ᔪᐊᓇᓯᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᓗ ᓂᑯᑎᒨᓯᓗ 1 ᐊᖑᑎᑕᖃᓚᐅᕐᐳᖅ ᐹᕆᓯᐅᖃᑕᐅᔪᒥᒃ, ᓂᑯᑎᒨᓯᒥᒃ ᐊᑎᓕᖕᒥᒃ, ᔫᑎᓄᑦ ᐊᖓᔪᖅᑲᐅᖃᑕᐅᔪᖅ. 2 ᑖᓐᓇ ᐅᓐᓄᐊᒃᑯᑦ ᔩᓱᓯᒧᐊᕐᐳᖅ ᐅᖃᐅᑎᓪᓗᒍ, “ᐊᔪᕆᕐᑐᐃᔩ, ᖃᐅᔨᒪᕗᒍᑦ ᒎᑎᒥᑦ ᐱᓯᒪᓪᓗᑎᑦ ᐊᔪᕆᕐᑐᐃᔨᐅᒐᕕᑦ; ᐃᓕᒃᑐᑦ ᑕᑕᓐᓇᕐᑐᓂᒃ ᐱᔪᖃᕈᓐᓇᖏᒻᒪᑦ, ᒎᑎᐅᑉ ᓇᔪᖏᑉᐸᒍ.” 3 ᔩᓱᓯᐅᑉ ᑭᐅᕚ, “ᓱᓕᑦᓯᐊᕐᑐᒥᒃ ᐅᖃᐅᑎᕙᒋᑦ, ᓄᑖᒥᒃ ᐃᕐᓂᐊᖑᖏᑦᑑᑉ, ᒎᑎᐅᑉ ᐊᑕᓂᐅᕕᖓ ᑕᑯᔪᓐᓇᓐᖏᓛ.” 4 ᓂᑯᑎᒨᓯᐅᑉ ᐅᖃᐅᑎᕚ, “ᖃᓄᖅ ᐃᓄᒃ ᐱᕈᕇᕐᓯᒪᓕᕐᓗᓂ ᐃᕐᓂᐊᖑᒃᑲᓐᓂᕈᓐᓇᕐᐹ? ᐊᓈᓇᒥ ᐃᒡᓕᐊᖓᓄᑦ ᐃᑎᒃᑲᓐᓂᕈᓐᓇᕐᐹ ᐃᕐᓂᐊᖑᒃᑲᓐᓂᕐᓗᓂᓗ?” 5 ᔩᓱᓯᐅᑉ ᑭᐅᕚ, “ᓱᓕᑦᓯᐊᕐᑐᒥᒃ ᐅᖃᐅᑎᕙᒋᑦ, ᓄᑖᒥᒃ ᐃᕐᓂᐊᖑᖏᑦᑐᖅ ᐃᒪᕐᒧᑦ ᐊᓂᕐᓂᕐᒧᓪᓗ ᐃᑦᔪᕐᓁᑦᑐᒧᑦ, ᒎᑎᐅᑉ ᐊᑕᓂᐅᕕᖓᓄᑦ ᐃᑎᕈᓐᓇᓐᖏᓚᖅ. 6 ᑎᒥᒥᑦ ᐃᕐᓂᐊᖑᔪᖅ ᐃᓄᑐᐃᓐᓇᐅᕗᖅ ᑎᒥᖃᕐᓗᓂ, ᐊᓂᕐᓂᕐᒥᓪᓕ ᐃᕐᓂᐊᖑᔪᖅ ᐊᓂᕐᓂᒃᑯᑦ ᐃᓅᓕᕐᐳᖅ. 7 ᑲᒪᓂᐊᕈᑎᒋᓇᒍ ᐅᖃᐅᑎᒐᒃᑭᑦ, ᐃᓘᓐᓇᓯ ᐃᕐᓂᐊᖑᒃᑲᓐᓂᕆᐊᖃᕐᐳᓯ. 8 ᐊᓄᕆ ᓇᒧᑐᐃᓐᓇᖅ ᐊᓄᕌᕐᕕᒋᔪᒪᔭᒥᓄᑦ ᐊᓄᕌᕐᐸᒃᐳᖅ; ᓱᓗᒃᓱᕐᓂᖓ ᑐᓵᒐᓗᐊᕐᐸᑦ, ᖃᐅᔨᒪᓐᖏᓚᑎᓪᓕ ᓇᑭᑦ ᐱᖕᒪᖔᑦ ᓇᒧᓪᓗ ᐂᖕᒪᖔᑦ; ᑍᒤᒃᑭᕗᑦᑕᐅᖅ ᐊᓂᕐᓂᕐᒥᑦ ᐃᕐᓂᐊᖑᔪᑦ.” 9 ᓂᑯᑎᒨᓯᐅᑉ ᐅᖃᐅᑎᕚ, “ᖃᓄᕐᓕ ᑕᒪᓐᓇ ᑍᒤᒍᓐᓇᕐᐹ?” 10 ᔩᓱᓯᐅᑉ ᑭᐅᕚ, “ᐃᓴᕆᐊᓔᑎᓂ ᐊᔪᕆᕐᑐᐃᔨᐅᕖᑦ, ᑕᒪᓐᓇᓗ ᖃᐅᔨᒪᓇᒍ? 11 ᓱᓕᑦᓯᐊᕐᑐᒥᒃ ᐅᖃᐅᑎᕙᒋᑦ, ᖃᐅᔨᒪᔭᑦᑎᓐᓂᒃ ᐅᖃᓲᖑᕗᒍᑦ, ᑕᑯᓚᐅᕐᑕᑦᑎᓐᓂᒡᓗ ᐅᓂᒃᑳᕐᓗᑕ; ᐅᖃᐅᓯᕆᔭᑦᑎᓐᓂᒡᓕ ᐅᒃᐱᓐᖏᓚᓯ. 12 “ᓄᓇᐅᑉ ᐱᖏᓐᓂᒃ ᐅᖃᐅᓯᖃᕐᑎᓪᓗᖓ ᐅᒃᐱᕈᓱᖏᒃᑯᕕᑦ; ᖃᓄᕐᓕ ᐅᒃᐱᕈᓱᒃᑲᔭᕐᐲᑦ ᕿᓚᐅᑉ ᐱᖏᓐᓂᒃ ᐅᖃᐅᑎᒐᔭᕈᒃᑭᑦ? 13 ᕿᓚᓕᐊᕐᑐᖃᓚᐅᕐᓯᒪᓐᖏᓚᖅ, ᕿᓚᖕᒥᑦ ᐊᖅᑲᕐᑐᖅ ᑭᓯᒥ, ᑕᕝᕙ ᐃᓅᑉ ᐃᕐᓂᖓ. 14 “ᓲᕐᓗ ᒨᓯᓯᐅᑉ ᖁᒡᓗᒋᐊᓐᖑᐊᖅ ᓇᑉᐸᕐᑎᓚᐅᕐᒪᒍ ᐃᓄᖃᖏᑦᑐᒥ, ᑍᒫᒃᑕᐅᖅ ᐃᓅᑉ ᐃᕐᓂᖓ ᓇᑉᐸᕐᑕᐅᔭᕆᐊᖃᕐᐳᖅ, 15 ᑭᓇᑐᐃᓐᓇᖅ ᐅᒃᐱᕐᑐᖅ ᑖᑦᓱᒧᖓ ᐃᓅᓯᖃᓕᖁᓪᓗᒍ ᓄᖑᓱᐃᑦᑐᒥᒃ. 16 ᒎᑎᐅᑉ ᓯᓚᕐᔪᐊᕐᒥᐅᑦ ᓇᒡᓕᒋᓪᓚᕆᒃᑲᒥᒋᑦ ᐃᕐᓂᑐᐊᓂ ᑐᓂᓚᐅᕐᐹ, ᑕᒪᕐᒥᒃ ᑖᑦᓱᒧᖓ ᐅᒃᐱᕐᑐᑦ ᐊᓯᐅᖁᓇᒋᑦ ᓄᖑᓱᐃᑦᑐᒥᒡᓕ ᐃᓅᓯᖃᖁᓪᓗᒋᑦ. 17 ᒎᑎᐅᑉ ᐃᕐᓂᓂ ᑎᓕᓚᐅᖏᒻᒪᒍ ᓯᓚᕐᔪᐊᕐᒧᑦ, ᓯᓚᕐᔪᐊᕐᒥᐅᓂᒃ ᐃᒋᑕᒃᓴᓐᖑᕐᑎᑦᓯᖁᓗᒍ, ᓯᓚᕐᔪᐊᕐᒥᐅᓪᓕ ᐱᐅᓕᔭᐅᖁᓪᓗᒋᑦ ᑖᑦᓱᒨᓇ. 18 “ᓇᓪᓕᐊᑦ ᑖᑦᓱᒧᖓ ᐅᒃᐱᕐᑐᑦ ᐃᖅᑲᕐᑐᕐᑕᐅᓐᖏᓚᑦ; ᓇᓪᓕᐊᓪᓕ ᑖᑦᓱᒧᖓ ᐅᒃᐱᖏᑦᑐᑦ ᐃᖅᑲᕐᑐᕐᑕᐅᓕᕇᕐᐳᑦ, ᒎᑎᐅᑉ ᐃᕐᓂᑐᐊᖓᑕ ᐊᑎᖓᓄᑦ ᐅᒃᐱᖏᓐᓇᒥᒃ. 19 ᐃᖅᑲᕐᑐᕐᑕᐅᓂᖅ ᐃᒤᓕᖓᕗᖅ, ᖃᐅᒪᔪᖅ ᓯᓚᕐᔪᐊᕐᒧᑦ ᑎᑭᓯᒪᕗᖅ, ᐃᓄᐃᑦ ᑖᕐᔪᐊᖅ ᐅᖓᒋᓂᕐᓴᕆᕚᑦ ᖃᐅᒪᔪᒥᑦ, ᐱᓂᐊᕐᓂᖏᑦ ᐱᐅᖏᑦᑐᓕᓂᐅᖕᒪᑕ. 20 ᐱᐅᖏᑦᑐᓕᔫᑉ ᖃᐅᒪᔪᖅ ᐆᒥᒋᕚ, ᖃᐅᒪᔪᒧᐊᕈᒪᓇᓂᓗ, ᐱᐅᖏᑦᑐᓕᓂᖏᑦ ᓴᖅᑭᑎᑕᐅᖁᓇᒋᑦ ᖃᐅᒪᔪᒧᑦ. 21 ᓱᓕᔪᒥᒡᓕ ᐱᓂᐊᕐᓂᖃᕐᑐᖅ ᖃᐅᒪᔪᒧᐊᕐᐳᖅ, ᐱᓂᐊᕐᓂᖏᑦ ᓴᖅᑭᑎᑕᐅᑦᓯᐊᖁᓪᓗᒋᑦ ᖃᐅᒪᔪᒧᑦ ᒎᑎᒥᑦ ᐱᓯᒪᖕᒪᑕ.” ᔪᐊᓇᓯ ᐹᑉᑎᑎᕆᔨᐅᑉ ᓇᓗᓁᕐᓯᓂᖓ ᔩᓱᓯᒥᒃ 22 ᑕᒪᑐᒪ ᑭᖑᕐᖓᒍᑦ ᔩᓱᓯ ᐃᓕᓐᓂᐊᕐᑎᖏᓪᓗ ᔫᑎᐊᒧᐊᕐᐳᑦ; ᑕᕝᕙᓂ ᐱᓇᓱᐊᖃᑎᒋᕔᑦ ᐹᑉᑎᑦᓯᓪᓗᓂᓗ. 23 ᔪᐊᓇᓯᑦᑕᐅᖅ ᐹᑉᑎᑦᓯᕗᖅ ᓄᓇᒥ ᐂᓇᓂᒥ ᓴᓕᒻᒥᐅᑉ ᖃᓂᒋᔭᖓᓃᑦᑐᒥ, ᑕᕝᕙᓂ ᐃᒪᖃᕐᒪᑦ ᐊᒥᒐᖏᑦᑐᒥᒃ; ᐃᓄᐃᓪᓗ ᑕᕝᕗᓐᖓᕐᐳᑦ ᐹᑉᑎᑕᐅᓪᓗᑎᒡᓗ. 24 ᔪᐊᓇᓯ ᓱᓕ ᑎᒍᔭᐅᓚᐅᕐᑎᓐᓇᒍ. 25 ᔫᑎᓪᓕ ᐃᓚᖓᑦ ᔪᐊᓇᓯᐅᑉ ᐃᓕᓐᓂᐊᕐᑎᖏᓐᓂᒃ ᐂᕙᖃᑎᖃᓕᕐᐳᖅ ᐅᒃᐱᕐᓂᒃᑯᑦ ᓴᓗᒻᒪᕐᑕᐅᓂᕐᒥᒃ ᐱᑦᔪᑎᖃᕐᓗᑎᒃ. 26 ᑕᕝᕙ ᐃᓕᓐᓂᐊᕐᑎᖏᑕ ᔪᐊᓇᓯ ᐅᐸᒃᐹᑦ ᐅᖃᐅᑎᓪᓗᒍᓗ, “ᐊᔪᕆᕐᑐᐃᔩ, ᐊᖑᑦ ᔪᐊᕐᑕᓂᐅᑉ ᑰᖓᑕ ᐊᑭᐊᓂ ᐃᓕᖕᓄᐊᓚᐅᕐᑐᖅ, ᐅᖃᐅᓯᕆᖃᑦᑕᕐᑍᑦ, ᑖᓐᓇ ᐹᑉᑎᑦᓯᖃᑦᑕᓕᕐᐳᖅ, ᐃᓄᓕᒫᓪᓗ ᑖᑦᓱᒧᓐᖓᖃᑦᑕᓕᕐᐳᑦ.” 27 ᔪᐊᓇᓯᐅᑉ ᑭᐅᕔᑦ, “ᐃᓄᒃ ᓇᓪᓕᐊᑦ ᐃᒻᒥᓃᓐᓇᖅ ᐱᑖᕈᓐᓇᓐᖏᓚᖅ ᒎᑎᐅᑉ ᑐᓂᓯᕕᒋᒃᐸᒍ ᑭᓯᐊᓂ ᐱᓂᐊᕈᓐᓇᕐᐳᖅ. 28 ᐃᓕᑦᓯ ᓇᖕᒥᓂᖅ ᖃᐅᔨᒪᔨᒋᕙᑦᓯ ᐅᖃᓚᐅᕋᒪ, ‘᙭ᔅᑑᓯᐅᓐᖏᓚᖓ, ᑎᓕᔭᐅᓯᒪᕗᖓᓕ ᑖᑦᓱᒪᓐᖓᑦ ᓯᕗᓕᐅᖁᓪᓗᖓ.’ 29 ᐅᐃᒃᓴᖅ ᑖᓐᓇᐅᕗᖅ ᓄᓕᐊᒃᓴᒥᒃ ᓇᖕᒥᓂᓕᒃ; ᐅᐃᒃᓴᐅᓪᓕ ᐱᖃᓐᓇᕆᔭᖓᑕ, ᓴᓂᐊᓂ ᓇᖏᕐᑑᑉ ᑐᓴᕐᑑᓪᓗ, ᖁᕕᐊᓱᒍᑎᒋᕚ ᐅᐃᒃᓴᐅᑉ ᓂᐱᖓᓂᒃ ᑐᓴᕋᒥ; ᑍᒫᒃ ᑕᕝᕙ ᐅᕙᖓ ᓇᖕᒥᓂᖅ ᖁᕕᐊᓱᖕᓂᕋ ᓈᒻᒪᒃᓯᑦᓯᐊᕐᐳᖅ. 30 ᑖᓐᓇ ᐊᖏᒃᓕᕙᓪᓕᐊᔭᕆᐊᖃᕐᐳᖅ, ᐅᕙᖓᓕ ᒥᑭᒡᓕᕙᓪᓕᐊᔭᕆᐊᖃᕐᐳᖓ.” ᑖᓐᓇ ᑕᕝᕙ ᕿᓚᖕᒥᑦ ᑎᑭᑦᑐᖅ 31 ᑕᑉᐹᓐᖓᑦ ᑎᑭᑦᑐᖅ ᑕᒤᓐᓂᒃ ᐱᓪᓚᕆᐅᓂᕐᐸᐅᕗᖅ; ᓄᓇᒥᑦ ᐱᔪᖅ ᓄᓇᒥᐅᑕᐅᕗᖅ, ᓄᓇᐅᓪᓗ ᐱᖏᓐᓂᒃ ᐅᖃᐅᓯᖃᕐᓗᓂ, ᕿᓚᖕᒥᓪᓕ ᑎᑭᑦᑐᖅ ᑕᒤᓐᓂᑦ ᐱᓪᓚᕆᐅᓂᕐᐸᐅᕗᖅ. 32 ᑕᑯᓚᐅᕐᑕᒥᓂᒃ ᑐᓴᓚᐅᕐᑕᒥᓂᒡᓗ ᐅᖃᐅᓯᖃᕐᐳᖅ, ᓇᓪᓕᐊᑦᑕᓘᓐᓃᓪᓕ ᑖᑦᓱᒪ ᐅᖃᐅᓯᕆᔭᖏᑦ ᐃᓚᓕᐅᓐᖏᓔᑦ. 33 ᓇᓪᓕᐊᑦ ᑖᑦᓱᒪ ᐅᖃᐅᓯᖏᓐᓂᒃ ᐃᓚᓕᐅᕐᓯᔪᖅ ᖁᓚᕐᓇᖏᑦᑐᒥᒃ ᖃᐅᔨᕗᖅ, ᒎᑎᐅᑉ ᓱᓕᑦᓯᐊᕐᓂᖓᓂᒃ. 34 ᒎᑎᐅᑉ ᑎᓕᓯᒪᔭᖓ ᒎᑎᐅᑉ ᐅᖃᐅᓯᖏᓐᓂᒃ ᐅᖃᐅᓯᖃᕐᐳᖅ, ᒎᑎᐅᑉ ᐊᓂᕐᓂᕐᒥᓂᒃ ᑐᓂᓯᕕᒋᖕᒪᒍ ᐊᒥᒐᖏᑦᑐᒥᒃ; 35 ᐊᑖᑕᐅᑉ ᐃᕐᓂᓂ ᓇᒡᓕᒋᕚ, ᑕᒤᑦᑕᓗ ᑐᓂᓚᐅᕐᐰᑦ ᑖᑦᓱᒪ ᐱᔪᓐᓇᕐᓂᖓᓄᑦ. 36 ᓇᓪᓕᐊᑦ ᑖᑦᓱᒪ ᐃᕐᓂᖓᓄᑦ ᐅᒃᐱᕐᑐᖅ ᐃᓅᓯᕐᒥᒃ ᓄᖑᓱᐃᑦᑐᒥᒃ ᐱᖃᕐᐳᖅ; ᓇᓪᓕᐊᓪᓕ ᑖᑦᓱᒪ ᐃᕐᓂᖓᓂᒃ ᐃᓚᓕᐅᕐᓯᖏᑦᑐᖅ ᐃᓅᓯᕐᒥᒃ ᑕᑯᓂᐊᓐᖏᓚᖅ, ᒎᑎᐅᓪᓕ ᓂᓐᖓᐅᓯᖓᑕ ᖁᓚᖏᐊᖏᓐᓇᕐᐹ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society