ᔪᐊᓇᓯᐅᑉ ᐊᒡᓚᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓗᕕᐅᑉ ᐃᓄᖃᕈᓐᓃᕐᓂᖓ

¹ ᐅᓪᓛᒪᕆᒃᑯᑦ ᐱᓇᓱᐊᕈᓯᐅᑉ ᐅᓪᓗᖏᑕ ᓯᕗᓪᓕᕐᐹᖓᓂ, ᓱᓕ ᑖᕐᑎᓪᓗᒍ, ᒥᐊᕆ ᒫᒃᑕᓖᓂ ᐃᓗᕕᕐᒧᐊᕐᐳᖅ, ᑕᑯᓪᓗᓂᓗ ᐅᔭᕌᓗᒃ ᐃᓗᕕᐅᑉ ᐹᖓᓂᑦ ᐲᕐᑕᐅᓯᒪᓂᖓᓂᒃ.

² ᑕᕝᕙ ᐅᓪᓚᒃᓯᕗᖅ ᓮᒨᓂ ᐲᑦᑐᕉᓯᒧᑦ ᐃᓕᓐᓂᐊᕐᑎᒧᓪᓗ ᐂᓪᓗᓂ, ᔩᓱᓯᐅᑉ ᓇᒡᓕᒋᔭᖓᓄᑦ, ᐅᖃᐅᑎᓪᓗᒋᒃ, “ᐊᑕᓂᖅ ᐊᓐᓂᑦᔭᐅᓐᓂᕐᒪᑦ ᐃᓗᕕᕐᒥᑦ, ᖃᐅᔨᒪᓐᖏᓚᕗᑦ ᓇᒧᓐᖓᕐᑕᐅᓐᓂᕐᒪᖔᑦ.”

³ ᑕᕝᕙ ᐲᑦᑐᕉᓯ ᐃᓕᓐᓂᐊᕐᑎᓗ ᐊᓂᕘᒃ, ᐃᓗᕕᕐᒧᑦ ᐂᓕᕐᓗᑎᒃ.

⁴ ᐅᓪᓚᒡᓗᑎᒃ ᐃᓗᕕᕐᒧᑦ, ᐃᓕᓐᓂᐊᕐᑎᓕ ᐲᑦᑐᕉᓯᒥᑦ ᓱᒃᑲᓂᕐᓴᐅᒐᒥ ᓯᕗᓪᓕᐅᓪᓗᓂ ᐃᓗᕕᕐᒧᑦ ᑎᑭᑉᐳᖅ;

⁵ ᐃᓗᐊᓄᑦ ᐃᑦᓱᐊᕋᒥ, ᑕᑯᕗᖅ ᖃᓪᓗᓈᕐᑕᓂᒃ ᓵᑦᑐᓂᒃ ᑕᒫᓃᕐᕆᔪᓂᒃ, ᐃᑎᕋᓂᓕ ᐃᓗᐊᓄᑦ.

⁶ ᓮᒨᓂ ᐲᑦᑐᕉᓯᓕ ᑭᖑᓪᓕᐅᓪᓗᓂ ᑎᑭᓐᓇᒥ, ᑲᑦᑐᕋᓂ ᐃᓗᕕᕐᒧᑦ ᐃᑎᕐᐳᖅ; ᑕᑯᓪᓗᓂᓗ ᖃᓪᓗᓈᕐᑕᓂᒃ ᓵᑦᑐᓂᒃ ᑕᒫᓃᕐᕆᔪᓂᒃ.

⁷ ᖃᓪᓗᓈᕐᑕᖅ ᔩᓱᓯᐅᑉ ᓂᐊᖁᐊᓄᑦ ᐃᒻᒧᑎᐅᓚᐅᕐᑐᖅ, ᑖᒃᑯᓄᖓ ᖃᓪᓗᓈᕐᑕᓄᑦ ᐃᒻᒧᑎᕕᓂᕐᓄᑦ ᐃᓚᒋᔭᐅᓇᓂ, ᐃᒻᒥᒍᓪᓕ ᐃᒧᓯᒪᕗᖅ ᑲᑎᒪᔭᐅᓇᓂ.

⁸ ᑕᕝᕙ ᐃᓕᓐᓂᐊᕐᑎ, ᐃᓗᕕᕐᒧᑦ ᑎᑭᖅᑳᓚᐅᕐᑐᖅ, ᐃᑎᕆᕗᖅ; ᑕᑯᓪᓗᓂᓗ ᐅᒃᐱᕐᐳᖅ;

⁹ ᐊᒡᓔᑦ ᓱᓕ ᖃᐅᔨᒪᖏᓐᓇᒥᒋᑦ ᐅᖃᕐᑐᑦ, ᑐᖁᖓᔪᓂᑦ ᒪᑭᑦᑕᕆᐊᖃᕐᓂᖓᓂᒃ.

¹⁰ ᑕᕝᕙ ᐃᓕᓐᓂᐊᕐᑏᒃ ᐅᑎᕐᓗᑎᒃ ᐊᖏᕐᕋᕐᐴᒃ.

ᔩᓱᓯᐅᑉ ᓴᖅᑭᓐᓂᖓ ᒥᐊᕆ ᒫᒃᑕᓖᓂᒧᑦ

¹¹ ᒥᐊᕆ ᐃᓗᕕᐅᑉ ᓯᓚᑖᓂ ᓇᖏᕐᓗᓂ ᕿᐊᕗᖅ, ᓱᓕᓕ ᕿᐊᓪᓗᓂ, ᐃᓗᕕᕐᒧᑦ ᐃᑦᑐᐊᕐᐳᖅ.

¹² ᑕᑯᓪᓗᓂᓗ ᐂᖏᓖᖕᓂᒃ ᒪᕐᕉᖕᓂᒃ ᖃᑯᕐᑖᖕᓂᒃ ᐊᓐᓄᕌᕐᓯᒪᔫᖕᓂᒃ, ᔩᓱᓯᐅᑉ ᑎᒥᖓᑕ ᐃᓂᒋᓚᐅᕐᑕᖓᓂ ᐃᒃᓯᕙᔫᖕᓂᒃ, ᐂᑉᐹ ᓂᐊᖁᐊᑕ ᓇᓛᓃᑦᑐᖅ, ᐂᑉᐸᖓᓗ ᐃᑎᒐᖏᑕ ᓇᓛᓃᓪᓗᓂ.

¹³ ᑖᒃᑯᐊᒃ ᒥᐊᕆ ᐊᐱᕆᕚᒃ, “ᐊᕐᓈᖅ ᓱᖕᒪᑦ ᕿᐊᕕᑦ?” ᒥᐊᕆ ᑭᐅᕗᖅ, “ᐊᑕᓂᕋ ᐊᓐᓂᑦᔭᐅᓐᓂᕐᒪᑦ, ᖃᐅᔨᒪᓐᖏᓚᖓᓗ ᓇᒧᓐᖓᕐᑕᐅᓐᓂᕐᒪᖔᑦ.”

¹⁴ ᑍᒫᒡᓗ ᐅᖃᕇᕋᒥ ᑐᓄᒻᒧᑦ ᕿᕕᐊᕐᐳᖅ; ᔩᓱᓯ ᑕᑯᕚ ᓇᖏᕐᑐᖅ, ᖃᐅᔨᒪᓐᖏᓛ ᔩᓱᓯᐅᖕᒪᖔᑦ.

¹⁵ ᔩᓱᓯᐅᑉ ᐊᐱᕆᕚ, “ᐊᕐᓈᖅ ᓱᖕᒪᑦ ᕿᐊᕕᑦ? ᑭᓇᒥᒡᓗ ᕿᓂᕐᐲᑦ?” ᒥᐊᕆᐅᑉ ᐱᕈᕐᓰᕕᓕᕆᔨᐅᓇᓱᒋᒐᒥᐅᒃ, ᐅᖃᐅᑎᕚ, “ᑕᕝᕙᓐᖓᑦ ᐊᓐᓂᓯᓐᓂᕈᕕᐅᒃ, ᐅᖃᐅᑎᓚᐅᓐᖓ ᓇᒧᓐᖓᕐᓂᕐᒪᖔᕐᐱᐅᒃ, ᐂᓂᐊᕋᒃᑯ.”

¹⁶ ᔩᓱᓯᐅᑉ ᐅᖃᐅᑎᕚ, “ᒥᐊᕆ.” ᕿᕕᐊᕐᓗᓂᐅᒡᓗ ᐅᖃᕐᐳᖅ ᐄᑉᕉᑎᑐᑦ, “ᕌᐳᓁ!” ᑐᑭᓕᒃ: “ᐊᔪᕆᕐᑐᐃᔩ!”

¹⁷ ᔩᓱᓯᐅᑉ ᐅᖃᐅᑎᕚ, “ᐊᒃᑐᕐᓂᐊᕐᓇᖓ, ᓱᓕ ᑕᑉᐸᐅᓐᖓᓚᐅᖏᓐᓇᒪ ᐊᑖᑕᓐᓄᑦ; ᐃᓅᖃᑎᒃᑲᓕ ᐅᐸᓕᒃᑭᑦ ᐅᖃᐅᑎᓗᒋᑦ, ᑕᑉᐸᐅᓐᖓᕐᓂᐊᕐᐳᖓ ᐊᑖᑕᓐᓄᑦ ᐊᑖᑕᑦᓯᓐᓄᓪᓗ, ᒎᑎᓐᓄᑦ ᒎᑎᑦᓯᓐᓄᓪᓗ.”

¹⁸ ᑕᕝᕙ ᒥᐊᕆ ᒫᒃᑕᓖᓂ ᐅᑎᓕᕐᐳᖅ; ᐃᓕᓐᓂᐊᕐᑏᓪᓗ ᐅᖃᐅᑎᕔᑦ, “ᐊᑕᓂᖅ ᑕᑯᓚᐅᕐᐸᕋ”; ᐅᖃᐅᑎᓪᓗᒋᑦ ᐅᖃᐅᓯᕆᓚᐅᕐᑕᖏᓐᓂᒃ.

ᔩᓱᓯ ᓴᖅᑭᓐᓂᖓ ᐃᓕᓐᓂᐊᕐᑎᒥᓄᑦ

¹⁹ ᐅᓪᓗᒥ ᑕᕝᕙᓂ ᐅᓐᓄᓕᕐᑎᓪᓗᒍ, ᐱᓇᓱᐊᕈᓯᐅᑉ ᓯᕗᓪᓕᕐᐹᖓᓂ, ᐃᓕᓐᓂᐊᕐᑏᑦ ᑲᑎᒪᓪᓗᑎᒃ ᐅᒃᑯᐊᑦ ᐊᑦᑐᖏᕐᓯᒪᓚᐅᕐᐳᑦ, ᔫᑎᓂᒃ ᓯᕘᕋᒐᒥᒃ, ᔩᓱᓯ ᓴᖅᑭᑉᐳᖅ ᐊᑯᕐᖓᓐᓂᓗ ᓇᖏᕐᓗᓂ, ᐅᖃᕐᐳᖅ, “ᓮᒪᓂᐅᑉ ᐃᓚᒋᓕᓯ.”

²⁰ ᑍᒫᒡᓕ ᐅᖃᕇᕋᒥ, ᐊᒡᒐᓂ ᓴᓂᕋᓂᓗ ᑕᑯᔭᐅᑎᑉᐰᑦ ᑖᒃᑯᓄᖓ. ᐃᓕᓐᓂᐊᕐᑏᓪᓗ ᖁᕕᐊᓱᓕᕐᐳᑦ ᐊᑕᓂᖅ ᑕᑯᒐᒥᑦᔪᒃ.

²¹ ᔩᓱᓯᐅᑉ ᐅᖃᐅᑎᒃᑲᓐᓂᕐᐰᑦ, “ᓮᒪᓂᐅᑉ ᐃᓚᒋᓕᓯ. ᓲᕐᓗ ᐊᑖᑕᐅᑉ ᑎᓕᓚᐅᕐᒪᖓ, ᑍᒫᒃᑕᐅᖅ ᑎᓕᒋᕙᑦᓯ.”

²² ᑍᒫᒡᓗ ᐅᖃᕇᕋᒥ, ᓱᐴᕐᕕᒋᕔᑦ, ᐅᖃᐅᑎᓪᓗᒋᓪᓗ, “ᐊᓂᕐᓂᖅ ᐃᑦᔪᕐᓁᑦᑐᖅ ᐱᒋᓕᕐᓯᐅᒃ.

²³ ᓇᓪᓕᐊᑦᑕ ᐊᔪᕐᓂᖏᑦ ᐃᓱᒪᒋᔪᓐᓁᕐᑕᓯ, ᑖᒃᑯᐊ ᐃᓱᒪᒋᔪᓐᓁᕐᑕᐅᕗᑦ; ᓇᓪᓕᐊᑦᑕᓕ ᐊᔪᕐᓂᖏᑦ ᐃᓱᒪᒋᔪᓐᓁᓐᖏᑕᓯ, ᑖᒃᑯᐊ ᐃᓱᒪᒋᔪᓐᓁᕐᑕᐅᓐᖏᓚᑦ.”

ᔩᓱᓯ ᑑᒪᓯᓗ

²⁴ ᑑᒪᓯᐅᓪᓕ 12 ᐃᓚᖓᑦᑕ, ᒪᕐᕈᓕᐊᕕᓂᕐᒥᒃ ᑍᔭᐅᔫᑉ ᐃᓚᒋᓚᐅᓐᖏᓔᑦ ᔩᓱᓯ ᑎᑭᑎᓪᓗᒍ.

²⁵ ᑕᕝᕙ ᐃᓕᓐᓂᐊᕐᑏᑦ ᑑᒪᓯ ᐅᖃᐅᑎᕚᑦ, “ᐊᑕᓂᖅ ᑕᑯᓚᐅᕐᐸᕗᑦ.” ᑑᒪᓯᐅᓪᓕ ᐅᖃᐅᑎᕔᑦ, “ᐊᒡᒐᖏᓐᓂ ᑭᑭᐊᒃᑐᕐᑕᐅᓂᖏᑦ ᑕᑯᖏᒃᑯᒃᑭᑦ, ᑎᑭᕋᓗ ᑭᑭᐊᒃᑐᕐᑕᐅᓂᖏᓐᓄᑦ ᐃᓕᖏᒃᑯᒃᑯ, ᓴᓂᕋᖓᓗ ᐊᒃᑐᖏᒃᑯᒃᑯ ᐅᐱᕈᓱᓕᑦᔮᓐᖏᓚᖓ.”

²⁶ ᐅᓪᓗᐃᑦ ᓯᑕᒪᐅᔪᕐᑐᑦ ᐊᓂᒍᕐᑎᓪᓗᒋᑦ, ᐃᓕᓐᓂᐊᕐᑏᑦ ᑲᑎᒪᓕᕆᕗᑦ ᐃᒡᓗᒥ, ᑑᒪᓯᐅᑉ ᐃᓚᒋᕔᑦ. ᐅᒃᑯᐊᑦ ᐊᑦᑐᖏᕐᓯᒪᑎᓪᓗᒋᑦ, ᔩᓱᓯ ᓇᔪᕐᑕᖓᓐᓄᐊᕐᐳᖅ ᐊᑯᕐᖓᓂᓗ ᓇᖏᕐᓗᓂ ᐅᖃᕐᐳᖅ, “ᓮᒪᓂᐅᑉ ᐃᓚᒋᓕᓯ.”

²⁷ ᑕᕝᕙ ᑑᒪᓯᒧᑦ ᐅᖃᕐᐳᖅ, “ᑎᑮᑦ ᐅᕗᖓ ᐃᓕᒍᒃ, ᐊᒡᒐᒃᑲᓗ ᑕᑯᓕᒃᑭᑦ; ᐊᒡᒐᑎᓪᓗ ᐃᓴᒃᓗᒋᑦ ᓴᓂᕋᕋ ᐊᒃᑐᓕᕈᒃ; ᐅᒃᐱᖏᓐᓇᒃ, ᐅᒃᐱᕆᓪᓕ.”

²⁸ ᑑᒪᓯᐅᑉ ᑭᐅᕚ, “ᐊᑕᓂᕋ, ᒎᑎᒐᓗ!”

²⁹ ᔩᓱᓯᐅᑉ ᐅᖃᐅᑎᕚ, “ᐅᒃᐱᓕᕐᐲᑦ ᑕᑯᒐᕕᖓ ᑭᓯᐊᓂ? ᓮᒪᓇᕐᑐᒦᐳᑦ ᑕᑯᓚᐅᕋᑎᒃ ᐅᒃᐱᕐᑐᑦ.”

ᑎᑎᕋᕐᑕᐅᑦᔪᑎᒋᔭᖏᑦ ᑖᒃᑯᐊ ᐊᒡᓚᒃᓯᒪᔪᑦ

³⁰ ᐃᓕᓐᓂᐊᕐᑎᖏᑕᓕ ᑕᒃᑯᐊᓂ ᔩᓱᓯ ᓱᓕ ᐊᒥᓱᓂᒃ ᓇᓗᓁᒃᑯᑕᕐᓂᒃ ᐱᓇᓱᐊᖃᑦᑕᓚᐅᕐᐳᖅ, ᐅᑯᓇᓂ ᐊᒡᓚᖕᓂ ᑎᑎᕋᕐᓯᒪᖏᑦᑐᓂᒃ.

³¹ ᑖᒃᑯᐊ ᑎᑎᕋᕐᓯᒪᕗᑦ ᐅᒃᐱᓕᖁᓪᓗᓯ ᔩᓱᓯ ᙭ᔅᑑᓯᐅᖕᒪᑦ, ᒎᑎᐅᑉ ᐃᕐᓂᖓ. ᐅᒃᐱᕐᓂᑦᓯᒍᑦ ᐃᓅᓯᖃᖁᓪᓗᓯ ᑖᑦᓱᒨᓇ.