ᔪᐊᓇᓯᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦᑬᓇᒥ ᑲᑎᑎᑕᐅᔪᖃᕐᓂᖓ 1 ᐅᓪᓗᐃᑦ ᐱᖓᔪᖓᓐᓂ ᑬᓇᒥ ᒐᓕᓕᐊᒦᑦᑐᒥ ᑲᑎᑎᑕᐅᔪᖃᓚᐅᕐᐳᖅ, ᔩᓱᓯᐅᑉ ᐊᓈᓇᖓ ᑕᕝᕙᓃᑉᐳᖅ; 2 ᔩᓱᓯᑦᑕᐅᖅ ᕾᖁᔭᐅᓯᒪᒋᕗᑦ ᑲᑎᑎᑕᐅᔫᖕᓄᑦ, ᐃᓕᓐᓂᐊᕐᑎᖏᓪᓗ. 3 ᐅᐂᓃᑦ ᓄᖑᒻᒪᑕ, ᐊᓈᓇᖓᑕ ᔩᓱᓯ ᐅᖃᐅᑎᕚ, “ᐅᐂᓂᒥᒃ ᓄᖑᕈᑎᕗᑦ.” 4 ᔩᓱᓯᐅᑉ ᐅᖃᐅᑎᕚ, “ᐊᕐᓈᖅ, ᖃᓄᐃᓕᐅᖁᓗᖓ ᐅᖃᕆᐊᖃᓐᖏᓚᑎᑦ, ᐱᕕᒃᓴᕋ ᓱᓕ ᓇᓪᓕᐅᑎᓯᒪᖏᒻᒪᑦ.” 5 ᑕᕝᕙ ᔩᓱᓯᐅᑉ ᐊᓈᓇᖓᑕ ᐱᔩᑦ ᐅᖃᐅᑎᕔᑦ, “ᖃᓄᑐᐃᓐᓇᖅ ᐱᖁᔨᒃᐸᑦ ᒪᓕᖕᓂᐊᕐᐸᓯ.” 6 ᔫᑎᑦ ᒪᓕᒐᖃᕐᒪᑕ ᐅᒃᐱᕈᓯᑐᖃᕐᒥᒃᑎᒍᑦ ᓱᓇᑐᐃᓐᓁᑦ ᓴᓗᒻᒪᕐᓴᑕᐅᒋᐊᖃᕐᓂᖏᓐᓂᒃ, ᑍᒤᒻᒪᑦ ᐱᖓᓲᔪᕐᑐᓂᒃ ᐃᒥᖃᐅᑎᓂᒃ ᑕᕝᕙᓃᑦᑐᖃᕐᐳᖅ, ᐊᑐᓂᑦ ᐃᒪᖃᕈᓐᓇᕐᑐᓂᒃ ᐊᑕᐅᓯᖅ 20ᒥᑦ 30ᒧᑦ ᖃᓪᓗᑎᓂᒃ. 7 ᔩᓱᓯᐅᑉ ᐱᔩᑦ ᐅᖃᐅᑎᕔᑦ, “ᐅᑯᐊ ᐃᒥᖃᐅᑏᑦ ᐃᒥᕐᒥᒃ ᐃᒻᒥᕐᓯᐅᒃ.” ᑕᕝᕙ ᐃᒻᒥᕐᐰᑦ ᑕᑕᓪᓗᒋᑦ. 8 ᐅᖃᐅᑎᕔᑦ, “ᑕᕝᕙᓐᖓᑦ ᖃᓗᓯᓗᓯ, ᓂᕆᕕᒡᔪᐊᕐᑐᑦ ᐊᖓᔪᖅᑳᖓᓐᓄᑦ ᐋᑦᓯᓕᕆᑦᓯ.” ᑕᕝᕙ ᐋᑦᓯᕗᑦ ᑖᑦᓱᒧᖓ, 9 ᓂᕆᕕᒡᔪᐊᕐᑐᑦ ᐊᖓᔪᖅᑳᖓᑦᑕ ᐃᒥᖅ ᐆᒃᑐᕋᒥᐅᒃ ᐅᐂᓂᐅᓕᕐᑐᖅ, ᖃᐅᔨᒪᓚᐅᓐᖏᓚᖅ ᓇᑭᑦ ᐱᖕᒪᖔᑦ ᐱᔨᓪᓕ ᐃᒥᕐᒥᒃ ᖃᓗᓯᖅᑲᐅᔪᑦ ᖃᐅᔨᒪᕗᑦ, ᓂᕆᕕᒡᔪᐊᕐᑐᑦ ᐊᖓᔪᖅᑳᖓᑦᑕ ᐅᐃᒃᓴᖅ ᕾᖁᕚ 10 ᐅᖃᐅᑎᓪᓗᒍ, “ᐱᐅᓯᕆᔭᐅᓲᖑᕗᖅ ᐅᐂᓂ ᒪᒪᕐᓂᕐᐹᖅ ᓯᕗᓪᓕᐅᑎᓪᓗᒍ; ᓂᕆᔭᕐᑐᕐᓯᒪᔪᓪᓕ ᐃᒥᕇᕐᓯᒪᓕᕐᐸᑕ, ᑭᖑᓕᐅᑎᓪᓗᒍ ᐅᐂᓂ ᒪᒪᖏᓐᓂᕐᓴᖅ ᐊᑐᐃᓐᓇᕈᕐᑕᐅᓲᖑᕗᖅ; ᐃᕝᕕᓪᓕ ᐅᐂᓂ ᒪᒪᕐᓂᕐᐹᖅ ᑭᖑᓪᓕᐅᑎᖔᕐᐸᑦ.” 11 ᑕᒪᑦᔭ ᔩᓱᓯᐅᑉ ᓇᓗᓁᒃᑯᑕᖏᑕ ᓯᕗᓪᓕᕐᐹᖓᑦ, ᐱᓂᐊᕐᓂᕆᓚᐅᕐᑕᖓ ᑬᓇᒥ ᒐᓕᓕᐊᒦᑦᑐᒥ, ᑕᕝᕙᓂ ᓂᕐᑐᕐᓇᕐᓂᕐᔪᐊᓂ ᓴᖅᑭᑎᓚᐅᕐᐹ; ᐃᓕᓐᓂᐊᕐᑎᖏᑕᓗ ᐅᒃᐱᕆᕚᑦ. 12 ᑕᒪᑐᒪ ᑭᖑᓂᖓᒍᑦ ᔩᓱᓯ, ᐊᓈᓇᖓᓗ, ᖃᑕᓐᖑᑎᖏᓪᓗ ᐃᓕᓐᓂᐊᕐᑎᖏᓪᓗ ᑲᐲᕐᓂᐊᒧᐊᕐᐳᑦ; ᑕᕝᕙᓃᑉᐳᓪᓗ ᐅᓪᓗᓂᒃ ᐅᓄᖏᑦᑐᓂᒃ. ᔩᓱᓯᐅᑉ ᑐᒃᓯᐊᕐᕕᒡᔪᐊᕐᒧᐊᕐᓂᖓ ᒫᑎᐅᓯ 21:12-13 ; ᒫᑯᓯ 11:15-17 ; ᓘᑲᓯ 19:45-46 13 ᔫᑎᑦ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᖓᑦ ᖃᒡᓕᓕᕐᒪᑦ, ᔩᓱᓯ ᔨᕉᓴᓕᒻᒧᐊᕐᐳᖅ. 14 ᑐᒃᓯᐊᕐᕕᒡᔪᐊᕐᒥᓗ ᐃᓄᖕᓂᒃ ᑕᑯᕗᖅ ᐃᒻᒧᒃᓯᐅᒊᑦ ᐸᖕᓂᖏᓐᓂᒃ ᓰᐱᓂᒡᓗ ᐊᕿᒡᒋᐅᔮᕐᑐᓂᒡᓗ ᓂᐅᕐᕈᑎᖃᕐᑐᓂᒃ, ᑮᓇᐅᔭᓂᒡᓗ ᑕᐅᕐᓰᔩᑦ ᐱᓇᓱᐊᕐᑎᓪᓗᒋᑦ ᐱᓇᓱᐊᒐᕐᒥᖕᓂᒃ. 15 ᐊᒃᖢᓈᒥᒃ ᑏᒐᕈᑎᓕᐅᕋᒥ, ᑕᕝᕙᓃᑦᑐᓕᒫᑦ ᐊᓂᑎᑉᐰᑦ, ᓰᐲᓪᓗ ᐃᒻᒧᒃᓯᐅᒊᓪᓗ ᐸᖕᓂᖏᑦ, ᑐᒃᓯᐊᕐᕕᒡᔪᐊᒥᑦ; ᑮᓇᐅᔭᓂᒡᓗ ᑕᐅᕐᓰᔩᑦ ᓵᖏᑦ ᐅᕐᕈᑎᑉᐰᑦ ᑮᓇᐅᔧᓪᓗ ᓈᕕᓪᓗᑎᒃ ᓇᒧᑐᐃᓐᓇᖅ. 16 ᐊᕿᒡᒋᐅᔭᓂᒡᓗ ᓂᐅᕐᕈᑎᓖᑦ ᐅᖃᐅᑎᕔᑦ, “ᐅᑯᐊ ᑕᕝᕙᓐᖓᑦ ᐊᓂᑎᓚᐅᕐᓯᐅᒃ; ᐊᑖᑕᒪ ᐃᒡᓗᖓ ᓂᐅᕕᕐᕕᐅᑎᑕᒃᓴᕆᓐᖏᓚᓯ.” 17 ᑕᕝᕙ ᐃᓕᓐᓂᐊᕐᑎᖏᑦ ᐃᖅᑬᕗᑦ ᑎᑎᕋᕐᓯᒪᔪᖃᕐᒪᑦ, “ᐃᒡᓗᖕᓄᑦ ᐃᓗᖏᕐᓲᑎᖃᕐᓂᕐᒪ ᐊᒃᓱᕈᕐᑎᓕᕐᐹᖓ.” 18 ᑕᕝᕙ ᔫᑎᑦ ᐊᖓᔪᖅᑳᖏᑕ ᐅᖃᐅᑎᕚᑦ, “ᖃᓄᖅ ᓇᓗᓁᒃᑯᑕᕐᒥᒃ ᓴᖅᑭᑎᑦᓯᔪᓐᓇᕐᐲᑦ ᐅᕙᑦᑎᓐᓄᑦ ᑍᒤᓕᐅᕈᓐᓇᕐᓂᕐᓄᑦ?” 19 ᔩᓱᓯᐅᑦ ᑭᐅᕔᑦ, “ᐅᓇ ᑐᒃᓯᐊᕐᕕᒡᔪᐊᖅ ᐊᓯᕈᕈᑦᓯᐅᒃ, ᐅᓪᓗᓂᒡᓗ ᐱᖓᓱᓂᒃ ᓇᑉᐸᕐᑎᑦᑐᒫᕐᐸᕋ.” 20 ᑕᕝᕙ ᔫᑎᑦ ᐅᖃᕐᐳᑦ, “ᐅᓈ ᑐᒃᓯᐊᕐᕕᒡᔪᐊᖅ ᓴᓇᔭᐅᓯᒪᔪᖅ ᐊᕐᕌᒍᓂᒃ 46ᓂᒃ, ᓇᑉᐸᕐᑎᑦᓱᓐᓇᕐᐱᐅᒃ ᐅᓪᓗᓂᒃ ᐱᖓᓱᓂᒃ?” 21 ᔩᓱᓯᓕ ᑐᒃᓯᐊᕐᕕᒡᔪᐊᕐᒥᒃ ᐅᖃᐅᓯᖃᕐᐳᖅ ᑎᒥᒥᓂᒃ. 22 ᑍᒤᒻᒪᑦ ᑐᖁᖓᔪᓂᑦ ᒪᑭᓯᒪᓕᕐᒪᑦ, ᐃᓕᓐᓂᐊᕐᑎᖏᑕ ᔩᓱᓯᐅᑉ ᐅᖃᐅᓯᕆᓚᐅᕐᑕᖏᑦ ᐃᖅᑲᓚᐅᕐᐰᑦ; ᐊᒡᓔᑦ ᐅᒃᐱᕆᕔᑦ ᔩᓱᓯᐅᓪᓗ ᐅᖃᐅᓯᕆᓚᐅᕐᑕᖏᑦ. ᔩᓱᓯᐅᑉ ᖃᐅᔨᒪᓂᖓ ᐃᓅᑉ ᐱᐅᓯᖓᓂᒃ 23 ᔩᓱᓯ ᔨᕉᓴᓕᒻᒦᑎᓪᓗᒍ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᑎᓪᓗᒋᑦ, ᐊᒥᓱᑦ ᐅᒃᐱᓕᕐᐳᑦ ᑖᑦᓱᒧᖓ ᓇᓗᓁᒃᑯᑕᕐᓂᒃ ᑕᑯᒐᒥᒃ ᐱᓇᓱᐊᕐᑕᖏᓐᓂᒃ. 24 ᔩᓱᓯᓕ ᓇᖕᒥᓂᖅ ᐃᓚᓕᐅᑎᒻᒪᕆᓚᐅᓐᖏᓚᖅ ᐃᓄᖕᓄᑦ, 25 ᐃᓄᓕᒫᑦ ᖃᐅᔨᒪᑦᓯᐊᕋᒥᒋᑦ ᐃᓄᖕᓄᑦ ᓇᓪᓕᐊᓐᓄᓪᓘᓐᓃᑦ ᓇᓗᓁᕐᓯᕕᐅᔭᕆᐊᖃᓚᐅᓐᖏᓚᖅ; ᖃᐅᔨᒪᑦᓯᐊᕋᒥ ᐃᓅᑉ ᐃᓗᒥᐅᑕᕆᔭᖏᓐᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society