ᔪᐊᓇᓯᐅᑉ ᐊᒡᓚᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᐰᓛᑑᓯᐅᑉ ᔩᓱᓯ ᑎᒍᔭᐅᖁᕚ, ᑏᒐᕐᑐᕐᑕᐅᖁᓪᓗᒍᓗ.

² ᐅᓇᑕᕐᑐᒃᓮᑦ ᓂᐊᖂᑎᒃᓴᓕᐅᕐᐳᑦ ᑲᑭᓪᓚᐅᑎᓕᖕᓂᒃ ᐅᕐᐱᐅᔮᕐᑐᓂᒃ ᐱᕐᕅᓪᓗᑎᒃ, ᔩᓱᓯᐅᓪᓗ ᓂᐊᖁᐊᓄᑦ ᐃᓕᕚᑦ, ᐊᓐᓄᕌᒥᒡᓗ ᐊᐅᐸᓪᓚᕆᒃᑐᒥᒃ ᐊᑎᑎᓪᓗᒍ;

³ ᐅᐸᒡᓗᒍᓗ ᐅᖃᐅᑎᕚᑦ, “ᓂᕐᑐᕐᑕᐅᓕ, ᔫᑎᑦ ᐊᖓᔪᖅᑳᕐᔪᐊᖓᑦ!” ᑮᓇᖓᒍᓪᓗ ᐸᑎᒃᐹᑦ.

⁴ ᐰᓛᑑᓯ ᐊᓂᖕᒥᒐᒥ, ᐃᓄᒐᓴᒡᔪᐊᓄᑦ ᐅᖃᕐᐳᖅ, “ᑕᑯᒋᑦ, ᐅᓇ ᐊᓂᑎᑉᐸᕋ, ᑕᑯᖁᓪᓗᓯ ᑖᑦᓱᒪ ᓱᒋᐊᕐᑕᐅᑦᔪᑎᒃᓴᖓᓂᒃ ᓇᓂᓯᖏᓐᓇᒪ.”

⁵ ᑕᕝᕙ ᔩᓱᓯ ᐊᓂᕗᖅ, ᓂᐊᖂᓯᔭᕐᓗᓂ ᑲᑭᓪᓚᐅᑎᓕᖕᓂᒃ ᐅᓕᒡᔪᐊᖃᕐᓗᓂᓗ ᐊᐅᐸᓪᓚᕆᒃᑐᒥᒃ. ᐰᓛᑑᓯ ᐃᓄᖕᓄᑦ ᐅᖃᕐᐳᖅ, “ᑕᑯᓕᕐᓯᐅᒃ ᐊᖑᑦ ᐅᓇ!”

⁶ ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖏᑦ ᑐᒃᓯᐊᕐᕕᒡᔪᐊᓪᓗ ᖃᐅᔨᓴᕐᑎᖏᑦ ᑕᑯᒐᒥᒃ ᔩᓱᓯᒥᒃ ᕾᒐᓛᓕᕐᐳᑦ, “ᑭᑭᐊᒃᑐᕐᑕᐅᓕ! ᑭᑭᐊᒃᑐᕐᑕᐅᓕ!” ᑕᕝᕙ ᐰᓛᑑᓯᐅᑉ ᐅᖃᐅᑎᕔᑦ, “ᓇᖕᒥᓂᖅ ᐱᓕᕐᓯᐅᒃ, ᑭᑭᐊᒃᑐᕐᓗᒍᓗ, ᐅᕙᖓᓕ ᓱᒋᐊᕐᑕᐅᑦᔪᑎᒃᓴᖓᓂᒃ ᓇᓂᓯᓐᖏᓚᖓ.”

⁷ ᑕᕝᕙ ᔫᑎᑦ ᑭᐅᕚᑦ, “ᐱᖁᔭᖃᕐᐳᒍᑦ, ᐱᖁᔧᑦ ᒪᓕᒡᓗᒋᑦ ᑖᓐᓇ ᑐᖁᑕᐅᔪᒃᓴᐅᕗᖅ, ᐃᒻᒥᓂᒃ ᐃᕐᓂᐅᑎᒻᒪᑦ ᒎᑎᒧᑦ.”

⁸ ᐰᓛᑑᓯᐅᓪᓕ ᐅᖃᐅᓰᑦ ᑕᒪᒃᑯᐊ ᑐᓴᕋᒥᒋᑦ, ᓯᕘᕋᓂᕐᓴᐅᓕᕐᐳᖅ.

⁹ ᐃᒡᓗᕐᔪᐊᕐᒧᓪᓗ ᐃᑎᕐᒥᒐᒥ ᔩᓱᓯ ᐊᐱᕆᕚ, “ᓇᑭᓐᖔᕐᓯᒪᕖᑦ?” ᔩᓱᓯᓕ ᑭᐅᓐᖏᓚᖅ.

¹⁰ ᑕᕝᕙ ᐰᓛᑑᓯᐅᑉ ᐅᖃᐅᑎᕚ, “ᐅᕙᓐᓄᑦ ᑭᐅᑦᑍᓕᒪᕖᑦ? ᖃᐅᔨᒪᓐᖏᓚᑏᑦ ᐱᔪᓐᓇᕐᓂᖃᕋᒪ ᐊᓂᑎᑦᓱᓐᓇᕐᓗᑎᑦ, ᑭᑭᐊᒃᑐᕐᑕᐅᑎᓪᓗᑎᓪᓘᓐᓃᑦ?”

¹¹ ᔩᓱᓯᐅᑉ ᑭᐅᕚ, “ᐅᕙᓐᓄᑦ ᐱᔪᓐᓇᕐᓂᖃᕋᔭᓐᖏᓚᑎᑦ ᑐᓂᓯᕕᐅᖏᒃᑯᕕᑦ ᑕᑉᐹᓐᖓᑦ; ᑍᒤᒻᒪᑦ ᐅᕙᓐᓂᒃ ᐱᔭᐅᑎᑦᓯᔪᖅ ᐃᓕᖕᓄᑦ ᐊᔪᕐᓂᖃᕐᓂᕐᓴᐅᕗᖅ ᐃᓕᖕᓂᑦ.”

¹² ᐰᓛᑑᓯᓕ ᕿᓂᕋᓱᐊᕋᓗᐊᕐᐳᖅ ᔩᓱᓯᐅᑉ ᐊᓂᑎᑕᐅᑦᔪᑎᒃᓴᖓᓂᒃ, ᔫᑎᓪᓕ ᕾᒐᓛᓕᕐᐳᑦ, “ᐅᓇ ᐊᓂᑎᓐᓂᐊᕈᕕᐅᒃ, ᐊᖓᔪᖅᑳᕐᔪᐊᑉ ᓰᓴᕆᐅᑉ ᐃᓚᓐᓈᕆᓂᐊᓐᖏᓛᑎᑦ; ᐃᒻᒥᓂᒃ ᐊᖓᔪᖅᑳᕐᔪᐊᖑᓂᕋᕐᑐᖅ ᐊᑭᕋᕐᑐᕐᒪᑦ ᐊᖓᔪᖅᑳᔪᐊᕐᒥᒃ ᓰᓴᕆᒥᒃ.”

¹³ ᐰᓛᑑᓯᐅᓪᓕ ᐅᖃᐅᓰᑦ ᑕᒪᒃᑯᐊ ᑐᓴᕋᒥᒋᑦ, ᔩᓱᓯ ᐊᓂᑎᑉᐹ ᐃᖏᓪᓗᓂ ᐃᖅᑲᕐᑐᐃᕕᐅᑉ ᐃᒃᓯᕙᐅᑕᖓᓄᑦ ᑍᔭᐅᔪᒧᑦ ᐅᔭᕋᖕᓂᒃ ᓇᑎᓕᐅᕐᓯᒪᔪᒥᒃ, ᐄᑉᕉᑎᑐᑦ ᐊᑎᖃᕐᑐᒧᑦ ᒐᐸᑕᒥᒃ.

¹⁴ ᑍᒤᓕᐅᕐᑎᓪᓗᒋᑦ ᑕᕝᕙᓂ ᐅᓪᓗᖅ ᕿᑎᕋᓕᑲᓴᓕᕐᐳᖅ; ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᐅᑉ ᐅᐸᓗᖕᒊᔭᕐᕕᖓ ᓇᓪᓕᐅᑎᑎᓪᓗᒍ. ᑕᕝᕙ ᔫᑎᓄᑦ ᐅᖃᕐᐳᖅ, “ᑕᑯᒋᑦ ᑕᕝᕙ ᐊᖓᔪᖅᑳᕐᔪᐊᓯ!”

¹⁵ ᕾᒐᓛᓕᕐᐳᓪᓕ, “ᑕᒫᓃᓇᓂ, ᑕᒫᓃᓇᓂ, ᑭᑭᐊᒃᑐᕐᑕᐅᓕ!” ᐰᓛᑑᓯᐅᑉ ᐅᖃᐅᑎᕔᑦ, “ᐊᖓᔪᖅᑳᕐᔪᐊᓯ ᑭᑭᐊᒃᑐᒐᒃᓴᕆᕙᕌ?” ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᑭᐅᕗᑦ, “ᐊᖓᔪᖅᑳᕐᔪᐊᖃᓐᖏᓚᒍᑦ ᓰᓴᕆᐅᑉ ᐊᓯᐊᓂᒃ!”

^16a ᑕᕝᕙ ᐰᓛᑑᓯᐅᑉ ᔩᓱᓯ ᐂᑦᑑᑎᒋᓕᕐᐹ ᑖᒃᑯᓄᖓ ᑭᑭᐊᒃᑐᕐᑕᐅᖁᓪᓗᒍ.

ᔩᓱᓯᐅᑉ ᑭᑭᐊᒃᑐᕐᑕᐅᓂᖓ

^16b ᔩᓱᓯ ᑕᕝᕙ ᑎᒍᕚᑦ,

¹⁷ ᔩᓱᓯ ᐊᓂᕗᖅ, ᓴᓐᓂᖓᔪᓕᒃᓴᓂᓗ ᐃᕐᓱᒃᐹ, ᓂᐊᖁᕕᓂᕐᑕᓕᖕᒧᑦ, ᐄᑉᕉᑎᑐᑦ ᐊᑎᖃᕐᑐᒧᑦ ᒎᓪᒑᑕᒥᒃ.

¹⁸ ᑕᕝᕙᓂ ᔩᓱᓯ ᑭᑭᐊᒃᑐᕐᐹᑦ ᓴᓐᓂᖓᔪᓕᖕᒧᑦ, ᐊᓯᖏᖕᓂᒃᑕᐅᖅ ᒪᕐᕉᖕᓂᒃ ᑭᑭᐊᒃᑐᐃᒋᕗᑦ, ᐊᕙᑖᓄᐊᕐᓗᒋᒃ ᓴᐅᒥᐊᓄᑦ ᑕᓕᕐᐱᐊᓄᓪᓗ, ᔩᓱᓯᓕ ᐊᑯᓪᓕᕐᐸᐅᓪᓗᒍ.

¹⁹ ᐰᓛᑑᓯ ᑎᑎᖅᑲᓂᒃ ᓂᐊᖁᐊᑕ ᖁᓛᓃᑦᑐᒃᓴᓂᒃ ᑎᑎᕋᕐᐳᖅ ᐃᓕᓪᓗᒋᓪᓗ ᓴᓐᓂᖓᔪᓕᖕᒧᑦ; ᐃᒫᒃ ᐅᖃᕐᓯᒪᔪᓂᒃ: “ᔩᓱᓯ ᓈᓴᕇᑎᒥᐅᖅ, ᔫᑎᑦ ᐊᖓᔪᖅᑳᕐᔪᐊᖓᑦ.”

²⁰ ᔫᑎᑦ ᐊᒥᓱᑦ ᑖᒃᑯᐊ ᑎᑎᕋᕐᓯᒪᔪᑦ ᐅᖃᓕᒫᕐᐰᑦ, ᔩᓱᓯᐅᑉ ᑭᑭᐊᒃᑐᕐᑕᐅᕕᒋᔭᖓ ᐅᖓᓯᖏᒻᒪᑦ ᐃᒡᓗᒐᓴᖕᓂᑦ; ᑖᒃᑯᐊ ᑎᑎᕋᕐᓯᒪᕗᑦ ᐄᑉᕉᑎᑐᑦ, ᓛᑎᓂᑎᑐᓪᓗ, ᒍᕇᑭᑎᑐᓪᓗ.

²¹ ᑕᕝᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐰᓛᑑᓯᒧᑦ ᐅᖃᕐᐳᑦ, “ᑎᑎᕋᕐᓯᒪᔭᕆᐊᖃᓐᖏᓚᖅ ‘ᔫᑎᑦ ᐊᖓᔪᖅᑳᕐᔪᐊᖓᓐᓂᒃ,’ ᐃᒫᒃᓕ: ‘ᐊᖑᑦ ᐅᓇ ᐅᖃᓚᐅᕐᑐᖅ, ᔫᑎᑦ ᐊᖓᔪᖅᑳᕐᔪᐊᕆᕚᖓ.’”

²² ᐰᓛᑑᓯᐅᑉ ᑭᐅᕔᑦ, “ᑎᑎᕋᕐᑕᒃᑲ ᑍᒫᒃ ᑎᑎᕋᕐᓯᒤᓐᓇᕐᓂᐊᕐᐳᑦ.”

²³ ᐅᓇᑕᕐᑐᒃᓮᑦ ᔩᓱᓯᒥᒃ ᑭᑭᐊᒃᑐᐃᔭᕇᕋᒥᒃ ᐊᓐᓄᕌᖏᓐᓂᒃ ᐊᒡᒍᐃᕗᑦ ᓯᑕᒪᐅᓕᓪᓗᒋᑦ, ᐊᑐᓂᑦ ᐊᑕᐅᓯᕐᒥᒃ ᐱᑖᕐᓗᑎᒃ; ᐅᓕᒡᔪᐊᖓᓕ ᑎᒍᒋᕚᑦ, ᑖᓐᓇ ᑭᓗᖃᕋᓂ ᓴᓇᓯᒪᓚᐅᕐᐳᖅ.

²⁴ ᑕᕝᕙ ᐅᓇᑕᕐᑐᒃᓮᑦ ᐃᒻᒥᖕᓄᑦ ᐅᖃᖃᑦᑕᐅᑎᕗᑦ, “ᑖᓐᓇ ᐊᕕᒍᓐᓁᕐᓚᕗᑦ; ᓇᓚᐅᑦᓵᕐᓗᑕᓕ ᒪᑭᑦᓯᒋᐊᖃᑦᑕᓕᕐᑕ ᓇᓪᓕᐊᑦᑕ ᐱᓂᐊᕐᒪᖔᒍ.” ᑕᒪᓐᓇ ᐊᑐᕐᑕᐅᓚᐅᕐᐳᖅ ᐊᒡᓔᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ, “ᐊᓐᓄᕌᒃᑲ ᐃᒻᒥᖕᓄᑦ ᐊᑐᓂᑦ ᐊᒡᒍᓚᐅᕐᐰᑦ, ᐅᓕᒡᔪᐊᕋᓗ ᓇᓚᐅᑦᓵᕈᑎᒋᓚᐅᕐᐹᑦ.” ᑕᕝᕙ ᐅᓇᑕᕐᑐᒃᓮᑦ ᑍᒤᓕᐅᓚᐅᕐᐳᑦ.

²⁵ ᔩᓱᓯᐅᑉ ᓴᓐᓂᖓᔪᓕᖓᑕ ᖃᓂᒋᔮᓂ ᐅᑯᐊ ᓇᖏᓚᐅᕐᐳᑦ, ᔩᓱᓯᐅᑉ ᐊᓈᓇᖓ, ᐊᓈᓇᖓᑕᓗ ᖃᑕᓐᖑᑖ, ᒥᐊᕆᓗ ᒃᓗᐹᓯᐅᑉ ᓄᓕᐊᖓ, ᒥᐊᕆᓗ ᒫᒃᑕᓖᓂ.

²⁶ ᔩᓱᓯᐅᓪᓕ ᐊᓈᓇᓂ ᑕᑯᒐᒥᐅᒃ, ᐃᓕᓐᓂᐊᕐᑎᓗ ᓇᒡᓕᒋᔭᓂ ᑕᕝᕙᓂ ᓇᖏᖃᑕᐅᔪᖅ; ᐊᓈᓇᒥᓄᑦ ᐅᖃᕐᐳᖅ, “ᐊᕐᓈᖅ, ᑕᑯᒋᑦ, ᑕᕝᕙ ᐃᕐᓃᑦ!”

²⁷ ᑕᕝᕙ ᐃᓕᓐᓂᐊᕐᑎ ᐅᖃᐅᑎᕚ, “ᑕᑯᒋᑦ, ᑕᕝᕙ ᐊᓈᓁᑦ!” ᐅᓪᓗᒥᑦ ᑕᕝᕙᓐᖓᑦ ᐱᒋᐊᕐᓗᓂ ᐃᓕᓐᓂᐊᕐᑎᐅᑉ ᓇᔪᕐᑎᒋᓕᕐᐹ ᐊᖏᕐᕋᒥᓂ.

ᔩᓱᓯᐅᑉ ᑐᖁᓂᖓ

²⁸ ᔩᓱᓯ ᖃᐅᔨᒪᓕᕋᒥ ᓱᓇᓕᒫᑦ ᐱᔭᕇᕐᒪᑕ, ᐊᒡᓔᑦ ᓇᓚᐅᑦᓯᖁᓪᓗᒋᑦ, ᐅᖃᕐᐳᖅ, “ᖀᓕᕐᐳᖓ.”

²⁹ ᑕᕝᕙᓂ ᐃᒥᖃᐅᑎᑕᖃᕐᐳᖅ ᖃᓯᓕᓇᕐᑐᒥᒃ ᐃᒪᓕᖕᒥᒃ; ᑖᒃᑯᐊᓕ ᐳᕙᐅᔭᒥᒃ ᖃᓯᓕᓇᕐᑐᒧᑦ ᒥᓱᖅᑳᕐᓗᒍ ᐱᕈᕐᑐᕕᓂᕐᓗ ᕼᐃᓴᑉᒥᒃ ᐊᑎᓖᑦ ᑲᐳᒻᒥᑖᕐᓗᒍ ᔩᓱᓯᐅᑉ ᖃᓂᖓᓄᑦ ᒪᓂᕚᑦ.

³⁰ ᔩᓱᓯ ᖃᓯᓕᓇᕐᑐᒥᒃ ᐃᒥᕋᒥ ᐅᖃᕐᐳᖅ, “ᐱᔭᕇᕐᐳᖅ”; ᐅᑯᓪᓗᓂᓗ ᐊᓂᕐᓇᖏᕐᐳᖅ.

ᔩᓱᓯᐅᑉ ᑲᐱᔭᐅᓂᖓ ᓴᓂᕋᖓᒍᑦ

³¹ ᐅᓪᓗᖅ ᐅᐸᓗᖕᒊᔭᕐᕕᐅᖕᒪᑦ, ᓴᐸᑎᐅᑎᓪᓗᒍ ᑎᒥᓂᒃ ᓂᕕᖓᖁᔨᓇᑎᒃ ᓴᓐᓂᖓᔪᓕᖕᒥ, ᐅᓪᓗᖅ ᑖᓐᓇ ᐃᑦᔪᕐᓁᒻᒪᑦ, ᔫᑎᑦ ᐊᖓᔪᖅᑳᖏᑦ ᐰᓛᑑᓯᒧᑦ ᐊᐱᕆᔭᕐᑐᕐᐳᑦ ᑭᑭᐊᒃᑐᕐᑕᐅᓯᒪᔪᑦ ᓂᐅᖏᑦ ᓇᑲᑎᕐᑕᐅᖁᓪᓗᒋᑦ, ᓴᓐᓂᖓᔪᓕᖕᒥᑦ ᐲᕐᑕᐅᔪᓐᓇᕐᓯᖁᓪᓗᒋᑦ.

³² ᑕᕝᕙ ᐅᓇᑕᕐᑐᒃᓮᑦ ᑕᕝᕗᓐᖓᕋᒥᒃ ᓴᓐᓂᖓᔪᓕᖕᒦᑦᑑᑉ ᓯᕗᓪᓕᕐᐹᖓᑦᑕ ᓂᐅᖏᒃ ᓇᒡᒍᕐᐰᑦ, ᐂᑉᐸᖓᑕᓗ ᓂᐅᖏᒃ ᓇᒡᒍᕆᕔᑦ.

³³ ᔩᓱᓯᒧᓪᓕ ᑎᑭᓐᓇᒥᒃ ᑕᑯᒐᒥᒃ ᑐᖁᔭᕇᕐᒪᑦ, ᓂᐅᖏᒃ ᓇᒡᒍᓐᖏᓛᒃ.

³⁴ ᐅᓇᑕᕐᑐᒃᓮᓪᓕ ᐃᓚᖓᑦᑕ ᖃᓗᒋᐊᕐᔪᐊᕐᒧᑦ ᔩᓱᓯ ᓴᓂᕋᖓᒍᑦ ᑲᐱᕚ, ᑕᕝᕔᓐᓇᕐᓗ ᐊᐅᒃ ᐃᒥᕐᓗ ᑯᕕᓕᕐᐴᒃ.

³⁵ ᔩᓱᓯ ᑍᒤᓕᔭᐅᑎᓪᓗᒍ ᑕᑯᓐᓈᓚᐅᕐᑑᑉ ᑖᓐᓇ ᐅᖃᐅᑎᒋᕚ, ᐅᖃᐅᓯᕆᔭᖓᓗ ᓱᓕᕗᖅ, ᖃᐅᔨᒪᓪᓗᓂᓗ ᓱᓕᔪᒥᒃ ᐅᖃᕋᒥ, ᐃᓕᑦᓯᑦᑕᐅᖅ ᐅᒃᐱᓕᖁᓪᓗᓯ.

³⁶ ᑕᒪᒃᑯᐊ ᐱᓂᐊᕐᓂᐅᓚᐅᕐᐳᑦ ᐊᒡᓔᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ, “ᑖᑦᓱᒪ ᓴᐅᓂᖏᑦ ᓇᒡᒍᕐᑕᐅᔪᒃᓴᐅᓐᖏᓚᑦ.”

³⁷ ᐊᒡᓔᑦᑕᐅᖅ ᐊᓯᖏᑦ ᐅᖃᕐᓯᒪᒃᑲᓐᓂᕆᕗᑦ, “ᑕᑯᔪᒫᕐᐳᑦ ᑲᐱᓚᐅᕐᑕᒥᖕᓂᒃ.”

ᔩᓱᓯᐅᑉ ᐃᓗᕕᕐᑕᐅᓂᖓ

³⁸ ᑕᒪᑐᒪᓕ ᑭᖑᕐᖓᒍᑦ ᔫᓯᐱ ᐊᕆᒪᑎᐊᒥᐅᖅ, ᔩᓱᓯᒧᑦ ᐃᓕᓐᓂᐊᕐᑎᐅᒐᒥ ᖃᐅᔨᔭᐅᑦᑍᓕᓪᓗᓂ, ᔫᑎᓂᒃ ᓯᕘᕋᒐᒥ, ᐰᓛᑑᓯᒧᑦ ᐊᐱᕆᔭᕐᑐᕐᐳᖅ ᔩᓱᓯᐅᑉ ᑎᒥᖓᓂᒃ ᐱᔪᓐᓇᕐᑎᑕᐅᔪᒪᓪᓗᓂ, ᐰᓛᑑᓯᐅᑉ ᐱᔪᓐᓇᕐᑎᑉᐹ. ᑕᕝᕙ ᔫᓯᐱᐅᑉ ᔩᓱᓯᐅᑉ ᑎᒥᖓ ᐅᐸᒃᓗᒍ ᐊᖅᑲᕐᑎᑉᐹ.

³⁹ ᓂᑯᑎᒨᓯᑦᑕᐅᖅ, ᑕᕝᕗᓐᖓᕆᕗᖅ ᐅᓐᓄᐊᖑᑎᓪᓗᒍ ᔩᓱᓯᒧᐊᓚᐅᕐᓯᒪᔪᖅ, ᓇᒃᓴᕐᓗᓂ ᑎᐱᑦᓯᐊᕆᒃᑐᒥᒃ ᒪᕐᒥᒃ ᐋᓗᔅᒥᒡᓗ ᑲᑎᓯᒪᔪᒥᒃ, ᐅᖁᒤᓐᓂᖃᕐᑐᒥᒃ 100ᐸᐅᓐ ᖃᓂᒋᔮᓂ.

⁴⁰ ᑕᕝᕙ ᔩᓱᓯᐅᑉ ᑎᒥᖓ ᑎᒍᕚᒃ, ᐃᒻᒧᓯᕐᓗᒍᓗ ᖃᓪᓗᓈᕐᑕᒥᒃ ᓵᑦᑐᒥᒃ ᐃᒻᒧᑎᒃᓴᔭᒥᒃ ᑎᐱᑦᓯᐊᕆᒃᑐᒧᓪᓗ ᒥᖑᐊᕐᐹᒃ, ᔫᑎᑦ ᐃᓗᕕᕐᓯᓪᓗᑎᒃ ᐱᐅᓯᕆᕙᒃᑕᖓᑐᑦ.

⁴¹ ᔩᓱᓯᐅᑉ ᑭᑭᐊᒃᑐᕐᑕᐅᕕᒋᔭᖓᓂ ᐱᕈᕐᓰᕕᒃᑕᖃᕐᐳᖅ, ᑕᕝᕙᓂ ᐱᕈᕐᓰᕕᖕᒥ ᐃᓗᕕᒃᓴᕐᑕᖃᕐᐳᖅ ᓄᑖᒥᒃ ᐃᓕᓯᕕᐅᓚᐅᕐᓯᒪᖏᑦᑐᒥᒃ ᓱᓕ.

⁴² ᐅᓪᓗᖅ ᔫᑎᑦ ᐅᐸᓗᖕᒊᔭᕐᕕᒋᖕᒪᒍ, ᑕᕝᕙᓂ ᖃᓂᑦᑐᒥ ᐃᓗᕕᒃᓴᕐᑕᖃᕐᒪᑦ, ᑕᕝᕗᖓ ᔩᓱᓯᐅᑉ ᑎᒥᖓ ᐃᓕᕚᑦ.