ᔪᐊᓇᓯᐅᑉ ᐊᒡᓚᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᑎᒍᔭᐅᓂᖓ

¹ ᔩᓱᓯ ᑐᒃᓯᐊᕇᕋᒥ, ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᑕᕝᕙᓐᖓᑦ ᓅᑉᐳᑦ, ᑰᒃ ᑭᑦᑐᕌᓂ ᐃᑳᕐᐹᑦ, ᑕᕝᕙᓂ ᐱᕈᕐᓰᕕᒃᑕᖃᕐᒪᑦ, ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᑕᕝᕗᓐᖓᕐᐳᑦ.

² ᔫᑕᓯᐅᓪᓕ, ᑖᑦᓱᒪ ᐱᔭᐅᑎᑦᓯᔨᖓᑕ, ᑖᓐᓇ ᐱᕈᕐᓰᕕᒃ ᖃᐅᔨᒪᕚ; ᔩᓱᓯ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᑕᕝᕙᓂ ᑲᑎᖃᑦᑕᕐᓯᒪᖕᒪᑕ.

³ ᑍᒤᒻᒪᑦ, ᔫᑕᓯ ᑕᕝᕗᖓ ᐱᕈᕐᓰᕕᖕᒧᐊᓕᕐᐳᖅ, ᐅᓇᑕᕐᑐᒃᓴᓂᒃ ᑐᒃᓯᐊᕐᕕᒡᔪᐊᓪᓗ ᖃᐅᔨᓴᕐᑎᖏᓐᓂᒃ ᐃᓚᖃᕐᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑕ ᐹᕆᓯᓪᓗ ᑎᓕᓯᒪᔭᖏᓐᓂᒃ, ᓇᓂᕉᑎᖃᕐᓗᑎᒃ ᓇᓂᕈᐊᓕᔭᕐᓗᑎᒡᓗ ᓱᒋᐅᑦᓯᔭᕐᓗᑎᒡᓗ.

⁴ ᔩᓱᓯᓕ, ᑕᒤᓐᓂᒃ ᖃᐅᔨᒪᒐᒥ ᐱᓂᐊᕐᕕᐅᓂᐊᕐᓂᕐᒥᓂᒃ, ᐸᕐᕆᐊᕐᓗᒋᑦ ᐅᖃᐅᑎᕔᑦ, “ᑭᓇᒦᒃ ᕿᓂᕐᐱᓯ?”

⁵ ᑖᒃᑯᐊ ᑭᐅᕚᑦ, “ᔩᓱᓯ ᓈᓴᕇᑎᒥᐅᖅ.” ᔩᓱᓯᐅᑉ ᐅᖃᐅᑎᕔᑦ, “ᑖᓐᓇᐅᕗᖓ.” ᔫᑕᓯᐅᑉ ᐱᔭᐅᑎᑦᓯᔫᑉ ᐃᓄᐃᑦ ᑖᒃᑯᐊ ᓇᖏᖃᑎᒋᕔᑦ.

⁶ ᔩᓱᓯᐅᓪᓕ ᐅᖃᐅᑎᖕᒪᒋᑦ, “ᑖᓐᓇᐅᕗᖓ,” ᑭᖑᑉᐱᐊᕋᒥᒃ ᓂᕕᕐᐳᑦ ᓄᓇᒧᑦ.

⁷ ᑕᕝᕙ ᔩᓱᓯᐅᑉ ᐊᐱᕆᒃᑲᓐᓂᕐᐰᑦ, “ᑭᓇᒦᒃ ᕿᓂᕐᐱᓯ?” ᑖᒃᑯᐊ ᐅᖃᕐᐳᑦ, “ᔩᓱᓯ ᓈᓴᕇᑎᒥᐅᖅ.”

⁸ ᔩᓱᓯᐅᑉ ᑭᐅᕔᑦ, “ᐅᖃᐅᑎᔭᕇᕐᐸᑦᓯ ᑖᓐᓇᐅᕗᖓ; ᐅᕙᖓᑐᐊᖅ ᕿᓂᕈᑦᓯᓐᖓ, ᐅᑯᐊ ᐃᓚᒋᔭᒃᑲ ᑲᒪᒋᓇᒋᑦ ᐊᐅᓪᓚᕐᓕᑦ.”

⁹ ᐅᖃᐅᓯᕆᓚᐅᕐᑕᖏᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ, “ᐅᕙᓐᓄᑦ ᑐᓂᓚᐅᕐᑕᕐᓂᒃ ᐊᑕᐅᓯᕐᒥᒡᓘᓐᓃᑦ ᐊᓯᐅᔪᖃᓐᖏᓚᖅ.”

¹⁰ ᑕᕝᕙ ᓮᒨᓂ ᐲᑦᑐᕉᓯ, ᓴᕕᒡᔪᐊᖃᕋᒥ, ᐊᒧᓪᓗᓂᐅᒃ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐱᔨᖓ ᐅᓕᒪᕐᓗᒍ ᓯᐅᑎᖓᑕ ᑕᓕᕐᐱᐊ ᓇᑲᑉᐹ. ᑖᓐᓇᓗ ᐱᔨ ᐊᑎᖃᕐᐳᖅ ᒪᐅᓪᑲᔅᒥᒃ.

¹¹ ᔩᓱᓯᐅᑉ ᐲᑦᑐᕉᓯ ᐅᖃᐅᑎᕚ, “ᓴᕕᒡᔪᐊᑦ ᑮᓁᓕᑕᖓᓄᑦ ᐴᓕᕈᒃ; ᑏᑐᑎᐅᑉ ᐃᒪᖓ ᐊᑖᑕᒪ ᐅᕙᓐᓄᑦ ᕾᑕᖓ ᐃᒥᕆᐊᖃᓐᖏᓚᕌ?”

ᔩᓱᓯᐅᑉ ᐋᓇᓯᒧᐊᕈᑦᔭᐅᓂᖓ

¹² ᑕᕝᕙ ᐅᓇᑕᕐᑐᒃᓮᑦ ᐊᖓᔪᖅᑳᖓᑦᑕ ᔫᑎᓪᓗ ᑐᒃᓯᐊᕐᕕᒡᔪᐊᕐᒥ ᖃᐅᔨᓴᕐᑎᖏᑕ ᔩᓱᓯ ᑎᒍᕚᑦ ᕿᓚᒃᓱᕐᓗᒍ.

¹³ ᓯᕗᓪᓕᕐᒥᒡᓗ ᐋᓇᓯᒧᐊᕈᑎᕚᑦ; ᑬᐊᐹᓯᐅᑉ ᓴᑭᖓᓄᑦ, ᐊᕐᕌᒍᒥ ᑕᒪᑐᒪᓂ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᔫᑉ.

¹⁴ ᑬᐊᐹᓯ ᑖᓐᓇᐅᕗᖅ ᔫᑎᑦ ᐊᖓᔪᖅᑳᖏᓐᓂᒃ ᐃᓱᒪᑖᕐᑎᑦᓯᓚᐅᕐᑐᖅ ᐃᓄᒃ ᐊᑕᐅᓯᖅ ᑐᖁᑕᐅᒃᐸᑦ ᐱᐅᓂᕐᓴᐅᒐᔭᕐᓂᕋᕐᓗᓂᐅᒃ ᐃᓅᖃᑎᒌᓕᒫᑦ ᐱᑦᔪᑎᒋᓗᒋᑦ.

ᐲᑦᑐᕉᓯᐅᑉ ᒥᓯᐊᕈᑎᖃᕐᓂᖓ ᔩᓱᓯᒥᒃ

¹⁵ ᓮᒨᓂᓕ ᐲᑦᑐᕉᓯ ᐃᓕᓐᓂᐊᕐᑎᐅᖃᑎᖓᓗ ᔩᓱᓯᒥᒃ ᒪᓕᒃᐴᒃ. ᐃᓕᓐᓂᐊᕐᑎᓗ ᐲᑦᑐᕉᓯᐅᑉ ᐊᓯᐊ ᖃᐅᔨᒪᔭᐅᒐᒥ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐃᒡᓗᖓᑕ ᓯᓚᑖᓄᑦ ᐊᕙᓗᓕᐅᕐᓯᒪᔫᒧᑦ ᐃᑎᖃᑕᐅᕗᖅ ᔩᓱᓯ ᐃᓚᒋᓪᓗᒍ,

¹⁶ ᐲᑦᑐᕉᓯᓕ ᐃᑎᕐᑕᕐᕕᐅᑉ ᐅᒃᑯᐊᖓᑕ ᓯᓚᑖᓂ ᓇᖏᕐᐳᖅ. ᐃᓕᓐᓂᐊᕐᑎᓗ ᐊᓯᐊ ᖃᐅᔨᒪᔭᐅᔪᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ, ᐊᓂᒐᒥ ᐊᕐᓇᒥᒃ ᐃᑎᕐᑕᕐᕕᐅᑉ ᐅᒃᑯᐊᖓᓂ ᑲᒪᔨᒥᒃ ᐅᖃᖃᑎᖃᓚᐅᕐᓗᓂ, ᐲᑦᑐᕉᓯ ᐃᑎᕐᑎᑉᐹ.

¹⁷ ᑕᕝᕙ ᐊᕐᓇᖅ ᐃᑎᕐᑕᕐᕕᐅᑉ ᐅᒃᑯᐊᖓᓂ ᑲᒪᔨ ᐲᑦᑐᕉᓯᒧᑦ ᐅᖃᕐᐳᖅ, “ᑖᑦᓱᒪ ᐃᓕᓐᓂᐊᕐᑎᖏᓐᓄᑦ ᐃᓚᒋᔭᐅᓐᖏᓚᑏᑦ?” ᐲᑦᑐᕉᓯᐅᑉ ᑭᐅᕚ, “ᐃᓚᒋᔭᐅᓐᖏᓚᖓ.”

¹⁸ ᓯᓚ ᓂᒡᓚᓱᓕᕐᒪᑦ, ᐱᔩᑦ ᑐᒃᓯᐊᕐᕕᒡᔪᐊᕐᒥᓗ ᖃᐅᔨᓴᕐᑏᑦ ᕿᔪᒃᓴᓂᒃ ᐃᑭᑦᓯᓚᐅᕐᐳᑦ ᐊᕙᑖᓂᓗ ᓇᖏᕐᓗᑎᒃ, ᐅᖅᑰᓯᑦᑎᕋᓱᐊᕐᐳᑦ; ᑕᕝᕙ ᐲᑦᑐᕉᓯ ᓇᖏᖃᑕᐅᓕᕆᕗᖅ, ᐃᑯᒪᔫᑉ ᓴᓂᐊᓂ ᐃᒻᒥᓂᒃ ᐅᖅᑰᓯᑦᑎᕋᓱᐊᕆᓪᓗᓂ.

ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦᑕ ᐊᐱᕐᓱᕐᓂᖓ ᔩᓱᓯᒥᒃ

¹⁹ ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖓᑦᑕ ᔩᓱᓯ ᐊᐱᕐᓱᕐᐹ ᐃᓕᓐᓂᐊᕐᑎᖏᑕ ᒥᒃᓵᓄᑦ ᐊᔪᕆᕐᑐᐃᖃᑦᑕᕐᓂᖓᓂᒡᓗ.

²⁰ ᔩᓱᓯᐅᑉ ᑭᐅᕚ, “ᑍᒪᓐᖓᑦ ᐃᔨᕐᓯᒪᓇᖓ ᐃᓄᓕᒫᓄᑦ ᐅᖃᓪᓚᖃᑦᑕᓚᐅᕐᐳᖓ; ᐊᔪᕆᕐᑐᐃᖃᑦᑕᓚᐅᕐᐳᖓᓗ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ ᑐᒃᓯᐊᕐᕕᒡᔪᐊᒥᓗ, ᔫᑎᓕᒫᑦ ᑲᑎᕕᒋᕙᒃᑕᖏᓐᓂ; ᐃᔨᕋᕐᑐᕐᓗᖓ ᐅᖃᓪᓚᓚᐅᕐᓯᒪᓇᖓ.

²¹ ᓱᓇᒥᒃ ᑐᑭᓯᕕᒋᔪᒪᕕᖔ? ᐃᓄᐃᑦ ᐊᐱᕐᓱᓚᐅᒃᑭᑦ ᐅᕙᓐᓂᒃ ᑐᓵᖃᕐᑕᓚᐅᕐᑐᑦ ᐅᖃᐅᓯᕆᖃᑦᑕᓚᐅᕐᑕᓐᓂᒃ; ᖃᐅᔨᒪᖕᒪᑕ ᖃᓄᖅ ᐅᖃᐅᓯᖃᖃᑦᑕᓚᐅᕐᒪᖔᕐᒪ.”

²² ᔩᓱᓯ ᑍᒫᒃ ᐅᖃᕐᒪᑦ, ᖃᐅᔨᓴᕐᑏᑦ ᐃᓚᖓᑦᑕ ᐅᓗᐊᖓᒍᑦ ᐸᑎᒃᓗᓂᐅᒃ ᐅᖃᐅᑎᕚ, “ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ ᑍᒫᒃ ᑭᐅᒪᔭᒃᓴᕆᕕᐅᒃ?”

²³ ᔩᓱᓯᐅᑉ ᑭᐅᕚ, “ᓈᒻᒪᖏᑦᑐᒥᒃ ᐅᖃᕈᒪ, ᓇᓗᓁᕐᓯᔪᖃᓚᐅᕐᓕ ᖃᓄᖅ ᓱᓕᖏᒻᒪᖔᕐᒪ; ᓱᓕᒍᒪᓕ ᐅᖃᐅᓯᕆᔭᓐᓂᒃ, ᓱᖕᒪᑦ ᐸᑎᒃᐱᖔ?”

²⁴ ᑕᕝᕙ ᐋᓇᓯᐅᑉ ᐊᓂᖁᓕᕐᐹ ᕿᓚᒃᑕᐅᓯᒪᑎᓪᓗᒍ ᑬᐊᐹᓯᒧᑦ ᐋᑕᐅᖁᕙ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ.

ᐲᑦᑐᕉᓯᐅᑉ ᓴᒡᓗᑎᖃᒃᑲᓐᓂᕐᓂᖓ ᔩᓱᓯᒥᒃ

²⁵ ᓮᒨᓂ ᐲᑦᑐᕉᓯ ᓱᓕ ᐃᑯᐊᓚᑎᑕᐅᔫᑉ ᓴᓂᐊᓂ ᓇᖏᕐᐳᖅ ᐅᖅᑰᓯᑦᑎᕋᓱᐊᕐᓗᓂ. ᑕᕝᕙ ᐅᖃᐅᑎᕚᑦ, “ᑖᑦᓱᒪ ᐃᓕᓐᓂᐊᕐᑎᖏᑕ ᐃᓚᒋᓐᖏᓛᑏᑦ?” ᐲᑦᑐᕉᓯ ᓱᓕᒐᓂ ᐅᖃᕐᐳᖅ, “ᐃᓚᒋᔭᐅᓐᖏᓚᖓ.”

²⁶ ᑐᓂᕐᕈᓯᕐᑎᑦᓯᔩᓪᓕ ᐊᖓᔪᖅᑳᖓᑦᑕ ᐱᔨᖏᑕ ᐃᓚᖓᑦ, ᐱᕈᕐᓰᕕᖕᒥ ᐲᑦᑐᕉᓯᐅᑉ ᓯᐅᑎᖓᒍᑦ ᓇᑲᖅᑲᐅᔭᖓᑕ ᐃᓚᖓᑦ, ᐅᖃᕐᐳᖅ. “ᑕᑯᖅᑲᐅᓐᖏᓚᒌᑦ ᑖᑦᓱᒥᖓ ᐃᓚᖃᕐᑎᓪᓗᑎᑦ ᐱᕈᕐᓰᕕᖕᒥ?”

²⁷ ᑕᕝᕙ ᐲᑦᑐᕉᓯ ᓱᓕᒐᓂ ᑭᐅᒋᕗᖅ; ᑕᕝᕔᓐᓇᕐᓗ ᐊᖑᑎᕕᐊᖅ ᓂᓪᓕᕐᐳᖅ.

ᔩᓱᓯᐅᑉ ᐋᑕᐅᓂᖓ ᐰᓛᑑᓯᒧᑦ

²⁸ ᑕᕝᕙ ᔩᓱᓯ ᑬᐊᐹᓯᐅᑉ ᐃᒡᓗᖓᓂᑦ ᐋᑕᐅᓕᕆᕗᖅ ᕉᒪᒥᐅᑦ ᐊᐅᓚᑦᓯᔨᖓᑦᑕ ᐃᒡᓗᕐᔪᐊᖓᓄᑦ. ᐅᓪᓛᒻᒪᕆᐅᓕᕐᑎᓪᓗᒍ. ᔫᑎᓪᓕ ᐊᖓᔪᖅᑳᖏᑦ ᑕᕝᕗᖓ ᐃᑎᖃᑕᐅᓐᖏᓚᑦ, ᐅᒃᐱᕐᕈᓯᕆᔭᑎᒃ ᒪᓕᓗᒋᑦ ᓴᓗᒤᓕᑎᕈᒪᖏᓐᓇᒥᒃ, ᖄᖏᕐᑕᐅᕕᒃᓯᐅᕈᑎᐅᑉ ᓇᓪᓕᐅᓐᓂᓯᐅᕐᑕᐅᓂᖓᓂᒃ ᓂᕆᔪᓐᓇᖃᑕᐅᔪᒪᒐᒥᒃ.

²⁹ ᑕᕝᕙ ᐰᓛᑑᓯᐅᑉ ᐊᓂᕕᒋᓪᓗᒋᑦ ᐅᖃᐅᑎᕔᑦ, “ᓱᓇᒥᒃ ᐸᓯᒃᓯᕈᑎᖃᕐᐱᓰ ᐊᖑᒻᒧᑦ ᐆᒧᖓ?”

³⁰ ᑖᒃᑯᐊ ᑭᐅᕗᑦ, “ᐅᓇ ᐱᐅᖏᑦᑐᓕᔨᐅᖏᑉᐸᑦ, ᐃᓕᖕᓄᐊᕈᑎᒐᔭᓐᖏᑕᕗᑦ.”

³¹ ᐰᓛᑑᓯᐅᑉ ᐅᖃᐅᑎᕔᑦ, “ᓇᖕᒥᓂᖅ ᑎᒍᓕᕐᓯᐅᒃ ᐃᖅᑲᕐᑐᕐᓗᒍ ᓇᖕᒥᓂᖅ ᐱᖁᔭᓯ ᒪᓕᒡᓗᒋᑦ.” ᑕᕝᕙ ᔫᑎᑦ ᐅᖃᐅᑎᕚᑦ, “ᑐᖁᑦᓯᔪᒃᓴᐅᓐᖏᓚᒍᑦ ᑭᓇᒥᒡᓘᓐᓃᑦ.”

³² ᑕᒪᓐᓇ ᐱᓂᐊᕐᓂᐅᓚᐅᕐᐳᖅ ᔩᓱᓯᐅᑉ ᐅᖃᐅᓯᕆᓚᐅᕐᑕᖏᑕ ᓇᓚᐅᑦᓯᓂᖏᑦ ᓴᖅᑭᑎᑕᐅᖁᓪᓗᒋᑦ ᖃᓄᐃᓕᐅᕐᑕᐅᓗᓂ ᑐᖁᑎᑕᐅᓛᕐᒪᖔᕐᒥ.

³³ ᐰᓛᑑᓯᓕ ᐃᒡᓗᕐᔪᐊᕐᒧᑦ ᐃᑎᕐᒥᒐᒥ ᔩᓱᓯ ᕾᖁᕚ, ᐅᖃᐅᑎᓪᓗᒍᓗ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”

³⁴ ᔩᓱᓯᐅᑉ ᑭᐅᕚ, “ᐃᒻᒥᓂᒃ ᑍᒫᒃ ᑕᒪᑐᒥᖓ ᐅᖃᕐᐲᑦ ᐅᕝᕙᓗ ᐊᓯᖕᓂᑦ ᑕᒪᑐᒥᖓ ᐅᖃᐅᑦᔭᐅᓐᓂᕐᐱᑦ ᖃᓄᐃᑦᑑᖕᒪᖔᕐᒪ?”

³⁵ ᐰᓛᑑᓯᐅᑉ ᑭᐅᕚ, “ᔫᑎᐅᓇᓱᒋᕕᖔ? ᓇᖕᒥᓂᖅ ᐃᓅᖃᑎᖕᓄᑦ ᑐᓂᕐᕈᓯᕐᑎᑦᓯᔩᓪᓗ ᐊᖓᔪᖅᑳᖏᓐᓄᑦ ᑎᒍᔭᐅᓪᓗᑎᑦ ᐅᕙᓐᓄᐊᕐᑕᐅᕗᑎᑦ; ᖃᓄᐃᓕᐅᓚᐅᕋᕕᑦ?”

³⁶ ᔩᓱᓯ ᑭᐅᕗᖅ, “ᐊᖓᔪᖅᑲᐅᕕᒐ ᓯᓚᕐᔪᐊᕐᒥᑦ ᑕᒪᑐᒪᖓᑦ ᐱᓐᖏᓚᖅ; ᐊᖓᔪᖅᑲᐅᕕᒐ ᓯᓚᕐᔪᐊᕐᒥᑦ ᑕᒪᑐᒪᖓᑦ ᐱᒃᐸᑦ, ᒪᓕᒃᑎᓐᓂᑦ ᐅᓇᑕᕈᑦᔭᐅᒐᔭᕐᐳᖅ, ᑎᒍᔭᐅᖁᓇᖓ ᔫᑎᑦ ᐊᖓᔪᖅᑳᖏᓐᓄᑦ; ᑍᒤᒻᒪᑦ, ᐊᖓᔪᖅᑲᐅᕕᒐ ᓯᓚᕐᔪᐊᕐᒥᑦ ᑕᒪᑐᒪᖓᑦ ᐱᓐᖏᓚᖅ.”

³⁷ ᑕᕝᕙ ᐰᓛᑑᓯᐅᑉ ᐊᐱᕆᕚ, “ᑕᕝᕚ ᐊᖓᔪᖅᑳᕐᔪᐊᖑᕕᑦ?” ᔩᓱᓯᐅᑉ ᑭᐅᕚ, “ᐃᕝᕕᑦ ᐊᖓᔪᖅᑳᕐᔪᐊᖑᓂᕋᕐᐸᕐᒪ. ᑕᒪᓐᓇ ᐱᑦᔪᑎᒋᓪᓗᒍ ᐃᓅᓚᐅᕐᐳᖓ, ᓯᓚᕐᔪᐊᕐᒧᓪᓗ ᑎᑭᓪᓗᖓ, ᓱᓕᔪᒥᒃ ᓇᓗᓁᕐᓯᔭᕐᑐᕐᓗᖓ. ᓱᓕᔪᒦᑦᑐᓕᒫᑦ ᑐᓴᕐᐹᖓ.”

^38a ᑕᕝᕙ ᐰᓛᑑᓯᐅᑉ ᐅᖃᐅᑎᕚ, “ᓱᓇᐅᕚ ᓱᓕᔪᖅ?”

ᔩᓱᓯᐅᑉ ᑐᖁᑕᒃᓴᕈᕐᑎᑕᐅᓂᖓ

^38b ᐰᓛᑑᓯ ᑍᒫᒃ ᐅᖃᕇᕋᒥ, ᐊᓂᓪᓗᓂ ᔫᑎᓄᑦ ᐅᖃᕐᐳᖅ, “ᓱᒋᐊᕐᑕᐅᑦᔪᑎᒃᓴᖓᓂᒃ ᑖᑦᓱᒪ ᓇᓂᓯᓐᖏᓚᖓ.

³⁹ ᐱᐅᓯᓯᓕ ᒪᓕᒡᓗᒋᑦ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐱᔪᒪᔭᑦᓯᓐᓂᒃ ᐊᑕᐅᓯᕐᒥᒃ ᐊᓂᑎᑦᓯᓲᖑᕗᖓ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᓕᕌᖓᑦᓯ; ᔫᑎᑦ ᐊᖓᔪᖅᑳᕐᔪᐊᖓᓐᓂᒃ ᐊᓂᑎᑦᓯᖁᕕᓯᓐᖔ?”

⁴⁰ ᑕᕝᕙ ᕾᒐᓛᓕᕐᐳᑦ, “ᑖᑦᓱᒥᖓᐅᖏᑦᑐᖅ, ᐸᕋᐹᓯᒥᒡᓕ!” (ᐸᕋᐹᓯᓕ ᐱᕋᔭᐅᕗᖅ.)