ᔪᐊᓇᓯᐅᑉ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᑐᒃᓯᐅᑦᔨᓂᖓ ᐃᓕᓐᓂᐊᕐᑎᒥᓂᒃ

¹ ᔩᓱᓯ ᑕᒪᒃᑯᓂᖓ ᐅᖃᕇᕋᒥ, ᕿᓚᖕᒧᑦ ᑕᑯᓴᕐᓗᓂ ᐅᖃᕐᐳᖅ, “ᐊᑖᑖᒃ, ᐃᑲᕐᕋᖅ ᓇᓪᓕᐅᑎᕗᖅ; ᐃᕐᓃᑦ ᓂᕐᑐᕐᓇᕐᓯᑎᓕᕈᒃ, ᓂᕐᑐᕐᓇᕐᑎᑕᐅᖁᓪᓗᑎᑦᑕᐅᖅ ᐃᕐᓂᕐᓄᑦ.

² ᐃᕐᓃᑦ ᑐᓂᓯᕕᒋᓯᒪᒐᕕᐅᒃ ᐱᔪᓐᓇᕐᓂᕐᒥᒃ ᐃᓄᓕᒫᓄᑦ, ᐃᓅᓯᕐᒥᒃ ᓄᖑᓱᐃᑦᑐᒥᒃ ᑐᓂᓯᖁᓪᓗᒍ ᑐᓂᓯᒪᔭᓕᒫᕐᓄᑦ ᑖᑦᓱᒧᖓ.

³ ᐃᓅᓯᖅ ᓄᖑᓱᐃᑦᑐᖅ ᐃᒤᓕᖓᕗᖅ, ᐃᓕᖕᓂᒃ ᖃᐅᔨᓗᓂ ᓇᓛᒍᑦ ᓱᓕᔪᒥᒃ ᒎᑎᑐᐊᖑᓂᕐᓂᒃ, ᑎᓕᓚᐅᕐᑕᕐᓂᒡᓗ ᔩᓱᓯ ᙭ᔅᑑᓯᒥᒃ.

⁴ ᓂᕐᑐᕐᓇᕐᑎᓚᐅᕐᐸᒋᑦ ᓄᓇᕐᔪᐊᕐᒥ, ᐱᓂᐊᕐᓃᓪᓗ ᐱᓇᓱᐊᕐᑕᐅᖁᓚᐅᕐᑕᓕᒫᑎᑦ ᐅᕙᓐᓄᑦ ᐱᔭᕇᓚᐅᕐᐸᒃᑲ;

⁵ ᒫᓐᓇ, ᐊᑖᑖᒃ ᓂᕐᑐᕐᓇᕐᑎᓚᐅᓐᖓ ᓇᖕᒥᓂᖅ ᓇᔫᑎᓂᕐᓄᑦ ᐱᒋᓚᐅᕐᑕᓐᓄᑦ ᐃᓕᖕᓂ ᓇᔫᑎᑎᓪᓗᖓ ᓯᓚᕐᔪᐊᖅ ᓴᓇᔭᐅᓚᐅᖄᕐᑎᓐᓇᒍ.

⁶ “ᖃᐅᔨᔭᐅᑎᓚᐅᕐᐸᒋᑦ ᐃᓄᖕᓄᑦ ᐅᕙᓐᓄᑦ ᑐᓂᓚᐅᕐᑕᕐᓄᑦ ᓯᓚᕐᔪᐊᕐᒥᐅᓂᑦ; ᑖᒃᑯᐊ ᐱᒋᓚᐅᕋᕕᒋᑦ, ᐅᕙᓐᓄᑦ ᑐᓂᓚᐅᕐᐸᑎᑦ, ᐅᖃᐅᓯᕐᑎᑦ ᓈᓚᓚᐅᕐᐰᑦ.

⁷ ᒫᓐᓇᓗ ᖃᐅᔨᕗᑦ ᐅᕙᓐᓄᑦ ᑐᓂᓚᐅᕐᑕᓕᒫᑎᑦ ᐃᓕᖕᓂᑦ ᐱᓯᒪᖕᒪᑕ;

⁸ ᐅᖃᐅᓰᑦ ᑐᓂᓚᐅᕐᑕᑎᑦ ᐅᕙᓐᓄᑦ ᑖᒃᑯᓄᖓ ᐅᖃᐅᓯᕆᓚᐅᕐᐸᒃᑲ, ᑖᒃᑯᐊᓗ ᐃᓚᓕᐅᓚᐅᕐᐰᑦ ᓱᓕᔪᒥᒃ ᖃᐅᔨᓪᓗᑎᒃ ᐃᓕᖕᓂᑦ ᐱᓯᒪᓂᓐᓂᒃ; ᐅᒃᐱᓕᕐᓗᑎᒡᓗ ᑎᓕᓚᐅᕋᕕᖓ.

⁹ “ᑖᒃᑯᐊ ᑐᒃᓯᐅᑎᕙᒃᑲ; ᓯᓚᕐᔪᐊᕐᒥᐅᑦ ᑐᒃᓯᐅᑎᓇᒋᑦ ᑖᒃᑯᐊᓕ ᑭᓯᒥ ᑐᓂᓚᐅᕐᑕᑎᑦ ᐅᕙᓐᓄᑦ ᑐᒃᓯᐅᑎᕙᒃᑲ, ᑖᒃᑯᐊ ᐱᒋᒐᕕᒋᑦ.

¹⁰ ᐱᒋᔭᓕᒫᒃᑲ ᐱᒋᕙᑎᑦ, ᐱᒋᔭᑎᓪᓗ ᐱᒋᕙᒃᑲ, ᓂᕐᑐᕐᓇᕐᓯᑎᑕᐅᕗᖓᓗ ᑕᒪᒃᑯᑎᒎᓇᖅ.

¹¹ ᓯᓚᕐᔪᐊᕐᒦᑦᑐᓐᓃᕐᐳᖓ, ᑖᒃᑯᐊᓕ ᓱᓕ ᓯᓚᕐᔪᐊᕐᒦᑉᐳᑦ, ᒫᓐᓇ ᐃᓕᖕᓄᑦ ᕾᕗᖓ. ᐊᑖᑖᒃ ᐃᑦᔪᕐᓁᑦᑐᑎᑦ, ᓴᐳᑎᓯᒪᓚᐅᒃᑭᑦ ᐱᔪᓐᓇᕐᓂᕐᓄᑦ, ᑖᒃᑯᐊ ᑐᓂᓚᐅᕐᑕᑎᑦ ᐅᕙᓐᓄᑦ ᐊᑕᐅᓯᐅᖁᓪᓗᒋᑦ, ᓲᕐᓗ ᐅᕙᒍᒃ ᐊᑕᐅᓯᐅᒐᓐᓄᒃ.

¹² ᑖᒃᑯᓇᓂ ᓇᔫᑎᓂᓐᓂ, ᓴᐳᑎᓯᒪᓚᐅᕐᐸᒃᑲ ᐱᔪᓐᓇᕐᓂᕐᓄᑦ, ᑖᒃᑯᐊ ᑐᓂᓚᐅᕐᑕᑎᑦ ᐅᕙᓐᓄᑦ; ᓴᐳᑎᓯᒪᓚᐅᕐᐸᒃᑲ, ᐊᑕᐅᓯᕐᒥᒡᓘᓐᓃᑦ ᐊᓯᐅᔪᖃᓐᖏᓚᖅ ᑖᓐᓇ ᑭᓯᒥ ᐊᓯᐅᔪᒃᓴᐅᓯᒪᔪᖅ ᐊᓯᐅᔪᑑᕗᖅ, ᐊᒡᓔᑦ ᓇᓚᐅᑦᓯᖁᓪᓗᒋᑦ.

¹³ ᒫᓐᓇᓕ ᐃᓕᖕᓄᑦ ᕾᕗᖓ; ᑍᒫᒡᓗ ᐅᖃᕐᐳᖓ ᓯᓚᕐᔪᐊᕐᒦᑎᓪᓗᖓ, ᖁᕕᐊᓱᖕᓂᕋ ᑖᒃᑯᓇᓐᖓᑦ ᐃᓗᒥᐅᑕᕆᔭᐅᓗᓂ ᓈᒻᒪᒃᓯᑦᓯᐊᖁᓪᓗᒍ.

¹⁴ ᐅᖃᐅᓯᕐᑎᑦ ᑐᓴᕐᑕᐅᑎᓚᐅᕐᐸᒃᑲ ᑖᒃᑯᓄᖓ; ᓯᓚᕐᔪᐊᕐᒥᐅᓂᑦ ᐆᒥᒋᔭᐅᕗᑦ ᓯᓚᕐᔪᐊᕐᒥᐅᓂᑦ ᐱᒋᔭᐅᖏᓐᓇᒥᒃ, ᐅᕙᖓᑦᑕᐅᖅ ᓯᓚᕐᔪᐊᕐᒥᐅᑦ ᐱᒋᖏᒻᒪᖓ.

¹⁵ ᑐᒃᓯᐊᓐᖏᓚᖓ ᑖᒃᑯᓂᖓ ᓯᓚᕐᔪᐊᕐᒥᑦ ᐲᕐᑕᐅᖁᔨᓗᖓ, ᓴᐳᑦᔨᓯᒪᖁᓪᓗᑎᓪᓕ ᑖᒃᑯᓂᖓ ᐱᐅᖏᑦᑐᒥᑦ ᓵᑖᓇᓯᒥᑦ.

¹⁶ ᓯᓚᕐᔪᐊᕐᒥᐅᑦ ᑖᒃᑯᐊ ᐱᒋᖏᒻᒪᒋᑦ, ᐅᕙᖓᑦᑕᐅᖅ ᓯᓚᕐᔪᐊᕐᒥᐅᑦ ᐱᒋᖏᒻᒪᖓ.

¹⁷ ᐃᑦᔪᕐᓁᑎᒃᑭᑦ ᓱᓕᓂᕐᓄᑦ; ᐅᖃᐅᓯᕐᑎᑦ ᓱᓕᖕᒪᑕ.

¹⁸ ᓯᓚᕐᔪᐊᕐᒧᑦ ᑎᓕᓚᐅᕋᕕᖓ, ᑍᒫᒃᑕᐅᖅ ᓯᓚᕐᔪᐊᕐᒧᑦ ᑎᓕᕙᒃᑲ.

¹⁹ ᑖᒃᑯᐊ ᐱᑦᔪᑎᒋᓪᓗᒋᑦ ᐃᓕᖕᓄᑦ ᑐᓂᕗᖓ, ᑖᒃᑯᐊᑦᑕᐅᖅ ᓱᓕᔪᒥᒃ ᑐᓂᖁᓪᓗᒋᑦ ᐃᓕᖕᓄᑦ.

²⁰ “ᑖᒃᑯᐊᑐᐊᕐᓕ ᑐᒃᓯᐅᑎᓐᖏᓚᒃᑲ, ᑍᒃᑯᐊᓕᑦᑕᐅᖅ ᐅᖃᐅᓯᖏᓐᓄᑦ ᐅᒃᐱᓕᕈᒫᕐᑐᑦ ᐅᕙᓐᓄᑦ ᑐᒃᓯᐅᑎᕙᒃᑲ.

²¹ ᑐᒃᓯᐊᕐᐳᖓ ᑖᒃᑯᐊᓕᒫᑦ ᐊᑕᐅᓯᐅᖁᓪᓗᒋᑦ; ᐃᕝᕕᑦᑕᐅᖅ ᐊᑖᑖᒃ, ᐃᓗᓐᓃᓐᓇᕕᑦ, ᐅᕙᖓᓗ ᐃᓗᖕᓃᓐᓇᒪ, ᑖᒃᑯᐊᑦᑕᐅᖅ ᐃᓗᑦᑎᓐᓃᖁᓪᓗᒋᑦ, ᓯᓚᕐᔪᐊᕐᒥᐅᑦ ᐅᒃᐱᓕᖁᓪᓗᒋᑦ ᑎᓕᓚᐅᕋᕕᖓ.

²² ᓂᕐᑐᕐᓇᕐᓂᖅ ᐅᕙᓐᓄᑦ ᑐᓂᓚᐅᕐᑍᑦ ᑐᓂᓚᐅᕐᐸᕋ ᑖᒃᑯᓄᖓ, ᑖᒃᑯᐊ ᐊᑕᐅᓯᐅᖁᓪᓗᒋᑦ ᐅᕙᑦᑎᑐᑦ,

²³ ᑖᒃᑯᓇᓃᓪᓗᖓ ᐃᕝᕕᓪᓗ ᐅᕙᓐᓃᓪᓗᑎᑦ, ᐊᑕᐅᓯᓪᓚᕆᐅᓕᖁᓪᓗᒋᑦ, ᓯᓚᕐᔪᐊᕐᒥᐅᑦ ᖃᐅᔨᓕᖁᓪᓗᒋᑦ ᑎᓕᓚᐅᕋᕕᖓ ᓇᒡᓕᒋᒐᕕᒋᓪᓗ ᐅᕙᓐᓂᒃ ᓇᒡᓕᒍᓱᖕᓂᕐᑐᑦ.

²⁴ “ᐊᑖᑖᒃ, ᐱᔪᒪᕗᖓ ᑖᒃᑯᐊ ᐅᕙᓐᓄᑦ ᑐᓂᓚᐅᕐᑕᑎᑦ, ᐅᕙᓐᓃᖁᓪᓗᒋᑦ ᓇᔪᕐᑕᓐᓂ, ᓂᕐᑐᕐᓇᕐᓂᕐᒥᒡᓗ ᐅᕙᓐᓄᑦ ᑐᓂᓚᐅᕐᑕᕐᓂᒃ ᑕᑯᖁᓪᓗᒋᑦ; ᐅᕙᓐᓂᒃ ᓇᒡᓕᒍᓱᖕᓂᕐᓄᑦ ᓯᓚᕐᔪᐊᖅ ᐱᓐᖑᕐᑎᑕᐅᓚᐅᖅᑳᕐᑎᓐᓇᒍ.

²⁵ ᓈᓛᒎᕐᑐᑎᑦ ᐊᑖᑖᒃ, ᓯᓚᕐᔪᐊᕐᒥᐅᑦ ᖃᐅᔨᒪᓐᖏᒻᒪᑕ ᐃᓕᖕᓂᒃ, ᐅᕙᖓᓕ ᖃᐅᔨᒪᕙᒋᑦ; ᑖᒃᑯᐊᓗ ᖃᐅᔨᕗᑦ ᑎᓕᓚᐅᕋᕕᖓ.

²⁶ ᑖᒃᑯᓄᖓ ᖃᐅᔨᔭᐅᑎᑉᐸᒋᑦ, ᓱᓕ ᖃᐅᔨᑎᑉᐸᓕᐊᔪᒪᕙᒃᑲ, ᓇᒡᓕᖕᓂᖅ ᓇᒡᓕᖕᓂᕆᔧᑦ ᐅᕙᓐᓄᑦ ᐃᓗᖏᓐᓃᖁᓪᓗᒍ, ᐅᕙᖓᓗ ᐃᓗᖏᓐᓃᓪᓗᖓ.”