ᔪᐊᓇᓯᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦᔩᓱᓯᐅᑉ ᐃᓕᓐᓂᐊᕐᑎᒥ ᐃᑎᒐᖏᓐᓂᒃ ᐅᐊᓴᕐᓂᖓ 1 ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᒃᓴᐅᑉ ᓯᕗᓂᖓᓂ, ᔩᓱᓯ ᖃᐅᔨᒪᒐᒥ ᐊᑖᑕᒥᓄᑦ ᐊᐅᓪᓚᕐᕕᒃᓴᖓ ᓯᓚᕐᔪᐊᕐᒥᑦ ᓇᓪᓕᐅᑎᓕᕐᒪᑦ, ᓇᖕᒥᓂᖅ ᐃᓄᖁᑎᓂ ᓇᒡᓕᒋᒐᒥᒋᑦ ᓯᓚᕐᔪᐊᕐᒦᑦᑐᑦ, ᐃᓱᓕᑦᑎᕕᒋᔭᓂ ᑎᑭᓪᓗᒍ ᓇᓪᓕᒌᓐᓇᓚᐅᕐᐰᑦ. 2 ᐅᓐᓄᒍᒻᒥᑕᖃᑎᒌᒃᑎᓪᓗᒋᑦ, ᓵᑖᓇᓯ ᐃᓱᒪᑖᕐᑎᑦᓯᓯᒪᓕᕇᕐᒪᑦ ᔫᑕᓯ ᐃᔅᑲᕆᐊᑎᒥᒃ, ᓮᒨᓂᐅᑉ ᐃᕐᓂᖓᓂᒃ, ᔩᓱᓯᒥᒃ ᐱᔭᐅᒃᑬᖁᓪᓗᒍ, 3 ᔩᓱᓯ, ᖃᐅᔨᒪᒐᒥ ᐊᑖᑕᐅᑉ ᓱᓇᓕᒫᓂᒃ ᑐᓂᓯᕕᒋᖕᒪᒍ, ᒎᑎᒥᓪᓗ ᐱᓚᐅᕋᒥ ᒎᑎᒧᓪᓗ ᐂᓂᐊᕋᒥ. 4 ᓂᕆᕕᖕᒥᑦ ᓂᑯᕕᓐᓇᒥ, ᐊᓐᓄᕌᓂ ᓯᓚᓪᓖᑦ ᐲᕐᓗᒋᑦ, ᐊᓪᓚᕈᑎᒥᒃ ᕿᑎᕐᒥᓄᑦ ᕿᓚᒃᓯᓪᓗᓂ. 5 ᐅᐊᓴᕐᕕᖕᒧᑦ ᐃᒥᕐᒥᒃ ᑯᕕᓯᓪᓗᓂ, ᐃᓕᓐᓂᐊᕐᑎᑦ ᐃᑎᒐᖏᓐᓂᒃ ᐅᐊᓴᓕᕐᐳᖅ, ᐊᓪᓚᕈᑎᒧᑦ ᕿᑎᕐᒥᐅᑕᕆᔭᒥᓄᑦ ᐊᓪᓚᕐᑎᕐᓗᒋᑦ. 6 ᑕᕝᕙ ᓮᒨᓂ ᐲᑦᑐᕉᓯᒧᑦ ᑎᑭᐅᑎᖕᒪᑦ; ᐲᑦᑐᕉᓯᐅᑉ ᐅᖃᐅᑎᕚ: “ᐊᑕᓃᖅ ᐃᑎᒐᒃᑲ ᐅᐊᓴᕐᓂᐊᕐᐱᒌᑦ?” 7 ᔩᓱᓯᐅᑉ ᑭᐅᕚ, “ᒫᓐᓇ ᑐᑭᓯᖏᒃᑲᓗᐊᕐᐳᑎᑦ ᓱᖕᒪᑦ ᑍᒤᓕᐅᕐᒪᖔᕐᒪ, ᑭᖑᕐᖓᒍᓪᓕ ᑐᑭᓯᔪᒫᕐᐳᑎᑦ.” 8 ᐲᑦᑐᕉᓯᐅᑉ ᐅᖃᐅᑎᕚ, “ᐃᑎᒐᓐᓂᒃ ᐅᐊᓴᓚᐅᕐᓯᒪᓂᐊᓐᖏᓚᑎᑦ.” ᔩᓱᓯᐅᑉ ᑭᐅᕚ, “ᐃᑎᒐᑎᑦ ᐅᐊᓴᕐᓂᐊᓐᖏᒍᒃᑭᑦ, ᐃᓚᒋᔪᓐᓃᕐᓂᐊᕐᐸᕐᒪ.” 9 ᑕᕝᕙ ᓮᒨᓂ ᐲᑦᑐᕉᓯᐅᑉ ᐅᖃᐅᑎᕚ, “ᐊᑕᓃᖅ, ᐃᑎᒐᒃᑲᓕ ᑖᒃᑯᑑᖏᑦᑐᑦ ᐊᒡᒐᒃᑲᓕ ᓂᐊᖁᕋᓗ ᐅᐊᓴᖃᓯᐅᑎᓕᒃᑭᑦ!” 10 ᔩᓱᓯᐅᑉ ᐅᖃᐅᑎᕚ, “ᓇᓪᓕᐊᑦ ᑎᒥᒥᓂᒃ ᐃᓘᓐᓈᓐᓂᒃ ᐅᐊᓴᕐᓯᒪᔪᖅ ᓴᓗᒪᓕᕋᒥ ᐅᐊᓴᒃᑲᓐᓂᕆᐊᖃᓐᖏᓚᖅ, ᐃᑎᒐᖏᑐᐊᖅ ᐅᐊᓴᕆᐊᓕᑑᕗᑦ, ᑕᒪᑦᓯ ᓴᓗᒪᕗᓯ ᐊᑕᐅᓯᕐᓕ ᐃᓚᒋᔭᓯ ᓴᓗᒻᒪᕐᓴᕆᐊᖃᕐᑐᑐᕗ.” 11 ᔩᓱᓯ ᖃᐅᔨᒪᓚᐅᕐᒪᑦ ᓇᓪᓕᐊᑦᑕ ᐱᔭᐅᑎᓐᓂᐊᕐᒪᖔᒍ; ᑍᒤᒻᒪᑦ ᐅᖃᕐᐳᖅ, “ᐃᓚᓯᓕ ᓴᓗᒪᕐᓴᕆᐊᖃᕐᑐᑑᕗᖅ.” 12 ᐃᑎᒐᖏᑦ ᐅᐊᓴᕇᕋᒥᒋᑦ, ᐊᓐᓄᕌᓂ ᓯᓚᓪᓖᑦ ᐊᑎᒋᕔᑦ, ᐅᑎᕐᓗᓂ ᐃᓂᒋᔭᒥᓄᑦ, ᐅᖃᐅᑎᓪᓗᒋᑦ, “ᑐᑭᓯᕕᓰ ᖃᓄᐃᓕᐅᕐᒪᖔᕐᒪ ᐃᓕᑦᓯᓐᓄᑦ? 13 ᐊᔪᕆᕐᑐᐃᔨᒥᒃ ᐊᑕᓂᕐᒥᒡᓗ ᑍᕙᑦᓯᓐᖓ; ᓇᓛᒍᑦ ᐅᖃᕐᐳᓯ, ᑖᓐᓇᐅᒐᒪ. 14 ᐅᕙᖓ ᑕᕝᕙ ᐊᑕᓂᓯ ᐊᔪᕆᕐᑐᐃᔨᓯᓗ, ᐃᑎᒐᑦᓯᓐᓂᒃ ᐅᐊᓴᕐᐳᖓ, ᐃᓕᑦᓯᑦᑕᐅᖅ ᐃᑎᒐᑦᓯᓐᓂᒃ ᐅᐊᓴᖃᑦᑕᐅᑎᔪᒃᓴᐅᒋᕗᓯ. 15 ᒪᓕᒐᒃᓴᑦᓯᓐᓂᒃ ᐱᓇᓱᐊᕐᕕᒋᕙᑦᓯ, ᑍᒤᓕᐅᖁᓪᓗᓯ ᓲᕐᓗ ᐱᓇᓱᐊᕐᕕᒋᒐᑦᓯ. 16 ᓱᓕᔪᒥᒃ ᐅᖃᐅᑎᕙᑦᓯ, ᐱᔨ ᐊᖏᓂᕐᓴᐅᓐᖏᓚᖅ ᐊᖓᔪᖅᑳᒥᓂᑦ; ᑎᓕᔭᐅᓯᒪᔪᕐᓗ ᐊᖏᓂᕐᓴᐅᖏᓐᓂᕗᖅ ᑎᓕᔨᒥᓂᑦ. 17 ᑕᒪᓐᓇ ᖃᐅᔨᒐᑦᓯᐅᒃ, ᓮᒪᓇᕐᑐᒦᓕᕋᔭᕐᐳᓯ ᐊᑐᓕᕈᑦᓯᐅᒃ. 18 “ᑕᒪᑐᒥᖓ ᐅᖃᐅᑎᔧᓐᓇᕆᓐᖏᓚᑦᓯ; ᖃᐅᔨᒪᒐᒃᑭᑦ ᓂᕈᐊᕐᓯᒪᔭᒃᑲ; ᐊᒡᓔᓪᓕ ᓇᓚᐅᑦᓯᔭᕆᐊᖃᕐᒪᑕ ᐅᖃᕐᑐᑦ: ‘ᓂᕆᖃᑎᒋᔭᒪ ᐊᑭᕋᕐᑐᓕᕐᐹᖓ.’ 19 ᒫᓐᓇ ᑕᒪᑐᒥᖓ ᐅᖃᐅᑎᕙᑦᓯ, ᓱᓕ ᐱᔪᖃᓚᐅᕐᑎᓐᓇᒍ, ᑕᒪᓐᓇ ᐊᑐᓕᕐᐸᑦ ᐅᕙᓐᓄᑦ ᐅᒃᐱᓕᖁᓪᓗᓯ, ‘ᐅᕙᖓ ᑖᓐᓇᐅᒐᒪ.’ 20 ᓱᓕᔪᒥᒃ ᐅᖃᐅᑎᕙᑦᓯ, ᑎᓕᔭᓐᓂᒃ ᐃᓚᓕᐅᕐᓯᔪᖅ ᑖᓐᓇ ᐅᕙᓐᓂᒃ ᐃᓚᓕᐅᕐᓯᒋᕗᖅ; ᐅᕙᓐᓂᒡᓕ ᐃᓚᓕᐅᕐᓯᔪᖅ ᑎᓕᔨᓐᓂᒃ ᐃᓚᓕᐅᕐᓯᒋᕗᖅ.” ᔩᓱᓯᐅᑉ ᓇᓗᓁᕐᓯᓂᖓ ᐱᔭᐅᒃᑲᕐᑕᐅᓂᐊᕐᓂᕐᒥᓂᒃ ᒫᑎᐅᓯ 26:20-25 ; ᒫᑯᓯ 14:17-21 ; ᓘᑲᓯ 22:21-23 21 ᔩᓱᓯᓕ ᑕᒪᒃᑯᓂᖓ ᐅᖃᕇᕋᒥ, ᐊᓂᕐᓂᒃᑯᑦ ᕿᒃᓵᖕᓂᕐᒧᑦ ᐊᖏᔪᒧᑦ ᑎᑭᑕᐅᕗᖅ, ᓇᓗᓁᕐᓯᓕᕐᐳᖅ, “ᓱᓕᔪᒥᒃ ᐅᖃᐅᑎᕙᑦᓯ, ᐃᓚᑦᓯ ᐃᓚᖓᑦᑕ ᐱᔭᐅᑎᓐᓂᐊᕐᐹᖓ.” 22 ᐃᓕᓐᓂᐊᕐᑏᑦ ᐃᒻᒥᖕᓄᑦ ᑕᑯᓴᖃᑦᑕᐅᑎᕗᑦ, ᓇᓗᓪᓗᑎᒃ ᓇᓪᓕᐊᓐᓂᒃ ᐅᖃᐅᓯᖃᕐᒪᖔᑦ. 23 ᐃᓕᓐᓂᐊᕐᑎᖏᑕᓕ ᐃᓚᖓᑦ, ᔩᓱᓯᐅᑉ ᓇᒡᓕᒋᔭᖓ, ᐃᒃᓯᕙᕗᖅ ᔩᓱᓯᐅᑉ ᑭᒡᓕᖓᓂ; 24 ᓮᒨᓂ ᐲᑦᑐᕉᓯᐅᑉ ᐃᔨᒻᒥᓄᑦ ᓇᓗᓁᕐᓯᕕᒋᓪᓗᓂᐅᒃ ᐅᖃᐅᑎᕚ, “ᐊᐱᕆᓚᐅᕈᒃ ᓇᓪᓕᐊᓐᓂᒃ ᐅᖃᐅᓯᖃᕐᒪᖔᑦ.” 25 ᑖᑦᓱᒪ ᐃᓕᓐᓂᐊᕐᑎᐅᑉ ᔩᓱᓯ ᐄᒐᕐᕕᒋᓪᓗᓂᐅᒃ ᐅᖃᐅᑎᕚ, “ᐊᑕᓃᖅ ᑭᓇᐅᕙ?” 26 ᔩᓱᓯᐅᑉ ᑭᐅᕚ, “ᓂᐊᖂᔭᒥᒃ ᒥᓱᒃᓯᓗᖓ ᑐᓂᓯᕕᒋᔭᕋ ᑖᓐᓇᐅᓂᐊᕐᐳᖅ.” ᑕᕝᕙ ᔩᓱᓯ ᓂᐊᖂᔭᒥᒃ ᐊᕕᒃᓯᓪᓗᓂ ᒥᓱᒃᐹ, ᑐᓂᓪᓗᒍ ᔫᑕᓯᒧᑦ, ᓮᒨᓂᐅᑉ ᐃᔅᑲᕆᐊᑎᐅᑉ ᐃᕐᓂᖓᓄᑦ. 27 ᔫᑕᓯᐅᑉ ᓂᐊᖂᔭᖅ ᑎᒍᖕᒪᒍ, ᓵᑖᓇᓯᐅᑉ ᐃᑎᕐᕕᒋᕚ. ᔩᓱᓯᐅᑉ ᐅᖃᐅᑎᕚ, “ᑐᐊᕕᕐᓗᑎᑦ ᐱᔭᕆᐊᖃᕐᑍᑦ, ᐱᓇᓱᐊᓕᕈᒃ.” 28 ᓂᕆᕕᖕᒦᖃᑎᒋᔭᖏᓪᓕ ᑐᑭᓯᔪᖃᓐᖏᓚᑦ ᓱᖕᒪᑦ ᔩᓱᓯᐅᑉ ᑍᒫᒃ ᐅᖃᐅᑎᖕᒪᖔᒍ. 29 ᔫᑕᓯ ᑲᒪᔨᒋᔭᐅᖕᒪᑦ ᑮᓇᐅᔭᖃᐅᑎᖓᓐᓂᒃ ᐃᒃᐱᐊᕐᔪᖕᒥᒃ; ᐃᓕᓐᓂᐊᕐᑏᑦ ᐃᓚᖏᑦ ᐃᓱᒪᕗᑦ ᔩᓱᓯ ᓂᐅᕕᕆᐊᖁᔨᓇᓱᒋᓪᓗᒍ ᐊᑐᕆᐊᖃᕐᑕᖏᓐᓂᒃ ᓇᓪᓕᐅᓐᓂᕐᓯᐅᓕᕈᑎᒃ; ᐅᕝᕙᓘᓐᓃᑦ ᑐᓂᓯᔭᕐᑐᖁᔭᐅᓇᓱᒋᕚᑦ ᐊᔪᕐᓴᕐᑐᓄᑦ. 30 ᔫᑕᓯᐅᑉ ᓂᐊᖂᔭᖅ ᐄᒐᒥᐅᒃ ᑕᕝᕔᓐᓇᖅ ᐊᓂᕗᖅ; ᐅᓐᓄᐊᖑᕗᕐᓗ. ᐱᖁᔭᖅ ᓄᑖᖅ 31 ᔫᑕᓯ ᐊᓂᖕᒪᑦ, ᔩᓱᓯ ᐅᖃᕐᐳᖅ, “ᒫᓐᓇ ᐃᓅᑉ ᐃᕐᓂᖓ ᓂᕐᑐᕐᓇᕐᑎᑕᐅᕗᖅ, ᒎᑎ ᑖᑦᓱᒨᓇ ᓂᕐᑐᕐᓇᕐᑎᑕᐅᒋᕗᖅ; 32 ᒎᑎ ᓂᕐᑐᕐᓇᕐᑎᑕᐅᒃᐸᑦ ᑖᑦᓱᒨᓇ, ᑕᕝᕙ ᐃᓅᑉ ᐃᕐᓂᖓ ᒎᑎᐅᑉ ᓂᕐᑐᕐᓇᕐᑎᓐᓂᐊᕆᕚ ᐃᒻᒥᒍᑦ, ᓂᕐᑐᕐᓇᕐᑎᑲᐅᑎᒋᓂᐊᕐᐹᓗ. 33 ᕿᑐᕐᖓᒃᑲ, ᐊᑯᓂᐅᖏᑦᑐᖅ ᓇᔪᓕᕐᐸᑦᓯ. ᕿᓂᕈᒫᕐᐸᑦᓯᓐᖓ; ᓲᕐᓗ ᔫᑎᓄᑦ ᐅᖃᓚᐅᕋᒪ, ᑍᒫᒃᑕᐅᖅ ᐃᓕᑦᓯᓐᓄᑦ ᒫᓐᓇ ᐅᖃᕐᐳᖓ, ‘ᐅᐸᖕᓂᐊᕐᑕᓐᓄᑦ ᐂᔪᓐᓇᖏᓐᓇᑦᓯ.’ 34 ᐱᖁᔭᒥᒃ ᓄᑖᒥᒃ ᑐᓂᓯᕕᒋᕙᑦᓯ, ᓇᒡᓕᒃᑎᒌᖁᓪᓗᓯ; ᓲᕐᓗ ᓇᒡᓕᒋᓚᐅᕋᑦᓯ, ᑍᒫᒃᑕᐅᖅ ᐃᓕᑦᓯᓐᓄᑦ ᓇᒡᓕᒃᑎᒌᒃᑐᒃᓴᐅᒋᕗᓯ. 35 ᐃᓕᑦᓯᓐᓄᑦ ᓇᒡᓕᒃᑎᒌᒍᑦᓯ, ᑕᒪᑐᒨᓇ ᐃᓄᓕᒫᑦ ᑐᑭᓯᔪᒫᕐᐳᑦ ᐅᕙᓐᓄᑦ ᐃᓕᓐᓂᐊᕐᑎᐅᓂᑦᓯᓐᓂᒃ.” ᔩᓱᓯᐅᑉ ᓇᓗᓁᕐᓯᓂᖓ ᐲᑦᑐᕉᓯᐅᑉ ᖃᐅᔨᒪᖏᓐᓂᕋᕐᓂᐊᕐᓂᖓᓂᒃ ᒫᑎᐅᓯ 26:31-35 ; ᒫᑯᓯ 14:27-31 ; ᓘᑲᓯ 22:31-34 36 ᑕᕝᕙ ᓮᒨᓂ ᐲᑦᑐᕉᓯᐅᑉ ᐅᖃᐅᑎᕚ, “ᐊᑕᓃᖅ ᓇᒧᓐᖓᕐᓂᐊᕐᐲᑦ?” ᔩᓱᓯᐅᑉ ᑭᐅᕚ, “ᐅᐸᖕᓂᐊᕐᑕᓐᓄᑦ ᒫᓐᓇ ᒪᓕᒍᓐᓇᓐᖏᓚᕐᒪ; ᑭᖑᕐᖓᒍᓪᓕ ᒪᓕᒍᒫᕐᐸᕐᒪ.” 37 ᐲᑦᑐᕉᓯᐅᑉ ᐅᖃᐅᑎᕚ, “ᐊᑕᓃᖅ ᓱᖕᒪᑦ ᒫᓐᓇ ᒪᓕᒍᓐᓇᓐᖏᓚᒌᑦ? ᐃᓕᖕᓂᒃ ᑐᖁᑕᐅᑦᔪᑎᖃᕋᓗᐊᕈᒪ ᖃᓄᐃᒃᓴᓐᖏᓚᖓ.” 38 ᔩᓱᓯᐅᑉ ᑭᐅᕚ, “ᑐᖁᑕᐅᓂᕐᒧᑦ ᐊᑐᐃᓐᓇᐅᓕᕐᐲᑦ ᐱᑦᔪᑎᒋᓗᖓ? ᓱᓕᔪᒥᒃ ᐅᖃᐅᑎᕙᒋᑦ, ᐊᖑᑎᕕᐊᖅ ᓂᓪᓕᖅᑳᕐᑎᓐᓇᒍ, ᐱᖓᓱᐃᕐᑐᕐᓗᑎᑦ ᐅᕙᓐᓂᒃ ᖃᐅᔨᒪᖏᓐᓂᕋᕐᓂᐊᕐᐳᑎᑦ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society