ᔪᐊᓇᓯᐅᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐅᕐᓱᕐᑎᕐᑕᐅᓂᖓ ᐱᑕᓂᒥ

¹ ᐅᓪᓗᑦ ᐱᖓᓲᔪᕐᑐᑦ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᐅᑉ ᓯᕗᓂᖓᓂ, ᔩᓱᓯ ᐱᑕᓂᒧᐊᕐᐳᖅ, ᓛᓴᕉᓯᐅᑉ ᑐᖁᖓᔪᓂᑦ ᐆᒻᒪᕐᑎᓚᐅᕐᑕᖓᑕ ᓄᓇᖓᓄᑦ.

² ᑕᕝᕙᓂ ᐅᓐᓄᒍᒻᒥᑕᕐᓂᐊᕐᑕᖓᓂᒃ ᓂᕿᒃᓴᓕᐅᕐᐹᑦ; ᒫᑕ ᐃᑲᔪᕐᐳᖅ ᐋᖅᑭᒃᓱᐃᖃᑕᐅᓪᓗᓂ; ᓛᓴᕉᓯ ᐃᒃᓯᕙᖃᑕᐅᕗᖅ ᓵᒥ ᓂᕆᕕᒋᓂᐊᕐᑕᖓᓐᓂ.

³ ᑕᕝᕙ ᒥᐊᕆ ᑎᐱᑦᓯᐊᕆᒃᓴᐅᒻᒥᒃ ᐊᑭᑐᔪᒥᒃ ᑎᒍᓯᓪᓗᓂ ᐊᑕᐅᓯᕐᒥᒃ ᐅᖁᒤᓐᓂᖃᕐᑐᒥᒃ, ᐱᕈᕐᑐᕕᓂᕐᓂᑦ ᐱᓯᒪᔪᒥᒃ ᐃᓚᓯᒪᖏᑦᑐᒥᒃ, ᔩᓱᓯᐅᑉ ᐃᑎᒐᖏᓐᓄᑦ ᑯᕕᓯᓪᓗᓂ ᓄᔭᕐᒥᓄᑦ ᐊᓪᓚᕐᑎᕐᐰᑦ; ᑎᐱᑦᓯᐊᕆᒃᓴᐅᑎᐅᑉ ᑎᐱᑦᓯᐊᕆᖕᓂᖓᓄᑦ ᐃᒡᓗᓕᒫᖅ ᑎᑉᐸᒃᐳᖅ.

⁴ ᔫᑕᓯᓕ ᐃᔅᑲᕆᐊᑦ, ᐃᓕᓐᓂᐊᕐᑎᖏᑕ ᐃᓚᖓᑦ, ᔩᓱᓯᒥᒃ ᐱᔭᐅᑎᑦᓯᓛᕐᑐᖅ; ᐅᖃᕐᐳᖅ:

⁵ “ᓱᖕᒪᓄᓇ ᑎᐱᑦᓯᐊᕆᒃᓴᐅᑦ ᓂᐅᕐᕈᑎᒋᔭᐅᓐᖏᓚᖅ ᓯᐅᓪᕕᕆᓄᑦ 300ᓄᑦ ᑮᓇᐅᔭᕐᑖᕈᑕᐅᒐᔭᕐᑐᖅ, ᑖᒃᑯᐊᓗ ᐊᔪᕐᓴᕐᑐᓄᑦ ᑐᓂᔭᐅᖔᕐᓗᑎᒃ?”

⁶ ᑍᒫᒃ ᐅᖃᕐᐳᖅ, ᐊᔪᕐᓴᕐᑐᓂᒃ ᐃᑲᔪᕈᒪᓂᕐᒨᖏᑦᑐᖅ ᑎᒡᓕᒐᓲᖑᓂᕐᒥᓄᓪᓕ; ᑮᓇᐅᔭᖃᐅᑎᒥᒃ ᐃᒃᐱᐊᕐᔪᖕᒥᒃ ᐱᓯᒪᔨᐅᒐᒥ, ᑕᕝᕙᓐᖓᑦ ᓇᖕᒥᓂᖅ ᐊᑐᕐᓂᐊᕐᑕᒥᓂᒃ ᑎᒍᓯᑐᐃᓐᓇᕐᐸᒃᑲᒥ.

⁷ ᔩᓱᓯ ᐅᖃᕐᐳᖅ, “ᐅᓇ ᐊᕐᓇᖅ ᑲᒪᒋᓐᖏᓚᐅᕐᓯᐅᒃ, ᑍᒤᓕᐅᕈᑎᖃᕐᒪᑦ ᐅᓪᓗᒧᑦ ᐃᓗᕕᕐᑕᐅᓂᒃᓴᓐᓄᑦ.

⁸ ᐊᔪᕐᓴᕐᑐᓂᒃ ᐃᓅᖃᑎᕾᓐᓇᕐᓂᐊᕐᐳᓯ, ᐅᕙᓐᓂᒃᓕ ᓇᔪᕐᑎᕾᓐᓇᓂᐊᓐᖏᓚᓯ.”

ᓛᓴᕉᓯᐅᑉ ᑐᖁᑕᒃᓴᐅᖁᔭᐅᓂᖓ

⁹ ᑕᕝᕙ ᔫᑎᑦ ᐊᒥᓱᑦ ᖃᐅᔨᒪᓕᕋᒥᒃ ᔩᓱᓯᐅᑉ ᐱᑕᓂᒦᓐᓂᖓᓂᒃ, ᑕᕝᕗᓐᖓᕐᐳᑦ, ᔩᓱᓯᒥᑐᐊᖅ ᐱᑦᔪᑎᖃᕋᑎᒃ ᓛᓴᕉᓯᒥᒡᓕᑦᑕᐅᖅ ᑕᑯᔪᒪᓪᓗᑎᒃ, ᔩᓱᓯᐅᑉ ᑐᖁᖓᔪᓂᑦ ᒪᑭᑎᓚᐅᕐᑕᖓᓂᒃ.

¹⁰ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐃᓱᒪᖃᓕᕐᐳᑦ ᓛᓴᕉᓯ ᑐᖁᖃᓯᐅᑎᔪᒪᓪᓗᒍ,

¹¹ ᓛᓴᕉᓯ ᐱᑦᔪᑎᒋᓪᓗᒍ ᔫᑎᑦ ᐊᒥᓱᑦ ᑲᒪᓗᐊᕈᓐᓃᕐᒪᑕ ᑐᓂᕐᕈᓯᕐᑎᑦᓯᔨᓂᒃ, ᐅᒃᐱᕆᔭᖃᕐᓂᕐᓴᐅᓕᕐᒪᑕ ᔩᓱᓯᒥᒃ.

ᔩᓱᓯᐅᑉ ᓂᕐᑐᕐᑕᐅᓂᖓ ᔨᕉᓴᓕᒻᒧᑦ ᐃᑎᓕᕐᑎᓪᓗᒍ

¹² ᖃᐅᑎᓪᓗᒍ ᐃᓄᒋᐊᒃᑐᕐᔪᐊᑦ ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕆᐊᕐᓯᒪᔪᑦ ᑐᓴᕐᐳᑦ ᔩᓱᓯᐅᑉ ᔨᕉᓴᓕᒻᒧᐊᓕᕐᓂᖓᓂᒃ.

¹³ ᑕᕝᕙ ᓇᐹᕐᑐᑦ ᐹᒦᑦ ᐊᕙᓚᖓᔪᖏᓐᓂᒃ ᓇᑲᑦᓯᓪᓗᑎᒃ ᐸᕐᕆᐊᓕᕐᐳᑦ, ᕾᒐᓛᕐᓗᑎᒃ, “ᕼᐆᓵᓇ! ᓂᕐᑐᕐᑕᐅᓕ ᐊᑕᓂᐅᑉ ᐊᑎᖓᓂ ᑎᑭᑦᑐᖅ, ᐊᖓᔪᖅᑳᕐᔪᐊᖅ ᐃᓴᕆᐊᓕᒥ!”

¹⁴ ᔩᓱᓯ ᓯᐅᑎᖅᑯᕐᑐᔫᑉ ᓄᕐᕋᖓᓂᒃ ᑎᒍᓯᓪᓗᓂ ᖄᖓᓄᑦ ᐃᑭᕗᖅ; ᐊᒡᓚᖕᓂ ᑎᑎᕋᕐᓯᒪᖕᒪᑦ,

¹⁵ “ᓯᕘᕋᓂᐊᕋᓯ, ᓮᐅᓂᐅᑉ ᐸᓂᖏᑦ; ᑕᑯᒋᑦ, ᐊᖓᔪᖅᑳᕐᔪᐊᓯ ᑎᑭᓕᕐᐳᖅ, ᓯᐅᑎᖅᑯᕐᑐᔫᑉ ᓄᕐᕋᖓᑕ ᖄᖓᓂ ᐃᑭᒪᓪᓗᓂ!”

¹⁶ ᐃᓕᓐᓂᐊᕐᑎᖏᑕᓕ ᑕᒪᓐᓇ ᑐᑭᓯᓚᐅᓐᖏᓛᑦ ᐊᑐᕐᑎᓪᓗᒍ; ᔩᓱᓯ ᓂᕐᑐᕐᓇᕐᓂᕐᔪᐊᕐᒧᑦ ᒪᑭᓯᒪᓕᕐᒪᑦ, ᐃᖅᑬᓚᐅᕐᐳᑦ ᐊᒡᓚᖕᓂ ᑎᑎᕋᕐᓯᒪᔪᖃᕐᓂᖓᓂᒃ ᑖᑦᓱᒥᖓ ᖃᓄᖅ ᐱᓂᐊᕐᕕᐅᔪᒫᕐᓂᖓᓂᒃ.

¹⁷ ᐃᓄᒐᓮᑦ ᓛᓴᕉᓯᒥᒃ ᑐᖁᖓᔪᓂᑦ ᐆᒻᒪᕐᑎᑦᓯᑎᓪᓗᒍ ᓇᔫᑎᓚᐅᕐᑐᑦ ᐅᓂᒃᑳᕐᐸᓪᓕᐊᑐᐃᓐᓇᓚᐅᕐᐳᑦ.

¹⁸ ᑍᒤᒻᒪᑦ ᐃᓄᒋᐊᒃᑐᕐᔪᐊᑦ ᐸᕐᕆᐊᓚᐅᕐᐹᑦ ᑐᓴᕐᓯᒪᒐᒥᒃ ᑕᒪᑐᒥᖓ ᓇᓗᓁᒃᑯᑕᕐᒥᒃ ᐱᓇᓱᐊᓚᐅᕐᓂᖓᓂᒃ.

¹⁹ ᑕᕝᕙ ᐹᕆᓯᑦ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, “ᑕᑯᒋᑦ ᖃᓄᐃᓕᐅᕐᓂᕗᑦ ᐱᕙᓪᓖᓯᒪᖏᑦᓯᐊᕐᐳᖅ; ᑕᑯᒋᑦ, ᐃᓄᓕᒫᑦ ᒪᓕᓕᕐᐳᑦ ᔩᓱᓯᒥᒃ.”

ᒍᕇᑭᑦ ᐃᓚᖏᑕ ᕿᓂᕐᓂᖓᑦ ᔩᓱᓯᒥᒃ

²⁰ ᒍᕇᑭᓪᓕ ᐃᓚᖏᑦ ᐃᓚᒋᔭᐅᓚᐅᕆᕗᑦ ᓇᓪᓕᐅᓐᓂᕐᓯᐅᕆᐊᕐᑐᕐᑐᓄᑦ ᔨᕉᓴᓕᒻᒧᑦ.

²¹ ᑖᒃᑯᐊᓗ ᐱᓕᑉᐴᓯᒧᐊᕐᐳᑦ, ᑖᓐᓇ ᐱᑦᓮᑕᒥᑦ ᒐᓕᓕᐊᒦᑦᑐᒥᑦ ᐱᓯᒪᖕᒪᑦ, ᐅᖃᐅᑎᓪᓗᒍ, “ᔩᓱᓯᒥᒃ ᑕᑯᔪᒪᕗᒍᑦ.”

²² ᐱᓕᑉᐴᓯᐅᑉ ᐋᓐᑐᕉ ᐅᖃᐅᑎᔭᕐᑐᕐᐹ; ᑖᒃᑯᐊᒃ ᒪᕐᕉᓪᓗᑎᒃ ᔩᓱᓯᒧᑦ ᐅᖃᕆᐊᕐᑐᕐᐴᒃ.

²³ ᔩᓱᓯᐅᑉ ᑭᐅᕚᒃ, “ᐃᓅᑉ ᐃᕐᓂᖓᑕ ᓂᕐᑐᕐᓇᕐᑎᑕᐅᕕᐊ ᓇᓪᓕᐅᑎᓯᒪᕗᖅ.

²⁴ ᓱᓕᔪᒥᒃ ᐅᖃᐅᑎᕙᑦᓯᒃ: ᓂᐊᖂᔭᒃᓴᐅᑉ ᑲᓐᖓᕐᓲᑎᒃᓴᕐᑕᖓ ᑖᓐᓇᑑᒐᔭᕐᐳᖅ ᓄᓇᒧᐊᕐᑕᐅᓗᓂ ᑐᖁᖏᒃᑯᓂ, ᑐᖁᒍᓂᓕ, ᓂᐊᖂᔭᒃᓴᓂᒃ ᐊᒥᓱᓂᒃ ᐱᕈᕐᑎᑦᓯᒐᔭᕐᐳᖅ.

²⁵ ᐃᓅᓯᕐᒥᓂᒃ ᐊᓐᓂᕈᓱᒃᑐᖅ ᐊᓯᐅᔨᔪᒫᕐᐳᖅ, ᐃᓅᓯᕐᒥᓂᒡᓕ ᐊᓐᓂᕈᓱᖏᑦᑐᖅ ᐅᕙᓂ ᓯᓚᕐᔪᐊᕐᒥ ᐃᓅᓯᕐᒧᑦ ᓄᖑᓱᐃᑦᑐᒧᑦ ᐱᒌᓐᓇᕐᓂᐊᕐᐹ.

²⁶ ᓇᓪᓕᐊᑦ ᐅᕙᓐᓂᒃ ᐱᔨᑦᓯᕐᑐᖅ, ᐅᕙᓐᓂᒃ ᒪᓕᒃᑐᒃᓴᐅᕗᖅ; ᓇᔪᒐᓐᓂᓗ, ᓇᔫᑎᔪᒃᓴᐅᕗᖅ; ᐅᕙᓐᓂᒃ ᐱᔨᑦᓯᕐᓂᐊᕐᑐᖅ, ᐊᑖᑕᒪ ᓂᕐᑐᕐᓇᕐᑎᑦᓱᒫᕐᐹ.”

ᔩᓱᓯᐅᑉ ᐅᖃᐅᓯᖃᕐᓂᖓ ᑐᖁᑕᐅᓂᒃᓴᒥᓂᒃ

²⁷ “ᒫᓐᓇᓕ ᐆᒻᒪᑎᒃᑯᑦ ᐅᖁᒤᑐᒦᑉᐳᖓ. ᖃᓄᖅ ᐅᖃᐅᓯᕆᔭᕆᐊᖓ ᓇᓗᕙᕋ? ᐅᖃᕈᓐᓇᕋᓗᐊᕐᑐᖓ, ‘ᐊᑖᑖᒃ, ᐃᖃᕐᕋᖅ ᑕᒪᓐᓇ ᓇᓪᓕᐅᑎᑎᑦᑍᓕᒍᒃ.’ ᑭᓯᐊᓂᓕ ᑕᒪᓐᓇ ᑎᑭᑦᔪᑎᒋᓯᒪᕙᕋ, ᐃᑲᕐᕋᖅ ᑕᒪᓐᓇ ᐊᑑᑎᔭᕆᐊᖃᕋᑯ.

²⁸ ᐊᑖᑖᒃ, ᐊᑏᑦ ᓂᕐᑐᕐᓇᕐᑎᓕᕈᒃ.” ᑕᕝᕙ ᓂᐱᒥᒃ ᕿᓚᖕᒥᑦ ᓂᓪᓕᕐᑐᖃᕐᐳᖅ, “ᓂᕐᑐᕐᓇᕐᑎᓚᐅᕐᐸᕋ, ᓱᓕᓗ ᓂᕐᑐᕐᓇᕐᑎᒃᑲᓐᓂᕐᓂᐊᕐᐸᕋ.”

²⁹ ᐃᓄᒋᐊᒃᑐᕐᔪᐊᑦ ᑕᕝᕙᓂ ᓇᖏᕐᑐᑦ ᓂᐱᒥᒃ ᑐᓴᕋᒥᒃ ᐅᖃᕐᐳᑦ, “ᑲᓪᓕᓕᕐᐳᖅ.” ᐃᓚᖏᓪᓕ ᐅᖃᕐᐳᑦ, “ᐂᖏᓕᐅᑉ ᐅᖃᖃᑎᒋᕚ.”

³⁰ ᔩᓱᓯᐅᑉ ᑭᐅᕔᑦ, “ᓂᐱ ᑐᓴᕐᑕᓯ ᑐᓴᕐᓴᐅᕗᖅ ᐃᓕᑦᓯ ᐱᑦᔪᑎᒋᓪᓗᓯ, ᐅᕙᖓ ᐱᑦᔪᑎᒋᓇᖓ.

³¹ ᒫᓐᓇ ᓯᓚᕐᔪᐊᕐᒥᐅᑦ ᐃᖅᑲᕐᑐᕐᑕᐅᕕᐊᑦ ᓇᓪᓕᐅᑎᕗᖅ, ᒫᓐᓇᓗ ᓯᓚᕐᔪᐊᑉ ᑕᒪᑐᒪ ᐊᐅᓚᑦᓯᔨᖓ ᓵᓚᐅᓗᓂ ᐊᓂᑎᑕᐅᓂᐊᓕᕐᐳᖅ;

³² ᐅᕙᖓᓗ, ᖃᖓᑦᑕᕐᑎᑕᐅᓂᐊᕈᒪ ᓄᓇᒥᑦ, ᐃᓄᖃᑎᒌᒃᔪᐊᖑᔪᓕᒫᑦ ᐅᕙᓐᓄᐊᕈᒪᓕᕐᑎᓐᓂᐊᕐᐸᒃᑲ.”

³³ ᑕᒪᑐᒥᖓ ᐅᖃᕐᐳᖅ ᑐᑭᓯᑎᑦᓯᓪᓗᓂ ᑐᖁᑕᐅᓂᕐᒧᑦ ᖃᓄᐃᑦᑐᒧᑦ ᑐᖁᑕᐅᓂᐊᕐᒪᖔᕐᒥ.

³⁴ ᐃᓄᒋᐊᒃᑐᕐᔪᐊᑦ ᑭᐅᕚᑦ, “ᐱᖁᔭᑦᑎᓐᓂᑦ ᑐᓴᕐᓯᒪᕗᒍᑦ ᙭ᔅᑑᓯᒎᖅ ᐃᓱᖃᖏᑦᑐᒧᑦ ᐃᓅᔪᒫᕐᒪᑦ. ᖃᓄᐃᒻᒪᓪᓕ ᐅᖃᕐᐱᑦ ᐃᓅᑉ ᐃᕐᓂᖓ ᓇᑉᐸᕐᑎᑕᐅᔭᕆᐊᖃᕐᐳᖅ; ᑭᓁᓐᓇ ᐃᓅᑉ ᐃᕐᓂᖓ?”

³⁵ ᔩᓱᓯᐅᑉ ᐅᖃᐅᑎᕔᑦ, “ᖃᐅᒪᔫᑉ ᓱᓕ ᓯᕕᑭᑦᑐᒥᒃ ᓇᔪᕐᓂᐊᕐᐹᓯ. ᑲᔪᓯᑦᓯᐊᕆᑦᓯ ᐱᓇᓱᐊᕐᑕᑦᓯᓐᓂᒃ ᓇᔪᕐᑎᖃᕐᓂᑦᓯᓐᓂ ᖃᐅᒪᔪᒥᒃ, ᑖᕐᑐᕐᔪᐊᕐᒧᑦ ᑎᑭᑕᐅᖁᓇᓯ; ᑖᕐᑐᒥ ᐱᓇᓱᐊᕐᑐᖅ ᖃᐅᔨᒪᖏᒻᒪᑦ ᓇᒧᓐᖓᐅᖕᒪᖔᕐᒥ.

^36a ᖃᐅᒪᔪᒥᒃ ᓇᔪᕐᑎᖃᕐᓂᑦᓯᓐᓂ, ᖃᐅᒪᔪᖅ ᐅᒃᐱᕆᓯᐅᒃ, ᕿᑐᕐᖓᐅᓕᖁᓪᓗᓯ ᖃᐅᒪᔪᒧᑦ.”

ᔫᑎᑦ ᐅᒃᐱᓕᕈᓐᓇᖏᓐᓂᖏᑦ

^36b ᔩᓱᓯᓕ ᑕᒪᒃᑯᓂᖓ ᐅᖃᕇᕋᒥ, ᑖᒃᑯᓇᓐᖓᑦ ᕿᒪᕉᑎᕗᖅ ᐃᔨᕐᓗᓂ.

³⁷ ᔩᓱᓯᓕ ᓇᓗᓁᒃᑯᑕᕐᓂᒃ ᐊᒥᓱᓂᒃ ᐱᓇᓱᐊᖃᑦᑕᕋᓗᐊᕐᒪᑦ ᑖᒃᑯᓇᓂ, ᔩᓱᓯᒧᑦ ᐅᒃᐱᓕᓚᐅᓐᖏᓚᑦ;

³⁸ ᓇᓚᐅᑦᑍᔫᑉ ᐂᓮᐊᓯᐅᑉ ᐅᖃᐅᓯᖏᑦ ᓇᓚᐅᑦᓯᖁᓪᓗᒋᑦ ᐅᖃᕐᓯᒪᔪᑦ: “ᐊᑕᓃᖅ, ᑭᐊ ᐅᖅᑳᐅᓯᕆᔭᕗᑦ ᐅᒃᐱᕆᕔᑦ? ᑭᒃᑯᓐᓄᓪᓗ ᐊᑕᓂᐅᑉ ᐱᔪᓐᓇᕐᓂᓂ ᓴᖅᑭᑎᑉᐸᐅᒃ?”

³⁹ ᑍᒤᒻᒪᑦ ᐅᒃᐱᓕᕈᓐᓇᓐᖏᓚᑦ. ᐊᒻᒪ ᐂᓮᐊᓯ ᐅᖃᕐᓯᒪᖕᒥᖕᒪᑦ,

⁴⁰ “ᒎᑎᐅᑉ ᐃᔨᖏᑦ ᑕᒃᐲᑎᓚᐅᕐᐰᑦ ᐆᒻᒪᑎᖏᓪᓗ ᓯᑎᑎᑉᐰᑦ, ᐃᔨᒥᖕᓄᑦ ᑕᑯᖁᓇᒋᑦ ᐆᒻᒪᑎᒥᖕᓄᓪᓗ ᑐᑭᓯᖁᓇᒋᑦ, ᐅᕙᓐᓄᓪᓗ ᓵᒋᐊᖁᓇᒋᑦ, ᐋᖅᑭᒃᑕᐅᖁᓇᒋᓪᓗ.”

⁴¹ ᐂᓮᐊᓯ ᑍᒫᒃ ᐅᖃᓚᐅᕐᐳᖅ ᔩᓱᓯᐅᑉ ᓂᕐᑐᕐᓇᕐᓂᖓ ᑕᑯᓚᐅᕋᒥᐅᒃ ᐅᖃᐅᑎᒋᒐᒥᐅᒡᓗ.

⁴² ᓱᓕᓕ ᔫᑎᑦ ᐊᖓᔪᖅᑳᖏᑦ ᐊᒥᓱᑦ ᔩᓱᓯ ᐅᒃᐱᕆᒐᓗᐊᕐᐹᑦ, ᐹᕆᓯᓪᓕ ᐱᓪᓗᒋᑦ ᓴᖅᑭᔮᕐᑐᒥᒃ ᐅᖃᐅᓯᖃᓐᖏᓚᑦ, ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᑦ ᐃᑎᕈᓐᓁᓪᓕᑎᑕᐅᔪᒪᓇᑎᒃ:

⁴³ ᐃᓄᖕᓄᑦ ᓈᒻᒪᒋᔭᐅᓂᖅ ᐱᔪᒪᓂᕐᓴᕆᒐᒥᑦᔪᒃ ᒎᑎᒧᑦ ᓈᒻᒪᒋᔭᐅᓂᕐᒥᑦ.

ᔩᓱᓯᐅᑉ ᐅᖃᐅᓯᖏᓐᓄᑦ ᐃᖅᑲᕐᑐᕐᑕᐅᓂᖅ

⁴⁴ ᔩᓱᓯ ᓂᐱᖅᑯᕐᑐᓪᓗᓂ ᐅᖃᕐᐳᖅ, “ᐅᕙᓐᓄᑦ ᐅᒃᐱᕐᑐᖅ, ᐅᕙᓐᓄᐃᓐᓇᖅ ᐅᒃᐱᓐᖏᓚᖅ ᑖᑦᓱᒧᖓᓕ ᐅᕙᓐᓂᒃ ᑎᓕᓯᔪᒧᑦ.

⁴⁵ ᐅᕙᓐᓂᒡᓗ ᑕᐅᑐᒃᑑᑉ ᐅᕙᓐᓂᒃ ᑎᓕᓯᔪᖅ ᑕᐅᑐᒃᑭᕚ.

⁴⁶ ᖃᐅᒪᔫᓪᓗᖓ ᓯᓚᕐᔪᐊᕐᒧᑦ ᑎᑭᑉᐳᖓ, ᐅᕙᓐᓄᑦ ᐅᒃᐱᕐᑐᖅ ᑖᕐᑐᒦᖏᓐᓇᖁᓇᒍ.

⁴⁷ ᐅᖃᐅᓯᓐᓂᒃ ᑐᓴᕐᑐᖅ ᒪᓕᒐᓂᓗ, ᐃᖅᑲᕐᑐᕐᓂᐊᓐᖏᓚᕋ; ᑎᑭᓚᐅᖏᓐᓇᒪ ᓯᓚᕐᔪᐊᕐᒥᐅᑦ ᐃᖅᑲᕐᑐᕆᐊᕐᑐᕐᓗᒋᑦ, ᓯᓚᕐᔪᐊᕐᒥᐅᓪᓕ ᐱᐅᓕᔭᕐᑐᕐᓗᒋᑦ.

⁴⁸ ᐅᕙᓐᓂᒃ ᓇᕐᕈᔪᖅ ᐃᓚᓕᐅᕐᓯᓇᓂᓗ ᐅᖃᐅᓯᓐᓂᒃ ᓇᔪᕐᑎᖃᓕᕐᐳᖅ ᐃᖅᑲᕐᑐᕐᑕᐅᑦᔪᑎᒃᓴᒥᓂᒃ; ᐅᖃᐅᓯᕐᓄᑦ ᐅᖃᐅᓯᕆᓚᐅᕐᑕᓐᓄᑦ ᐃᖅᑲᕐᑐᕐᑕᐅᔪᒫᕐᐳᖅ ᐅᓪᓗᐃᑦ ᓇᒡᒐᑖᓂ.

⁴⁹ ᐅᕙᓐᓂᒃ ᐱᔪᓐᓇᕐᓂᖃᕐᓗᖓ ᐅᖃᓚᐅᖏᓐᓇᒪ; ᐊᑖᑕᐅᓪᓕ ᑎᓕᔨᒪ ᐱᖁᔭᒥᓂᒃ ᑐᓂᓯᕕᒋᓚᐅᕐᐹᖓ ᐅᖃᐅᓯᕆᔭᒃᓴᓐᓂᒃ, ᖃᓄᕐᓗ ᐅᖃᕐᑐᒃᓴᐅᖕᒪᖔᕐᒪ.

⁵⁰ ᖃᐅᔨᒪᕗᖓᓗ ᑖᑦᓱᒪ ᐱᖁᔨᓂᖓ ᐃᓅᓯᕐᑖᕐᓇᕐᒪᑦ ᓄᖑᓱᐃᑦᑐᒥᒃ. ᑍᒤᒻᒪᑦ ᐅᖃᐅᓯᕆᔭᒃᑲ, ᐅᖃᐅᓯᕆᕙᒃᑲ ᐊᑖᑕᐅᑉ ᑍᒫᒃ ᐅᖃᖁᓚᐅᕐᒪᖓ.”