ᔨᕆᒤᐊᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᐅᑉ ᐊᕙᓗᔭᐅᓂᖓ ᐊᑭᕋᒥᓄᑦ

¹ ᐃᓕᑦᓯ ᐱᓐᔭᒥᓂᒧᑦ ᑭᖑᕚᕆᔭᐅᔪᓯ, ᔨᕉᓴᓕᒥᑦ ᕿᒫᓕᕆᑦᓯ, ᑎᑦᑐᓚᐅᓪᓗ ᓂᓪᓕᕐᑎᓯᐅᒃ ᓄᓇᒥ ᑎᑯᐊᒥ! ᖃᐅᔨᑦᔪᑎᒃᓴᒥᒡᓗ ᑕᑯᒃᓴᐅᑎᑦᓯᓕᕆᑦᓯ ᐱᑦ-ᕼᐊᑭᕆᒻᑯᓐᓄᑦ; ᐅᓐᓄᐊᓪᓗᐊᑉ ᓇᓛᓂᑦ ᑲᑉᐱᐊᓇᕐᑐᒥᒃ ᓴᖅᑭᑦᑐᖃᓕᕐᒪᑦ ᐊᓯᕈᕐᑕᐅᓇᕐᑐᒥᒃ.

² ᓮᐅᓂᐅᓪᓗ ᐸᓂᖓᑐᑦ ᑍᒤᑦᑐᑎᑦ ᓄᖑᑕᐅᑎᓐᓂᐊᕐᐸᒋᑦ, ᐱᐅᔫᓪᓗᑎᑦ ᑕᑯᒥᓇᕐᑑᒐᓗᐊᕐᑎᓪᓗᑎᑦ.

³ ᓰᐱᓕᕆᔨᓄᑦ ᓰᐱᖁᑎᖏᓐᓄᓪᓗ ᐅᐸᒃᑕᐅᓂᐊᕐᐳᑎᑦ, ᐅᖓᓗᔭᐅᓗᑎᑦ ᑕᖕᒫᕐᑎᕐᓂᐊᕐᐳᑦ ᐊᑐᓂᑦ ᖃᓂᒋᔭᒥᓃᑦᑐᓂᒃ ᑲᒪᒋᔭᖃᕐᓗᑎᒃ.

⁴ ᐅᓇᑕᕆᐊᓕᕐᓯᐅᒃ, ᐅᓪᓗᖅ ᕿᑎᕋᓕᕐᐸᑦ ᐱᒋᐊᕐᓂᐊᕐᐳᒍᑦ ᑭᓯᐊᓂᓕ ᑕᑯᒋᑦ ᐅᓐᓄᓕᕇᕐᐳᖅ ᑖᓗᐊᓕᕇᕐᓗᓂᓗ.

⁵ ᐅᓐᓄᐊᖔᒃᑯᑦ ᐅᓇᑕᕆᐊᕐᕕᒋᓂᐊᕐᐸᕗᑦ, ᐊᕙᓗᕐᔪᐊᖏᓪᓗ ᓱᕋᒃᑎᕐᓗᒋᑦ.

⁶ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ, “ᓇᐹᕐᑐᓂᒃ ᓇᑲᑎᕆᓗᓯ ᐃᑯᕐᕋᓕᐅᕆᑦᓯ ᔨᕉᓴᓕᐅᑉ ᐊᕙᓗᕐᔪᐊᖏᑦ ᓯᖁᑦᑎᕐᑕᐅᔪᒃᓴᐅᖕᒪᑕ, ᐃᒡᓗᒐᓴᒡᔪᐊᖏᑦ ᐱᐅᖏᑦᑐᓂᒃ ᑕᑕᒻᒪᑕ.

⁷ ᓲᕐᓗ ᐃᒥᕐᑕᕐᕕᐅᑉ ᐃᒪᖓ ᐃᒻᒥᕐᓱᕐᑕᐅᕙᖕᒪᑦ, ᑍᒫᒃᑕᐅᖅ ᐱᐅᖏᑦᑐᓕᐅᕐᓂᖏᑦ ᐱᓯᒪᔭᐅᕗᑦ, ᓇᓂᑐᐃᓐᓇᖅ ᑲᑉᐱᐊᓇᕐᑐᖃᕐᐳᖅ ᐊᓯᕈᕐᓇᕐᑐᖃᕐᓗᓂᓗ, ᖃᓂᒪᓐᓇᕐᓂᖏᑦ ᐋᓐᓂᕐᑎᕆᓂᖏᓪᓗ ᑕᐅᑐᐃᓐᓇᕋᒃᑭᑦ.

⁸ ᔨᕉᓴᓕᒥᐅᑕᐅᔪᓯ ᐃᓂᕐᑎᕆᑦᔪᑎᒃᑲ ᑐᓴᕐᓯᐅᒃ. ᑐᓴᕐᓂᐊᖏᒃᑯᑦᓯᐅᒃ ᕿᒪᖕᓂᐊᕐᐸᑦᓯ, ᓄᓇᖁᑎᓯᓗ ᓱᓇᖃᕈᓐᓃᕐᑎᓪᓗᒍ ᓄᓇᒋᔪᒥᓇᕈᓐᓃᕐᑎᓪᓗᒍᓗ ᑭᑯᒃᑐᐃᓐᓇᕐᓄᑦ.”

ᐃᓴᕆᐊᓕᒥᐅᑦ ᐊᑭᕋᕐᑐᕐᓂᖓᑦ

⁹ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᐃᓴᕆᐊᓕᒥᐅᑦ ᐊᒥᐊᒃᑯᖏᑦ ᐊᒡᒍᕐᑕᐅᓕᑦ ᕔᓂᒃᓮᑦ ᐸᐅᕐᒊᑦ ᐊᒡᒍᕐᑕᐅᕙᖕᓂᖏᑎᑐᑦ ᐅᕐᐱᒐᕐᓂᑦ, ᕿᒥᕐᕈᐊᑦᓯᐊᕐᓗᒍ ᐸᐅᕐᖓᓂᒃ ᐳᑯᒃᑐᑎᑐᑦ.

¹⁰ ᑭᓇᒃᑯᑦ ᐃᓂᕐᑎᕆᑦᔪᑎᓐᓂᒃ ᑐᓴᕈᓐᓇᕐᓂᐊᕐᐹᑦ? ᑭᓇᒃᑯᓐᓄᓪᓗ ᓈᓚᒃᑕᐅᔪᓐᓇᕐᓂᐊᕐᐳᖔ? ᑐᓵᔪᒪᔪᖃᕈᓐᓃᕐᒪᑦ, ᑕᑯᒋᑦ ᓈᓚᒃᑐᖃᕈᓐᓇᕈᓐᓃᕐᐳᖅ. ᐊᑕᓂᐅᑉ ᐅᖃᐅᓯᖏᑦ ᑐᓴᕐᑕᐅᔭᕆᐊᒃᓴᖅ ᐱᐅᒋᔭᐅᔪᓐᓂᕐᒪᑕ, ᖁᕕᐊᒋᔭᐅᓇᑎᒡᓗ.

¹¹ ᐅᕙᖓᓕ ᐊᑕᓂᐅᑉ ᓂᓐᖓᐅᓯᖓᓂᑦ ᐱᑕᖃᓗᐊᓂᕐᒧᑦ ᐱᓯᒪᒋᐊᖓ ᑕᖃᕙᕋ, “ᐊᓂᑎᓕᕈᒃ ᕿᑐᕐᖓᖏᓐᓄᑦ ᐊᖅᑯᑎᒦᑦᑐᓄᑦ, ᐃᓅᓱᒃᑐᖁᑎᖏᓐᓄᓪᓗ ᑲᑎᒪᔪᓄᑦ, ᓄᓕᐊᕇᓄᓪᓗ ᓴᖅᑭᓐᓂᐊᕐᐸᕋ ᐃᓄᑐᖃᐅᓕᕐᑐᓄᓪᓗ.

¹² ᐃᒡᓗᖏᓐᓂᒃ ᐋᑕᐅᓂᐊᕐᐳᑦ ᐊᓯᖏᓐᓄᑦ ᑐᓂᔭᐅᓗᑎᒃ, ᐱᕈᕐᓰᕕᖁᑎᖏᑦ ᓄᓕᐊᖏᓪᓗ ᐱᖃᓯᐅᑦᔭᐅᓗᑎᒃ, ᑍᒤᓕᐅᕐᓂᐊᕐᐳᑦ ᐊᑭᓂᐊᕐᕕᒋᓕᕈᒃᑭᑦ ᓄᓇᖃᑎᒌᑦ,” ᐊᑕᓂᖅ ᐅᖃᕐᐳᖅ.

¹³ “ᒥᑭᓐᓂᕐᐹᓂᑦ ᐊᖏᓂᕐᐹᑦ ᑎᑭᓪᓗᒋᑦ ᒥᖕᓂᑐᔪᐃᓐᓈᓘᓕᕐᒪᑕ, ᑕᒪᕐᒥᒃ ᓯᓔᕐᕆᒃᓯᓂᒃᑯᑦ ᐱᕚᓪᓕᕈᑎᖃᕋᓱᐊᕐᐳᑦ; ᐱᔪᖃᓛᕐᑐᒥᒃ ᐅᖃᕐᑎᓐᓂᑦ ᑐᓂᕐᕈᓯᕐᑎᑦᓯᔨᓄᑦ ᓴᒡᓗᑭᑦᓯᓂᕐᒥᒃ ᐱᓂᐊᕐᓂᖃᓕᕐᒪᑕ

¹⁴ ᐃᓄᖁᑎᒪ ᑭᓪᓕᖏᓐᓂᒃ ᒪᑦᑐᓯᕐᓯᑐᐃᓐᓇᕐᐳᑦ. ᐅᖃᕐᓗᑎᒃ, ‘ᖃᓄᐃᓐᓇᕐᑐᖃᓐᖏᓚᖅ,’ ᖃᓄᐃᓐᓇᕐᑐᒦᒃᑲᓗᐊᕋᒥᒃ.

¹⁵ ᑲᓐᖑᓲᑎᖃᕐᐹᑦ ᑕᒪᒃᑯᓂᖓ ᓈᒻᒪᖏᑦᑐᓕᐅᕐᓂᕆᔭᒥᖕᓃᒃ? ᑍᒤᓐᖏᓚᑦ ᑲᓐᖑᓱᒍᓐᓁᓪᓕᕗᑦ, ᐊᐅᐸᓪᓕᕈᓐᓁᓪᓕᓪᓗᑎᒡᓘᓐᓃᑦ, ᑲᑕᒃᓯᒪᔪᓄᑦ ᑲᑕᖃᑕᐅᕕᒡᔪᐊᕐᓂᐊᕐᐳᑦ; ᓱᒋᐊᓕᕈᒃᑭᑦ, ᐃᒋᑕᐅᔪᒫᕐᐳᑦ,” ᐊᑕᓂᖅ ᐅᖃᕐᐳᖅ.

ᐃᓴᕆᐊᓕᒥᐅᑦ ᐊᑐᕈᒪᖏᓐᓂᖏᑦ ᒎᑎᐅᑉ ᐊᑐᖁᔭᖓᓂᒃ

¹⁶ ᐃᒫᒃ ᐊᑕᓂᖅ ᐅᖃᕐᐳᖅ, “ᐊᖅᑯᑏᑦ ᑲᑎᓐᓂᖏᓐᓄᑦ ᑕᑯᔭᕐᑐᕆᑦᓯ, ᐊᑐᕐᑕᐅᕙᒃᑐᑐᕾᓪᓗ ᖃᐅᔨᓇᓱᐊᕐᓯᒋᑦ, ᑐᑭᓯᑎᑕᐅᔪᒪᓗᓯ ᐊᖅᑯᒻᒥᒃ ᐊᑲᐅᔪᒥᒃ ᐊᑐᕐᓂᐊᕐᑕᑦᓯᓐᓂᒃ. ᑕᕝᕙ ᑕᕐᓂᑦᓯᓐᓄᑦ ᒥᕐᖑᐃᕐᓯᕐᕕᒃᓴᕐᓯᓂᐊᕐᐳᓯ. “ᑭᓯᐊᓂᓕ ᐅᖃᕐᐳᑦ, ‘ᐊᖅᑯᒻᒥᒃ ᑍᒤᑦᑐᒥᒃ ᐊᑐᕈᒪᓐᖏᓚᒍᑦ.’

¹⁷ ᖃᐅᔨᓴᕐᑎᓂᒃ ᑎᓕᓯᓚᐅᕐᐳᖓ ᐃᓕᑦᓯᓐᓄᑦ ᐅᖃᐅᔨᖁᓪᓗᒋᑦ ᑎᑦᑐᓚᐅᑦ ᓂᐱᖓᓂᒃ ᑐᓴᖁᓪᓗᓯ, ᑭᓯᐊᓂᓕ ᐅᖃᓚᐅᕐᐳᓯ ᓈᓚᒍᒪᖏᓐᓂᕋᕐᓗᓯ.

¹⁸ “ᑍᒤᒻᒪᑦ ᑐᓴᓕᕆᑦᓯ ᐃᓅᖃᑎᒌᒡᔪᐊᖑᔪᓯ ᖃᐅᔨᓕᕐᓗᓯᓗ, ᖃᐅᔨᓴᕆᑦᓯ ᖃᓄᐃᓕᓂᐊᕐᒪᖔᑕ.

¹⁹ ᓄᓈ ᑐᓴᓕᕆᑦ, ᐃᓅᖃᑎᒌᑦ ᑖᒃᑯᐊ ᐊᓯᕈᕐᑕᐅᓇᕐᑐᒧᑦ ᑎᑭᕝᕕᐅᑎᓐᓂᐊᕐᐸᒃᑲ, ᐱᓂᐊᕐᓂᖏᑕ ᐱᕈᕐᑎᑕᖏᓐᓄᑦ, ᐅᖃᐅᓯᓐᓂᒃ ᓈᓚᓚᐅᖏᒻᒪᑕ ᐱᖁᔭᓐᓂᒡᓗ ᓇᕐᕈᓚᐅᕐᒪᑕ.

²⁰ ᐳᔫᕐᑎᑦᓯᑦᔪᑎᒃᓮᑦ ᓰᐸᒥᑦ ᐱᓯᒪᔪᑦ ᓱᓇᒧᑦ ᐊᑑᑎᖃᕐᐸᑦ, ᓄᓇᓂᓪᓘᓐᓃᑦ ᐅᖓᓯᒃᑐᓂᑦ ᓰᕐᓇᕐᑐᑦ ᐱᑖᕕᓂᖏᑦ? ᑐᓂᕐᕈᑎᓯ ᐆᒪᔪᕕᓃᑦ ᐆᓯᒪᔪᑦ ᑐᓂᕐᕈᓯᕐᕕᖕᒥ ᓈᒻᒪᒋᓐᖏᓚᒃᑲ, ᑐᓂᕐᕈᓯᕈᑎᒋᔭᓯᓗ ᖁᕕᐊᒋᓐᖏᓚᒃᑲ.

²¹ ᑍᒤᒻᒪᑦ ᐃᒫᒃ ᐊᑕᓂᖅ ᐅᖃᕐᐳᖅ, ‘ᑕᑯᒋᑦ, ᐃᓄᖁᑎᓐᓄᑦ ᐊᐳᕈᑎᒃᓴᖃᕐᑎᑦᓯᓂᐊᕐᐳᖓ ᐹᓪᓚᖁᓪᓗᒋᑦ, ᕿᑐᕐᖓᕇᓕᒫᑦ ᐊᐳᕈᑎᒃᓴᖃᕐᓂᐊᕐᐳᑦ, ᓯᓚᖅᑲᑎᒌᑦ ᐃᓚᓐᓈᕇᓪᓗ ᐊᓯᕈᕐᑕᐅᓂᐊᕐᐳᑦ.’”

ᓵᓚᒋᔭᐅᓂᖅ ᐅᓐᓄᐊᓪᓗᐊᑉ ᓇᓛᓂᓐᖔᕐᑐᓄᑦ

²² ᐃᒫᒃ ᐊᑕᓂᖅ ᐅᖃᕐᐳᖅ, “ᑕᑯᒋᑦᓯ ᐅᓇᑕᕆᐊᕐᑐᕐᑐᑦ ᐃᓕᑦᓯᓐᓂᒃ ᕾᓕᕐᐳᑦ, ᐅᓐᓄᐊᓪᓗᐊᑉ ᓇᓛᓂᑦ, ᐃᓅᖃᑎᒌᒡᔪᐊᑦ ᐅᓇᑕᕐᑐᒃᓴᖏᑦ ᐅᖓᓯᖕᓂᕐᐹᒥᐅᑦ ᐊᐅᓚᑦᔭᓕᕐᐳᑦ.

²³ ᐅᓇᑕᐅᑎᖃᕐᐳᑦ ᐱᑎᒃᓯᓂᒃ ᖃᓗᒋᐊᓂᒡᓗ, ᐊᑦᑕᕆᔭᖃᓐᖏᓚᑦ ᓇᒡᓕᖕᓂᖃᕋᑎᒡᓗ, ᓂᐱᖏᑦ ᓂᐱᖃᕐᐳᑦ ᐃᒪᕕᐅᑉ ᐃᒃᑑᓕᔮᕐᓂᖓᑐᑦ, ᐃᖏᕐᕋᓕᕌᖓᒥᒃ ᕿᒻᒥᕐᔪᐊᓄᑦ, ᓮᐅᓂᒥᐅᑕᐅᔪᓯ ᐅᐸᒃᑕᐅᓕᕐᐳᓯ ᐅᓇᑕᐅᓯᔭᕐᑐᓄᑦ.

²⁴ “ᑐᓴᐅᒪᓕᕋᑦᑎᒍ ᑕᓕᕗᑦ ᓄᑭᖃᕈᓐᓃᕐᐳᑦ, ᐃᓱᒫᓗᓕᕐᓗᑕᓗ ᐋᓐᓂᐊᓕᕐᐳᒍᑦ ᐊᕐᓇᐅᑉ ᐃᕐᓂᓱᒃᑑᑉ ᐋᓐᓂᐊᓂᖓᑐᑦ.

²⁵ ᐃᒡᓗᒐᓴᒡᔪᐊᑦ ᓯᓚᑖᓅᕐᑍᓕᓕᕆᑦᓯ, ᐊᖅᑯᑎᒃᑯᓪᓗ ᐱᓱᒃᑍᓕᓗᓯ ᐊᑭᕋᓯ ᓴᕕᒡᔪᐊᓕᔭᕐᒪᑕ, ᓇᓂᑐᐃᓐᓇᖅ ᑲᑉᐱᐊᓇᕐᓯᕗᖅ.

²⁶ “ᐃᓄᖁᑎᒃᑲ, ᐆᒪᔪᑦ ᒥᖅᑯᖏᓐᓂᒃ ᓴᓇᓯᒪᔪᓂᒃ ᐊᓐᓄᕌᕐᑐᓕᕆᑦᓯ, ᐊᕐᔭᓕᓂᒃᑯᓪᓗ ᐊᒃᓴᑳᓗᓯ, ᕿᐊᒋᑦᓯ ᕿᒃᓵᒃᑐᐊᓗᒃᑎᑐᑦ ᐃᕐᓂᑐᐊᒥᓂᒃ ᑐᖁᔨᐊᖃᕋᑖᕐᑐᑎᑐᑦ, ᐅᒡᒍᐊᕐᓗᓯᓗ ᐊᓯᕈᐃᔭᐅᕐᑐᕐᑐᑦ ᑎᑭᓐᓂᐊᕐᒪᑕ ᓂᕆᐅᒡᕕᒋᓐᖏᑕᑦᓯᒍᑦ.

²⁷ ᔨᕆᒤᐊ ᖃᐅᔨᓴᕐᑎᓐᖑᕐᑎᓚᐅᕐᐸᒋᑦ ᓴᕕᕋᔭᖕᓂᒃ, ᐃᓄᖁᑎᒃᑲ ᓴᕕᕋᔭᒃᓴᑎᑐᑦ ᑍᒤᒻᒪᑕ, ᐅᑦᔨᕐᓱᓚᐅᒃᑭᑦ ᐃᓕᖅᑯᓯᕆᔭᖏᓪᓗ ᖃᐅᔨᓴᕐᓗᒋᑦ.

²⁸ ᐃᓄᖁᑎᒃᑲ ᓯᑎᒃᑎᓐᓂᑰᓕᕐᐳᑦ, ᐃᓕᖅᑯᓯᖃᓕᕐᒪᑕ ᐃᓅᖃᑎᒥᖕᓂᒃ ᑲᑕᒃᑎᑦᓯᓇᓱᖕᓃᓐᓇᕐᒥᒃ, ᖃᑯᕐᓕᒃᑎᑐᑦ ᓴᕕᕋᔭᒃᑎᑐᓪᓗ ᑍᒤᑦᑑᔮᓕᕐᐳᑦ, ᐱᐅᖏᑦᑐᐃᓐᓇᕐᒥᒃ ᐃᓕᖅᑯᓯᖃᓕᕐᒪᑕ.

²⁹ ᐃᑯᐊᓚᑦᓯᕕᒃ ᐃᑯᒪᓕᕐᐳᖅ, ᑯᓯᕐᓯᐊᖑᓂᖏᓐᓂᒃ ᐊᐅᒃᑎᑦᓯᓂᐊᕐᓗᓂ, ᐱᐅᓂᖏᓪᓗ ᓴᖅᑭᑐᐃᓐᓇᓕᒑᕗᑦ, ᐱᐅᖏᑦᑐᓕᔪᑦ ᐲᕈᓐᓁᓪᓕᖕᒪᑕ.

³⁰ ᑍᔭᐅᔪᒫᕐᐳᑦ ᓯᐅᓪᕕᕆᓂᒃ ᐱᔪᒪᔭᐅᔪᓐᓃᕐᓂᑯᓂᒃ, ᐊᑕᓂᐅᑉ ᓇᕐᕈᒋᓕᕐᒪᒋᑦ ᐱᔪᒪᔪᓐᓃᕐᓗᒋᓪᓗ.”