ᔨᕆᒤᐊᐅᑉ ᐊᒡᓚᖏᑦ 47 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐅᖃᐅᓯᖏᑦ ᐱᓕᔅᑍᓂᒥᐅᑦ ᐱᓪᓗᒋᑦ

¹ ᒪᑯᐊ ᑕᕝᕙ ᐊᑕᓂᐅᑉ ᐅᖃᓚᐅᕐᑕᖏᑦ ᔨᕆᒤᐊᒧᑦ ᐱᓕᔅᑍᓂᒥᐅᑦ ᐱᓪᓗᒋᑦ ᐰᕉ ᐅᓇᑕᕆᐊᓚᐅᕐᑎᓐᓇᒍ ᒑᓴᒥᐅᓂᒃ.

² “ᐃᒫᒃ ᐊᑕᓂᖅ ᐅᖃᕐᐳᖅ: ᑕᑯᒋᑦ ᐅᓐᓄᐊᓪᓗᐊᑉ ᓇᓛᓂᑦ ᐃᒪᕐᑎᑐᑦ ᐅᓕᑉᐸᓪᓕᐊᔪᑎᑐᑦ ᑍᒤᑦᑐᕐᑕᖃᓕᕐᐳᖅ. ᓄᓇᓕᓕᒫᑦ ᐃᒪᐅᑦᔭᐅᓂᐊᕐᐳᑦ, ᐃᓄᖏᓪᓗ ᕾᒐᓛᕐᓂᐊᕐᐳᑦ ᐃᑲᔪᕐᑕᐅᔪᒪᓗᑎᒃ, ᓄᓇᖃᕐᑐᑦ ᕿᐊᔪᐊᓘᓂᐊᕐᐳᑦ.

³ ᕿᒻᒥᕐᔪᐊᑦ ᐸᖓᓕᒃᑐᑦ ᕿᑭᕐᕋᖏᑦ ᑐᓴᕐᓴᐅᓕᕐᐸᑕ, ᐊᑭᕋᖏᑕ ᕿᒧᒃᓯᐅᑎᕐᕙᓗᖏᑦ ᕿᑭᕐᕌᓕᕐᐸᑕ, ᐊᑖᑕᐅᔪᑦ ᓄᑕᖅᑲᒥᖕᓂᒃ ᐃᑲᔪᕐᓯᕈᓐᓇᕐᓂᐊᓐᖏᓚᑦ, ᑕᓕᖏᑦ ᓄᑮᕈᑎᔪᒫᕐᒪᑕ.

⁴ ᐅᓪᓗᖅ ᓇᓪᓕᐅᑎᖕᒪᑦ ᐱᓕᔅᑍᓂᒥᐅᑦ ᓄᖑᕋᕐᑕᐅᕕᒃᓴᖓᑦ, ᑭᓇᒃᑯᓐᓂᒡᓕ ᑍᕆᒥᐅᑦ ᓮᑐᓂᒥᐅᓪᓗ ᐃᑲᔪᕐᑎᒃᓴᕐᓯᓂᐊᕐᐹᑦ ᐊᑕᓂᐅᑉ ᐊᓯᕈᕐᑕᐅᑎᓐᓂᐊᕐᒪᒋᑦ ᐱᓕᔅᑍᓂᒥᐅᑦ, ᐊᒥᐊᒃᑰᓚᐅᕐᑐᑦ ᑲᑉᕼᐊᑐᐊᕆᐅᑉ ᓯᒡᔭᖓᓂ.

⁵ ᒑᓴᒥᐅᑦ ᕿᒃᓵᖕᓂᕐᒧᑦ ᓄᔧᔭᕐᓯᒪᓂᐊᕐᐳᑦ, ᐊᓯᑭᓗᓂᒥᐅᑦ ᓂᐱᖃᕈᓐᓃᕐᓗᑎᒃ, ᓄᓇᑐᐃᓐᓇᕐᒥᐅᑕᐅᔪᓯ ᖃᓄᖅ ᐊᑯᓂᐅᑎᒋᔪᖅ ᐃᓕᑦᓯᓐᓂᒃ ᑭᓪᓕᐊᓂᐊᕐᐱᓰ?

⁶ ᐅᖃᕐᐳᓯ, ‘ᐊᑕᓂᐅᑉ ᓴᕕᒡᔪᐊᖓ ᖃᓄᖅ ᐊᑯᓂᐊᑎᒋᔪᖅ ᓄᖅᑲᖓᓂᐊᕐᐲᑦ? ᐴᕆᔭᕐᓂ ᐴᕐᓯᒪᑐᐃᓐᓇᓕᕆᑦ, ᑕᕾᕐᓯᕐᓗᑎᓪᓗ.’

⁷ ᖃᓄᕐᓕ ᓄᖅᑲᖓᑐᐃᓐᓇᕈᓐᓇᕐᐹ, ᐊᑕᓂᕐᒧᑦ ᐱᓇᓱᐊᕈᑕᐅᖁᔭᐅᓗᓂ? ᐅᓇᑕᐅᑕᐅᖁᔭᐅᓗᓂ ᐊᓯᑭᓗᓂᒥᐅᓄᑦ ᑕᕆᐅᑉ ᓯᓈᓃᑦᑐᓄᑦ.”