ᔨᕆᒤᐊᐅᑉ ᐊᒡᓚᖏᑦ 46 - ᐊᒡᓔᑦ ᐃᑦᔪᕐᖕᓁᑦᑐᑦᐄᑦᔨᑉᑎᒥᐅᑦ ᓵᓚᐅᓂᖓᑦ ᑲᑭᒦᓯᒥ 1 ᔨᕆᒤᐊ ᒎᑎᐅᑉ ᐅᖃᕐᑎᖓ ᐊᑕᓂᕐᒧᑦ ᐅᖃᕐᕕᐅᓚᐅᕐᐳᖅ ᐃᓅᖃᑎᒌᒡᔪᐊᑦ ᐱᓪᓗᒋᑦ, 2 ᐄᑦᔨᑉᑎᒥᐅᑦ ᐱᓪᓗᒋᑦ ᐅᖃᕐᐳᖅ, ᐅᖃᐅᓯᒃᓴᖃᕐᐳᖓ ᓂᑯ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᐱᓪᓗᒍ, ᓵᓚᒋᔭᐅᓚᐅᕐᑑᑉ ᑳᕐᓯᒥᔅᒥ ᑰᖕᒥ ᐃᕗᕅᑎᒥ ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᑦᑕ ᔨᕼᐅᐃᐊᑭᐅᑉ ᔫᓮᐊᐅᑉ ᐃᕐᓂᖓᑕ ᐊᐅᓚᑦᓯᓂᖏᑕ ᓯᑕᒪᒋᓕᕐᑕᖓᓂ: 3 “ᓴᐴᓗᑕᓯ ᐊᖏᔪᑦ ᒥᑭᑦᑐᓪᓗ ᐅᐸᓗᖕᒊᕐᓯᒪᓕᕐᓯᒋᒃ ᐅᓇᑕᕆᐊᓕᕆᑦᓯ! 4 ᕿᒻᒥᕐᔪᐊᓯ ᐊᓄᓕᕐᓯᐅᒃ, ᐃᑭᒪᕕᓕᕐᓱᕐᓗᒋᓪᓗ ᕿᒻᒥᕐᔪᐊᓯ! ᐃᓂᒋᓂᐊᕐᑕᑦᓯᓐᓄᐊᓕᕆᑦᓯ ᐅᓇᑕᐅᑎᓂᒃ ᓇᓴᕐᓯᒪᓗᓯ, ᖃᓗᒋᐊᓯ ᕿᓪᓚᕆᒃᓴᓕᕐᓯᒋᒃ ᐅᓇᑕᐅᑎᓂᒃ ᐊᓐᓄᕌᕐᓗᓯ. 5 ᓱᓇᒥᒃ ᑕᑯᕗᖔ? ᑲᑉᐱᐊᓱᓕᕐᑐᓂᒃ ᐅᑎᕆᐊᓕᕐᓗᑎᒡᓗ, ᐅᓇᑕᕐᑎᖁᑎᖏᑦ ᓵᓚᐅᕗᑦ, ᑐᐊᕕᕐᓗᑎᒃ ᕿᒫᕗᑦ, ᑲᑉᐱᐊᓱᓕᕐᐳᑦ ᓇᑭᑐᐃᓐᓇᖅ ᐊᕙᑕᖏᕐᑕᐅᓕᕋᒥᒃ, ᐊᑕᓂᖅ ᐅᖃᕐᐳᖅ. 6 ᐆᒻᒪᕆᖕᓂᕐᐹᖑᒐᓗᐊᑦ ᕿᒫᔪᓐᓇᕐᓂᐊᓐᖏᓚᑦ, ᐱᔪᓐᓇᕐᓂᖃᕐᓂᕐᐹᖑᔪᓪᓗ ᐊᓐᓇᒡᕕᖃᕐᓂᐊᖏᓐᓂᕗᑦ, ᑰᑉ ᐃᕗᕅᑎᐅᑉ ᓴᓂᐊᓂ ᐹᓪᓚᒃᐳᑦ ᒪᑭᑦᑐᓐᓇᕋᑎᒃ. 7 ᑭᓇᒃᑰᕙᑦ ᓁᓕᐅᑉ ᑰᖓᑐᑦ ᖄᒥᑦᑐᑐᑦ ᑍᒤᑎᑦᓯᔪᑦ, ᑰᒃᑎᑐᑦ ᓱᐱᓕᕐᑐᑎᑐᑦ ᑍᒤᑎᑦᓯᔫᑦ? 8 ᐄᑦᔨᑉᑎᐅᑉ ᓁᓕᐅᑉ ᑰᖓᑐᑦ ᐅᓕᑎᑦᑐᑎᑐᑦ ᑍᒤᑉᐳᑦ, ᑰᒃᑎᑐᑦ ᓱᐱᔪᑎᑐᑦ, ᐅᖃᕐᓗᑎᒡᓗ, ‘ᒪᑭᓪᓗᑕ ᓄᓇᕐᔪᐊᓕᒫᖅ ᓈᔪᒪᓂᐊᕐᐸᕗᑦ, ᐃᒡᓗᒐᓴᒡᔪᐊᕐᓂᒃ ᐃᓄᖏᓐᓂᒡᓗ ᐊᓯᕈᐃᔪᒪᕗᒍᑦ. 9 ᕿᒻᒥᕐᔪᐊᑦ ᓱᑲᑦᑑᑎᓯᐅᒃ, ᕿᒧᒃᓯᐅᑎᒨᕐᑐᓯᓗ ᓱᒃᑲᓵᕆᑦᓯ, ᐅᓇᑕᕐᑎᑕᐅᔪᓯ ᑐᐊᕕᕐᓗᓯ ᐱᓱᒋᑦᓯ, ᑯᔅᒥᐅᑕᐅᔪᓯ ᐳᑎᒥᐅᑕᐅᔪᓯᓗ ᓴᐴᓗᑕᖃᓕᕆᑦᓯ, ᓘᑎᒥᐅᑕᐅᔪᓯᓗ ᐱᑎᒃᓯᓯ ᕿᓗᓕᕐᓯᒋᒃ.’” 10 ᐅᓪᓗᖅ ᑍᓐᓇ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᒎᑎᐅᑉ ᐅᓪᓗᖁᑎᒋᕚ, ᐅᓪᓗᖅ ᐊᑭᓂᐊᕐᕕᒋᕚ, ᐊᑭᕋᕐᑐᕐᑎᓂ ᐊᑭᓂᐊᕐᕕᒋᔪᒫᕐᒪᒋᑦ, ᓴᕕᒡᔪᐊᒧᑦ ᑲᐱᔭᐅᔪᖅ ᑐᖁᓗᓂ ᑭᓯᐊᓂᐅᕗᖅ, ᐊᐅᖕᒥᒃ ᑯᕕᓯᖏᓐᓂᖓᓂ ᓄᖅᑲᐅᑎᔭᐅᓂᐊᓐᖏᓚᖅ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᑐᓂᕐᕈᓯᕐᓂᐊᕐᒪᑦ, ᐅᓐᓄᐊᓪᓗᐊᑉ ᓇᓛᓃᑦᑐᑦ ᓄᓇᖓᓐᓂ ᑰᑉ ᐃᕗᕅᑎᐅᑉ ᖃᓂᒋᔭᖓᓂ. 11 ᒋᓕᐊᑎᑦ ᓄᓇᖓᓂᑦ ᒥᖑᐊᕐᓯᑦᔪᑎᒃᓮᑐᕆᑦᓯ, ᐃᓕᑦᓯ ᐄᑦᔨᑉᑎᐅᑉ ᐸᓂᖏᑦ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᑦ, ᐃᓅᓕᓴᐅᑎᒃᓴᑦᓯᓐᓂᒃ ᕿᓂᕋᓗᐊᕈᑦᓯ ᓇᓂᓯᓂᐊᓐᖏᓚᓯ, ᐋᖅᑭᒃᑕᐅᑦᔪᑎᒃᓴᖃᓐᖏᓚᓯ. 12 ᐃᓅᖃᑎᒌᒡᔪᐊᓄᑦ ᑲᓐᖑᓇᕐᑐᒦᓐᓂᓯ ᑐᓴᐅᒪᔭᐅᓕᕐᐳᖅ, ᕿᐊᓂᓯᓗ ᓄᓇᕐᔪᐊᓕᒫᒥ ᑐᓵᔭᐅᓕᕐᐳᖅ, ᐅᓇᑕᕐᑎ ᐹᓪᓚᒃᐳᖅ ᐅᓇᑕᕐᑎᐅᖃᑎᒥᓄᑦ; ᑕᕝᕙ ᑕᒪᖏᒃ ᐅᕐᕈᖃᑎᒌᒃᐴᒃ. ᓂᐱᑯᓁᓴᐅᑉ ᑎᑭᐅᑎᓂᖓ 13 ᐃᒫᒃ ᑕᕝᕙ ᐊᑕᓂᖅ ᔨᕆᒤᐊᒧᑦ ᐅᖃᕐᑎᒥᓄᑦ ᐅᖃᓚᐅᕐᐳᖅ ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕆᐊᕐᓂᒃᓴᖓ ᐄᑦᔨᑉᑎᒧᑦ ᐱᓪᓗᒍ: 14 “ᑕᒪᓐᓇ ᐅᖃᐅᓯᕆᒍᒃ ᐄᑦᔨᑉᑎᒥᐅᓂ, ᐅᖃᐅᓯᕆᓗᒍᓗ ᒥᒡᑐᓕᒥ, ᐅᖃᐅᓯᕆᖕᒥᓗᒍᓗ ᒥᒻᐱᓯᒥ ᑕᐸᓂᓯᒥᓗ, ᐃᓂᒃᓴᑦᓯᓐᓄᐊᕐᓗᓯ ᐅᐸᓗᖕᒊᕐᓯᒪᓕᕆᑦᓯ, ᐊᕙᑎᑦᓯᓐᓃᑦᑐᑦ ᓴᕕᒡᔪᐊᒧᑦ ᑐᖁᕋᕐᑕᐅᓂᐊᕐᒪᑕ! 15 ᓱᖕᒪᑦ ᐅᓇᑕᕐᑎᖁᑎᓯ ᐅᕐᕈᕚᑦ? ᓇᖏᕈᓐᓇᖏᓐᓇᒥᒃ ᐊᑕᓂᐅᑉ ᐅᕐᕈᑎᓯᒪᖕᒪᒋᑦ. 16 ᒪᑭᑕᔪᓐᓇᕐᓂᐊᓐᖏᓚᑦ ᐅᕐᕈᔭᕌᖓᒥᒃ ᖃᓕᕇᓕᕐᐸᓪᓕᐊᓂᐊᕐᐳᑦ, ᐅᖃᕐᓗᑎᒡᓗ, ‘ᒪᑭᓪᓗᑕ ᐅᑎᓚᐅᕐᑕ ᐃᓅᖃᑎᑦᑎᓐᓄᑦ, ᓄᓇᒧᓪᓗ ᐃᓅᕕᒋᓚᐅᕐᑕᑦᑎᓐᓄᑦ, ᕿᒫᓗᑕ ᓴᕕᒡᔪᐊᒥᑦ.’ 17 ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᐊᑦᑎᓕᕈᒃ, ‘ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᐅᖃᕐᑐᐊᓗᑐᐃᓐᓇᐅᒐᒥ, ᐱᕕᒃᓴᕆᓚᐅᕐᑕᕋᓗᐊᒥᓂᒃ ᐊᓐᓁᕗᖅ.’ 18 ᐅᕙᖓ ᐊᑕᓂᐅᒐᒪ ᐊᔪᒐᖃᖏᑦᑐᖅ, ᐊᖓᔪᖅᑳᕐᔪᐊᖑᕗᖓ, ᐆᒪᓪᓗᖓ, ᓲᕐᓗ ᖃᖅᑲᖅ ᑍᐸᕆ ᖃᖅᑲᓂᑦ ᐳᕐᑐᓛᖑᖕᒪᑦ, ᖃᖅᑲᕐᓗ ᑳᕐᒥᐅᓪ ᓄᐃᑕᖕᒪᑦ ᑕᕆᐅᕐᒧᑦ, ᑍᒫᒃᑕᐅᖅ ᐱᔪᓐᓇᕐᑐᕐᔪᐊᖑᓂᐊᕐᐳᑦ ᐃᓕᑦᓯᓐᓂᒃ ᐅᓇᑕᕆᐊᕐᑐᑦ. 19 ᐄᑦᔨᑉᑎᒥᐅᑕᐅᔪᓯ ᓇᒃᓴᕐᓂᐊᕐᑕᑦᓯᓐᓂᒃ ᐴᖅᑬᓕᕆᑦᓯ ᐊᐅᓪᓚᕈᑦᔭᐅᔪᒫᕋᑦᓯ, ᒥᒻᐱᓯᒥ ᓄᓇᖃᕐᑐᑦ ᓱᓁᕈᑎᔪᒫᕐᐳᑦ ᓄᓇᖃᕐᕕᕕᓂᑐᐃᓐᓇᐅᓕᕐᓗᑎᒃ ᐃᓄᖃᕈᓐᓃᕈᒫᕐᒪᑕ. 20 ᐄᑦᔨᑉᑎ ᐊᕐᓇᓪᓗᑦᓯᐊᕙᒃᑎᑐᑦ ᓄᕐᕋᖃᓚᐅᕐᓯᒪᖏᑦᑐᑎᑐᑦ ᑍᒤᑉᐳᖅ, ᐆᒪᔪᓂᒃ ᐸᒡᕕᓵᕆᔨᑎᑐᑦ ᑍᒤᑦᑐᓂᒃ ᑎᑭᑦᑐᖃᕐᓂᐊᕐᐳᖅ ᐅᓐᓄᐊᓪᓗᐊᑉ ᓇᓛᓂᑦ. 21 ᐊᑭᓕᕐᓱᐊᖑᓪᓗᑎᒃ ᐅᓇᑕᕆᐊᕐᑎᑕᐅᔫᒐᓗᐊᑦ ᐃᒻᒧᒃᓯᐅᒐᐅᑉ ᓄᕐᕋᖓᑐᑦ ᖁᐃᓂᓂᕐᒧᑦ ᐱᒡᒐᕐᑐᑎᑐᑦ ᑍᒤᑉᐳᑦ, ᕿᒪᒃᓯᑐᐃᓐᓇᕐᐳᑦ ᐊᑭᒪᓂᕐᒥᒃ ᐊᔪᕋᒥᒃ, ᐅᓪᓗᖅ ᑲᑉᐱᐊᓱᒃᑎᑕᐅᕕᖓᑦ ᓇᓪᓕᐅᑎᓯᒪᖕᒪᑦ, ᑎᑭᐅᑎᓯᒪᖕᒪᑕ ᓱᒋᐊᕐᑕᐅᕕᖕᒥᖕᓄᑦ. 22 ᐄᑦᔨᑉᑎᒥᐅᑦ ᓯᕋᓛᕐᓂᐊᕐᐳᑦ ᖁᒡᓗᒋᐊᑎᑐᑦ ᕿᒪᒃᓯᒋᐊᕐᑐᑎᑐᑦ, ᐊᑭᕋᖏᑦ ᐱᔪᓐᓇᕐᓂᖃᕐᓗᑎᒃ ᑎᑭᑉᐸᓪᓕᐊᓕᕐᒪᑕ, ᑎᑭᓐᓂᐊᕐᒪᑕ ᐅᓕᒪᐅᓯᔭᕐᓗᑎᒃ, ᐊᖑᑎᑎᑐᑦ ᓇᐹᕐᑐᓂᒃ ᓇᑲᑎᕆᔭᕐᑐᕐᓯᒪᔪᑎᑐᑦ. 23 ᓇᐹᕐᑐᖏᓪᓗ ᓇᑲᑎᕐᑕᐅᔪᒫᕐᐳᑦ, ᐊᑕᓂᖅ ᐅᖃᕐᐳᖅ, ᓇᐹᕐᑐᖏᑦ ᐊᑯᓐᓂᖃᕐᑑᔮᖏᒃᑲᓗᐊᕐᐸᑕ, ᐱᒡᓕᕐᑕᐅᔮᕐᑐᓂᑦ ᐅᓄᕐᓂᕐᓴᐅᓗᑎᒃ ᑎᑭᑦᓱᒫᕐᒪᑕ, ᐅᓄᓗᐊᕐᓂᖏᓐᓄᑦ ᓈᓴᒐᒃᓴᐅᖏᓪᓗᑎᒃ. 24 ᐄᑦᔨᑉᑎᐅᑉ ᐸᓂᖓ ᑲᓐᖑᓱᒃᑎᑕᐅᔪᒫᕐᐳᖅ, ᐱᔭᐅᓗᓂᓗ ᐅᓐᓄᐊᓪᓗᐊᑉ ᓇᓛᓂᑦ ᑎᑭᓯᒪᔪᓄᑦ.” 25 ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, “ᑕᑯᒋᑦ ᑎᑭᑎᑦᓯᓕᕐᐳᖓ ᑎᐱᓯᒃᑯᑦ ᒎᑎᖓᑦᑕ ᐋᒪᓐᓇᐅᑉ ᓱᒋᐊᕐᑕᐅᑦᔪᑎᒃᓴᖓᓂᒃ, ᐰᕉᓪᓗ ᐄᑦᔨᑉᑎᒥᐅᓪᓗ ᒎᑎᓐᖑᐊᖏᑕ ᐊᖓᔪᖅᑳᕐᔪᐊᖏᑕᓗ ᓱᒋᐊᕐᑕᐅᑦᔪᑎᒃᓴᖏᓐᓂᒃ, ᑍᒃᑯᓄᖓᓗ ᐰᕉᒥᒃ ᑕᑎᖃᕐᑐᓄᑦ. 26 ᑐᓂᑦᔪᑎᒋᓂᐊᕐᐸᒃᑲᓗ ᑖᒃᑯᓂᖓ ᑐᖁᑦᓯᔪᒪᔪᓄᑦ, ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐊᖓᔪᖅᑳᖁᑎᖏᓐᓄᓪᓗ. ᑕᒪᑐᒪᓕ ᑭᖑᓂᖓᒍᑦ ᐄᑦᔨᑉᑎ ᓄᓇᒋᔭᐅᔪᓐᓇᕐᓯᑎᑦᓱᒫᕆᕙᕋ ᑕᒪᑐᒪ ᓯᕗᓂᖓᓂᑐᑦ ᓄᓇᒋᔭᐅᔪᑐᖃᐅᖕᒪᑦ, ᐊᑕᓂᖅ ᐅᖃᕐᐳᖅ.” ᒎᑎᐅᑉ ᐃᓄᖁᑎᓂ ᐱᐅᓕᔪᒫᕐᐰᑦ 27 “ᓯᕘᕋᓂᐊᕋᓯ ᐃᓄᖁᑎᒃᑲ, ᑲᒪᓂᐊᕈᑎᒋᓇᒍᓗ ᐃᓴᕆᐊᓕᒥᐅᖑᔪᓯ ᐅᖓᓯᒃᑐᒥᑦ ᐱᐅᓕᔭᕐᑐᕈᒫᕐᐸᑦᓯ, ᑭᖑᕚᓯᓗ ᐊᐅᓪᓚᕈᑦᔭᐅᓯᒪᕕᒋᔭᖏᓐᓂᑦ. ᔧᑯᒃᑯᑦ ᐅᑎᕈᒫᕐᐳᑦ ᓮᒪᓇᕐᑐᒥᒃ ᐃᓂᖃᑦᓯᐊᕐᓇᕐᑐᒥᒡᓗ ᓄᓇᖃᓕᕈᒫᕆᕗᑦ, ᓯᕘᕋᓵᕐᑎᖃᕈᓐᓃᕐᓗᑎᒡᓗ. 28 ᓯᕘᕋᓂᐊᕋᓯ ᔧᑯᒃᑯᑦ ᐃᓄᖁᑎᒃᑲ, ᐃᓚᒋᒐᑦᓯ, ᐊᑕᓂᖅ ᐅᖃᕐᐳᖅ, ᐃᓅᖃᑎᒌᒡᔪᐊᓂᒃ ᐊᓯᕈᕐᑕᐅᑎᑦᓯᓯᒪᒐᓗᐊᕐᐳᖓ, ᓯᐊᒻᒪᕐᑎᓪᓗᓯᓗ ᓇᒧᑐᐃᓐᓇᖅ, ᓄᖑᑕᐅᑎᒻᒪᕆᖕᓂᐊᓐᖏᓚᑦᓯᓕ ᐋᖅᑭᒋᐊᕐᓂᐊᕐᐸᑦᓯ ᐊᑲᐅᔪᒦᖁᔨᓂᓐᓄᑦ ᑭᓯᐊᓂ; ᐋᖅᑭᒋᐊᓚᐅᖏᓪᓗᑎᑦ ᓴᒃᑯᓐᓂᐊᓐᖏᓚᒋᑦ, ᐅᕙᖓ, ᐊᑕᓂᐅᔪᖓ ᑕᒪᑐᒥᖓ ᐅᖃᕐᐳᖓ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society