ᔨᕆᒤᐊᐅᑉ ᐊᒡᓚᖏᑦ 45 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐊᖏᕐᓯᒪᓂᖓ ᐸᕉᒃᒧᑦ

¹ ᐃᒫᒃ ᔨᕆᒤᐊᐅᑉ ᒎᑎᐅᑉ ᐅᖃᕐᑎᖓᑕ ᐸᕉᒃ ᓂᕅᐊᐅᑉ ᐃᕐᓂᖓ ᐅᖃᐅᑎᓚᐅᕐᐹ, ᔨᕼᐅᐃᐊᑭᒻ ᔫᓮᐊᐅᑉ ᐃᕐᓂᖓ ᐊᖓᔪᖅᑳᕐᔪᐊᖑᓯᒪᓕᕐᑎᓪᓗᒍ ᐊᕐᕌᒍᓂᒃ ᓯᑕᒪᓂᒃ, ᐸᕉᒃ ᑎᑎᕋᓚᐅᕐᓯᒪᓕᕐᑎᓪᓗᒍ ᔨᕆᒤᐊᐅᑉ ᐅᖃᕐᐸᓪᓕᐊᔭᖏᓐᓂᒃ ᐊᒡᓚᖕᓂᒃ.

² ᐃᒫᒃ ᑕᕝᕙ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, “ᐸᕉᒃ ᐃᓕᖕᓄᑦ:

³ ᐅᖃᓚᐅᕋᕕᑦ, ‘ᐅᕙᓐᓄᑦ ᑲᑉᐱᐊᓐᓇᒦᒃ ᐊᑕᓂᐅᑉ ᐋᓐᓂᐊᕐᓂᕋ ᐃᓚᒃᑲᓐᓂᕐᒪᒍ ᕿᒃᓵᖕᓇᕐᑐᒥᒃ, ᐋᓐᓂᐊᓂᕐᒧᑦ ᐃᓂᓪᓚᒍᓐᓇᓐᖏᓚᖓ.’

⁴ “ᐊᑕᓂᖅ ᐅᖃᕐᐳᖅ, ᐃᒫᒃ ᐅᖃᐅᑎᒍᒃ, ᑕᑯᒋᑦ, ᓇᑉᐸᕐᑎᓚᐅᕐᑕᒃᑲ ᓄᖑᑎᑦᓱᒫᕆᕙᒃᑲ, ᐱᕈᕐᑎᓚᐅᕐᑕᒃᑲᓗ ᓄᓱᒃᐸᒡᓗᒋᑦ ᓄᓇᓕᒫᒥᑦ.

⁵ ᐱᔪᓐᓇᕐᑐᕐᔪᐊᖑᓕᕈᑎᒃᓴᓂᒃ ᕿᓂᕈᕕᑦ, ᕿᓂᕈᓐᓃᕆᑦ ᐊᓯᕈᕐᑕᐅᓇᕐᑐᒥᒃ ᐃᓄᓕᒫᓄᑦ ᑎᑭᑎᑦᓯᓂᐊᕋᒪ, ᐊᑕᓂᖅ ᐅᖃᕐᐳᖅ, ᐃᕝᕕᓪᓕ ᐃᓅᓯᕐᒥᒃ ᑐᓂᓂᐊᕐᐸᒋᑦ ᓇᒧᑐᐃᓐᓇᖅ ᐂᓂᐊᕈᕕᑦ ᐃᓅᑎᑦᓱᒫᕐᐸᒋᑦ.”