ᔨᕆᒤᐊᐅᑉ ᐊᒡᓚᖏᑦ 44 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓂᐅᑉ ᐅᖃᐅᓯᖏᑦ ᐃᓴᕆᐊᓕᒥᐅᓄᑦ ᐄᑦᔨᑉᑎᒦᑦᑐᓄᑦ 1 ᐊᑕᓂᐅᑉ ᔨᕆᒤᐊ ᐅᖃᕐᕕᒋᕚ ᔫᑎᑦ ᐄᑦᔨᑉᑎᒦᑦᑐᑦ ᐱᑦᔪᑎᒋᓗᒋᑦ ᓄᓇᓕᖕᓂ ᐅᑯᓇᓃᑦᑐᑦ; ᒥᒡᑐᓕᒥ, ᑕᐸᓂᓯᒥ ᒥᒻᐱᓯᒥᓗ, ᓄᓇᒥᓗ ᐹᑐᕉᓯᒥ. 2 ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, “ᑕᑯᓯᒪᓕᕐᐳᓯ ᔨᕉᓴᓕᒥᐅᑦ ᐊᓯᕈᕐᑕᐅᓯᒪᓂᖏᓐᓂᒃ ᔫᑕᐅᓪᓗ ᓄᓇᖓᓂ ᓄᓇᓕᐅᔪᑦ, ᒫᓐᓇᓕ ᓄᓇᓕᕕᓂᑐᐃᓐᓇᐅᓕᕐᒪᑕ ᐃᓄᖃᕋᑎᒡᓗ. 3 ᐃᓄᒋᓚᐅᕐᑕᖏᓐᓂᑦ ᓂᓐᖓᒃᑎᑕᐅᓚᐅᕋᒪ ᐱᐅᖏᑦᑐᓕᓂᖏᓐᓄᑦ, ᑐᓂᕐᕈᓯᕐᓗᑎᒃ ᑐᒃᓯᐊᕐᕕᖃᖃᑦᑕᓚᐅᕐᒪᑕ ᐊᓯᓐᓂᒃ ᒎᑎᒋᔪᒪᔭᒥᖕᓂᒃ ᑖᒃᑯᐊᓗ ᐱᔨᑦᓯᖔᓕᕐᓗᒋᑦ ᓯᕗᓕᕕᓂᖏᑕ ᓯᕗᓕᕕᓂᑦᓯᓗ ᑐᒃᓯᐊᕐᕕᒋᓂᐅᔭᓚᐅᓐᖏᑕᖏᓐᓂᒃ. 4 ᐅᖃᕐᑎᓐᓂᒃ ᐱᓇᓱᐊᕐᕕᐅᔭᕐᑐᕐᑎᖃᑦᑕᓚᐅᕐᐸᑦᓯ, ᐅᖃᐅᑎᓪᓗᓯ, ‘ᐱᐅᖏᑦᑐᓂᒃ ᐆᒥᒋᔭᓐᓂᒃ ᐱᓇᓱᐊᓕᖁᓇᓯ.’ 5 ᑐᓴᕈᓐᓇᓚᐅᓐᖏᓐᓇᑦᓯ ᓈᓚᒍᒪᖏᓪᓗᓯᓗ, ᐱᐅᖏᑦᑐᓕᓂᓯ ᓄᖅᑲᐅᑎᔪᒪᓚᐅᖏᓐᓇᑦᓯᐅᒃ ᒎᑎᓐᖑᐊᓄᑦ ᑐᓂᕐᕈᓯᕐᓗᓯ ᑐᒃᓯᐊᕐᕕᖃᖃᑦᑕᕋᑦᓯ. 6 ᓂᓐᖓᕕᒃᔪᐊᕐᓂᕋ ᓴᖅᑭᑎᓚᐅᕐᐸᕋ ᔫᑕᒥᐅᓄᑦ ᔨᕉᓴᓕᒥᐅᓄᓪᓗ ᓄᓇᓖᓪᓗ ᐃᑯᐊᓪᓚᒃᑕᐅᑎᓚᐅᕐᐸᒃᑲ, ᓄᓇᓕᕕᓂᑐᐃᓐᓇᐅᓕᕐᐳᑦ ᐅᓪᓗᒥ ᑕᑯᓪᓗᒋᓪᓗ ᑕᑯᔪᒥᓇᓐᖏᓚᑦ. 7 “ᑍᒤᒻᒪᑦ ᐃᒫᒃ ᐊᑕᓂᖅ ᒎᑎ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐃᓱᒪᓚᐅᕆᑦᓯ ᖃᓄᐃᒻᒪᑦ ᐃᓕᑦᓯᓐᓂᒃ ᐱᐅᖏᑦᑐᓕᐅᕐᑎᒻᒪᖔᑦᓯ, ᐊᖑᑎᑦ ᐊᕐᓁᓪᓗ ᓱᕈᓰᓪᓗ ᓄᑕᕋᑯᓗᐃᓪᓗ ᐊᓯᕈᕐᑕᐅᖁᒐᑦᓯᐅᒃ ᐊᒥᐊᒃᑯᖃᕈᒪᔪᓐᓃᕐᐱᓰ? 8 ᓱᖕᒪᑦ ᓂᓐᖓᒃᑎᓐᓇᓱᐊᕐᐱᓯᓐᖔ ᑐᒃᓯᐊᕐᕕᖃᕐᓂᑦᓯᓐᓄᑦ ᒎᑎᓐᖑᐊᓄᑦ ᑐᓂᕐᕈᓯᕐᕕᒋᓪᓗᒋᓪᓗ ᐄᑦᔨᑉᑎᒥ ᒎᑎᒋᔭᐅᔪᑦ? ᑍᒤᓕᐅᕋᓱᐊᕐᐱᓰ? ᓄᖑᑦᓯᐊᒻᒪᕆᒍᒪᓪᓗᓯ, ᓄᓇᒥ ᐃᓅᖃᑎᒌᒡᔪᐊᖑᔪᓄᑦ ᒥᑕᐅᑎᒋᔭᒃᓴᓐᖑᕈᒪᓪᓗᓯ ᐅᖃᕐᓂᕐᓘᑎᒃᓴᐅᔪᒪᓪᓗᓯᓘ? 9 ᐳᐃᒍᕐᐱᓰ ᐱᐅᖏᑦᑐᓂᒃ ᐱᓂᐊᕐᑕᐅᓯᒪᔪᓂᑦ ᔫᑕᒥᐅᓂᑦ ᔨᕉᓴᓕᒥᐅᓂᓪᓗ ᓯᕗᓕᕕᓂᑦᓯᓐᓄᑦ ᐱᓂᐊᕐᑕᐅᓯᒪᔪᓂᒃ? ᐊᖓᔪᖅᑳᖑᓚᐅᕐᑐᓄᑦ ᔫᑕᒥ, ᓄᓕᐊᖏᓐᓄᓪᓗ ᐃᓕᑦᓯᓐᓄᑦ ᓄᓕᐊᑦᓯᓐᓄᓪᓗ? 10 ᐅᓪᓗᒥᒧᑦ ᑎᑭᓪᓗᒍ ᓱᓕ ᒥᑭᒡᓕᑎᓚᐅᕐᓯᒪᓐᖏᓚᓯ ᐃᓕᑦᓯᓗ ᓯᕗᓕᕕᓂᓯᓗ, ᐅᕙᓐᓂᒃ ᐅᐱᒋᔭᖃᓚᐅᕐᓯᒪᓐᖏᓚᓯ ᐃᓅᓇᓱᐊᓚᐅᕐᓯᒪᓇᓯᓗ ᐱᖁᔭᒃᑲ ᒪᓕᒡᓗᒋᑦ. 11 “ᑍᒤᒻᒪᑦ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐊᑭᕋᕐᑐᕐᓂᐊᕐᐸᑦᓯ ᔫᑕᒥᐅᓕᒫᓪᓗ ᐊᓯᕈᕈᒫᕐᐸᒃᑲ. 12 ᔫᑕᒥᐅᑦ ᐊᒥᐊᒃᑯᖏᑦ ᐄᑦᔨᑉᑎᒥ ᓄᓇᖃᕆᐊᕐᑐᕐᓯᒪᔪᑦ ᓄᖑᓐᓂᐊᕐᐸᒃᑲ ᐃᓘᓐᓇᑎᒃ ᐄᑦᔨᑉᑎᒦᓕᕋᓗᐊᕐᑎᓪᓗᒋᑦ ᑐᖁᕋᕈᒫᕐᐳᑦ, ᐅᓇᑕᕐᑐᓂᓘᓐᓃᑦ, ᑳᖕᓇᕐᑐᕐᔪᐊᒧᓪᓘᓐᓃᑦ, ᒥᑭᓐᓂᕐᐹᒥᑦ ᐱᔪᓐᓇᕐᓂᕐᐹᑦ ᑎᑭᓪᓗᒋᑦ, ᑐᖁᑕᐅᔪᒫᕐᐳᑦ ᐅᓇᑕᕐᑐᒃᓴᓄᑦ ᑳᖕᓇᕐᑐᕐᔪᐊᒧᓪᓗ, ᐅᖃᕐᓂᕐᓘᑎᒃᓴᓐᖑᕈᒫᕐᐳᑦ ᑕᑯᒥᓁᑦᑑᓗᑎᒡᓗ ᐃᒋᑕᒃᓴᐅᓂᐊᕐᐳᑦ ᐸᓯᔭᒃᓴᐅᓗᑎᒡᓗ. 13 ᐄᑦᔨᑉᑎᒦᓕᕐᑐᑦ ᐅᓇᑕᕐᓂᒃᑯᑦ ᑳᖕᓇᕐᑐᕐᔪᐊᒃᑯᓪᓗ ᐋᓐᓂᐊᓇᕐᑐᑎᒍᓪᓗ ᓱᒋᐊᕐᓂᐊᕐᐸᒃᑲ, ᔨᕉᓴᓕᒥᐅᓂᒃ ᓱᒋᐊᕐᓯᓂᕆᓚᐅᕐᑕᑦᑐᑦ ᐱᓂᐊᕐᐸᒃᑲ. 14 ᔫᑕᒥᐅᑦ ᐊᒥᐊᒃᑯᖏᑦ ᐄᑦᔨᑉᑎᒧᐊᓚᐅᕐᑐᑦ ᐃᓅᔪᕐᑕᖃᕐᓂᐊᓐᖏᓚᑦ, ᔫᑕᒧᑦ ᐅᑎᕈᒫᕐᑐᒃᓴᓂᒃ ᐅᑎᕐᓯᕐᕕᒋᕙᓚᐅᕐᑕᒥᖕᓄᑦ; ᐅᑎᕐᑐᒃᓴᖃᕈᒫᖏᒻᒪᑕ ᕿᒪᒃᓯᓂᑯᕕᓂᕐᓂᒃ ᐅᓄᖏᑦᑐᓂᒃ ᐅᑎᕈᓐᓇᕐᑐᖃᕈᒫᕐᑑᒐᓗᐊᖅ.” 15 ᐊᖑᑎᑦ ᑕᒪᕐᒥᒃ ᖃᐅᔨᒪᔪᑦ ᓄᓕᐊᒥᖕᓂᒃ ᑐᓂᕐᕈᓯᖃᑦᑕᕐᑐᓂᒃ ᒎᑎᒋᔭᒥ ᐊᓯᐊᓄᑦ ᐊᕐᓇᐅᖃᑎᖏᓪᓗ ᑕᕝᕙᓃᖃᑕᐅᔪᑦ ᐃᓄᐃᓪᓗ ᑕᕝᕙᓃᑦᑐᑦᑕᐅᖅ, ᐹᑐᕉᓯᒦᑦᑐᓪᓗ ᐄᑦᔨᑉᑎᒥᐅᓂ, ᑕᕆᐅᓪᓗ ᓇᓛᓂᒥᐅᑦ ᔨᕆᒤᐊᒧᑦ ᐅᖃᕐᐳᑦ, 16 “ᐊᑕᓂᐅᑉ ᐊᑎᖓᓂ ᐅᖃᐅᓯᕆᔭᑎᑦ ᓈᓚᖕᓂᐊᓐᖏᓚᕗᑦ, 17 ᐊᖏᕈᑎᒋᓚᐅᕐᑕᓕᒫᑦᑎᓐᓂᒃ ᐱᓇᓱᐊᕐᓂᐊᕐᐳᒍᑦ, ᐆᓯᒪᔪᓂᒃ ᑐᓂᕐᕈᓯᖃᑦᑕᕐᓂᐊᕐᐳᒍᑦ ᕿᓚᐅᑉ ᑯᐃᖓᓄᑦ, ᑯᕕᓯᕕᒋᕙᒡᓗᒍᓗ ᑐᓂᕐᕈᑎᓂᒃ ᐃᒥᕐᑕᐅᔪᒃᓴᓂᒃ; ᓲᕐᓗᑦᑕᐅᖅ ᓯᕗᓕᕕᓂᕗᑦ ᐊᖓᔪᖅᑳᕐᔪᐊᕆᔭᕗᓪᓗ ᐊᖓᔪᖅᑳᖁᑎᕗᓪᓗ ᑍᒤᓕᐅᕐᐸᓚᐅᕐᒪᑕ ᔫᑕᒥ ᔨᕉᓴᓕᒥᓗ, ᑍᑦᓱᒪᓂ ᓂᕿᒃᓴᖃᑦᓯᐊᕐᐸᓚᐅᕐᐳᒍᑦ ᐊᔪᕐᓴᕐᓇᕐᑐᕐᓯᐅᕋᑕᓗ ᐱᐅᖏᑦᑐᓂᒡᓗ ᑕᑯᓚᐅᕐᓇᑕ. 18 ᕿᓚᐅᑉ ᑯᐃᖓᓄᑦ, ᐆᑕᕐᓯᒪᔪᓂᒃ ᑐᓂᕐᕈᓯᖃᑦᑕᕈᓐᓃᕋᑦᑕ ᑯᕕᓯᖃᑦᑕᕈᓐᓃᕋᑦᑕᓗ ᐃᒥᕐᑕᐅᔪᒃᓴᓂᒃ ᑐᓂᕐᕈᑎᓂᒃ, ᓱᓁᕈᑎᖔᕐᓯᒪᕗᒍᑦ, ᐅᓇᑕᕐᑐᓄᓪᓗ ᑐᖁᕋᕐᑕᐅᕙᓕᕐᓗᑕ ᑳᖕᓇᕐᑐᕐᔪᐊᒧᓪᓗ.” 19 ᐊᕐᓁᑦ ᐅᖃᒃᑲᓐᓂᕐᐳᑦ, “ᐆᓯᒪᔪᓂᒃ ᑐᓂᕐᕈᓯᕌᖓᑦᑕ ᕿᓚᐅᑉ ᑯᐃᖓᓄᑦ ᐃᒥᕐᑕᒃᓴᖏᓐᓂᒡᓗ ᑐᓂᕐᕈᓯᕐᓗᑕ, ᐅᐃᕗᑦ ᖃᐅᔨᒪᕙᓐᖏᓛᑦ? ᐆᑕᕗᑦ ᐊᑦᔨᖃᕐᐸᖕᒪᑕ ᑖᑦᓱᒥᖓ ᐃᒥᕐᑕᒃᓴᖏᓐᓂᒡᓗ ᑯᕕᓯᓪᓗᑕ ᑐᓂᕐᕈᓯᕐᕕᒋᕙᒃᑲᑦᑎᒍ.” 20 ᔨᕆᒤᐊᐅᑉ ᐅᖃᐅᑎᓕᕐᐰᑦ ᐃᓄᓕᒫᑦ, ᐊᖑᑏᑦ ᐊᕐᓇᓪᓗ, ᑭᐅᒪᔨᒋᔭᓂ: 21 “ᐊᑕᓂᐅᑉ ᐃᖅᑲᐅᒪᖏᒻᒪᒌᑦ? ᐃᓱᒪᒋᓇᓂᒋᓪᓗ ᐳᔫᕐᑎᑦᓯᓪᓗᑎᒃ ᑐᓂᕐᕈᑎᒋᔭᐅᖃᑦᑕᓚᐅᕐᑐᑦ ᔫᑕᒥᐅᓂᑦ ᔨᕉᓴᓕᒥᐅᓂᓪᓗ ᐃᓕᑦᓯᓐᓄᑦ ᓯᕗᓕᕕᓂᑦᓯᓐᓄᓪᓗ ᐊᖓᔪᖅᑳᕐᔪᐊᑦᓯᓐᓄᑦ ᐊᖓᔪᖅᑳᖁᑎᖏᓐᓄᓪᓗ ᐃᓄᖕᓄᓪᓗ ᓄᓇᖃᓚᐅᕐᑐᓄᑦ ᑖᕙᓂ? 22 ᐊᑕᓂᖅ ᕿᓄᐃᓵᕈᓐᓁᓪᓕᒐᒥ ᐱᐅᖏᑦᑐᓂᒃ ᐃᓕᖅᑯᓯᖃᕐᓂᑦᓯᓐᓄᑦ, ᓈᒻᒪᒋᓐᖏᑕᖏᓐᓂᒡᓗ ᐱᓇᓱᐊᖃᑦᑕᕐᓂᑦᓯᓐᓄᑦ ᓄᓇᒋᔭᓯ ᐅᖃᐅᓯᕐᓘᑎᒃᓴᓐᖑᓚᐅᕐᐳᖅ, ᓱᓁᕈᑎᓪᓗᓂᓗ ᐃᓄᖃᕈᓐᓃᕐᓗᓂᓗ ᒫᓐᓇ ᑍᒤᑦᑑᓕᕐᐳᖅ. 23 ᑐᓂᕐᕈᓯᖃᑦᑕᓚᐅᕋᑦᓯ ᐊᑕᓂᕐᓗ ᐊᔪᕐᑐᓕᕕᒋᓪᓗᒍ, ᓈᓚᓚᐅᖏᓐᓇᑦᓯᐅᒃ ᐱᖁᔭᖏᓪᓗ ᒪᓕᖕᓇᒋᑦ ᑐᓴᕐᑕᐅᖁᔭᖏᓪᓗ ᐃᓱᒪᒋᓇᒋᑦ ᐊᖏᕐᓯᒪᓂᖏᓪᓘᓐᓃᑦ, ᑕᒪᑦᔭ ᑲᑉᐱᐊᓇᕐᑐᓂᒃ ᐊᑐᕈᑎᒋᓕᕐᑕᓯ ᐅᓪᓗᒥᓗ ᑕᑯᓯᒪᓕᕐᐸᓯ ᑍᒤᑦᑐᒦᑦᔪᑎᒋᔭᓯ ᓱᓇᒨᕐᒪᖔᑦ.” 24 ᔨᕆᒤᐊᐅᑉ ᐅᖃᐅᑎᒃᑲᓐᓂᕐᐰᑦ ᐃᓄᓕᒫᑦ ᐊᕐᓁᓪᓗ, “ᐊᑕᓂᐅᑉ ᐅᖃᐅᓯᖏᑦ ᑐᓴᕐᓯᐅᒃ, ᔫᑕᒥᐅᑕᐅᔪᓯ ᐄᑦᔨᑉᑎᒦᓕᕐᑐᓯ. 25 ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᑕᒪᑦᓯ ᓄᓕᐊᓯᓗ ᐱᓂᐊᕐᓂᑦᓯᒍᑦ ᓇᓗᓇᕈᓐᓃᕐᑎᑦᓯᕗᓯ ᐊᑐᕈᒪᓚᐅᕐᑕᓯ ᐅᖃᕐᑎᓪᓗᓯ, ‘ᐊᖏᖃᑎᒌᒍᑎᓕᐅᕐᐳᒍᑦ ᐆᓯᒪᔪᓂᒃ ᑐᓂᕐᕈᓯᖃᑦᑕᕈᒪᓪᓗᑕ ᑯᕕᓯᖃᑦᑕᕈᒪᓪᓗᑕᓗ ᐃᒥᕐᑕᒃᓴᖏᓐᓂᒃ ᑐᓂᕐᕈᓯᖃᑦᑕᕐᓗᑕᓗ ᕿᓚᐅᑉ ᑯᐃᖓᓄᑦ.’ ᐊᑏ ᑍᒤᓕᐅᕈᒪᒍᑦᓯ ᑍᒤᓕᐅᕆᑦᓯ ᐊᖏᕈᑎᒋᓚᐅᕐᑕᓯ ᐊᑐᕐᓗᒍ. 26 ᑍᒤᒻᒪᑦ ᐊᑕᓂᐅᑉ ᐅᖃᐅᓯᖏᑦ ᑐᓴᕐᓯᐅᒃ ᔫᑎᐅᔪᓯ ᐄᑦᔨᑉᑎᒥ ᓄᓇᖃᓕᕐᑐᓯ: ᑕᑯᒋᑦ, ᐊᑎᕋ ᐊᑐᕐᓗᒍ ᐅᖃᒻᒪᕆᒃᐳᖓ, ᐊᑕᓂᖅ ᐅᖃᕐᐳᖅ, ᔫᑕᒥᐅᑦ ᓇᓪᓕᐊᑐᐃᓐᓇᖅ ᐄᑦᔨᑉᑎᒦᓕᕐᑐᑦ ᑐᒃᓯᐊᕋᓱᐊᕐᐸᖁᔪᓐᓃᕐᐸᒃᑲ ᐅᕙᓐᓄᑦ, ᐊᑎᕋᓘᓐᓃᑦ ᐊᑐᕐᓗᒍ ᐅᖃᕐᐸᖁᔪᓐᓃᕐᐸᒃᑲ, ᐃᒫᒃ, ‘ᐊᑕᓂᖅ ᐊᑕᓂᐅᓂᕐᐹᖑᔪᖅ ᐆᒪᖕᒪᑦ.’ 27 ᑕᑯᒋᑦ, ᖃᐅᔨᓴᕐᓂᐊᓕᕐᐸᒃᑲ ᐊᓯᕈᕐᑕᐅᖁᓪᓗᒋᑦ ᐱᐅᔪᒥᒃ ᐱᕕᐅᖁᓇᒋᑦ, ᔫᑎᑦ ᐄᑦᔨᑉᑎᒦᑦᑐᑦ ᑐᖁᑕᐅᔪᒫᕐᐳᑦ ᐅᓇᑕᕐᑐᓄᑦ ᑳᖕᓇᕐᑐᕐᔪᐊᒧᓪᓗ ᑕᒪᕐᒥᒃ ᓄᖑᑕᐅᓚᐅᖏᓐᓂᓕᒫᒥᖕᓂ. 28 ᑍᒃᑯᐊ ᐅᓇᑕᕐᑐᓄᑦ ᐱᔭᐅᖏᓪᓗᑎᒃ ᔫᑕᐅᑉ ᓄᓇᖓᓄᑦ ᐅᑎᕈᒫᕐᑐᑦ ᐅᓄᖏᑦᑐᑯᓘᔪᒫᕐᐳᑦ, ᔫᑕᒥᐅᕕᓃᑦ ᐊᒥᐊᒃᑯᖏᑦ ᐄᑦᔨᑉᑎᒥᐅᑕᐅᓕᕐᑐᑦ ᖃᐅᔨᖁᓪᓗᒋᑦ ᓇᓪᓕᐊᑦᑕ ᐅᖃᐅᓯᖏᑦ ᓱᓕᓂᕐᓴᐅᓕᕈᒫᕐᒪᖔᑕ, ᐅᕙᖓᓘᓐᓃᑦ ᑍᒃᑯᐊᓘᓐᓃᑦ. 29 ᐃᓕᑦᓯᓐᓄᑦ ᓇᓗᓁᒃᑯᑕᐅᓕᕐᓕ ᑕᕝᕙᓂ ᓄᓇᒋᔭᑦᓯᓐᓂ ᓱᒋᐊᕈᒫᕋᑦᓯ, ᐊᑕᓂᖅ ᐅᖃᕐᐳᖅ, ᓯᕘᕋᓮᓂᕆᔭᒃᑲ ᐃᓕᑦᓯᓐᓂᒃ ᑍᒤᓕᖕᒊᓐᓇᕐᓂᐊᕐᒪᑕ ᐊᑐᓕᖏᓐᓂᓕᒫᒥᖕᓂ. 30 ᐃᒫᒃ ᐊᑕᓂᖅ ᐅᖃᕐᐳᖅ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᕼᐅᐳᕋ, ᐱᔭᐅᑎᑦᓱᒫᕋᒃᑯ ᐊᑭᕋᖏᓐᓄᑦ ᑖᑦᓱᒥᖓ ᑐᖁᑦᓯᔪᒪᔪᓄᑦ, ᔨᑎᑬᐊᑐᑦᑕᐅᖅ ᔫᑕᒥᐅᑦ ᐊᖓᔪᖅᑳᕐᔪᐊᕆᓚᐅᕐᑕᖓᑐᑦ ᐱᔭᐅᓚᐅᕐᑐᑐᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑐᖁᑦᓯᔪᒪᓚᐅᕐᑐᒧᑦ ᑖᑦᓱᒥᖓ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society