ᔨᕆᒤᐊᐅᑉ ᐊᒡᓚᖏᑦ 43 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᑉ ᐄᑦᔨᑉᑎᒧᐊᕈᑦᔭᐅᓂᖓ

¹ ᔨᕆᒤᐊᐅᑉ ᐃᓄᐃᑦ ᐅᖃᐅᑎᔭᕇᕐᒪᒋᑦ ᐊᑕᓂᐅᑉ ᒎᑎᖓᑦᑕ ᐅᖃᕐᑕᐅᖁᔭᓕᒫᖏᓐᓂᒃ.

² ᐊᔭᕅᐊᐅᑉ ᕼᐅᓮᐊᐅᑉ ᐃᕐᓂᖓᑕ, ᔪᕼᐋᓇᓂᐅᓪᓗ ᑲᕆᐊᑉ ᐃᕐᓂᖓᑕ ᐊᓯᖏᑕᓗ ᐊᔪᖏᑦᑑᓐᓇᓱᒋᔪᑦ ᔨᕆᒤᐊ ᐅᖃᐅᑎᕚᑦ, “ᓱᓕᖏᑦᑐᓂᒃ ᐅᖃᕐᐳᑎᑦ ᐊᑕᓂᐅᑉ ᒎᑎᑦᑕ ᐅᕙᑦᑎᓐᓄᑦ ᑎᓕᓐᖏᓛᑎᑦ ᐅᖃᕐᑎᑦᓴᕐᑐᕐᓗᑎᑦ ᐄᑦᔨᑉᑎᒥ ᓄᓇᖃᖁᖏᓪᓗᑕ.

³ ᐸᕉᑭᐅᑉ ᓂᕅᐊᐅᑉ ᐃᕐᓂᖓᑕ ᐃᓱᒪᑖᕐᑎᓯᒪᖕᒪᑎᑦ ᖁᕕᐊᓇᖏᑦᑐᓂᒃ ᐅᕙᑦᑎᓐᓄᑦ ᐅᖃᓪᓚᒃᐳᑎᑦ, ᑲᐅᓪᑎᐊᒥᐅᓄᑦ ᓵᓚᒋᔭᐅᓗᑕ ᑐᖁᑕᐅᖁᒐᑦᑎᒍᑦ, ᐊᐅᓪᓚᕈᑦᔭᐅᓗᑕᓘᓐᓃᑦ ᐹᐱᓘᓂᒧᑦ.”

⁴ ᑕᒪᓐᓇ ᐱᓪᓗᒍ ᔪᕼᐋᓇᓂᓗ ᑲᕆᐊᑉ ᐃᕐᓂᖓ ᐊᖓᔪᖅᑳᒻᒪᕆᐅᔪᓪᓗ ᐃᓄᑐᐃᓐᓁᓪᓗ ᐊᑕᓂᐅᑉ ᔫᑕᒥ ᓄᓇᖃᖁᔨᓂᖓᓂᒃ ᓈᓚᒍᒪᓚᐅᓐᖏᓚᑦ.

⁵ ᑕᕝᕙ ᔪᕼᐋᓇᓂ ᑲᕆᐊᑉ ᐃᕐᓂᖓ ᐅᓇᑕᕐᑐᒃᓴᓄᓪᓗ ᐊᖓᔪᖅᑳᒻᒪᕆᐅᔪᑦ ᔫᑕᐅᑉ ᓄᓇᖓᓂᑦ ᐊᒥᐊᒃᑰᓂᑯᐃᑦ ᐄᑦᔨᑉᑎᒧᐊᕈᑎᕔᑦ, ᐃᓅᖃᑎᒌᒡᔪᐊᓄᓪᓗ ᓯᐊᒻᒪᕐᑎᑕᐅᓂᑰᓪᓗᑎᒃ ᐅᑎᕐᓂᑯᐃᑦ ᐃᓚᐅᑎᓪᓗᒋᑦ.

⁶ ᐊᖑᑎᑦ, ᐊᕐᓁ, ᓄᑕᖅᑲᑦ, ᐊᖓᔪᖅᑳᕐᔪᐊᓪᓗ ᐸᓂᖏᑦ, ᑖᒃᑯᐊᓕᒫᑦ ᓂᐳᔭᕋᑕᐅᑉ ᑲᒪᒋᔭᐅᑎᓚᐅᕐᑕᖏᑦ ᒋᑕᓔᐊᒧᑦ ᐊᕼᐂᑲᐅᑉ ᐃᕐᓂᖓᓄᑦ ᓴᕙᓂᐅᑉ ᐃᕐᖑᑕᖓᓄᑦ ᐊᒡᓛᑦ ᐸᕉᒃᓗ ᓂᕅᐊᐅᑉ ᐃᕐᓂᖓ ᔨᕆᒤᐊᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐃᓚᐅᑎᑕᐅᒋᓪᓗᑎᒃ.

⁷ ᐊᑕᓂᐅᑉ ᐅᖃᐅᓯᖏᓂᒃ ᓈᓚᒍᒪᖏᓐᓇᒥᒃ ᐄᑦᔨᑉᑎᓕᐊᓕᓚᐅᕐᐳᑦ ᐊᒡᓛᑦ ᐃᒡᓗᒐᓴᒡᔪᐊᑦ ᑕᐸᓂᓯᒥᐅᑦ ᑎᑭᓪᓗᒋᑦ.

⁸ ᑕᕝᕙᓂ ᑕᐸᓂᓯᒥ ᔨᕆᒤᐊ ᐊᑕᓂᐅᑉ ᐅᖃᐅᑎᕚ,

⁹ “ᐅᔭᕋᖕᓂᒃ ᐊᖏᔫᑎᓂᒃ ᐱᓗᑎᑦ ᖃᓕᕇᒃᓯᑎᒃᑭᑦ ᐰᕉᑉ ᐊᖓᔪᖅᑳᒃᑯᕕᖓᑕ ᐃᑎᕐᑕᕐᕕᐊᑕ ᓯᕗᕌᓂ ᑕᐸᓂᓯᒥ, ᔫᑕᒥᐅᓪᓗ ᑕᑯᓐᓇᕐᑎᓪᓗᒋᑦ ᑍᒤᓕᐅᕆᑦ.

¹⁰ ᐅᖃᐅᑎᓗᒋᓪᓗ, ‘ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐱᔨᒐ ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᑎᑭᑎᓐᓂᐊᕐᐸᕋ ᑕᒪᐅᖓ, ᐊᖓᔪᖅᑲᐅᕕᖓᓗ ᐃᓂᖃᕐᓂᐊᕐᐳᖅ ᑖᒃᑯᐊ ᐅᔭᕅᑦ ᖃᓕᕇᒃᑐᑦ ᐃᓂᖓᓐᓂ, ᑐᐱᖁᑎᓂᓗ ᑖᒃᑯᐊ ᓇᓛᓄᑦ ᓇᑉᐸᕈᒫᕐᐹ.

¹¹ ᓂᐱᑯᓁᓴ ᑎᑭᓐᓂᐊᕐᒪᑦ ᐄᑦᔨᑉᑎᒥᐅᓂᒃ ᓵᓚᖃᕆᐊᕐᑐᕐᓗᓂ, ᑍᒃᑯᐊ ᐋᓐᓂᐊᓇᕐᑐᓄᑦ ᑐᖁᔪᒃᓮᑦ ᐋᓐᓂᐊᓇᕐᑐᓄᑦ ᑐᖁᔪᒫᕐᐳᑦ, ᑍᒃᑯᐊᓗ ᐊᐅᓪᓚᕈᑦᔭᐅᔪᒃᓮᑦ ᐊᐅᓪᓚᕈᑦᔭᐅᔪᒫᕐᐳᑦ ᑎᒍᔭᐅᓗᑎᒃ, ᑍᒃᑯᐊᓗ ᐅᓇᑕᕐᑐᓄᑦ ᑐᖁᑕᐅᔪᒃᓮᑦ ᐅᓇᑕᕐᑐᓂ ᑐᖁᑕᐅᔪᒫᕐᐳᑦ.

¹² ᐄᑦᔨᑉᑎᒥᐅᑦ ᒎᑎᓐᖑᐊᖏᑦᑕ ᐃᓂᖏᑦ ᐃᑯᐊᓪᓚᒃᑕᐅᑎᑦᓱᒫᕐᐸᒃᑲ, ᐹᐱᓘᓂᒥᐅᓄᓪᓗ ᐄᑦᔨᑉᑎᒥᐅᑦ ᒎᑎᓐᖑᐊᕆᔭᖏᑦ ᐃᑯᐊᓪᓚᒃᑕᐅᓗᑎᒡᓘᓐᓃᑦ ᐊᐅᓪᓚᕈᑦᔭᐅᓗᑎᒡᓘᓐᓃᑦ ᐱᔭᐅᔪᒫᕐᐳᑦ, ᓲᕐᓗ ᓰᐱᓕᕆᔨᐅᑉ ᐊᓐᓄᕌᓂ ᑯᒤᔭᕐᐸᖕᒪᒋᑦ, ᑍᒫᒃᑕᐅᖅ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐄᑦᔨᑉᑎᒥᐅᑦ ᓄᓇᖓ ᓴᓗᒻᒪᑦᓯᐊᕐᓗᓂᐅᒃ ᕿᒪᒍᒫᕐᐹ ᓵᓚᖃᕐᓂᕐᒥᓄᑦ.

¹³ ᓇᐸᔪᓪᓗ ᐃᑦᔪᕐᓁᑦᑐᖁᑎᒋᓂᕋᕐᑕᖏᑦ ᐱᑦ-ᓯᒥᔅᓰᑦ ᕼᐃᓕᐅᐳᓖᓯᒦᑦᑐᑦ ᐄᑦᔨᑉᑎᒥ ᐅᕐᕉᕋᕐᑎᑦᓱᒫᕐᐰᑦ ᒎᑎᓐᖑᐊᒥᖕᓄᓪᓗ ᑐᒃᓯᐊᕐᕕᖏᑦ ᐃᑯᐊᓪᓚᒃᑎᓪᓗᒋᑦ.’”