ᔨᕆᒤᐊᐅᑉ ᐊᒡᓚᖏᑦ 42 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓄᐃᑦ ᑐᒃᓯᐅᑦᔭᐅᔪᒪᓂᖓᑦ ᔨᕆᒤᐊᒧᑦ

¹ ᐅᓇᑕᕐᑐᒃᓮᑦ ᐊᖓᔪᖅᑳᖏᑦ ᔪᕼᐋᓇᓂᓗ ᑲᕆᐊᑉ ᐃᕐᓂᖓ, ᐊᔭᕅᐊᓗ ᕼᐅᓮᐊᐅᑉ ᐃᕐᓂᖓ ᔨᕆᒤᐊᒧᐊᕐᐳᑦ ᐃᓄᑐᐃᓐᓇᕐᓂᒃ ᐃᓚᖃᕐᓗᑎᒃ ᒥᑭᓐᓂᕐᐹᒥᑦ ᐱᔪᓐᓇᕐᓂᕐᐹᖅ ᑎᑭᓪᓗᒍ.

² ᔨᕆᒤᐊᒧᓪᓗ ᐅᖃᕐᐳᑦ, “ᑐᒃᓯᕋᐅᑎᒋᔪᒪᔭᑦᑎᓐᓂᒃ ᐊᖏᕐᑕᐅᔪᒪᒐᓗᐊᕋᑦᑕ, ᑐᒃᓯᐅᑦᔭᐅᔪᒪᓪᓗᑕ ᐊᑕᓂᕐᒧᑦ ᒎᑎᑦᑎᓐᓄᑦ, ᐃᓅᔪᑑᓕᕐᑐᒍᑦ ᑐᒃᓯᐅᑦᔭᐅᔪᒪᒐᑦᑕ, ᐃᓄᒋᐊᓚᐅᕋᓗᐊᕐᓗᑕ ᖃᑦᓰᓐᓇᐅᓕᕋᑦᑕ ᑕᑯᓐᓇᕋᕕᑦ.

³ ᐊᑕᓂᕐᒧᑦ ᑐᒃᓯᐅᑦᔭᐅᔪᒪᕗᒍᑦ ᒎᑎᑦᑎᓐᓄᑦ ᖃᐅᔨᔪᒪᓪᓗᑕ ᓇᒧᓐᖓᐅᔪᒃᓴᐅᖕᒪᖔᑦᑕ ᖃᓄᕐᓗ ᐱᔪᒃᓴᐅᖕᒪᖔᑦᑕ.”

⁴ ᔨᕆᒤᐊᐅᑉ ᑭᐅᕔᑦ, “ᑐᓴᐅᒪᕙᒋᑦ ᑕᑯᒋᑦ, ᑐᒃᓯᐊᕐᓂᐊᕐᐳᖓ ᐊᑕᓂᕐᒧᑦ ᒎᑎᑦᑎᓐᓄᑦ ᑐᒃᓯᐅᑦᔭᐅᔪᒪᓂᓯ ᒪᓕᒡᓗᒍ, ᖃᓄᑐᐃᓐᓇᖅ ᐊᑕᓂᖅ ᑭᐅᒃᐸᑦ ᐅᖃᐅᑎᓂᐊᕐᐸᒋᑦ, ᐅᖃᐅᓯᖃᕐᑍᓕᓂᐊᓐᖏᓚᖓ ᐃᓕᑦᓯᓐᓄᑦ.”

⁵ ᑖᒃᑯᐊᓗ ᔨᕆᒤᐊᒧᑦ ᐅᖃᕐᐳᑦ, “ᐊᑕᓂᐅᑉ ᖃᐅᔨᑦᔪᑎᒃᓴᕆᓂᐊᓕᕐᐹᑎᒍᑦ ᐊᖅᑯᑎᒋᓗᓂᑎᑦ ᐅᕙᑦᑎᓐᓄᑦ ᒪᓕᒃᑕᐅᖁᔭᖏᓐᓂᒃ ᓈᓚᖏᒃᑯᑦᑕ.

⁶ ᐊᑕᓂᐅᑉ ᒎᑎᑦᑕ ᐅᖃᕐᑕᐅᑎᑕᖏᑦ ᐅᕙᑦᑎᓐᓄᑦ ᖁᕕᐊᓇᕋᓗᐊᕐᐸᑕ ᖁᕕᐊᓇᖏᒃᑲᓗᐊᕐᐸᑕᓗ ᐊᑕᓂᐅᑉ ᓂᐱᖓ ᓈᓚᖕᓂᐊᕐᐸᕗᑦ, ᐊᑕᓂᐅᑉ ᒎᑎᑦᑕ ᓂᐱᖓᓂᒃ, ᓈᓚᒃᑯᑦᑕ ᖃᓄᐃᖏᑦᓯᐊᕐᓂᐊᕋᑦᑕ.”

ᐊᑕᓂᐅᑉ ᑭᐅᓂᖓ ᔨᕆᒤᐊᑉ ᑐᒃᓯᐊᕐᓂᖓᓄᑦ

⁷ ᐅᓪᓗᐃᑦ ᖁᓕᑦ ᐊᓂᒍᕐᑎᓪᓗᒋᑦ ᐊᑕᓂᖅ ᔨᕆᒤᐊᒧᑦ ᐅᖃᕐᐳᖅ;

⁸ ᔪᕼᐋᓇᓂᒃᑯᑦ ᑲᕆᐊᑉ ᐃᕐᓂᖓ ᐅᓇᑕᕐᑐᒃᓮᓪᓗ ᐊᖓᔪᖅᑳᒻᒪᕆᖏᑦ ᐃᓚᒋᔭᖏᑦ, ᐃᓄᐃᓪᓗ ᐱᓪᓚᕆᐅᖏᑦᑐᑦ ᐱᓪᓚᕇᓪᓗ ᔨᕆᒤᐊᐅᑉ ᑲᑎᖁᕔᑦ.

⁹ ᐅᖃᐅᑎᓪᓗᒋᓪᓗ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᑐᒃᓯᐊᕐᕕᐅᖁᓚᐅᕋᑦᓯᐅᒃ ᐃᒫᒃ ᐅᖃᕐᐳᖅ,

¹⁰ ᓄᓇᒥ ᑕᒫᓃᖏᓐᓇᕈᑦᓯ, ᐱᕈᕐᐸᓪᓕᐊᑎᓐᓂᐊᕐᐸᑦᓯ ᓄᖑᑉᐸᓪᓕᐊᑎᖏᓪᓗᓯ, ᐱᕈᕐᑎᑦᓱᒪᕙᑦᓯ ᓄᖑᑦᓱᒪᓐᖏᓚᑦᓯ, ᐊᓯᕈᕐᑕᐅᓇᕐᑐᒧᑦ ᑎᑭᑎᑦᓯᓂᕆᓚᐅᕐᑕᕋ ᐅᒡᒍᐊᕈᑎᒋᒐᒃᑯ.

¹¹ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᑲᑉᐱᐊᒋᑦᑍᓕᓯᐅᒃ, ᐱᖃᑎᒋᒐᑦᓯ ᐱᐅᓕᓂᐊᕐᐸᑦᓯ ᐱᔪᓐᓇᕐᓂᖓᓂᓪᓗ ᓴᐳᑎᓯᒪᓂᐊᕐᐸᑦᓯ.

¹² ᓂᑲᒍᓱᒃᑎᐅᒐᒪ, ᓂᑲᒍᓱᒃᑎᓐᓂᐊᕆᕙᕋ ᐃᓕᑦᓯᓐᓂᒃ ᓄᓇᑦᓯᓐᓄᑦ ᐅᑎᕐᑎᑦᓱᒫᕐᐸᑦᓯ.

¹³ “ᐅᖃᓕᕈᑦᓯᓕ, ‘ᓄᓇᖃᑦᔮᓐᖏᓚᒍᑦ ᑕᒫᓂ,’ ᐊᑕᓂᐅᓪᓗ ᒎᑎᑦᓯ ᓂᐱᖓ ᓈᓚᖏᒃᑯᑦᓯᐅᒃ,

¹⁴ ᐅᖃᓕᕐᓗᓯᓗ, ‘ᐋᒃᑲᓕ ᐄᑦᔨᑉᑎᒥ ᓄᓇᖃᕆᐊᕐᑐᖔᕐᓂᐊᕐᐳᒍᑦ, ᐅᓇᑕᕐᑐᓂᒃ ᑕᑯᕙᖕᓂᐊᕈᓐᓃᕋᑦᑕ, ᐅᓇᑕᕆᐊᓕᕐᑐᓪᓗ ᑎᑦᑐᓚᐅᑎᖏᓐᓂᒃ ᑐᓵᕙᒍᓐᓃᕐᓗᑕ, ᑳᒃᐸᒍᓐᓃᕐᓗᑕᓗ ᑍᑲᓂ ᓄᓇᖃᕐᓂᐊᕐᐳᒍᑦ.’

¹⁵ ᔫᑕᒥ ᐊᒥᐊᒃᑰᔪᓯ ᐊᑕᓂᐅᑉ ᐅᖃᐅᓯᖏᑦ ᑐᓴᓕᕐᓯᐅᒃ, ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ‘ᐄᑦᔨᑉᑎᒥᐅᑕᐅᔪᒪᓪᓚᕆᒃᑯᑦᓯ ᐄᑦᔨᑉᑎᒧᐊᓕᕆᑦᓯ ᓄᓇᑖᕆᐊᕐᑐᕐᓗᓯ,

¹⁶ ᑍᑯᓐᖓᕈᑦᓯᓕ ᐅᓇᑕᕐᑕᐅᓂᕐᒧᑦ ᓯᕘᕋᒋᔭᑦᓯᓐᓄᑦ ᐅᓇᑕᕐᑐᓄᑦ ᑐᖁᑕᐅᔪᒫᕐᐳᓯ ᐄᑦᔨᑉᑎᐅᑉ ᓄᓇᖓᓂ, ᑳᖃᑦᑕᕆᐊᒃᓴᕐᓗ ᓯᕘᕋᒋᔭᓯ ᐱᕐᓕᕋᕈᒫᕐᐳᓯ, ᐄᑦᔨᑉᑎᒥᓗ ᑐᖁᔪᒫᕐᐳᓯ.

¹⁷ ᐃᓄᓕᒫᑦ ᐄᑦᔨᑉᑎᒥᐅᑕᐅᔪᒪᔪᑦ ᑐᖁᕋᕈᒫᕐᐳᑦ ᐅᓇᑕᕐᓂᒃᑯᑦ, ᐱᕐᓕᕋᕐᓗᑎᒃ, ᐋᓐᓂᐊᓇᕐᑐᓄᓪᓘᓐᓃᑦ, ᐊᑕᐅᓯᕐᒥᒡᓘᓐᓃᑦ ᐊᓐᓇᒍᓐᓇᕐᑐᖃᕈᒫᓐᖏᓚᖅ ᑲᑉᐱᐊᓇᕐᑐᓄᑦ ᑎᑭᑎᒐᔭᕐᑕᓐᓄᑦ.’

¹⁸ “ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐃᒫᒃ ᐅᖃᕐᐳᖅ, ᑍᒫᒃᑕᐅᖅ ᔨᕉᓴᓕᒥᐅᓄᑦ ᓂᓐᖓᕕᒡᔪᐊᕐᓂᕋ ᓴᖅᑭᑎᓚᐅᕋᒃᑯ, ᐃᓕᑦᓯᓐᓄᑦᑕᐅᖅ ᓴᖅᑭᑎᑦᓱᓐᓇᕆᕙᕋ ᐄᑦᔨᑉᑎᒧᐊᕐᓂᐊᕈᑦᓯ. ᑕᑯᔪᒥᓇᕐᑑᔪᒫᓐᖏᓚᓯ ᐃᓄᖕᓄᓪᓗ ᒥᑕᐅᑎᒋᔭᒃᓴᐅᔪᒫᕐᐳᓯ ᐅᖃᕐᓂᕐᓘᑎᒃᓴᐅᓗᓯᓗ, ᓄᓇᓯᓗ ᑕᒪᓐᓇ ᑕᑯᒃᑲᓐᓂᕈᓐᓇᕈᒫᓐᖏᓚᓯᐅᒃ.”

¹⁹ “ᐃᓕᑦᓯ ᔫᑕᒥ ᐊᒥᐊᒃᑰᔪᓯ, ᐊᑕᓂᐅᑉ ᐅᖃᐅᑎᕚᓯ, ᐃᓂᕐᑎᕐᓗᓯ ᐄᑦᔨᑉᑎᒧᐊᖁᓐᖏᓚᑦᓯ. ᖃᐅᔨᓕᕆᑦᓯ ᖁᓚᕐᓇᖏᑦᑐᒥᒃ ᐅᓪᓗᒥ ᐃᓂᕐᑎᕋᑦᓯ.

²⁰ ᑕᒻᒪᕐᐳᓯ ᐊᖏᔪᒥᒃ, ᑐᒃᓯᐅᑦᔭᐅᔪᒪᓯᒪᒐᑦᓯ ᐊᑕᓂᕐᒧᑦ ᒎᑎᑦᑎᓐᓄᑦ, ᐊᖏᕐᓯᒪᕗᓯᓗ ᐅᖃᐅᓯᕆᔭᖏᓐᓂᒃ ᓈᓚᒍᒪᓪᓗᓯ.

²¹ ᒫᓐᓇᓕ ᐅᖃᐅᑎᓕᕋᑦᓯ ᐊᑕᓂᐅᑉ ᒎᑎᑦᑕ ᐅᖃᐅᓯᕆᔭᐅᖁᔭᖏᓐᓂᒃ, ᓈᓚᓐᖏᓚᓯ ᐊᑕᓂᐅᑉ ᓂᐱᖓᓂᒃ.

²² ᑍᒤᒻᒪᑦ ᖃᐅᔨᓕᕆᑦᓯ ᓄᓇᒋᔪᒪᔭᑦᓯᓐᓂᒃ ᓄᓇᑖᕋᓗᐊᕈᑦᓯ ᑐᖁᔪᒫᕐᐳᓯ, ᐅᓇᑕᕐᓂᒃᑯᑦ, ᑳᖕᓇᕐᑐᕐᔪᐊᒃᑯᑦ, ᐋᓐᓂᐊᓇᕐᑐᒃᑯᓪᓗ.”