ᔨᕆᒤᐊᐅᑉ ᐊᒡᓚᖏᑦ 40 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᑉ ᒋᑕᓔᐊᒃᑯᓐᓃᓐᓂᖓ

¹ ᔨᕆᒤᐊᓕ ᐊᑕᓂᕐᒧᑦ ᐅᖃᕐᕕᐅᓚᐅᕆᕗᖅ ᓂᐳᔭᕋᑕᓐᒧᑦ ᐅᓇᑕᕐᑎᓄᑦ ᐊᖓᔪᖅᑳᖑᓂᕐᐹᕆᔭᐅᔪᒧᑦ ᑎᒍᔭᐅᓯᒪᕕᒋᓚᐅᕐᑕᖓᓂᑦ ᐊᓂᑎᑕᐅᓯᒪᓕᕐᑎᓪᓗᒍ ᕌᒪᒥ, ᔨᕆᒤᐊ ᑕᑯᓚᐅᕐᒪᒍ ᐊᑦᓱᖏᕐᓱᕐᑕᐅᖃᑕᐅᓯᒪᔪᖅ ᑎᒍᔭᐅᓯᒪᔪᓄᑦ ᔨᕉᓴᓕᒥᓐᖔᕈᑦᔭᐅᔪᓂᑦ ᔫᑕᒥᓪᓗ ᐊᐅᓪᓚᕈᑦᔭᐅᓕᕐᑎᓪᓗᒋᑦ ᐹᐱᓘᓂᒧᑦ.

² ᐊᖓᔪᖅᑳᖑᓂᕐᐹᕆᔭᐅᔫᑉ ᔨᕆᒤᐊ ᑕᑯᓕᕋᒥᐅᒃ ᐅᖃᐅᑎᕚ, “ᐊᑕᓂᐅᑉ ᒎᑎᕕᑦ ᐅᖃᐅᓯᕆᖃᑦᑕᓚᐅᕐᑕᖓ ᑲᑉᐱᐊᓇᕐᑐᖅ ᓇᓪᓕᐅᑎᔪᒫᕐᑐᖅ ᓄᓇᓕᖕᓄᑦ ᑖᒃᑯᓄᖓ,

³ ᒫᓐᓇ ᐊᑕᓂᐅᑉ ᓇᓪᓕᐅᑎᑎᓯᒪᓕᕐᐹ, ᓲᕐᓗ ᐅᖃᐅᓯᕆᖃᑦᑕᓚᐅᕐᑕᖓᑐᑦ ᑍᒤᓕᕐᐳᖅ, ᑕᒪᓐᓇᓗ ᑍᒤᑉᐳᖅ ᐃᓅᖃᑎᒌᖑᓪᓗᓯ ᐊᔪᕐᑐᓕᓚᐅᕋᑦᓯ ᐊᑕᓂᕐᒥᒃ ᓈᓚᖏᓐᓂᕐᒧᑦ.

⁴ ᒫᓐᓇᓕ ᑕᑯᒋᑦ, ᐅᓪᓗᒥ ᕿᓚᕈᑦᔮᕈᒪᕙᒋᑦ ᐊᒡᒐᐅᑎᒃᑯᑦ ᐊᕐᓵᕐᑑᔭᓄᑦ ᐊᑦᓱᖏᐅᑎᒋᔭᕐᓂᑦ, ᐹᐱᓘᓂᒧᑦ ᐃᓚᐅᔪᒪᒍᕕᑦ ᒪᓕᒍᓐᓇᕐᐳᑎᑦ, ᑲᒪᒋᑦᓯᐊᕐᓂᐊᕐᐸᒋᑦ, ᒪᓕᒍᒪᖏᒃᑯᕕᓪᓕ ᒪᓕᒃᑍᓕᒋᑦ ᑕᑯᒋᑦ ᓄᓇᒋᔪᒪᔭᕐᓂ ᓄᓇᖃᕈᓐᓇᓕᕐᐳᑎᑦ ᐃᓱᒪᕐᓱᕐᓗᑎᑦ.”

⁵ ᔨᕆᒤᐊᓕ ᕿᒪᕉᑎᒋᐊᓚᐅᕐᑎᓐᓇᒍ ᓂᐳᓴᑖᓐ ᐅᖃᒃᑲᓐᓂᕐᐳᖅ, “ᒋᑕᓔᐊ ᐊᕼᐂᑲᒻ ᐃᕐᓂᖓ ᓴᕙᓂᐅᑉ ᐃᕐᖑᑕᖓ ᐅᑎᕐᕕᒋᓕᕈᒃ, ᑲᒪᔨᓐᖑᕐᑎᑕᐅᓯᒪᔪᖅ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᔫᑕᒥᐅᑦ ᓄᓇᓕᖏᓐᓄᑦ, ᐃᓅᖃᑎᖕᓃᑦᓱᒪᒍᕕᑦ ᐅᕝᕙᓘᓐᓃᑦ ᐊᓯᐊᓂ ᓇᔪᕈᒪᔭᕐᓂ.” ᑖᑦᓱᒪᓗ ᐊᖓᔪᖅᑳᒻᒪᕆᐅᑉ ᑕᖁᐊᒃᓴᖏᓐᓂᒃ ᑐᓂᓪᓗᒍ ᐱᖁᑎᑖᕐᑎᓪᓗᓂᐅᒡᓗ ᐊᐅᓪᓚᕐᑎᑉᐹ.

⁶ ᔨᕆᒤᐊ ᓄᓇᒧᑦ ᒥᔅᐸᒧᐊᕋᒥ ᒋᑕᓔᐊᒃᑯᓐᓃᓕᕐᐳᖅ ᐊᕼᐂᑲᐅᑉ ᐃᕐᓂᖓᓂ ᐃᓅᖃᑎᒥᓃᓪᓗᓂᓗ ᕿᒪᒃᑕᐅᓂᑯᓂ ᓄᓇᒥᖕᓂ.

ᒋᑕᓔᐊᐅᑉ ᐊᐅᓚᑦᓯᔨᐅᓂᖓ ᔫᑕᒥ

⁷ ᐃᓴᕆᐊᓕᒥᐅᓪᓕ ᐅᓇᑕᕐᑎᖏᑕ ᐊᖓᔪᖅᑳᕆᔭᖏᑦ ᕿᒫᓂᑰᓪᓗᑎᒃ ᓇᓂᑐᐃᓐᓈᓕᕐᓂᑯᐃᑦ ᑐᓴᐅᒪᓕᕐᐳᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᒋᑕᓔᐊ ᐊᕼᐂᑲᐅᑉ ᐃᕐᓂᖓ ᐊᐅᓚᑦᓯᔨᓐᖑᕐᑎᑕᐅᓯᒪᓕᕐᓂᖓᓂᒃ ᓄᓇᓕᓕᒫᓄᑦ ᑲᒪᔨᐅᓕᕐᓂᖓᓂᒡᓗ, ᐊᖑᑏᑦ ᐊᕐᓁᓪᓗ, ᓄᑕᖅᑲᓪᓗ, ᐊᔪᕐᓴᕐᓂᕐᐹᖑᔪᓄᑦ ᐊᐅᓪᓚᕈᑦᔭᐅᖏᓐᓂᑯᓄᑦ ᐹᐱᓘᓂᒧᑦ ᑖᑦᓱᒧᖓ ᑐᓂᔭᐅᓯᒪᓕᕐᓂᖏᑦ.

⁸ ᑖᒃᑯᐊᓗ ᒋᑕᓔᐊᒧᐊᕐᐳᑦ ᓄᓇᒥᑦ ᒥᔅᐸᒥᑦ ᐅᑯᐊᖑᓪᓗᑎᒃ; ᐃᓯᒥᐅᓪ ᓂᑕᓁᐊᐅᑉ ᐃᕐᓂᖓ, ᔪᕼᐋᓇᓐ ᔫᓇᑕᓂᓗ ᑲᕆᐊᑉ ᐃᕐᓂᖏᒃ, ᓯᕅᐊᓗ, ᑖᓐᕼᐅᒥᑎᐅᑉ ᐃᕐᓂᖓ, ᐃᐰᓪᓗ ᐃᕐᓂᖏᒃ ᓂᑐᐸᕼᐊᑍᑎᒥᐅᑕᐅᑉ, ᔭᔭᓁᐊᓗ ᒫ-ᑲᑍᑎᒥᐅᑕᐅᑉ ᐃᕐᓂᖓ ᐅᓇᑕᕐᑎᖁᑎᖏᓪᓗ.

⁹ ᒋᑕᓔᐊᐅᑉ ᐊᕼᐂᑲᐅᑉ ᐃᕐᓂᖓᑕ ᓴᕙᓂᐅᑉ ᐃᕐᖑᑕᖓᑕ ᐊᖏᕐᕕᒋᕔᑦ ᓯᕘᕋᖏᓪᓗᑎᒃ ᐹᐱᓘᓂᒥᐅᓄᑦ ᐃᓄᖁᑎᒋᔭᐅᖁᓪᓗᒋᑦ, ᐅᖃᕐᓗᓂ, “ᓯᕘᕋᖏᓪᓗᓯ ᑲᐅᓪᑎᐊᒥᐅᓄᑦ ᐃᓄᖁᑎᒋᔭᐅᓕᕆᑦᓯ ᓄᓇᑖᕐᑐᕐᓗᓯᓗ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᐊᐅᓚᑦᓯᔨᒋᓗᒍ, ᑕᕝᕙ ᖃᓄᐃᑕᐅᓂᐊᓐᖏᓚᓯ.

¹⁰ ᐅᕙᖓᓕ ᒥᔅᐸᒥ ᓄᓇᖃᕐᓂᐊᕐᐳᖓ ᐃᓕᑦᓯᓐᓄᑦ ᐅᖃᕐᑎᒋᔭᐅᓂᐊᕋᒪ ᑲᐅᓪᑎᐊᒥᐅᑦ ᐅᕙᑦᑎᓐᓄᑦ ᑎᑭᑦᓴᕌᖓᑕ, ᐃᓕᑦᓯᓕ ᕔᓂᒃᓴᓂᒃ ᑲᑎᕐᓱᐃᒋᑦᓯ, ᐊᐅᔭᒃᑯᓪᓗ ᐱᕈᕐᑐᓂᒃ ᐅᕐᓱᒃᓴᓂᒡᓗ ᐴᖅᑲᕐᓗᒋᑦ ᒪᕐᕋᕐᓄᑦ ᓄᓇᒋᔪᒪᔭᑦᓯᓐᓂᓗ ᓄᓇᓕᖕᓂ ᓄᓇᖃᓕᕆᑦᓯ.”

¹¹ ᔫᑎᓪᓗ ᒧᐊᐱᒥ, ᐋᒪᓐᒥᓗ, ᐄᑐᒥᓗ ᓄᓇᓕᖕᓂᓗ ᑖᒃᑯᐊ ᐊᓯᖏᓐᓃᑦᑐᓂ ᑐᓴᐅᒪᓕᕋᒥᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᔫᑕᒥ ᐊᒥᐊᒃᑯᖃᕐᑎᑦᓯᓂᖓᓂᒃ, ᑖᒃᑯᐊᓗ ᑲᒪᔨᖃᓕᕐᓂᖏᓐᓂᒃ ᒋᑕᓔᐊᒥᒃ ᐊᕼᐂᑲᒻ ᐃᕐᓂᖓᓂᒃ ᓴᕙᓂᐅᑉ ᐃᕐᖑᑕᖓᓂᒃ.

¹² ᔫᑕᐅᑉ ᓄᓇᖓᓄᑦ ᐅᑎᓚᐅᕐᐳᑦ ᒋᑕᓔᐊᒧᑦ ᒥᔅᐸᒦᑦᑐᒧᑦ ᖃᐅᔨᒃᑲᐅᑎᔭᕐᑐᕐᓗᑎᒃ ᓇᑭᑐᐃᓐᓇᖅ ᕿᒫᓪᓗᑎᒃ ᓯᐊᒻᒪᕐᕕᒋᓚᐅᕐᑕᒥᖕᓂᑦ, ᐱᕈᕐᓰᕕᖕᓂᓪᓗ ᑲᑎᕐᓱᐃᕗᑦ ᐊᔪᕐᓴᕋᑎᒃ ᕔᓂᒃᓴᓂᒃ ᐊᐅᔭᒃᑯᑦ ᐱᕈᕐᑐᓂᒃ.

ᒋᑕᓔᐊᐅᑉ ᑐᖁᑕᐅᓂᖓ

¹³ ᔪᕼᐋᓇᓐ ᑲᕆᐊᑉ ᐃᕐᓂᖓ ᐅᓇᑕᕐᑎᓪᓗ ᐊᖓᔪᖅᑳᓕᒫᖏᑦ ᕿᒫᓪᓗᑎᒃ ᓄᓇᒥ ᑕᒫᓂᑐᐃᓐᓈᓕᕐᓂᑯᐃᑦ ᒋᑕᓔᐊᒧᐊᕐᐳᑦ ᒥᔅᐸᒦᑦᑐᒧᑦ.

¹⁴ ᐅᖃᕐᓗᑎᒡᓗ, “ᖃᐅᔨᒪᓐᖏᓚᑏᑦ ᐹᓔᐊᓯᐅᑉ ᐊᒧᓁᑎᑦ ᐊᖓᔪᖅᑳᕐᔪᐊᖓᑦᑕ ᐃᓯᒥᐅᓕ ᓂᑕᓁᐊᐅᑉ ᐃᕐᓂᖓ ᐃᓕᖕᓂᒃ ᑐᖁᑦᓯᔭᕐᑐᕐᑎᑕᐅᓯᒪᓂᖓᓃᒃ?” ᒋᑕᓔᐊᐅᓪᓕ ᐊᕼᐂᑲᐅᑉ ᐃᕐᓂᖓᑕ ᑖᒃᑯᐊ ᐅᒃᐱᕆᓐᖏᓔᑦ.

¹⁵ ᑕᕝᕙ ᔪᕼᐋᓇᓂᐅᑉ ᑲᕆᐊᑉ ᐃᕐᓂᖓᑕ ᐃᔨᕋᕐᑐᕐᓗᓂ ᒋᑕᓔᐊ ᒥᔅᐸᒥ ᐅᖃᐅᑎᕚ, “ᐃᓯᒥᐅᓕ ᓂᑕᓁᐊᐅᑉ ᐃᕐᓂᖓ ᑐᖁᑦᓴᕐᑐᓚᐅᕐᓚᒍ, ᖃᐅᔨᔪᖃᑦᔮᓐᖏᓚᖅ, ᓱᖕᒪᓪᓕ ᐃᓕᖕᓂᒃ ᑐᖁᑦᓯᑎᑕᐅᓇᓱᐊᕐᐹ? ᑐᖁᑕᐅᒐᔭᕈᕕᑦ ᔫᑎᑦ ᐃᓕᖕᓄᑦ ᐊᐅᓚᑕᐅᓕᕐᑐᑦ ᐊᕕᑎᑕᐅᑐᐃᓐᓇᕐᓂᐊᕐᐳᑦ, ᑕᒪᓐᓇᓗ ᖁᐊᕐᓵᕐᓇᕐᓂᐊᕐᐳᖅ ᔫᑕᒥᐅᑕᐅᔪᓕᒫᓄᑦ.”

¹⁶ ᒋᑕᓔᐊᐅᓪᓕ ᐊᕼᐂᑲᐅᑉ ᐃᕐᓂᖓᑕ ᔪᕼᐋᓇᓂ ᑲᕆᐊᑉ ᐃᕐᓂᖓ ᐅᖃᐅᑎᕚ, “ᑍᒤᓐᓇᓱᐊᕐᑍᓕᒋᑦ ᐅᖃᐅᓯᕆᔧᑦ ᐃᓯᒥᐅᓕᐅᑉ ᓇᓛᓄᑦ ᓱᓕᖏᒻᒪᑦ!”