ᔨᕆᒤᐊᐅᑉ ᐊᒡᓚᖏᑦ 38 - ᐊᒡᓔᑦ ᐃᑦᔪᕐᖕᓁᑦᑐᑦᔨᕆᒤᐊᑉ ᐃᒥᕐᑕᕐᕕᖕᒧᑦ ᐴᕐᑕᐅᓂᖓ 1 ᓯᕚᑍᐊ ᒫᑖᓂᐅᑉ ᐃᕐᓂᖓ, ᒋᑕᓔᐊᓗ ᐸᓱᕼᐅᕆᐅᑉ ᐃᕐᓂᖓ, ᔪᑲᐅᓪ ᓯᓕᒤᐊᐅᑉ ᐃᕐᓂᖓ, ᐸᓱᕼᐅᕆᓗ ᒪᓪᑬᔭᐅᑉ ᐃᕐᖑᑕᖓ, ᑐᓴᕋᒥ ᔨᕆᒤᐊᐅᑉ ᐅᖃᐅᓯᕆᔭᖏᓐᓂᒃ ᐃᓄᖕᓄᑦ, 2 ᐅᖃᕐᑎᓪᓗᒍ, ᐃᒫᒃ ᐊᑕᓂᖅ ᐅᖃᕐᐳᖅ, “ᐃᒡᓗᒐᓴᒡᔪᐊᓃᖏᓐᓇᕈᒪᔪᑦ ᐅᓇᑕᕐᑎᓄᑦ ᑐᖁᑕᐅᓂᐊᕐᐳᑦ, ᑳᖕᓇᕐᑐᕐᔪᐊᒧᓪᓘᓐᓃᑦ, ᐋᓐᓂᐊᓇᕐᑐᓄᓪᓘᓐᓃᑦ, ᑲᐅᓪᑎᐊᒥᐅᓄᓪᓕ ᑐᓂᑦᔪᑎᒋᔪᖅ ᑖᓐᓇ ᐃᓅᓂᐊᕐᐳᖅ, ᐊᓐᓇᒃᑎᑕᐅᓗᓂ ᐃᓅᓂᐊᕐᐳᖅ. 3 ᐃᒫᒃ ᐊᑕᓂᖅ ᐅᖃᕐᐳᖅ, ᓇᓗᓇᓐᖏᓚᖅ ᐃᒡᓗᒐᓴᒡᔪᐊᑦ ᑖᒃᑯᐊ ᐱᔭᐅᓂᐊᕐᐳᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑎᖁᑎᖏᓐᓄᑦ.” 4 ᐊᖓᔪᖅᑳᖑᔪᑦ ᐊᖓᔪᖅᑳᕐᔪᐊᕐᒧᑦ ᐅᖃᕐᐳᑦ, “ᐃᓄᒃ ᑖᓐᓇ ᑐᖁᑕᐅᔪᒃᓴᐅᕗᖅ, ᐅᓇᑕᕐᑐᒃᓴᓂᒃ ᓴᐱᕐᓵᕆᖕᒪᑦ ᐃᒡᓗᒐᓴᒡᔪᐊᓂ ᐊᒥᐊᒃᑰᔪᓂᒃ, ᐃᓄᖕᓂᒡᓗ, ᐅᖃᐅᓯᕆᖃᑦᑕᕐᑕᒥᓄᑦ ᐃᓄᖕᓂᒃ ᐱᔪᓐᓇᕐᓯᑎᑦᓯᓇᓱᐊᖏᒻᒪᑦ ᓴᐱᓕᕐᑎᑦᓯᓇᓱᖔᕐᒪᓪᓕ.” 5 ᐊᖓᔪᖅᑳᕐᔪᐊᑉ ᔨᑎᑬᐊᐅᑉ ᐅᖃᐅᑎᕔᑦ, “ᐃᓱᒪᕐᓲᑎᒋᕙᓯ, ᐱᓂᐊᕐᓂᕆᔪᒪᔭᑦᓯᓐᓂᒃ ᐊᑭᕋᕐᑐᕈᓐᓇᓐᖏᓚᖓ.” 6 ᑕᕝᕙ ᔨᕆᒤᐊ ᑎᒍᕚᑦ, ᒪᓪᑬᔭᐅᓪᓗ ᐊᖓᔪᖅᑳᕐᔪᐊᑉ ᐃᕐᓂᖓᑕ ᐃᒥᕐᑕᕐᕕᒃᓴᖁᑎᖓᓄᑦ ᐴᕆᐊᕐᑐᕐᓗᒍ, ᐊᒃᓗᓈᓄᓪᓗ ᓂᖏᑦᑎᑦᔪᑎᖃᕐᓗᑎᒃ ᔨᕆᒤᐊ ᓂᖏᑎᑉᐹᑦ ᐃᒥᕐᑕᕐᕕᒃᓴᒧᑦ ᐃᒪᖃᖏᑦᑐᒧᑦ ᒪᕐᕅᓐᓇᕐᒧᑦ ᑭᕕᓕᕐᓗᓂᓗ. 7 ᐃᐱᑦ-ᒥᓕᒃᓕ ᐃᑎᐅᐱᐊᒥᐅᑕᖅ ᐃᒡᔪᐃᕐᑕᐅᓯᒪᔪᖅ ᐊᖓᔪᖅᑳᖑᖃᑕᐅᔪᖅ ᐊᖓᔪᖅᑳᕐᔪᐊᑉ ᐃᒡᓗᖓᓂ, ᑐᓴᕋᒥ ᔨᕆᒤᐊᐅᑉ ᐃᒥᕐᑕᕐᕕᖕᒧᑦ ᐴᕐᑕᐅᓂᖓᓂᒃ, ᐊᖓᔪᖅᑳᕐᔪᐊᖅ ᐃᒃᓯᕚᕐᒪᑦ ᐃᑎᕐᑕᕐᕕᖕᒥ ᐱᓐᔭᒥᓂᒥᒃ ᑍᔭᐅᔪᒥ. 8 ᐃᐱᑦ-ᒥᓕᑭᐅᑉ ᐊᖓᔪᖅᑳᕐᔪᐊᖅ ᐅᐸᒃᓗᓂᐅᒃ ᐅᖃᐅᑎᕚ, 9 “ᐊᑕᓂᕋ ᐊᖓᔪᖅᑳᕐᔪᐊᕋ, ᔨᕆᒤᐊᒥᒃ ᒎᑎᐅᑉ ᐅᖃᕐᑎᖓᓂᒃ ᐴᕐᓯᔪᕕᓃᑦ ᓈᒻᒪᖏᑦᑐᐊᓗᖕᒥᒃ ᐱᓇᓱᐊᕐᓯᒪᕗᑦ, ᐃᒥᕐᑕᕐᕕᖕᒧᑦ ᐴᕐᑕᐅᓐᓂᕐᒪᑦ ᐱᕐᓕᕐᓯᐊᕆᓪᓗᒍ ᓂᐊᖂᔭᖃᕈᓐᓃᕐᒪᑦ ᐃᒡᓗᒐᓴᒡᔪᐊᓂ.” 10 ᐊᖓᔪᖅᑳᕐᔪᐊᑉ ᐃᐱᑦ-ᒥᓕᒃ ᐃᑎᐅᐱᐊᒥᐅᑕᖅ ᐅᖃᐅᑎᕚ, “ᐊᖑᑎᓂᒃ 30ᓂᒃ ᐃᓚᖃᕐᓗᑎᑦ ᔨᕆᒤᐊ ᒎᑎᐅᑉ ᐅᖃᕐᑎᖓ ᐃᒥᕐᑕᕐᕕᖕᒥᑦ ᐊᒧᔭᕐᑐᓕᕐᓯᐅᒃ ᑐᖁᖏᓐᓂᖓᓂ.” 11 ᐃᐱᑦ-ᒥᓕᒃ ᑕᕝᕙ ᐊᖑᑎᑦ ᐱᖃᑎᒋᓪᓗᒋᑦ ᐊᖓᔪᖅᑳᕐᔪᐊᑉ ᐃᒡᓗᖓᓂᑦ ᑐᓂᓯᕕᐅᑉ ᐊᑖᓃᑦᑐᒧᑦ ᐃᒡᓗᕈᓯᕐᒧᐊᕐᐳᖅ, ᑕᕝᕙᓐᖓᓪᓗ ᖃᓪᓗᓈᕐᑕᓂᒃ ᐊᓐᓄᕌᑐᖃᕕᓂᕐᓂᒡᓗ ᐱᓪᓗᑎᒃ, ᐊᒃᓗᓈᑦ ᖃᓪᓗᓈᕐᑍᓪᓗ ᓂᖏᑎᑉᐰᑦ ᔨᕆᒤᐊᒧᑦ ᐃᒥᕐᑕᕐᕕᐅᑉ ᐃᓗᐊᓃᑦᑐᒧᑦ. 12 ᐃᐱᑦ-ᒥᓕᑭᐅᑉ ᐃᑎᐅᐱᐊᒥᐅᑕᐅᑉ ᔨᕆᒤᐊ ᐅᖃᐅᑎᕚ, “ᑖᒃᑯᐊ ᖃᓪᓗᓈᕐᑍᑦ ᐊᓐᓄᕌᕕᓃᓪᓗ ᐅᓂᕐᓄᐊᕐᓗᒋᑦ ᐊᒃᓗᓈᓄᑦ ᐋᓐᓂᕇᒃᑯᑎᒋᓂᐊᕐᐸᑎᑦ.” ᔨᕆᒤᐊᓗ ᑍᒤᓕᐅᕐᐳᖅ. 13 ᐊᒧᕚᓪᓗ ᐃᒥᕐᑕᕐᕕᒃᓴᒥᑦ, ᐊᒃᓗᓈᓄᑦ ᐊᒧᐊᕈᑎᖃᕐᓗᑎᒃ. ᔨᕆᒤᐊᓗ ᖃᐅᔨᓴᕐᑏᑦ ᓇᔪᕐᑕᖏᓐᓂ ᐃᓂᖃᓕᓚᐅᕐᐳᖅ. ᔨᑎᑬᐊᐅᑉ ᐅᖃᐅᑎᔭᐅᒋᐊᕈᒪᓂᖓ ᔨᕆᒤᐊᒧᑦ 14 ᐊᖓᔪᖅᑳᕐᔪᐊᑉ ᔨᑎᑬᐊᐅᑉ ᔨᕆᒤᐊ ᐂᔭᐅᑎᑉᐹ, ᐅᖃᐅᑎᓪᓗᒍᓗ, “ᐊᐱᕆᔪᒪᒐᒃᑭᑦ ᓱᓕᔪᒥᒃ ᐅᖃᐅᑎᓂᐊᕐᐸᕐᒪ ᐃᔨᕐᓯᒪᑎᑦᓯᑦᑍᓕᒋᑦ.” 15 ᔨᕆᒤᐊᐅᑉ ᔨᑎᑬᐊ ᐅᖃᐅᑎᕚ, “ᓱᓕᔪᒥᒃ ᑭᐅᒍᒃᑭᑦ ᑐᖁᓐᓇᔭᖏᓐᓇᕕᖔ? ᐅᖃᐅᑎᒋᐊᑐᐊᕈᒃᑭᑦ ᓈᓚᒍᒪᑦᔮᖏᓐᓂᕗᑎᑦ.” 16 ᐊᖓᔪᖅᑳᕐᔪᐊᓪᓕ ᔨᑎᑬᐊ ᔨᕆᒤᐊᒧᑦ ᐊᖏᒻᒪᕆᒃᐳᖅ ᐃᓄᖕᓄᑦ ᖃᐅᔨᔭᐅᓇᓂ: “ᐊᑕᓂᐅᑉ ᐆᒪᔫᑉ ᐅᕙᑦᑎᓐᓂᒃ ᐊᓂᕐᓂᖃᕐᑎᑦᓯᔫᑉ ᐊᑎᖓᓂ ᑐᖁᓐᓂᐊᓐᖏᓚᒋᑦ ᐱᔭᐅᑎᓐᓂᐊᓐᖏᓚᒋᓪᓗ ᐃᓕᖕᓂᒃ ᑐᖁᑦᓯᔪᒪᔪᓄᑦ.” 17 ᔨᕆᒤᐊᐅᑉ ᔨᑎᑬᐊ ᐅᖃᐅᑎᓕᕐᐹ, “ᐃᒫᒃ ᐊᑕᓂᖅ ᐊᔪᖓᖃᖏᑦᑐᖅ ᐅᖃᕐᐳᖅ, ᐃᓴᕆᐊᓕᒥᐅᑦ ᒎᑎᖓᑦ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑎᖁᑎᖏᓐᓄᑦ ᑐᓂᑦᔪᑎᒋᒍᕕᑦ ᐃᓅᑎᑕᐅᒐᔭᕐᐳᑎᑦ, ᐃᒡᓗᒐᓴᒡᔪᐊᓪᓗ ᐃᑭᑕᐅᒐᔭᓐᖏᓚᑦ, ᕿᑐᕐᖓᕇᓯᒍᓪᓗ ᑐᖁᑕᐅᓂᐊᓐᖏᓚᓯ. 18 ᐃᓕᖕᓂᒃ ᑐᓂᑦᔪᑎᒋᓂᐊᖏᒃᑯᕕᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑎᖁᑎᖏᓐᓄᑦ ᑖᒃᑯᐊ ᐃᒡᓗᒐᓴᒡᔪᐊᑦ ᐱᔭᐅᓂᐊᕐᐳᑦ ᑲᐅᓪᑎᐊᒥᐅᓄᑦ ᐃᑯᐊᓪᓚᒃᑎᑕᐅᓗᑎᒡᓗ ᐊᓐᓇᒡᕕᒃᓴᖃᕐᓂᐊᓐᖏᓚᑎᓪᓗ.” 19 ᐊᖓᔪᖅᑳᕐᔪᐊᖅ ᔨᑎᑬᐊ ᐅᖃᕐᐳᖅ ᔨᕆᒤᐊᒧᑦ, “ᓯᕘᕋᒐᒪ ᔫᑎᐅᖃᑎᓐᓂᒃ ᑲᐅᓪᑎᐊᒥᐅᓄᐊᕐᓯᒪᔪᓂᒃ, ᑖᒃᑯᓄᖓ ᐱᔭᐅᑎᒃᑲᓗᐊᕈᒪ ᑍᒃᑯᓄᖓ ᑐᓂᑦᔪᑕᐅᓗᖓ ᐋᓐᓂᐊᑎᑕᐅᓂᐊᕋᓱᒋᕗᖓ.” 20 ᔨᕆᒤᐊᐅᑉ ᐅᖃᐅᑎᕚ, “ᑍᒃᑯᓄᖓ ᑐᓂᑦᔪᑕᐅᓂᐊᓐᖏᓚᑎᑦ, ᐊᑕᓂᖅ ᓈᓚᒃᑯᕕᐅᒃ ᐅᖃᐅᓯᕆᔭᒃᑲ ᒪᓕᒡᓗᒋᑦ ᖃᓄᐃᑕᐅᑦᔮᓐᖏᓚᑎᑦ, ᑐᖁᑕᐅᑦᔮᓇᑎᓪᓗ. 21 ᑐᓂᑦᔪᑎᒋᔪᒪᓂᐊᖏᒃᑯᕕᓪᓕ, ᐃᒫᒃ ᐊᑕᓂᐅᑉ ᑕᑯᑎᓯᒪᕚᖓ; 22 ᐊᕐᓇᓕᒫᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᑕ ᐃᒡᓗᖓᓃᑦᑐᑦ ᐊᓂᑎᑕᐅᔪᒫᕐᐳᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᖓᔪᖅᑳᖁᑎᖏᓐᓄᑦ, ᑖᒃᑯᐊᓗ ᐊᕐᓁᑦ ᐃᓕᖕᓂᒃ ᐅᖃᐅᓯᖃᕈᒫᕐᐳᑦ ᐃᒫᒃ: ‘ᐊᖓᔪᖅᑳᕐᔪᐊᖅ ᐃᓚᓐᓇᕆᔭᒥᓄᑦ ᑕᒻᒪᕐᑎᑕᐅᓪᓗᓂ ᓵᓚᒋᔭᐅᑎᑕᐅᕗᖅ, ᐃᑎᒐᖏᑦ ᒪᕐᕋᕐᒧᑦ ᒪᖑᖕᒪᑕ, ᐃᓚᓐᓇᕆᔭᒥᓄᑦ ᕿᒪᒃᑕᐅᕗᖅ.’ 23 “ᐊᕐᓁᑦ ᕿᑐᕐᖓᖏᓪᓗ ᐱᔭᐅᔪᒫᕐᐳᑦᑕᐅᖅ ᑲᐅᓪᑎᐊᒥᐅᓄᑦ, ᐃᕝᕕᓪᓗ ᐊᓐᓇᒡᕕᒃᓴᖃᕐᓂᐊᓐᖏᓚᑎᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑎᒍᔭᐅᔪᒫᕐᐳᑎᑦ, ᐃᒡᓗᒐᓴᒡᔪᐊᖁᑎᑎᓪᓗ ᐃᑯᐊᓪᓚᒃᑎᑕᐅᓗᑎᒃ.” 24 ᔨᑎᑬᐊᐅᑉ ᔨᕆᒤᐊ ᐅᖃᐅᑎᕚ, “ᐅᖃᖃᑎᒌᖕᓂᕗᒃ ᑭᓇᑐᐃᓐᓇᕐᒧᑦ ᖃᐅᔨᔭᐅᑎᑦᑍᓕᒍᒃ ᑐᖁᑕᐅᓪᓚᕐᓂᐊᕋᕕᑦ. 25 ᐊᖓᔪᖅᑳᖑᔪᓄᑦ ᐅᖃᖃᑎᒌᒃᑐᕕᓂᐅᓂᕗᒃ ᖃᐅᔨᔭᐅᒍᓂ ᑐᑭᓯᔪᒪᓕᕐᓂᐊᕐᒪᑕ ᖃᓄᖅ ᐊᖓᔪᖅᑳᕐᔪᐊᕐᓗ ᐅᖃᖃᑎᒌᖕᓂᕐᒪᖔᑦᓯᒃ, ᖃᓄᕐᓗ ᐃᓕᖕᓄᑦ ᐅᖃᕐᓂᕐᒪᖔᕐᒪ, ᐃᔨᕋᕐᑐᕐᕕᐅᔪᒪᖏᓪᓗᑎᒃ ᐃᓕᖕᓂᒃ ᑐᖁᑦᓯᑐᐃᓐᓇᕆᐊᖃᕐᐳᑦ. 26 ᐅᖃᐅᑎᓂᐊᕐᐸᑎᓪᓕ, ᐊᖓᔪᖅᑳᕐᔪᐊᕐᒧᑦ ᕿᓄᔭᕐᑐᓚᐅᕐᐳᖓ ᔫᓇᑕᓂᐅᑉ ᐃᒡᓗᖓᓄᑦ ᐅᑎᕐᑎᑕᐅᔪᒪᓇᖓ ᑐᖁᔭᕐᑐᕈᒪᓇᖓ ᑕᕝᕗᖓ.” 27 ᐊᖓᔪᖅᑳᖑᔪᓪᓕ ᐊᓱᐃᓛᒃ ᔨᕆᒤᐊᒧᐊᓚᐅᕐᐳᑦ ᐊᐱᕐᓱᕐᓗᒍᓗ ᐊᖓᔪᖅᑳᕐᔪᐊᓪᓗ ᑭᐅᑦᔪᑎᒋᖁᓚᐅᕐᑕᖏᓐᓂᒃ ᐅᖃᐅᑎᖕᒪᒋᑦ, ᐊᐱᕐᓱᒃᑲᓐᓂᕈᓐᓃᕐᐳᑦ, ᖃᐅᔨᒪᔪᖃᓚᐅᖏᒻᒪᑦ ᐊᖓᔪᖅᑳᕐᔪᐊᕐᒥᒃ ᐅᖃᖃᑎᖃᓚᐅᕐᓂᖓᓂᒃ. 28 ᔨᕆᒤᐊᓗ ᖃᐅᔨᓴᕐᑏᑦ ᓇᔪᒐᖓᓂ ᐃᓂᕾᓐᓇᓚᐅᕐᐳᖅ ᔨᕉᓴᓕᐅᑉ ᐅᓇᑕᕐᑐᒃᓴᓄᑦ ᐱᔭᐅᕕᖓ ᑎᑭᓪᓗᒍ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society