ᔨᕆᒤᐊᐅᑉ ᐊᒡᓚᖏᑦ 35 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᑉ ᕆᕼᐊᐰᐅᑉ ᑭᖑᕚᖏᓐᓃᓐᓂᖓ

¹ ᔨᕆᒤᐊ ᐊᑕᓂᕐᒧᑦ ᐅᖃᕐᕕᐅᓚᐅᕐᐳᖅ ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᑎᓪᓗᒍ ᔫᓮᐊᐅᑉ ᐃᕐᓂᖓ ᔫᑕᒥᐅᑦ ᐊᖓᔪᖅᑳᕐᔪᐊᖓ:

² “ᐃᓚᒌᑦ ᕆᑳᐰᑎᒃᑯᑦ ᕾᖁᓗᒋᑦ ᐊᑕᓂᐅᑉ ᐃᒡᓗᖓᓄᑦ, ᑲᑎᖃᑎᒋᒃᑭᑦ ᐃᒥᕐᑎᓪᓗᒋᓪᓗ ᕔᓂᒥᒃ.”

³ ᑕᕝᕙ ᔭ-ᐊᔭᓁᐊᒧᐊᓚᐅᕐᐳᖓ ᔨᕆᒤᐊᐅᑦᑕᐅᖅ ᐃᕐᓂᖓᓄᑦ, ᕼᐊᐸᔭᓁᐊᒥᒃ ᐊᑖᑕᖃᕐᑐᒧᑦ, ᖃᑕᓐᖑᑎᖏᓪᓗ ᑕᒪᕐᒥᒃ ᐃᕐᓂᖏᓪᓗ ᑖᒃᑯᐊ ᕆᑳᐰᑎᒃᑯᑦ ᐃᓚᒌᓕᒫᑦ.

⁴ ᐊᑕᓂᐅᑉ ᐃᒡᓗᖓᓄᐊᕐᑎᓚᐅᕐᐸᒃᑲ, ᑲᑎᖃᑎᒋᓪᓗᒋᓪᓗ ᒎᑎᐅᑉ ᐅᖃᕐᑎᖓᑕ ᕼᐊᓇᓐᓂᐅᑉ ᐃᓕᓐᓂᐊᕐᑎᖏᑕ ᐃᒡᑕᓔᐊᐅᑉ ᐃᕐᓂᖓᑕ ᐃᒡᓗᕈᓯᕆᖃᑦᑕᓚᐅᕐᑕᖓᓂ ᐊᖓᔪᖅᑳᕐᔪᐊᑦ ᐃᒡᓗᕈᓯᕆᖃᑦᑕᕐᑕᖏᑕ ᓴᓂᐊᓃᑦᑐᒥ, ᒫ-ᐊᓯᐊᑉ ᓴᓗᒻᒥᐅᑉ ᐃᕐᓂᖓᑕ ᐃᑎᕐᑕᕐᕕᓕᕆᔨᐅᑉ ᐃᒡᓗᕈᓯᖓᑕ ᖁᓕᓪᑎᐊᖓᓂ.

⁵ ᐴᒍᑕᓂᒡᓗ ᕔᓂᒥᒃ ᐃᒻᒥᕐᓯᕗᖓ, ᐃᒥᐅᑎᒃᓴᖏᓐᓂᒡᓗ ᐊᑐᐃᓐᓇᕈᐃᓪᓗᖓ; ᕆᑳᐰᑎᒃᑯᑦ ᐃᓚᒌᑦ ᐅᖃᐅᑎᕙᒃᑲ ᕔᓂᒥᒃ ᐃᒥᖁᓪᓗᒋᑦ.

⁶ ᑖᒃᑯᐊᓕ ᑭᐅᕗᑦ, “ᕔᓂᒥᒃ ᐃᒥᕈᓐᓇᓐᖏᓚᒍᑦ; ᓯᕗᓕᑦᑕ ᔫᓇᑖᑉ ᕆᑳᐱᐅᑉ ᐃᕐᓂᖓᑕ ᐱᖁᔭᖃᕐᑎᓚᐅᕐᒪᑎᒍᑦ ᐃᒤᑦᑐᒥᒃ; ‘ᐃᓕᑦᓯ ᑭᖑᕚᓯᓗ ᐃᒥᕐᐸᒃᑐᒃᓴᐅᓐᖏᓚᓯ ᕔᓂᒥᒃ.

⁷ ᐃᒡᓗᓕᐅᕐᑐᒃᓴᐅᓐᖏᓚᓯ, ᐱᕈᕐᓯᐊᒃᓴᓕᕆᕙᖏᓪᓗᓯᓗ, ᕔᓂᓕᒃᓴᓂᒡᓗ ᐱᕈᕐᓰᕕᖁᑎᖃᕐᐸᖏᓪᓗᓯ ᑍᒤᑦᑐᓂᒃ ᐱᓇᓱᐊᕐᐸᒃᑐᒃᓴᐅᓐᖏᓚᓯ, ᑭᓯᐊᓂᓕ ᑐᐱᕐᒥᐅᖑᐃᓐᓇᕐᐸᒃᑐᒃᓴᐅᕗᓯ, ᑕᕝᕙ ᐊᑯᓂ ᓄᓇᒥ ᐃᓅᓯᖃᕈᒫᕐᐳᓯ ᑕᒫᓃᕐᕆᔭᒃᑎᐅᒐᑦᓯ.’

⁸ ᑕᒪᒃᑯᐊᓕᒫᑦ ᓈᓔᓐᓇᓚᐅᕐᐸᕗᑦ ᓯᕗᓕᑦᑕ ᔨᕼᐅᓇᑕᐅᑉ ᕆᑳᐱᐅᑉ ᐃᕐᓂᖓᑕ ᒪᓕᒐᒃᓴᓕᐊᕆᓚᐅᕐᑕᖏᑦ ᐅᕙᑦᑎᓐᓄᑦ, ᐅᕙᒍᓪᓗ ᓄᓕᐊᕗᓪᓗ ᐃᕐᓂᕗᓪᓗ ᐸᓂᕗᓪᓗ ᐃᒥᓚᐅᕐᓯᒪᓐᖏᓚᑦ ᕔᓂᒥᒃ.

⁹ ᐃᒡᓗᓕᐅᓚᐅᕐᓯᒪᓇᑕᓗ ᕔᓂᒃᓴᖁᑎᖃᓚᐅᕐᓯᒪᓐᖏᓚᒍᑦ ᐱᕈᕐᓰᕕᖃᓐᖏᓚᒍᑦ ᑲᓐᖓᕐᓱᐃᓚᐅᕐᓯᒪᓇᑕᓗ.

¹⁰ ᑐᐱᕐᒥᐅᖑᐃᓐᓇᕐᐳᒍᑦ ᒪᓖᓐᓇᕐᓗᑕᓗ ᓯᕗᓕᕕᓂᑦᑕ ᔫᓇᑕᐅᑉ ᒪᓕᖁᓚᐅᕐᑕᖏᓐᓂᒃ.

¹¹ ᓂᐱᑯᓁᓴᐅᓪᓕ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᓄᓇᕗᑦ ᓵᓚᒋᓕᕐᒪᒍ ᐅᖃᓚᐅᕐᐳᖑᑦ, ᔨᕉᓴᓕᒧᐊᕈᒪᓪᓗᑕ ᑲᐅᓪᑎᐊᒥᐅᑦ ᓯᕆᐊᒥᐅᓪᓗ ᐅᓇᑕᕐᑎᖁᑎᖏᓐᓂᑦ ᕿᒫᔪᒪᓪᓗᑕ ᑍᒪᓐᖓᑦ ᑕᕝᕙ ᔨᕉᓴᓕᒥᐅᑕᐅᓕᕐᐳᒍᑦ.”

¹² ᔨᕆᒤᐊᓕ ᐊᑕᓂᕐᒧᑦ ᐅᖃᕐᕕᐅᓕᕆᕗᖅ,

¹³ “ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, ᔫᑕᒥᐅᑦ ᔨᕉᓴᓕᒥᐅᓪᓗ ᐅᖃᐅᑎᔭᕐᑐᒃᑭᒃ ᑐᑭᓯᕚᓪᓕᕐᑐᒃᓴᐅᓕᕋᑦᓯ ᓱᓕ ᐅᖃᐅᓯᓐᓂᒃ ᓈᓚᖕᓂᐊᓐᖏᓚᓰ? ᐊᑕᓂᖅ ᐅᖃᕐᐳᖅ.

¹⁴ ᔨᕼᐅᓇᑕᐅᑉ ᕆᑳᐱᐅᑉ ᐃᕐᓂᖓᑕ ᐃᕐᓂᓂ ᕔᓂᒥᒃ ᐃᒥᖃᑦᑕᖁᓐᓂᖏᒻᒪᒋᑦ ᓱᓕ ᐅᓪᓗᒥ ᑕᒪᓐᓇ ᑖᒃᑯᐊ ᒪᓕᒃᐹᑦ, ᐃᒥᕈᓐᓇᖏᒻᒪᑕ ᕔᓂᒥᒃ ᐅᓪᓗᒥ, ᓯᕗᓕᕆᔭᒥ ᐱᖁᔭᓕᐊᕆᔭᕕᓂᖓᓂᒃ ᓈᓚᒃᑲᒥᒃ. ᐅᕙᖓᓕ ᐅᓄᕐᑐᐃᕐᓱᕐᓗᖓ ᐅᖃᐅᑎᖃᑦᑕᓚᐅᕐᐸᑦᓯ, ᑭᓯᐊᓂᓕ ᓈᓚᒍᓐᓇᓚᐅᓐᖏᓚᓯ.

¹⁵ ᐅᓄᕐᑐᐃᕐᓱᕐᓗᖓ ᐅᖃᕐᑎᒃᑲ ᑎᓕᕙᓚᐅᕐᐸᒃᑲ ᐃᓕᑦᓯᓐᓄᑦ, ᐅᖃᕐᐸᓚᐅᕐᐳᓪᓗ, ‘ᓵᒋᐊᕐᑐᒃᓴᐅᕗᓯ ᐱᐅᖏᑦᑐᓕᓂᑦᓯᓐᓂᑦ ᐊᑲᐅᔪᒥᒡᓗ ᐃᓕᖅᑯᓯᖃᓕᕐᓗᓯ; ᒎᑎᓐᖑᐊᓂᒃ ᒪᓕᓕᕐᑍᓕᒋᑦᓯ ᐱᓂᐊᕐᕕᒋᓇᒋᓪᓘᓐᓃᑦ, ᑕᕝᕙ ᐃᓅᓂᐊᕐᐳᓯ ᓯᕗᓕᑦᓯᓐᓄᑦ ᐃᓕᑦᓯᓐᓄᓪᓗ ᓄᓇᒋᔭᐅᖁᓚᐅᕐᑕᓐᓂ.’ ᑭᓯᐊᓂᓕ ᑐᓴᕈᓐᓇᓚᐅᓐᖏᓚᑦᓯᓐᖓ ᓈᓚᒍᒪᓇᖓᓗ.

¹⁶ ᔨᕼᐅᓇᑕᐅᑉ ᑭᖑᕚᖏᑦ ᕆᑳᐱᐅᑉ ᐃᕐᓂᖓᑕ ᒪᓕᒐᒃᓴᓕᐊᖏᓐᓂᒃ ᒪᓖᓐᓇᓚᐅᕐᐳᑦ, ᐅᑯᐊᓕ ᐃᓅᖃᑎᒌᑦ ᐅᕙᓐᓂᒃ ᓈᓚᒍᒪᓐᖏᓚᑦ.

¹⁷ ᑍᒤᒻᒪᑦ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, ᔫᑕᒥᐅᓄᑦ ᔨᕉᓴᓕᒥᐅᓕᒫᓄᓪᓗ ᑎᑭᑕᐅᑎᑦᓯᔪᒫᕐᐳᖓ ᑲᑉᐱᐊᓇᕐᑐᓂᒃ ᑎᑭᓐᓂᐊᕐᓂᕋᕐᓯᒪᔭᓐᓂᒃ, ᐅᖃᐅᑎᕙᓚᐅᕋᓗᐊᕋᒃᑭᑦ ᓈᓚᒍᒪᓚᐅᖏᒻᒪᑕ, ᑎᓕᓯᑦᔪᑎᓐᓂᒡᓗ ᓈᓚᒍᒪᓚᐅᕋᑎᒃ.”

¹⁸ ᔨᕆᒤᐊᐅᓪᓗ ᐃᓚᒌᑦ ᕆᑳᐰᑎᒃᑯᑦ ᐅᖃᐅᑎᕔᑦ, ᐃᒫᒃ ᐊᑕᓂᖅ ᐊᔪᖓᖃᖏᑦᑐᖅ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, “ᓈᓚᓚᐅᕋᑦᓯᐅᒃ ᐱᖁᔭᐅᑦᔪᑎᒋᔭᓯ ᓯᕗᓕᕕᓂᑦᓯᓐᓄᑦ ᔨᕼᐅᓇᑕᒧᑦ ᐱᖁᔭᓕᐊᕆᔭᖏᓪᓗ ᒪᓕᒡᓗᓯᐅᒃ ᐊᑐᕐᑕᐅᖁᔭᖏᓪᓗ ᐊᑐᓚᐅᕋᑦᓯᐅᒃ.

¹⁹ ᑕᒪᓐᓇ ᐱᓪᓗᒍ, ᐃᒫᒃ ᐊᑕᓂᖅ ᐊᔪᖓᖃᖏᑦᑐᖅ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ; ᔫᓇᑕᐅᑉ ᕆᑳᐱᐅᑉ ᐃᕐᓂᖓ ᐱᔨᑦᓯᕐᑎᒃᓴᓂᒃ ᐊᔪᕐᓴᓕᓚᐅᕐᓯᒪᓂᐊᓐᖏᓚᑎᑦ.”