ᔨᕆᒤᐊᐅᑉ ᐊᒡᓚᖏᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᑎᑬᐊᑉ ᑐᓴᖁᔭᐅᓂᖓ ᐅᖃᐅᓯᕐᓂᒃ

¹ ᐊᑕᓂᐅᑉ ᐅᖃᐅᓯᖓ ᔨᕆᒤᐊᒧᑦ ᑎᑭᑉᐳᖅ, ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑕ ᐅᓇᑕᕐᑐᒃᓴᖁᑎᖏᑦ ᐊᐅᓚᑕᖏᓐᓃᑦᑐᑦ ᐅᓇᑕᖃᑎᖃᒻᒪᕆᓕᕐᑎᓪᓗᒋᑦ ᔨᕉᓴᓕᒥᐅᓂᒃ ᓄᓇᓕᖕᓂᒡᓗ ᖃᓂᒋᔭᖏᓐᓃᑦᑐᓂᒃ:

² “ᐃᒫᒃ ᐊᑕᓂᖅ ᐅᖃᕐᐳᖅ ᐃᓴᕆᐊᓕᒥᐅᑦ ᒎᑎᖓᑦ, ᔨᑎᑬᐊᒧᐊᕐᓗᑎᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᐅᑎᒍᒃ, ‘ᐃᒫᒃ ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐃᒡᓗᒐᓴᒡᔪᐊᖁᑎᓯ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑐᓂᓂᐊᓕᕐᐸᒃᑲ, ᑖᑦᓱᒪᓗ ᐃᑯᐊᓪᓚᒍᒫᕐᐹ.

³ ᑖᑦᓱᒪᓐᖓᑦ ᐊᓐᓇᒡᕕᖃᕐᓂᐊᓐᖏᓚᑎᑦ, ᓵᓚᒋᔭᐅᓗᑎᑦ ᑎᒍᔭᐅᓂᐊᕐᐳᑎᑦ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᓇᖕᒥᓂᖅ ᑕᑯᔪᒫᕐᐸᑦ, ᐃᔨᒥᑦ ᐃᔨᒧᑦ ᐅᖃᖃᑎᒋᓗᒍᓗ ᑮᓇᕐᒥᑦ ᑮᓇᕐᒧᑦ; ᐹᐱᓘᓂᒧᐊᕈᑦᔭᐅᔪᒫᕋᕕᑦ.’

⁴ ᑍᒤᒃᑲᓗᐊᕐᑎᓪᓗᒍ ᐊᑕᓂᐅᑉ ᐅᖃᐅᓯᖓᓂᒃ ᑐᓴᓕᕆᑦ, ᔨᑎᑬᐊ ᔫᑕᒧᑦ ᐊᖓᔪᖅᑳᕐᔪᐊᖑᔪᑎᑦ, ᐃᒫᒃ ᐊᑕᓂᖅ ᐅᖃᕐᐳᖅ ᐃᕝᕕᑦ ᐱᑦᔪᑎᒋᓗᑎᑦ: ‘ᐅᓇᑕᕐᑐᓂ ᑐᖁᑕᐅᓂᐊᓐᖏᓚᑎᑦ,

⁵ ᖃᓄᐃᖏᑦᓯᐊᕐᓗᑎᑦ ᑐᖁᔪᒫᕐᐳᑎᑦ. ᓯᕗᓕᓯ ᐃᑯᐊᓚᑦᓯᕙᓚᐅᕐᒪᑕ ᐃᓯᕐᓗᐊᕐᓂᑎᑦᓯᓪᓗᑎᒃ ᐃᓅᔪᓐᓃᕐᑐᖃᕌᖓᑦ ᐊᖓᔪᖅᑳᕐᔪᐊᖏᓐᓂᒃ, ᐅᐱᒍᓲᑎᖃᕐᓂᕐᒥᖕᓂᒃ ᓇᓗᓁᕐᓯᑦᔪᑎᒋᓗᒍ, ᑍᒪᒃᑕᐅᖅ ᐃᓕᖕᓂᒃ ᐅᐱᒍᓲᑎᖃᕐᓂᕐᒧᑦ ᐅᒡᒍᐊᕈᑎᖃᕐᓂᕐᒧᓪᓗ ᐃᑯᐊᓚᑦᓯᑦᔪᑕᐅᔪᒫᕆᕗᑎᑦ ᑎᐱᑦᓯᐊᕆᒃᑐᓂᒃ; ᐅᖃᕐᓗᑎᒃ, “ᐊᖓᔪᖅᑳᕆᔭᕗᑦ ᑐᖁᕗᖅ!”’ ᐅᕙᖓ ᑕᒪᑐᒥᖓ ᐅᖃᕐᐳᖓ, ᐊᑕᓂᖅ ᐅᖃᕐᐳᖅ.”

⁶ ᔨᕆᒤᐊᐅᑉ ᑕᒪᒃᑯᐊ ᐅᖃᐅᓯᕆᕔᑦ ᔨᑎᑬᐊᒧᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᔨᕉᓴᓕᒦᓪᓗᓂ.

⁷ ᐅᓇᑕᕕᒃᔪᐊᓕᕐᑎᓪᓗᒋᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑎᖁᑎᖏᑦ ᔨᕉᓴᓕᒥᐅᓂᒃ ᔫᑕᒥᐅᓂᒡᓗ ᖃᓂᒋᔭᖏᓐᓃᕐᑐᓂᒡᓗ ᓄᓇᓕᖕᓂᒃ, ᓱᓕ ᓚᑮᓯᓗ ᐊᔨᑲᓗ ᓄᓇᓕᖏᒃ ᓴᐴᓗᑕᓖᒃ ᐊᒥᐊᒃᑯᑑᓕᓚᐅᕐᐴᒃ ᔫᑕᒥᐅᑦ ᓄᓇᖁᑎᓕᒫᖏᓐᓂ.

ᑎᒍᔭᐅᓯᒪᔪᑦ ᓴᒡᓗᕿᑕᐅᓯᒪᓂᖏᑦ

⁸ ᐊᑕᓂᐅᑉ ᔨᕆᒤᐊ ᐅᖃᐅᑎᕚ, ᔨᑎᑬᐊ ᐊᖓᔪᖅᑳᕐᔪᐊᖅ ᐊᖏᖃᑎᒌᒍᑎᓕᐅᕐᓯᒪᓕᕐᑎᓪᓗᒍ ᔨᕉᓴᓕᒥᐅᓄᑦ ᑎᒍᔭᐅᓯᒪᔪᑦ ᕿᓚᕈᑦᔮᕐᑕᐅᖁᓪᓗᒋᑦ,

⁹ ᑕᒪᕐᒥᒃ ᐄᑉᕉᓂᒃ ᓯᐊᓛᓖᑦ ᐃᓱᒪᕐᓱᓕᕐᑎᑦᓯᖁᔭᐅᕗᑦ, ᓇᓪᓕᐊᑦ ᔫᑎᐅᖃᑎᒥᓂᒃ ᑎᒍᓯᓯᒪᔪᓐᓃᖁᓪᓗᒍ ᓯᐊᓛᕆᓗᒍ.

¹⁰ ᐊᖓᔪᖅᑳᓕᒫᑦ ᐃᓄᐃᓪᓗ ᐊᖏᖃᑎᒌᒍᑎᓕᐅᓚᐅᕐᐳᑦ ᑎᒍᓯᒪᓪᓗᒋᑦ ᓯᐊᓛᒥᖕᓂᒃ ᐊᖑᑎᓂᒃ ᐊᕐᓇᓂᒡᓗ ᐃᓱᒪᕐᓱᓕᕐᑎᑦᓯᖁᓪᓗᒋᑦ, ᓯᐊᓛᖑᒃᑲᓐᓂᖁᓇᒋᑦ, ᓈᓚᒡᓗᑎᒃ ᓯᐊᓛᑎᒃ ᓴᒃᑯᓚᐅᕐᐰᑦ.

¹¹ ᑭᓯᐊᓂᓕ ᑭᖑᓂᖓᒍᑦ ᐃᓱᒪᑖᓕᕐᒥᒐᒥᒃ ᑎᒍᓯᒪᓚᐅᕐᑕᑎᒃ ᐅᑎᕐᑎᓪᓗᒋᑦ ᓯᐊᓛᕐᑕᕆᓕᓚᐅᕆᕔᑦ.

¹² ᐊᑕᓂᐅᓪᓕ ᔨᕆᒤᐊ ᐅᖃᕐᕕᒋᓕᕆᕚ,

¹³ “ᐃᒫᒃ ᑕᕝᕙ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᓯᕗᓕᓯ ᐊᖏᖃᑎᒌᒍᑎᒥᒃ ᐋᖅᑭᒃᓯᖃᑎᒋᓚᐅᕐᐸᒃᑲ ᐄᑦᔨᑉᑎᒥᑦ ᐊᐅᓪᓚᕐᑎᓐᓇᒃᑭᑦ ᑎᒍᔭᐅᓯᒪᕕᒋᓚᐅᕐᑕᖏᓐᓂᑦ. ᐅᖃᕐᓗᖓᓗ;

¹⁴ ᐊᕐᕌᒍᑦ 7ᒋᓕᕌᖓᒍ ᐄᑉᕉᒥᐅᑕᐅᖃᑎᑦᓯᓐᓂᒃ ᐃᓱᒪᕐᓱᓕᕐᑎᑦᓯᖃᑦᑕᕐᑐᒃᓴᐅᕗᓯ ᓂᐅᕕᐊᕆᓪᓗᒍ ᓯᐊᓛᕐᑖᕆᓂᑯᑦᓯᓐᓂᒃ, ᐊᕐᕌᒍᓂᒃ ᐱᖓᓲᔪᕐᑐᓂᒃ ᐃᓕᑦᓯᓐᓂᑦ ᓯᐊᓛᕆᔭᐅᓂᑰᓯᒪᓕᑐᐊᕐᐸᑦ ᐃᓱᒪᕐᓱᓕᕐᑎᑕᒃᓴᕆᕙᓯ, ᑭᓯᐊᓂᓕ ᓯᕗᓕᓯ ᐅᕙᓐᓂᒃ ᓈᓚᓚᐅᓐᖏᓚᑦ ᑐᓴᕈᒪᓇᑎᒡᓗ.

¹⁵ ᒫᓐᓇᒃᑯᓪᓕ ᓵᒋᐊᓚᐅᕋᑦᓯ ᐊᑲᐅᒋᔭᓐᓂᒃ ᐊᑐᕐᐳᓯ, ᐃᓅᖃᑎᑦᓯᓐᓂᒡᓗ ᐃᓱᒪᕐᓱᓕᕐᑎᑦᓯᔪᓐᓇᕈᒪᓪᓗᓯ ᓇᓗᓁᕐᓯᓚᐅᕐᐳᓯ ᐊᖏᖃᑎᒌᒍᑎᓕᐅᓚᐅᕐᐳᓯᓗ ᓵᓐᓂ ᐃᒡᓗᖁᑎᓐᓃᑦᓗᓯ ᐊᑎᓐᓂᒃ ᑍᔭᐅᔪᒥ.

¹⁶ ᒫᓐᓇᓕ ᐅᖃᓚᐅᕐᑕᓯ ᓴᖑᑎᓪᓗᒍ ᐊᑎᕋ ᐊᑐᕐᓂᕐᓗᓕᕆᕙᓯ, ᓯᐊᓛᓯ ᐃᓱᒪᕐᓱᓕᕐᑎᑦᓴᕆᐊᖃᓚᐅᕐᑕᓯ ᐊᖑᑏᑦ ᐊᕐᓁᓪᓗ ᐅᑎᕐᑎᒻᒥᒐᑦᓯᐅᒃ, ᑎᒍᓯᒪᓪᓗᒋᑦ ᓯᐊᓛᕆᒃᑲᓐᓂᓕᕐᓗᒋᑦ.

¹⁷ ᑍᒤᒻᒪᑦ ᐊᑕᓂᖅ ᐅᖃᕐᐳᖅ, ᐅᕙᓐᓂᒃ ᓈᓚᓚᐅᓐᖏᓚᓯ ᐄᑉᕉᒥᐅᑕᐅᖃᑎᑦᓯᓐᓂᒃ ᐃᓱᒪᕐᓱᓕᕐᑎᑦᓯᔪᒪᖏᓐᓇᑦᓯ, ᒫᓐᓇ ᐅᖃᐅᑎᓕᕐᐸᑦᓯ ᐃᓱᒪᕐᓱᕐᑎᓐᓂᐊᓕᕐᐸᑦᓯ ᐊᑕᓂᖅ ᐅᖃᕐᐳᖅ, ᐅᓇᑕᕐᑐᓂ ᑐᖁᑕᐅᖁᓪᓗᓯ ᐋᓐᓂᐊᓇᕐᑐᓄᓪᓗ, ᑳᖕᓇᕐᑐᕐᔪᐊᒧᓪᓗ, ᐃᓅᖃᑎᒌᒡᔪᐊᓄᓪᓗ ᑕᑯᑦᔪᑎᒃᓴᓐᖑᕐᓂᐊᕐᐳᓯ ᓯᕘᕋᓇᕐᑐᒥᒃ.

¹⁸ ᐊᖏᖃᑎᒌᒍᑎᓕᐊᕆᓚᐅᕐᑕᓐᓂᒃ ᒪᓕᖏᑦᑐᑦ ᓈᓚᖏᑦᑐᓪᓗ ᐊᖏᖃᑎᒌᖕᓂᐅᑉ ᒪᓕᒐᒃᓴᕐᑕᖏᓐᓂᒃ ᐋᖅᑭᓚᐅᕐᑕᑦᑎᓐᓂᒃ ᓵᓐᓂ, ᐃᒻᒧᒃᓯᐅᒐᐅᑉ ᓄᕐᕋᖓᓂᒃ ᒪᕐᕉᓕᓗᒍ ᐊᕕᒃᓯᑦᔪᓯᖓᑦᑎᑐᑦ ᐱᓂᐊᕐᐸᒃᑲ ᒪᕐᕉᓕᓗᒋᓪᓗ ᓇᑲᒌᕈᒃᑭᑦ ᐊᑯᓐᓂᖓᒍᑦ ᐱᓱᖕᓂᐊᕐᐳᖓ.

¹⁹ ᓲᕐᓗᑦᑕᐅᖅ ᔨᕉᓴᓕᒥᐅᑦ ᔫᑕᒥᐅᓪᓗ ᓯᕗᓕᕐᑎᖏᑦ, ᑐᓂᕐᕈᓯᕐᑎᑦᓯᔨᖏᓪᓗ, ᐃᓄᐃᓪᓗ ᐃᒻᒧᒃᓯᐅᒐᐅᑉ ᓄᕐᕋᖓ ᒪᕐᕉᓕᓪᓗᒍ ᐊᕕᒃᑐᕋᒥᑦᔪᒃ ᐊᑯᓐᓂᖓᒍᑦ ᐱᓱᓚᐅᕐᒪᑕ.

²⁰ ᑍᒃᑯᐊ ᐃᓕᑦᓯᓐᓂᒃ ᑐᖁᑦᓯᔪᒪᔪᓄᑦ ᐱᔭᐅᑎᓐᓂᐊᕐᐸᑦᓯ, ᑎᒥᕕᓃᓪᓗ ᓂᕿᒋᔭᐅᓕᕈᒫᕐᐳᑦ ᑎᖕᒥᐊᓄᑦ ᐆᒪᔪᓄᓪᓗ ᓄᓇᒦᑦᑐᓄᑦ.

²¹ ᔨᑎᑬᐊ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ ᐊᖓᔪᖅᑳᖁᑎᖏᓪᓗ ᐊᑭᕋᖏᓐᓄᑦ ᐱᔭᐅᑎᓐᓂᐊᕐᐸᒃᑲ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᕐᑐᒃᓴᖁᑎᖏᓐᓄᑦ, ᒫᓐᓇ ᐃᓕᑦᓯᓐᓂᒃ ᐱᓇᓱᐊᕈᓐᓃᕐᐳᑦ.

²² ᑎᓕᓯᓂᐊᕐᐳᖓ, ᐊᑕᓂᖅ ᐅᖃᕐᐳᖅ, ᐅᑎᕐᓂᐊᕐᒪᑕ ᑕᕝᕗᖓ ᐃᒡᓗᒐᓴᒡᔪᐊᓄᑦ ᐅᓇᑕᕐᓗᒍᓗ ᓵᓚᒋᒍᓂᑦᔪᒃ ᐃᑯᐊᓪᓚᖕᓂᐊᕐᐹᑦ, ᔫᑕᒥᐅᓪᓗ ᓄᓇᓕᖁᑎᖏᑦ ᓄᓇᒋᔭᒃᓴᐅᔪᓐᓃᕐᑎᓐᓂᐊᕐᐸᒃᑲ ᓄᓇᒋᔭᐅᔪᓐᓃᖁᓪᓗᒋᑦ ᐃᓄᖕᓄᑦ.”