ᔨᕆᒤᐊᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐊᓯᓐᓂᐊᕐᓂᖏᑦ

¹ ᐊᖑᑦ ᓄᓕᐊᒥᓂᒃ ᐊᕕᑦᑎᒃᐸᑦ ᐊᕐᓇᐅᓪᓗ ᐅᐃᒋᓚᐅᕐᑕᓂ ᕿᒪᒡᓗᒍ ᐊᓯᐊᓂᒡᓗ ᐅᐃᓂᒡᓗᓂ, ᐅᐃᒋᓚᐅᕐᑕᖓᑕ ᐅᑎᕐᕕᒋᔭᕆᐊᖃᕐᐸᐅᒃ? ᐃᓕᑦᓯᓕ ᐊᖑᓐᓂᐊᕐᑎᑎᑐᑦ ᐃᓅᓕᕐᐳᓯ ᐅᓄᕐᑐᓂᒃ ᐅᖓᒋᔭᖃᓕᕐᑐᑎᑐᑦ, ᑕᕝᕙ ᒫᓐᓇ ᐅᕙᓐᓄᑦ ᐅᑎᕈᓐᓇᕐᐱᓰ? ᐊᑕᓂᖅ ᐅᖃᕐᐳᖅ.

² ᐱᖑᐃᑦ ᖄᖏᓐᓄᑦ ᑕᑯᓴᓕᕆᑦᓯ, ᐊᓯᓐᓂᐊᕐᕕᒋᓯᒪᓐᖏᑕᑦᓯᓐᓂᒃ ᐱᑕᖃᕐᐹ? ᐊᖅᑯᑏᑦ ᓴᓂᕌᓂ ᐅᑕᖅᑭᕗᓯ ᐅᖓᒋᔭᑦᓯᓐᓂᒃ, ᓄᓇᖁᑎᖃᖏᑦᑐᑎᑐᑦ ᑍᒤᓪᓗᓯ ᓲᕐᓗ ᐃᓄᖃᔪᐃᑦᑐᒦᑦᑐᑎᑐᑦ ᐋᕋᑉᒥᐅᑎᑐᑦ, ᓄᓇ ᓇᕐᕈᓇᕐᓯᑎᑉᐸᓯ ᐊᖑᓐᓂᐊᕐᑎᑎᑐᑦ ᐃᓕᖅᑯᓯᖃᕐᓂᑦᓯᓐᓄᑦ ᐱᐅᖏᑦᑐᓕᓂᑦᓯᓐᓄᓪᓗ.

³ ᑍᒤᒻᒪᑦ ᓄᓇ ᖃᐅᓯᓕᕐᑎᑕᐅᔪᓐᓇᕈᓐᓃᕐᐳᖅ ᐅᐱᕐᖔᒃᑯᓪᓗ ᓯᓚᓗᒍᓐᓇᕈᓐᓃᕐᓗᓂ, ᐊᖑᓐᓂᐊᕐᑎᑎᑐᑦ ᑕᐅᑦᑐᖃᓕᕋᓗᐊᕋᕕᑦ ᑲᓐᖑᓲᑎᒋᔪᒪᓐᖏᓔᓪᓘᓐᓃᑦ.

⁴ ᐅᖃᕐᕕᒋᕋᑖᓚᐅᓐᖏᓚᕐᒫ? ᐊᑖᑕᒋᓂᕋᕐᓗᖓ, ᐃᓚᓐᓈᕆᓂᕋᕐᓗᖓᓗ ᐃᓅᓱᒃᑑᓂᕐᓂᑦ.

⁵ ᐅᖃᕐᐸᒃᐳᑎᑦ, ᓂᓐᖓᒡᕕᒋᓯᒤᓐᓇᕐᓂᐊᕐᐱᑎᒎᑦ? ᑕᐅᕗᖓᓕᒫᖅ, ᑍᒫᒃ ᐅᖃᕋᓗᐊᕐᓗᑎᑦ ᐱᐅᖏᑦᑐᓕᐅᕈᑎᒋᔪᓐᓇᕐᑕᓕᒫᑎᑦ ᐊᑐᕋᓱᐊᖃᑦᑕᕐᐸᑎᑦ.

ᐃᓴᕆᐊᓕᒥᐅᑦ ᔫᑕᒥᐅᓪᓗ ᓵᒋᐊᕐᑐᒃᓴᐅᕗᑦ

⁶ ᔫᓮᐊ ᐊᖓᔪᖅᑳᕐᔪᐊᖑᑎᓪᓗᒍ, ᐊᑕᓂᐅᑉ ᐅᖃᕐᕕᒋᕚᖓ, “ᑕᑯᓯᒪᕕᓪᓖ? ᐃᓴᕆᐊᓕᒥᐅᑦ ᐅᒃᐱᕈᒪᖏᑦᑐᑦ ᐃᓕᖅᑯᓯᖏᓐᓂᒃ? ᐱᖑᓕᒫᑦ ᖄᖏᓐᓂ ᓇᐹᕐᑐᐃᓪᓗ ᐊᑖᓐᓂ ᐊᓯᓐᓂᐊᓚᐅᕐᐹᖓ ᐊᖑᓐᓂᐊᕐᑎᑎᑐᑦ.

⁷ ᑍᒤᓕᐅᓚᐅᕋᓗᐊᕐᓗᑎᒃ ᐅᕙᓐᓄᑦ ᐅᑎᕐᓂᐊᕋᓱᒋᓚᐅᕋᓗᐊᕐᐸᒃᑲ ᑭᓯᐊᓂᓕ ᐅᑎᓚᐅᓐᖏᓚᑦ, ᐊᓯᓐᓂᐊᕐᑎᐅᖃᑎᖓᑕᓗ ᔫᑕᐅᑉ ᑕᒪᓐᓇ ᑕᑯᓚᐅᕆᕚ.

⁸ ᐃᓴᕆᐊᓕᒥᐅᑉ ᐊᓯᓐᓂᐊᕐᓂᖓ ᐱᓪᓗᒍ ᐊᕕᑦᑎᑦᔪᑎᓂᒃ ᑐᓂᓚᐅᕐᐸᕋ, ᕿᒪᒡᓗᒍᓗ, ᑍᒤᑎᑦᓯᓂᕋ ᔫᑕᐅᑉ ᑕᑯᒐᓗᐊᕋᒥᐅᒃ ᓯᕘᕋᓕᓚᐅᖏᓐᓂᕗᕐᑕᐅᖅ. ᐊᓯᓐᓂᐊᕐᓂᕐᒥᓂᒡᓗ ᑲᔪᓯᑐᐃᓐᓇᓚᐅᕐᐳᖅ.

⁹ ᐃᓴᕆᐊᓕᒥᐅᑉ ᓈᒻᒪᖏᑦᑐᓕᓂᖓ ᔫᑕᐅᑉ ᓱᕙᓪᓕᕈᑎᒋᓚᐅᖏᒻᒪᒍ. ᓄᓇ ᓇᕐᕈᓇᕐᓯᑎᓚᐅᕐᐹ ᐊᓯᓐᓂᐊᕈᑎᖃᕐᓗᓂᓗ ᐅᔭᕋᖕᒥᒃ ᕿᔪᖕᒥᒡᓗ.

¹⁰ ᑍᒤᓕᐅᕋᓗᐊᕋᒥᒃ ᐊᓯᓐᓂᐊᕐᑎᐅᖃᑎᖓᑕ ᔫᑕᐅᑉ ᐅᑎᕐᕕᒋᓚᐅᓐᖏᓛᖓ ᓱᓕᑦᓯᐊᕐᓗᓂ, ᑭᓯᐊᓂᓕ ᐅᑎᓐᖑᐊᑐᐃᓐᓇᓚᐅᕐᐳᖅ, ᐊᑕᓂᖅ ᐅᖃᕐᐳᖅ.”

¹¹ ᐊᑕᓂᐅᑉ ᐅᖃᐅᑎᒋᕚᖓ, “ᐃᓴᕆᐊᓕ ᐅᒃᐱᕆᔭᖃᓐᖏᓕᕋᓗᐊᕐᓗᓂ ᐅᕙᓐᓂᒃ, ᐸᓯᔭᒃᓴᐅᖏᓐᓂᕐᓴᐅᕗᖅ ᔫᑕᐅᑉ ᐊᓯᓐᓂᐊᕐᓂᖓᓂᑦ.

¹² ᐂᓕᕆᑦ, ᐅᓐᓄᐊᓪᓗᐊᑉ ᓇᓛᓃᑦᑐᓄᑦ ᐅᖃᕆᐊᕐᑐᕆᑦ. ᐃᓴᕆᐊᓕ ᐅᕙᓐᓄᑦ ᐅᑎᓚᐅᕆᑦ, ᐊᑕᓂᖅ ᐅᖃᕐᐳᖅ, ᓂᓐᖓᐅᒪᓂᕐᒧᑦ ᑕᑯᓂᐊᓐᖏᓚᒋᑦ ᓂᑲᒍᓱᒃᑐᕐᔫᒐᒪ, ᐃᓱᖃᖏᑦᑐᒧᑦ ᓂᓐᖓᐅᒪᓂᐊᓐᖏᓚᖓ.

¹³ ᐸᓯᔭᒃᓴᐅᓃᑦ ᓇᓗᓁᓕᕈᒃ, ᐊᑕᓂᖅ ᒎᑏᑦ ᐊᑭᕋᕐᑐᓚᐅᕋᕕᐅᒃ ᐱᓂᐊᕐᓂᕆᔭᑎᓪᓗ ᔫᑎᐅᖏᑦᑐᑦ ᒎᑎᓐᖑᐊᖏᓐᓄᑦ ᐱᓂᐊᓚᐅᕋᕕᒋᑦ. ᓇᐹᕐᑐᐃᑦ ᓇᒧᑐᐃᓐᓇᖅ ᓯᐊᒻᒪᖓᔪᑦ ᐊᑖᓐᓂ ᐅᕙᓐᓂᒃ ᓈᓚᓚᐅᖏᓐᓇᕕᑦ. ᐊᑕᓂᖅ ᐅᖃᕐᐳᖅ.

¹⁴ ᐊᑕᓂᖅ ᐅᖃᕐᐳᖅ, ᐊᓯᓐᓂᐊᕐᑎᐅᔪᓯ ᐅᕙᓐᓄᑦ ᐅᑎᕆᑦᓯ, ᐅᐃᒋᒐᑦᓯᓐᖓ. ᓂᕈᐊᕐᓂᐊᕐᐳᖓ ᐊᑕᐅᓯᕐᒥᒃ ᓄᓇᓕᖁᑎᑦᓯᓐᓂᑦ ᑕᒤᓐᓂᑦ, ᒪᕐᕉᓈᕐᑎᕆᓗᖓᓗ ᐃᓚᒌᖕᓂᑦ ᐊᑐᓂᑦ, ᓮᐅᓂᒧᓐᖓᐅᑎᓗᓯᓗ.

¹⁵ ᐰᕐᓯᔨᑖᕐᑎᓐᓂᐊᕐᐸᑦᓯᓗ ᐅᕙᓐᓂᒃ ᓈᓚᑦᓯᐊᕐᑐᓂᒃ, ᑕᓯᐅᕐᓯᖁᓪᓗᒋᑦ ᓯᓚᑐᓗᑎᒃ ᑐᑭᓯᒪᑦᓯᐊᕐᓗᑎᒡᓗ.

¹⁶ ᐅᓪᓗᓂ ᑍᒃᑯᓇᓂ ᐅᓄᕐᓯᕙᓪᓕᐊᓕᕈᑦᓯ ᓄᓇᒋᔭᑦᓯᓐᓂ, ᐊᑕᓂᖅ ᐅᖃᕐᐳᖅ, ᐅᖃᕐᑐᖃᕈᓐᓁᓕᔪᒫᕐᐳᖅ, ‘ᐊᑕᓂᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ.’ ᐃᓱᒪᒋᔪᒫᓐᖏᓛᑦ, ᐃᖅᑲᐅᒪᓇᒍᓗ, ᑭᖑᓂᖃᓈᕐᓇᒍᓗ, ᐊᑦᔨᐊᓂᒡᓗ ᓴᓇᔪᖃᕐᓂᐊᓐᖏᓚᖅ.

¹⁷ ᑕᒪᓐᓇ ᓇᓪᓕᐅᑎᒃᐸᑦ ᔨᕉᓴᓕᒻ ᐊᑕᓂᕐᒧᑦ ᐃᒃᓯᕙᐅᑕᕐᔪᐊᖃᕐᕕᐅᓂᕋᕐᑕᐅᓕᕈᒫᕐᐳᖅ, ᐃᓅᖃᑎᒌᒡᔪᐊᓪᓗ ᔨᕉᓴᓕᒧᑦ ᑲᑎᖃᑦᑕᕈᒫᕐᐳᑦ ᐊᑕᓂᐅᑉ ᐊᑎᖓᓂᒃ ᐅᐱᒍᓱᖕᓂᕐᒥᖕᓂᒃ ᓇᓗᓁᕐᓯᔭᕐᑐᕐᓗᑎᒃ. ᐆᒻᒪᑎᒥᒃᑕ ᓯᑎᔫᓂᖏᓐᓂᒃ ᐱᐅᖏᑦᑐᓕᔪᒪᓂᖏᓐᓂᒡᓗ ᒪᓕᒍᓐᓃᕈᒫᕐᐳᑦ.

¹⁸ ᑍᒃᑯᓇᓂᓗ ᐅᓪᓗᓂ ᔫᑕᒥᐅᑦ ᐃᓚᓕᐅᑎᔪᒫᕐᐳᑦ ᐃᓴᕆᐊᓕᒥᐅᓄᑦ, ᑖᒃᑯᐊᓗ ᐃᓅᖃᑎᒌᖑᓗᑎᒃ ᐅᓐᓄᐊᓪᓗᐊᑉ ᓇᓛᓂᓐᖓᕐᓗᑎᒃ ᓄᓇᑖᕈᒫᕐᐳᑦ ᓯᕗᓕᑦᓯᓐᓄᑦ ᓄᓇᑖᕆᔭᐅᖁᓚᐅᕐᑕᕋ ᑭᖑᕐᖑᑎᓕᕐᓗᒍ.”

ᒎᑎᐅᑉ ᐃᓄᖁᑎᖏᑕ ᐊᓯᓐᓂᐊᕐᓯᒪᓂᖏᑦ

¹⁹ ᐊᑕᓂᖅ ᐅᖃᕐᐳᖅ, “ᐅᖃᓚᐅᕐᐳᖓᓕ, ᖁᕕᐊᓱᒃᑲᔭᓚᐅᕐᐳᖓ ᐃᕐᓂᑦᑐᑦ ᐱᔪᒪᓗᓯ, ᓄᓇᒃᑯᒥᓇᕐᑐᒥᓗ ᓄᓇᖃᕐᑎᓪᓗᓯ. ᐃᓅᖃᑎᒌᒡᔪᐊᓄᑦ ᑭᖑᕐᖑᑎᔭᐅᕙᒃᑐᓂᑦ ᐱᐅᓂᕐᐹᒥᒃ. ᐊᑖᑕᒥᒡᓗ ᑍᔭᐅᕙᖕᓂᐊᕈᒪᓪᓗᖓ, ᖁᔭᓈᕐᑕᐅᓂᐊᕋᓱᒋᓇᖓᓗ.

²⁰ ᐊᕐᓇᑎᑐᓪᓕ ᐊᓯᓐᓂᐊᕐᑐᑐᑦ ᐅᐃᒥᓂᒃ, ᐃᓴᕆᐊᓕᒥᐅᑦ ᐊᓯᓐᓂᐊᓚᐅᕐᐹᖓ,” ᐊᑕᓂᖅ ᐅᖃᕐᐳᖅ.

²¹ ᕿᐊᕙᓗᖕᓂᒃ ᑐᓴᕐᓴᐅᔪᖃᕐᐳᖅ ᐱᖑᐃᑦ ᖄᖏᓐᓂ ᓇᐹᕐᑐᖃᖏᓐᓂᕐᒥ. ᑖᒃᑯᐊᖑᕗᑦ ᐃᓴᕆᐊᓕᒥᐅᑦ ᕿᐊᓂᖏᑦ ᕿᓄᓂᖏᓪᓗ ᓈᒻᒪᖏᑦᑐᓕᓚᐅᕐᓂᕐᒥᖕᓄᑦ ᐊᑕᓂᕐᒥᒡᓗ ᒎᑎᒥᖕᓂᒃ ᐳᐃᒍᓚᐅᕐᓂᕐᒥᖕᓄᑦ.

²² ᐅᑎᕆᑦᓯ, ᐊᑕᓂᕐᒥᒃ ᕿᒤᓚᐅᕐᑐᓯ ᑕᕝᕙ ᑲᑕᒃᓯᒪᓂᑦᓯᓐᓂᑦ ᐋᖅᑭᖕᓂᐊᕐᐸᑦᓯ. ᐅᖃᕐᐳᓯ, “ᐅᑎᕈᒪᕗᒍᑦ ᐊᑕᓂᐅᒐᕕᑦ ᒎᑎᒋᔭᕗᑦ.

²³ ᒎᑎᐅᑉ ᐊᓯᐊᓅᕐᓂᕗᑦ ᐱᖑᐃᑦ ᖄᖏᓐᓂ ᖃᖅᑲᓂᓗ ᐃᑲᔪᕐᓯᒪᓐᖏᓚᑦ ᐅᕙᑦᑎᓐᓂᒃ, ᐊᑕᓂᕐᒥ ᒎᑎᑦᑎᓐᓂ ᑭᓯᐊᓂ ᐃᓴᕆᐊᓕᒥᐅᑦ ᐱᐅᓕᔭᐅᕕᒃᓴᖃᕐᐳᑦ.

²⁴ ᒎᑎᓐᖑᐊᓅᕐᓂᑦᑕ ᑲᓐᖑᓇᕐᓂᖓ ᐊᓯᐰᑐᐃᓐᓇᕐᓯᒪᕗᖅ ᓯᕗᓕᕕᓂᑦᑕ ᐱᓇᓱᐊᕐᓂᕕᓂᖏᓐᓂᒃ, ᐃᓅᓱᒃᑐᖁᑎᖏᓐᓂᒃ, ᐆᒪᔪᖁᑎᖏᓐᓂᒡᓗ.

²⁵ ᑲᓐᖑᓱᖕᓂᕐᒧᑦ ᒪᑭᑕᔪᓐᓇᕈᓐᓃᕐᑐᒃᓴᐅᕗᒍᑦ. ᑲᓐᖑᓱᖕᓂᕐᒧᓪᓗ ᐅᓕᒃᑕᐅᔪᒃᓴᐅᕗᒍᑦ ᐊᔪᕐᑐᓕᓯᒪᒐᑦᑕ ᐊᑕᓂᕐᒧᑦ ᒎᑎᑦᑎᓐᓄᑦ ᑕᒪᑦᑕ ᐅᕙᒍᓪᓗ, ᓯᕗᓕᕗᓪᓗ ᐃᓅᓱᒃᑑᓂᑦᑎᓐᓂᑦ ᐅᓪᓗᒥᒧᑦ ᑎᑭᓪᓗᒍ, ᐊᑕᓂᖅ ᒎᑎᕗᑦ ᓈᓚᓚᐅᖏᓐᓇᑦᑎᒍ.”