ᔨᕆᒤᐊᐅᑉ ᐊᒡᓚᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᐅᑉ ᑎᑎᕋᕐᑕᖏᑦ ᔫᑎᓄᑦ ᐹᐱᓘᓂᒦᑦᑐᓄᑦ

¹ ᐅᑯᐊ ᑕᕝᕙ ᔨᕆᒤᐊᐅᑉ ᒎᑎᐅᑉ ᐅᖃᕐᑎᖓᑕ ᑎᑎᕋᖏᑦ ᔨᕉᓴᓕᒥᑦ ᐊᐅᓪᓚᕐᑎᑕᐅᓯᒪᔪᑦ ᐊᖓᔪᖅᑳᖏᑕ ᐊᒥᐊᒃᑯᖏᓐᓄᑦ, ᑐᓂᕐᕈᓯᕐᑎᑦᓯᔨᓄᓪᓗ, ᒎᑎᒧᓪᓗ ᐅᖃᕐᑎᒋᔭᐅᔪᓄᑦ, ᐃᓄᖕᓄᓪᓗ ᓂᐱᑯᓁᓴᒧᑦ ᐊᐅᓪᓚᕈᑦᔭᐅᓯᒪᔪᓄᑦ ᔨᕉᓴᓕᒥᑦ ᐹᐱᓘᓂᒧᑦ.

² ᑖᒃᑯᐊ ᑎᑎᕋᓚᐅᕐᐰᑦ ᐊᖓᔪᖅᑳᕐᔪᐊᖅ ᔨᑯᓁᐊ ᓄᓕᐊᖓᑕᓗ ᐊᓈᓇᖓ ᐊᖓᔪᖅᑳᖁᑎᖏᓪᓗ ᔫᑕᒥ ᔨᕉᓴᓕᒥᓗ ᓯᕗᓕᕐᑎᐅᔪᑦ, ᕿᔪᓕᕆᔩᑦ, ᓴᕕᕋᔭᓕᕆᔩᓪᓗ ᔨᕉᓴᓕᒥᑦ ᐊᐅᓪᓚᕈᑦᔭᐅᓯᒪᓕᕐᑎᓪᓗᒋᑦ.

³ ᑎᑎᕋᕐᑕᓂᓗ ᑐᓂᕔᑦ ᐃᓖᓴᒧᑦ ᓴᕙᓂᐅᑉ ᐃᕐᓂᖓᓄᑦ ᔨᒪᕅᐊᒧᓪᓗ ᕼᐃᓪᑬᐊᐅᑉ ᐃᕐᓂᖓᓄᑦ, ᑖᑦᓱᒪᓗ ᔨᑎᑬᐊᒧᑦ ᑐᓂᕔᑦ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᑖᑦᓱᒪᓗ ᐊᐅᓪᓚᕐᑎᑕᐅᑎᑉᐰᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᑖᒃᑯᐊᓗ ᐃᒫᒃ ᐅᖃᐅᓯᖃᕐᐳᑦ:

⁴ “ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᑍᒃᑯᓄᖓ ᐊᐅᓪᓚᕈᑦᔭᐅᑎᓚᐅᕐᑕᓐᓄᑦ ᔨᕉᓴᓕᒥᑦ ᐹᐱᓘᓂᒧᑦ.

⁵ ‘ᓄᓇᖃᑐᖃᕐᓂᐊᕐᑐᑎᑐᑦ ᐃᒡᓗᓕᐅᓕᕆᑦᓯ ᐊᖏᕐᕋᒃᓴᑦᓯᓐᓂᒃ, ᐱᕈᕐᓰᕕᒃᑖᕐᑐᕐᓗᓯᓗ ᓂᕿᖃᕐᕕᒃᓴᑦᓯᓐᓂᒃ.

⁶ ᐂᑉᐸᕐᑖᕐᑐᕆᑦᓯ ᕿᑐᕐᖓᕐᑖᕐᓂᐊᕋᑦᓯ, ᕿᑐᕐᖓᓯᓗ ᐂᑉᐸᕐᑖᕐᑎᓪᓗᓯᐅᒃ ᕿᑐᕐᖓᕐᑖᖁᓪᓗᒋᑦᑕᐅᖅ, ᐅᓄᕐᓯᕙᓪᓕᐊᖁᓪᓗᓯ ᓄᖑᑉᐸᓪᓕᐊᖏᓪᓗᓯ.

⁷ ᐃᓅᖃᑎᒌᑦᓯᐊᕋᓱᐊᕐᓯᒋᒃ ᐱᕙᓪᓕᐊᖃᑎᒋᑦᓯᐊᕋᓱᐊᕐᓗᒋᓪᓗ ᓄᓇᖃᑎᑖᕆᓚᐅᕐᑕᓯ ᐊᐅᓪᓚᕐᑎᑕᐅᕕᑦᓯᓐᓄᑦ, ᐊᑕᓂᕐᒧᑦ ᑐᒃᓯᐊᕈᑎᒋᖃᑦᑕᕐᓗᒍ, ᐱᔪᓐᓇᕐᓯᑦᓯᐊᕐᐸᑕᓗ ᐱᔪᓐᓇᕐᓯᑦᓯᐊᕐᓂᐊᕆᕗᓯ.

⁸ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐃᒫᒃ ᐅᖃᕐᐳᖅ, ᒎᑎᒧᑦ ᐅᖃᕐᑎᒋᔭᐅᔪᓄᑦ ᓯᓔᕐᕆᔭᐅᑦᑍᓕᒋᑦᓯ, ᐅᕝᕙᓘᓐᓃᑦ ᓯᕗᓂᒃᓴᒥᒃ ᖃᐅᔨᒪᓇᓱᐊᕐᑎᓄᑦ, ᓯᓐᓇᒃᑐᖏᓪᓗ ᐅᒃᐱᕆᑦᑍᓕᓯᒋᒃ.

⁹ ᓇᓚᐅᑦᑍᓂᖏᑦ ᐊᑎᓐᓂ ᓱᓕᖏᒻᒪᑕ, ᑖᒃᑯᐊ ᑎᓕᓯᒪᖏᓐᓇᒃᑭᑦ ᑍᒤᓕᐅᖁᓪᓗᒋᑦ. ᐊᑕᓂᖅ ᐅᖃᕐᐳᖅ.’

¹⁰ ᐃᒫᒡᓕ ᐊᑕᓂᖅ ᐅᖃᕐᐳᖅ, ‘ᐊᕐᕌᒍᐃᑦ 70 ᐹᐱᓘᓂᒦᓐᓂᓯ ᓈᒻᒪᒃᓯᒃᐸᑕ ᑕᕝᕙ ᐅᐸᒍᒫᕐᐸᑦᓯ ᐊᖏᕐᓂᕆᓚᐅᕐᑕᕋᓗ ᐃᓕᑦᓯᓐᓄᑦ ᐊᑑᑎᑎᑦᓱᒫᕐᐸᕋ ᐅᑎᕐᑎᓪᓗᓯᓗ ᑕᒪᐅᖓ.

¹¹ ᐃᓱᒪᒋᓯᒪᓪᓗᒋᑦ ᐋᖅᑭᒃᓱᐃᑦᔪᑎᒋᓯᒪᔭᒃᑲ ᐃᓕᑦᓯᓐᓄᑦ ᖃᐅᔨᒪᒐᒃᑭᑦ, ᐊᑕᓂᖅ ᐅᖃᕐᐳᖅ, ᐃᓕᑦᓯᓐᓂᒃ ᐱᔪᓐᓇᕐᓯᑎᑦᓯᔪᒪᓯᒪᓂᕋ, ᐊᓯᕈᐃᔪᒪᓗᖓᐅᖏᑦᑐᖅ ᐋᖅᑭᒃᓱᐃᓯᒪᒐᒪ ᓂᕆᐅᒋᔭᒃᓴᖃᖁᓪᓗᓯ ᓯᕗᓂᒃᓴᖃᖁᓪᓗᓯᓗ.

¹² ᕿᓄᒍᑦᓯ ᐅᕙᓐᓄᓪᓗ ᑐᒃᓯᐊᕈᑦᓯ ᑐᓴᕐᓂᐊᕐᐸᑦᓯ.

¹³ ᕿᓂᕈᑦᓯᓐᖓ ᓇᓂᓂᐊᕐᐸᑦᓯᓐᖓ ᐃᓗᖏᕐᓱᕐᓗᓯ ᕿᓂᓕᕈᑦᓯᓐᖓ ᓇᓂᓂᐊᕐᐸᑦᓯᓐᖓ.

¹⁴ ᐃᓕᑦᓯᓐᓄᑦ ᓇᓂᔭᐅᔪᓐᓇᕐᐳᖓ, ᐊᑕᓂᖅ ᐅᖃᕐᐳᖅ, ᐅᑎᕐᑎᓐᓂᐊᕐᐸᑦᓯᓗ ᑎᒍᔭᐅᓯᒪᕕᒋᓚᐅᕐᑕᑦᓯᓐᓂᑦ, ᐃᓅᖃᑎᒌᒡᔪᐊᓕᒫᓂᑦ ᓇᑭᑐᐃᓐᓇᖅ ᑲᑎᕐᓱᕐᓂᐊᕐᐸᑦᓯ ᐊᐅᓪᓚᕐᑎᑕᐅᕕᒋᓯᒪᓚᐅᕐᑕᑦᓯᓐᓂᑦ, ᐊᑕᓂᖅ ᐅᖃᕐᐳᖅ, ᐊᐅᓪᓚᕐᑎᑕᐅᕕᒋᓚᐅᕐᑕᑦᓯᓐᓂᑦ ᓄᓇᒋᓐᖏᑕᑦᓯᓐᓄᑦ, ᐅᑎᕐᑎᑦᓱᒫᕆᕙᑦᓯ ᓄᓇᑦᓯᓐᓄᑦ.’

¹⁵ ᐅᖃᕋᓗᐊᕈᑦᓯ, ᐊᑕᓂᐅᑉ ᐅᖃᕐᑎᒥᓂᒃ ᑎᓕᓯᕕᒋᓯᒪᓕᕐᐹᑎᒍᑦ ᐹᐱᓘᓂᒥᑦ.

¹⁶ ᐃᒫᒃ ᐊᑕᓂᖅ ᐅᖃᕐᓯᒪᕗᖅ ᑍᕕᑎᐅᑉ ᐊᖓᔪᖅᑲᐅᕕᖓᓂ ᐊᖓᔪᖅᑳᕐᔪᐊᖑᔪᒧᑦ ᐃᓄᖕᓄᓪᓗ ᓄᓇᒥ ᑕᕝᕙᓃᑦᑐᓄᑦ ᐊᐅᓪᓚᕈᑦᔭᐅᓚᐅᕐᓯᒪᖏᑦᑐᓄᑦ.

¹⁷ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑕᑯᒋᑦ, ᐅᓇᑕᕐᕕᐅᑎᓐᓂᐊᕐᐸᒃᑲ ᑳᖕᓇᕐᑐᕐᔪᐊᒦᑎᓪᓗᒋᓪᓗ, ᐋᓐᓂᐊᓇᕐᑐᖃᕐᑎᑦᓯᕕᒋᓗᒋᓪᓗ ᐱᒋᓕᒃᓴᑎᑐᑦ ᓂᕆᔭᒃᓴᐅᔪᓐᓃᕐᑐᑎᑐᑦ ᑍᒤᑎᑦᓱᒫᕐᐸᒃᑲ.

¹⁸ ᐅᓇᑕᕐᑕᐅᑎᓐᓂᐊᕐᐸᒃᑲ ᑳᖕᓇᕐᑐᕐᔪᐊᖃᕐᑎᑦᓯᓗᖓᓗ ᐋᓐᓂᐊᓇᕐᑐᖃᕐᑎᑦᓯᓂᐊᕐᐳᖓ ᐃᓅᖃᑎᒌᒡᔪᐊᓄᓪᓗ ᑲᑉᐱᐊᓲᑕᐅᓂᐊᕐᐳᑦ ᑕᒪᒃᑯᐊ ᑕᑯᔭᐅᓕᕈᑎᒃ ᑍᒃᑯᓄᖓ ᑎᑭᑎᒃᑯᒃᑭᑦ.

¹⁹ ᐅᖃᐅᓯᓐᓂᒃ ᓈᓚᓚᐅᖏᒻᒪᑕ, ᐊᑕᓂᖅ ᐅᖃᕐᐳᖅ, ᐅᓄᕐᑐᐃᕐᓱᕐᓗᖓ ᐅᖃᕐᑕᐅᖁᔭᓐᓂᒃ ᑐᓴᕐᑎᖃᑦᑕᓚᐅᕋᓗᐊᕋᒃᑭᑦ ᐅᖃᕐᑎᒃᑲ ᐊᖅᑯᑎᒋᓪᓗᒋᑦ, ᐃᓕᑦᓯᑦᑕᐅᖅ ᓈᓚᒍᒪᓚᐅᓐᖏᓚᓯ, ᐊᑕᓂᖅ ᐅᖃᕐᐳᖅ.

²⁰ ᐊᑕᓂᐅᑉ ᐅᖃᐅᓯᖏᑦ ᑐᓴᓕᕐᓯᐅᒃ ᐃᓕᑦᓯ ᐊᐅᓪᓚᕈᑦᔭᐅᓯᒪᔪᓯ ᔨᕉᓴᓕᒥᑦ ᐹᐱᓘᓂᒧᑦ.

²¹ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐂᕼᐊᑉ ᐱᓪᓗᒍ ᑯᓔᐊᐅᑉ ᐃᕐᓂᖓ, ᔨᑎᑬᐊᓗ ᐱᓪᓗᒍ ᒫᓯᐊᐅᑉ ᐃᕐᓂᖓ, ᑖᒃᑯᐊᒃ ᓱᓕᖏᑦᑐᓂᒃ ᐊᑎᓐᓂ ᐅᖃᐅᑦᔪᐃᑲᑦᑕᕐᒪᑎᒃ ᐃᓕᑦᓯᓐᓂᒃ, ᑖᒃᑯᐊᒃ ᑎᒍᔭᐅᑎᓐᓂᐊᕐᐹᒃᑲᒃ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑖᑦᓱᒪᓗ ᑐᖁᑕᐅᑎᑦᓱᒫᕐᐹᒃ ᑕᑯᓐᓇᕐᑎᓪᓗᓯ.

²² ᐃᓄᐃᓪᓗ ᐊᐅᓪᓚᕈᑦᔭᐅᓯᒪᔪᑦ ᔨᕉᓴᓕᒥᑦ ᐹᐱᓘᓂᒧᑦ ᓱᒋᐊᕐᑕᐅᖁᔨᓕᕌᖓᒥᒃ ᐅᖃᕐᐸᖕᓂᐊᕐᐳᑦ, ‘ᐊᑕᓂᐅᑉ ᐱᓂᐊᕐᕕᒋᓕᑎᑦ ᓲᕐᓗ ᔨᑎᑬᐊᒧᑦ ᐂᕼᐊᑉᒧᓪᓗ ᐱᓂᐊᓚᐅᕐᓂᖓᑐᑦ ᐆᒪᑎᓪᓗᒋᒃ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᓄᑦ ᐃᑯᐊᓪᓚᒃᑕᐅᓚᐅᕐᒪᑎᒃ.’

²³ ᐃᓴᕆᐊᓕᒥ ᓈᒻᒪᖏᑦᑐᓂᒃ ᐱᓇᓱᐊᕐᓯᒪᖕᒪᑎᒃ, ᓯᓚᖅᑲᑎᒥ ᓄᓕᐊᖏᓐᓂᒃ ᐊᓯᓐᓂᐊᖃᑦᑕᕐᓯᒪᖕᒪᑎᒃ, ᐊᑎᕋᓗ ᐊᑐᕐᓗᒍ ᓴᒡᓗᓪᓗᑎᒃ ᐅᖃᖃᑦᑕᕐᓯᒪᓪᓗᑎᒃ, ᐅᖃᖁᓗᒋᑦ ᐅᖃᓚᐅᕐᓯᒪᑎᓐᓇᖓ. ᐅᕙᖓ ᖃᐅᔨᒪᒐᒪ, ᖃᐅᔨᓯᒪᔫᓂᐊᕐᐳᖓ ᑖᒃᑯᓂᖓ, ᐊᑕᓂᖅ ᐅᖃᕐᐳᖅ.”

ᓯᒤᐊᐅᑉ ᑎᑎᕋᖏᑦ

²⁴ ᓯᒤᐊ ᐅᖃᐅᑎᒍᒃ ᓂᕼᐃᓚᒥ ᓄᓇᓕᒃ.

²⁵ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓ ᐃᒫᒃ ᐅᖃᕐᐳᖅ, “ᐃᓕᖕᓂᓐᖔᕐᑐᓂᒃ ᓇᖕᒥᓂᖅ ᔨᕉᓴᓕᒥᐅᓄᑦ ᑎᑎᕋᓚᐅᕐᐳᑎᑦ, ᔨᐸᓁᐊ ᒫᓯᐊᐅᑉ ᐃᕐᓂᖓ ᐊᖅᑯᑎᒋᓪᓗᒍ ᑐᓂᕐᕈᓯᕐᑎᑦᓯᔨᐅᔪᖅ, ᑐᓂᕐᕈᓯᕐᑎᑦᓯᔨᐅᖃᑎᖏᓐᓄᓪᓗ ᔨᐸᓁᐊ ᐅᖃᐅᑎᓚᐅᕋᕕᐅᒃ:

²⁶ ᐊᑕᓂᐅᑉ ᑐᓂᕐᕈᓯᕐᑎᑦᓯᔨᓐᖑᕐᑎᑉᐹᑎᑦ ᔨᕼᐅᐃᐊᑕᐅᑉ ᐃᓂᖓᓂ ᑲᒪᔨᒻᒪᕆᐅᓕᖁᓪᓗᑎᑦ ᑐᒃᓯᐊᕐᕕᒡᔪᐊᒥ, ᑍᒤᒻᒪᑦ ᐱᔭᒃᓴᖃᕐᐳᑎᑦ ᐃᓱᒪᖃᑦᓯᐊᖏᑦᑐᑦ ᐅᕝᕙᓘᓐᓃᑦ ᒎᑎᒧᑦ ᐅᖃᕐᑎᒋᔭᐅᓐᖑᐊᕐᑐᑦ ᐊᑦᑐᖏᐅᓯᕐᑕᐅᕙᖁᓪᓗᒋᑦ ᐊᕐᓵᕐᑑᔭᓄᑦ ᖁᖓᓯᕈᓯᕐᑕᐅᓯᒪᓗᑎᒃ ᓴᕕᕋᔭᖕᒥᒃ.

²⁷ ᓱᖕᒪᓪᓕ ᔨᕆᒤᐊ ᐊᓇᑑᑎᒥᐅᖅ ᓱᐊᖏᑉᐱᐅᒃ? ᒎᑎᒧᑦ ᐅᖃᕐᑎᒋᔭᐅᓂᕋᕐᓗᓂ ᐃᓕᑦᓯᓐᓄᐊᓚᐅᕐᑐᖅ?

²⁸ ᐹᐱᓘᓂᒧᑦ ᐅᖃᐅᓯᒃᓴᖃᓚᐅᕐᒪᑦ ᐃᒤᑦᑐᒥᒃ, ᐊᑯᓂ ᑕᐅᕙᓃᓐᓂᐊᕋᑦᓯ ᐃᒡᓗᓕᐅᓕᕆᑦᓯ ᓄᓇᖃᑯᑖᖕᓂᐊᕐᑐᑎᑐᑦ, ᐱᕈᕐᓰᕕᓕᐅᕆᑦᓯ ᓂᕿᒃᓴᖃᕐᕕᒋᓂᐊᕐᑕᑦᓯᓐᓂᒃ.”

²⁹ ᔨᐸᓁᐊᐅᓪᓕ ᑐᓂᕐᕈᓯᕐᑎᑦᓯᔨᐅᑉ ᑎᑎᖅᑲᑦ ᐅᖃᓕᒫᕐᐰᑦ ᔨᕆᒤᐊ ᒎᑎᐅᑉ ᐅᖃᕐᑎᖓ ᑐᓵᑎᓪᓗᒍ.

³⁰ ᑕᕝᕙ ᐊᑕᓂᐅᑉ ᔨᕆᒤᐊ ᐅᖃᕐᕕᒋᕚ:

³¹ “ᐊᐅᓪᓚᕈᑦᔭᐅᓯᒪᔪᓕᒫᑦ ᐅᖃᐅᑎᒃᑭᑦ ᐃᒫᒃ ᐊᑕᓂᖅ ᐅᖃᐅᓯᖃᕐᐳᖅ, ‘ᓯᒤᐊ ᓂᕼᐃᓚᒥ ᓄᓇᓕᒃ ᐱᓪᓗᒍ, ᓯᒤᐊ ᐃᓕᑦᓯᓐᓄᑦ ᐱᔪᒫᕐᑐᒃᓴᓂᒃ ᐅᖃᐅᓯᖃᓚᐅᕐᒪᑦ ᑎᓕᓚᐅᖏᒃᑲᓗᐊᕐᑕᕋ ᑍᒫᒃ ᐅᖃᖁᓗᒍ, ᓱᓕᖏᑦᑐᒥᒃ ᐃᓕᑦᓯᓐᓂᒃ ᐅᒃᐱᓕᕐᑎᑦᓯᖕᒪᑦ.

³² ᐃᒫᒃ ᐊᑕᓂᖅ ᐅᖃᕐᐳᖅ, ᓯᒤᐊ ᓂᕼᐃᓚᒥ ᓱᒋᐊᕐᓂᐊᕐᐸᕋ ᑭᖑᕚᖏᑦ ᐱᖃᓯᐅᑎᓗᒋᑦ, ᐃᓅᖃᑎᒃᓴᖃᕈᓐᓃᕐᓂᐊᕐᐳᖅ ᐃᓚᒋᔭᒥᓂ, ᐱᐅᔪᓂᒡᓗ ᐃᓄᖁᑎᓐᓄᑦ ᐱᓇᓱᐊᕐᓂᕆᔭᒃᑲ ᑕᑯᓂᐊᓐᖏᓔᑦ, ᐊᑕᓂᖅ ᐅᖃᕐᐳᖅ, ᐅᖃᐅᓯᖃᓚᐅᕐᒪᑦ ᐅᕙᓐᓂᒃ ᐊᑭᕋᕐᑐᕐᑐᓂᒃ.’”