ᔨᕆᒤᐊᐅᑉ ᐊᒡᓚᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

ᕼᐊᓇᓁᐊᐅᑉ ᒎᑎᒧᑦ ᐅᖃᕐᑎᒋᔭᐅᓐᖑᐊᕐᓂᖓ

¹ ᐊᕐᕌᒍᒥ ᑕᕝᕙᓂᑦᓮᓐᓇᖅ, ᑕᖅᑮᑦ ᑕᓪᓕᒪᖓᓐᓂ ᐊᕐᕌᒍᐃᑦ ᓯᑕᒪᒋᓕᕐᑕᖓᓐᓂ, ᔨᑎᑬᐊ ᐊᖓᔪᖅᑳᕐᔪᐊᖑᓕᓵᕐᑎᓪᓗᒍ ᔫᑕᒥ, ᐱᔪᖃᓛᕐᑐᒥᒃ ᐅᖃᕐᑎ ᕼᐊᓇᓁᐊ ᐊᔾᔪᕆᐅᑉ ᐃᕐᓂᖓ ᒋᐱᐅᓂᒥᐅᑕᖅ ᐅᕙᓐᓄᑦ ᐅᖃᕐᐳᖅ ᐊᑕᓂᐅᑉ ᐃᒡᓗᖓᓂ ᑐᓂᕐᕈᓯᕐᑎᑦᓯᔩᑦ ᐃᓄᐃᓪᓗ ᑐᓵᑎᓪᓗᒋᑦ,

² “ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᕿᒧᒍᑖ ᕿᔪᒃ ᓯᖁᒥᓐᓂᐊᕐᐸᕋ.

³ ᐊᕐᕌᒎᖕᓂᒃ ᒪᕐᕉᖕᓂᒃ ᐊᑕᓂᐅᑉ ᐃᒡᓗᖓᑕ ᐱᖁᑎᓕᒫᖏᑦ ᐅᑎᕐᑎᑦᓱᒫᕐᐸᒃᑲ ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᐅᓪᓚᕈᑎᓚᐅᕐᑕᖏᑦ ᐹᐱᓘᓂᒧᑦ.

⁴ ᐅᑎᕐᑎᓐᓂᐊᕆᕙᕋᓗ ᔨᑯᓁᐊ ᔨᕼᐅᐃᐊᑭᐅᑉ ᐃᕐᓂᖓ ᔫᑕᒥᐅᑦ ᐊᖓᔪᖅᑳᕐᔪᐊᖓᑦ, ᐊᐅᓪᓚᕈᑦᔭᐅᓯᒪᖃᑕᐅᔪᓕᒫᓪᓗ ᐹᐱᓘᓂᒧᑦ ᐅᑎᕐᑎᒻᒥᓗᒋᑦ ᔫᑕᒧᑦ, ᐊᑕᓂᖅ ᐅᖃᕐᐳᖅ, ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑦᑕ ᐊᓄᓯᒪᐅᑎᖓ ᕿᔪᒃ ᓯᖁᒥᓐᓂᐊᕋᒃᑯ.”

⁵ ᔨᕆᒤᐊᓕ ᒎᑎᐅᑉ ᐅᖃᕐᑎᖓ ᑭᐅᕗᖅ, ᕼᐊᓇᓁᐊᒧᑦ ᑐᓂᕐᕈᓯᕐᑎᑦᓯᔩᑦ ᐃᓄᓕᒫᓪᓗ ᑐᓵᑎᓪᓗᒋᑦ ᑐᒃᓯᐊᕐᕕᒡᔪᐊᕐᒥ.

⁶ ᔨᕆᒤᐊ ᐃᒫᒃ ᐅᖃᕐᓗᓂ, ᐋᒦᓐ! ᐊᑕᓂᖅ ᑍᒤᓕᐅᓚᐅᕐᓕ, ᐊᑕᓂᐅᑦᑐᖅ ᐅᖃᐅᓯᕆᔭᑎᑦ ᓇᓚᐅᑦᓯᑎᓪᓕᒋᑦ ᐅᑎᕐᑎᑦᓯᓗᓂ ᑐᒃᓯᐊᕐᕕᒡᔪᐊᑉ ᐱᖁᑎᓕᒫᖏᓐᓂᒃ; ᐊᐅᓪᓚᕐᑎᑕᐅᓯᒪᔪᕕᓂᓕᒫᓂᒡᓗ ᐹᐱᓘᓂᒧᑦ.

⁷ ᑭᓯᐊᓂ ᐅᖃᐅᑎᔪᒪᕙᒋᑦ ᑐᓵᑎᓪᓗᑎᑦ ᐃᓄᐃᓪᓗ ᑐᓵᑎᓪᓗᒋᑦ.

⁸ ᓯᕗᓂᑦᑎᓐᓂ ᐅᕙᑦᑎᓐᓂᑦ ᒎᑎᒧᑦ ᐅᖃᕐᑎᒋᔭᐅᕙᓚᐅᕐᑐᑦ ᐅᖃᐅᓯᖃᕐᐸᓚᐅᕐᒪᑕ ᐅᓇᑕᕐᓂᕐᑕᖃᓛᕐᑐᒥᒃ, ᖁᐊᕐᓵᖓᓇᕐᑐᖃᓛᕐᑐᓂᒃ, ᐋᓐᓂᐊᓇᕐᑐᖃᓛᕐᑐᓂᒡᓗ ᓄᓇᓕᖕᓄᑦ ᐊᖓᔪᖅᑳᐅᕕᒡᔪᐊᓄᓪᓗ.

⁹ ᒎᑎᒧᓪᓕ ᐅᖃᕐᑎᒋᔭᐅᔪᖅ ᐅᖃᐅᓯᖃᕐᐸᒃᑐᖅ ᓮᒻᒪᕐᑎᑕᐅᔪᒫᕐᓂᕅᓪᓗᓂ ᒎᑎᒥᑦ ᑎᓕᔭᐅᓯᒪᓪᓚᕆᖕᓂᖓ ᓇᓗᓇᕈᓐᓃᕋᔭᕐᐳᖅ ᐅᖃᐅᓯᕆᔭᖏᑕ ᓇᓚᐅᑦᓯᓂᖏᑦ ᓴᖅᑭᓕᕐᐸᑕ ᑭᓯᐊᓂ.

¹⁰ ᕼᐊᓇᓁᐊᐅᓪᓗ ᔨᕆᒤᐊᐅᑉ ᐊᓄᓯᒪᐅᑎᖓ ᕿᔪᒃ ᖁᖓᓯᖓᓂᑦ ᐲᕐᓗᓂᐅᒃ ᓱᕋᒃᐹ.

¹¹ ᐃᓄᐃᓪᓗ ᑐᓵᑎᓪᓗᒋᑦ ᕼᐊᓇᓁᐊᐅᑉ ᐅᖃᐅᑎᕔᑦ, “ᐃᒫᒃ ᐊᑕᓂᖅ ᐅᖃᕐᐳᖅ, ᑍᒫᒃᑕᐅᖅ ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᓄᓯᒪᐅᑎᖓ ᕿᔪᒃ ᓯᖁᑦᑎᕈᒫᕐᐸᕋ ᐃᓅᖃᑎᒌᒡᔪᐊᑦ ᖁᖓᓯᖏᓐᓃᑎᑕᖓ ᐲᕈᒫᕋᒃᑯ ᐊᕐᕌᒎᒃ ᒪᕐᕉᒃ ᐊᑐᕐᑎᓪᓗᒋᒃ.” ᑍᒫᒡᓗ ᐅᖃᕐᑎᓪᓗᒍ ᒎᑎᐅᑉ ᐅᖃᕐᑎᖓ ᔨᕆᒤᐊ ᕿᒪᕉᑎᕗᖅ.

¹² ᕼᐊᓇᓁᐊᐅᓪᓕ ᔨᕆᒤᐊᐅᑉ ᐊᓄᓯᒪᐅᑎᖓ ᕿᔪᒃ ᓱᕋᕋᑖᕐᑎᓪᓗᓂᐅᒃ ᐊᑕᓂᐅᑉ ᔨᕆᒤᐊ ᐅᖃᕐᕕᒋᓕᕐᐹ:

¹³ “ᕼᐊᓇᓁᐊ ᐅᖃᐅᑎᔭᕐᑐᕈᒃ, ᓯᖁᒥᑦᓯᒐᓗᐊᕐᐳᑎᑦ ᐊᓄᓯᒪᐅᑎᒥᒃ ᕿᔪᖕᒥᒃ ᑭᖑᕝᕕᕐᑕᐅᑎᓐᓂᐊᕐᐸᕋᓕ ᐊᓄᓯᒪᐅᑎᒥᒃ ᓴᕕᕋᔭᖕᒥᒃ ᓴᓇᓯᒪᔪᒥᒃ.

¹⁴ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓ ᐅᖃᕐᐳᖅ, ᐃᓅᖃᑎᒌᒡᔪᐊᑦ ᐊᓄᓯᒪᐅᑎᓕᐅᕈᒪᕙᒃᑲ ᓴᕕᕋᔭᖕᒥᒃ ᐱᔨᑦᓯᖁᓪᓗᒋᑦ ᓂᐱᑯᓁᓴᒥᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᑖᑦᓱᒧᖓ ᐊᐅᓚᑕᐅᖁᓪᓗᒋᑦ ᐆᒪᔪᓪᓗᑦᑕᐅᖅ ᐊᒡᓛᑦ ᑖᑦᓱᒧᖓ ᐊᐅᓚᑕᐅᑎᑦᓱᒫᕐᐸᒃᑲ.”

¹⁵ ᔨᕆᒤᐊᐅᑉ ᕼᐊᓇᓁᐊ ᐅᖃᐅᑎᕚ, “ᕼᐊᓇᓁᐊ, ᐊᑕᓂᕐᒧᑦ ᑎᓕᔭᐅᓯᒪᓇᑎᑦ ᐃᓅᖃᑎᒌᒡᔪᐊᓂᒃ ᓱᓕᖏᑦᑐᒥᒃ ᐅᒃᐱᕆᔭᐅᓕᕐᑎᑦᓯᒐᕕᑦ.”

¹⁶ ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ, “ᑕᑯᒋᑦ, ᓄᓇᕐᔪᐊᒥᑦ ᐃᒋᓐᓂᐊᕐᐸᒋᑦ, ᐊᕐᕌᒍᒥ ᑕᕝᕙᓂ ᑐᖁᔪᒫᕐᐳᑎᑦ ᐊᔪᕆᕐᑐᐃᓯᒪᒐᕕᑦ ᒎᑎᒥᒃ ᐊᑭᕋᕐᑐᕐᑐᓂᒃ.”

¹⁷ ᑕᖅᑮᑦ 7ᖓᓐᓂ ᐊᕐᕌᒍᒥ ᑕᕝᕙᓂᑦᓮᓐᓇᖅ, ᓇᓚᐅᑦᑍᔪᖅ ᕼᐊᓇᓁᐊ ᑐᖁᕗᖅ.