ᔨᕆᒤᐊᐅᑉ ᐊᒡᓚᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑭᕋᕐᑐᕐᑏᑦ ᑎᑭᓐᓂᖏᑦ ᐅᓐᓄᐊᓪᓗᐊᑉ ᓇᓛᓂᑦ

¹ ᐊᑕᓂᐅᑉ ᐅᖃᕐᕕᒋᕚ ᔨᕆᒤᐊ ᔫᑕᒥᐅᓕᒫᑦ ᐱᑦᔪᑎᒋᓪᓗᒋᑦ, ᐊᕐᕌᒍᐃᑦ ᔨᕼᐅᐃᐊᑭᒻ ᔫᓮᐊᐅᑉ ᐃᕐᓂᖓᑕ ᐊᖓᔪᖅᑳᕐᔪᐊᕆᔭᐅᓂᖓᑕ ᔫᑕᒥ ᓯᑕᒪᒋᓕᕐᑕᖓᓂ, ᓂᐱᑯᓁᓴ ᐊᕐᕌᒍᓕᒫᒥᒃ ᐊᖓᔪᖅᑳᕐᔪᐊᕆᔭᐅᓕᕐᑎᓪᓗᒍ ᐹᐱᓘᓂᒥᐅᓄᑦ.

² ᔨᕆᒤᐊ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᐅᖃᓪᓚᓚᐅᕐᐳᖅ ᔫᑕᒥᐅᓕᒫᓄᑦ ᔨᕉᓴᓕᒦᑦᑐᓕᒫᓄᓪᓗ:

³ “ᐊᕐᕌᒍᓂᒃ 23ᓂᒃ, ᔫᓮᐊᐅᑉ ᐋᒪᓐ ᐃᕐᓂᖓᑕ ᐊᖓᔪᖅᑳᕐᔪᐊᖑᓂᖓᑕ 13ᒋᓕᕐᑕᖓᓐᓂᑦ ᐱᒋᐊᕐᓗᒍ ᐅᓪᓗᒥᒧᑦ ᑎᑭᓪᓗᒍ ᐊᑕᓂᐅᑉ ᐅᖃᕐᑕᖏᓐᓂᒃ ᐅᕙᓐᓄᑦ ᐅᖃᕐᕕᒋᖃᑦᑕᕐᓯᒪᕙᑦᓯ ᐅᓄᕐᑐᐃᓱᕐᓗᖓ, ᓈᓚᓚᐅᕐᓯᒪᓐᖏᓚᓯᓕ.

⁴ ᐊᑕᓂᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᒥᓂᒃ ᑎᓕᓯᕕᒋᖃᑦᑕᓚᐅᕐᐹᓯ ᐅᓄᕐᑐᐃᕐᓱᕐᓗᓂ, ᑐᓴᕈᓐᓇᓚᐅᓐᖏᓚᓯᓕ ᓈᓚᓚᐅᕐᓇᒋᓪᓗ.

⁵ ᐅᖃᖃᑦᑕᓚᐅᕐᐳᓪᓗ, ‘ᓵᒋᐊᓕᕆᑦᓯ, ᑕᒪᑦᓯ ᐊᑐᓂᑦ, ᐱᐅᖏᑦᑐᓕᓂᑦᓯᓐᓂᑦ ᐱᓂᐊᕐᓂᕆᔭᑦᓯᓐᓂᓪᓗ ᓈᒻᒪᖏᑦᑐᓂᑦ ᓄᓇᖃᑯᑖᒍᓐᓇᕐᓂᐊᕋᑦᓯ ᐊᑕᓂᐅᑉ ᓄᓇᑖᕆᔭᐅᑎᓯᒪᔭᖓᓂᒃ ᐃᓕᑦᓯᓐᓄᑦ ᓯᕗᓕᑦᓯᓐᓄᓪᓗ ᑍᑦᓱᒪᓂᐊᓗᖕᒥᑦ ᐃᓱᖃᖏᑦᑐᒧᑦ.

⁶ ᒎᑎᓐᖑᐊᓄᑦ ᓴᖑᕕᖃᕐᑍᓕᓗᓯ ᑭᒡᒐᕐᑐᕈᒪᓗᒋᑦ ᑐᒃᓯᐊᕐᕕᒋᖃᑦᑕᕈᒪᓗᒋᓪᓘᓐᓃᑦ, ᓂᓐᖓᒃᓴᕐᑍᓕᓯᓐᖓ ᓴᓇᔭᕕᓂᑦᓯᓐᓄᑦ ᑕᕝᕙ ᐊᓯᕈᕐᑕᐅᓇᕐᑐᒧᑦ ᓱᒋᐊᕐᓂᐊᓐᖏᓚᑦᓯ.’

⁷ ᑭᓯᐊᓂᓕ ᓈᓚᒍᒪᓚᐅᓐᖏᓚᓯ ᐊᑕᓂᖅ ᐅᖃᕐᐳᖅ, ‘ᐊᑲᐅᒋᓐᖏᑕᓐᓂᒃ ᐱᓂᐊᕐᓯᒪᕗᓯ ᓴᓇᔭᑦᓯᒍᑦ ᐊᓯᕈᕐᑕᐅᓇᕐᑐᒧᓪᓗ ᐃᓕᑦᓯᓐᓂᒃ ᑎᑭᑎᓯᒪᕗᓯ.’

⁸ “ᑍᒤᒻᒪᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ, ‘ᓈᓚᓚᐅᖏᓐᓂᓯ ᐅᖃᐅᓯᕐᓂᒃ ᐱᑦᔪᑎᒋᓪᓗᒍ.

⁹ ᑕᑯᒋᑦ, ᐅᓐᓄᐊᓪᓗᐊᑉ ᓇᓛᓃᑦᑐᑦ ᐃᓄᓕᒫᖏᓐᓂᒃ ᑎᓕᓯᓂᐊᕐᐳᖓ, ᑭᒡᒐᓐᓂᒡᓗ ᓂᐱᑯᓁᓴᒥᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ, ᐊᑕᓂᖅ ᐅᖃᕐᐳᖅ, ᐅᓇᑕᕆᐊᕐᑎᓐᓂᐊᕐᐸᒃᑲᓗ ᓄᓇᒧᑦ ᑕᒪᐅᖓ ᐃᓅᖃᑎᒌᒡᔪᐊᓄᑦ, ᓄᓇᓕᐅᖃᑎᒋᔭᓕᒫᓯᓗ ᐊᓯᕈᕐᑕᐅᑎᓐᓂᐊᕐᐸᒃᑲ ᑲᑉᐱᐊᓲᑎᒃᓴᓐᖑᕐᑎᓪᓗᒋᓪᓗ ᐋᖅᑭᒃᑕᐅᒃᑲᓐᓂᕐᓂᐊᕈᓐᓃᕐᑐᒥᒃ ᓄᓇᓕᕕᓂᑐᐃᓐᓇᐅᓕᕐᑎᓐᓂᐊᕐᐸᕋ.

¹⁰ ᖁᕕᐊᓱᒃᕙᓗᒃᑐᑦ ᑐᓴᕐᑕᐅᕙᒍᓐᓃᕈᒫᕐᐳᑦ, ᑲᑎᑎᑕᐅᕋᑖᕐᑐᑦ ᓄᓕᐊᓂᒃᑐᑦ ᐅᐃᓂᒃᑐᓪᓗ ᓂᐱᖏᑕ ᑲᑦᔮᕐᓇᕐᓂᖏᑦ ᐊᓯᐅᓗᑎᒃ, ᓯᖃᓪᓕᑦᓯᕖᓪᓗ ᓯᖃᓪᓕᑦᓯᕙᓪᓛᓂᖏᑦ ᓇᓂᕈᐊᓪᓗ ᖃᐅᒪᓂᓕᒫᖏᑦ ᐱᑕᖃᕈᓐᓃᕈᒫᕐᐳᑦ.

¹¹ ᑕᒪᓐᓇ ᓄᓇᓕᒫᖅ ᓯᖁᑦᑎᕐᓯᒪᓕᕈᒫᕐᐳᖅ ᐊᑐᕐᑐᒃᓴᐅᔪᓐᓃᕐᓗᓂ, ᑖᒃᑯᐊᓗ ᐃᓅᖃᑎᒌᒡᔪᐊᑦ ᐊᐅᓚᑕᐅᓕᕈᒫᕐᐳᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐊᕐᕌᒍᓂᒃ 70ᓂᒃ.

¹² ᐊᕐᕌᒍᓪᓕ 70 ᓈᒃᐸᑕ, ᐊᑭᓂᐊᕕᒋᔪᒫᕐᐹᕋ ᐹᐱᓘᓂᐅᑉ ᐊᖓᔪᖅᑳᕐᔪᐊᖓ ᐃᓄᖁᑎᖏᓪᓗ ᑲᐅᓪᑎᐊᒥᐅᑦ, ᓄᓇᖓᓪᓗ ᐸᓯᔭᒃᓴᐅᓂᖏᑦ ᐱᑦᔪᑎᒋᓗᒋᑦ ᐊᑕᓂᖅ ᐅᖃᕐᐳᖅ, ᓱᓇᑕᖃᕈᓐᓃᕈᒫᕐᐳᕐᓗ ᐃᓱᖃᖏᑦᑐᒧᑦ.

¹³ ᓇᓪᓕᐅᑎᑎᑦᓱᒫᕐᐸᒃᑲᓗ ᓄᓇᓕᖕᓄᑦ ᑖᒃᑯᓄᖓ ᓇᓪᓕᐅᑎᔪᒫᕐᓂᕋᒃᓗᒋᑦ ᐅᖃᕐᓯᒪᔭᒃᑲ ᐊᒡᓚᖕᓂ ᑖᒃᑯᓇᓂ ᑎᑎᕋᕐᑕᐅᓯᒪᔪᑦ ᔨᕆᒤᐊᐅᑉ ᐅᖃᕐᑎᒪ ᓇᓚᐅᑦᑍᑦᔪᑎᒋᓯᒪᔭᖏᑦ ᐃᓅᖃᑎᒌᒡᔪᐊᓕᒫᓄᑦ.

¹⁴ ᑖᒃᑯᐊᑦᑕᐅᖅ ᐃᓅᖃᑎᒌᒡᔪᐊᓄᑦ ᐊᖓᔪᖅᑳᕐᔪᐊᓄᓪᓗ ᐱᔪᓐᓇᕐᑐᕐᔪᐊᓄᑦ ᑎᒍᔭᐅᔪᒫᕐᒥᖕᒪᑕ. ᐱᓂᐊᕐᓂᖏᑦ ᓴᓇᔭᖏᓪᓗ ᒪᓕᒡᓗᒋᑦ ᐊᑭᓂᐊᕐᕕᒋᔪᒫᕋᒃᑭᑦ.’”

ᒎᑎᐅᑉ ᐃᖅᑲᕐᑐᐃᓂᖓ ᐃᓅᖃᑎᒌᒡᔪᐊᓂᒃ

¹⁵ ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᕙᓐᓄᑦ ᐅᖃᕐᐳᖅ, “ᖃᓪᓗᑎ ᐊᒡᒐᖕᓃᑦᑐᖅ ᓂᓐᖓᕕᒡᔪᐊᕐᓯᒪᓂᓐᓂᒃ ᐃᒪᖃᕐᑐᖅ ᑎᒍᓗᒍ ᑎᓕᓯᕕᒋᔭᓕᒫᓐᓄᑦ ᐃᓅᖃᑎᒌᒡᔪᐊᓄᑦ ᐃᒥᕐᑕᐅᑎᑦᔪᒃ.

¹⁶ ᐃᒥᕈᓂᑦᔪᒃ ᓄᑭᖃᑦᓯᐊᕈᓐᓃᕐᓂᐊᕐᐳᑦ ᑐᑮᕈᑎᓗᑎᒡᓗ ᐅᓇᑕᕐᑕᐅᑎᓐᓂᐊᕋᑭᑦ.”

¹⁷ ᖃᓪᓗᑎᓗ ᑎᒍᓪᓗᒍ ᐊᑕᓂᐅᑉ ᐊᒡᒐᖏᓐᓂᑦ, ᐃᓅᖃᑎᒌᒡᔪᐊᓄᑦ ᑎᓕᓯᕕᒋᔭᖏᓐᓄᑦ ᐃᒥᕐᑕᐅᑎᓚᐅᕐᐸᕋ.

¹⁸ ᔨᕉᓴᓕᒧᑦ ᔫᑕᐅᓪᓗ ᓄᓇᓕᖏᓐᓄᑦ ᐊᖓᔪᖅᑳᕐᔪᐊᖏᓐᓄᑦ ᐊᖓᔪᖅᑳᖁᑎᖏᓐᓄᓪᓗ ᐊᓯᕈᕈᑎᒃᓴᐅᖁᓪᓗᒍ ᑲᑉᐱᐊᒋᔭᐅᑦᔪᑎᒃᓴᐅᓕᖁᓪᓗᒍᓗ ᐱᐅᒋᔭᐅᖏᑦᔪᑎᒃᓴᓐᖑᖁᓪᓗᒍᓗ ᐅᓪᓗᒥᒧᑦ ᑍᒤᒻᒪᑕ.

¹⁹ ᐅᑯᐊ ᑕᕝᕙ ᓇᓗᓁᕐᓯᒪᔪᑦ ᑕᕝᕙᓐᖓᑦ ᐃᒥᐅᑎᒥᑦ ᐃᒥᕆᐊᖃᕐᑐᑦ: ᐰᕉ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ, ᑲᒪᔨᖁᑎᖏᓪᓗ ᐊᖓᔪᖅᑳᖁᑎᖏᓪᓗ, ᐃᓄᖁᑎᖏᓪᓗ.

²⁰ ᓄᓇᓕᑐᖃᐅᖏᑦᑐᓪᓗ ᑍᑲᓃᑦᑐᑦ; ᐊᖓᔪᖅᑳᕐᔪᐊᓕᒫᓪᓗ ᓄᓇᒥ ᐅᔾᒥ; ᐊᖓᔪᖅᑳᕐᔪᐊᓕᒫᑦ ᐱᓕᔅᑍᓂᒥ ᐅᑯᓇᓂ, (ᐊᓯᑭᓗᓂᒥ, ᒑᓴᒥ, ᐃᑯᕋᓂ, ᐃᓄᐃᓪᓗ ᐊᒥᐊᒃᑰᓯᒪᔪᑦ ᐋᔅᑖᑦᒥ.)

²¹ ᐄᑐᒥᐅᑦ, ᒧᐊᐱᒥᐅᑦ, ᐋᒪᒥᐅᓪᓗ.

²² ᐊᖓᔪᖅᑳᕐᔪᐊᕆᔭᐅᔪᓕᒫᑦ ᑍᕆᒥ, ᓮᑐᓂᒥᓗ, ᐊᖓᔪᖅᑳᕐᔪᐊᓕᒫᑦ ᑕᕆᐅᕌᓗᑉ ᓯᒃᔭᖓᓃᑦᑐᓂ.

²³ ᑎᑖᓂᒥᐅᑦ, ᑏᒪᒥᐅᑦ, ᐳᔾᒥᐅᓪᓗ ᑖᒃᑯᐊᓗ ᐅᖓᓯᒋᔭᖓᓂ ᓄᓇᖃᐅᕐᑐᑦ.

²⁴ ᐊᕋᐱᐊᒥᐅᓪᓗ ᐊᖓᔪᖅᑳᕐᔪᐊᓕᒫᖏᑦ, ᓱᓇᖃᔪᐃᑦᑐᒥᓗ ᓄᓇᖃᕐᑐᑦ ᐊᖓᔪᖅᑳᕐᔪᐊᖏᑦ.

²⁵ ᔨᒻᕆᒥᐅᑦ ᐊᖓᔪᖅᑳᕐᔪᐊᓕᒫᖏᑦ, ᐃᓛᒥᐅᓪᓗ ᒥᑎᐊᒥᐅᓪᓗ.

²⁶ ᐅᓐᓄᐊᓪᓗᐊᓪᓗ ᓇᓛᓂᑦᑐᑦ ᐊᖓᔪᖅᑳᕐᔪᐊᓕᒫᖏᑦ, ᖃᓂᑦᑐᒦᑦᑐᑦ ᐅᖓᓯᒃᑐᒦᑦᑐᓪᓗ. ᓄᓇᕐᔪᐊᕐᒥᐅᓕᒫᑦ ᐊᖓᔪᖅᑲᐅᕕᒃᔪᐊᖏᑦ ᑖᒃᑯᐊᓕᒫᑦ, ᓯᓵᒃᒥᐅᑦ ᐊᖓᔪᖅᑳᕐᔪᐊᖓᑦ ᐃᓚᒋᔭᐅᓗᓂ ᑖᑦᓱᒥᖓ ᐃᒥᕐᑐᒃᓴᐅᕗᑦ.

²⁷ ᐅᖃᐅᑎᓪᓗᒋᓪᓗ, “ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᐃᒥᓕᕆᑦᓯ ᐋᖓᔮᕐᓗᓯ ᒥᕆᐊᖃᑦᑕᕐᓗᓯᓗ, ᐅᕐᕈᓗᓯᓗ ᒪᑭᒃᑲᓐᓂᕐᓂᐊᕈᓐᓃᕐᓗᓯ ᐃᓕᑦᓯᓐᓂᒃ ᑐᖁᕅᔭᕐᑐᕐᑐᓂᒃ ᑎᑭᑎᑦᓯᓂᐊᕋᒪ.

²⁸ ᖃᓪᓗᑎᒥᑦ ᑎᒍᒥᐊᕐᑕᓐᓂᒃ ᐃᒥᕈᒪᖏᑉᐸᑕ, ᐅᖃᐅᑎᔭᒃᓴᕆᕙᑎᑦ, ‘ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᑕᕝᕙᓐᖓᑦ ᐃᒥᕐᑐᒃᓴᐅᕗᓯ.

²⁹ ᑕᑯᓕᕆᑦᓯ, ᐃᒡᓗᒐᓴᒡᔪᐊᖁᑎᒪ ᐊᓯᕈᕐᑕᐅᑦᔪᑎᒃᓴᖓᓂᒃ ᑎᑭᑎᑦᓯᕙᓪᓕᐊᓕᕐᐳᖓ, ᓱᒋᐊᕐᑕᐅᓂᐊᕋᓱᒋᖏᑉᐱᓰ? ᓱᒋᐊᕐᑕᐅᖏᑦᑑᓂᐊᓐᖏᓚᓯ, ᑐᖁᕋᕐᑕᐅᑦᔪᑎᒃᓴᓯᓐᓂᒃ ᑎᑭᑎᑦᓯᓂᐊᕋᒪ ᐃᓅᔪᓕᒫᓄᑦ ᓄᓇᒥ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.’

³⁰ “ᐅᖃᐅᓯᕆᔭᐅᖁᔭᓐᓂᒃ ᐅᖃᐅᓯᖃᕆᐊᕐᑐᓕᕆᑦ ᐅᖃᐅᑎᓗᒋᓪᓗ, ‘ᐊᑕᓂᖅ ᓂᓪᓕᐊᓕᕐᐳᖅ ᖁᑦᓯᒃᑐᒥᑦ, ᐃᓂᒋᔭᒥᓂᑦ ᐃᑦᔪᕐᓁᑦᑐᒥᑦ ᓂᐱᖓ ᑐᓴᕐᓴᐅᕗᖅ, ᓂᐱᕐᔪᐊᒧᓪᓗ ᓱᐊᖕᓂᐊᕐᐳᖅ ᓄᓇᖃᕐᑐᓄᑦ ᑕᒫᓂ, ᕾᒐᓛᕐᓂᐊᕐᐳᖅ ᐸᐅᕐᖓᓂᒃ ᐃᑦᓰᔧᕝᕕᖕᒦᑦᑐᑎᑐᑦ ᓄᓇᕐᔪᐊᒥ ᐃᓂᖃᕐᑐᓕᒫᑦ ᐊᑭᕋᕐᑐᕐᓗᒋᑦ.

³¹ ᓂᐱᕐᔪᐊᕐᓗ ᑐᓴᕐᑕᐅᔪᒪᕐᐳᖅ ᓄᓇᐅᑉ ᑭᒡᓕᖓᓃᑦᑐᑦ ᑎᑭᓪᓗᒋᑦ ᐊᑕᓂᐅᑉ ᓈᒻᒪᒃᓴᖏᓐᓂᕐᒥᓂᒃ ᐃᓅᖃᑎᒌᒡᔪᐊᓕᒫᓄᑦ ᓴᖅᑭᑎᓐᓂᐊᕐᐹ ᐃᖅᑲᕐᑐᐃᓂᖓᓗ ᐃᓅᖃᑎᒌᓄᑦ ᓄᓇᕐᔪᐊᒥ ᑎᑭᐅᒪᓂᐊᕐᒪᑦ, ᐱᐅᖏᑦᑐᓕᔪᓪᓗ ᑐᖁᑕᐅᑎᓐᓂᐊᕐᒪᒋᑦ, ᐊᑕᓂᖅ ᐅᖃᕐᐳᖅ.’”

³² ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, “ᑕᑯᒋᑦ ᐊᓯᕈᕐᑕᐅᓂᖅ ᓯᐊᒻᒪᕐᐸᓪᓕᐊᓕᕐᐳᖅ, ᐃᓅᖃᑎᒌᒡᔪᐊᓂᑦ ᐃᓅᖃᑎᒌᒡᔪᐊᓄᑦ, ᐊᓄᕆᕐᔪᐊᖅ ᓴᖅᑭᓕᕐᐳᖅ ᓯᓚᕐᔪᐊᑉ ᑭᒡᓕᖓᓂᑦ.

³³ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐊᑕᓂᕐᒧᑦ ᑐᖁᕋᕐᑕᐅᔪᕕᓃᑦ ᓇᓂᑐᐃᓐᓇᖅ ᑕᑯᔭᒃᓴᐅᔪᒫᕐᐳᑦ, ᓄᓇᕐᔪᐊᑉ ᑭᒡᓕᖓᓂᑦ ᑭᒡᓕᖓᓄᑦ. ᐅᒡᒍᐊᕈᑕᐅᔪᒫᓐᖏᓚᑦ ᑲᑎᕐᓱᕐᑕᐅᔪᓐᓇᖏᓪᓗᑎᒃ, ᐃᓗᕕᕐᑕᐅᔪᓐᓇᖏᓪᓗᑎᒡᓗ, ᐊᓇᕐᑎᑐᓪᓕ ᑕᒫᓃᕐᕆᑐᐃᓐᓇᕈᒫᕐᐳᑦ ᒪᓂᖅᑲᒥ.

³⁴ “ᖁᕝᕕᐅᕆᑦᓯ ᕿᐊᓗᓯᓗ, ᐃᓕᑦᓯ ᐰᕐᓯᔨᒋᔭᐅᔪᓯ, ᐊᒃᓴᑳᖃᑦᑕᕐᓗᓯ ᐊᕐᔭᓕᓂᕐᓂ, ᐃᓕᑦᓯ ᓯᕗᓕᕐᑎᒋᔭᐅᔪᓯ ᐃᓄᖁᑎᓐᓄᑦ. ᑐᖁᕋᕐᑕᐅᕕᒃᓴᓯ ᓇᓪᓕᐅᑎᖕᒪᑦ, ᐅᕐᕈᔪᒫᕐᐳᓯ ᓯᖁᑦᑎᕐᓗᓯᓗ ᒪᕐᕋᐅᔭᕐᑎᑐᑦ.

³⁵ ᐰᕐᓯᔨᐅᔪᑦ ᕿᒫᕕᒃᓴᖃᕐᓂᐊᓐᖏᓚᑦ, ᓯᕗᓕᕐᑎᐅᔪᓪᓗ ᐃᓄᖕᓄᑦ ᐊᓐᓇᒡᕕᓴᖃᕐᓂᐊᓐᖏᓚᑦ.

³⁶ ᑐᓴᕐᓯᐅᒃ ᐰᕐᓯᔨᐅᔪᑦ ᕿᐊᕙᓗᖏᑦ, ᓯᕗᓕᕐᑎᐅᔪᓪᓗ ᕿᐊᖓᔭᒃᐸᓚᑦᓯᓂᖏᑦ! ᐊᑕᓂᐅᑉ ᓄᓇᓕᖁᑎᖏᑦ ᐊᓯᕈᕐᑎᒻᒪᒋᑦ.

³⁷ ᓇᑎᕐᓇᔮᓪᓗ ᐃᕕᒃᓱᒑᖃᐅᑦᓯᐊᕐᑐᑦ ᑭᓱᒃᓴᐅᔪᓐᓃᕐᑎᑕᐅᓯᒪᕗᑦ, ᐊᑕᓂᐅᑉ ᓂᓐᖓᕕᒡᔪᐊᕐᓯᒪᓂᕐᒥᓄᑦ ᐱᓇᓱᐊᕐᕕᒋᒪᒋᑦ.

³⁸ ᓔᔭᑎᑐᑦ ᐃᓂᓪᓚᖓᕕᖕᒥᓂᒃ ᕿᒤᔪᑎᑐᑦ; ᓄᓇᖓᑦ ᓱᓇᖃᕈᓐᓃᕈᒫᕐᐳᖅ. ᐅᓇᑕᕐᕕᐅᓯᒪᓂᕐᒥᓄᑦ, ᐅᓇᑕᕆᐊᕐᓯᒪᔪᓄᑦ, ᐊᑕᓂᐅᓪᓗ ᓂᓐᖓᕕᒡᔪᐊᕐᓯᒪᓂᖓᓄᑦ.”