ᔨᕆᒤᐊᐅᑉ ᐊᒡᓚᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᐅᑉ ᐅᖃᐅᓯᖏᑦ ᔫᑕᐅᑉ ᐊᖓᔪᖅᑳᕐᔪᐊᖏᓐᓄᑦ

¹ ᐃᒫᒃ ᐊᑕᓂᖅ ᐅᖃᕐᐳᖅ, “ᔫᑕᐅᑉ ᐊᖓᔪᖅᑳᕐᔪᐊᖓᑦᑕ ᐃᒡᓗᖓᓄᐊᕐᓗᑎᑦ ᐅᑯᓂᖓ ᐅᖃᓪᓚᒡᕕᒋᒃᑭᑦ,

² ᐅᖃᕐᓗᑎᑦ, ‘ᐊᑕᓂᐅᑉ ᐅᖃᐅᓯᖏᑦ ᑐᓴᒃᑭᑦ, ᔫᑕᐅᑉ ᐊᖓᔪᖅᑳᕐᔪᐊᖓ ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓂ ᐊᖓᔪᖅᑳᖑᔪᑎᑦ, ᐊᖓᔪᖅᑳᖁᑎᑎᓪᓗ ᐃᓄᑯᑎᑎᓪᓗ ᑐᓴᖃᑎᒋᓗᒋᑦ ᐃᑎᖃᑦᑕᕐᑐᑦ ᐃᑎᕐᑕᕐᕕᒃᑯᑦ.

³ ᐃᒫᒃ ᐊᑕᓂᖅ ᐅᖃᕐᐳᖅ: ᐊᑦᔨᒌᒃᑎᑦᓯᓂᕐᒥᒃ ᐃᓱᐊᕐᑐᓕᓂᕐᒥᒡᓗ ᐱᓇᓱᐊᕆᑦᓯ, ᓴᐳᑦᔨᓯᒪᓇᓱᐊᕐᐸᒡᓗᓯᓗ ᑎᒡᓕᒡᕕᐅᓯᒪᔪᓂᒃ; ᓄᓇᑦᓯᓐᓂᒥᐅᑕᐅᖏᑦᑐᓂᒡᓗ ᐱᑦᓯᐊᖃᑦᑕᕐᓗᓯ, ᐱᓂᕐᓗᐃᑦᑍᓕᒋᑦᓯ ᐊᑖᑕᖃᖏᑦᑐᓂᒃ ᐅᐃᒡᒐᕐᓂᕐᓂᒡᓗ, ᐸᓯᔭᒃᓴᐅᖏᑦᑐᓂᒡᓗ ᑐᖁᑕᐅᑎᑦᓯᕙᖏᓪᓗᓯ ᑕᒫᓂ ᓄᓇᑦᓯᓐᓂ.

⁴ ᐱᖁᔭᒃᑲ ᑖᒃᑯᐊ ᒪᓕᑦᓯᐊᕈᑦᓯᐅᒃ, ᑕᕝᕙ ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓂ ᐃᒃᓯᕙᐅᑕᕐᔪᐊᖃᕐᑐᑦ, ᐊᖓᔪᖅᑳᖁᑎᖏᓪᓗ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᑎᒍᑦ ᐊᕙᒻᒧᒐᕈᒫᕐᐳᑦ ᕿᒧᒃᓯᐅᑎᒃᑯᑦ ᐊᒃᓴᓗᐊᓕᒃᑯᑦ ᕿᒻᒥᕐᔪᐊᒃᑯᓪᓗ, ᓯᐊᓛᖏᑦ ᐃᓄᖁᑎᖏᓪᓗ ᐃᓚᒋᓗᒋᑦ.

⁵ ᓈᓚᖏᒃᑯᑦᓯᐅᒡᓕ ᑖᒃᑯᐊ, ᐅᖃᕕᒃᓗᓂ ᐃᒻᒥᓄᑦ ᐊᑕᓂᖅ ᐅᖃᕐᐳᖅ, ᐃᒡᓗᒐᓴᒡᔪᐊᑦ ᑖᒃᑯᐊ ᓱᓁᕈᑎᔪᒫᕐᐳᑦ ᓄᓇᓕᕕᓂᑐᐃᓐᓇᐅᓕᕐᓗᑎᒃ.

⁶ “‘ᐃᒫᒃ ᐊᑕᓂᖅ ᐅᖃᕐᒪᑦ ᔫᑕᐅᑉ ᐊᖓᔪᖅᑳᕐᔪᐊᖓᑕ ᐃᒡᓗᖓᓃᑦᑐᓄᑦ: ᑕᑯᒥᓇᕋᓗᐊᕐᐳᑎᑦ ᒋᓕᐊᑎᐅᑉ ᓄᓇᖓᑎᑐᑦ, ᓕᐸᓇᓂᐅᓪᓗ ᖃᖅᑲᖏᑎᑐᑦ, ᓱᓇᖃᔪᐃᑦᑑᑉ ᓄᓇᖓᑐᑦ ᑍᒤᑦᑐᓐᖑᕐᑎᑦᓱᒫᕐᐸᑦᓯ, ᓄᓇᓕᖃᖏᑦᑐᑎᑐᑦ.

⁷ ᐊᓯᕈᐃᔪᒃᓴᓂᒃ ᑎᑭᑎᑦᓯᔪᒫᕋᒪ ᐃᓕᑦᓯᓐᓄᑦ, ᐊᑐᓂᑦ ᐅᓇᑕᐅᑎᖃᑦᓯᐊᕐᑐᓂᒃ; ᑖᒃᑯᐊ ᐅᕐᕈᑎᑦᓯᔪᒫᕐᐳᑦ ᓱᑲᖁᑎᑦᓯᓐᓂᒃ ᓰᑕᕆᓂᒃ ᐱᐅᓂᕐᐹᓂᒃ, ᐃᑯᒪᒧᓪᓗ ᐃᑯᐊᓪᓚᒡᓗᒋᑦ.

⁸ “‘ᐃᓅᖃᑎᒌᒡᔪᐊᓪᓗ ᐊᖅᑯᓵᓕᕈᑎᒃ ᐃᒡᓗᒐᓴᒡᔪᐊᓄᑦ, ᐃᓅᖃᑎᒥᖕᓄᑦ ᐅᖃᕐᐸᓕᕈᒫᕐᐳᑦ, “ᓱᖕᒪᑦ ᐊᑕᓂᐅᑉ ᐃᒡᓗᒐᓴᒡᔪᐊᑦ ᐱᔪᓐᓇᕐᓂᕐᐹᖑᔪᑦ ᑍᒤᓕᐅᓚᐅᕐᐰᑦ?”

⁹ ᑭᐅᔭᐅᔪᒫᕐᐳᓪᓗ, “ᐊᑕᓂᐅᑉ ᒎᑎᒥᑕ ᐊᖏᖃᑎᒌᒍᑎᒋᓯᒪᔭᖓᓂᒃ ᕿᒤᓚᐅᕐᒪᑕ, ᑐᒃᓯᐊᕐᕕᖃᖔᓕᕐᓗᑎᒡᓗ ᐱᔨᑦᓯᖔᓕᕐᓗᑎᒃ ᒎᑎᓐᖑᐊᓂᒃ.”’”

ᔨᕆᒤᐊᐅᑉ ᐅᖃᐅᓯᖃᕐᓂᖓ ᔪᐊᕼᐊᔅᒥᒃ

¹⁰ ᕿᐊᑦᔪᑎᒋᑦᑍᓕᓯᐅᒃ ᑐᖁᖓᔪᖅ, ᕿᒃᓴᐅᑎᒋᓇᒍᓗ, ᕿᐊᑦᔪᑎᖃᖔᕐᑐᒃᓴᐅᕗᓯᓕ ᐊᐅᓪᓚᕈᑦᔭᐅᓯᒪᔪᓂᒃ, ᐅᑎᕐᓂᐊᕈᓐᓁᕐᒪᑕ ᓄᓇᑐᖃᕐᒥᖕᓂᒃ ᑕᑯᓂᐊᕈᓐᓁᕐᒪᑕ.

¹¹ ᐊᑕᓂᖅ ᐃᒫᒃ ᐅᖃᕐᐳᖅ ᓴᓗᒻᒧᑦ ᔫᓮᐊᐅᑉ ᐃᕐᓂᖓᓄᑦ ᔫᑕᐅᑉ ᐊᖓᔪᖅᑳᕐᔪᐊᖓᓄᑦ, “ᑖᓐᓇ ᐊᖓᔪᖅᑳᕐᔪᐊᓐᖑᕈᒫᕐᒪᑦ ᐊᑖᑕᖓᑕ ᐃᓂᖓᓂ, ᐃᓂᒃᓴᒥᓃᑦᓱᒫᓐᖏᓚᕐᓕ ᐊᐅᓪᕈᑦᔭᐅᔪᒫᕐᒪᑦ ᐅᑎᕈᒫᕋᓂᓗ.

¹² ᑐᖁᔪᒫᕐᒪᑦ ᑎᒍᔭᐅᓯᒪᕕᒋᔭᒥᓃᓪᓗᓂ, ᓄᓇᒥᒡᓗ ᑕᒪᑐᒥᖓ ᑕᑯᒃᑲᓐᓂᕈᓐᓇᕐᓯᔪᒫᓐᖏᓚᖅ.”

ᔨᕆᒤᐊᐅᑉ ᐅᖃᐅᑦᔨᓂᖓ ᔨᕼᐅᐃᐊᑭᒻ ᐱᑦᔪᑎᒋᓪᓗᒍ

¹³ “ᑲᑉᐱᐊᓇᕐᑐᒦᑉᐳᖅ ᐃᓱᐊᕐᑐᓕᓂᒃᑰᖏᑦᑐᖅ ᐊᖓᔪᖅᑲᐅᕕᒃᑖᕐᑐᖅ, ᓈᒻᒪᓈᕐᓯᒪᑦᓯᐊᕐᓂᕐᓗ ᐊᑐᕐᓇᒍ, ᐃᒡᓗᓕᐅᕐᑐᕐᓗ ᖁᓕᕇᒥᒃ ᐃᒡᓗᕈᓯᖃᐅᕐᑐᒥᒃ; ᐃᓅᖃᑎᒥᓂᒃ ᓴᓇᑎᑦᓯᓯᒪᔪᖅ ᐊᑭᖃᖏᑦᑐᒥᒃ, ᐊᑭᓖᓚᐅᕋᓂᓗ ᓴᓇᑎᑕᒥᓂᒃ;

¹⁴ ᐅᖃᕐᑐᖅ, ‘ᐊᑭᑐᔪᒃᓴᔭᒥᒃ ᐃᒡᓗᓕᐅᕈᒪᕗᖓ ᐃᒡᓗᒃᓴᓐᓂᒃ, ᐃᒡᓗᐊᕈᓯᖃᕐᑐᒥᒃ ᓂᕈᑐᔪᓂᒃ ᖁᓕᕇᓂᒃ.’ ᐃᒐᓛᖏᑦ ᐊᖏᔫᑕᐅᑎᓪᓗᒋᑦ, ᕿᔪᑦᓯᐊᕙᐅᓂᕐᐹᓂᒃ ᓰᑕᕆᓂᒃ ᑐᓐᖓᕕᖃᕐᑎᑉᐹ ᓴᐅᓂᖃᕐᑎᓪᓗᒍᓗ, ᐊᐅᐸᕐᑐᒥᒡᓗ ᒥᖑᐊᕈᑎᖃᕐᑎᓪᓗᒍ.

¹⁵ ᐊᖓᔪᖅᑳᕐᔪᐊᓐᖑᕈᓐᓇᕐᑐᕆᕖᑦ ᕿᔪᑦᓯᐊᕙᐅᓂᕐᐹᓂᒃ ᓰᑕᕆᓂᒃ ᐊᑐᕐᓂᕐᓄᑦ? ᐊᑖᑕᓯ ᐃᓅᓯᖃᑦᓯᐊᓚᐅᓐᖏᓛᑦ? ᓂᕆᔭᒃᓴᖃᕐᓂᕐᒥᖕᓄᑦ ᓈᒻᒪᒋᓪᓗᒍ ᐊᑐᖁᔭᐅᔪᕐᓗ ᐊᑐᕐᓗᒍ ᐃᓅᓚᐅᐳᑦ.

¹⁶ ᐊᒃᓱᔪᓂᒃ ᐃᑲᔪᕐᑕᐅᔭᕆᐊᓕᖕᓂᒡᓗ ᓴᐳᑦᔨᓯᒪᓂᕐᓴᐅᓚᐅᕐᐳᑦ; ᐱᓇᓱᐊᑦᓯᐊᕋᒥᒃ ᓈᒻᒪᑦᓯᐊᕐᑐᒥᒃ ᐃᓅᓚᐅᕐᐳᑦ. ᐊᑕᓂᕐᒥᒃ ᖃᐅᔨᒪᓪᓗᓂ ᐃᓅᓯᖃᕐᓂᖅ ᑍᒤᑦᑐᒥᒃ ᐱᑎᑦᓯᓐᖏᓛᖅ? ᐊᑕᓂᖅ ᐅᖃᕐᐳᖅ.

¹⁷ ᑕᐅᑐᒃᑕᓯ ᐃᓱᒪᓯᓗ ᖃᑭᔪᒪᓃᓐᓇᕐᒥᒃ ᐱᔪᒪᔭᑐᐊᖃᒧᑦ ᓯᓔᕐᕆᒃᓯᕐᓗᓯ ᖃᑭᕙᒃᐳᓯ, ᐸᓯᔭᒃᓴᐅᖏᑦᑐᓂᒃ ᑐᖁᑎᑦᓯᕙᒃᓗᓯ, ᐅᖁᒤᑦᑐᒦᑎᑦᓯᕙᒡᓗᓯᓗ ᐃᓄᖁᑎᑦᓯᓐᓂᒃ.”

¹⁸ ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ ᔨᕼᐅᐃᐊᑭᒻ ᐱᑦᔪᑎᒋᓪᓗᒍ ᔫᑕᒧᑦ ᐊᖓᔪᖅᑳᕐᔪᐊᖑᔪᖅ ᔫᓮᐊᐅᑉ ᐃᕐᓂᖓ, “ᑐᖁᒃᐸᑦ ᕿᒃᓵᒍᑕᐅᔪᒫᓐᖏᓚᖅ ᖃᑕᓐᖑᑎᖏᓐᓄᑦ ᓇᔭᖏᓐᓄᓪᓗ ᐅᒡᒍᐊᕐᓇᕋᔭᕋᓗᐊᕐᐳᖅ, ᕿᐊᑦᔪᑕᐅᓐᖏᓚᕐᓕ, ᐊᖓᔪᖅᑳᕐᔪᐊᖃᕐᑐᓄᑦ ᐅᒡᒍᐊᕐᓇᕋᓗᐊᕐᐳᖅ, ᐊᖓᔪᖅᑳᕐᔪᐊᖑᓂᖓ ᐱᑦᔪᑎᒋᓪᓗᒍ.

¹⁹ ᐃᓗᕕᕐᑕᐅᓂᖓ ᓯᐅᑎᖅᑯᕐᑐᔪᑎᑐᑦ ᐱᔭᐅᔪᒫᕐᐳᖅ, ᐅᓂᐊᕐᑕᐅᓪᓗᓂ ᐃᒋᑕᐅᑐᐃᓐᓇᕐᓗᓂ ᒪᓂᖅᑲᒧᑦ ᔨᕉᓴᓕᐅᑉ ᐃᑎᕐᑕᕐᕕᖏᑕ ᓯᓚᑖᓄᑦ.”

ᔨᕆᒤᐊᐅᑉ ᐅᖃᐅᓯᖃᕐᓂᖓ ᔨᕉᓴᓕᒥᒃ

²⁰ “ᒪᔪᕋᕆᑦ ᓕᐸᓇᓂᒧᑦ, ᕾᒐᓛᕆᑦ ᐹᓴᓂᒥ, ᕾᒐᓛᕆᓪᓗ ᐊᐸᕅᒥ, ᐃᑲᔪᕐᑎᒋᓂᐊᕋᓱᒋᓚᐅᕐᑕᑎᑦ ᓄᖑᑕᐅᖕᒪᑕ.

²¹ ᐃᓂᕐᑎᕋᓱᓚᐅᕋᓗᐊᕐᐸᒋᑦ ᐊᔪᕐᓴᕐᓇᖏᑦᑐᒦᑎᓪᓗᑎᑦ, ᓈᓚᑦᔮᖏᓐᓂᕋᓚᐅᕐᐳᑎᓪᓕ ᑕᒪᓐᓇᓗ ᐃᓕᖅᑯᓯᕇᓐᓇᕋᕕᐅᒃ ᐃᓅᓱᒃᑑᓂᕐᓂᑦ ᐅᕙᓐᓂᒃ ᓈᓚᒍᓐᓇᓚᐅᖏᓐᓇᕕᑦ.

²² ᐰᕐᓯᔨᖁᑎᓯ ᐊᓄᕆᒧᑦ ᑎᒃᑕᐅᕋᕐᓂᐊᕐᐳᑦ, ᑕᐱᕆᕙᒃᑕᓯᓗ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ, ᖁᕕᐊᓇᖏᑦᑐᒥᒃ ᑲᓐᖑᓇᕐᑐᒥᒡᓗ ᑕᕝᕙ ᐊᑐᕐᓂᐊᕐᐳᑎᑦ, ᐱᐅᖏᑦᑐᓕᓂᓯ ᐱᑦᔪᑎᒋᓪᓗᒋᑦ.

²³ ᓕᐸᓇᓂᒥᐅᑕᐅᔪᓯ ᐃᒡᓗᖃᐅᑦᓯᐊᕐᑐᓯ ᕿᔪᑦᓯᐊᕙᖕᓂᒃ ᓰᑕᕆᓂᑦ ᓴᓇᓯᒪᔪᓂᒃ, ᐅᒡᒐᕐᓱᕈᒫᕐᐳᓯᓕ ᐋᓐᓂᐊᓇᕐᑐᒧᑦ ᑎᑭᑕᐅᓕᕈᑦᓯ, ᐊᕐᓇᑐᑦ ᐃᕐᓂᓱᒃᑐᑎᑐᑦ.”

ᒎᑎᐅᑉ ᐃᖅᑲᕐᑐᐃᓂᖓ ᔨᕼᐅᐃᐊᑭᓐᒥᒃ

²⁴ ᐊᑕᓂᖅ ᐅᖃᕐᐳᖅ, “ᒎᑎᐅᓪᓗᖓ ᐆᒪᒐᒪ, ᑯᓂᐊ ᔨᕼᐅᐃᐊᑭᐅᑉ ᐃᕐᓂᖓ, ᔫᑕᒥ ᐊᖓᔪᖅᑳᕐᔪᐊᖑᔪᖅ, ᑕᓕᕐᐱᓐᓂ ᓇᒡᒍᐊᕐᒥᒋᒐᓗᐊᕈᒃᑭᑦ ᓱᓕ ᐲᕈᓐᓇᕐᐸᒋᑦ.

²⁵ ᐃᓕᖕᓂᒃ ᑐᖁᑦᓯᔪᒪᔪᓄᑦ ᐱᔭᐅᑎᑦᓱᒫᕐᐸᒋᑦ, ᑲᑉᐱᐊᒋᔭᕐᓄᑦ, ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᓄᖏᓐᓄᓪᓗ ᑲᐅᓪᑎᐊᒥᐅᓄᑦ.

²⁶ ᐊᓈᓁᓪᓗ ᐊᐅᓪᓚᕈᑦᔭᐅᑎᑦᓱᒫᕐᐸᑦᓯᒃ ᓄᓇᑦᓯ ᐊᓯᐊᓄᑦ, ᐃᓅᕕᒋᓚᐅᓐᖏᑕᕐᓄᑦ ᑕᒪᑦᓯᒡᓗ ᑖᕙᓂ ᑐᖁᔪᒫᕐᐳᓯᒃ.

²⁷ ᐅᑎᕈᓐᓇᕈᒫᓐᖏᓚᓯ ᓄᓇᒧᑦ ᐅᑎᕐᓯᕐᕕᒌᓐᓇᕐᑕᑦᓯᓐᓄᑦ.

²⁸ “ᑯᓂᐊ ᑖᓐᓇᐅᕚ ᓇᕐᕈᒋᔭᐅᔪᖅ, ᒪᕐᕋᐅᔭᖅ ᓯᖁᒥᓯᒪᔪᖅ, ᐃᒃᐱᒋᔭᐅᖏᑦᑐᖅ? ᓱᖕᒪᑦ ᕿᑐᕐᖓᓂ ᐃᓚᒋᓪᓗᒋᑦ ᐃᒋᑕᐅᔪᒃᓴᐅᕚᑦ ᓄᓇᒧᑦ ᖃᐅᔨᒪᓐᖏᑕᖓᓐᓄᑦ?

²⁹ ᓄᓇ, ᓄᓇ, ᓄᓈ! ᐊᑕᓂᐅᑉ ᐅᖃᐅᓯᖓ ᑐᓴᕈᒃ!

³⁰ ᐊᑕᓂᖅ ᐃᒫᒃ ᐅᖃᕐᒪᑦ, ‘ᐊᖑᑦ ᑖᓐᓇ ᑎᑎᕋᕐᓯᒪᓂᐊᕐᐸᓯ ᕿᑐᕐᖏᓱᐃᑦᑑᓂᕋᕐᓗᒍ, ᐱᔪᓐᓇᕐᓯᓐᓂᖏᑦᑐᖅ ᐃᓅᓪᓗᓂ, ᑭᖑᕚᖏᑦ ᒪᑭᑦᑐᓐᓇᕐᓯᔪᖃᕈᒫᓐᖏᓚᑦ, ᑍᕕᑎᐅᑉ ᐊᖓᔪᖅᑲᐅᓂᖓᑕ ᐃᒃᓯᕙᐅᑕᕐᔪᐊᖓᓂ ᐊᖓᔪᖅᑳᕐᔪᐊᓐᖑᕐᑐᖃᕐᓂᐊᓐᖏᓚᑦ, ᐊᐅᓚᑦᓯᔪᕐᑕᖃᕐᓂᐊᕋᓂᓗ ᔫᑕᒥ.’”