ᔨᕆᒤᐊᐅᑉ ᐊᒡᓚᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᐅᑉ ᓵᓚᒋᔭᐅᓂᒃᓴᖓᑕ ᐅᖃᐅᓯᐅᓂᖓ

¹ ᔨᕆᒤᐊ ᐊᑕᓂᕐᒧᑦ ᐅᖃᕐᕕᐅᓚᐅᕐᐳᖅ ᐅᑯᓂᖓ, ᐊᖓᔪᖅᑳᕐᔪᐊᑉ ᔨᑎᑬᐊᐅᑉ ᑎᓕᔭᖏᓐᓄᑦ ᑎᑭᑕᐅᒐᒥ ᐸᓱᕼᐅᕆᒧᑦ ᒪᓪᑬᔭᐅᑉ ᐃᕐᓂᖓᓄᑦ ᑐᓂᕐᕈᓯᕐᑎᑦᓯᔨᒧᓪᓗ ᔨᐸᓁᐊᒧᑦ ᒫᓯᐊᐅᑉ ᐃᕐᓂᖓᓄᑦ, ᐅᖃᕐᓗᑎᒡᓗ:

² “ᐊᑕᓂᖅ ᖃᐅᔨᓇᓱᐊᕐᕕᒋᓚᐅᕈᒃ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᓂᐱᑯᓁᓴᐅᑉ ᐅᓇᑕᕆᐊᕐᑐᕈᒪᖕᒪᑎᒍᑦ, ᐊᑕᓂᐅᑉ ᑲᒪᓇᕐᑐᑎᒍᑦ ᐱᐅᔪᓂᒃ ᐱᓇᓱᐊᕈᑎᔪᓐᓇᕐᒪᖔᑎᒍᑦ, ᐅᓇᑕᕆᐊᕋᓱᐊᕐᑑᒐᓗᐊᓄᑦ ᑲᒪᒋᔭᐅᓂᐊᖏᓐᓇᑦᑕ.”

³ ᔨᕆᒤᐊᐅᓪᓕ ᐅᖃᐅᑎᕔᑦ ᐅᖃᕐᓗᓂ,

⁴ “ᔨᑎᑬᐊ ᐃᒫᒃ ᐅᖃᐅᑎᓯᐅᒃ, ‘ᐊᑕᓂᖅ ᐃᒫᒃ ᐅᖃᕐᐳᖅ, ᐃᓴᕆᐊᓕᒥᐅᑦ ᒎᑎᖓᑦ, ᑕᑯᒋᑦ, ᐅᓇᑕᐅᑎᒃᓴᓯ ᐊᑐᕐᓗᒋᑦ ᐃᓕᑦᓯᓐᓂᒃ ᓵᑦᓯᖔᕐᓂᐊᕐᐳᖓ ᐅᓇᑕᐅᑎᒃᓴᓕᐊᕆᓯᒪᔭᓯᓗ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᑲᐅᓪᑎᐊᒥᐅᑦ ᐅᓇᑕᕐᑎᖏᓐᓄᑦ ᒫᓐᓇ ᐃᒡᓗᒐᓴᒡᔪᐊᖃᕐᕕᑦᓯᓐᓂᒃ ᐃᓗᒪᓯᓗᑎᒃ ᐱᕖᕈᑦᔨᓯᒪᔪᓄᑦ ᐃᓕᑦᓯᓐᓂᒃ; ᐃᒡᓗᒐᓴᒡᔪᐊᖃᕐᕕᑦᓯ ᐃᓗᐊᓄᐊᕈᓐᓇᕐᓯᑎᓐᓂᐊᕐᐸᒃᑲ.

⁵ ᐅᕙᖓ ᓇᖕᒥᓂᖅ ᐅᓇᑕᕐᓂᐊᕐᐸᑦᓯ ᐱᔪᓐᓇᕐᓂᓐᓄᑦ, ᓂᓐᖓᐅᒪᓂᓐᓄᑦ ᓂᓐᖓᕕᒃᔪᐊᕐᓯᒪᓂᓐᓄᓪᓗ.

⁶ ᐃᒡᓗᒐᓴᒡᔪᐊᕐᒥᐅᓪᓗ ᐱᒋᐊᕈᒃᑭᑦ ᐋᓐᓂᐊᓇᕐᑐᒧᑦ ᑐᖁᕋᕐᓂᐊᕐᐳᑦ ᐃᓄᐃᑦ ᐆᒪᔪᐃᓪᓗ.

⁷ ᑕᒪᓐᓇᓗ ᐊᓂᒍᕐᒪᑦ, ᐊᑕᓂᖅ ᐅᖃᕐᐳᖅ, ᔨᑎᑬᐊ ᔫᑕᐅᑉ ᐊᖓᔪᖅᑳᕐᔪᐊᖓ, ᐊᖓᔪᖅᑳᖁᑎᖏᓪᓗ, ᐃᓄᐃᓪᓗ ᑐᖁᕋᕐᓇᕐᑐᒧᑦ ᐱᔭᐅᓂᐊᓐᖏᓚᑦ ᐅᓇᑕᕐᑐᓂᓘᓐᓃᑦ, ᑳᖕᓇᕐᑐᕐᔪᐊᒧᓪᓘᓐᓃᑦ ᐹᐱᓘᓂᒥᐅᓪᓘᓐᓃᑦ ᐊᖓᔪᖅᑳᕐᔪᐊᖓᓐᓄᑦ ᓂᐱᑯᓁᓴᒧᑦ, ᑖᒃᑯᐊ ᐊᒥᐊᒃᑰᔪᑦ ᑐᖁᑕᐅᑎᓐᓂᐊᕐᐰᑦ ᓇᒡᓕᒋᖏᓪᓗᒋᑦ ᐃᓚᑦᓱᒋᖏᓪᓗᒋᓪᓘᓐᓃᑦ.’

⁸ “ᐃᓄᐃᑦ ᐅᖃᐅᑎᒃᑲᓐᓂᒃᑭᑦ, ᐊᑕᓂᖅ ᐃᒫᒃ ᐅᖃᕐᐳᖅ, ‘ᑕᑯᒋᑦ, ᐅᖃᐅᑎᕙᑦᓯ ᐃᓅᓯᖃᕐᓇᕐᑐᒥᒃ ᑐᖁᒧᐊᕐᓇᕐᑐᒥᒡᓗ.

⁹ ᐃᒡᓗᒐᓴᒡᔪᐊᓃᑦᑐᑦ ᑐᖁᓂᐊᕐᐳᑦ ᐅᓇᑕᕐᑐᓂ, ᑳᖕᓇᕐᑐᕐᔪᐊᒃᑯᑦ ᐋᓐᓂᐊᓇᕐᑐᒃᑯᓪᓗ; ᓇᓪᓕᐊᓪᓕ ᑲᐅᓪᑎᐊᒥᐅᓄᑦ ᑐᓂᑦᔪᑎᒋᔭᕐᑐᕈᓂ ᐃᓗᒪᓗᓂᓯ ᐊᔪᓕᕐᑎᑦᓯᓯᒪᔪᓄᑦ, ᐃᓅᔪᓐᓇᕐᓂᐊᕐᐳᖅ, ᑐᓂᑦᔪᑎᒋᓂᓂ ᐊᓐᓇᒍᑎᒋᓂᐊᕐᒪᒍ ᐅᓇᑕᕐᓂᕐᒥᑦ.

¹⁰ ᑍᒤᓕᐅᕈᒪᓂᕋ ᓴᖑᑎᑦᔮᔪᓐᓃᕐᐸᕋ ᐃᒡᓗᒐᓴᖕᓄᑦ ᐱᐅᔪᒥᒃ ᐱᓇᓱᐊᕐᓂᐊᖏᓐᓇᒪ ᐱᐅᖏᑦᑐᒥᒃ ᑭᓯᐊᓂ, ᐊᑕᓂᖅ ᐅᖃᕐᐳᖅ: ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᐱᔪᓐᓇᕐᓂᖃᕐᑎᑕᐅᓂᐊᕐᐳᖅ ᐊᓯᕈᐃᖁᓪᓗᒍ ᐃᑯᒪᒧᑦ.’”

ᔫᑕᒥᐅᑦ ᐊᖓᔪᖅᑳᕐᔪᐊᖏᑕ ᐃᖅᑲᕐᑐᕐᑕᐅᓂᖏᑦ

¹¹ “ᐅᖃᕐᑐᒃᓴᐅᒋᕗᑎᑦ ᔫᑕᐅᑉ ᐊᖓᔪᖅᑳᕐᔪᐊᖓᑕ ᐃᒡᓗᖓᓄᑦ, ‘ᐊᑕᓂᐅᑉ ᐅᖃᐅᓯᖓ ᑐᓴᕐᓯᐅᒃ,

¹² ᑍᕕᑎᐅᑉ ᐊᖓᔪᖅᑳᕐᔪᐊᖑᓂᖓᓄᑦ ᑭᖑᕚᖑᔪᓯ, ᐊᑕᓂᖅ ᐃᒫᒃ ᐅᖃᕐᐳᖅ: “ᓈᒻᒪᓈᕐᓯᒪᔪᒥᒃ ᐱᓇᓱᐊᖃᑦᑕᕆᑦᓯ ᖃᐅᑕᒫᑦ, ᓴᐳᑦᔨᓯᒪᓇᓱᐊᖃᑦᑕᕐᓗᓯᓗ ᑎᒡᓕᒡᕕᐅᓯᒪᔪᓂᒃ, ᓂᓐᖓᒡᓗᖓ ᐊᑭᓂᐊᖁᓇᖓ ᐃᑯᐊᓚᔪᑎᑐᑦ, ᐱᐅᖏᑦᑐᓕᓂᓯ ᐃᑯᐊᓚᒃᑕᐅᖁᓪᓗᒋᑦ, ᖃᒥᑕᐅᓂᐊᓐᖏᓚᕐᓗ ᓇᓪᓕᐊᓐᓄᓪᓘᓐᓃᑦ.”’

¹³ ᑕᑯᒋᑦ, ᔨᕉᓴᓕᒥᐅᑕᐅᔪᓯ ᐊᑲᐅᒋᓐᖏᓚᑦᓯ, ᓇᕐᓴᒥᐅᑕᐅᔪᓯ, ᕾᕐᑑᓂᖓᓂ ᓄᓇᖃᕐᑐᓯ, ᐊᑕᓂᖅ ᐅᖃᕐᐳᖅ, ᐅᖃᕐᐳᓯ, ‘ᑭᒃᑯᑦ ᐅᕙᑦᑎᓐᓂᒃ ᐅᓇᑕᕋᓱᐊᕐᐹᑦ? ᑭᒃᑯᓪᓗ ᐱᔭᐅᑦᔧᕐᓯᒪᕕᑦᑎᓐᓄᑦ ᐃᑎᕈᓐᓇᕐᐹᑦ?’

¹⁴ ᓱᒋᐊᕐᓂᐊᕐᐸᑦᓯ ᐱᓂᐊᕐᓂᓯ ᐱᕈᕐᑎᑕᖏᑦ ᒪᓕᒡᓗᒋᑦ, ᐊᑕᓂᖅ ᐅᖃᕐᐳᖅ; ᓇᐹᕐᑐᖁᑎᑦᓯᓐᓂᒃ ᐃᑯᐊᓪᓔᓂᐊᕐᐳᖓ ᓇᔪᕐᑕᓕᒫᓯᓗ ᐃᑯᐊᓚᓗᑎᒃ ᓄᖑᑕᐅᔪᒫᕐᐳᖅ.”