ᔨᕆᒤᐊᐅᑉ ᐊᒡᓚᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᒪᕐᕋᐅᔭᖅ ᓯᖁᒥᓯᒪᔪᖅ

¹ ᐃᒫᒃ ᐊᑕᓂᖅ ᐅᖃᕐᐳᖅ, “ᓂᐅᕕᕆᐊᕆᑦ ᒪᕐᕋᐅᔭᓕᐅᕐᑎᒥᑦ ᒪᕐᕋᐅᔭᕐᒥᒃ, ᐱᖃᑎᖃᕐᓗᑎᑦ ᐊᖓᔪᖅᑳᓂᒃ ᑐᓂᕐᕈᓯᕐᑎᑦᓯᔨᓂᒡᓗ ᐊᖓᔪᒃᓕᓂᒃ.

² ᐱᓐ ᕼᐃᓇᐅᑉ ᓇᕐᓴᖓᓄᐊᕐᓂᐊᕐᐳᑎᑦ ᐃᑎᕐᑕᕐᕕᒃᑯᑦ ᐹᑦᓴᑎᒥᒃ ᐊᑎᖃᕐᑐᒃᑯᑦ ᐊᓂᓗᓯ, ᑍᑲᓂᓗ ᐅᖃᐅᓯᕆᖁᔭᒃᑲ ᐅᖃᐅᓯᕆᓗᒋᑦ.

³ ᐅᖃᕐᓗᑎᑦ, ‘ᐊᑕᓂᐅᑉ ᐅᖃᐅᓯᖏᑦ ᑐᓴᕐᓯᐅᒃ, ᔫᑕᒧᑦ ᐊᖓᔪᖅᑳᕐᔪᐊᖑᔪᓯ ᔨᕉᓴᓕᒥᐅᑕᐅᔪᓯᓗ, ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᑕᑯᒋᑦ, ᐊᓯᕈᕐᑕᐅᓇᕐᑐᒥᒃ ᑎᑭᑎᑦᓯᓂᐊᕐᐳᖓ ᑕᒪᐅᖓ, ᑐᓴᕐᑐᓪᓗ ᖁᐊᕐᓵᖓᓂᐊᕐᐳᑦ.

⁴ ᐅᕙᓐᓂᒃ ᕿᒤᓚᐅᕐᒪᑕ, ᐊᓯᖏᑕᓗ ᒎᑎᒋᔭᖏᓐᓄᑦ ᓄᓇᑎᒃ ᐃᓂᑖᖑᑎᓪᓗᒍ ᓇᕐᕈᓇᕐᓯᑎᑉᐹᑦ, ᐆᑕᒃᓴᓂᒡᓗ ᑐᓂᕐᕈᓯᕐᕕᒋᕙᒃᓗᒋᑦ, ᓯᕗᓕᕕᓂᖏᑕᓘᓐᓃᑦ ᖃᐅᔨᒪᓚᐅᕐᓯᒪᓐᖏᑕᖏᓐᓂᒃ, ᔫᑕᐅᓪᓘᓐᓃᑦ ᐊᖓᔪᖅᑳᕐᔪᐊᖏᑕ ᖃᐅᔨᒪᓚᐅᕐᓯᒪᖏᒻᒥᔭᖏᑦ; ᑕᕝᕙᓂᓗ ᑐᖁᕅᕙᒃᓗᑎᒃ ᐸᓯᔭᒃᓴᐅᖏᑦᑐᓂᒃ.

⁵ ᐳᕐᑐᔪᓂᒃ ᑐᓂᕐᕈᓯᕐᕕᓕᐅᕐᓯᒪᕗᑦ ᐰᓕᒧᑦ ᕿᑐᕐᖓᒥᖕᓂᒡᓗ ᐃᑯᐊᓚᔪᒧᑦ ᑐᓂᕐᕈᓯᐅᑎᓪᓗᒋᑦ ᐰᓕᒧᑦ ᑐᒃᓯᐊᕈᑎᒋᖃᑦᑕᕐᐰᑦ, ᑍᒤᓕᐅᖁᓪᓗᒋᑦ ᐅᖃᓚᐅᕐᓯᒪᓐᖏᓚᖓ ᐱᖁᔭᓕᐅᓚᐅᕐᓯᒪᓐᖏᓚᖓᓘᓐᓃᑦ, ᑍᒤᑦᑐᒥᒃ ᐃᓱᒪᓚᐅᕐᓯᒪᖏᓐᓇᒪ.

⁶ ᑍᒤᒻᒪᑦ ᑕᑯᒋᑦ, ᐅᓪᓗᐃᑦ ᑎᑭᓕᕐᐳᑦ, ᐊᑕᓂᖅ ᐅᖃᕐᐳᖅ, ᑕᒪᓐᓇ ᓄᓇ ᐊᑎᖃᕐᑎᑕᐅᔪᓐᓃᕐᕕᒃᓴᖓ ᑐᐱᑎᒥᒃ, ᐅᕝᕙᓘᓐᓃᑦ ᐱᓐ ᕼᐃᓇᒥᐅᑦ ᓇᕐᓴᖓᓂᒃ, ᑍᔭᐅᓕᕈᒫᕐᐳᕐᓕ ᓇᕐᓴᒥᒃ ᑐᖁᕅᕕᖕᒥᒃ.

⁷ ᔫᑕᒥᐅᓄᑦ ᔨᕉᓴᓕᒥᐅᓄᓪᓗ ᓯᕗᓂᒃᓴᓕᐊᕆᓯᒪᔭᒃᑲ ᐊᑐᕈᓐᓃᕐᑎᓐᓂᐊᕐᐸᒃᑲ, ᑐᖁᕋᕐᑕᐅᑎᓪᓗᒋᓪᓗ ᐅᓇᑕᕐᑐᓂ ᐊᑭᕋᖏᓐᓄᑦ, ᑖᒃᑯᓂᖓ ᑐᖁᕅᔪᒪᔪᓂᒃ, ᑎᒥᕕᓂᖏᓪᓗ ᓂᕆᔭᒃᓴᐅᖁᓪᓗᒋᑦ ᑎᖕᒥᐊᓄᑦ ᐆᒪᔪᓄᓪᓗ.

⁸ ᑖᒃᑯᐊ ᐃᒡᓗᒐᓴᒡᔪᐊᑦ ᓱᕋᒃᑕᐅᑎᓐᓂᐊᕐᐸᒃᑲ ᓇᕐᕈᒋᔭᒃᓴᓐᖑᕐᑎᓪᓗᒋᓪᓗ; ᐊᖅᑯᓵᕐᑐᓪᓗ ᑲᒪᓂᐊᕐᓗᑎᒃ ᓱᕋᒃᑎᕐᓯᒪᓂᖓᓂᒃ ᖁᐊᕐᓵᖓᔪᒫᕐᐳᑦ.

⁹ ᕿᑐᕐᖓᒥᖕᓂᒡᓗ ᓂᕿᖃᓕᕈᒫᕐᐳᑦ, ᐃᒻᒥᖕᓄᓪᓗ ᓂᕆᖃᑦᑕᐅᑎᓕᕐᑎᓪᓗᒋᑦ ᐊᑭᕋᒥᖕᓄᑦ ᐃᓗᔭᐅᓯᒪᓗᑎᒃ ᓴᐱᔭᐅᓯᒪᓂᕐᒥᖕᓄᑦ, ᐊᑭᕋᕐᒥᖕᓂᑦ ᑐᖁᑦᓯᔪᒪᔪᓂᑦ ᑍᒤᑎᑕᐅᓗᑎᒃ.’

¹⁰ “ᑕᕝᕙ ᒪᕐᕋᐅᔭᖅ ᓯᖁᒥᑕᒃᓴᕆᕙᑦ ᐃᓕᖕᓂᒃ ᒪᓕᒃᓯᒪᔪᑦ ᑕᑯᓐᓇᕐᑎᓪᓗᒋᑦ.

¹¹ ᐅᖃᐅᑎᓗᒋᓪᓗ, ‘ᐃᒫᒃ ᑕᕝᕙ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ: ᑍᒫᒃ ᑕᕝᕙ ᐃᓅᖃᑎᒌᒡᔪᐊᑦ ᐃᒡᓗᒐᓴᒡᔪᐊᓪᓗ ᓯᖁᒥᑦᓱᒫᕐᐸᒃᑲ ᑖᑦᓱᑐᓇᖅ ᒪᕐᕋᐅᔭᕐᑎᑐᑦ ᓯᖁᒥᑕᐅᔪᑎᑐᑦ ᐋᖅᑭᒃᓱᒐᒃᓴᐅᔪᓐᓃᕐᓗᑎᒡᓗ ᑍᒤᑦᓱᒫᕐᐳᑦ. ᑐᐱᑎᒥ ᐃᓗᕕᕐᓯᔪᒫᕐᐳᑦ ᐊᓯᐊᓂ ᐃᓗᕕᕐᓯᕕᒃᓴᖃᕈᓐᓃᕈᒫᕐᒪᑦ.

¹² ᐃᒫᒃ ᐱᓇᓱᐊᕐᓂᐊᕐᐳᖓ ᐅᕙᓂ ᓄᓇᖃᕐᑐᓄᑦ, ᐊᑕᓂᖅ ᐅᖃᕐᐳᖅ, ᑖᒃᑯᐊ ᐃᒡᓗᒐᓴᒡᔪᐊᑦ ᑐᐱᑎᒥᐅᑎᑑᓕᕈᒪᕐᐳᑦ.

¹³ ᐃᒡᓗᐃᑦ ᔨᕉᓴᓕᒦᑦᑐᑦ, ᐊᖓᔪᖅᑳᕐᔪᐊᓪᓗ ᐃᒡᓗᖏᑦ ᔫᑕᒦᑦᑐᑦ ᓇᕐᕈᓇᕐᓯᔪᒫᕐᐳᑦ ᑐᐱᑎᒥᐅᑎᑐᑦ, ᐃᒡᓗᓕᒫᑦ ᖄᖏᓐᓂ ᐃᑯᐊᓚᑦᓯᕕᐅᖃᑦᑕᕐᑐᑦ ᑐᓂᕐᕈᓯᕐᑐᓄᑦ, ᖁᑦᓯᒃᑐᒦᑦᑐᓄᑦ ᐃᒥᒐᒃᓴᓂᒡᓗ ᑐᓂᕐᕈᑕᐅᕙᒃᑐᑦ ᒎᑎᓐᖑᐊᓄᑦ ᓇᕐᕈᓇᕐᓯᑎᑕᐅᔪᒫᕐᐳᑦ ᑐᐱᑎᒥᐅᑎᑐᑦ.’”

¹⁴ ᔨᕆᒤᐊ ᑐᐱᑎᒥᓐᖔᕐᓗᓂ ᐅᑎᓕᕆᕗᖅ, ᐊᑕᓂᐅᑉ ᐅᖃᖁᔭᖓᓂᒃ ᐅᖃᓪᓚᓚᐅᕐᓗᓂ, ᐊᒻᒪ ᐊᑕᓂᐅᑉ ᐃᒡᓗᖓᓂ ᐃᓄᖕᓄᑦ ᐅᖃᓪᓚᓕᕆᕗᖅ:

¹⁵ “ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓ ᐅᖃᕐᐳᖅ, ᑕᑯᒋᑦ, ᐃᒡᓗᒐᓴᒡᔪᐊᓄᑦ ᓄᓇᓕᖕᓄᓪᓗ ᑎᑭᑎᑦᓯᓂᐊᕐᐳᖓ ᑲᑉᐱᐊᓇᕐᑐᓂᒃ ᑎᑭᓐᓂᐊᕐᓂᕋᕐᓯᒪᔭᓕᒫᓐᓂᒃ ᐃᓕᑦᓯᓐᓄᑦ, ᓯᑎᔫᓚᐅᕐᒪᑕ, ᑐᓴᕈᒪᓇᑎᒡᓗ ᐅᖃᐅᓯᓐᓂᒃ.”