ᔨᕆᒤᐊᐅᑉ ᐊᒡᓚᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᐅᑉ ᒪᕐᕋᐅᔭᓕᐅᕐᑎᒥ ᐳᓛᕐᓂᖓ

¹ ᐊᑕᓂᐅᑉ ᐅᖃᐅᓯᖓ ᑎᑭᑉᐳᖅ ᔨᕆᒤᐊᒧᑦ,

² “ᒪᑭᓪᓗᑎᑦ ᒪᕐᕋᐅᔭᓕᐅᕐᑎᐅᑉ ᐃᒡᓗᖓᓄᐊᓕᕆᑦ ᑍᑲᓂᓗ ᑐᓴᕐᑎᓐᓂᐊᕐᐸᒋᑦ ᐅᖃᐅᓯᓐᓂᒃ.”

³ ᑕᕝᕙ ᒪᕐᕋᐅᔭᓕᐅᕐᑎᐅᑉ ᐃᒡᓗᖓᓄᐊᕐᐳᖓ, ᑬᕕᑎᑦᓯᕕᖕᒥᓗ ᓴᓇᔪᖅ ᑕᑯᕙᕋ.

⁴ ᒪᕐᕋᐅᔭᓕᐅᕐᑎᐅᑉ ᓴᓇᔭᖓ ᐋᖅᑭᑦᓯᐊᖏᑦᑕᕌᖓᑦ, ᐊᒡᒐᖕᒥᓄᑦ ᐋᖅᑭᒋᐊᒃᑲᓐᓂᕐᓗᒍ ᐊᓯᐊᓂᒃ ᓴᓇᓕᕐᐹ, ᒪᕐᕋᐅᔭᓕᐅᕐᑎᐅᑉ ᐱᐅᒋᔭᖓ ᒪᓕᒡᓗᒍ.

⁵ ᑕᕝᕙ ᐊᑕᓂᐅᑉ ᐅᖃᐅᑎᓕᕐᐹᖓ,

⁶ “ᐃᓴᕆᐊᓕᒥᐅᖑᔪᓯ ᒪᕐᕋᐅᔭᓕᐅᕐᑎᑎᑐᑦ ᑍᒫᒃ ᐃᓕᑦᓯᓐᓄᑦ ᐱᓂᐊᕐᑐᒃᓴᐅᓐᖏᓚᖔ? ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐃᓴᕆᐊᓕᒥᐅᖑᔪᓯ ᐊᒡᒐᓐᓃᑉᐳᓯᑦᑕᐅᖅ ᒪᕐᕋᑎᑐᑦ ᒪᕐᕋᐅᔭᓕᐅᕐᑎᐅᑉ ᐊᒡᒐᖏᓐᓃᑦᑐᑎᑐᑦ.

⁷ ᖃᖓᑐᐃᓐᓇᒃᑯᑦ ᐅᖃᕈᒪ ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕖᓪᓘᓐᓃᑦ ᓄᓱᖕᓂᐊᕐᓂᕋᕐᓗᒋᑦ ᓯᖁᒥᓐᓂᐊᕐᓂᕋᕐᓗᒋᓪᓗ ᐊᓯᕈᕐᓂᐊᕐᓂᕋᕐᓗᒋᓪᓘᓐᓃᑦ.

⁸ ᑭᖑᓂᖓᒍᓪᓗ ᐃᓅᖃᑎᒌᒡᔪᐊᑦ ᖃᕿᐊᓕᕐᐸᑕ ᐱᐅᖏᑦᑐᓕᓂᕐᒥᖕᓂᑦ, ᐊᓯᕈᕐᑕᐅᑦᔪᑎᒃᓴᕋᓗᐊᖏᓐᓂᒃ ᑲᔪᓯᕕᐅᑎᓐᓂᐊᓐᖏᓚᒃᑲ.

⁹ ᐅᕝᕙᓘᓐᓃᑦ ᐊᓯᐊᒍᑦᑕᐅᖅ ᐅᖃᓕᕐᒥᒍᒪ ᐃᓅᖃᑎᒌᒡᔪᐊᑦ ᐊᖓᔪᖅᑲᐅᕖᓪᓘᓐᓃᑦ ᓴᖅᑭᓐᓂᐊᕐᓂᕋᕐᓗᒋᑦ ᐱᕈᕐᓗᑎᒡᓗ.

¹⁰ ᐱᐅᖏᑦᑐᓂᒡᓕ ᐱᓇᓱᐊᓕᕐᐸᑕ ᓵᓐᓂ ᓈᓚᒍᓐᓃᕐᓗᑎᒡᓗ ᐅᕙᓐᓂᒃ, ᐊᒻᒪ ᐱᐅᔪᒥᒃ ᐱᓇᓱᐊᕐᓂᐊᕐᓂᕋᓚᐅᕐᑕᕋᓗᐊᕋ ᑖᒃᑯᓄᖓ ᓴᖑᑎᑦᓱᒫᕆᕙᕋ.

¹¹ ᑍᒤᒻᒪᑦ, ᔫᑕᐅᑉ ᔨᕉᓴᓕᐅᓪᓗ ᐃᓄᖏᑦ ᐅᖃᐅᑎᒃᑭᑦ, ᐃᒫᒃ ᑕᕝᕙ ᐊᑕᓂᖅ ᐅᖃᕐᐳᖅ, ‘ᑕᑯᒋᑦ, ᑲᑉᐱᐊᓇᕐᑐᒥᒃ ᑎᑭᑦᑐᒃᓴᒥᒃ ᐃᓕᑦᓯᓐᓄᑦ ᐋᖅᑭᒃᓱᐃᓕᕐᐳᖓ, ᖃᓄᐃᓕᒋᐊᕈᑎᒃᓴᓂᒡᓗ ᐅᐸᓗᖕᒊᔭᕐᓗᖓ, ᐱᐅᖏᑦᑐᓕᓂᑦᓯᓐᓂᑦ ᓵᒋᐊᓕᕆᑦᓯ ᐊᖅᑯᑎᑦᓯᓐᓂᑦ ᐱᓂᐊᕐᓂᓯᓗ ᐋᖅᑭᒋᐊᓕᕐᓯᐅᒃ.’

¹² ᑖᒃᑯᐊᓕ ᑭᐅᒃᐸᑕ, ‘ᐋᒃᑲ, ᑍᒤᑦᓱᒪᓐᖏᓚᒍᑦ, ᐱᓇᓱᐊᕈᒪᔭᑦᑎᓐᓂᒃ ᐱᓇᓱᐊᕈᒪᒐᑦᑕ, ᑕᒪᑦᑕ ᒪᓕᒍᒪᒐᑦᑕ ᐆᒻᒪᑎᑦᑕ ᐱᐅᖏᑦᑐᓕᔪᒪᓂᖏᓐᓂᑦ ᓴᖑᔪᒪᓐᖏᓚᒍᑦ.’”

ᐃᓄᐃᑦ ᐊᑕᓂᕐᒥᒃ ᖁᔭᓈᕐᓯᓂᖓᑦ

¹³ ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ: “ᐃᓅᖃᑎᒌᒡᔪᐊᓄᑦ ᖃᐅᔨᓇᓱᐊᓕᕆᑦ ᑍᒫᒃ ᐅᖃᕐᑐᖃᓚᐅᕐᓯᒪᖕᒪᖔᑕᓕ ᑍᒤᓚᐅᕐᓯᒪᖏᑦᓯᐊᕐᓗᑎᒃ ᐃᓴᕆᐊᓕᒥᐅᑦ ᐱᔭᒃᓴᐅᖏᑦᑐᐊᓗᖕᒥᒃ ᐊᑐᓕᕐᒪᑕ.

¹⁴ ᓕᐸᓇᓂᐅᑉ ᖃᖅᑲᖏᑕ ᐊᐳᑎᖓ ᐊᓯᐅᑐᐃᓐᓇᓚᐅᕐᓯᒪᕚ? ᑰᖏᓪᓘᓐᓃᑦ ᐅᖓᓯᒃᑐᒥᑦ ᑰᒃᑐᑦ ᐃᒤᕈᑎᑐᐃᓐᓇᓚᐅᕐᓯᒪᕚᑦ?

¹⁵ ᐃᓄᖁᑎᒪᓕ ᐳᐃᒍᕐᐹᖓ; ᐆᑕᒃᓴᓂᒃ ᑐᓂᕐᕈᓯᕐᐸᓕᕐᐳᑦ ᒎᑎᓐᖑᐊᓄᑦ; ᐹᓪᓚᒃᐳᑦ ᐱᓂᐊᕐᓂᑎᒃ ᒪᓕᒡᓗᒋᑦ, ᐃᓅᓯᕆᔭᐅᖁᔭᐅᓚᐅᕐᑐᖅ ᓯᕗᓕᕐᒥᖕᓄᑦ ᒪᓕᖏᓐᓇᒥᑦᔪᒃ ᐊᑐᕐᑕᐅᕙᖏᑦᑐᑎᒎᕋᓱᐊᕐᐳᑦ ᐊᖅᑯᓯᐊᖑᓯᒪᖏᑦᑐᑎᒍᑦ.

¹⁶ ᓄᓇᖓ ᐊᑐᕐᑐᒃᓴᐅᔪᓐᓃᕐᓂᐊᕐᐳᖅ, ᓄᓇᒋᔭᐅᔭᕆᐊᒃᓴᖅ ᓇᕐᕈᒋᔭᐅᓕᕐᓗᓂ. ᐊᖅᑯᓵᕐᑐᓕᒫᑦ ᑲᒪᓂᐊᖃᑦᑕᕈᒫᕐᐳᑦ ᐃᓕᕿᑕᒫᕐᓗᑎᒡᓗ.

¹⁷ ᐊᓄᕆᐅᑉ ᓴᓐᖏᔫᕕᖓᓂᑦ ᐊᓄᕌᕐᕕᐅᔪᑎᑐᑦ ᓯᐊᒻᒪᕈᒫᕐᐳᑦ ᐊᑭᕋᖏᑕ ᓵᖏᓐᓂ. ᑲᑉᐱᐊᓇᕐᑐᓪᓗ ᓇᓪᓕᐅᑎᒃᐸᑕ ᑐᓄᒐ ᑕᑯᔪᒫᕐᐹᑦ, ᑮᓇᕋᐅᖏᑦᑐᖅ.”

ᔨᕆᒤᐊᐅᑉ ᑐᖁᑕᐅᔪᒪᓂᖓ

¹⁸ ᐃᓄᐃᓪᓕ ᐅᖃᕐᐳᑦ, “ᔨᕆᒤᐊ ᖃᓄᐃᓕᐅᕈᑎᒋᓚᐅᕐᓚᕗᑦ! ᑐᓂᕐᕈᓯᕐᑎᑦᓯᔩᑦ ᐱᖁᔭᓂᒃ ᐊᔪᕆᕐᑐᐃᓂᕆᕙᒃᑕᖏᑦ ᐊᓯᐅᑎᑕᐅᔭᕆᐊᖃᖏᒻᒪᑕ, ᐃᓕᓯᒪᑦᓯᐊᕐᑐᓪᓗ ᐅᖃᐅᑦᔪᐃᓂᖏᑦ, ᐱᔪᖃᓛᕐᑐᒥᒡᓗ ᐅᖃᕐᑎᑦ ᐅᖃᐅᓯᖏᑦ. ᔨᕆᒤᐊ ᐸᓯᔭᒃᓴᓕᐊᕆᓚᐅᕐᓚᕗᑦ ᐅᖃᐅᓯᖏᓪᓗ ᓈᓚᖏᓪᓗᒋᑦ.”

¹⁹ ᑕᕝᕙ ᑐᒃᓯᐊᓕᕐᐳᖓ, “ᐊᑕᓃᖅ ᓈᓚᓚᐅᓐᖓ, ᐅᕙᓐᓂᒃ ᐸᓯᔭᒃᓴᓐᖑᕐᑎᑦᓯᓇᓱᐊᕐᑐᑦ ᐅᖃᐅᓯᖏᑦ ᑐᓵᓚᐅᒃᑭᑦ!

²⁰ ᐱᑦᓯᐊᕐᓂᖅ ᐱᐅᖏᑦᑐᒧᑦ ᐊᑭᓂᐊᕐᑕᐅᑦᔪᑎᖃᕐᑐᒃᓴᐅᕚ? ᑍᒤᑦᓴᕆᐊᖃᖏᒃᑲᓗᐊᕐᑎᓪᓗᒍ ᑕᑯᒋᑦ ᐃᑎᕐᓴᓕᐅᕆᕗᑦ ᐅᕙᓐᓂᒃ ᑐᖁᑦᓯᔪᒪᓪᓗᑎᒃ. ᐃᖅᑲᐅᒪᒋᑦ ᐅᖃᕐᕕᒋᓚᐅᕋᒃᑭᑦ ᑖᒃᑯᐊ ᐱᑦᔪᑎᒋᓪᓗᒋᑦ, ᐊᓯᕈᕐᑕᐅᖁᓇᒋᑦ ᓂᓐᖓᐅᓯᕐᓄᑦ.

²¹ ᑍᒤᒻᒪᑦ ᕿᑐᕐᖓᖏᑦ ᑳᖕᓇᕐᑐᕐᔪᐊᒧᑦ ᐱᕐᓕᕋᓕᕐᓕᑦ; ᐅᓇᑕᕐᑐᓄᓪᓗ ᑐᖁᕋᕐᑕᐅᓕᕐᓕᑦ, ᓄᓕᐊᖏᑦ ᕿᑐᕐᒊᕈᑦᔭᐅᓕᕐᓕᑦ, ᐅᐃᒡᒐᕐᓂᐅᓕᕐᓗᑎᒡᓗ, ᐊᖑᑎᖏᓪᓗ ᑐᖁᕋᕐᑕᐅᓗᑎᒃ ᐋᓐᓂᐊᓇᕐᑐᓄᑦ, ᐃᓅᓱᒃᑐᖁᑎᖏᓪᓗ ᐅᓇᑕᕐᑐᓂ ᑐᖁᕋᕐᑕᐅᓗᑎᒃ.

²² ᐃᒡᓗᖏᓐᓂ ᕿᐊᕙᓗᒃᑐᑦ ᑐᓴᕐᓴᐅᓕᕐᓕᑦ, ᑎᑭᑕᐅᑲᓪᓚᒃᑎᓪᓗᒋᑦ ᓵᓚᖃᕆᐊᕐᑐᕐᑐᓂᑦ, ᐃᔪᒃᑲᕐᕕᒃᓴᓐᓂᒃ ᐃᑎᕐᓴᓕᐅᕆᓚᐅᕐᒪᑕ, ᓂᒐᕐᕕᒃᓴᓕᐅᕐᓗᓂᖓᓗ ᐃᑎᒐᒃᑯᑦ.

²³ ᐊᑕᓃᖅ ᑲᐅᔨᒪᔧᓐᓇᕆᕙᑎᑦ ᑖᒃᑯᐊ ᑐᖁᑦᓯᓇᓱᐊᕐᓂᖏᑦ ᐅᕙᓐᓂᒃ. ᐱᐅᖏᑦᑐᓕᓂᖏᑦ ᐃᓱᒪᒋᔪᓐᓃᕐᑍᓕᒃᑭᑦ, ᐊᔪᕐᓂᖏᓪᓗ ᐲᔭᕐᑍᓕᓗᒋᑦ ᓵᖕᓂᑦ, ᓵᓚᒋᔭᐅᑎᒃᑭᑦ ᓂᓐᖓᐅᑦᔨᓂᕆᓛᕐᑕᕐᓄᓪᓗ ᑎᑭᑕᐅᑎᒃᑭᑦ.”