ᔨᕆᒤᐊᐅᑉ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᑕᐅᑉ ᐊᔪᕐᓂᖓ ᓱᒋᐊᕐᑕᐅᓂᖓᓗ

¹ “ᔫᑕᐅᑉ ᐊᔪᕐᓂᖏᑦ ᓴᕕᕋᔭᒃᑯᑦ ᑎᑎᕋᕐᓯᒪᕗᑦ; ᐊᓕᒎᔭᕐᑐᑦ ᓯᑎᑎᒋᔪᒧᑦ ᐃᑎᕐᓴᓕᐅᕈᑎᓯᒪᓪᓗᑎᒃ ᑎᑎᕋᕐᓯᒪᕗᑦ ᐆᒻᒪᑎᖏᓐᓂ, ᑐᓂᕐᕈᓯᕐᕕᖏᑕᓗ ᓇᒡᔪᖏᖕᓂ.

² ᕿᑐᕐᖓᖏᑦ ᐊᐅᓚᔨᕗᑦ ᑐᓂᕐᕈᓯᕐᕕᖏᓐᓂᒃ ᒎᑎᓐᖑᐊᒧᑦ ᐊᓯᕋᒧᑦ, ᓇᐹᕐᑐᐃᑦ ᑐᖑᔪᐃᓐᓇᕐᑐᑦ ᓴᓂᐊᓐᓂ, ᐱᖑᐃᓪᓗ ᐳᕐᑐᔪᑦ ᖄᖏᓐᓂ.

³ ᖃᖅᑲᓂ ᓄᓇᑐᐃᓐᓇᕐᒦᑦᑐᒥ, ᐊᔪᕐᓴᖏᑦᔪᑎᓯ ᑲᑎᕐᓱᐊᓯᓗ ᓇᒡᕚᕐᑕᒐᐅᑎᑦᓱᒫᕐᐸᒃᑲ ᐊᑭᓕᐅᑕᐅᓗᑎᒃ ᐊᔪᕐᓂᑦᓯᓐᓄᑦ ᓄᓇᓕᒫᑦᓯᓐᓂ.

⁴ ᐱᓂᐊᕐᓂᓯ ᒪᓕᒡᓗᒋᑦ ᑭᖑᕐᖑᑎᔭᒃᓴᓯ ᐊᓯᐅᔨᔪᒫᕐᐸᓯ ᑐᓂᓚᐅᕐᑕᒃᑲ ᐃᓕᑦᓯᓐᓄᑦ, ᐊᑭᕋᓯᓐᓂᒃ ᐱᔨᑦᓯᕐᑎᑦᓱᒫᕐᐸᓯ ᓄᓇᒥ ᑲᐅᔨᒪᓐᖏᑕᑦᓯᓐᓂ, ᓂᓐᖓᐅᓯᕋ ᐃᑯᒪᑐᑦ ᐃᑯᐊᓪᓚᒃᑎᑕᐅᖕᒪᑦ ᐃᑯᐊᓚᔪᒫᕐᓗᓂᓗ ᐃᓱᖃᖏᑦᑐᒧᑦ.”

ᐊᑦᔨᒌᖏᑦᑐᑦ ᐅᖃᕈᓯᐅᓲᑦ

⁵ ᐃᒫᒃ ᐊᑕᓂᖅ ᐅᖃᕐᐳᖅ: “ᓇᕐᕈᓇᕐᐳᖅ ᐃᓄᖕᒥᒃ ᑕᑎᖃᕐᑐᖅ ᑎᒥᐅᓪᓗ ᓴᓐᖏᓂᖓᓂᒃ ᓲᖑᓂᖃᕋᓱᒃᑐᖅ, ᐆᒻᒪᑎᒥᒍᑦ ᕿᒤᓯᒪᔪᖅ ᐊᑕᓂᕐᒥᒃ.

⁶ ᑖᓐᓇ ᐅᕐᐱᒐᕐᑎᑐᑦ ᓱᓇᖃᔪᐃᑦᑐᒦᑦᑐᑎᑐᑦ ᑍᒤᑉᐳᖅ, ᐱᐅᔪᒥᒃ ᑕᑯᔭᒃᓴᖃᖏᑦᑐᑎᑐᑦ. ᓴᓗᐊᖓᔪᒦᑦᓱᒫᕐᐳᖅ ᐃᓄᖃᔪᐃᑦᑐᒥ, ᓄᓇᒥ ᑕᕆᐅᕐᒥ ᐃᓄᖃᖏᑦᑐᒥ.

⁷ ᓮᒻᒪᕐᑎᑕᐅᑦᔪᑎᒃᓴᖃᕐᐳᖅ ᐊᑕᓂᕐᒥᒃ ᑕᑎᖃᕐᑐᖅ, ᓂᕆᐅᒋᓗᒍ ᑕᑎᖃᕐᑐᖅ ᐊᑕᓂᕐᒥᒃ.

⁸ ᓇᐹᕐᑐᑎᑐᑦ ᑍᒤᑉᐳᖅ ᐃᒪᖃᑦᓯᐊᕐᑐᒥ ᐱᕈᕐᓯᒪᔪᑎᑐᑦ, ᐊᒫᖏᓪᓗ ᐃᒫᓄᑦ ᑎᑭᐅᒪᑦᓯᐊᕐᑐᑎᑐᑦ, ᓯᓚ ᐅᖅᑰᔪᐊᓘᓕᕋᓗᐊᕐᐸᑦ ᓯᕘᕋᖏᑦᑐᑎᑐᑦ, ᐅᖃᐅᔭᖃᕐᑐᑎᑐᑦ ᑐᖑᔪᐃᓐᓇᕐᑐᓂᒃ, ᐸᓂᕐᓇᕐᑐᖃᕋᓗᐊᕐᐸᑦ ᐃᓱᒫᓗᖏᑦᑐᑎᑐᑦ, ᐱᕈᕐᑐᒃᓴᖁᑎᖏᑦ ᐱᕈᐃᓐᓇᐅᔭᕐᒪᑕ.

⁹ ᐆᒻᒪᑎᓕ ᐅᐃᕖᓐᓂᕐᐹᖑᕗᖅ ᓱᓇᓕᒫᓂᑦ, ᐱᐅᖏᑦᑐᕐᔪᐊᖑᓪᓗᓂᓗ; ᑭᐊᓕ ᑐᑭᓯᔪᓐᓇᕐᐸᐅᒃ?

¹⁰ ᐅᕙᖓ ᐊᑕᓂᖅ ᖃᐅᔨᓴᕈᓐᓇᕐᐳᖓ, ᐃᓅᑉ ᐆᒻᒪᑎᖓᓂᒃ ᐃᓱᒪᖓᓂᒡᓗ, ᑐᓂᓯᔪᓐᓇᕐᓗᖓᓗ ᐃᓅᑉ ᐱᓂᐊᕐᓂᖏᑦ ᒪᓕᒡᓗᒋᑦ, ᐱᓂᐊᕐᓂᖏᑕ ᐱᕈᕐᑎᑕᖏᓐᓂᒃ.”

¹¹ ᐊᕿᒡᒋᐅᔭᑎᑐᑦ ᒪᓐᓂᒋᓐᖏᑕᒥᓂᒃ ᐃᕙᓕᕐᑐᑎᑐᑦ, ᐊᖑᑦ ᓈᒻᒪᓈᖏᑦᑐᒃᑯᑦ ᐊᒃᓱᐃᓕᓯᒪᔪᖅ ᑍᒤᑦᑑᕗᖅ, ᐃᓅᓯᖓᑕ ᐃᓚᖓᓂ ᐊᓯᐅᔨᔪᒫᕐᐳᖅ, ᐃᓅᓯᐊᑕᓗ ᐃᓱᐊᓂ ᓯᓔᑦᑑᓂᖓ ᓇᓗᓇᕈᓐᓃᕈᒫᕐᐳᖅ.

¹² ᐃᒃᓯᕙᐅᑕᕐᔪᐊᖅ ᐱᓐᓇᕐᓇᕐᑐᕐᔪᐊᖅ ᐳᕐᑐᔪᓃᑉᐳᖅ, ᐱᒋᐊᕐᓂᖓᓂᑦ ᐃᑦᔪᕐᓁᑦᑐᕕᖁᑎᑦᑕ ᐃᓂᒋᔭᖓ.

¹³ ᐊᑕᓃᖅ ᐃᓴᕆᐊᓕᒥᐅᑦ ᓂᕆᐅᒋᔭᖃᕐᕕᒋᔭᖓᑦ, ᐃᓕᖕᓂᒃ ᕿᒤᔪᑦ ᑲᓐᖑᓇᕐᑐᒦᑦᓱᒫᕐᐳᑦ; ᐃᓕᖕᓂᒃ ᑐᓄᐃᔪᑦ ᐳᔪᕋᒃᑯᑦ ᐊᑎᓕᐅᕐᑕᐅᓯᒪᔪᑎᑐᑦ ᐊᓯᐅᔪᒫᕐᐳᑦ, ᐊᑕᓂᕐᒥᒃ ᕿᒤᓚᐅᕐᒪᑕ, ᐃᒥᕐᕕᒃᓴᒥᒃ ᐃᓅᓯᖃᕐᓇᕐᑐᒥᒃ.

ᔨᕆᒤᐊᐅᑉ ᐃᑲᔪᕐᑕᐅᔪᒪᓂᖓ ᐊᑕᓂᕐᒧᑦ

¹⁴ ᐊᑕᓃᖅ ᐋᖅᑭᓚᐅᓐᖓ, ᑕᕝᕙ ᐋᖅᑭᖕᓂᐊᕐᐳᖓ; ᐱᐅᓕᓚᐅᓐᖓ ᑕᕝᕙ ᐱᐅᓕᔭᐅᓂᐊᕐᐳᖓ; ᐃᕝᕕᑐᐊᖅ ᓂᕐᑐᒐᒃᓴᕆᒐᒃᑭᑦ.

¹⁵ ᑕᑯᒋᑦ, ᐅᖃᐅᑦᔭᐅᕙᒃᐳᖓ, “ᓇᐅᒡᓕ ᐊᑕᓂᐅᑉ ᐅᖃᐅᓯᖓ? ᒫᓐᓇ ᐊᑏ ᑎᑭᓕᕐᓕ!”

¹⁶ ᐰᕐᓯᔨᐅᓂᓐᓂ ᓱᓕ ᕿᒤᓚᐅᕐᓯᒪᓐᖏᓚᖓ, ᐊᑕᓃᖅ ᖃᐅᔨᒪᕗᑎᑦ ᑲᑉᐱᐊᓇᕐᑐᓄᑦ ᑎᑭᑕᐅᖁᔨᓚᐅᖏᓐᓂᓐᓂ, ᐅᖃᐅᓯᕆᔭᓕᒫᒃᑲ ᖃᐅᔨᒪᕙᑎᑦ.

¹⁷ ᑲᑉᐱᐊᓇᕐᑑᑦᑍᓕᒋᑦ ᐅᕙᓐᓄᑦ; ᕿᒫᕕᒃᓴᕆᒐᒃᑭᑦ ᑲᑉᐱᐊᓇᕐᑐᖃᓕᕐᐸᑦ.

¹⁸ ᐊᑭᕋᕐᑐᕐᑎᒃᑲ ᑲᓐᖑᓇᕐᑐᒧᐊᕐᑎᒃᑭᑦ, ᑲᓐᖑᓇᕐᑐᒧᐊᕐᑎᓐᓇᖓ; ᓴᐱᓕᕐᑎᒃᑭᑦ ᓴᐱᕐᓇᕐᑐᒧᐊᕐᑎᓐᓇᖓ, ᐱᐅᖏᑦᑐᒧᑦ ᑎᑭᕝᕕᐅᑎᒃᑭᑦ; ᐊᓯᕈᒃᑭᑦ ᐊᓯᕈᕐᑕᐅᓇᕐᑐᒧᑦ ᒪᕐᕈᕕᓪᓗᐊᕐᑐᒧᑦ.

ᓴᐸᑎᒥᒃ ᐃᒃᐱᒍᓱᑦᓯᐊᕆᐊᖃᕐᓂᖅ

¹⁹ ᐃᒫᒃ ᐊᑕᓂᐅᑉ ᐅᖃᐅᑎᕚᖓ: “ᐃᓄᐃᑦ ᐃᑎᕐᕕᒋᕙᒃᑕᖏᓐᓂ ᐃᑎᕐᑕᕐᕕᖕᒥ ᓇᖏᕆᐊᕐᑐᕆᑦ, ᔫᑕᐅᓪᓗ ᐊᖓᔪᖅᑳᕐᔪᐊᖏᑕ ᐃᑎᕐᕕᒋᕙᒃᑕᖏᓐᓂ, ᔨᕉᓴᓕᐅᓪᓗ ᐊᕙᓗᕐᔪᐊᖓᑕ ᐃᑎᕐᑕᕐᕕᓕᒫᖏᓐᓂ.

²⁰ ᐅᖃᐅᑎᓗᒋᓪᓗ, ‘ᐊᑕᓂᐅᑉ ᐅᖃᐅᓯᖏᓐᓂᒃ ᑐᓴᕆᑦᓯ, ᐊᖓᔪᖅᑳᕐᔪᐊᖑᔪᓯ ᐃᓄᑐᐃᓐᓇᐅᔪᓯᓗ ᔫᑕᒥ, ᔨᕉᓴᓕᒥᐅᑕᐅᔪᓯᓗ ᐃᑎᕐᑕᕐᕕᒃᑎᒍᑦ ᐃᑎᕐᐸᒃᑐᓯ.

²¹ ᐃᒫᒃ ᐊᑕᓂᖅ ᐅᖃᕐᒪᑦ: ᐅᔨᕐᓱᑦᓯᐊᕐᑐᒃᓴᐅᕗᓯ ᐃᓅᓯᓯ ᐱᓪᓗᒋᑦ, ᓴᐸᑎᒥ ᐊᒡᔭᕐᓯᔪᒃᓴᐅᖏᓐᓇᑦᓯ ᐃᑎᕐᑐᒃᓴᐅᓇᓯᓗ ᔨᕉᓴᓕᐅᑉ ᐃᑎᕐᑕᕐᕕᖏᑎᒍᑦ.

²² ᐃᒡᓗᑦᓯᓐᓂᑦ ᐊᒡᔭᕐᓯᓗᓯ ᐊᓂᔪᒃᓴᐅᓐᖏᓚᓯ ᐱᓇᓱᐊᕐᑐᒃᓴᐅᓇᓯᓗ ᓴᐸᑎᒥ, ᓴᐸᑎᓕ ᐃᑦᔪᕐᓁᑎᑕᒃᓴᕆᕙᓯ, ᓯᕗᓕᓯ ᑍᒫᒃ ᐱᖁᓚᐅᕋᒃᑭᑦ.

²³ ᑖᒃᑯᐊᓕ ᓈᓚᓚᐅᓐᖏᓚᑦ ᑐᓴᓚᐅᓐᖏᓚᓪᓗ, ᓯᑎᔫᒐᓱᓚᐅᕐᐳᓪᓕ ᓈᓚᒍᒪᓇᑎᒡᓗ ᐅᖃᐅᑦᔫᓯᐊᒥᖕᓂᒃ.

²⁴ “‘ᓈᓚᑦᓯᐊᕈᑦᓯᓐᖓᓕ, ᐊᑕᓂᖅ ᐅᖃᕐᐳᖅ, ᓴᐸᑎᐅᑎᓪᓗᒍ ᐊᒡᔭᕐᓯᓗᓯ ᐊᕙᒻᒧᒐᕐᑍᓕᓗᓯ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᑎᒍᑦ, ᐃᑦᔪᕐᓁᑎᒃᑯᑦᓯᐅᒡᓗ ᓴᐸᑎ ᓴᓇᕕᒋᑦᑍᓕᓗᒍ.

²⁵ ᑕᕝᕙ ᐊᖓᔪᖅᑳᕐᔪᐊᕆᔭᓯ ᑍᕕᑎᐅᑉ ᑭᖑᕚᖏᓐᓂᑦ ᐱᓯᒪᔪᑦ ᐊᖓᔪᖅᑳᖁᑎᖏᓪᓗ ᐃᑎᕐᐸᖕᓂᐊᕐᐳᑦ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᑎᒍᑦ ᔫᑕᒥᐅᓂᒃ ᔨᕉᓴᓕᒥᐅᓂᒡᓗ ᐃᓚᖃᕐᓗᑎᒃ ᕿᒧᒃᓯᐅᑎᖁᑎᒥᒃᑎᒍᑦ, ᐃᒡᓗᒐᓴᒡᔪᐊᓪᓗ ᑖᒃᑯᐊ ᐃᓄᕾᓐᓇᕐᓂᐊᕐᐳᑦ ᐃᓱᖃᖏᑦᑐᒧᑦ.

²⁶ ᐃᓄᐃᓪᓗ ᑎᑭᑉᐸᒍᒫᕐᐳᑦ, ᔫᑕᐅᑉ ᓄᓇᓕᖁᑎᖏᓐᓂᑦ, ᓄᓇᓕᖕᓂᓪᓗ ᔨᕉᓴᓕᐅᑉ ᓴᓂᐊᓃᑦᑐᓂᑦ, ᐱᓐᔭᒥᓂᐅᓪᓗ ᓄᓇᖏᓐᓂᑦ, ᖃᖅᑲᒥᐅᓪᓗ ᑭᒡᓕᖓᓂᒥᐅᓂᑦ ᓂᒋᑉᒥᓗ ᓄᓇᖃᕐᑐᓂᑦ ᑐᓂᕐᕈᓯᕆᐊᕐᑐᕐᓗᑎᒃ ᐆᑕᒃᓴᓂᒃ, ᓂᐊᖂᔭᒃᓴᓂᒃ, ᐳᔫᕐᑎᑕᒃᓴᓂᒡᓗ ᖁᔭᓕᑦᔪᑎᒃᓴᓂᒡᓗ ᐊᑕᓂᐅᑉ ᐃᒡᓗᖓᓂ.

²⁷ ᓈᓚᖏᒃᑯᑦᓯᓐᖓᓕ ᓴᐸᑎᓗ ᐃᑦᔪᕐᓁᑎᖏᒃᑯᑦᓯᐅᒃ, ᐊᒡᔭᕐᓯᑦᑍᓕᖏᒃᑯᑦᓯᓗ ᓴᐸᑎᐅᑎᓪᓗᒍ ᔨᕉᓴᓕᐅᑉ ᐃᑎᕐᑕᕐᕕᖏᑎᒍᑦ, ᑕᕝᕙ ᐃᑎᕐᑕᕐᕕᖏᑦ ᐃᑯᐊᓪᓚᒍᒫᕐᐸᒃᑲ, ᔨᕉᓴᓕᒻ ᐊᖓᔪᖅᑳᒃᑯᕕᖓ ᓄᖑᑕᐅᔪᒫᕐᐳᖅ ᖃᒥᑕᐅᔪᓐᓇᕈᒫᓐᖏᓚᕐᓗ.’”