ᔨᕆᒤᐊᐅᑉ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓂᐅᑉ ᐊᑐᕈᒪᓂᖓ ᔨᕆᒤᐊᒥᒃ 1 ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ: 2 “ᑕᕝᕙᓐᖓᑦ ᓄᓇᓕᖕᓂᑦ ᓄᓕᐊᓂᒃᑐᒃᓴᐅᓐᖏᓚᑎᑦ ᕿᑐᕐᖓᕐᑖᕐᑐᒃᓴᐅᓇᑎᓪᓗ ᑕᕝᕙᓐᖓᑦ. 3 ᐃᒫᒃ ᐊᑕᓂᖅ ᐅᖃᐅᓯᒃᓴᖃᕐᒪᑦ ᐊᓈᓇᐅᔪᓄᑦ ᐊᑖᑕᐅᔪᓄᓪᓗ ᑕᕝᕙᓂ ᓄᓇᒥ ᕿᑐᕐᖏᐅᕐᓯᒪᔪᓄᑦ. 4 ᑐᖁᕋᕈᒫᕐᐳᑦ ᖃᓂᒪᓇᕐᑐᓄᑦ, ᕿᒃᓵᒍᑕᐅᔪᒫᓐᖏᓚᑦ ᐃᓗᕕᕐᑕᐅᖏᓪᓗᑎᒡᓘᓐᓃᑦ; ᓄᓇᒥᓕ ᐊᓇᕐᑎᑐᑦ ᑕᒫᓃᕐᕆᑐᐃᓐᓇᕈᒫᕐᐳᑦ ᑎᒥᕕᓂᖏᑦ. ᑐᖁᕋᕐᑕᐅᔪᒫᕐᐳᑦ ᐅᓇᑕᕐᑐᓂ, ᑳᖕᓇᕐᑐᕐᔪᐊᒧᓪᓗ, ᑎᒥᕕᓃᓪᓗ ᓂᖃᐅᓕᕈᒫᕐᐳᑦ ᑎᖕᒥᐊᓄᑦ ᐆᒪᔪᓄᓪᓗ ᓄᓇᒦᑦᑐᓄᑦ.” 5 ᐊᑕᓂᖅ ᐃᒫᒃ ᐅᖃᕐᒪᑦ: “ᐃᒡᓗᒧᑦ ᕿᒃᓵᒃᑐᓄᑦ ᐃᑎᕐᑍᓕᒋᑦ, ᕿᒃᓵᖃᑎᒋᔭᕐᑐᕐᑍᓕᒃᑭᑦ ᓇᒡᓕᒍᓱᖕᓃᓪᓘᓐᓃᑦ ᑕᑯᒃᓴᐅᑎᑦᑍᓕᒍᒃ ᓮᒻᒪᕐᑎᓐᓂᐊᕈᓐᓃᕋᒃᑭᑦ ᓇᒡᓕᒋᓂᐊᕈᓐᓃᕐᓗᒋᓪᓗ ᐃᓚᑦᓱᒋᓂᐊᕈᓐᓃᕋᒃᑭᓪᓘᓐᓃᑦ, ᐊᑕᓂᖅ ᐅᖃᕐᐳᖅ. 6 ᑕᒪᕐᒥᒃ ᐊᔪᖏᑦᑐᑦ ᐊᔪᕐᑐᓪᓗ ᑐᖁᔪᒫᕐᐳᑦ ᓄᓇᒥ ᑕᒫᓂ; ᐃᓗᕕᕐᑕᐅᔪᒫᓐᖏᓚᑦ, ᕿᒃᓵᒍᑕᐅᔪᒫᓐᖏᓚᓪᓘᓐᓃᑦ ᐅᒡᒍᐊᕐᓂᕐᒧᑦ ᑭᓪᓕᐊᑦᔪᑕᐅᔪᒫᓐᖏᓚᑦ ᓄᔧᔭᕈᑕᐅᔪᒫᕋᑎᒡᓗ. 7 ᐃᓚᓐᖓᕐᑐᓪᓗ ᓂᕆᔭᒃᓴᖏᓐᓂᒃ ᐋᑦᓯᕕᐅᓂᐊᓐᖏᓚᑦ ᓮᒻᒪᕐᓴᕐᑕᐅᓇᓱᐊᕐᓗᑎᒃ; ᐊᑖᑍᕐᑑᒐᓗᐊᑦ ᐊᓈᓁᕐᑑᒐᓗᐊᓪᓗ ᐃᓚᑦᓱᒋᔭᐅᔪᒫᓐᖏᓚᑦ. 8 “ᓂᕆᕕᒡᔪᐊᕐᑐᓄᑦ ᐃᑎᕐᑐᒃᓴᐅᓐᖏᓚᑎᑦ ᓂᕆᖃᑕᐅᔪᒪᓗᑎᑦ ᐃᒥᖃᑕᐅᓗᑎᓪᓘᓐᓃᑦ.” 9 ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᒪᑦ: “ᐃᓅᑎᓪᓗᓯ ᓱᓕ ᐅᓪᓗᒥ ᐃᓅᔪᓯ, ᖁᕕᐊᓱᒡᕙᓗᒃᑐᓂᒃ ᑐᓵᔭᒃᓴᖃᕈᓐᓃᕈᒫᕐᐳᓯ, ᓄᓕᐊᓂᕋᑖᕐᑐᑦ ᐅᐃᓂᕋᑖᕐᑐᓪᓗ ᓂᐱᖏᑦ ᖁᕕᐊᓱᒃᑐᑦ ᑐᓴᕐᓴᐅᕙᒍᓐᓃᕈᒫᕐᐳᑦ. 10 “ᑕᒪᒃᑯᓂᖓᓕ ᐅᖃᐅᑎᒍᕕᒋᑦ, ᐊᐱᕆᔭᐅᒍᕕᑦ ᐃᒫᒃ, ‘ᓱᖕᒪᑦ ᐊᑕᓂᖅ ᑍᒫᓗᐊᕌᓗᒃ ᑲᑉᐱᐊᓇᕐᑐᓂᒃ ᑎᑭᑎᑦᓯᕚ ᐅᕙᑦᑎᓐᓄᑦ? ᓱᓇᒥᒃ ᐱᐅᖏᑦᑐᓕᑦᔪᑎᖃᕐᓂᕋᑦᑖ? ᓱᓇᒥᒡᓗ ᐊᔪᕐᑐᓕᓐᓂᕋᑦᑕ ᐊᑕᓂᕐᒧᑦ ᒎᑎᑦᑎᓐᓅᑦ?’ 11 ᐃᒫᒃ ᐅᖃᐅᑎᔭᒃᓴᕆᕙᑎᑦ, ‘ᓯᕗᓕᕕᓂᑦᓯ ᕿᒪᓚᐅᕐᒪᖓ, ᐊᑕᓂᖅ ᐅᖃᕐᐳᖅ, ᒎᑎᓐᖑᐊᓂᒡᓗ ᒪᓕᒐᖃᖔᓕᓚᐅᕐᒪᑕ ᑖᒃᑯᐊᓗ ᐱᔨᑦᓯᖔᓕᕐᓗᒋᑦ ᑐᒃᓯᐊᕐᕕᒋᕙᒃᓗᒋᓪᓗ, ᐅᕙᓐᓂᒡᓕ ᕿᒤᓪᓗᑎᒃ ᐱᖁᔭᒃᑲ ᒪᓕᒍᒪᔪᓐᓃᓚᐅᕐᐰᑦ. 12 ᐃᓕᑦᓯᓕ ᓯᕗᓕᕕᓂᑦᓯᓐᓂᑦ ᐱᐅᖏᓐᓂᕐᓴᒃᑲᓐᓂᕐᓂᒃ ᐃᓕᖅᑯᓯᖃᓕᕐᐳᓯ, ᑕᑯᔪᓐᓇᕐᐳᓯᓗ ᓇᖕᒥᓂᖅ ᓴᖑᑎᑕᒃᓴᐅᖏᑦᑐᑦ ᐆᒻᒪᑎᓯ ᐱᐅᖏᑦᑐᑦ ᒪᓕᖔᕐᓗᒋᑦ ᐅᕙᓐᓂᒃ ᓈᓚᒍᓐᓃᕋᑦᓯ. 13 ᑍᒤᒻᒪᑦ ᓄᓇᒥᑦ ᑕᒫᓐᖓᑦ ᐃᒋᑕᐅᑎᓐᓂᐊᕐᐸᑦᓯ ᓄᓇᒧᑦ ᓯᕗᓕᕕᓂᑦᓯᓐᓄᑦ ᐊᒡᓛᑦ ᖃᐅᔨᒪᔭᐅᓚᐅᖏᑦᑐᒧᑦ ᓄᓇᑖᕐᓗᓯᓗ ᑕᕝᕙᓂ, ᑕᕝᕙᓂᓗ ᒎᑎᒋᔪᒪᔭᑦᓯᓐᓂᒃ ᒎᑎᖃᕈᒫᕋᑦᓯ ᖃᐅᑕᒫᑦ ᐱᔨᑦᓯᕐᓂᐊᕐᑕᑦᓯᓐᓂᒃ ᐅᓪᓗᒃᑯᑦ ᐅᓐᓄᐊᒃᑯᓪᓗ, ᐃᓕᑦᓯᓐᓂᒃ ᓂᑲᒍᓱᖕᓂᐊᕈᓐᓃᕐᐳᖓ.’” ᐊᐅᓪᓚᕈᑦᔭᐅᓯᒪᕕᖕᒥᑦ ᐅᑎᕈᒫᕐᓂᒃᓴᖅ 14 “ᑍᒤᒻᒪᑦ ᑕᑯᒋᑦ, ᐅᓪᓗᐃᑦ ᑎᑭᓕᕐᐳᑦ, ᐊᑕᓂᖅ ᐅᖃᕐᐳᖅ, ᐅᖃᕐᑐᖃᕐᐸᒍᓐᓃᕈᒫᕐᐳᖅ ᐃᒫᒃ, ‘ᐊᑕᓂᖅ ᐃᓅᖕᒪᑦ, ᐃᓴᕆᐊᓕᒥᐅᓂᒃ ᐊᐅᓪᓚᕐᑎᑦᓯᓚᐅᕐᑐᖅ ᐄᑦᔨᑉᑎᒥᑦ.’ 15 ᐅᖃᖔᖃᑦᑕᓕᕈᒫᕐᐳᓪᓕ ᐃᒫᒃ, ‘ᐊᑕᓂᖅ ᐃᓅᖕᒪᑦ ᐃᓴᕆᐊᓕᒥᐅᓂᒃ ᐊᐅᓪᓚᕐᑎᑦᑎᓯᒪᔪᖅ ᐅᓐᓄᐊᓪᓗᐊᑉ ᓇᓛᓃᑦᑐᓂᑦ ᓄᓇᓕᖕᓂᑦ ᖁᔭᓈᕐᓯᕕᒋᓯᒪᔭᒥᓂᑦ ᑖᒃᑯᓂᖓ.’ ᐅᑎᕐᑎᑦᓱᒫᕋᒃᑭᑦ ᓯᕗᓕᕕᓂᖏᓐᓄᑦ ᓄᓇᑖᖑᑎᓚᐅᕐᓯᒪᔭᓐᓄᑦ.” ᓱᒋᐊᕐᑕᐅᓂᒃᓴᐅᑉ ᕾᕙᓪᓕᐊᓂᖓ 16 “ᑕᑯᒋᑦ, ᐃᖃᓗᒃᓯᐅᕐᑎᓂᒃ ᐅᓄᕐᑐᓂᒃ ᑎᓕᓯᕕᒋᓂᐊᕐᐸᒃᑲ, ᐊᑕᓂᖅ ᐅᖃᕐᐳᖅ, ᐱᔭᕆᔭᐅᓂᐊᕐᐳᓪᓗ, ᑕᒪᑐᒪᓕ ᑭᖑᓂᖓᒍᑦ ᐆᒪᔪᕐᓯᐅᕐᑎᓂᒃ ᐅᓄᕐᑐᓂᒃ ᑎᓕᓯᓂᐊᕆᕗᖓ ᐱᔭᐅᓇᓱᐊᖁᓪᓗᒋᑦ ᖃᖅᑲᓃᕝᕕᒋᔭᖏᓐᓂᑦ, ᐱᖑᕐᒦᕝᕕᒋᔭᖏᓐᓂᓪᓗ, ᕾᕈᓱᖕᒦᕝᕕᒋᔭᖏᓐᓂᓪᓗ. 17 ᐱᐅᓯᕆᔭᓕᒫᖏᑦ ᖃᐅᔨᒪᑦᓯᐊᕋᒃᑭᑦ; ᐅᕙᓐᓄᑦ ᐃᔨᕐᓯᒪᖏᒻᒪᑕ, ᐊᔪᕐᑐᓕᓂᖏᓪᓗ ᑕᕐᕆᓯᒪᔪᖃᕋᑎᒃ ᐅᕙᓐᓄᑦ. 18 ᒪᕐᕈᐃᕐᑐᓪᓗᐊᕐᑐᒥᒃ ᐊᑭᓂᐊᕐᕕᒋᔪᒫᕐᐸᒃᑲ ᐱᐅᖏᑦᑐᓕᓂᖏᓐᓄᑦ ᐊᔪᕐᑐᓕᓂᖏᓐᓄᓪᓗ, ᓄᓇᖁᑎᒐ ᓇᕐᕈᓇᕐᓯᑎᑕᐅᓯᒪᖕᒪᑦ ᐆᒪᖏᑦᑐᓂᒃ ᒎᑎᓐᖑᐊᓕᐅᕐᕕᐅᓪᓗᑎᒃ, ᑭᖑᕐᖑᑎᔭᒃᓴᕋᓗ ᓇᕐᕈᓇᕐᑐᓂᒃ ᒎᑎᓐᖑᐊᓂᒃ ᑕᑕᑎᕐᓯᒪᕚᑦ.” ᔨᕆᒤᐊᐅᑉ ᑐᒃᓯᐊᕐᓂᖓ ᖁᓚᕋᓂ ᐊᑕᓂᕐᒧᑦ 19 ᐊᑕᓃᖅ ᐱᔪᓐᓇᐅᑎᒋᕙᒋᑦ ᓴᐴᓗᑕᕆᓪᓗᑎᓪᓗ, ᕿᒫᕕᒋᕙᒃᐸᒋᑦ ᐅᖁᒤᑦᑐᒦᓕᕌᖓᒪ, ᐃᓅᖃᑎᒌᒡᔪᐊᑦ ᐃᓕᖕᓄᐊᕐᑐᒃᓴᐅᖕᒪᑕ ᐅᖃᕐᓗᑎᒡᓗ: “ᓯᕗᓕᕗᑦ ᑭᖑᕐᖑᑦᔨᓚᐅᓐᖏᓚᑦ ᓱᓇᒥᒡᓘᓐᓃᑦ ᓴᒡᓗᕿᑕᐅᓂᕐᒥᒃ ᑭᓯᐊᓂ, ᒎᑎᓐᖑᐊᓂᒃ ᐊᑑᑎᖃᖏᑦᑐᓂᒃ ᐱᕚᓪᓕᕈᑎᒃᓴᐅᖏᑦᑐᓂᒃ. 20 ᐃᓄᐃᑦ ᓇᖕᒥᓂᖅ ᓴᓇᔭᒥᖕᓂᒃ ᒎᑎᖃᕈᓐᓇᕐᐹᑦ? ᑍᒤᑦᑐᓪᓕ, ᒎᑎᐅᓐᖏᓚᑦ! 21 ᑍᒤᒻᒪᑦ ᑕᑯᒋᑦ, ᖃᐅᔨᑎᓐᓂᐊᕐᐸᒃᑲ, ᑕᒪᑐᒪᓂ ᖃᐅᔨᑎᓐᓂᐊᕐᐸᒃᑲ, ᐱᔪᓐᓇᕐᓂᖃᕐᓂᓐᓂᒃ ᓴᓐᖏᔫᓂᓐᓂᒡᓗ, ᖃᐅᔨᓕᕐᓂᐊᕐᒪᑕ ᐊᑎᖃᕋᒪ ᐊᑕᓂᕐᒥᒃ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society