ᔨᕆᒤᐊᐅᑉ ᐊᒡᓚᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᑕᒥᐅᑦ ᐊᓯᕈᕐᑕᐅᔪᒃᓴᐅᓂᖓᑦ

¹ ᑕᕝᕙ ᐊᑕᓂᐅᑉ ᐅᖃᕐᕕᒋᕚᖓ, “ᒨᓯᓯᓗ ᓴᒧᐃᓕᓗ ᐅᕙᓐᓄᑦ ᕿᓄᒐᔭᕋᓗᐊᕐᐸᑎᒃ, ᑖᒃᑯᐊ ᐃᓅᖃᑎᒌᑦ ᓂᑲᒋᓕᕋᔭᓐᖏᓚᒃᑲ, ᑕᑯᓐᓇᕈᒪᖏᓐᓇᒃᑭᑦ ᓇᔪᕐᑕᓐᓂᑦ ᐊᐅᓪᓚᖁᓚᐅᒃᑭᑦ.

² ᐊᐱᕆᔭᐅᒍᕕᑦ, ‘ᓇᒧᓐᖓᕐᓂᐊᕋᑦᑕᓖ?’ ᐅᖃᐅᑎᓂᐊᕐᐸᑎᑦ, ‘ᐃᒫᒃ ᐊᑕᓂᖅ ᐅᖃᕐᐳᖅ: “ᑍᒃᑯᐊ ᐋᓐᓂᐊᔪᑦ ᑐᖁᓂᐊᕐᐳᑦ, ᐅᓇᑕᕐᑐᓂᓗ ᑐᖁᔪᒃᓴᒃᓮᑦ ᑐᖁᓂᐊᕐᐳᑦ; ᐱᕐᓕᕐᓗᑎᒡᓗ ᑐᖁᔪᒃᓮᑦ ᐱᕐᓕᕐᓗᑎᒃ ᑐᖁᓂᐊᕐᐳᑦ, ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒃᓮᑦ ᐊᐅᓪᓚᕈᑦᔭᐅᓂᐊᕐᐳᑦ.”’

³ ᓯᑕᒪᓂᒃ ᐊᑦᔨᒌᖏᑦᑐᓂᒃ ᐊᓯᕈᐃᔪᒃᓴᓂᒃ ᑎᑭᑎᑦᓯᓂᐊᕐᐳᖓ, ᐊᑕᓂᖅ ᐅᖃᕐᐳᖅ, ᓴᕕᒡᔪᐊᒥᒃ ᑐᖁᑦᓯᑦᔪᑎᒃᓴᒥᒃ, ᕿᒻᒥᓂᒡᓗ ᑎᒥᖏᑦ ᐅᓂᐊᕐᑕᐅᓗᑎᒃ ᓂᕆᔪᒃᓴᓂᒃ, ᑎᖕᒥᐊᓂᒡᓗ ᑎᒥᕕᓂᕐᓂᒃ ᓂᕆᔪᒃᓴᓂᒃ, ᐆᒪᔪᓂᒡᓗ ᓄᔪᐊᕐᑕᓂᒃ ᑎᒥᕕᓂᕐᓂᒃ ᓂᕆᔪᒃᓴᓂᒃ ᓄᖑᑕᐅᖁᓪᓗᒋᑦ.

⁴ ᐊᖓᔪᖅᑳᕐᔪᐊᓄᑦ ᓄᓇᕐᔪᐊᓕᒫᒥ ᑲᑉᐱᐊᓲᑎᒃᓴᐅᑎᓐᓂᐊᕐᐸᒃᑲ ᐊᖓᔪᖅᑳᕐᔪᐊᑉ ᒫᓇᓯᐅᑉ ᕼᐃᓯᑬᐊᐅᑉ ᐃᕐᓂᖓᑕ ᐱᓂᐊᕐᓂᕆᓚᐅᕐᑕᖏᑦ ᔨᕉᓴᓕᒧᑦ ᐱᑦᔪᑎᒋᓗᒋᑦ.

⁵ ᑭᒃᑯᓐᓄᓪᓕ ᓇᒡᓕᒋᔭᐅᓂᐊᕐᐱᓰ, ᔨᕉᓴᓕᒥᐅᑕᐅᔪᓯ? ᑭᒃᑯᓐᓄᓪᓗ ᕿᒃᓵᒍᑕᐅᓂᐊᕐᐱᓰ? ᑭᓇᒃᑯᓐᓄᓪᓗ ᖃᓄᐃᒻᒪᖔᑦᓯ ᐊᐱᕆᔭᐅᔪᓐᓇᕐᓂᐊᕐᐱᓰ?

⁶ ᓇᕐᕈᒋᓕᓚᐅᕋᑦᓯᓐᖓ, ᐊᑕᓂᖅ ᐅᖃᕐᐳᖅ, ᐅᕙᓐᓂᒃ ᑐᓄᐃᒐᑦᓯ; ᑎᒍᓂᐊᕐᐸᑦᓯ ᐊᓯᕈᕐᑕᐅᑎᓪᓗᓯᓗ; ᑕᖃᑦᔪᑎᒐᑦᓯ.

⁷ ᐱᕈᕐᓰᕕᓕᕆᔩᑦ ᓴᓃᔭᐅᑎᖏᓐᓄᑦ ᑎᒃᑕᐅᕋᕐᑎᑦᓱᒫᕐᐸᑦᓯ ᐊᓄᕆᒧᑦ ᐃᒡᓗᒐᓴᒡᔪᐊᑦ ᐃᑎᕐᑕᕐᕕᖏᓐᓂ; ᕿᒃᓵᒃᑎᓐᓂᐊᕐᐸᒃᑲ, ᐊᓯᕈᕐᓗᒋᓪᓗ ᐃᓄᖁᑎᒃᑲ; ᐱᐅᓯᕐᒥᖕᓂᒃ ᕿᒤᓚᐅᖏᒻᒪᑕ.

⁸ ᐅᐃᒡᒐᕐᓂᖁᑎᖏᑦ ᐅᓄᕐᓂᕐᓴᐅᓂᐊᕐᐳᑦ ᓯᐅᕋᕐᓂᑦ ᓯᒡᔭᒦᑦᑐᓂᑦ; ᐅᓪᓘᑉ ᕿᑎᖓᓂ ᐊᓯᕈᐃᔭᕐᑐᕐᑐᒥᒃ ᑎᑭᑎᑦᓯᓂᐊᕐᐳᖓ ᐃᓅᓱᒃᑐᐃᑦ ᐊᓈᓇᖏᓐᓄᑦ ᕿᒃᓵᖕᓇᕐᑎᑦᓯᓂᐊᕐᐳᖓ; ᓂᕆᐅᓇᖏᑦᑐᒃᑯᑦ ᐋᓐᓂᕐᓇᕐᑐᒃᑯᑦ ᑲᑉᐱᐊᓇᕐᑐᑯᓪᓗ.

⁹ ᐊᕐᓇᖅ 7ᓂᒃ ᕿᑐᕐᖓᓕᒃ ᓄᑮᕈᑎᓂᐊᕐᐳᖅ ᐊᓂᕐᓇᖏᕐᓗᓂᓗ; ᓯᕿᓂᖅ ᑕᑯᓐᓇᕈᓐᓃᕐᓂᐊᕐᐹ ᓱᓕ ᐅᓪᓘᒐᓗᐊᕐᑎᓪᓗᒍ; ᖁᕕᐊᓇᖏᑦᑐᒦᓐᓂᐊᕐᐳᖅ ᑲᓐᖑᓇᕐᑐᒦᓪᓗᓂᓗ. ᐊᒥᐊᒃᑰᔫᓪᓗ ᐅᓇᑕᕐᑐᓂ ᑐᖁᑕᐅᔪᒫᕐᐳᑦ, ᐊᑕᓂᖅ ᐅᖃᕐᐳᖅ.”

ᔨᕆᒤᐊᐅᑉ ᓈᒻᒪᒃᓴᖏᓪᓗᓂ ᐅᖃᕐᓂᖓ ᐊᑕᓂᕐᒧᑦ

¹⁰ ᑲᑉᐱᐊᓐᓇᒦᒃ, ᐊᓈᓇᒪ ᕿᑐᕐᖓᕐᑖᕆᓚᐅᕐᓂᕐᒪᖓ, ᐃᓅᓕᕋᒪ ᐊᒃᓱᕈᕐᓇᓗᐊᕐᑐᒥᒃ, ᑮᓇᐅᔭᓂᒃ ᐊᑐᕐᑐᐊᓚᐅᕐᓯᒪᓇᖓ ᐊᑐᕐᕕᖃᓚᐅᕐᓯᒪᓇᖓᓗ, ᐅᕙᓐᓂᒡᓕ ᐅᖃᕐᓂᕐᓘᑎᖃᓕᕐᐳᑦ.

¹¹ ᐊᑕᓃᖅ ᑍᒤᓕᕐᓕ, ᐱᐅᔪᒥᒃ ᐱᓇᓱᐊᓚᐅᖏᒃᑯᒪ ᐃᓕᖕᓄᑦ, ᑐᒃᓯᐊᓚᐅᖏᒃᑯᒪᓗ ᐃᓕᖕᓄᑦ ᐊᑭᕋᕐᑐᕐᑐᑦ ᐱᑦᔪᑎᒋᓗᒋᑦ ᑲᑉᐱᐊᓇᕐᑐᖃᓕᕐᑎᓪᓗᒍ ᐅᖁᒤᑦᑐᖃᓕᕐᑎᓪᓗᒍᓗ.

¹² ᐃᓄᒃ ᓱᕅᔪᓐᓇᕐᐹ? ᓴᕕᕋᔮᓗᖕᒥᒃ ᑲᓐᓄᔭᒥᒃ ᐃᓚᖃᕐᑐᒥᒃ? ᐅᓐᓄᐊᓪᓗᐊᑉ ᓇᓛᓂᒥᐅᓂᑦ ᐱᓯᒪᔪᒥᒃ?

¹³ “ᐊᒃᓗᐃᑦᔪᑎᓯ ᐱᒃᑯᒥᓇᕐᑐᖁᑎᓯᓗ ᓇᒡᕚᕐᑕᒐᒃᓴᐅᔪᒫᕐᐳᑦ, ᐊᑭᖃᖏᓪᓗᑎᒃ, ᐊᔪᕐᑐᓕᓂᓯ ᐱᓪᓗᒋᑦ ᓄᓇᒋᔭᓕᒫᑦᓯᓐᓂ.

¹⁴ ᓯᐊᓛᕆᔭᐅᓕᕈᒫᕐᐳᓯ ᐊᑭᕋᑦᓯᓐᓄᑦ ᓄᓇᒋᓚᐅᕐᓯᒪᓐᖏᑕᑦᓯᓐᓂ, ᓂᓐᖓᐅᓯᕋ ᐃᑯᐊᓛᕐᑐᑎᑐᑦ ᐃᑯᐊᓚᔪᒫᕐᒪᑦ ᐃᓱᖃᖏᑦᑐᒧᑦ.

¹⁵ “ᐊᑕᓃᖅ ᖃᐅᔨᒪᑦᓯᐊᕋᕕᑦ, ᐃᖅᑲᐅᒪᓗᖓ ᐅᐸᓚᐅᓐᖓ, ᐊᑭᕋᕐᑐᕐᑎᒃᑲ ᐊᑭᓂᐊᕐᕕᒋᓚᐅᒃᑭᑦ, ᕿᓄᐃᓵᕈᓐᓇᕐᓂᓐᓄᑦ ᐊᐅᓪᓚᕈᑦᔭᐅᑎᑦᑍᓕᓐᖓ; ᐅᖁᒤᒃᓴᕐᑎᑕᐅᓂᕋ ᐃᓕᖕᓂᒃ ᐱᑦᔪᑎᖃᕐᓂᖓ ᖃᐅᔨᒪᕙᑦ.

¹⁶ ᐅᖃᐅᑎᒐᕕᖓ ᐅᖃᐅᓯᕆᔭᑎᑦ ᐆᒻᒪᒻᒥᐅᑕᕐᑖᕆᓚᐅᕐᐸᒃᑲ, ᖁᕕᐊᓲᑎᒃᓴᕐᑖᕆᓪᓗᒋᓪᓗ ᐃᓗᒃᑯᑦ, ᕾᖁᔭᐅᓯᒪᒐᒪ ᐊᑎᒃᑯᑦ, ᐊᑕᓃᖅ ᕿᓚᖕᒥᐅᒐᓴᒡᔪᐃᑦ ᒎᑎᖓᑦ.

¹⁷ ᖁᕕᐊᓱᒃᑐᑦ ᐃᒃᓯᕙᖃᑎᒋᓚᐅᓐᖏᓚᒃᑲ, ᖁᕕᐊᓱᓚᐅᓐᖏᓚᖓᓘᓐᓃᑦ; ᐃᓄᑑᓪᓗᖓ ᐃᒃᓯᕙᓚᐅᕐᐳᖓ, ᕾᖁᔭᐅᓯᒪᓂᕋ ᐃᓕᖕᓄᑦ ᐱᑦᔪᑎᒋᓪᓗᒍ, ᓂᓐᖓᐅᒪᓂᕐᒥᒃ ᑕᑕᑎᓚᐅᕋᕕᖓ.

¹⁸ ᓱᖕᒪᓪᓕ ᐋᓐᓂᐊᓂᕋ ᓄᖅᑲᕈᓐᓇᓐᖏᓚᖅ, ᐃᑭᓕᕐᑕᐅᓂᒃᑲᓗ ᒪᒥᑦᓱᓐᓇᕋᑎᒃ, ᐊᖅᑮᔪᒪᓐᖏᓚᑏᑦ? ᑰᒃᑎᑐᑦ ᐃᒤᕈᓯᒪᔪᑎᑐᑦ ᐅᕙᓐᓄᑦ ᑍᒤᑦᑑᓂᐊᕐᐲᑦ?”

¹⁹ ᑍᒤᒻᒪᑦ ᐊᑕᓂᖅ ᐃᒫᒃ ᐅᖃᕐᐳᖅ: “ᐅᕙᓐᓄᑦ ᐅᑎᕈᕕᑦ ᑕᕝᕙ ᐅᑎᕐᑎᓐᓂᐊᕐᐸᒋᑦ, ᐱᔨᑦᓯᓕᕐᓂᐊᕋᕕᖓ, ᐊᑐᕐᓇᕐᑐᓂᒡᓗ ᐅᖃᓪᓚᖃᑦᑕᓕᕐᓂᐊᕋᕕᑦ, ᐊᑐᕐᓇᖏᑦᑐᓂᒃ ᐅᖃᐅᓯᖃᕈᓐᓃᕐᓗᑎᑦ, ᖃᓂᕆᓕᕐᓂᐊᕆᕙᒋᑦ, ᑖᒃᑯᓄᖓ ᐅᐸᒃᑕᐅᔪᒫᕐᐳᑎᑦ, ᑖᒃᑯᓄᖓᓕ ᐅᐸᒍᑎᔭᕆᐊᖃᕐᓂᐊᓐᖏᓚᑎᑦ.

²⁰ ᐃᒡᓗᒐᓮᑦ ᐊᕙᓗᕐᔪᐊᖏᑎᑐᑦ ᑍᒤᑦᑑᑎᓐᓂᐊᕐᐸᒋᑦ ᐃᓄᖕᓄᑦ, ᐊᕙᓗᕐᔪᐊᑎᑐᑦ ᐱᔭᐅᓐᓇᖏᑦᑐᑎᑐᑦ ᑲᓐᓄᔭᒥᑦ ᓴᓇᔭᐅᓯᒪᔪᑎᑐᑦ, ᐃᓕᖕᓂᒃ ᐱᓇᓱᐊᕋᓗᐊᕈᑎᒃ ᓵᓚᖃᕐᓂᐊᓐᖏᓚᑦ, ᐅᕙᖓ ᓇᔪᕐᓂᐊᕋᒃᑭᑦ ᓴᐳᑎᓂᐊᕐᐸᒋᑦ ᐱᐅᓕᓗᑎᓪᓗ.” ᐊᑕᓂᖅ ᐅᖃᕐᐳᖅ.

²¹ “ᓴᐳᑎᓂᐊᕐᐸᒋᑦ ᐊᔪᕐᑐᓕᔪᑦ ᐊᒡᒐᖏᓐᓂᑦ, ᐱᐅᓕᓗᑎᓪᓗ ᐊᑐᖏᑦᑐᓕᔪᓂᑦ.”