ᔨᕆᒤᐊᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᐅᑉ ᕿᑎᕐᒥᐅᑕᕐᑖᖁᔭᐅᓂᖓ

¹ ᐊᑕᓂᖅ ᐅᕙᓐᓄᑦ ᐃᒫᒃ ᐅᖃᕐᐳᖅ, “ᖃᓪᓗᓈᕐᑕᒥᒃ ᕿᑎᕈᑎᑖᕆᐊᕐᑐᓕᕆᑦ, ᐱᒍᕕᐅᒃ ᕿᑎᕈᓯᐅᑎᓂᐊᕐᐸᑦ, ᐃᒪᕐᒧᑦ ᒥᓱᒃᑎᑦᑍᓕᓗᒍ.”

² ᑕᕝᕙ ᕿᑎᕈᑎᑖᕆᐊᕐᑐᓚᐅᕐᐳᖓ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ, ᐊᑎᓪᓗᒍᓗ.

³ ᐊᑕᓂᐅᓪᓗ ᐅᖃᕐᕕᒋᒃᑲᓐᓂᓕᕆᕚᖓ ᐂᑉᐸᖓᓂᒃ,

⁴ “ᕿᑎᕈᑎᑖᕆᔧᑦ ᐊᑐᓕᕐᑕᑦ, ᐃᕗᕅᑎᒧᑦ ᐃᔨᕆᐊᕐᑐᓕᕈᒃ ᕾᕐᑑᑉ ᖁᖕᓈᖓᓄᑦ.”

⁵ ᑕᕝᕙ ᐃᔨᕆᐊᕐᑐᓚᐅᕐᐸᕋ ᐃᕗᕅᑎᒧᑦ ᐊᑕᓂᐅᑉ ᑍᒫᒃ ᐱᖁᖕᒪᖓ.

⁶ ᐅᓪᓗᐃᑦ ᐅᓄᕐᑐᑦ ᑭᖑᓂᖓᑦᑎᒍᑦ, ᐊᑕᓂᐅᑉ ᐅᖃᕐᕕᒋᕚᖓ, “ᐃᕗᕅᑎᒧᑦ ᐂᓚᐅᕐᒥᒍᒃ ᕿᑎᕈᑏᑦ ᐃᔨᕆᐊᕐᑐᖁᓚᐅᕐᑕᕋ ᑍᑯᖓ.”

⁷ ᐃᕗᕅᑎᒧᐊᕋᒪ, ᐃᔨᓚᐅᕐᑕᕋ ᕿᑎᕈᑎ ᐱᒋᕙᕋ ᐃᔨᕐᓯᕕᒋᓚᐅᕐᑕᓐᓂᑦ. ᑕᑯᒋᓪᓗ, ᕿᑎᕈᑎ ᐱᐅᔪᓐᓃᕐᐳᖅ; ᐊᑐᒐᒃᓴᐅᔪᓐᓃᕐᓗᓂᓗ.

⁸ ᑕᕝᕙ ᐊᑕᓂᐅᑉ ᐅᖃᕐᕕᒋᓕᕐᐹᖓ;

⁹ ᐅᖃᕐᓗᓂ: “ᐃᒫᒃ ᐊᑕᓂᖅ ᐅᖃᕐᐳᖅ: ᑍᒫᒃᑕᐅᖅ ᔫᑕᒥᐅᑦ ᔨᕉᓴᓕᒥᐅᓪᓗ ᐱᐅᔪᕆᓂᖏᑦ ᐱᐅᔪᓐᓃᕐᑎᑦᓱᒫᕐᐸᒃᑲ.

¹⁰ ᐃᓄᐃᑦ ᐅᑯᐊ ᐱᐅᖏᑦᑐᓕᔪᑦ, ᐅᖃᐅᓯᓐᓂᒃ ᓈᓚᒍᒪᓐᖏᓚᑦ, ᐆᒻᒪᑎᒥᓗ ᓯᑎᓂᖏᓐᓄᑦ ᒎᑎᓐᖑᐊᓂᒃ ᒪᓕᒍᒪᕗᑦ ᑐᒃᓯᐊᕐᕕᖃᖃᑦᑕᕈᒪᓪᓗᑎᒃ, ᑍᒤᑦᓱᒫᕆᕗᑦ ᑖᑦᓱᑐᓇᖅ ᕿᑎᕈᑎᑐᑦ ᐊᑑᑎᒃᓴᖃᕈᓐᓃᕐᑐᑐᑦ.

¹¹ ᑍᒫᒃᑕᐅᖅ ᐊᖑᑦ ᕿᑎᕈᓯᓲᖑᖕᒪᑦ ᕿᓚᒃᓱᒍ, ᐃᓴᕆᐊᓕᒥᐅᓕᒫᑦ ᔫᑕᒥᐅᓕᒫᓪᓗ ᐅᕙᓐᓄᑦ ᕿᓚᒃᓱᕈᒫᕆᕙᒃᑲ, ᐊᑕᓂᖅ ᐅᖃᕐᐳᖅ, ᐃᓄᖁᑎᒋᔪᒪᓪᓗᒋᑦ ᓇᖕᒥᓂᕆᓗᒋᑦ ᓂᕐᑐᕐᑕᐅᑦᔪᑎᒋᓗᒋᓪᓗ, ᐅᐱᒋᔭᐅᑦᔪᑎᒋᓗᒋᓪᓗ, ᐅᕙᓐᓂᒡᓕ ᓈᓚᒍᒪᓚᐅᓐᖏᓚᑦ.”

ᕔᓂᖃᐅᑎᐅᑉ ᑐᑭᓕᐅᑦᔭᐅᓂᖓ

¹² “ᐅᑯᓂᖓ ᐅᖃᐅᓯᕐᓂᒃ ᐅᖃᐅᑎᒃᑭᑦ, ‘ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ, ᕔᓂᖃᐅᑎᓕᒫᑦ ᕔᓂᒥᒃ ᑕᑕᑕᐅᔪᒫᕐᐳᑦ.’ ᐅᖃᐅᑎᒋᔪᒫᕐᐹᑎᓪᓗ, ‘ᑕᒪᓐᓇ ᖃᐅᔨᒪᕙᕗᑦ ᕔᓂᖃᐅᑏᑦ ᕔᓂᒥᒃ ᑕᑕᑕᐅᓲᖑᓂᖏᑦ.’

¹³ ᑍᒤᓕᒃᐸᑕ ᑕᕝᕙ ᐅᖃᐅᑎᓂᐊᕐᐸᑎᑦ, ‘ᐃᒫᒃ ᐊᑕᓂᖅ ᐅᖃᕐᐳᖅ, ᑕᑯᒋᑦ, ᐋᖓᔮᕐᑎᑦᓯᓂᐊᕐᐳᖓ ᓇᓂᑐᐃᓐᓇᖅ ᓄᓇᓕᖕᓂᒃ ᑕᒫᓂ: ᐊᖓᔪᖅᑳᕐᔪᐊᓂᒃ ᑍᕕᑎᐅᑉ ᐊᖓᔪᖅᑲᐅᕕᖓᓂᑦ ᐱᓯᒪᔪᓂᒃ, ᑐᓂᕐᕈᓯᕐᑎᑦᓯᔨᓂᒃ, ᒎᑎᐅᓪᓗ ᐱᔪᖃᓛᕐᑐᒥᒃ ᐅᖃᕐᑎᖏᓐᓂᒃ, ᔨᕉᓴᓕᒥᐅᓕᒫᓂᒡᓗ.

¹⁴ ᐃᒻᒥᖕᓅᕐᑎᑦᓱᒫᕐᐸᒃᑲ ᓯᖁᑦᑎᖃᑦᑕᐅᑎᖁᓪᓗᖏᑦ, ᐃᕐᓂᕇᑦ ᐊᑖᑕᒋᑦ, ᐊᑕᓂᖅ ᐅᖃᕐᐳᖅ, ᓂᑲᒋᓂᐊᓐᖏᓚᒃᑲ ᓇᒡᓕᒋᓂᐊᓐᖏᓚᒃᑲᓘᓐᓃᑦ, ᐊᓯᕈᕐᑕᐅᖁᓪᓗᒋᑦ.’”

ᔨᕆᒤᐊᐅᑉ ᐃᓂᕐᑎᕆᓂᖓ ᐱᐅᔪᕆᓂᐅᑉ ᐅᓗᕆᐊᓇᕐᓂᖓᓂᒃ

¹⁵ ᑐᓴᕐᓯᓐᖓ ᓈᓚᒃᓯᓐᖓᓗ, ᐱᐅᔪᕆᖏᓪᓗᓯ, ᑍᒫᒃ ᐊᑕᓂᖅ ᐅᖃᕐᒪᑦ.

¹⁶ ᐊᑕᓂᖅ ᒎᑎᓯ ᓂᕐᑐᕐᓯᐅᒃ ᑖᕐᓯᑎᑦᓯᖏᓐᓂᖓᓂ, ᐹᓪᓚᖁᓇᓯ ᖃᖅᑬᑦ ᑕᕐᕆᑎᑕᐅᓕᕐᐸᑕ ᑖᕐᑐᒧᑦ, ᖃᐅᒪᔪᒥᒃ ᕿᓂᕋᓗᐊᕈᑦᓯ ᑖᑦᓱᒪ ᑖᕐᓯᑎᑦᓱᒫᑉᐹ ᑖᕐᑐᕐᔪᐊᖑᓕᕐᓗᓂ.

¹⁷ ᓈᓚᖕᓂᐊᖏᒃᑯᑦᓯ, ᑕᕐᓂᒃᑯᑦ ᐃᔨᕋᕐᑐᕐᓗᖓ ᕿᐊᑦᔪᑎᒋᔪᒫᕐᐸᑦᓯ ᐱᐅᔪᕆᓂᓯ ᐱᑦᔪᑎᒋᓗᒍ; ᖁᕝᕕᐅᕈᑎᒋᕐᔪᐊᕈᒫᕐᐸᑦᓯ, ᐊᑕᓂᐅᑉ ᐃᓅᖁᑎᖏᑦ ᑎᒍᔭᐅᔪᒫᕐᒪᑕ ᐊᐅᓪᓚᕈᑦᔭᐅᓗᑎᒃ.

¹⁸ ᐊᖓᔪᖅᑳᕐᔪᐊᖅ ᐊᓈᓇᖓᓗ ᐅᖃᐅᑎᒃᑭᒃ, ᐊᖓᔪᖅᑲᐅᕕᑦᓯᓐᓂᒃ ᐲᓕᕆᑦᓯᒃ, ᐊᖓᔪᖅᑳᕐᔪᐊᕐᓯᐅᑎᓯᒃ ᓂᐊᖂᑏᒃ ᑕᑯᒥᓇᕐᑐᑦ ᓂᐊᖁᑦᓯᖕᓂᑦ ᐲᕐᑕᐅᓯᖕᒪᑕ.

¹⁹ ᐃᒡᓗᒐᓴᒡᔪᐊᑦ ᓂᒋᑉᒦᑦᑐᑦ ᓇᒧᓐᖓᕐᕕᒃᓴᖃᕈᓐᓃᕐᒪᑕ, ᒪᑐᐃᕐᑕᐅᔪᓐᓇᕈᓐᓃᕐᓗᑎᒡᓗ; ᔫᑕᒥᐅᓕᒫᑦ ᐊᐅᓪᓚᕈᑦᔭᐅᕗᑦ ᐅᖓᓯᒃᑐᒧᑦ ᓄᓇᒋᓐᖏᑕᒥᖕᓄᑦ.

²⁰ “ᑕᑯᓴᓕᕆᑦᓯ ᑕᑯᓗᓯᓗ ᐅᓐᓄᐊᓪᓗᐊᑉ ᓇᓛᓂᑦ ᑎᑭᓴᕐᑐᕐᑐᓂᒃ. ᓇᐅᒡᓕᑍᒪ ᓰᐲᑦ ᑲᒪᒋᓂᐊᓚᐅᕐᑕᓯ? ᓰᐱᖁᑎᒋᓂᕋᕐᓗᒋᑦ ᐅᐱᒋᕙᓚᐅᕐᑕᓯ?

²¹ ᖃᓄᕐᓕ ᐅᖃᕐᓂᐊᕐᐱᓰ? ᐊᖓᔪᖅᑲᕐᑖᕈᑦᓯ ᐃᑲᔪᕐᑎᒋᓂᐊᕋᓱᒋᓪᓗᒋᑦ ᐊᒡᓛᑦ ᐃᓕᓴᓚᐅᕐᑕᑦᓯᓐᓄᑦ ᑕᐱᕆᔪᒪᓪᓗᒋᑦ, ᑕᕝᕙ ᐋᓐᓂᐊᒐᔭᓐᖏᓚᓰ? ᐊᕐᓇᑎᑐᑦ ᐃᕐᓂᓱᒃᑐᑎᑐᑦ?

²² ᐆᒻᒪᑎᑦᓯᓐᓂ ᐅᖃᕈᒫᕐᐳᓯ, ᓱᖕᒪᑦ ᑍᒤᑦᑐᒦᑉᐱᑖ? ᐅᓄᕐᑐᓂᒃ ᐊᔪᕐᑐᓕᓯᒪᓂᑦᓯᓐᓄᑦ ᑍᒤᑉᐳᓯ ᖁᓄᔪᕐᓂᐊᕐᑕᐅᔪᑎᑐᑦ ᐊᓐᓄᕌᑎᑦ ᐲᔭᕐᑕᐅᖕᒪᑕ ᐋᓐᓂᕐᓯᕐᑕᐅᓪᓗᑎᓪᓗ.

²³ ᐃᑎᐅᐱᐊᒥᐅᑕᖅ ᐅᕕᓂᖕᒥᑕ ᑕᕐᓴᖓᓂᒃ ᐊᓯᑦᔩᔪᓐᓇᕐᐹ? ᐅᕝᕙᓘᓐᓃᑦ ᓛᔭᐅᔮᕐᑑᑉ ᑕᕐᓴᓪᓛᒋᔭᓂ ᖁᐱᓴᕈᐊᑦᑐᑦ ᐲᔭᕈᓐᓇᕐᐸᒌᑦ? ᐱᐅᔪᒥᒃ ᐱᓇᓱᐊᓕᕈᓐᓇᖏᓐᓂᕗᓯ ᐱᐅᖏᑦᑐᒥᒃ ᓱᖏᐅᑎᓯᒪᓂᕐᒧᑦ.

²⁴ ᓴᓃᔭᕐᓂᑯᑎᑐᑦ ᐊᕕᐅᖅᑲᕐᑎᓐᓂᐊᕐᐸᑦᓯ ᐊᓄᕆᒧᑦ ᑎᒃᑕᐅᔪᑎᑐᑦ ᓱᓇᖃᔪᐃᑦᑐᒥᑦ ᐱᔪᒧᑦ.

²⁵ ᑖᒃᑯᐊ ᑕᕝᕙ ᓄᓇᖁᑎᓯ ᓇᓚᐅᑦᑖᕈᑎᒃᑯᑦ ᑭᒡᓕᓕᐅᕐᓯᒪᔪᑦ, ᐃᓕᑦᓯᓐᓄᑦ ᐱᔭᐅᖁᓪᓗᒋᑦ ᓇᓗᓁᕐᓯᒪᔭᒃᑲ, ᐊᑕᓂᖅ ᐅᖃᕐᐳᖅ, ᐅᕙᓐᓂᒃ ᐳᐃᒍᓚᐅᕋᑦᓯ ᑕᑎᖃᓕᕐᓗᓯᓗ ᓱᓕᖏᑦᑐᓂᒃ.

²⁶ ᐊᓐᓄᕌᓯ ᐲᔭᕐᓗᒋᑦ ᑮᓇᑦᓯᓐᓄᑦ ᒪᑑᑎᒋᔪᒫᕐᐸᒃᑲ, ᑲᓐᖑᒋᔭᓯ ᑕᑯᔭᐅᖁᓪᓗᒋᑦ.

²⁷ ᓇᕐᕈᓇᕐᑐᓕᓂᓯ ᑕᑯᓯᒪᒐᒃᑭᑦ, ᐊᓯᓐᓂᐊᕐᓯᒪᓂᓯ ᐱᔪᒪᓗᐊᕐᓂᓯᓗ, ᑲᓐᖑᓱᒐᓯ ᓄᓕᐊᕐᓃᑦ ᐱᓇᓱᐊᓚᐅᕐᑕᓯ ᑕᑯᓯᒪᕙᒃᑲ, ᖃᖅᑬᑦ ᖄᖏᓐᓂ ᓇᑎᕐᓇᓂᓗ. ᑲᑉᐱᐊᓐᓇᒦᖑᔪᓯ ᔨᕉᓴᓕᒥᐅᑦ! ᖃᓄᖅ ᐊᑯᓂᐅᑎᒋᔪᖅ ᓴᓗᒤᑦᑑᓂᐊᕐᐱᓰ?”