ᔨᕆᒤᐊᐅᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᐅᑉ ᐊᐱᕐᓱᕐᓂᖓ ᐊᑕᓂᕐᒥᒃ

¹ “ᐊᑕᓂᖅ ᐃᓱᐊᕐᓃᑦ ᓱᕐᕋᒍᓐᓇᖏᒻᒪᑦ, ᓇᓗᓕᕐᓯᒪᑦᔪᑎᒋᔭᒃᑲ ᓵᖕᓄᑦ ᓴᖅᑭᑦᓱᒪᕙᒃᑲ, ᓱᖕᒪᑦ ᐱᐅᖏᑦᑐᓕᔪᑦ ᐱᔪᓐᓇᑦᓯᐊᕐᐹᑦ? ᐅᒃᐱᖏᑦᑐᓪᓗ ᑲᔪᓯᑦᓯᐊᕐᓗᑎᒃ?

² ᑲᓐᖓᕐᓱᓚᐅᕐᐸᑎᑦ ᐊᒫᖃᑦᓯᐊᓕᕐᓗᑎᒡᓗ, ᐱᕈᕐᐳᑦ ᐸᐅᕐᖓᖃᓕᕐᓗᑎᒃ; ᖃᓂᑉᐳᑎᑦ ᖃᓂᖏᓐᓄᑦ ᐆᒻᒪᑎᖏᓐᓄᓪᓕ ᐅᖓᓯᒃᐳᑎᑦ.

³ ᐅᕙᓐᓂᒡᓕ ᖃᐅᔨᒪᕗᑎᑦ, ᐊᑕᓃᖅ, ᐊᑐᕐᑕᓕᒫᒃᑲ ᑕᑯᓐᓇᕋᕕᒋᑦ, ᖃᓄᕐᓗ ᐃᓕᖕᓂᒃ ᐃᓱᒪᖃᕐᒪᖔᕐᒪ ᖃᐅᔨᓴᕈᓐᓇᕐᓗᑎᑦ. ᐱᐅᖏᑦᑐᓕᔪᑦ ᓴᓂᕐᕙᓚᐅᒃᑭᑦ ᓰᐱᑎᑐᑦ ᓴᓂᕐᕙᒃᑕᐅᓯᒪᔪᑎᑐᑦ ᐅᓪᓗᒧᑦ ᑐᖁᑕᐅᓂᒃᓴᖏᓐᓄᑦ.

⁴ ᖃᓄᖅ ᐊᑯᓂᐅᑎᒋᔪᒥᒃ ᓄᓇ ᕿᒃᓵᖕᓂᐊᕐᐹ? ᐃᕕᒃᓱᒐᕕᓂᖏᓪᓗ ᑐᖁᓕᓗᑎᒃ? ᐃᓄᖏᑕ ᐱᐅᖏᓐᓂᖏᓐᓄᑦ, ᐆᒪᔪᑦ ᑎᖕᒥᐊᓪᓗ ᑐᖁᕋᓕᕐᐳᑦ, ᐅᖃᕐᒪᑕ, ‘ᐊᑕᓂᐅᑉ ᐱᐅᓯᕗᑦ ᖃᐅᔨᒪᓐᖏᓔ.’

⁵ ᐃᓄᖕᓂᒃ ᐅᓪᓚᐅᑎᖃᑎᖃᕐᓗᑎᑦ ᑕᖃᔨᐊᕆᔭᐅᒍᕕᑦ, ᖃᓄᕐᓕ ᕿᒻᒥᕐᔪᐊᓂᒃ ᓱᒃᑲᓕᐅᑎᖃᑎᖃᕈᓐᓇᕋᔭᕐᐲᑦ? ᓄᓇᒥ ᐊᑦᑕᕐᓇᕐᑐᖃᖏᑦᑐᒥ ᐹᓪᓚᖃᑦᑕᕈᕕᑦ ᔪᐊᕐᑕᓂᐅᑉ ᓇᐹᕐᑐᖃᕐᓂᖓᓃᓕᕈᕕᑦ ᖃᓄᕐᓕ ᐱᒐᔭᕐᐲᑦ?

⁶ ᖃᑕᓐᖑᑎᕕᓪᓗ ᐃᒡᓗᒥᐅᖃᑎᕕᓪᓗ ᐊᒡᓛᑦ ᐊᑭᕋᕐᑐᓕᕐᐹᑎᑦ, ᐃᓕᖕᓂᒡᓗ ᐊᑭᕋᕐᑐᕐᑐᓂᒃ ᐃᑲᔪᕐᑐᐃᓕᕐᒪᑕ, ᐅᒃᐱᕆᑦᑍᓕᒃᑭᑦ ᐅᖃᓪᓚᑦᓯᐊᕐᑑᔮᕋᓗᐊᕐᐸᑕ ᐃᓕᖕᓄᑦ.”

ᐊᑕᓂᐅᑉ ᕿᒃᓵᒍᑎᖃᕐᓂᖓ ᐃᓄᖁᑎᒥᓂᒃ

⁷ ᐃᓄᖁᑎᒃᑲ ᖁᔭᓈᕐᐸᒃᑲ, ᑭᖑᕐᖑᑎᔭᒃᓴᒃᑲᓗ ᕿᒪᒡᓗᒋᑦ; ᐃᓄᖁᑎᒃᑲ ᓇᒡᓕᒋᓚᐅᕐᑕᒃᑲ ᐊᑭᕋᖏᓐᓄᑦ ᑐᓂᑦᔪᑎᒋᓕᕐᐸᒃᑲ.

⁸ ᐃᓄᖁᑎᒋᔪᒪᓯᒪᔭᒪ ᓇᐹᕐᑐᓃᑦᑐᑎᑐᑦ ᓛᔭᑎᑐᑦ ᐃᕐᓯᓵᓕᕐᒪᖓ, ᑍᒤᒻᒪᑦ ᐆᒥᒋᓕᕐᐸᒃᑲ.

⁹ ᐃᓄᖁᑎᒋᔪᒪᓪᓗᒋᑦ ᓂᕈᐊᓚᐅᕐᑕᒃᑲ ᑎᖕᒥᐊᑎᑐᑦ ᐅᑭᓕᕆᐊᑐᑦ ᑍᒤᓕᕐᐳᑦ ᑎᖕᒥᐊᖑᖃᑎᖏᓐᓄᑦ ᓂᕆᔭᐅᓇᓱᐊᕐᑐᑎᑐᑦ, ᐆᒪᔪᑦ ᐃᕐᓯᓇᕐᑐᑦ ᕾᖁᓕᒃᑭᑦ ᑖᒃᑯᓂᖓ ᓂᕆᖃᑕᐅᓂᐊᓕᕐᒪᑕ.

¹⁰ ᐰᕐᓯᔨᓄᑦ ᐅᓄᕐᑐᓄᑦ ᐸᐅᕐᖓᖃᕐᕕᒃᓴᖁᑎᒃᑲ ᑐᓪᓕᕋᕐᑕᐅᓪᓗᑎᒃ ᓯᖁᑦᑎᕐᑕᐅᕗᑦ, ᐱᕈᕐᓰᕕᖁᑎᑦᓯᐊᕆᓚᐅᕐᑕᒃᑲᓗ ᐊᑐᕐᑐᒃᓴᐅᔪᓐᓃᕐᓗᑎᒃ ᓱᓇᖃᕈᓐᓁᕐᓗᑎᒃ ᐱᕈᕐᑐᖃᕈᓐᓃᕐᐳᑦ.

¹¹ ᓄᓇᓕᒫᖅ ᐊᑐᕐᑐᒃᓴᐅᔪᓐᓃᕐᐳᖅ, ᓱᓇᑕᖃᕈᓐᓃᕐᐳᖅ, ᐅᕙᓐᓄᑦ ᕿᒃᓵᒡᓗᓂ ᕿᐊᕗᖅ. ᓄᓇᓕᒫᖅ ᐊᑐᕐᕕᒃᓮᕈᑎᕗᖅ, ᑭᓇᒧᓪᓘᓐᓃᑦ ᐃᒃᐱᒋᔭᐅᓐᖏᓚᖅ.

¹² ᐱᖑᓕᒫᑦ ᓇᐹᕐᑐᖃᖏᓐᓂᕐᒦᑦᑐᑦ ᓱᓇᖃᔪᐃᑦᑐᒥ ᓈᓯᒪᓕᕐᐳᑦ ᐊᓯᕈᐃᔭᕐᑐᕐᑐᓂᒃ; ᐊᑕᓂᐅᑉ ᐅᓇᑕᕆᐊᕐᑎᑕᖏᑦ ᓈᓯᓯᒪᔪᒫᕐᐳᑦ ᓄᓇᐅᑉ ᑭᒡᓕᖓᓂᑦ ᑭᒡᓕᖓᓄᑦ; ᓮᓕᔪᖃᕈᒫᓐᖏᓚᕐᓗ ᑎᒥᖃᕐᑐᒥᒃ.

¹³ ᐃᓄᖁᑎᒃᑲ ᓂᐊᖂᔭᒃᓴᓂᒃ ᑲᓐᖓᕐᓱᐃᓚᐅᕐᐳᑦ ᐅᕐᐱᖕᓂᒡᓕ ᑲᑭᓐᓇᕐᑐᓕᖕᓂᒃ ᑲᑎᕐᓱᐃᕗᑦ, ᐱᓇᓱᐊᕐᓂᕐᒧᑦ ᑕᖃᑐᐃᓐᓇᕐᐸᒃᐳᑦ, ᐱᓇᓱᐊᕐᓂᖓᓪᓕ ᐱᕙᓪᓕᕐᓇᕐᑐᖃᓐᖏᓚᖅ. ᐱᕈᕐᑎᑕᕕᓂᕐᒥᓂᒃ ᑲᓐᖑᓲᑎᖃᕈᒫᕐᐳᑦ ᐊᑕᓂᐅᑉ ᓂᓐᖓᐅᓯᕐᒥᓄᑦ ᐱᓂᐊᕐᕕᒋᔪᒫᕐᒪᒋᑦ.

ᐊᑕᓂᐅᑉ ᐊᖏᕐᓂᖓ ᐃᓴᕆᐊᓕᒥᐅᑦ ᐊᓯᖏᓐᓃᑦᑐᓄᑦ

¹⁴ ᐃᒫᒃ ᐊᑕᓂᖅ ᐅᖃᕐᐳᖅ, “ᐃᓄᖁᑎᒪ ᐃᓴᕆᐊᓕᒥᐅᑦ ᐊᓯᖏᑦ ᐊᑲᐅᖏᑦᑐᓕᔪᑦ ᑎᒍᓯᓚᐅᕐᑐᑦ ᑖᒃᑯᓂᖓ ᓄᓱᒍᒫᕐᐸᒃᑲ ᓄᓇᖏᓐᓂᑦ, ᔫᑕᒥᐅᓪᓗ ᐱᔭᐅᕕᒋᓯᒪᔭᖏᓐᓂᑦ ᓄᓱᒍᒫᕆᕙᒃᑲ.

¹⁵ ᓄᓱᒌᕈᒃᑭᓪᓗ ᐃᓚᑦᓱᒋᓕᕈᒫᕆᕙᒃᑲ, ᐅᑎᕐᑎᓪᓗᒋᓪᓗ ᐊᑐᓂᑦ ᑭᖑᕐᖑᑎᔭᒃᓴᔭᖏᓐᓄᑦ ᐊᑐᓂᓪᓗ ᓄᓇᖏᓐᓄᑦ.

¹⁶ ᑕᒪᑐᒪ ᑭᖑᕐᖓᒍᑦ, ᐊᒃᓱᕈᕐᓗᑎᒃ ᐃᓄᖁᑎᒪ ᐱᐅᓯᖏᓐᓂᒃ ᐃᓕᓐᓂᐊᕋᔭᕐᐸᑕ, ᐅᖃᕕᒍᑎᖃᕐᓗᑎᒡᓗ ᐊᑎᓐᓂ, ‘ᐊᑕᓂᖅ ᐃᓅᖕᒪᑦ,’ ᑍᒫᒃᑕᐅᖅ ᐃᓄᖁᑎᒃᑲ ᐃᓕᓐᓂᐊᕐᑎᓚᐅᕐᒪᒋᑦ ᐅᖃᕕᒡᕕᖃᖁᓪᓗᒋᑦ ᐰᓕᒧᑦ, ᑖᒃᑯᐊ ᒪᑭᑦᓱᒫᕐᐳᑦ ᐃᓄᖁᑎᒪ ᐊᑯᕐᖓᓐᓂ.

¹⁷ ᐃᓅᖃᑎᒌᒡᔪᐊᓪᓕ ᓇᓪᓕᖏᑦ ᓈᓚᖏᑉᐸᑕ, ᑕᕝᕙ ᓄᓱᑦᓯᐊᒻᒪᕆᒍᒫᕐᐸᒃᑲ ᐊᓯᕈᕐᓗᒋᓪᓗ, ᐊᑕᓂᖅ ᐅᖃᕐᐳᖅ.”