ᔨᕆᒤᐊᐅᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊ ᐊᖏᖃᑎᒌᖕᓂᕐᓗ

¹ ᐅᑯᐊ ᐅᖃᐅᓰᑦ ᔨᕆᒤᐊᒧᑦ ᑎᑭᓚᐅᕐᐳᑦ ᐊᑕᓂᕐᒥᑦ, ᐅᖃᕐᓗᓂ,

² “ᑐᓴᕆᑦ ᑖᑦᓱᒪ ᐊᖏᖃᑎᒌᖕᓂᐅᑉ ᐅᖃᐅᓯᖏᓐᓂᒃ, ᐅᖃᐅᓯᕆᓗᒋᓪᓗ, ᔫᑕᒥᐅᓄᑦ ᔨᕉᓴᓕᒥᐅᓄᓪᓗ.

³ ᐅᖃᐅᑎᓗᒋᓪᓗ, ᐃᒫᒃ ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓᑦ ᐅᖃᕐᐳᖅ: ᓇᕐᕈᓇᕐᓯᓕ ᐊᖏᖃᑎᒌᖕᓂᐅᑉ ᐅᖃᐅᓯᖏᓐᓂᒃ ᓈᓚᖏᑦᑐᖅ.

⁴ ᓯᕗᓕᓯᓐᓂᒃ ᐱᖁᔨᓚᐅᕋᒪ ᐊᐅᓪᓚᕐᑎᓪᓗᒋᑦ ᐄᑦᔨᑉᑎᒥᑦ, ᓴᕕᕋᔭᒃᓴᒥᒃ ᐊᐅᒃᑎᑦᓯᕕᒃᑎᑐᑦ ᑍᒤᑦᑐᒦᕝᕕᒋᔭᖓᓂᑦ, ᐅᖃᕐᓗᖓᓗ, ᓂᐱᒐ ᓈᓚᒃᑕᒃᓴᕆᕙᓯ, ᐱᖁᔨᑦᔪᑎᒋᔭᓕᒫᒃᑲᓗ ᒪᓕᒡᓗᒋᑦ. ᑕᕝᕙ ᐃᓄᖁᑎᒋᓂᐊᕐᐸᑦᓯ, ᐅᕙᖓᓗ ᒎᑎᒋᓂᐊᕐᐸᑦᓯᓐᖓ.

⁵ ᐅᖃᕕᒃᓗᖓ ᐊᖏᒻᒪᕆᒍᑎᒋᓚᐅᕐᑕᕋ ᓯᕗᓕᑦᓯᓐᓄᑦ ᓱᓕᖁᓪᓗᒍ, ᓄᓇᑖᕐᑎᑦᓱᒪᓚᐅᕋᒃᑭ ᒪᒪᕐᑐᓂᒃ ᓂᕿᒃᓴᖃᑦᓯᐊᕐᑐᒥᒃ ᐊᔪᕐᓴᕐᓇᖏᑦᑐᒥᓗ ᐅᓪᓗᒥ ᓄᓇᒋᓕᕐᑕᑦᓯᓐᓂᒃ.” ᑕᕝᕙ ᑭᐅᕙᕋ, “ᐊᑕᓃᖅ, ᑍᒤᓕᕐᓕ.”

⁶ ᐊᑕᓂᐅᓪᓗ ᐅᖃᐅᑎᕚᖓ, “ᑕᒪᒃᑯᐊᓕᒫᑦ ᐅᖃᐅᓯᕆᒃᑭᑦ ᔫᑕᒥᐅᓂ ᔨᕉᓴᓕᒥᐅᓂᓗ; ᑐᓴᕆᑦᓯ ᐊᖏᖃᑎᒌᖕᓂᐅᑉ ᒪᓕᒃᑕᐅᖁᔭᖏᓐᓂᒃ ᓈᓚᒃᑐᒃᓴᐅᕗᓯ.

⁷ ᑍᒪᓐᖓᑦ ᓯᕗᓕᓯ ᐊᐅᓪᓚᕐᑎᓚᐅᕋᒃᑭᑦ ᐄᑦᔨᑉᑎᒥᑦ ᐅᓪᓗᒥᒧᑦ ᑎᑭᓪᓗᒍ, ᐅᖃᐅᑎᖃᑦᑍᓐᓇᓚᐅᕐᐸᒃᑲ ᐅᓄᕐᑐᐃᓱᕐᓗᒋᑦ ᓂᐱᓐᓂᒃ ᓈᓚᒃᑐᒃᓴᐅᓂᖏᓐᓂᒃ.

⁸ ᑐᓴᓚᐅᓐᖏᓚᓪᓕ ᓈᓚᒐᓱᐊᓚᐅᓐᖏᓚᓪᓘᓐᓃᑦ ᒪᓕᖔᓚᐅᕐᐳᓪᓕ ᐆᒻᒪᑎᒥ ᓯᑎᔫᑦᔪᑎᒋᔭᖏᓐᓂᒃ ᐱᐅᖏᑦᑐᓂᒃ. ᑍᒤᒻᒪᑦ ᑐᓂᓚᐅᕐᐸᒃᑲ ᐊᖏᖃᑎᒌᖕᓂᐅᑉ ᐅᖃᐅᓯᖏᓐᓂᒃ, ᒪᓕᒃᑕᐅᖁᓪᓗᒋᑦ ᑖᒃᑯᓄᖓ, ᒪᓕᒍᒪᓚᐅᓐᖏᓚᓪᓕ.”

⁹ ᐊᑕᓂᐅᓪᓕ ᐅᖃᐅᑎᒃᑲᓐᓂᕆᕚᖓ, “ᐋᖅᑭᒃᓱᐃᓯᒪᔪᖃᕐᐳᖅ ᓈᒻᒪᖏᑦᑐᒥᒃ ᔫᑕᒥᐅᓂ ᔨᕉᓴᓕᒥᐅᓂᓗ.

¹⁰ ᓯᕗᓕᕆᓚᐅᕐᑕᒥ ᐊᔪᕐᑐᓕᑦᔪᑎᒋᕙᓚᐅᕐᑕᖏᓐᓄᑦ ᐅᑎᕐᒪᑕ, ᓈᓚᒍᒪᕙᓚᐅᖏᑦᑐᓄᑦ ᐅᖃᐅᓯᕐᓂᒃ, ᐊᓯᓐᓂᒡᓗ ᒎᑎᖃᕋᓱᐊᕐᐳᑦ ᐱᔨᑦᓯᕈᒪᔭᒥᖕᓂᒃ; ᐃᓴᕆᐊᓕᒥᐅᑦ ᔫᑕᒥᐅᓪᓗ ᑕᒪᕐᒥᒃ ᓯᖁᒥᑦᑎᓯᒪᖕᒪᑕ ᓯᕗᓕᖏᓐᓄᑦ ᐊᖏᖃᑎᒌᒍᑎᒋᓯᒪᔭᓐᓂᒃ.”

¹¹ ᑍᒤᒻᒪᑦ ᐃᒫᒃ ᐊᑕᓂᖅ ᐅᖃᕐᐳᖅ, “ᑕᑯᒋᑦ ᐱᐅᖏᑦᑐᒧᑦ ᑎᑭᑕᐅᑎᓐᓂᐊᕐᐸᒃᑲ ᕿᒫᔪᓐᓇᕐᓂᐊᓐᖏᑕᖓᓐᓂᒃ, ᐅᕙᓐᓂᒃ ᑕᑎᖃᕋᓱᒃᑲᓗᐊᕐᐸᑕ, ᑐᓴᕐᓂᐊᓐᖏᓚᒃᑲ.

¹² ᔫᑕᐅᑉ ᐃᒡᓗᒐᓴᖏᑦ ᔨᕉᓴᓕᒥᐅᓪᓗ ᐃᓄᖏᑦ, ᑕᑎᖃᕋᓱᐊᕈᒫᕐᐳᑦ ᒎᑎᓐᖑᐊᓂᒃ ᑐᒃᓯᐊᕐᕕᒋᕙᒃᑕᒥᖕᓂᒃ, ᐱᐅᓕᔨᒋᔪᓐᓇᕐᓂᐊᓐᖏᓔᓪᓕ ᑲᑉᐱᐊᓇᕐᑐᒧᑦ ᑎᑭᑕᐅᒍᑎᒃ.

¹³ ᔫᑕᒥᐅᑕᐅᔪᓯ ᒎᑎᖃᓕᕐᐳᓯ ᓄᓇᖁᑎᑦᓯᑐᑦ ᐅᓄᕐᑎᒋᔪᓂᒃ; ᑐᓂᕐᕈᓯᕐᕕᖃᐅᓕᕐᓗᓯᓗ ᔨᕉᓴᓕᒥᐅᑦ ᐊᖅᑯᑎᖏᑎᑐᑦ ᐅᓄᕐᑎᒋᔪᓂᒃ ᓇᕐᕈᓇᕐᑐᓂᒃ, ᒎᑎᓐᖑᐊᒧᑦ ᐰᓕᒧᑦ ᐃᓯᕐᓗᐊᕐᓂᑎᑦᓯᕕᑦᓯᓐᓂᒃ.

¹⁴ ᑍᒤᒻᒪᑦ ᐃᓄᐃᑦ ᑖᒃᑯᐊ ᑐᒃᓯᐅᑎᑦᑍᓕᒃᑭᑦ, ᕿᓄᑦᔪᑎᒋᑦᑍᓕᒃᑭᑦ ᑐᒃᓯᐅᑎᑦᑍᓕᓗᒋᓪᓗ, ᐅᖁᒤᒃᓴᓕᕈᑎᒃ ᑐᒃᓯᐊᕋᓗᐊᕐᐸᑕ ᑐᓴᕐᓂᐊᓐᖏᓚᒃᑲ.

¹⁵ “ᓱᔪᓄᑯᐊ ᓇᒡᓕᒋᔭᒃᑲ ᐃᒡᓗᓐᓃᑉᐸᑦ, ᐱᐅᖏᑦᑐᓕᔨᑐᐃᓐᓇᐅᓪᓗᑎᒃ? ᐊᖏᕈᑏᑦ ᑐᓂᕐᕈᑎᒋᔭᓯᓗ ᐆᒪᔪᐃᑦ ᑲᑉᐱᐊᓇᕐᑐᒥᒃ ᓇᓪᓕᐅᑎᔪᒃᓴᒥᒃ ᓄᖅᑲᕐᑎᑦᓯᔪᓐᓇᕋᓱᒋᕕᓯᐅᒃ? ᐱᐅᖏᑦᑐᓂᒃ ᐊᑐᕈᒪᔭᑦᓯᓐᓂᒃ ᑲᔪᓯᑐᐃᓐᓇᕐᑎᓪᓗᓯ ᐅᐱᒋᔭᐅᑦᔪᑎᒃᓴᐅᓇᓱᒋᕕᓯᐅᒃ ᑕᒪᓐᓇ?

¹⁶ ᐊᑕᓂᐅᑉ ᑍᕙᓚᐅᕐᐹᓯ, ‘ᐆᒪᑦᓯᐊᕐᑐᖁᑎᒋᓂᕋᕐᓗᓂᓯ ᓇᐹᕐᑐᑎᑐᑦ ᐅᕐᓱᒃᓴᕐᑕᓕᒃᑎᑐᑦ ᐱᕈᕐᕕᐅᓯᒪᑦᓯᐊᕐᓂᕐᒥᖕᓄᑦ ᑕᑯᒥᓇᕐᑐᑎᑐᑦ’; ᑲᓪᓕᕐᒧᓪᓕ ᐃᑯᐊᓪᓚᒃᑕᐅᔪᒫᕐᐳᑦ, ᓇᐹᕐᑑᓪᓗ ᐊᕙᓚᖓᔪᖏᑎᑐᑦ ᐊᓯᕈᕐᑕᐅᓗᑎᒃ.

¹⁷ “ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᐱᕈᕐᑎᓚᐅᕋᓗᐊᕐᒪᓯ, ᐃᓴᕆᐊᓕᒥᐅᓪᓕ ᔫᑕᒥᐅᓪᓗ ᐅᕙᓐᓂᒃ ᓂᓐᖓᒃᓮᓯᒪᕗᑦ ᐱᐅᖏᑦᑐᓕᓂᕐᒥᖕᓄᑦ, ᑐᓂᕐᕈᓯᕐᓗᑎᒃ ᒎᑎᓐᖑᐊᒧᑦ ᐰᓕᒧᑦ.”

ᔨᕆᒤᐊᐅᑉ ᑐᖁᑕᐅᔪᒪᓂᖓ

¹⁸ ᐊᑕᓂᐅᓪᓕ ᖃᐅᔨᑎᓚᐅᕐᒪᖓ ᖃᐅᔨᓚᐅᕐᐳᖓ; ᑕᑯᑎᓚᐅᕐᒪᖓ ᐱᐅᖏᑦᑐᓂᒃ ᐱᓇᓱᐊᕈᒪᔭᖏᓐᓂᒃ.

¹⁹ ᖃᐅᔨᒪᓇᖓᓕ ᓄᕐᕋᐅᔭᕐᑎᑐᑦ ᑐᖁᑕᐅᕕᒃᓴᒥᓄᑦ ᐋᑕᐅᓕᕐᑐᑎᑐᑦ ᑍᒤᓚᐅᕐᐳᖓ. ᖃᐅᔨᒪᓚᐅᓐᖏᓚᖓ ᐋᖅᑭᒃᓱᐃᓯᒪᔪᕕᓂᐅᓕᕐᑎᓪᓗᒋᑦ ᑐᖁᑦᓯᔪᒪᓪᓗᑎᒃ ᐅᕙᓐᓂᒃ, ᐅᖃᕐᓗᑎᒃ, “ᓇᐹᕐᑐᖅ ᐊᓯᕈᓚᐅᕐᓚᕗᑦ ᐱᕈᕐᑐᖏᓪᓗ ᐆᒪᔪᑦ ᓄᓇᖓᓂᑦ ᓇᑲᓚᐅᕐᓚᕗᑦ, ᐊᑎᖓᓗ ᐃᖅᑲᐅᒪᔭᐅᔪᓐᓁᖁᓪᓗᒍ.”

²⁰ ᐊᑕᓃᕐᓕ ᖁᑦᓯᖕᓂᕐᐸᐅᔪᑎᑦ, ᓈᒻᒪᓈᕐᑐᒥᒃ ᐃᖅᑲᕐᑐᐃᔪᑎᑦ, ᐃᓄᐃᓪᓗ ᐆᒻᒪᑎᖓᓃᑦᑐᓂᒃ ᐃᓱᒪᖓᓃᑦᑐᓂᒡᓗ ᖃᐅᔨᓴᕈᓐᓇᕐᑐᑎᑦ, ᐊᑭᓂᐊᕐᓂᖅ ᑖᒃᑯᓄᖓ ᐃᓕᖕᓄᑦ ᑐᓂᖔᕐᐸᕋ.

²¹ ᑍᒤᒻᒪᑦ ᐃᒫᒃ ᐊᑕᓂᖅ ᐅᖃᕐᐳᖅ, “ᐊᖑᑎᓄᑦ ᓄᓇᒥ ᐊᓇᑑᑎᒦᑦᑐᓄᑦ, ᑐᖁᑦᓯᔪᒪᔪᓄᑦ ᐃᓕᖕᓂᒃ ᐅᖃᕐᓗᑎᒡᓗ, ‘ᐊᑕᓂᐅᑉ ᐊᑎᖓᓂ ᐅᖃᖁᔭᖏᓐᓂᒃ ᐅᖃᕐᑍᓕᒋᑦ, ᐅᖃᑐᐊᕈᕕᑦ ᑐᖁᓐᓂᐊᕐᐸᑦᑎᒋᑦ.’”

²² ᑍᒤᒻᒪᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫᒃ ᐅᖃᕐᐳᖅ, “ᑕᑯᒋᑦ, ᓱᒋᐊᕐᓂᐊᕐᐸᒃᑲ ᐃᓅᓱᒃᑐᖁᑎᖏᑦ ᑐᖁᑕᐅᔪᒫᕐᐳᑦ ᐅᓇᑕᕐᑐᓂ; ᐃᕐᓂᖏᓪᓗ ᐸᓂᖏᓪᓗ ᑳᖕᓇᕐᑐᒧᑦ ᐱᕐᓕᕋᕈᒫᕐᐳᑦ.

²³ ᐊᒥᐊᒃᑯᖃᕐᓂᐊᓐᖏᓚᓪᓗ, ᐊᓇᑑᑎᒥᐅᑦ ᐃᓄᖏᑦ ᐊᓯᕈᕐᑕᐅᓇᕐᑐᒧᑦ ᑎᑭᑕᐅᔪᒫᕐᐳᑦ, ᐊᕐᕌᒍᒥ ᓱᒋᐊᕐᑕᐅᕕᒃᓴᖓᑦ ᓇᓪᓕᐅᑎᒃᐸᑦ.”