ᔨᕆᒤᐊᐅᑉ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕆᒤᐊᒥᒃ ᓇᓗᓁᕐᓯᔪᑦ

¹ ᑕᒪᑦᔭ ᔨᕆᒤᐊᐅᑉ ᐅᖃᐅᓯᖏᑦ ᕼᐃᓪᑬᐊᐅᑉ ᐃᕐᓂᖓᑕ, ᑐᓂᕐᕈᓯᕐᑎᑦᓯᔨᐅᔫᑉ ᐃᓚᖓᑦᑕ ᓄᓇᓕᖕᓂ ᐊᓇᑑᑎᒥ ᐱᓐᔭᒥᓂᒥᐅ ᓄᓇᖓᓂ.

² ᐊᑕᓂᖅ ᔨᕆᒤᐊᒧᑦ ᐅᖃᓚᐅᕐᐳᖅ ᔫᓮᐊᐅᑉ ᐋᒪᓐᓇᐅᑉ ᐃᕐᓂᖓᑕ ᔫᑕᒥ ᐊᖓᔪᖅᑲᐅᓂᖓᑕ 13ᒋᓕᕐᑕᖓᓂ,

³ ᐊᑕᓂᕐᓗ ᐅᖃᓚᐅᕆᕗᖅ ᔫᓮᐊᐅᑉ ᐃᕐᓂᖓ ᔨᕼᐅᐃᐊᑭᒻ ᐊᖓᔪᖅᑳᕐᔪᐊᖑᓕᕐᑎᓪᓗᒍ, ᐊᒻᒪᓗ ᑭᖑᓂᖓᒍᑦ ᐊᑕᓂᖅ ᐅᖃᖃᑦᑕᓚᐅᕆᕗᖅ ᔨᑎᑬᐊ ᔫᓮᐊᐅᑉ ᐃᕐᓂᖓᑕ ᐊᖓᔪᖅᑲᐅᓂᖓᑕ 11ᖓᓐᓄᑦ ᑎᑭᓪᓗᒍ. ᑖᑦᓱᒪᓗ ᐊᕐᕌᒎᑉ ᑕᖅᑭᖏᑕ ᑕᓪᓕᒪᖓᓐᓂ ᔨᕉᓴᓕᒥᐅᑦ ᐃᓄᖏᑦ ᐊᐅᓪᓚᕈᑦᔭᐅᓂᖏᑕ ᓄᓇᒋᓐᖏᑕᒥᖕᓄᑦ ᑎᑭᓪᓗᒍ.

ᔨᕆᒤᐊᐅᑉ ᕾᖁᔭᐅᓂᖓ

⁴ ᑕᕝᕙ ᐊᑕᓂᖅ ᐅᕙᓐᓄᑦ ᐅᖃᕐᐳᖅ, ᐅᖃᕐᓗᓂ:

⁵ “ᓄᑕᕋᒃᓴᓐᖑᓚᐅᕐᑎᓐᓇᒃ ᓱᓕ ᓂᕈᐊᓚᐅᕐᐸᒋᑦ; ᐃᓅᓕᖅᑳᕐᑎᓐᓇᒡᓗ ᐃᑦᔪᕐᓁᑎᓚᐅᕐᐸᒋᑦ; ᑎᓕᓚᐅᕐᐸᒋᑦ ᐱᔪᖃᓛᕐᑐᒥᒃ ᐅᖃᕐᑎᒋᔪᒪᓪᓗᑎᑦ ᐃᓅᖃᑎᒌᒡᔪᐊᓄᑦ.”

⁶ ᑕᕝᕙ ᑭᐅᕙᕋ, “ᑕᑯᒋᑦ ᐊᑕᓃᖅ ᒎᑏ! ᖃᓄᖅ ᐅᖃᓪᓚᒋᐊᒃᓴᖅ ᓇᓗᔪᖓ, ᐅᕕᒃᑲᐅᓗᐊᕋᒪ.”

⁷ ᐊᑕᓂᐅᓪᓕ ᐅᖃᐅᑎᕚᖓ, “ᐅᕕᒃᑲᐅᓗᐊᕐᓂᕋᕐᑍᓕᒋᑦ, ᐂᔪᒃᓴᐅᕗᑎᑦ ᑕᒤᓐᓄᑦ ᐂᕕᒋᔭᐅᖁᔭᓐᓄᑦ, ᐅᖃᕐᕕᒋᓗᒋᓪᓗ ᐅᖃᐅᓯᕆᔭᐅᖁᔭᓐᓂᒃ.

⁸ ᑲᑉᐱᐊᒋᑦᑍᓕᑭᑦ, ᐃᓚᒋᓂᐊᕐᐸᒋᑦ ᓴᐳᑎᓯᒪᓗᑎᑦ, ᐅᕙᖓ ᐊᑕᓂᐅᓪᓗᖓ ᐅᖃᕐᐳᖓ!”

⁹ ᐊᑕᓂᕐᓗ ᐃᓴᒃᓗᓂ, ᖃᓂᕋ ᐊᒃᑐᕐᐹ, ᐅᖃᕐᓗᓂᓗ, “ᑕᑯᒋᑦ ᐅᖃᐅᓯᒃᑲ ᖃᓂᕐᓄᑦ ᐃᓕᕙᒃᑲ.

¹⁰ ᐅᓪᓗᒥ ᐱᔪᓐᓇᕐᓯᑎᑉᐸᒋᑦ ᐱᔪᓐᓇᕐᓂᖃᓕᖁᓪᓗᑎᑦ ᐃᓅᖃᑎᒌᒡᔪᐊᓄᑦ ᐊᖓᔪᖅᑲᐅᕕᖕᓄᓪᓗ, ᐊᒫᖏᑎᒍᑦ ᓄᓱᒃᓯᖁᓪᓗᑎᑦ ᐅᕐᕈᑎᑦᓯᖁᓪᓗᑎᓪᓗ, ᐊᓯᕈᐃᖁᓪᓗᑎᑦ ᐃᒋᑦᓯᖁᓪᓗᑎᓪᓗ, ᐋᖅᑭᒃᓱᐃᖁᓪᓗᑎᑦ ᐱᕈᕐᑎᑦᓯᖁᓪᓗᑎᓪᓗ.”

ᔨᕆᒤᐊᐅᑉ ᑕᑯᑎᑕᐅᓂᖓ ᒪᕐᕉᖕᓂᒃ

¹¹ ᐊᑕᓂᐅᑉ ᐊᐱᕆᕚᖓ, “ᔨᕆᒤᐊ ᓱᓇᒦᒃ ᑕᑯᕕᑦ?” ᑭᐅᕙᕋᓗ, “ᓇᐹᕐᑑᑉ ᐊᕙᓚᖓᔪᖓᑕ ᐃᓚᖓᓂᒃ ᑕᑯᕗᖓ.”

¹² ᐊᑕᓂᐅᑉ ᑭᐅᕚᖓ, “ᓱᓕᕗᑎᑦ, ᖃᐅᔨᓴᕐᐳᖓ ᐅᖃᐅᓯᒃᑲ ᓇᓚᐅᑦᓯᓂᐊᕐᒪᖔᑕ.”

¹³ ᐊᑕᓂᐅᑉ ᐅᖃᐅᑎᓕᕆᕚᖓ, “ᓱᓇᒥᒃ ᑕᑯᒃᑲᓐᓂᕐᐲᑦ?” ᑭᐅᕙᕋ, “ᑕᑯᕗᖓ ᐅᓐᓄᐊᓪᓗᐊᑉ ᓇᓛᓂ ᐅᒃᑯᓯᖕᒥᒃ ᑎᕐᑎᑦᑐᒥᒃ, ᒥᒃᓯᒧᓪᓗ ᐅᕐᕈᓕᒑᔪᒥᒃ.”

¹⁴ ᐊᑕᓂᐅᑉ ᐅᖃᐅᑎᕚᖓ, “ᐅᓐᓄᐊᓪᓗᐊᑉ ᓇᓛᓂᑦ ᐊᓯᕈᕐᑕᐅᓐᓇᕐᑐᖅ ᑎᑭᑦᓱᒫᕐᐳᖅ ᓄᓇᒧᑦ ᑕᒪᑐᒧᖓ,

¹⁵ ᐅᓐᓄᐊᓪᓗᐊᑉ ᓇᓛᓃᑦᑐᑦ ᐃᓅᖃᑎᒌᒡᔪᐊᑦ ᑕᒪᐅᖓ ᑎᑭᖁᔪᒫᕋᒃᑭᑦ ᐊᖓᔪᖅᑳᕐᔪᐊᖏᓪᓗ ᐊᖓᔪᖅᑲᐅᕕᒃᑖᖁᓂᐊᕐᐸᒃᑲ ᔨᕉᓴᓕᐅᑉ ᐃᑎᕐᑕᕐᕕᒃᔪᐊᖏᓐᓂ, ᐊᕙᓗᕐᔪᐊᖏᑕᓗ ᐊᕙᑖᓂ, ᔫᑕᐅᓪᓗ ᐃᒡᓗᒐᓴᒡᔪᐊᖁᑎᖏᑕ ᐊᕙᑖᓂ.

¹⁶ ᐃᓄᖁᑎᒃᑲ ᓱᒋᐊᕐᓂᐊᕋᒃᑭᑦ ᐊᔪᕐᑐᓕᓂᕆᓚᐅᕐᑕᖏᑦ ᐱᓪᓗᒋᑦ, ᐅᕙᓐᓂᒃ ᕿᒤᓯᒪᖕᒪᑕ, ᐆᒪᔪᓂᒡᓗ ᑐᓂᕐᕈᓯᖃᑦᑕᓕᕐᓗᑎᒃ ᒎᑎᓐᖑᐊᓄᑦ, ᒎᑎᓐᖑᐊᓄᓪᓗ ᓴᓇᓯᒪᔭᒥᖕᓄᑦ ᑐᒃᓯᐊᕐᕕᖃᖃᑦᑕᓕᕐᒪᑕ.

¹⁷ ᔨᕆᒤᐋ ᐅᐸᓗᖕᒊᔭᓕᕆᑦ, ᐂᓗᑎᓪᓗ ᐅᖃᐅᑎᔭᕐᑐᓕᒃᑭᑦ ᑕᒤᓐᓂᒃ ᐅᖃᐅᓯᕆᔭᐅᖁᔭᓐᓂᒃ. ᓯᕘᕋᒋᑦᑍᓕᒃᑭᑦ, ᓯᕘᕋᒍᕕᓪᓕ ᓯᕘᕋᑎᓐᓂᕐᓴᐅᔪᓐᓇᕐᐸᒋᑦ ᐱᖃᑎᒋᓕᕈᕕᒋᑦ.

¹⁸ ᔨᕆᒤᐊ ᑕᑯᒋᑦ, ᓄᓇᒥ ᑕᒫᓂ ᐃᓅᔪᑦ ᔫᑕᒥᐅᑉ ᐊᖓᔪᖅᑳᕐᔪᐊᖏᑦ, ᐊᖓᔪᖅᑳᖑᑎᑕᐅᔪᓪᓗ ᑖᒃᑯᓄᖓ, ᑐᓂᕐᕈᓯᕐᑎᑦᓯᔨᐅᔪᓪᓗ, ᐃᓄᐃᓪᓗ, ᐃᓕᖕᓂᒃ ᐊᑭᕋᕐᑐᕐᓂᐊᕐᐳᑦ.

¹⁹ ᑖᒃᑯᐊ ᐅᓇᑕᕈᒫᕐᐹᑎᑦ; ᓵᓚᒋᔭᐅᓂᐊᓐᖏᓚᑎᓪᓕ, ᐅᕙᖓ ᐱᖃᑎᒋᓂᐊᕋᒃᑭᑦ ᓴᐳᑎᓯᒪᓗᑎᑦ. ᐅᕙᖓ ᐊᑕᓂᐅᔪᖓ ᐅᖃᕐᐳᖓ ᑕᒪᑐᒥᖓ.”