ᐃᓗᐊᕐᓮᔩᑦ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᒥᑎᐊᓂᒥᐅᑦ ᑭᖑᓪᓕᕐᐹᒥᒃ ᓵᓚᐅᓂᖓᑦ

¹ ᐃᕗᕅᒥᐅᑦ ᐃᓄᖏᑦ ᐅᖃᕐᐳᑦ ᒋᑎᐅᓂᒧᑦ, “ᓱᖕᒪᑦ ᐅᕙᑦᑎᓐᓂᒃ ᐱᑦᓯᐊᕐᕕᖃᓚᐅᓐᖏᓚᑎᑦ, ᐅᕙᑦᑎᓐᓂᒃ ᕾᖁᔨᓚᐅᖏᓐᓇᕕᑦ ᐅᓇᑕᕆᐊᕐᓂᐊᕐᑎᓪᓗᓯ ᒥᑎᐊᓂᒥᐅᓂᒃ?” ᓈᒻᒪᒃᓴᕋᑎᒃ ᑍᒫᒃ ᐃᓕᕋᓇᕐᕕᒋᓪᓗᒍ ᓂᓪᓕᐊᕕᒋᕚᑦ.

² ᐅᖃᐅᑎᕔᓪᓕ, “ᖃᓄᖅ ᐱᓂᐊᕐᓂᕆᓚᐅᕐᑕᒃᑲ ᐊᑦᔨᓪᓗᐊᖃᕐᐹᑦ ᐱᓂᐊᕐᓂᕆᓚᐅᕐᑕᑦᓯᓐᓂᒃ? ᐃᕗᕅᒥᒥᑦ ᑲᑎᕐᓱᐃᓂᕐᓗᑯᐃᑦ ᕔᓂᒃᓴᓂᒃ ᐱᐅᓂᕐᓴᐅᓐᖏᓛᑦ ᐊᐰᔨᕆᒥ ᕔᓂᓕᐊᕆᔭᐅᓯᒪᔪᓂᑦ?

³ ᒎᑎᐅᑉ ᓵᓚᖃᕐᓂᕐᒥᒃ ᑐᓂᕕᒋᓚᐅᕐᐹᓯ ᒥᑎᐊᓂᒥᐅᑦ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖏᖕᓂᒃ ᒪᕐᕉᖕᓂᒃ, ᐅᕆᑉᒥᒃ ᔩᐱᒥᒡᓗ; ᓱᓇᒥᒡᓕ ᐱᓂᐊᓚᐅᕐᐳᖓ ᐱᓂᐊᕐᓂᕆᓚᐅᕐᑕᑦᓯ ᐊᑦᔨᓪᓗᐊᖏᓐᓂᒃ?” ᑍᒫᒃ ᐅᖃᐅᑎᖕᒪᒋᑦ ᓂᓐᖓᐅᒪᓗᐊᕈᓐᓃᕐᐳᑦ.

⁴ ᒋᑎᐅᓂ ᑎᑭᑎᓪᓗᒍ ᔪᐊᕐᑕᓂᒧᑦ ᐃᑳᕐᑎᓪᓗᒍᓗ ᐊᑭᐊᓄᑦ. ᐃᒻᒥᓂᒃ ᐊᖑᑎᓪᓗ 300ᐃᑦ ᐃᓚᒋᔭᖏᑦ ᑕᖃᓯᒪᓕᓚᐅᕐᐳᑦ, ᑳᓕᕐᓗᑎᒡᓗ.

⁵ ᓱᑰᑎᒥᐅᓪᓗ, ᑕᕝᕙᓂ ᓄᓇᖃᕐᑐᑦ ᐅᖃᐅᑎᕔᑦ, “ᕿᓄᕗᖓ ᐃᓕᑦᓯᓐᓄᑦ ᐃᓄᖁᑎᒃᑲ ᒪᓕᒃᑐᑦ ᐅᕙᓐᓂᒃ ᓂᐊᖂᔭᒥᒃ ᑐᓂᓚᐅᕐᓯᐅᒃ ᓄᑮᓕᕐᒪᑕ, ᒪᓕᒃᑲᑦᑕ ᔩᐸᒥᒃ ᔮᓪᒨᓇᒥᒡᓗ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᖕᓂᒃ.”

⁶ ᓱᑰᑎᒥᐅᓪᓕ ᓯᕗᓕᕐᑎᖏᑦ ᐅᖃᕐᐳᑦ, “ᔩᐸ ᔮᓪᒨᓇᓗ ᑎᒍᓯᒪᓕᕋᑦᓯᐅᒃ ᓱᖕᒪᓪᓕ ᓂᐊᖂᔭᓂᒃ ᑐᓂᓯᔭᕆᐊᖃᕐᐱᑖ ᐅᓇᑕᕐᑐᒃᓴᖁᑎᖕᓄᑦ?”

⁷ ᑍᒤᒻᒪᑦ ᒋᑎᐅᓂᐅᑉ ᐅᖃᐅᑎᕔᑦ, “ᐊᑕᓂᐅᑉ ᐅᕙᑦᑎᓐᓄᑦ ᑐᓂᒃᐸᒋᒃ ᔩᐸ ᔮᓪᒨᓇᓗ, ᑎᒥᓯ ᑭᓪᓕᐊᔭᕐᑐᓛᕐᐸᕗᑦ ᑲᑭᓪᓚᐅᑎᓂᒃ ᐅᕐᐱᖕᓂᒡᓗ ᓯᐅᕋᕐᒥᐅᑕᕐᓂᒃ ᐊᑐᕐᓗᑕ!”

⁸ ᑕᕝᕙᓐᖔᕐᓗᑎᒃ ᐱᓄᐃᓕᒧᑦ ᑎᑭᒃᑭᕗᑦ, ᑍᒫᑦᓮᓐᓇᖅ ᐊᐱᕆᒋᕔᑦ ᑕᕝᕙᓂ ᓄᓇᖃᕐᑐᑦ, ᐱᓄᐃᓕᒥᐅᓪᓕ ᑭᐅᓚᐅᕆᕗᑦ ᑍᒫᑦᓮᓐᓇᖅ ᓱᑰᑎᒥᐅᑦ ᑭᐅᑦᔪᓯᕆᓚᐅᕐᑕᖓᑎᑐᑦ.

⁹ ᑍᒤᒻᒪᑦ ᐱᓄᐃᓕᒥᐅᑦ ᐅᖃᐅᑎᕔᑦ, “ᓵᓚᖃᕐᓗᖓ ᐅᑎᕈᒪ ᓇᐸᔪᕐᔪᐊᖁᑎᓯ ᐅᓇ ᓯᖁᒥᑦᓱᒫᕐᐸᕋ!”

¹⁰ ᔩᐸᓗ ᔮᓪᒨᓇᓗ ᑳᑯᕆᒦᓚᐅᕐᐴᒃ ᐅᓇᑕᕐᑐᒃᓴᖁᑎᑎᒃ ᐃᓚᒋᓪᓗᒋᑦ. ᐅᓇᑕᕐᑐᒃᓴᖁᑎᖏᑦ 15,000ᐅᓪᓗᑎᒃ; ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᓯᒪᔪᑦ ᐅᓇᑕᕐᑐᒃᓮᑦ ᐊᒥᐊᒃᑯᖏᑦ; 120,000ᐃᑦ ᐅᓇᑕᕐᑐᒃᓴᖁᑎᖏᑦ ᐅᓇᑕᐅᑎᓖᑦ ᑐᖁᖓᓕᓚᐅᕐᒪᑕ.

¹¹ ᒋᑎᐅᓂᓕ ᐊᖅᑯᑎᒃᑯᑦ ᐃᖏᕐᕋᓪᓗᓂ, ᓄᓁᑦ ᓅᐸᐅᓪᓗ ᔪᒡᐱᕼᐊᐅᓪᓗ ᓯᕿᓂᖓᑕ ᓂᐱᕕᐊᒍᑦ, ᐅᓇᑕᕐᑐᒃᓮᓪᓗ ᐅᓇᑕᕐᓗᒋᑦ. ᓂᕆᐅᓐᖏᓈᓚᐅᕐᐰᑦ.

¹² ᔩᐸᓗ ᔮᓪᒨᓇᓗ ᕿᒪᒃᓯᕗᒃ, ᒪᓕᒡᓗᒋᒡᓗ ᑎᒍᕚᒃ, ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᒃ ᑖᒃᑯᐊᒃ ᒪᕐᕉᒃ, ᐅᓇᑕᕐᑐᒃᓴᖁᑎᖏᓪᓗ ᐅᐃᒻᒪᒃᑎᑉᐰᑦ.

¹³ ᒋᑎᐅᓂᓕ ᔪᐊᓯᐅᑉ ᐃᕐᓂᖓ ᐅᑎᓕᕋᒥ ᐅᓇᑕᕐᕕᖕᒥᖕᓂᑦ ᐊᖅᑲᕐᑎᓚᐅᕐᐳᖅ ᕼᐃᕆᔅ ᐊᖅᑯᑎᖓᒍᑦ,

¹⁴ ᑎᒍᓯᓪᓗᓂᓗ ᐊᖑᒻᒥᒃ ᐅᕕᒃᑲᒥᒃ ᓱᑰᑎᒥᐅᑕᕐᒥᒃ, ᐊᐱᕐᓱᓚᐅᕐᐹᓗ; ᑖᓐᓇᓗ ᑎᑎᕋᓚᐅᕐᐳᖅ ᐊᑎᕐᓂᒃ 77ᓂᒃ ᓱᑰᑎᒥᐅᑦ ᓯᕗᓕᕐᑎᖏᓐᓂᒃ ᐊᖓᔪᖅᑳᖏᓐᓂᒡᓗ.

¹⁵ ᒋᑎᐅᓂᓗ ᑎᑭᓐᓇᒥ ᓱᑰᑎᐅᑉ ᐃᓄᖏᑦ ᐅᖃᐅᑎᕔᑦ, “ᐅᑯᐊᒃ ᑕᕝᕙ ᔩᐸᓗ ᔮᓪᒨᓇᓗ, ᑖᒃᑯᐊᒃ ᐱᓪᓗᒋᒃ ᐅᐃᕕᓴᓚᐅᕐᑐᓯ ᐅᕙᓐᓂᒃ ᐅᖃᓚᐅᕋᑦᓯ, ‘ᑎᒍᓯᒪᓪᓗᓯᐅᒃ ᐱᓯᒪᓕᕐᐱᓯᒋᑦ ᔩᐸᓗ ᔮᓪᒨᓇᓗ, ᑍᒫᒃ ᓂᕆᑎᑦᓯᔭᕆᐊᖃᓕᕐᐱᑖ ᐅᓇᑕᕐᑐᒃᓴᖁᑎᖕᓂᒃ ᓄᑮᕈᑎᓕᕐᑐᓂᒃ?’”

¹⁶ ᑕᕝᕙ ᑎᒍᓯᓚᐅᕐᐳᖅ ᑲᑭᓪᓚᐅᑎᓕᖕᓂᒃ ᐅᕐᐱᖕᓂᒡᓗ ᐃᓄᖃᖏᑦᑐᒥᑦ ᐱᔭᕕᓂᕐᒥᓂᒃ ᐋᓐᓂᕐᑎᕆᑦᔪᑎᒋᓪᓗᒋᓪᓗ ᓱᑰᑎᒥᐅᑦ ᐊᖓᔪᖅᑳᖏᓐᓂᒃ.

¹⁷ ᓇᐸᔪᕐᔪᐊᕐᓗ ᐱᓄᐃᓕᒦᑦᑐᖅ ᐅᕐᕈᑎᓚᐅᕐᐹ ᑐᖁᓪᓗᒋᓪᓗ ᐃᒡᓗᒐᓴᖕᓃᑦᑐᑦ.

¹⁸ ᒋᑎᐅᓂᐅᑉ ᔩᐸᓗ ᔮᓪᒨᓇᓗ ᐊᐱᕆᕚᒃ, “ᑍᒃᑯᐊᓕ ᐊᖑᑎᑦ ᑐᖁᓚᐅᕐᑕᓯ ᑍᐸᕆᒥ ᖃᓄᐃᑦᑑᕙᑦ?” ᑭᐅᕘᒡᓗ, “ᐃᓕᒃᑐᑦ ᑕᐅᑦᑐᖃᓚᐅᕐᐳᑦ ᐃᓘᓐᓇᑎᒡᓗ ᐊᖓᔪᖅᑳᕐᔪᐊᑉ ᐃᕐᓂᕆᔫᔮᓚᐅᕐᐰᑦ.”

¹⁹ ᒋᑎᐅᓂᐅᑉ ᐅᖃᐅᑎᕔᑦ, “ᑍᒃᑯᐊ ᖃᑕᓐᖑᑎᒋᓚᐅᕐᐸᒃᑲ, ᐊᓈᓇᒪ ᓇᖕᒥᓂᖅ ᐃᕐᓂᖏᑦ. ᐊᖏᕈᑎᖃᒻᒪᕆᒃᐳᖓ, ᐊᑕᓂᕐᒧᑦ ᐆᒪᔪᒧᑦ, ᑐᖁᓚᐅᖏᒃᑯᑦᓯᐅᒃ, ᑐᖁᒃᑲᔭᓐᖏᓚᑦᓯᒃ.”

²⁰ ᔨᑎᕆᒧᑦ ᐅᖃᕐᐳᖅ ᐃᕐᓂᕐᒥᓄᑦ ᐊᖓᔪᒃᓕᕐᐹᒧᑦ, “ᐊᑏ ᑐᖁᓕᒃᑭᒃ!” ᔩᓴᕆᐅᓪᓕ ᓴᕕᒡᔪᐊᓂᒃ ᑎᒍᔪᒪᓚᐅᓐᖏᓚᖅ, ᑲᑉᐱᐊᓱᒃᑲᒥ ᓄᑲᑉᐱᐊᑐᐃᓐᓇᐅᒐᒥ ᓱᓕ.

²¹ ᔩᐸᓗ ᔮᓪᒨᓇᓗ ᐅᖃᕐᐴᒃ ᒋᑎᐅᓂᒧᑦ, “ᐊᑏ, ᓇᖕᒥᓂᖅ ᑐᖁᓚᐅᕐᑎᒍᒃ. ᐊᖑᑦ ᐊᖑᑕᐅᖕᒪᑦ ᓴᓐᖏᔫᓪᓗᓂᓗ.” ᑍᒤᒻᒪᑦ ᒋᑎᐅᓂᐅᑉ ᑐᖁᑉᐹᒃ, ᑳᒥᓕᖁᑎᖏᑕᓗ ᖁᖓᓯᖏᑕ ᐱᐅᓴᐅᑎᖏᑦ ᐅᔭᒥᖏᑦ ᑎᒍᕔᑦ.

²² ᑕᒪᑐᒪ ᑭᖑᓂᐊᒍᑦ, ᐃᓴᕆᐊᓕᒥᐅᑉ ᒋᑎᐅᓂᒧᑦ ᐅᖃᕐᐳᑦ, “ᐊᒐᔪᖅᑳᖑᓚᐅᕆᑦ ᐅᕙᑦᑎᓐᓄᑦ ᐃᕝᕕᑦ ᐃᕐᓂᑎᓪᓗ ᐃᕐᖑᑕᑎᓪᓗ. ᐱᐅᓕᓚᐅᕋᑦᑎᒍᑦ ᒥᑎᐊᓂᒥᐅᑦ ᐱᔪᓐᓇᕐᓂᖏᓐᓂᑦ.”

²³ ᒋᑎᐅᓂᐅᑉ ᑭᐅᕔᑦ, “ᐊᖓᔪᖅᑳᖑᔪᒪᓐᖏᓚᖓ ᐃᓕᑦᓯᓐᓄᑦ, ᐃᕐᓂᒃᑲᓘᓐᓃᑦ ᐊᖓᔪᖅᑳᓐᖑᕐᓂᐊᓐᖏᓚᑦ, ᐊᑕᓂᕐᓕ ᐊᖓᔪᖅᑳᖑᓂᐊᕐᐳᖅ ᐃᓕᑦᓯᓐᓄᑦ.”

²⁴ ᒋᑎᐅᓂᓗ ᐅᖃᒃᑲᓐᓂᕐᐳᖅ, “ᐱᔪᒪᔭᖃᕐᐳᖓ ᐊᑕᐅᓯᕐᒥᒃ, ᐃᓘᓐᓇᓯ ᑐᓂᓯᕕᒋᓯᓐᖓ ᑐᖁᓚᐅᕐᑕᑦᓯ ᐱᖁᑎᕕᓂᖏᓐᓂᒃ ᑎᒍᓚᐅᕐᑕᑦᓯᓐᓂᒃ ᓯᐅᑎᒥᐅᑕᕐᓂᒃ.” (ᒎᓗᓂᒃ ᓯᐅᑎᕈᑎᖃᕐᐸᓚᐅᕐᒪᑕ ᐃᓯᒤᓕᐅᑉ ᑭᖑᕚᖏᑦ.)

²⁵ ᐃᓄᐃᑦ ᑭᐅᕚᑦ, “ᖁᕕᐊᓱᖕᓂᐊᕐᐳᒍᑦ ᑐᓂᓯᕕᒋᒍᑦᑎᒋᑦ.” ᐊᓐᓄᕌᒥᒃ ᐃᓕᓯᓪᓗᑎᒃ, ᐃᓘᓐᓇᑎᒡᓗ ᐃᓕᓯᕗᑦ ᓯᐅᑎᒥᐅᑕᕐᓂᒃ ᑎᒍᓚᐅᕐᑕᒥᖕᓂᒃ.

²⁶ ᓯᐅᑎᒥᐅᑍᑦ ᒎᓗᐃᑦ ᐅᖁᒤᓐᓂᖃᓚᐅᕐᐳᑦ 1,700ᓂᒃ ᓴᑯᓪᔅᓂᒃ ᐅᖁᒤᓐᓂᕐᓯᐅᑏᑦ ᒪᓕᒡᓗᒋᑦ, ᐃᓚᒋᔭᐅᓇᑎᒃ ᖁᖓᓯᕐᒧᑦ ᐱᐅᓴᐅᑏᑦ, ᐃᑦᑎᐅᔧᓪᓗ ᑕᐅᑦᑐᖏᑦ ᐊᓐᓄᕌᑦ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᑕ ᐊᑐᓚᐅᕐᑕᖏᑦ, ᐅᕝᕙᓘᓐᓃᑦ ᑳᒥᓖᑦ ᖁᖓᓯᕈᑎᒋᓚᐅᕐᑕᖏᑦ.

²⁷ ᒋᑎᐅᓂ ᓴᓇᓚᐅᕐᐳᖅ ᐊᔪᕆᕐᑐᐃᔨᕐᔪᐊᑉ ᓴᒡᕕᖕᒥᐅᑕᖏᓐᓂᒃ ᒎᓗᓂᒃ ᐱᓚᐅᕐᑕᒥᓂᒃ; ᐊᖏᕐᕋᒥᓄᓪᓗ ᐃᓕᕚ ᐅᐸᕋᒥ. ᐃᓴᕆᐊᓕᒥᐅᑦ ᐃᓘᓐᓇᑎᒃ ᐊᓯᓐᓂᐊᓕᓚᐅᕐᐳᑦ ᒎᑎᒥᒃ, ᐃᓘᓐᓇᑎᒡᓗ ᐂᕗᑦ ᑐᒃᓯᐊᕆᐊᕐᑐᕐᓗᑎᒃ ᑖᑦᓱᒧᖓ. ᒋᑎᐅᓂᐅᑉ ᐃᓚᖏᑕᓗ ᐊᔪᓕᕈᑎᒋᓚᐅᕐᐹᑦ.

²⁸ ᒥᑎᐊᓂᒥᐅᑦ ᓵᓚᐅᕗᑦ ᐃᓴᕆᐊᓕᒥᐅᓄᑦ, ᓯᕘᕋᓇᕈᓃᓚᐅᕐᐳᑦ ᒪᑭᒃᑲᓐᓂᕈᓐᓃᕐᓗᑎᒡᓗ. ᓄᓇᒥᓗ ᐅᓇᑕᕐᓂᖃᕈᓐᓃᓚᐅᕐᐳᑦ ᐊᕐᕌᒍᓂᒃ 40ᓂᒃ ᒋᑎᐅᓂᐅᑉ ᑐᖁᓂᖓ ᑎᑭᓪᓗᒍ.

ᒋᑎᐅᓂᐅᑉ ᑐᖁᓂᖓ

²⁹ ᔨᕈᐸᐅᓪ ᔪᐊᓯᐅᑉ ᐃᕐᓂᖓ ᐅᑎᓚᐅᕐᐳᖅ ᓇᖕᒥᓂᖅ ᐊᖏᕐᕋᒥᓄᑦ ᑍᑲᓃᓕᕐᓗᓂᓗ.

³⁰ ᓇᖕᒥᓂᕐᒥᓂᒃ ᒋᑎᐅᓂ ᐃᕐᓂᖃᓚᐅᕐᐳᖅ 70ᓂᒃ, ᐅᓄᕐᑐᓂᒃ ᓄᓕᐊᖃᓚᐅᕋᒥ.

³¹ ᓄᓕᐊᖃᒃᑲᓐᓂᓚᐅᕆᕗᖅ ᓯᑭᒻᒥ ᓄᓇᖃᕐᑐᒥᒃ, ᑖᓐᓇᓗ ᐃᕐᓂᕐᑖᕐᕕᒋᓚᐅᕐᐹ ᐊᑎᖃᕐᑎᓪᓗᒍᓗ ᐊᐱᒥᓕᑭᒥᒃ.

³² ᒋᑎᐅᓂ ᔪᐊᓯᐅᑉ ᐃᕐᓂᖓ ᑐᖁᓚᐅᕐᐳᖅ ᐃᓄᑐᖃᒻᒪᕆᐅᓕᕐᓗᓂ. ᐃᓗᕕᕐᑕᐅᓪᓗᓂᓗ ᐊᑖᑕᖓᑕ ᔪᐊᓯᐅᑉ ᐊᐰᔭᕆᑎᐅᑉ ᑭᖑᕚᖓᑕ ᐃᓗᕕᖓᓂ, ᐅᐸᕋᒥ.

³³ ᒋᑎᐅᓂᐅᓪᓗ ᑐᖁᓂᖓᑕ ᑭᖑᓂᐊᒍᑦ ᐃᓴᕆᐊᓕᐅᑉ ᑭᖑᕚᖏᑦ ᐊᓯᓐᓂᐊᓕᕇᓚᐅᕆᕗᑦ ᒎᑎᒥᒃ, ᑐᒃᓯᐊᕐᐸᓕᕐᓗᑎᒃ ᐰᓕᒧᑦ, ᓴᓇᓚᐅᕐᐳᑦ ᐰᓕ-ᐱᕆᑎᒥᒃ ᒎᑎᑖᕆᓪᓗᒍᓗ.

³⁴ ᐃᖅᑲᐅᒪᔪᓐᓃᓚᐅᕐᐳᓪᓗ ᐊᑕᓂᕐᒥᒃ ᒎᑎᒥᖕᓂᒃ, ᓴᐳᑦᔨᔨᒋᕙᓚᐅᕐᑕᒥᖕᓂᒃ ᐊᑭᕋᒥᖕᓂᑦ ᖃᖓᑐᐃᓐᓇᓕᒫᖅ.

³⁵ ᔨᕈᐸᐅᓕᐅᓪᓗ ᐱᑦᓯᐊᕐᕕᒋᓚᐅᓐᖏᓔᑦ ᒋᑎᐅᓂᐅᑉ ᐃᓚᖏᑦ, ᐱᐅᔪᑦ ᐱᓂᐊᕐᓂᕆᓚᐅᕐᑕᖏᑦ ᐃᓴᕆᐊᓕᒥᐅᓄᑦ ᐱᓪᓗᒋᑦ.