ᐃᓗᐊᕐᓮᔩᑦ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᒋᑎᐅᓂᐅᑉ ᓵᓚᖃᕐᓂᖓ ᒥᑎᐊᓂᒥᐅᓂᒃ

¹ ᐅᓪᓗᐃᑦ ᐃᓚᖓᓐᓂ ᔨᕈᐸᐅᓪ (ᑖᓐᓇ ᒋᑎᐅᓂ) ᐃᓄᐃᓪᓗ ᓇᔪᕐᑎᓕᒫᖏᑦ ᒪᑭᑉᐳᑦ ᐅᓪᓛᒻᒪᕆᒃᑯᑦ ᑕᖕᒫᕐᓗᑎᒡᓗ ᕼᐊᕉᑎᐅᑉ ᑰᖓᓂ; ᒥᑎᐊᓂᒥᐅᓪᓕ ᑕᖕᒫᕐᓯᒪᓚᐅᕐᐳᑦ ᓇᕐᓴᒥ ᒨᕆᐅᑉ ᐅᖓᑖᓂ.

² ᐊᑕᓂᐅᓪᓗ ᒋᑎᐅᓂ ᐅᖃᐅᑎᕚ, “ᐃᓄᐃᑦ ᓇᔪᕐᑎᒋᔭᑎᑦ ᐅᓄᓗᐊᕐᒪᑕ ᓵᓚᖃᕐᑎᓐᓂᐊᕈᒃᑭᑦ ᒥᑎᐊᓂᒥᐅᓂᒃ. ᐃᓴᕆᐊᓕᒥᐅᑦ ᐅᕙᓐᓄᑦ ᐃᓱᒪᑐᐃᓐᓇᕆᐊᖃᕐᒪᑕ ᐱᑦᔪᑎᔭᐅᔪᕆᖏᓪᓗᑎᒃ, ᐅᖃᕐᓗᑎᒃ, ‘ᐅᕙᑦᑎᓐᓂᒃ ᓵᓚᖃᓚᐅᕐᐳᒍᑦ.’

³ ᐃᓄᐃᑦ ᑐᓵᑎᓪᓗᒋᑦ ᐅᖃᐅᑎᒃᑭᑦ, ‘ᓇᓪᓕᐊᑦ ᑲᑉᐱᐊᓱᒃᑯᓂ ᓴᔪᒡᓗᓂᓗ ᑖᓐᓇ ᐊᖏᕐᕋᓕᕐᓕ,’” ᒋᑎᐅᓂᐅᑉ ᐆᒃᑐᕋᓚᐅᕐᐰᑦ; ᑍᒤᒻᒪᑦ 22,000ᐃᓪᓗ ᐅᑎᓚᐅᕐᐳᑦ, 10,000ᐃᑦ ᕿᒪᒃᑕᐅᓪᓗᑎᒃ ᒋᓕᐊᑎᒥ.

⁴ ᐊᑕᓂᐅᑉ ᒋᑎᐅᓂ ᐅᖃᐅᑎᕚ, “ᐃᓄᐃᑦ ᓲᓕ ᐅᓄᓗᐊᕐᒪᑕ ᐃᒪᐅᑉ ᓯᓈᓅᕐᑎᒃᑭᑦ ᑕᐅᕙᓂ ᐆᒃᑐᕋᕐᓂᐊᕋᒃᑭᑦ; ᓇᓪᓕᐊᑦ ᐃᓕᖕᓄᑦ ᐅᖃᐅᓯᕆᓕᕈᒃᑯ ᐊᖑᑦ ᐅᓇ ᐃᓕᑦᓯᓐᓄᑦ ᐃᓚᐅᓂᐊᕐᑐᖅ, ᑖᓐᓇ ᐃᓚᐅᔭᕆᐊᖃᕐᓂᐊᕐᐳᖅ; ᓇᓪᓕᐊᓪᓗ ᐅᖃᐅᓯᕆᓕᕈᒃᑯ ᐊᖑᑦ ᐅᓇ ᐃᓕᑦᓯᓐᓄᑦ ᐃᓚᐅᓂᐊᖏᑦᑐᖅ, ᑖᓐᓇ ᐃᓚᐅᔭᕆᐊᖃᕐᓂᐊᓐᖏᓚᖅ.”

⁵ ᒋᑎᐅᓂᐅᑉ ᐃᓄᐃᑦ ᐃᒪᐅᑉ ᓯᓈᓅᕈᑎᕔᑦ ᑕᐅᓄᖓ; ᐊᑕᓂᐅᓪᓗ ᒋᑎᐅᓂ ᐅᖃᐅᑎᕚ, “ᓇᓪᓕᐊᑦ ᖃᓂᕐᒥᓄᑦ ᐃᒥᕐᑐᖅ ᕿᒻᒥᑎᑐᑦ, ᑖᓐᓇ ᓇᓗᓁᕈᒃ; ᑍᒫᒃᑕᐅᖅ ᓰᖅᑯᕐᓗᑎᒃ ᐃᒥᕐᑐᑦ ᓇᓗᓁᕐᓗᖏᑦ.”

⁶ ᐊᖑᑎᑦ ᑖᒃᑯᐊ ᐃᒥᕐᑐᑦ ᐊᒡᒐᖕᒥᖕᓄᑦ ᖃᓗᓯᕙᒃᓗᑎᒃ 300ᐅᓚᐅᕐᐳᑦ ᐅᓄᕐᓂᖏᑦ; ᐊᓯᖏᓪᓕ ᐃᓄᐃᑦ ᓰᖅᑯᕐᓗᑎᒃ ᐃᒥᓚᐅᕐᐳᑦ.

⁷ ᐊᑕᓂᐅᓪᓗ ᒋᑎᐅᓂ ᐅᖃᐅᑎᕚ, “ᐊᖑᑎᓄᑦ 300ᓄᑦ ᖃᓗᓯᓪᓗᑎᒃ ᐃᒥᕐᑐᓄᑦ ᒥᑎᐊᓂᒥᐅᓂᒃ ᓵᓚᖃᕐᑎᓐᓂᐊᕐᐸᒋᑦ; ᐊᓯᖏᓪᓕ ᐊᖏᕐᕋᕐᑎᓕᒃᑭᑦ.”

⁸ ᐃᓄᐃᓪᓗ ᒪᕐᕋᐅᔭᖁᑎᖏᓐᓂᒃ ᑎᑦᑐᓚᐅᑎᖏᓐᓂᒡᓗ ᑕᖁᐊᖏᓐᓂᒡᓗ ᐱᓪᓗᓂ; ᐃᓴᕆᐊᓕᒥᐅᑉ ᐊᒥᐊᒃᑯᖏᑦ ᐊᖏᕋᕐᑎᑉᐰᑦ, 300ᓂᒡᓕ ᐊᖑᑎᓂᒃ ᐱᓯᒪᓕᕐᓗᓂ; ᒥᑎᐊᓂᒥᐅᓪᓕ ᑕᖕᒫᕐᓯᒪᓚᐅᕐᐳᑦ ᓇᕐᓴᒥ ᐊᒃᐸᓯᒃᑐᒥ.

⁹ ᑍᑦᓱᒪᓂ ᐅᓐᓄᒃᑎᓪᓗᒍ ᐊᑕᓂᐅᑉ ᒋᑎᐅᓂ ᐅᖃᐅᑎᕚ, “ᒪᑭᓕᕆᑦ ᐅᓇᑕᕆᐊᕐᓗᑎᓪᓗ ᑕᖕᒫᕐᓯᒪᕕᖏᓐᓄᑦ; ᓵᓚᖃᕐᑎᑦᑕᕇᕋᒃᑭᑦ.

¹⁰ ᑕᐅᓄᓐᖓᕆᐊᒃᓴᕐᓕ ᑲᑉᐱᐊᓱᒃᑯᕕᑦ, ᑕᖕᒫᕐᓯᒪᕕᖏᓐᓄᐊᓕᕆᑦ ᐱᔩᑦ ᐳᕋ ᐱᖃᑎᒋᓗᒍ.

¹¹ ᑐᓴᕐᓂᐊᕋᕕᑦ ᖃᓄᖅ ᐅᖃᐅᓯᖃᓕᕐᒪᖔᑕ, ᓯᕘᕋᔪᓐᓃᕐᓂᐊᕐᐳᑎ ᐅᓇᑕᕆᐊᓕᕐᓗᑎᓪᓗ ᑕᖕᒫᕐᓯᒪᕕᖏᓐᓄᑦ.” ᐊᓱᐃᓛᒃ ᒋᑎᐅᓂ ᐱᔨᓂ ᐳᕋ ᐱᖃᑎᒋᓪᓗᒍ ᑕᐅᓄᓐᖓᕐᐴᒃ ᐅᓇᑕᕐᑐᒃᓮᑦ ᐅᓇᑕᐅᑎᓖᑦ ᑕᖕᒫᕐᓯᒪᔪᑦ ᓯᓚᑖᓐᓄᑦ.

¹² ᒥᑎᐊᓂᒥᐅᑦ, ᐊᒪᓕᑬᑎᓪᓗ, ᓯᕿᓂᐅᓪᓗ ᓇᓛᓂᑦ ᐱᓯᒪᔪᑦ ᓇᑎᕐᓇᒥ ᓯᐊᒻᒪᒃᓯᒪᓚᐅᕐᐳᑦ ᓇᕐᓴᒥ ᐱᒡᓕᕐᑕᐅᔮᕐᑐᑎᑐᑦ ᐅᓄᓗᐊᒧᑦ, ᑳᒥᓕᖁᑎᖃᓚᐅᕐᐳᓪᓗ ᓈᓴᒐᒃᓴᐅᖏᑦᑐᓂᒃ ᓯᒡᔭᒥ ᓯᐅᕋᕐᑎᑐᑦ ᐅᓄᕐᑐᕐᔪᐊᑎᑐᑦ.

¹³ ᒋᑎᐅᓂᒃᑯᓪᓗ ᑎᑭᐅᑎᒐᒥᒃ, ᑐᓵᓚᐅᕐᐳᖅ ᐊᖑᒻᒥᒃ ᓯᓐᓇᒃᑐᒥᓂᒃ ᐅᓂᒃᑳᕐᑐᒥᒃ ᐱᖃᑎᒥᓄᑦ, ᐅᖃᓚᐅᕐᐳᖅ, “ᑕᑯᒋᑦ ᓯᓐᓇᒃᑐᓚᐅᕐᑐᖓ ᓂᐊᖂᔭᒥ ᐹᓕᒥᒃ ᐊᒃᓴᑳᔪᒥᒃ ᒥᑎᐊᓂᒥᐅᑦ ᑕᖕᒫᕐᓯᒪᕕᖓᓄᑦ ᑐᐱᕐᒧᑦ ᐊᐳᕐᑐᒥᒃ. ᑐᐱᕐᓗ ᐅᕐᕈᕗᖅ, ᐅᓕᓐᓇᒥ ᒪᓂᖅᑲᒥ ᐃᓯᕕᖓᓕᕐᐳᖅ.”

¹⁴ ᐱᖃᑎᖓᑕ ᑭᐅᕚ, “ᐃᓐᓇ ᒋᑎᐅᓂᐅᑉ ᓴᕕᒡᔪᐊᖓ, ᔪᐊᓯᐅᑉ ᐃᕐᓂᖓᑕ, ᐃᓴᕆᐊᓕᒥᐅᑕᐅᑉ ᒎᑎᐅᑉ ᓵᓚᖃᕐᑎᒻᒪᒍ ᒥᑎᐊᓂᒥᐅᓂᒃ ᐅᓇᑕᕐᑐᒃᓴᖁᑎᓕᒫᖏᓐᓂᒡᓗ!”

¹⁵ ᒋᑎᐅᓂᓕ ᑐᓴᕋᒥ ᓯᓇᒃᑑᑉ ᐅᓂᒃᑳᕆᔭᐅᓂᖓᓂᒃ ᖃᓄᕐᓗ ᑐᑭᖃᕐᒪᖔᑦ, ᐹᒻᒪᒃᑎᕐᐳᖅ ᑐᒃᓯᐊᕐᓗᓂᓗ ᐊᑕᓂᕐᒧᑦ; ᐅᑎᕋᒥᒡᓗ ᐃᓴᕆᐊᓕᒥᐅᑦ ᑕᖕᒫᕐᓯᒪᕕᒋᔭᖓᓄ ᐅᖃᐅᑎᕔᑦ, “ᒪᑭᓕᕆᑦᓯ, ᐊᑕᓂᐅᑉ ᓵᓚᖃᕐᑎᒻᒪᓯ ᒥᑎᐊᓂᒥᐅᑦ ᐅᓇᑕᕐᑐᒃᓴᕐᔪᐊᖁᑎᖏᓐᓂᒃ!”

¹⁶ ᐊᕕᒃᑐᕐᐰᓪᓗ 300ᐃᑦ ᐃᓄᖁᑎᓂ ᐱᖓᓱᐃᓕᓪᓗᒋᑦ ᐊᑐᓂᓪᓗ ᐂᑦᑐᕐᐰᑦ, ᑎᑦᑐᓚᐅᑎᓂᒃ ᒪᕐᕋᕐᓂᒡᓗ ᐃᒪᖃᐅᑎᓂᒃ ᓇᓂᕈᐊᓂᒃ ᐃᓗᓕᓕᖕᓂᒃ.

¹⁷ ᐅᖃᐅᑎᓪᓗᒋᓪᓗ, “ᑕᑯᓐᓈᕐᓗᖓ ᖃᓄᐃᓕᐅᕐᒪᖔᕐᒪ ᒪᓕᖕᓂᐊᕐᐸᑦᓯᓐᖓ, ᑕᖕᒫᕐᓯᒪᕕᖏᑕ ᓯᓚᑖᓄᐊᕈᒪ, ᖃᓄᐃᓕᐅᕐᒪᖔᕐᒪ ᖃᐅᔨᓴᑦᓯᐊᕐᓂᐊᕐᐳᓯ.

¹⁸ ᑎᑦᑐᓚᐅᑎᒥᒃ ᓂᓪᓕᕐᑎᑦᓯᒍᒪ, ᐃᓚᒋᔭᓕᒫᒃᑲᓗ, ᐃᓕᑦᓯᑦᑕᐅᖅ ᑎᑦᑐᓚᐅᑎᑦᓯᓐᓂᒃ ᓂᓪᓕᕐᑎᑦᓯᓂᐊᕆᕗᓯ ᑕᖕᒫᕐᓯᒪᕕᖏᑕ ᐊᕙᑎᓕᒫᖓᓂ, ᕾᒐᓛᕐᓗᓯᓗ, ‘ᐊᑕᓂᐅᑉ ᐅᓇᑕᕐᓂᖓ ᒋᑎᐅᓂᐅᓪᓗ!’”

¹⁹ ᑕᕝᕙ ᒋᑎᐅᓂ ᐃᓄᖁᑎᖏᓪᓗ 100ᐃᑦ ᑕᖕᒫᕐᓯᒪᕕᖏᑦᑕ ᑭᒡᓕᖓᓄᐊᕐᐳᖅ ᕿᑎᕋᓕᓚᐅᕐᑎᓐᓇᒍ ᐅᓐᓄᒃᑯᑦ, ᖃᐅᔨᓴᕐᑏᑦ ᐊᓯᑦᔨᕐᑕᐅᕋᑖᕐᑎᓪᓗᒋᑦ; ᐊᑕᐅᑦᓯᒃᑯᑦ ᑎᑦᑐᓚᐅᑎᒥᖕᓂᒃ ᓂᓪᓕᕐᑎᑦᓯᕗᑦ, ᒪᕐᕅᓪᓗ ᐃᒪᖃᐅᑏᑦ ᑎᒍᒥᐊᕐᑕᑎᒃ ᓯᖁᒥᓪᓗᒋᑦ,

²⁰ ᐅᓇᑕᕐᑐᒃᓮᑦ ᐱᖓᓱᐃᓕᖅᑲᖓᔪᑦ ᑎᑦᑐᓚᐅᑎᒥᖕᓂᒃ ᓂᓪᓕᕐᑎᑦᓯᒋᕗᑦ ᐃᒪᖃᐅᑎᓂᒡᓗ ᓯᖁᒥᑦᓯᓪᓗᑎᒃ, ᓴᐅᒥᖕᒥᖕᓂ ᓇᓂᕈᐊᕐᒥᒃ ᑎᒍᒥᐊᕐᓗᑎᒃ, ᑕᓕᕐᐱᖕᒥᖕᓄᓪᓗ ᑎᑦᑐᓚᐅᑎᒥᒃ ᓂᓪᓕᕐᑎᑦᓯᓪᓗᑎᒃ, ᕾᒐᓛᕐᓗᑎᒡᓗ, “ᓴᕕᒡᔪᐊᖅ ᐊᑕᓂᐅᑉ ᐅᓇᑕᕐᓂᖓ ᒋᑎᐅᓂᐅᓪᓗ!”

²¹ ᑕᒪᕐᒥᒃ ᐃᓂᒥᖕᓂ ᓇᖏᕐᐳᑦ ᑕᖕᒫᕐᓯᒪᕕᖓᑦ ᐊᕙᓗᓯᒪᓪᓗᒍ, ᐅᓇᑕᕐᑐᒃᓴᓕᒫᓪᓗ ᕿᒫᓕᕐᐳᑦ ᕾᒐᓛᕐᓗᑎᒃ.

²² ᑎᑦᑐᓚᐅᑎᑦ 300ᐃᑦ ᓂᓪᓕᐊᑎᑕᐅᓕᕐᒪᑕ, ᐊᑕᓂᐅᑉ ᐊᖑᑎᑦ ᐃᓚᒥᖕᓄᑦ ᓴᕕᒡᔪᐊᒥᖕᓄᑦ ᐅᓇᑕᕐᑎᓕᕐᐰᑦ ᐅᓇᑕᕐᑐᒃᓴᐅᖃᑎᓕᒫᒥᖕᓄᑦ. ᕿᒫᓪᓗᑎᒡᓗ ᐱᑦ-ᓰᑕ ᑎᑭᓪᓗᒍ ᔨᕆᕋᐅᑉ ᓇᓛᓄᑦ, ᓄᓇᓖᑦ ᐊᐱᐅᓪ-ᒥᕼᐅᓚ ᑭᒡᓕᖓᓄᑦ ᑕᐹᑎᐅᑉ ᖃᓂᒋᔮᓄᑦ.

²³ ᐊᖑᑎᓪᓕ ᐃᓴᕆᐊᓕᒥᐅᑦ ᕾᖁᔭᐅᓚᐅᕐᐳᑦ ᓈᑉᑕᓕᐅᑉ ᑭᖑᕚᖏᓐᓂᑦ, ᐋᓱᕆᐅᓪᓗ ᑭᖑᕚᖏᓐᓂᑦ ᒫᓇᓯᐅᓪᓗ ᑭᖑᕚᓕᒫᖏᑦ, ᑖᒃᑯᐊᓗ ᒪᓕᓚᐅᕐᐳᑦ ᒥᑎᐊᓂᒥᐅᓂᒃ.

²⁴ ᒋᑎᐅᓂ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᓂᒃ ᖃᖅᑲᓕᖕᓄᑦ ᐃᕗᕅᑎᒥ ᓄᓇᖃᕐᑐᓄᑦ ᐅᖃᐅᑎᓪᓗᒋᑦ, “ᐊᖅᑲᕐᑎᕐᓗᓯ ᕾᒋᑦᓯ ᐅᓇᑕᕆᐊᕐᓗᓯ ᒥᑎᐊᓂᒥᐅᓂᒃ. ᐃᑳᕐᕖᑦ ᓴᐳᒻᒥᓯᐅᒃ ᐱᑦ-ᐸᕋ ᑎᑭᓪᓗᒍ, ᔪᐊᕐᑕᓂᐅᑉ ᑰᖓ ᑎᑭᓪᓗᒍ.” ᐃᕗᕅᑎᒥᐅᑦ ᕾᖁᔭᐅᓚᐅᕐᐳᑦ ᓴᐳᒻᒥᒃᓯᓕᕐᓗᑎᒡᓗ ᐃᑳᕐᕕᖕᓂᒃ ᐱᑦ-ᐸᕋ ᑎᑭᓪᓗᒍ ᔪᐊᕐᑕᓂᐅᓪᓗ ᑰᖓᓂᒃ.

²⁵ ᑎᒍᓯᓪᓗᑎᒡᓗ ᒪᕐᕉᖕᓂᒃ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖓᑕ ᐃᕐᓂᖏᖕᓂᒃ, ᐅᕆᑉ ᔩᐱᓗ; ᐅᕆᑉᓗ ᑐᖁᓚᐅᕐᐹᑦ ᐅᕆᐅᑉ ᐃᓐᓈᕈᖁᑎᖓᓂ, ᔩᐱᓗ ᑐᖁᓚᐅᕆᕚᑦ ᔩᐱᐅᑉ ᕔᓂᓕᐅᕐᕕᖓᓂ. ᒪᓖᓐᓇᕐᓗᑎᒃ ᒥᑎᐊᓂᒥᐅᓂᒃ ᐅᕆᐅᑉᓗ ᔩᐱᐅᓪᓗ ᓂᐊᖁᖏᒃ ᒋᑎᐅᓂᒧᐊᕐᐰᑦ, ᔪᐊᕐᑕᓂᐅᑉ ᑰᖓᑕ ᐊᑭᐊᓂ.