ᐃᓗᐊᕐᓮᔩᑦ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᑎᐴᕋ ᐊᒻᒪᓗ ᐸᕌᒃ

¹ ᐃᓴᕆᐊᓕᒥᐅᑦ ᐱᐅᖏᑦᑐᐊᓗᖕᓂᒃ ᐱᓂᐊᕐᓂᖃᓕᓚᐅᕆᕗᑦ ᐊᑕᓂᕐᒧᑦ. ᐃᕼᐅᑦ ᑐᖁᓂᖓᑕ ᑭᖑᓂᐊᒍᑦ.

² ᐊᑕᓂᐅᑉ ᓵᓚᐅᑎᓚᐅᕐᐰᑦ ᔮᐱᓂᒧᑦ, ᑬᓇᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐊᐅᓚᑦᓯᕕᖃᕐᑐᒧᑦ ᐃᒡᓗᒐᓴᒡᓂ ᕼᐂᔭᒥ. ᐅᓇᑕᕐᑐᒃᓴᖁᑎᖓᑕ ᐊᖓᔪᖅᑳᕆᓚᐅᕐᑕᖓ ᓯᓰᕋ, ᐊᖏᕐᕋᖃᓚᐅᕐᑐᖅ ᕼᐊᕈᓯᑎ-ᕼᐊᒍᔨᒻᒥ.

³ ᐃᓴᕆᐊᓕᐅᑦ ᐃᓄᖏᑦ ᐃᓗᖏᕐᓱᓕᓚᐅᕐᐳᑦ ᓂᓪᓕᐊᓪᓗᑎᒃ ᐊᑕᓂᕐᒧᑦ ᐃᑲᔪᕐᑕᐅᔪᒪᓪᓗᑎᒃ; ᔮᐱᓐ ᐱᖃᓚᐅᕐᒪᑦ 900ᓂᒃ ᓴᕕᕋᔭᖕᓂᒃ ᕿᒧᒃᓯᐅᑎᓄᑦ ᐅᓂᐊᕐᑕᐅᓲᓂᒃ ᐊᒃᓴᓗᐊᓕᖕᓂᒃ, ᑲᑉᐱᐊᓱᒃᑎᑦᓯᓪᓗᓂᓗ ᐃᓴᕆᐊᓕᒥᐅᑦ ᐃᓄᖏᓐᓂᒃ ᐊᕐᕌᒍᓂᒃ 20ᓂᒃ ᓂᑲᒋᓇᒋᑦ.

⁴ ᑎᐴᕋ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ, ᓚᐱᑑᑎᐅᑉ ᓄᓕᐊᖓ, ᑍᑦᓱᒪᓂ ᐃᓱᐊᕐᓮᔨᒋᔭᐅᓚᐅᕐᐳᖅ ᐃᓴᕆᐊᓕᒥᐅᓄᑦ.

⁵ ᐃᒃᓯᕙᕙᓚᐅᕐᐳᕐᓗ ᓇᐹᕐᑑᑉ ᐹᒥᐅᑉ ᑎᐴᕋᐅᑉ ᐊᑖᓂ ᕌᒪᐅᑉ ᐱᑎᓕᐅᓪᓗ ᐊᑯᓐᓂᖓᓂ ᖃᖅᑲᓕᖕᒥ ᐃᕗᕅᒻ ᓄᓇᖓᓂ, ᐃᓴᕆᐊᓕᐅᓪᓗ ᐃᓄᖏᑦ ᐂᕙᓚᐅᕐᐳᑦ ᑖᑦᓱᒧᖓ ᐃᑲᔪᕐᑕᐅᔪᒪᓪᓗᑎᒃ ᐃᓱᐃᓪᓕᐅᕈᑎᒋᔭᒥᖕᓂᑦ.

⁶ ᑖᓐᓇ ᑎᓕᓯᕗᖅ ᕾᖁᔭᐅᖁᓪᓗᒍ ᐸᕌᒃ ᐊᐱᓄᐊᒥᐅᑉ ᐃᕐᓂᖓ ᑭᑎᓯᒥᐅᑕᖅ ᓈᑉᑕᓕᒥᑦ, ᐅᖃᐅᑎᔭᐅᖁᓪᓗᒍ, “ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᑦᑕ ᐱᖁᖕᒪᑎᑦ, ‘ᐅᓇᑕᕐᑐᒃᓴᖁᑎᖕᓂᒃ ᖃᖅᑲᒥ ᑍᐸᕆᒥ ᑲᑎᑎᑦᓯᖁᓪᓗᑎᑦ, ᐅᓇᑕᕐᑐᒃᓴᓂᒃ 10,000ᓂᒃ ᓇᒃᓴᕐᓗᑎᑦ ᓇᑉᑖᓕᐅᑉ ᑭᖑᕚᖏᓐᓂᑦ ᓯᐳᓗᓂᐅᓪᓗ ᑭᖑᕚᖏᓐᓂᑦ;

⁷ ᓯᓰᕋ ᐊᓂᑎᓐᓂᐊᕋᒃᑯ, ᔮᐱᓂᐅᑉ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᑦ, ᑭᓲᓂ ᑰᖓᓂ ᑲᑎᓂᐊᕋᕕᐅᒃ ᐊᒃᓴᓗᐊᓕᖁᑎᖏᑦ ᕿᒧᒃᓯᐅᑎᓖᑦ ᐅᓇᑕᕐᑐᒃᓴᕐᔪᐊᖁᑎᖏᓪᓗ ᐃᓚᒋᓗᒋᑦ; ᑖᓐᓇᓗ ᐃᓕᖕᓄᑦ ᑐᓂᓂᐊᕐᐸᕋ.’”

⁸ ᐸᕌᐅᓪᓗ ᐅᖃᐅᑎᓚᐅᕐᐹ, “ᐂᓂᐊᕐᐳᖓ ᐱᖃᑎᒋᓂᐊᕈᕕᖓ; ᐱᖃᑎᒋᓂᐊᖏᒃᑯᕕᖓᓕ ᐂᓂᐊᓐᖏᓚᖓ!”

⁹ ᐊᕐᓇᐅᑉ ᐅᖃᐅᑎᕚ, “ᓱᓕᓗᖓ ᐂᖃᑎᒋᓂᐊᕐᐸᒋᑦ; ᑭᓯᐊᓂ ᐃᕝᕕᑦ ᓂᕐᑐᕐᑕᐅᑦᔪᑎᒃᓴᕐᓯᓂᐊᓐᖏᓚᑎᑦ ᐂᕕᒋᔭᕐᓄᑦ, ᐊᑕᓂᐅᑉ ᓯᓰᕋ ᑐᓂᓂᐊᕐᒪᒍ ᐊᕐᓇᐅᑉ ᐊᒡᒐᖏᓐᓄᑦ.” ᑕᕝᕙ ᑎᐴᕋ ᓂᑯᕕᑉᐳᖅ ᐸᕌᒡᓗ ᐂᖃᑎᒋᓕᕐᐹ ᑭᑎᓯᒧᑦ.

¹⁰ ᐸᕌᑭᐅᓪᓗ ᕾᖁᕔᑦ ᓯᐳᓗᓂᐅᑉ ᑭᖑᕚᖏᑦ ᐊᒻᒪᓗ ᓈᑉᑕᓕᐅᑉ ᑭᖑᕚᖏᑦ ᑭᑎᓯᒧᑦ; ᐊᖑᑎᓪᓗ 10,000ᐃᑦ ᒪᓕᒡᓗᑎᒃ ᑭᖑᓂᖓᓂ, ᑎᐴᕋᐅᑦᑕᐅᖅ ᐂᑉᐸᕆᕚ.

¹¹ ᑖᓐᓇᓕ ᕼᐃᐸᕐ ᑭᓁᑎ ᑭᓁᑎᓂᑦ ᐊᕝᕗᑎᓪᓗᓂ ᓯᓚᑖᓃᓚᐅᕐᐳᖅ, ᑭᓁᑎᑦ ᑖᒃᑯᐊ ᕼᐅᐹᐱᐅᑉ ᑭᖑᕚᖏᑦ, ᒨᓯᓯᐅᑉ ᓴᑭᒋᓚᐅᕐᑕᖓᑕ, ᑖᓐᓇ ᑐᐱᖃᕐᐳᖅ ᐅᖓᓯᒋᔭᖓᓐᓂ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᓴᓂᐊᓂ ᔮ-ᐊᓇᓂᒦᑦᑐᒥ, ᑭᑎᓯᐅᑉ ᓴᓂᐊᓂ.

¹² ᓯᓰᕋ ᐅᖃᐅᑎᔭᐅᒐᒥ ᐸᕌᒃ ᐊᐱᓄᐊᒻ ᐃᕐᓂᖓ ᖃᖅᑲᒧᑦ ᑍᐸᕆᒧᐊᕐᓂᕋᕐᑕᐅᖕᒪᑦ.

¹³ ᑍᒤᒻᒪᑦ ᓯᓰᕋ ᑲᑎᖁᔨᓚᐅᕐᐳᖅ ᐊᒃᓴᓗᐊᓕᓕᒫᓂᒃ ᕿᒧᒃᓯᐅᑎᓕᖕᓂᒃ, 900ᓂᒃ ᓴᕕᕋᔭᖕᓂᒃ ᐊᒃᓴᓗᐊᓕᖕᓂᒃ, ᐊᖑᑎᓕᒫᓪᓗ ᐱᖃᑎᒋᔭᓂ, ᐂᖃᑎᒋᔪᒪᓪᓗᒋᑦ ᕼᐊᕈᓯᑎ-ᕼᐊᒍᔨᒻᒥᑦ ᑭᓲᓂᐅᑉ ᑰᖓᓄᑦ.

¹⁴ ᑎᐴᕋᐅᑉ ᐸᕌᒃ ᐅᖃᐅᑎᕚ, “ᒪᑭᓕᕆᑦ! ᐅᓪᓗᖅ ᑖᓐᓇ ᓇᓪᓕᐅᑎᖕᒪᑦ ᐊᑕᓂᐅᑉ ᑐᓂᖕᒪᑎᑦ ᓯᓰᕋᒥᒃ ᐱᔪᓐᓇᕐᓂᕐᓄᑦ. ᐊᑕᓂᖅ ᐃᕝᕕᑦ ᓯᕗᓂᖓᓃᓐᖏᓛᖅ?” ᑕᕝᕙ ᐸᕌᒃ ᐊᖅᑲᕐᑎᓚᐅᕐᐳᖅ ᖃᖅᑲᒥᑦ ᑍᐸᕆᒥᑦ 10,000ᓂᑦ ᐊᖑᑎᓂᑦ ᒪᓕᒃᑕᐅᓪᓗᓂ.

¹⁵ ᐊᑕᓂᐅᑉ ᓴᖑᑎᓚᐅᕐᐹ ᓯᓰᕋ ᐊᒃᓴᓗᐊᓕᓕᒫᖏᓪᓗ ᐅᓇᑕᕐᑐᒃᓴᖁᑎᖏᓪᓗ ᐸᕌᒃᒧᑦ ᑖᑦᓱᒪᓗ ᓵᓚᒋᓚᐅᕐᐰᑦ ᓴᕕᒡᔪᐊᒧᑦ; ᓯᓰᕋ ᐊᒃᓴᓗᐊᓕᖕᒥᓂᑦ ᓂᐅᓪᓗᓂ ᕿᒫᓚᐅᕐᐳᖅ ᐊᕐᐸᖏᕐᓗᓂ.

¹⁶ ᐸᕌᒃᓕ ᐊᒃᓴᓗᐊᓖᑦ ᐅᓇᑕᕐᑐᒃᓮᓪᓗ ᒪᓕᓚᐅᕐᐰᑦ ᕼᐊᕈᓯᑎ-ᕼᐊᒍᔨᒻ ᑎᑭᓪᓗᒍ, ᓯᓰᕋᐅᑉ ᐅᓇᑕᕐᑐᒃᓴᖁᑎᖏᑦ ᑐᖁᑕᐅᓚᐅᕐᐳᑦ ᓴᕕᒡᔪᐊᒧᑦ, ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑯᔭᐅᓚᐅᓐᖏᓚᑦ.

¹⁷ ᑭᓯᐊᓂᓕ, ᓯᓰᕋ ᕿᒫᓚᐅᕐᐳᖅ ᐊᕐᐸᖏᕐᓗᓂ ᔧᓕᐅᑉ ᑐᐱᖓᓄᑦ, ᕼᐃᐸᕆᐅᑉ ᑭᓁᑎᐅᑉ ᓄᓕᐊᖓᓄᑦ; ᑖᒃᑯᐊᒃ ᓮᒻᒪᖃᑎᒌᑦᓯᐊᓚᐅᕐᒪᑎᒃ ᔮᐱᓂᒃᑯᒃ ᕼᐂᔭᒥᐅᑦ ᐊᖓᔪᖅᑳᕐᔪᐊᖓᑦ ᕼᐃᐳᕆᑯᓪᓗ ᐃᓚᖏᑦ.

¹⁸ ᔧᓕᐅᑉ ᐸᕐᕆᐊᕐᐹ ᓯᓰᕋ ᐅᖃᐅᑎᓪᓗᒍᓗ, “ᕾᒋᑦ, ᐊᖓᔪᖅᑳᖅ, ᕾᒋᑦ ᐅᕙᓐᓄᑦ; ᑲᑉᐱᐊᓱᖏᓪᓗᑎᑦ.” ᑐᐱᕐᒧᓪᓗ ᐃᑎᖃᑎᒋᖕᒪᒍ ᐊᕐᓇᐅᑉ ᐅᓕᒃᐹ ᐊᓗᕐᓗᐃᔭᐅᒻᒥᒃ.

¹⁹ ᐊᖑᑎᐅᓪᓗ ᐅᖃᐅᑎᕚ, “ᒥᑭᔪᒥᒃ ᐃᒥᕐᑎᓚᐅᓐᖓ; ᐃᒥᕈᒃᑲᒪ.” ᐃᒪᖃᐅᑎᒥᒃ ᑕᕝᕙ ᒪᑐᐃᕐᓯᕗᖅ ᐃᒻᒧᖕᒥᒃ ᐃᒪᓕᖕᒥᒃ, ᐃᒥᕐᑎᓪᓗᒍᓗ, ᐱᔭᕇᕋᒥᓗ ᐅᓕᒃᑭᕚ.

²⁰ ᐅᖃᐅᑎᒃᑲᓐᓂᕐᐹᓗ, “ᑐᐱᐅᑉ ᐅᒃᑯᐊᖓᑕ ᓯᓚᑖᓂ ᓇᖏᓚᐅᕆᑦ, ᐊᖑᒻᒥᒃ ᕾᔪᖃᕐᐸᑦ ᐊᐱᕐᓱᕐᑐᒥᒃ, ‘ᐊᖑᑎᑕᖃᕐᐹ ᑕᕝᕙᓃ?’ ᐅᖃᐅᑎᔪᒫᕐᐸᑦ, ‘ᐋᒃᑲ.’”

²¹ ᑖᓐᓇᓕ ᔧᓕ, ᕼᐃᐸᕆᐅᑉ ᓄᓕᐊᖓ, ᑐᐱᐅᑉ ᐸᐅᒍᐊᖓᓂᒃ ᑲᐅᑕᕐᒥᒡᓗ ᑎᒍᓯᕗᖅ, ᑎᕐᓕᐊᕐᓗᒍᓗ ᐅᐸᒃᐹ ᐸᐅᒍᐊᕐᓗ ᑲᑉᐳᑎᕚ ᐃᕐᓴᖓᓄᑦ, ᐊᒡᓛᑦ ᒪᓂᖅᑲᒧᑦ ᐸᐅᒍᐊᕐᓗᓂ; ᖃᐅᔨᓚᐅᓐᖏᓚᖅ ᓯᓂᒃᑲᒥ ᑕᖃᓯᒪᒐᒥᓗ. ᑍᒫᒡᓗ ᑐᖁᕗᖅ.

²² ᑭᖑᓂᐊᒍᓪᓕ, ᐸᕌᒃ ᒪᓕᒃᑲᒥ ᓯᓰᕋᒥᒃ, ᔧᓕᐅᑉ ᐸᕐᕆᐊᕐᐹ ᐅᖃᐅᑎᓪᓗᒍᓗ, “ᕾᒋᖅ, ᐊᖑᒻᒥᒃ ᕿᓂᕐᑕᕐᓂᒃ ᑕᑯᑎᓐᓂᐊᕋᒃᑭᑦ.” ᑐᐱᖓᓄᓪᓗ ᐃᑎᕋᒥ ᑕᑯᕗᖅ ᓯᓰᕋᒥᒃ ᓇᓚᓪᓗᓂ, ᑐᖁᖓᔪᒥᒃ ᑐᐱᐅᑉ ᐸᐅᒍᐊᖓᓄᑦ ᐃᕐᓴᒥᒍᑦ ᐸᐅᒍᐊᕐᓯᒪᔪᒥᒃ.

²³ ᑍᑦᓱᒪᓂ ᐅᓪᓗᒥ ᒎᑎᐅᑉ ᔮᐱᓂ ᑬᓇᓂᒥᐅᑦ ᐊᖓᔪᖅᑳᕐᔪᐊᖓ ᓵᓚᐅᑎᓚᐅᕐᐹ ᐃᓴᕆᐊᓕᒥᐅᑦ ᐃᓄᖏᓐᓄᑦ.

²⁴ ᐃᓴᕆᐊᓕᒥᐅᓪᓗ ᐃᓄᖏᑕ ᐱᔪᓐᓇᕐᓂᖏᑦ ᓴᓐᖏᔫᓕᕐᐸᓪᓕᐊᓚᐅᕐᐳᑦ ᐊᖓᔪᖅᑳᕐᔪᐊᕐᒧᑦ ᔮᐱᓂᒧᑦ ᑬᓇᓂᒥᐅᑕᕐᒧᑦ, ᐊᓯᕈᕐᑕᐅᓪᓗᓂᓗ ᐊᖓᔪᖅᑳᕐᔪᐊᖅ ᔮᐱᓂ ᑬᓇᓂᒥᐅᑕᖅ ᑭᖑᓂᖓᓂ.