ᐃᓗᐊᕐᓮᔩᑦ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᖃᑎᒌᑦ ᓄᓇᓕᑐᕾᑦ ᓅᓚᐅᓐᖏᑦᑐᑦ

¹ ᑍᒤᒻᒪᑦ ᐊᑕᓂᐅᑉ ᐃᓅᖃᑎᒌᒡᔪᐊᑦ ᓄᓇᕾᓐᓇᕐᑎᓚᐅᕐᐰᑦ ᐃᓴᕆᐊᓕᒥᐅᑦ ᐆᒃᑐᕈᒪᓪᓗᒋᑦ, ᑍᒃᑯᐊ ᐅᓇᑕᖃᑕᐅᓚᐅᕐᓯᒪᖏᑦᑐᑦ ᑬᓇᓂᒥ.

² ᑍᒤᓚᐅᕐᐳᖅ ᐃᓴᕆᐊᓕᐅᑉ ᑭᖑᕚᖏᑦ ᐃᓕᓐᓂᐊᕐᑎᑦᓱᒪᓪᓗᒋᑦ ᐅᓇᑕᕐᓂᕐᒥᒃ, ᐱᓗᐊᕐᑐᒥᒃ ᑖᒃᑯᐊ ᐅᓇᑕᖃᑕᐅᓚᐅᕐᓯᒪᖏᑦᑐᑦ.

³ ᑖᒃᑯᐊ ᓄᓇᕾᓐᓇᓚᐅᕐᑐᑦ ᐱᓕᔅᑍᓂᒥ ᑕᓪᓕᒤᑦ ᐃᒡᓗᒐᓮᑦ ᑬᓇᓂᒥᐅᓪᓗ ᐃᓘᓐᓇᑎᒃ, ᓮᑐᓂᒥᐅᑦ, ᕼᐃᕔᑎᓪᓗ ᓄᓇᖃᕐᑐᑦ ᓕᐸᓇᓂᐅᑉ ᖃᖅᑲᖏᓐᓂ, ᖃᖅᑲᒥᑦ ᐰᓕ-ᕼᐊᕐᒪᓐᒥᑦ ᕼᐊᒫᑎ ᑎᑭᓪᓗᒍ.

⁴ ᑖᒃᑯᐊ ᐆᒃᑑᑎᒃᓴᐅᓚᐅᕐᐳᑦ ᐃᓴᕆᐊᓕᒥᐅᓄᑦ, ᖃᐅᔨᓴᕈᑕᐅᖁᓪᓗᒋᑦ ᐃᓴᕆᐊᓕᒥᐅᑦ ᓈᓚᒐᔭᕐᒪᖔᑕ ᐊᑕᓂᐅᑉ ᐱᖁᔭᖏᓐᓂᒃ ᑐᓂᓚᐅᕐᑕᖏᓐᓂᒃ ᓯᕗᓕᖏᑦᓄᑦ ᒨᓯᓯᒃᑯᑦ.

⁵ ᐃᓴᕆᐊᓕᒥᐅᑦ ᓄᓇᖅᑲᑎᖃᓚᐅᕐᐳᑦ ᑬᓇᓂᒥᐅᓂᒃ, ᕼᐃᑍᑎᓂᒡᓗ, ᐊᒧᕅᑎᓂᒡᓗ, ᐱᕆᔧᑎᓂᒡᓗ, ᕼᐃᕔᑎᓂᒡᓗ, ᔨᐳᓮᑎᓂᒡᓗ.

⁶ ᐃᓅᖃᑎᑐᖃᕆᓐᖏᑕᒥᖕᓂᒡᓗ ᓄᓕᐊᓂᒃᐳᑦ ᐅᐃᓂᒡᓗᑎᒡᓗ ᑖᒃᑯᓇᖓᑦ ᒎᑎᓐᖑᐊᖏᓐᓂᒡᓗ ᐱᔨᑦᓯᓕᕐᓗᑎᒃ.

ᐅᓯᓂᐅᓪ

⁷ ᐃᓴᕆᐊᓕᒥᐅᑦ ᐃᓄᖏᑦ ᐱᐅᖏᑦᑐᐊᓗᖕᓂᒃ ᐱᓂᐊᕐᓂᖃᓚᐅᕐᐳᑦ ᐊᑕᓂᐅᑉ ᓵᖓᓂ, ᐊᑕᓂᖅ ᒎᑎᑎᒃ ᐳᐃᒍᕐᓗᒍ, ᐱᔨᑦᓯᓕᕐᓗᑎᒃ ᐰᓕᓂᒃ ᐊᓯᕋᑎᒥᒡᓗ ᒎᑎᓐᖑᐊᓂᒃ.

⁸ ᑍᒤᒻᒪᑦ ᐊᑕᓂᖅ ᓂᓐᖓᓚᐅᕐᐳᖅ ᐃᓴᕆᐊᓕᒥᐅᓄᑦ ᐊᖓᔪᖅᑳᕐᔪᐊᒧᓪᓗ ᑯᓵᓐ-ᕆᓴᑍᒻ ᒥᓱᐳᑍᒥᐊᒥᐅᑕᕐᒧᑦ ᓵᓚᒋᔭᐅᑎᑉᐰᑦ, ᑯᓵᓐ-ᕆᓵᑍᒻᒥᒃ ᐱᔨᑦᓯᓚᐅᕐᐳᑦ ᐊᕐᕌᒍᓂᒃ 8ᓂᒃ.

⁹ ᐃᓴᕆᐊᓕᒥᐅᓪᓕ ᐃᓗᖏᕐᓱᒻᒪᕆᒃᓗᑎᒃ ᑐᒃᓯᐊᓚᐅᕐᐳᑦ ᐊᑕᓂᕐᒧᑦ, ᐊᑕᓂᐅᓪᓗ ᐃᓴᕆᐊᓕᒥᐅᑦ ᑎᓕᓯᕕᒋᓚᐅᕐᐰᑦ, ᐊᖑᒻᒥᒃ ᓴᐳᑦᔨᓂᐊᕐᑐᒥᒃ, ᑖᓐᓇ ᐅᑎᓂ-ᐅᓪᒥᒃ ᐊᑎᖃᕐᐳᖅ, ᑬᓚᐱᐅᑉ ᓄᑲᖓᑕ ᑮᓇᑦᔨᐅᑉ ᐃᕐᓂᖓ.

¹⁰ ᐊᑕᓂᐅᑉ ᐊᓂᕐᓂᖓᑕ ᐃᓗᒻᒥᕐᐹ, ᐃᓴᕆᐊᓕᒥᐅᓪᓗ ᐃᓱᐊᕐᓴᕐᓗᒋᑦ; ᐅᓯᓂᐅᓪ ᐅᓇᑕᕆᐊᓚᐅᕐᐳᖅ, ᐊᖓᔪᖅᑳᕐᔪᐊᖅ ᑯᓵᓐ-ᕆᓴᑍᒻ ᐊᑕᓂᐅᑉ ᑐᓂᓚᐅᕐᐹ ᑖᑦᓱᒧᖓ; ᑖᑦᓱᒪ ᑯᓵᓐ-ᕆᓴᑍᒻ ᓵᓚᒋᕚ.

¹¹ ᓄᓇᒥᓗ ᐅᓇᑕᕐᓂᖃᕈᓃᓚᐅᕐᐳᑦ ᐊᕐᕌᒍᓂᒃ 40ᓂᒃ, ᑭᖑᓂᐊᒍᓪᓗ ᐅᑎᓂ-ᐅᓪ ᑮᓇᑦᔨᐅᑉ ᐃᕐᓂᖓ ᑐᖁᕗᖅ.

ᐃᕼᐅᑦ

¹² ᐃᓴᕆᐊᓕᒥᐅᑦ ᐃᓄᖏᑦ ᓱᓕ ᐱᐅᖏᑦᑐᐊᓗᖕᒥᒃ ᐱᓂᐊᕐᓂᖃᓕᓚᐅᕆᕗᑦ ᐊᑕᓂᐅᑉ ᓵᖓᓂ; ᐊᑕᓂᐅᓪᓗ ᐃᒡᓚᓐ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑦ ᓴᓐᖏᓂᕐᓴᐅᓕᕐᑎᓚᐅᕐᐹ ᐃᓴᕆᐊᓕᒥᐅᓂᑦ.

¹³ ᑖᓐᓇ ᑲᑎᖁᔨᓚᐅᕐᐳᖅ ᐊᒧᓁᑎᓂᒃ ᐊᒪᓕᑬᑎᓂᒡᓗ; ᐅᓇᑕᕆᐊᖃᑎᒋᓪᓗᒋᑦ ᓵᓚᖃᓚᐅᕐᐳᑦ ᐃᓴᕆᐊᓕᒥᐅᓂᒃ ᔨᕆᑯᓗ ᓵᓚᒋᓪᓗᒍ, ᐃᒡᓗᒐᓮᑦ ᐹᒥᓂᒃ ᓇᐹᕐᑐᓕᒃ.

¹⁴ ᐃᓴᕆᐊᓕᒥᐅᑦ ᐃᓄᖏᑦ ᐃᒡᓚᓂᒧᑦ ᓯᐊᓛᖑᓕᓚᐅᕐᐳᑦ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᓄᑦ ᐊᕐᕌᒍᓂᒃ 18ᓂᒃ.

¹⁵ ᐃᓴᕆᐊᓕᒥᐅᑦ ᐃᓗᖏᕐᓱᕐᓗᑎᒃ ᓂᓪᓕᐊᓕᓚᐅᕆᕗᑦ ᐊᑕᓂᕐᒧᑦ, ᐊᑕᓂᐅᓪᓗ ᐃᓴᕆᐊᓕᒥᐅᑦ ᑎᓕᓯᕕᒋᓚᐅᕐᐰᑦ, ᐊᖑᒻᒥᒃ ᓴᐳᑦᔨᓂᐊᕐᑐᒥᒃ. ᑖᓐᓇ ᐃᕼᐅᑦ, ᒋᕋᐅᑉ ᐃᕐᓂᖓ, ᐱᓐᔭᒥᓂᐅᑉ ᑭᖑᕚᖏᓐᓂᑦ ᐱᔪᖅ, ᑖᓐᓇ ᓴᐅᒥᐅᓚᐅᕐᐳᖅ. ᐃᓴᕆᐊᓕᒥᐅᑦ ᐃᓄᖏᑕ ᑎᓕᓚᐅᕐᐹ ᐊᖓᔪᖅᑳᕐᔪᐊᕐᒧᑦ ᐃᒡᓚᓐᒧᑦ, ᒧᐊᐱᒥᐅᑕᕐᒧᑦ ᐊᑭᓕᐅᑎᒥᖕᓂᒃ ᑐᓂᕐᕈᑎᓂᒃ ᑐᓂᓯᒋᐊᕐᑐᖁᓪᓗᒍ.

¹⁶ ᐃᕼᐅᓪᓕ ᓴᕕᓕᐅᓚᐅᕐᐳᖅ ᐃᒡᓗᒃᑐᑦ ᑮᓇᓕᖕᒥᒃ, ᑕᑭᓂᓕᖕᒥᒃ ᐃᑎᒐᒥᒃ ᐊᕝᕙᕐᒥᒡᓗ. ᐃᓂᓕᐅᕐᐹᓗ ᖁᒃᑐᕋᕐᒥᓂ ᑕᓕᕐᐱᖕᒥ ᐊᓐᓄᕌᒥ ᐃᑭᐊᖓᓂ.

¹⁷ ᑐᓂᕐᕈᑏᓪᓗ ᐊᑭᓕᐅᑏᑦ ᑐᓂᓚᐅᕐᐰᑦ ᐃᒡᓚᓐᒧᑦ, ᒧᐊᐱᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐃᒡᓛᓐᓕ ᖁᐃᓂᔪᒻᒪᕆᐊᓘᓚᐅᕐᐳᖅ.

¹⁸ ᐃᕼᐆᓪᓗ ᑐᓂᕐᕈᑎᓂᒃ ᐂᑐᕋᒥᐅᒃ, ᑍᒃᑯᐊ ᐊᒡᔭᕐᓯᓚᐅᕐᑐᑦ ᐅᑎᖁᓚᐅᕐᐰᑦ ᐊᖏᕐᕋᒧᑦ.

¹⁹ ᐃᕼᐅᓪᓕ ᐃᒻᒥᓂᒃ ᐅᑎᕆᐊᓚᐅᕐᐳᖅ ᓴᓇᓐᖑᐊᕐᓯᒪᔪᑦ ᐅᔭᕅᑦ ᒋᐅᓪᒐᐅᑉ ᖃᓂᒋᔭᖓᓂᑦ, ᐅᑎᕐᓗᓂᓗ ᐃᒡᓚᓐᒧᑦ, ᐅᖃᐅᑎᓪᓗᒍᓗ, “ᐊᖓᔪᖅᑳᕐᔪᐊᒻᒪᕇᒃ, ᐅᖃᐅᓯᒃᓴᖃᕐᐳᖓ ᐃᓕᖕᓄᑦ ᑐᓴᕐᑕᐅᔭᕆᐊᖃᖏᑦᑐᒥᒃ.” ᑖᓐᓇ ᐅᖃᕐᐳᖅ, “ᓂᐱᖃᖏᓪᓗᓯ.” ᐊᖓᔪᖄᕐᔪᐊᓪᓗ ᐱᔨᓕᒫᖏᑦ ᐊᓂᕗᑦ ᐃᒡᓗᕈᓯᖓᓂᑦ.

²⁰ ᑕᕝᕙ ᐃᕼᐅᑎᐅᑉ ᐅᐸᒃᐹ, ᐃᓄᑑᓪᓗᓂ ᐃᒃᓯᕙᑎᓪᓗᒍ ᓂᒡᓚᕐᓯᕐᕕᖕᒥᓂ ᐃᒡᓘᑉ ᖃᖓᓂ, ᐅᖃᐅᑎᓪᓗᒍᓗ, “ᐅᖃᐅᓯᒃᓴᖃᕐᐳᖓ ᐃᓕᖕᓄᑦ ᒎᑎᒥᑦ ᐱᔪᒥᒃ.” ᐊᖓᔪᖅᑳᕐᔪᐊᕐᓗ ᐃᒃᓯᕙᐅᑕᒥᓂᑦ ᓂᑯᕕᑉᐳᖅ.

²¹ ᓴᐅᒥᖕᒥᓄᑦ ᐃᕼᐅᑎᐅᑉ ᓴᕕᒡᔪᐊᓂ ᑎᒍᕚ ᑕᓕᕐᐱᖕᒥᓃᑦᑐᖅ ᐊᖓᔪᖅᑳᕐᔪᐊᕐᓗ ᑲᐱᓪᓗᒍ ᓈᖓᒍᑦ.

²² ᓴᕕᒡᔪᐊᑉ ᐅᓂᒃᑕᕐᕕᖓ ᐃᓗᖓᓄᐊᖃᓯᐅᑎᓚᐅᕐᐳᖅ, ᐅᕐᓱᖓᓄᑦ ᓴᕕᒡᔪᐊᖅ ᑕᓕᓪᓗᓂ, ᓴᕕᒡᔪᐊᖅ ᐊᒧᓚᐅᖏᒻᒪᒍ ᓈᖓᓂᑦ; ᐃᕐᕋᕕᖏᓪᓗ ᐊᓂᓪᓗᑎᒃ.

²³ ᐃᕼᐅᑦᓗ ᐊᓂᕗᖅ ᐅᒃᑯᐊᕐᓗ ᐊᑦᑐᖏᕐᓗᒍ,

²⁴ ᐊᓂᓯᒪᓕᕐᑎᓪᓗᒍ, ᐱᔨᖏᑦ ᕾᒐᒥᒃ ᐅᒃᑯᐊᖅ ᐊᑦᑐᖏᕐᓯᒪᖕᒪᑦ, ᐃᒡᓘᑉ ᖁᓛᓄᑦ ᐃᑎᕐᕕᒃ, ᐊᖓᔪᖅᑳᕐᔪᐊᖅ ᐃᓗᐊᓃᒻᒪᑦ ᐃᓱᒪᒋᕚᑦ ᐊᓇᕆᐊᕐᑐᕐᓯᒪᓇᓱᒋᓪᓗᒍ ᐃᒡᓘᑉ ᖁᓛᓂ ᐃᒡᓗᕈᓯᕐᒥ.

²⁵ ᐊᑯᓂᒍᓱᓕᕐᓗᑎᒃ ᐅᑕᖅᑭᓚᐅᕐᐳᑦ, ᐃᒡᓗᕈᓯᕐᓕ ᐅᒃᑯᐃᕐᐸᓪᓕᐊᖏᒻᒪᒍ, ᐲᕈᑎᒥᒃ ᑎᒍᓯᓪᓗᑎᒃ ᐅᒃᑯᐃᕐᐹᑦ; ᑕᑯᓪᓗᑎᒡᓗ ᐊᖓᔪᖅᑳᖓᑦ ᓇᑎᕐᒥ ᓇᓚᔪᖅ ᑐᖁᖓᓪᓗᓂ.

²⁶ ᐃᕼᐅᑦᓕ ᕿᒪᒃᓯᓚᐅᕐᐳᖅ ᐅᑕᖅᑭᓂᖏᓐᓂ. ᐅᔭᕅᑦ ᓴᓇᓐᖑᐊᕐᓯᒪᔪᑦ ᖄᖏᕐᐰᑦ ᖀᒫᓪᓗᓂᓗ ᓰ-ᐃᕋᒧᑦ.

²⁷ ᑎᑭᓐᓇᒥᓗ ᑎᑦᑐᓚᐅᑎᒥᒃ ᓂᓕᕐᑎᑦᓯᕗᖅ ᐃᕗᕅᒻ ᖃᖅᑲᖏᓐᓂ; ᐃᓴᕆᐊᓕᒥᐅᓪᓗ ᕾᖁᓪᓗᒋᑦ ᐅᓇᑕᕆᐊᕐᑐᖃᑎᒋᕔᑦ ᑕᐅᓄᖓ, ᑖᓐᓇ ᓯᕗᓪᓕᕐᐸᐅᓪᓗᓂ.

²⁸ ᐅᖃᐅᑎᓪᓗᒋᓪᓗ, “ᒪᓕᒃᓯᓐᖓ; ᐊᑕᓂᐅᑉ ᓵᓚᖃᕐᑎᒻᒪᓯ, ᒧᐊᐰᑎᓂᒃ ᐊᑭᕋᑦᓯᓐᓂᒃ.” ᐃᕼᐅᑦ ᒪᓕᒃᐹᑦ ᑕᐅᓄᖓ ᔪᐊᕐᑕᓂᒥ ᐃᑳᕐᕕᖏᓐᓂ ᒧᐊᐱᒥᐅᑦ ᐅᑕᖅᑭᓪᓗᒋᑦ, ᐊᑕᐅᓯᕐᒥᒡᓘᓐᓃᑦ ᐃᑳᕐᑐᖃᓚᐅᓐᖏᓚᖅ.

²⁹ ᐅᓪᓗᒥ ᑍᑦᓱᒪᓂ 10,000ᓂᒃ ᑐᖁᕅᓚᐅᕐᐳᑦ, ᒧᐊᐱᒥᐅᑦ ᐅᓇᑕᕐᑐᒃᓴᖏᓐᓂᒃ ᓴᓐᖏᔪᓂᒃ, ᐊᔪᖏᑦᑐᕐᔪᐊᓂᒃ. ᐊᑕᐅᓯᕐᓘᓐᓃᑦ ᕿᒫᔪᓐᓇᓚᐅᓐᖏᓚᖅ.

³⁰ ᐅᓪᓗᒥᒃ ᑍᑦᓱᒪᓂ ᐃᓴᕆᐊᓕᒥᐅᑦ ᓵᓚᖃᓚᐅᕐᐳᑦ ᒧᐊᐱᒥᐅᓂᒃ, ᓄᓇᖓᓗ ᐅᓇᑕᕐᓂᖃᕈᓐᓃᓚᐅᕐᐳᑦ ᐊᕐᕌᒍᓂᒃ 80ᓂᒃ.

ᓴᒻᒐᕆ

³¹ ᑭᖑᓂᐊᒍᓪᓗ ᐃᓱᐊᕐᓮᔨᐅᓚᐅᕐᑐᖅ ᓴᒻᒐᕆ ᐊᓇᑎᐅᑉ ᐃᕐᓂᖓ. ᐃᓴᕆᐊᓕᒥᐅᓂᒃ ᓴᐳᑦᔨᓚᐅᕐᐳᖅ ᑐᖁᑦᓯᓪᓗᓂ 600ᓂᒃ ᐱᓕᔅᑍᓂᒥᐅᓂᒃ ᐃᒻᒧᒃᓯᐅᒐᕐᒥᒃ ᑐᒡᒐᐅᑎᒧᑦ.