ᐃᓗᐊᕐᓮᔩᑦ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐂᖏᓕᖓ ᐴᑭᒻᒥ

¹ ᐊᑕᓂᐅᑉ ᐂᖏᓕᖓ ᒋᐅᓪᒐᐅᓪᒥ ᐱᓪᓗᓂ ᐴᑭᒻᒨᓚᐅᕐᐳᖅ ᐃᓴᕆᐊᓕᒥᐅᓪᓗ ᐅᖃᐅᑎᓪᓗᒋᑦ, “ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᐸᑦᓯ, ᐂᑎᓪᓗᓯᓗ ᓄᓇᒧᑦ ᓯᕗᓕᑦᓯᓐᓄᑦ ᐊᖏᕈᑎᒋᓚᐅᕐᑕᓐᓄᑦ, ᐅᖃᓚᐅᕋᒪ, ‘ᐊᖏᕈᑎᒋᓚᐅᕐᑕᕋ ᐃᓕᑦᓯᓐᓄᑦ ᓯᖁᒥᓐᓂᐊᓐᖏᓚᕋ.

² ᐊᖏᖃᑎᒌᒍᑎᓕᐅᕐᑐᒃᓴᐅᓐᖏᓚᓯᓗ ᐃᓄᖕᓂᒃ ᑕᒫᓂ ᓄᓇᖃᕐᑐᓂᒃ. ᑐᓂᕐᕈᓯᕐᕕᖏᓪᓗ ᓯᖁᒥᑕᒃᓴᕆᕙᓯ.’ ᐅᖃᐅᓯᕆᓚᐅᕐᑕᓐᓂᒡᓕ ᐊᑐᖏᓐᓇᑦᓯ. ᓱᖕᒪᑦ ᑍᒤᓕᐅᕐᐱᓰ?

³ ᒫᓐᓇᓕ ᐅᖃᐅᑎᕙᑦᓯ ᑖᒃᑯᐊ ᐃᓄᐃᑦ ᐊᐅᓪᓚᕐᑎᓐᓂᐊᕈᓐᓃᕐᐸᒃᑲ ᓯᕗᓂᑦᓯᓐᓂ ᐊᑭᕋᕐᑐᕐᑎᒋᓂᐊᓕᕋᓯᐅᒃ ᒎᑎᓐᖑᐊᖏᓐᓂᓪᓗ ᐊᔪᓕᕐᑎᑕᐅᓗᓯ.”

⁴ ᐊᑕᓂᐅᑉ ᐂᖏᓕᖓᑕ ᑍᒫᒃ ᐅᖃᐅᑎᖕᒪᒋᑦ, ᐃᓴᕆᐊᓕᒥᐅᑦ ᐃᓄᓕᒫᖏᑦ ᓂᐱᖅᑯᕐᑐᓪᓗᑎᒃ ᕿᐊᓚᐅᕐᐳᑦ.

⁵ ᑕᒪᓐᓇ ᐱᓪᓗᒍ ᑍᓐᓇ ᓇᔪᕐᑕᖓ ᑍᔭᐅᕗᖅ ᐴᑭᒻᒥᒃ ᑕᕝᕙᓂᓗ ᑐᓂᕐᕈᓯᕐᐳᑦ ᐊᑕᓂᕐᒧᑦ.

ᔮᓱᐊᑉ ᑐᖁᓂᖓ

⁶ ᔮᓱᐊᑉ ᐃᓴᕆᐊᓕᒥᐅᑦ ᐃᓄᖏᑦ ᐊᖏᕐᕋᖁᓕᕐᐰᑦ, ᐃᓘᓐᓇᑎᒡᓗ ᐂᓕᕐᐳᑦ ᓇᖕᒥᓂᖅ. ᓄᓇᖁᑎᑖᒥᖕᓄᑦ ᓄᓇᑖᕆᐊᕐᑐᓕᕐᓗᑎᒃ.

⁷ ᔮᓱᐊᑉ ᐃᓅᓂᓕᒫᖓᓂ, ᐃᓴᕆᐊᓕᒥᐅᑦ ᐃᓄᖏᑦ ᐱᔨᑦᓯᓚᐅᕐᐳᑦ ᐊᑕᓂᕐᒥᒃ, ᑐᖁᓂᖓᑕᓗ ᑭᖑᓂᖓᒍᑦ ᑲᔪᓯᑦᓯᐊᓚᐅᕐᐳᑦ ᐊᖓᔪᖅᑳᖏᑦ ᐃᓅᑎᓪᓗᒋᑦ ᑕᑯᓚᐅᕐᑐᑦ ᐊᑕᓂᐅᑉ ᐱᓂᐊᕐᓂᕆᓚᐅᕐᑕᖏᓐᓂᒃ ᐃᓴᕆᐊᓕᒥᐅᓂ.

⁸ ᔮᓱᐊᓕ ᓈᓂᐅᑉ ᐃᕐᓂᖓ, ᐊᑕᓂᐅᑉ ᐱᔨᖓ ᑐᖁᓚᐅᕐᐳᖅ ᐊᕐᕌᒍᖃᓕᕐᓗᓂ 110ᓂᒃ.

⁹ ᐃᓗᕕᕐᑕᐅᓪᓗᓂᓗ ᓄᓇᖁᑎᒥᓂ ᑎᒻᓇᑦ-ᕼᐃᕆᒃᒥ, ᓄᓇᒥ ᐃᕗᕅᒥ ᖃᖅᑲᐅᑉ ᒑᔅ ᐅᓐᓄᐊᓪᓗᐊᓂ.

¹⁰ ᑭᖑᕚᕇᖑᓚᐅᕐᑐᑦ ᑐᖁᖕᒥᖕᒪᑕ, ᐊᓯᖏᑦ ᑭᖑᕚᕇᑦ ᐳᐃᒍᓚᐅᕐᐳᑦ ᐊᑕᓂᕐᒥᒃ ᐱᓂᐊᕐᓂᕆᓚᐅᕐᑕᖏᓐᓂᒡᓗ ᐃᓴᕆᐊᓕᒥᐅᓄᑦ.

ᐃᓴᕆᐊᓕᒥᐅᑦ ᑐᒃᓯᐊᖃᑦᑕᕈᓐᓃᕐᓂᖓᑦ ᐊᑕᓂᕐᒧᑦ

¹¹ ᐃᓴᕆᐊᓕᒥᐅᑦ ᐃᓄᖏᑦ ᐊᔪᕐᑐᓕᓚᐅᕐᐳᑦ ᐊᑕᓂᐅᑉ ᓵᖓᓂ ᐱᔨᑦᓯᓕᕐᓗᑎᒡᓗ ᐰᓕᓄᑦ ᒎᑎᓐᖑᐊᓄᑦ.

¹² ᐊᑕᓂᖅ ᑲᒪᒋᔪᓐᓃᕐᐹᑦ, ᓯᕗᓕᖏᑦᑕ ᒎᑎᖓᑦ, ᐊᐅᓪᓚᕐᑎᑦᓯᓚᐅᕐᑐᖅ ᑖᒃᑯᓂᖓ ᐄᑦᔨᑉᑎᒥᑦ: ᑐᒃᓯᐊᖃᑦᑕᓕᓚᐅᕐᐳᓪᓗ ᒎᑎᐅᑉ ᐊᓯᖏᓐᓄᑦ, ᐃᓄᐃᑦ ᓄᓇᖅᑲᑎᒋᔭᒥ ᒎᑎᖏᓐᓄᑦ. ᐹᒻᒪᒃᑎᕐᕕᒋᓪᓗᒋᓪᓗ; ᐊᑕᓂᕐᒥᒡᓗ ᓂᓐᖓᒃᓮᓚᐅᕐᐳᑦ.

¹³ ᐊᑕᓂᖅ ᑲᒪᒋᔪᓐᓃᕋᒥᑦᔪᒃ, ᐱᔨᑦᓯᓕᕐᓗᑎᒃ ᐰᓕᓂᒃ ᐋᔅᑕᕉᑎᒥᒡᓗ ᒎᑎᓐᖑᐊᓂᒃ.

¹⁴ ᑍᒤᒻᒪᑦ ᐊᑕᓂᖅ ᓂᓐᖓᓚᐅᕐᐳᖅ ᐃᓴᕆᐊᓕᒥᐅᓄᑦ, ᑎᒡᓕᒃᑎᓄᑦ ᐱᓕᕆᐊᖑᑎᓚᐅᕐᐰᑦ ᑎᒡᓕᒐᕐᕕᐅᑎᓪᓗᒋᓪᓗ; ᐊᑭᕋᖏᓐᓄᓪᓗ ᐊᕙᑎᖏᓐᓃᑦᑐᓄᑦ ᓵᓚᒋᔭᐅᑎᓚᐅᕐᐰᑦ, ᑍᒤᒻᒪᑦ ᐊᑭᕋᒥᖕᓂᒃ ᓵᓚᖃᕈᓐᓁᓪᓕᓚᐅᕐᐳᑦ.

¹⁵ ᐅᓇᑕᕆᐊᑐᐊᕌᖓᑕᓗ, ᐊᑕᓂᐅᑉ ᐅᓇᑕᖃᑦᑕᓕᓚᐅᕐᐰᑦ, ᓲᕐᓗ ᑍᒫᒃ ᓯᕗᓂᖓᒍᑦ ᐅᖃᐅᑎᓚᐅᕋᒥᒋᑦ. ᑍᒫᒡᓗ ᐊᖏᕐᕕᒋᓚᐅᕋᒥᒋᑦ; ᕿᒃᓵᖕᓂᖃᒻᒪᕆᓚᐅᕐᐳᓪᓗ.

¹⁶ ᐊᑕᓂᐅᓪᓕ ᑐᓂᓚᐅᕐᐰᑦ ᐃᓱᐊᕐᓮᔨᓂᒃ, ᑖᒃᑯᐊᓗ ᐱᐅᓕᒃᓯᓚᐅᕐᐳᑦ ᑎᒡᓕᒐᕐᑎᒋᔭᖏᓐᓂᑦ.

¹⁷ ᓱᓕᓕ ᓈᓚᓚᐅᓐᖏᓚᑦ ᐃᓱᐊᕐᓮᔨᓂᒃ; ᐊᓯᓐᓂᐊᕐᑐᑎᑐᑦ ᒎᑎᐅᑉ ᐊᓯᖏᓐᓂᒃ ᒎᑎᖃᓕᓚᐅᕐᒪᑕ ᑐᒃᓯᐊᖃᑦᑕᓕᕐᓗᑎᒡᓗ ᑖᒃᑯᓄᖓ; ᑭᖑᓂᖓᒍᑦ ᓯᕗᓕᕕᓂᖏᑦᑕ ᐃᓕᖅᑯᓯᖏᓐᓂᒃ ᐱᐅᓯᖃᕈᓐᓃᓚᐅᕐᐳᑦ, ᐊᑕᓂᐅᑉ ᐱᖁᔭᖏᓐᓂᒃ ᓈᓚᑦᓯᐊᓚᐅᕐᑐᑎᑐᑦ, ᑖᒃᑯᐊᓕ ᑍᒤᑦᑐᓐᓃᓚᐅᕐᐳᑦ.

¹⁸ ᐊᑕᓂᐅᑉ ᐃᓴᕆᐊᓕᒥᐅᑉ ᐃᓱᐊᕐᓮᔨᓂᒃ ᑐᓂᑐᐊᕐᒪᒋᑦ ᐊᑕᓂᐅᑉ ᐃᓚᒋᖃᑦᑕᓚᐅᕐᐰᑦ ᐃᓗᐊᕐᓮᔩᑦ, ᐃᓄᖕᓂᒡᓗ ᐱᐅᓕᒃᓯᓚᐅᕐᐳᖅ ᐊᑭᕋᖏᓐᓂᑦ, ᐃᓗᐊᕐᓮᔩᑦ ᐃᓅᓂᖏᓐᓂ ᐊᑕᓂᐅᑉ ᓈᒃᑭᒋᓚᐅᕐᐰᑦ ᐊᓂᕐᓴᐅᒥᓂᖃᓚᐅᕐᒪᑕ ᐅᑯᒤᒃᓴᕐᓂᕐᒥᖕᓂᒃ ᐊᒃᓱᕈᕐᑎᑕᐅᓂᕐᒥᖕᓂᒡᓗ.

¹⁹ ᐃᓱᐊᕐᓮᔨᓕ ᑐᖁᑐᐊᕐᒪᑦ, ᐃᓄᐃᑦ ᐅᑎᖃᑦᑕᓚᐅᕐᐳᑦ ᐱᐅᓯᑐᖃᕐᒥᖕᓄᑦ ᐱᐅᖏᓐᓂᕐᓴᐅᓕᕐᐸᒡᓗᑎᒡᓗ ᓯᕗᓕᕆᓚᐅᕐᑕᒥᖕᓂᑦ. ᒎᑎᐅᑉ ᐊᓯᖏᓐᓂᒃ ᒎᑎᖃᖃᑦᑕᓚᐅᕐᒪᑕ, ᐱᔨᑦᓯᕐᓗᒋᑦ ᑐᒃᓯᐊᕐᕕᒋᓪᓗᒋᓪᓗ; ᐱᓂᐊᕐᓂᕐᒥᖕᓂᒡᓗ ᓴᒃᑯᓚᐅᓐᖏᓚᑦ.

²⁰ ᐊᑕᓂᖅ ᓂᓐᖓᓚᐅᕐᐳᖅ ᐃᓴᕆᐊᓕᒥᐅᓄᑦ ᐅᖃᕐᓗᓂᓗ, “ᐃᓅᖃᑎᒌᑦ ᓯᖁᒥᑦᓯᓚᐅᕐᒪᑕ ᐊᖏᖃᑎᒌᒍᑎᒋᓯᒪᔭᓐᓂᒃ ᐱᖁᔨᑦᔪᑎᒋᓚᐅᕐᑕᓐᓂᒃ ᓯᕗᓕᖏᓐᓄᑦ. ᓈᓚᒃᓯᒪᖏᓐᓂᖏᓐᓄᑦ ᐅᕙᓐᓂᒃ,

²¹ ᐊᐅᓪᓚᕐᑎᑦᓯᓂᐊᕈᓐᓃᕐᐳᖓ ᐃᓅᖃᑎᒌᒡᔪᐊᓂᒃ ᓄᓇᖃᕐᑐᑐᖃᕐᓂᒃ ᔮᓱᐊᑉ ᐊᐅᓪᓚᕐᑎᓚᐅᓐᖏᑕᖏᓐᓂᒃ ᑐᖁᑎᓪᓗᒍ.

²² ᐊᑐᕐᓂᐊᕐᐸᒃᑲᓕ ᖃᐅᔨᓴᐅᑎᒋᓗᒋᑦ ᐃᓴᕆᐊᓕᒥᐅᓂᒃ, ᐃᓅᓯᖃᕈᒪᖕᒪᖔᑕ ᓯᕗᓕᕕᓂᕐᒥᒃᑎᑐᑦ ᐊᑕᓂᐅᑉ ᐊᑐᕐᑕᐅᖁᔭᖏᓐᓂᒃ ᑍᒤᑦᓱᒪᖏᒻᒪᖔᑕᓘᓐᓃᑦ.”

²³ ᑍᒤᒻᒪᑦ ᐊᑕᓂᐅᑉ ᐃᓅᖃᑎᒌᒡᔪᐊᑦ ᑕᒫᓂ ᓄᓇᖃᕐᑐᑐᕾᑦ ᑕᒫᓃᖏᓐᓇᕐᑎᓚᐅᕐᐰᑦ, ᐊᑕᐅᑦᓯᒃᑯᑦ ᐊᐅᓪᓚᕐᑎᓐᓇᒋᑦ, ᔮᓱᐊᒥᒡᓗ ᐱᔪᓐᓇᕐᓂᖃᕐᑎᑦᓯᓚᐅᕐᓂᕐᒥᑐᑦ ᐱᔪᓐᓇᕐᓂᖃᕐᑎᓚᐅᓐᖏᓔᑦ.