ᐃᓗᐊᕐᓮᔩᑦ ᐊᒡᓚᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦᒤᑲᓗ ᑖᓐᓗ ᑭᖑᕚᖏᑦ 1 ᐅᓪᓗᓂ ᑍᒃᑯᓇᓂ ᐊᖓᔪᖅᑳᕐᔪᐊᖃᓚᐅᖏᒻᒪᑦ ᐃᓴᕆᐊᓕᒥ. ᑍᑦᓱᒪᓂᓗ ᑖᓐ ᑭᖑᕚᖏᑦ ᕿᓂᓚᐅᕐᐳᑦ ᓇᖕᒥᓂᖅ ᓄᓇᒃᓴᒥᖕᓂᒃ. ᑍᑦᓱᒪᓂ ᐃᓴᕆᐊᓕᐅᑉ ᑭᖑᕚᖏᓐᓂ ᓇᖕᒥᓂᖅ ᓄᓇᑖᕐᓯᒪᔪᓂ ᓄᓇᑖᕐᓯᒪᖏᑦᑐᑑᓚᐅᕐᒪᑕ. 2 ᑖᓐ ᑭᖑᕚᖏᑦ ᑎᓕᓯᓚᐅᕐᐳᑦ ᐊᖑᑎᓂᒃ ᑕᓪᓕᒪᓂᒃ ᐱᔪᓐᓇᑦᓯᐊᕐᑐᓂᒃ ᑭᖑᕚᖑᖃᑎᒌᓕᒫᒥᖕᓂᑦ ᐃᒡᓗᒐᓴᖕᓂᑦ ᔫᕋᒥᑦ ᐃᒡᓗᒐᓴᒡᔪᐊᓂᓪᓗ ᐃᔅᑕᐅᓪᒥᑦ ᓄᓇᒥᒃ ᖃᐅᔨᓇᓱᐊᖁᓪᓗᒋᑦ. ᐅᖃᐅᑎᓪᓗᒋᑦ, “ᓄᓇ ᕿᒥᕐᕈᐊᕆᐊᕐᑐᕐᓯᐅᒃ.” ᓄᓇᒧᐊᕋᒥᒡᓗ ᐃᕗᕅᒥᐅᑉ ᖃᖅᑲᖏᓐᓄᑦ, ᒤᑲᐅᑉ ᐃᒡᓗᖓᓄᐊᓚᐅᕐᐳᑦ, ᑕᕝᕙᓂᓗ ᑐᔪᕐᒥᓪᓗᑎᒃ. 3 ᒤᑲᐅᓪᓗ ᐃᒡᓗᖓᑕ ᖃᓂᒋᔭᖓᓃᑎᓪᓗᒋᑦ, ᐃᓕᑕᕐᓯᕗᑦ ᐅᕕᒃᑲᒥᒃ ᓕᕔᑎᒥᒃ ᐅᖃᐅᓯᖓᒍᑦ; ᑖᑦᓱᒧᖓᓗ ᐂᕗᑦ ᐊᐱᕆᓪᓗᒍᓗ, “ᑭᓇᒨᑦ ᑕᒪᐅᓐᖓᕐᑕᐅᓐᓂᕐᐲᑦ? ᓱᕕᑦ ᑕᒫᓂ? ᑕᒪᐅᖓᓗ ᖃᓄᐃᓕᐅᕆᐊᕐᑐᕐᓯᒪᕕᑦ?” 4 ᑭᐅᕔᓪᓕ, “ᒤᑲᐅᑉ ᐱᓂᐊᕐᕕᒋᓯᒪᕚᖓ; ᐱᓇᓱᐊᕐᑎᑉᐹᖓᓗ ᑐᓂᕐᕈᓯᕐᑎᑦᓯᔨᐅᖁᓪᓗᖓ ᑖᑦᓱᒧᖓ.” 5 ᐅᖃᐅᑎᕚᓪᓗ, “ᒎᑎ ᐊᐱᕆᓚᐅᕈᒃ, ᕿᓄᕕᒋᕙᑦᑎᒋᑦ, ᖃᐅᔨᒪᖁᓪᓗᑕ ᐃᖏᕐᕋᓗᑕ ᐱᓇᓱᐊᕆᐊᕐᑐᕐᑕᑦᑎᓐᓂᒃ ᐱᔪᓐᓇᑦᓯᐊᕐᓂᐊᕐᒪᖔᑦᑕ.” 6 ᑐᓂᕐᕈᓯᕐᑎᑦᓯᔨᐅᑉ ᑭᐅᕔᑦ, “ᐃᓱᒫᓗᖏᓪᓗᓯ ᐊᐅᓪᓚᓕᕆᑦᓯ, ᐊᑕᓂᐅᑉ ᓇᔪᕐᓂᐊᕐᐹᓯ ᐊᖅᑯᑎᒋᓂᐊᕐᑕᑦᓯᓐᓂ.” 7 ᑖᒃᑯᐊ ᐊᖑᑎᑦ ᑕᓪᓕᒪᑦ ᐊᐅᓪᓚᕐᐳᑦ ᐂᓪᓗᑎᒡᓗ ᓄᓇᓕᖕᒧᑦ ᓔᓯᒧᑦ. ᐃᓄᖏᓪᓗ ᑍᑲᓃᑦᑐᑦ ᑕᑯᓪᓗᒋᑦ, ᓄᓇᖃᕐᑐᑦ ᐊᑭᕋᕐᑐᕐᑎᖃᕋᑎᒃ, ᓮᑐᓂᒥᐅᑎᑐᑦ ᐃᓂᓪᓚᖓᑦᓯᐊᕐᓗᑎᒃ, ᐅᐃᒪᖏᑦᑑᓚᐅᕐᐳᑦ, ᐊᑭᕋᕐᑐᕐᓂᖃᕋᑎᒃ ᑭᓇᒧᓪᓘᓐᓃᑦ; ᓈᒻᒪᑦᓯᐊᓚᐅᕐᐳᑦ. ᓄᓇᖃᓚᐅᕐᐳᑦ ᓮᑐᓂᒥᐅᑦ ᐅᖓᓯᒋᔭᖓᓂ, ᐃᓅᖃᑎᖃᓚᐅᕐᓇᑎᒡᓗ ᖃᓂᒋᔭᒥᖕᓂ. 8 ᑍᒃᑯᐊ ᐊᖑᑎᑦ ᑕᓪᓕᒪᑦ ᐃᓚᒥᖕᓄᑦ ᐅᑎᕋᒥᒃ ᔫᕋᒦᑦᑐᓄᑦ ᐃᔅᑕᐅᓪᒦᑦᑐᓄᓪᓗ, ᓄᓇᖃᑎᖏᑕ ᐊᐱᕐᓱᕐᐰᑦ, “ᓱᓇᒥᒃ ᐅᓂᒃᑳᒃᓴᖃᕐᐱᓰ?” 9 ᑖᒃᑯᐊ ᑭᐅᕗᑦ, “ᐸᕐᓇᒡᓗᑕ, ᐅᓇᑕᕆᐊᓚᐅᕐᓚᕗᑦ, ᓄᓇᖓᑦ ᕿᒥᕐᕈᓚᐅᕐᐸᕗᑦ, ᐱᕈᕐᓰᑦᓯᐊᕐᓇᕐᑐᖅ, ᓱᓕᕆᖏᓪᓗᓯ ᑕᒪᓃᑦᓱᓐᓇᕐᐱᓰ? ᐅᐃᒪᓕᕆᑦᓯ! ᑲᔪᓯᓕᕆᑦᓯ ᐃᑎᕐᕕᒋᓗᒍ ᐱᑖᕆᔭᕐᑐᓕᕐᓚᕗᑦ! 10 ᑍᑯᓐᖓᕈᑦᓯᓗ, ᖃᐅᔨᓂᐊᕐᐳᓯ ᐃᓄᐃᑦ ᓂᕆᐅᖏᒻᒪᑕ ᓱᔭᐅᓂᐊᕐᓂᕐᒥᓂᒃ. ᓄᓇᖓ ᐊᖏᔪᒻᒪᕆᐊᓘᖕᒪᑦ; ᓱᓇᑐᐃᓐᓇᓕᒫᖃᕐᑐᖅ ᐃᓅᑉ ᐱᔪᒪᔭᓕᒫᖏᓐᓂᒃ, ᒎᑎᐅᑉ ᑐᓂᕚᓯ ᑖᑦᓱᒥᖓ.” 11 600 ᐊᖑᑏᑦ ᑖᓐ ᑭᖑᕚᖏᓐᓂᑦ ᐅᓇᑕᐅᑎᒥᖕᓂᒃ ᓇᒃᓴᕐᓗᑎᒃ ᐊᐅᓪᓚᓚᐅᕐᐳᑦ, ᔫᕋᒥᑦ ᐃᔅᑕᐅᓪᒥᓪᓗ ᐅᓇᑕᕆᐊᓕᕐᓗᑎᒃ. 12 ᐊᐅᓪᓚᕋᒥᒡᓗ ᑕᖕᒫᕐᐳᑦ ᑭᕆᐊᑦ-ᔨᕆᒻᒧᑦ ᔫᑕᒦᑦᑐᒧᑦ. ᑖᓐᓇ ᓄᓇ ᐅᓪᓗᒥᒧ ᓱᓕ ᑍᔭᐅᕗᖅ ᑖᓐ-ᒪᕼᐊᓂᒥᒃ; ᑖᓐ ᑭᖑᕚᖏᑕ ᑕᖕᒫᕐᕕᖓᓂᒃ. 13 ᑕᕝᕙᓐᖓᑦ ᐱᓪᓗᑎᒃ ᐃᕗᕅᒥᐅᑉ ᖃᖅᑲᖏᓐᓄᐊᕐᐳᑦ, ᑎᑭᓪᓗᑎᒡᓗ ᒤᑲᐅᑉ ᐃᒡᓗᖓᓄᑦ. 14 ᑍᒃᑯᐊ ᐊᖑᑏᑦ ᑕᓪᓕᒪᑦ ᐃᔨᕋᕐᑐᕐᓗᑎᒃ ᖃᐅᔨᓴᕆᐊᓚᐅᕐᑐᑦ ᓔᓯᒥᒃ ᐃᓚᑎᒃ ᐅᖃᐅᑎᕔᑦ, “ᖃᐅᔨᒪᓐᖏᓚᓰ ᐃᒡᓗᓂ ᑖᒃᑯᓇᓂ ᑐᓂᕐᕈᓯᕐᑎᑦᓯᔨᐅᑉ ᐊᑐᕐᐸᒃᑕᖓᓂᒃ ᐊᓐᓄᕌᕐᑕᖃᕐᒪᑦ, ᒎᑎᓐᖑᐊᓂᒡᓗ ᒥᑭᔪᓂᒃ ᐃᒡᓗᒥᐅᑕᕐᓂᒃ, ᕿᔪᖕᒥᒡᓗ ᓴᓇᓐᖑᐊᕐᓯᒪᔪᒥᒃ ᒎᑎᓐᖑᐊᒥᒃ, ᐊᐅᒃᑎᓯᒪᔪᒥᒡᓗ ᒎᑎᓐᖑᐊᓕᐊᕆᓯᒪᔪᒥᒃ ᓴᕕᕋᔭᖕᒥᒃ? ᒫᓐᓇᓕ ᐃᓱᒪᒃᓴᕐᓯᐅᓕᕆᑦᓯ ᖃᓄᐃᓕᐅᕐᓂᐊᕐᒪᖔᑦᓯ.” 15 ᑕᕝᕙ ᐂᓕᕐᐳᑦ ᑍᑯᖓ, ᑎᑭᓪᓗᑎᒡᓗ ᐅᕕᒃᑲᐅᑉ ᓕᕔᑎᐅᑉ ᐊᖏᕐᕋᖓᓄᑦ, ᒤᑲᐅᑉ ᐃᒡᓗᖓᓃᑦᑐᒧᑦ, ᐊᐱᕆᓪᓗᒍᓗ ᖃᓄᐃᒻᒪᖔᑦ. 16 600ᐃᓪᓗ ᑖᓐ ᑭᖑᕚᖏᑦ ᐅᓇᑕᐅᑎᓂᒃ ᑎᒍᒥᐊᕐᑐᑦ, ᓇᖏᓚᐅᕐᐳᑦ ᐃᑎᕐᑕᕐᕕᖓᓂ. 17 ᑖᒃᑯᐊ ᑕᑦᓕᒪᑦ ᐃᔨᕋᕐᑐᕐᓗᑎᒃ ᓄᓇᒥᒃ ᖃᐅᔨᓴᕆᐊᓚᐅᕐᑐᑦ ᐃᒡᓗᖓᓄᑦ ᐃᑎᕐᐳᑦ ᑎᒍᓪᓗᒋᓪᓗ ᑐᓂᕐᕈᓯᕐᑎᑦᓯᔨᐅᑉ ᐊᑐᕐᐸᒃᑕᖓ ᐊᓐᓄᕌᖅ, ᒎᑎᓐᖑᐊᓪᓗ ᒥᑭᔪᑦ ᐃᒡᓗᒥᐅᑍᑦ, ᕿᔪᒡᓗ ᓴᓇᓐᖑᐊᕐᓯᒪᔪᖅ ᒎᑎᓐᖑᐊᖅ, ᐊᐅᒃᑎᓯᒪᔪᕐᓗ ᒎᑎᓐᖑᐊᓕᐊᕆᓯᒪᔪᑦ ᓴᕕᕋᔭᒃ, ᑐᓂᕐᕈᓯᕐᑎᑦᓯᔨᓕ ᐃᑎᕐᑕᕐᕕᖕᒦᖏᓐᓇᓚᐅᕐᐳᖅ 600 ᐊᖑᑏᑦ ᐱᖃᑎᒋᓪᓗᒋᑦ. 18 ᐊᖑᑏᑦ ᑖᒃᑯᐊ ᒤᑲᐅᑉ ᐃᒡᓗᖓᓄᐊᓚᐅᕐᑐᑦ ᑎᒍᓯᓪᓗᑎᒡᓗ ᑐᓂᕐᕈᓯᕐᑎᑦᓯᔨᐅᑉ ᐊᑐᕐᐸᒃᑕᖓᓂᒃ ᐊᓐᓄᕌᒥᒃ, ᒎᑎᓐᖑᐊᓪᓗ ᒥᑭᔪᑦ ᐃᒡᓗᒥᐅᑍᑦ, ᒎᑎᓐᖑᐊᓪᓗ ᐊᐅᒃᑎᓯᒪᔪᖅ ᒎᑎᓐᖑᐊᓕᐊᕆᓯᒪᔪᖅ ᓴᕕᕋᔭᒃ, ᑐᓂᕐᕈᓯᕐᑎᑦᓯᔨᐅᑉ ᐊᐱᕆᕔᑦ, “ᖃᓄᐃᓕᐅᕐᐱᓰ?” 19 ᑖᒃᑯᐊᓗ ᐅᖃᐅᑎᕚᑦ, “ᓂᐱᖃᓐᖏᓚᐅᕆᑦ, ᐊᒡᒐᖕᓄᑦ ᖃᓃᑦ ᒪᑐᓯᒪᒍᒃ, ᒪᓕᒡᓗᑎᓪᓗ ᐅᕙᑦᑎᓐᓄᑦ ᐊᑖᑕᐅᓂᐊᕋᕕᑦ ᑐᓂᕐᕈᓯᕐᑎᑦᓯᔨᐅᓗᑎᑦ ᐃᓅᑉ ᐊᑕᐅᓯᐅᑉ ᐃᒡᓗᖓᓂ, ᐅᕝᕙᓘᓐᓃᑦ ᑭᖑᕚᖑᖃᑎᒌᓄᑦ ᐃᓚᒌᓄᑦ ᐃᓴᕆᐊᓕᒥᐅᓄᑦ?” 20 ᑐᓂᕐᕈᓯᕐᑎᑦᓯᔨ ᖁᕕᐊᓱᒻᒪᕆᓚᐅᕐᐳᖅ; ᑍᒤᒻᒪᑦ ᑐᓂᕐᕈᓯᕐᑎᑦᓯᔨᐅᑉ ᐊᑐᕐᐸᒃᑕᖓ ᐊᓐᓄᕌᖅ, ᒎᑎᓐᖑᐊᓪᓗ ᒥᑭᔪᑦ ᐃᒡᓗᒥᐅᑍᑦ, ᕿᔪᒡᓗ ᓴᓇᓐᖑᐊᕐᓯᒪᔪᖅ ᒎᑎᓐᖑᐊᖅ, ᐊᐅᒃᑎᓯᒪᔪᕐᓗ ᒎᑎᓐᖑᐊᖅ ᓴᕕᕋᔭᒃ ᑎᒍᕔᑦ ᒪᓕᓕᕐᓗᒋᓪᓗ. 21 ᐅᑎᓕᓚᐅᕐᐳᓪᓗ, ᕿᑐᕐᖓᑎᒃ ᐃᓚᒋᓪᓗᒋᑦ, ᐆᒪᔪᖁᑎᑎᒡᓗ, ᓱᓇᑐᐃᓐᓇᖏᓪᓗ ᓯᕗᓪᓕᐅᓪᓗᑎᒃ. 22 ᐃᒡᓗᒥᓪᓗ ᐅᖓᓯᒃᓯᑎᓪᓗᒋᑦ. ᒤᑲᐅᑉ ᓯᓚᖅᑲᑎᓂ ᕾᖁᓚᐅᕐᐰᑦ ᐅᓇᑕᕆᐊᖁᓪᓗᒋᑦ. ᐊᖑᓪᓗᒋᓪᓗ ᑖᓐ ᑭᖑᕚᖏᑦ. 23 ᕾᒐᓛᕐᕕᒋᓪᓗᒋᓪᓗ, ᑖᓐ ᑭᖑᕚᖏᑦ, ᑖᒃᑯᐊᓗ ᐅᑎᒧᑦ ᕿᕕᐊᕐᓗᑎᒃ ᒤᑲ ᐊᐱᕆᕚᑦ, “ᓱᕖᑦ ᐃᓄᒋᐊᕌᓗᖕᓂᒃ ᐃᓚᖃᕐᓗᑎᑦ ᕾᕕᑦ?” 24 ᒤᑲᐅᑉ ᑭᐅᕔᑦ, “ᒎᑎᓐᖑᐊᒃᑲ ᑎᒍᒐᑦᓯᐅᒃ ᓴᓇᓚᐅᕐᑕᒃᑲ, ᑐᓂᕐᕈᓯᕐᑎᑦᓯᔨᒐᓗ ᐊᐅᓪᓚᕈᑎᓪᓗᒋᑦ ᓱᓇᒥᒡᓕ ᐊᒥᐊᒃᑯᕕᓯᓐᖔ ᖃᓄᐃᒻᒪᑦ ᑍᒤᓕᐅᕐᐱᓰ?” 25 ᑖᓐ ᑭᖑᕚᖏᑕ ᐅᖃᐅᑎᕚᑦ, “ᐅᕙᑦᑎᓐᓄᑦ ᑐᓵᔭᐅᓂᐊᕐᓇᒃ, ᐊᖑᑎᓄᑦ ᓂᓐᖓᐅᒪᔪᓄᑦ ᐅᐸᒃᑕᐅᓪᓚᕐᓂᐊᕋᕕᑦ, ᑐᖁᑕᐅᓗᑎᑦ ᐃᒡᓗᒥᐅᖃᑎᑎᑦ ᐃᓚᒋᓗᒋᑦ.” 26 ᑖᓐ ᑭᖑᕚᖏᑦ ᐊᐅᓪᓚᕐᐳᑦ; ᒤᑲᓕ ᖃᐅᔨᒐᒥ ᑖᒃᑯᐊ ᓲᖑᓂᕐᓴᐅᖕᒪᑕ ᐃᒻᒥᓂᑦ, ᐅᑎᕐᐳᖅ, ᐊᖏᕐᕋᕐᓗᓂᓗ. 27 ᒤᑲᐅᑉ ᓴᓇᓚᐅᕐᑕᖏᑦ ᓇᒃᓴᕐᓗᒋᑦ, ᑖᑦᓱᒪᓗ ᑐᓂᕐᕈᓯᕐᑎᑦᓯᔨᖁᑎᖓ, ᑖᓐ ᑭᖑᕚᖏᑦ ᑎᑭᑉᐳᑦ ᓔᓯᒧᑦ, ᐃᓄᖕᓄᑦ ᓮᓕᔪᓄᑦ ᓱᓇᒥᒡᓗ ᓂᕆᐅᖏᑦᑐᓄᑦ, ᓴᕕᒡᔪᐊᒧᓪᓗ ᑐᖁᓪᓗᒋᑦ, ᐃᒡᓗᒐᓮᓪᓗ ᐃᑯᐊᓪᓚᒡᓗᒋᑦ. 28 ᑖᒃᑯᐊᓕ ᓴᐳᑎᔭᐅᔪᓐᓇᓚᐅᓐᖏᓚᑦ ᐊᓯᒥᖕᓄᑦ, ᓔᓯ ᐅᖓᓯᒃᑐᒻᒪᕆᐅᓚᐅᕐᒪᑦ ᓮᑐᓂᒥᑦ, ᐃᓅᖃᑎᖃᓚᐅᖏᒻᒪᑕ ᐊᓯᒥᖕᓂᒃ, ᓇᕐᓴᒥᐅᖑᓚᐅᕐᒪᑕ ᐱᑦ-ᕆᕼᐅᑉᒥ. ᑖᓐ ᑭᖑᕚᖏᑕ ᐃᒡᓗᒐᓮᑦ ᓴᓇᒋᐊᓪᓚᓚᐅᕐᐰᑦ ᓄᓇᑖᕆᓪᓗᒍᓗ. 29 ᐊᑎᕐᑖᕐᑎᓪᓗᒍᓗ ᐃᒡᓗᒐᓴᒡᔪᐊᑦ ᑖᓐᒥᒃ, ᓯᕗᓕᕕᓂᖓᑦᑕ ᐊᑎᖓᓂᒃ, ᐃᓴᕆᐊᓕᐅᑉ ᐃᕐᓂᕆᓚᐅᕐᑕᖓᓂᒃ; ᓯᕗᓪᓕᕐᒥᒃ ᐃᒡᓗᒐᓮᑦ ᐊᑎᖃᓚᐅᕐᐳᑦ ᓔᓯᒥᒃ. 30 ᑖᓐ ᑭᖑᕚᖏᑦ ᐃᓄᓐᖑᐊᒥᒃ ᓴᓇᓐᖑᐊᕐᓯᒪᔪᒥᒃ ᐋᖅᑭᒃᓯᓚᐅᕐᐳᑦ ᐃᒻᒥᖕᓄᑦ; ᔫᓇᑕᓂᓗ, ᒌᕐᓲᒥᐅᑉ ᐃᕐᓂᖓ, ᒨᓯᓯᐅᑉ ᐃᕐᖑᑕᖓ, ᑐᓂᕐᕈᓯᕐᑎᑦᓯᔨᐅᓚᐅᕐᐳᖅ ᑖᓐ ᑭᖑᕚᖏᓐᓄᑦ ᐃᓄᐃᑦ ᐊᐅᓪᓚᐅᑦᔭᐅᓂᖓ ᑎᑭᓪᓗᒍ. 31 ᒤᑲᐅᑉ ᒎᑎᓐᖑᐊᖏᑦ ᑖᑦᓱᒪ ᓴᓇᓚᐅᕐᑕᖏᑦ ᑍᑲᓃᖏᓐᓇᓚᐅᕐᐳᑦ ᒎᑎᐅᑉ ᑐᐱᖓᓂ ᑐᒃᓯᐊᕐᕕᐅᑎᓪᓗᒍ ᓮᓗᐊᒦᓐᓂᖓᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society