ᐃᓗᐊᕐᓮᔩᑦ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᒤᑲᐅᑉ ᒎᑎᓐᖑᐊᖏᑦ

¹ ᐊᖑᑎᑕᖃᓚᐅᕐᐳᖅ ᒤᑲᒥᒃ ᐊᑎᓕᖕᒥᒃ, ᓄᓇᖃᕐᑐᒥᒃ ᖃᖅᑲᔮᓂ ᐃᕗᕅᒥᒥ.

² ᑖᑦᓱᒪ ᐊᓈᓇᓂ ᐅᖃᐅᑎᕚ, “ᑎᒡᓕᒡᕕᐅᓪᓗᑎᑦ ᓯᐅᓪᕕᕆᓂᒃ 1,100ᓂᒃ, ᐅᖃᕐᓂᕐᓗᒍᑎᒋᓚᐅᕐᐸᑦ ᑎᒡᓕᒃᑐᕕᓂᖅ. ᑍᒤᓕᑎᓪᓗᑎᑦ ᑐᓴᓚᐅᕐᐸᒋᑦ. ᑕᑯᒋᑦ, ᑮᓇᐅᔧᑦ ᐱᓯᒪᕙᒃᑲ; ᐅᕙᖎᓐᓇ ᑎᒍᓯᓚᐅᕐᑐᖓ.” ᐊᓈᓈᖓ ᐅᖃᕐᐳᖅ, “ᐊᑕᓂᐅᑉ ᓮᒻᒪᕐᑎᓪᓕᑎᑦ ᐃᕐᓃᒃ!”

³ ᑮᓇᐅᔧᑦ 1,100 ᓯᐅᓪᕕᕇᑦ ᐅᑎᕐᑎᓚᐅᕐᐰᑦ ᐊᓈᓇᒥᓄᑦ, ᐊᓈᓇᖓᓗ ᐅᖃᕐᐳᖅ, “ᑐᓂᕐᕈᑎᒋᓂᐊᕐᐸᒃᑲ ᐊᑕᓂᕐᒧᑦ ᓯᐅᓪᕕᕇᑦ ᐃᕐᓂᕋ ᐱᑦᔪᑎᒋᓪᓗᒍ. ᐃᓄᓐᖑᐊᒥᒃ ᓴᕕᕋᔭᖕᒥᒃ ᒎᑎᓐᖑᐊᒥᒃ, ᐊᐅᒃᑎᓚᐅᕐᓗᒍ ᓴᓇᓯᒪᔪᒥᒃ ᓴᓇᔪᖃᖁᓪᓗᒍ; ᒫᓐᓇᓕ ᐅᑎᕐᑎᑉᐸᒃᑲ ᐃᓕᖕᓄᑦ.”

⁴ ᐊᓈᓇᒥᓄ ᑮᓇᐅᔧᑦ ᐅᑎᕐᑎᒻᒪᒋᑦ. ᐊᓈᓇᖓᑕ ᑮᓇᐅᔧᑦ 200 ᓯᐅᓪᕕᕇᑦ ᑐᓂᕔᑦ ᓯᐅᓪᕙᓕᕆᔨᒧᑦ, ᑖᓐᓇᓗ ᒎᑎᓐᖑᐊᒥᒃ ᐃᓄᓐᖑᐊᓕᐅᕐᐳᖅ, ᐃᓕᓪᓗᒍᓗ ᒤᑲᐅᑉ ᐃᒡᓗᖓᓄᑦ.

⁵ ᑖᓐᓇ ᐊᖑᑦ ᒤᑲ ᓇᖕᒥᓂᖅ ᑐᒃᓯᐊᕐᕕᖃᓚᐅᕐᐳᖅ. ᑐᓂᕐᕈᓯᕐᑎᑦᓯᔨᓯᐅᑎᒥᒃ ᓴᒡᕕᖕᒥᐅᑕᓕᐅᓚᐅᕐᐳᖅ ᐃᒡᓗᒥᐅᑕᓂᒡᓗ ᒎᑎᓐᖑᐊᓂᒃ, ᐃᕐᓂᕐᒥᓗ ᐃᓚᖓᓐᓂᒃ ᑐᓂᕐᕈᓯᕐᑎᑦᓯᔨᓐᖑᕐᑎᑦᓯᓪᓗᓂ.

⁶ ᑍᑦᓱᒪᓂ ᐊᖓᔪᖅᑳᕐᔪᐊᖃᓚᐅᖏᒻᒪᑦ ᐃᓴᕆᐊᓕᓂ, ᐃᓄᓕᒫᑦ ᓈᒻᒪᒐᓱᒋᔭᒥᖕᓂᒃ ᐃᓅᓚᐅᕐᐳᑦ.

⁷ ᑍᑦᓱᒪᓂ ᐅᕕᒃᑲᕐᑕᖃᓚᐅᕐᐳᖅ ᐊᖑᒻᒥᒃ ᓄᓇᖃᕐᑐᒥᒃ ᐱᑦᓕᐊᒥ, ᔫᑕᒦᑦᑐᒥ, ᔫᑕᐅᑉ ᑭᖑᕚᖏᓐᓄᑦ ᓄᓇᖃᖃᑕᐅᔪᒥᒃ, ᑖᓐᓇᓗ ᓕᕔᑎᐅᕗᖅ; ᑕᒫᓂᓗ ᓂᐅᕐᕈᐊᖑᓚᐅᕐᐳᖅ.

⁸ ᐊᐅᓪᓚᕐᒪᓪᓗ ᓄᓇᓕᖕᓂᑦ ᐱᑦᓕᐊᒥᑦ ᔫᑕᒦᑦᑐᒥᑦ ᓄᓇᒋᓂᐊᕐᑕᒥᓂᒃ ᕿᓂᕐᓗᓂ; ᐃᖏᕐᕋᓚᐅᕐᓗᓂ, ᖃᖅᑲᓕᖕᓄᑦ ᐃᕗᕅᒥᒧᑦ ᑎᑭᓚᐅᕐᐳᖅ ᒤᑲᐅᑉ ᐃᒡᓗᖓᓄᐊᕐᓗᓂ.

⁹ ᒤᑲᐅᑉ ᐊᐱᕆᕚ, “ᓇᑭᓐᖔᕐᐲᑦ?” ᑭᐅᕚ, “ᓕᕔᑎᐅᕗᖓ ᐱᑦᓕᐊᒥᑦ ᔫᑕᒦᑦᑐᒥᑦ ᐱᕗᖓ, ᐃᖏᕐᕋᖃᑦᑕᕐᐳᖓ ᓄᓇᒃᓴᓐᓂᒃ ᕿᓂᕐᓗᖓ.”

¹⁰ ᒤᑲᐅᑉ ᐅᖃᐅᑎᕚ, “ᐅᕙᓃᓕᕆᑦ, ᐊᑖᑕᒋᓚᐅᕐᓚᒋᑦ, ᑐᓂᕐᕈᓯᕐᑎᑦᓯᔨᒋᓗᑎᓪᓗ, ᑐᓂᖃᑦᑕᕐᓂᐊᕐᐸᒋᑦ, ᑮᓇᐅᔭᓂᒃ ᓯᐅᓪᕕᕆᓂᒃ ᖁᓕᓂᒃ ᐊᕐᕌᒍᑕᒫᑦ, ᐊᓐᓄᕌᓂᒡᓗ, ᓂᕿᖃᕐᑎᓐᓂᐊᕐᐸᒋᓪᓗ, ᑕᕝᕙ ᓕᕔ ᑕᕝᕙᓃᓕᕐᐳᖅ.”

¹¹ ᐅᕕᒃᑲᕐᓗ ᓕᕔᑎ ᓈᒻᒪᒃᓴᕐᓗᓂ ᐃᒡᓗᒥᐅᖃᑎᒋᓕᕐᐹ; ᒤᑲᐅᓪᓗ ᐅᕕᒃᑲᖅ ᐃᕐᓂᖏᓐᓄᑦ ᐃᓚᒋᔭᐅᓕᕐᓗᓂ.

¹² ᒤᑲᐅᑉ ᑐᓂᕐᕈᓯᕐᑎᑦᓯᔨᓐᖑᕐᑎᑉᐹ ᓕᕔᑎ, ᐅᕕᒃᑲᕐᓗ ᑖᓐᓇ ᑐᓂᕐᕈᓯᕐᑎᑦᓯᔨᑖᕆᓪᓗᒍ ᑕᕝᕙᓂ ᐊᖏᕐᕋᖃᓕᕐᐳᖅ ᒤᑲᐅᑉ ᐃᒡᓗᖓᓂ.

¹³ ᑕᕝᕙ ᒤᑲ ᐅᖃᕐᐳᖅ, “ᖃᐅᔨᒪᕗᖓ ᐊᑕᓂᐅᑉ ᓮᒻᒪᕐᑎᓐᓂᐊᕐᒪᖓ, ᒫᓐᓇ ᓕᕔᑎᒥᒃ ᑐᓂᕐᕈᓯᕐᑎᑦᓯᔨᖃᓕᕋᒪ.”