ᐃᓗᐊᕐᓮᔩᑦ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᓵᒻᓲᓂᒃᑯᒃ ᑎᓔᓚᒃᑯᒃ

¹ ᓵᒻᓲᓂ ᒑᓴᒧᐊᕐᐳᖅ, ᑍᑲᓂᓗ ᑕᑯᓪᓗᓂ ᐊᕐᓇᒥᒃ ᐊᑐᒐᕐᒥᒃ, ᑖᓐᓇᓗ ᐅᐸᒃᓗᒍ ᐃᓐᓇᖓᖃᑎᒋᕚ.

² ᒑᓴᒥᐅᑦ ᐅᖃᐅᑎᔭᐅᓚᐅᕐᐳᑦ, “ᓵᒻᓲᓂ ᑕᒪᐅᖓ ᑎᑭᑉᐳᖅ!” ᓇᔪᕐᑕᖓ ᐅᖓᓗᕚᑦ ᐃᔨᕐᓯᒪᓪᓗᑎᒡᓗ ᐅᑕᖅᑭᓪᓗᒍ ᐅᓐᓄᐊᓕᒫᖅ ᐃᒡᓗᒐᓮᑦ ᐃᑎᕐᑕᕐᕕᖓᓂ. ᐅᓐᓄᐊᓕᒫᖅ ᓂᐱᖃᓚᐅᓐᖏᓚᑦ, ᐃᒫᒃ ᐅᖃᖃᑦᑕᐅᑎᓪᓗᑎᒃ, “ᐅᓪᓛᒃᑯᑦ ᖃᐅᒻᒪᓕᕐᐸᑦ, ᑐᖁᓐᓂᐊᕐᐸᕗᑦ.”

³ ᓵᒻᓲᓂᓗ ᓇᓚᕗᖅ ᐅᓐᓄᐊᑉ ᕿᑎᕋᓕᕐᓂᖓ ᑎᑭᓪᓗᒍ, ᒪᑭᓐᓇᒥᓗ ᐅᓐᓄᐊᒃᑯᑦ ᕿᑎᕋᓕᕐᑎᓪᓗᒍ, ᐃᒡᓗᖓᓮᑦ ᐃᑎᕐᑕᕐᕕᖓᑕ ᐅᒃᑯᐊᖓ ᑎᒍᕚ ᐊᕙᓗᖏᒡᓗ ᒪᕐᕉᒃ ᓄᓱᒡᓗᒋᑦ ᐲᕐᐰᑦ, ᐃᕐᓱᒡᓗᒋᓪᓗ ᖃᖅᑲᐅᑉ ᖄᖓᓄᐊᕈᑎᕔᑦ ᕼᐃᐸᕋᓐᒧᑦ ᓵᓐᖓᔪᒧᑦ.

⁴ ᑕᒪᑐᒪ ᑭᖑᕐᖓᒍᑦ ᐅᖓᒋᔭᖃᓕᕐᐳᖅ ᐊᕐᓇᒥᒃ ᓱᕆᒃ ᓇᕐᓴᖓᓂᒥᐅᑕᕐᒥᒃ, ᐊᑎᓕᖕᒥᒃ ᑎᓔᓚᒥᒃ.

⁵ ᐱᓕᔅᑍᓂᒥᐅᓪᓗ ᐊᖓᔪᖅᑳᖏᑦ ᑖᑦᓱᒧᖓ ᐅᐸᒍᑎᕗᑦ ᐅᖃᐅᑎᓪᓗᒍ, “ᓯᓔᕐᕆᓚᐅᕈᒃ ᖃᐅᔨᓇᓱᐊᕐᓗᑎᓪᓗ ᖃᓄᖅ ᓴᓐᖏᔪᐊᓘᓂᖓᓂᒃ, ᖃᓄᕐᓗ ᓵᓚᒋᔪᓐᓇᕐᒪᖔᑦᑎᒍᑦ, ᐊᑦᓱᖏᕐᓂᐊᕋᑦᑎᒍᑦ ᓵᓚᒋᓗᒍᓗ; ᑕᕝᕙ ᑐᓂᓂᐊᕐᐸᑦᑎᒋᑦ 1,100ᓂᒃ ᓯᐅᓪᕕᕆᓂᒃ.”

⁶ ᑕᕝᕙ ᑎᓔᓚᐅᑉ ᓵᒻᓲᓂ ᐅᖃᐅᑎᕚ, “ᐅᖃᐅᑎᓚᐅᓐᖓ ᖃᓄᐊᓗᒃ ᓴᓐᖏᔫᑎᑕᐅᖕᒪᖔᕐᐱᑦ, ᖃᓄᕐᓗ ᕿᓚᒃᓱᕐᑕᐅᔪᓐᓇᕐᒪᖔᕐᐱᑦ ᓵᓚᐅᓗᑎᑦ.”

⁷ ᓵᒻᓲᓂᐅᓪᓗ ᐅᖃᐅᑎᕚ, “ᐊᑦᓱᖏᕐᑕᐅᒍᒪ ᐱᓯᒃᓰᑦ ᓄᖃᕐᑎᖏᓐᓄᑦ 7ᓄᑦ ᓄᑖᓄᑦ ᐸᓂᓚᐅᖏᑦᑐᓄᑦ, ᓴᓐᖐᑦᑑᓕᕐᓂᐊᕐᐳᖓ ᐃᓄᑐᐃᓐᓇᑎᑐᑦ.”

⁸ ᑕᕝᕙ ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑐᓂᓯᕗᑦ ᑖᑦᓱᒧᖓ ᐱᓯᒃᓯᐅᑉ ᓄᖃᕐᑎᖏᓐᓂᒃ 7ᓂᒃ, ᓄᑖᓂᒃ ᓱᓕ ᐸᓂᓚᐅᖏᑦᑐᓂᒃ, ᑖᑦᓱᒪᓗ ᐊᑦᓱᖏᕐᓱᕐᐹ ᑖᒃᑯᓄᖓ.

⁹ ᐊᖑᑏᑦ ᐅᑕᖅᑭᓚᐅᕐᐳᑦ ᐊᕐᓇᐅᑉ ᐃᒡᓗᕈᓯᖓᓂ. ᐊᕐᓇᐅᓪᓗ ᐅᖃᐅᑎᕚ, “ᓵᒻᓲᓂ ᐱᓕᔅᑍᓂᒥᐅᑦ ᐅᐸᒃᐹᑎᑦ!” ᐱᑎᒃᓯᐅᑉ ᓄᖃᕐᑎᖏᑦ ᕿᒃᑐᕋᕐᐰᑦ ᐃᕙᓗᑎᑐᑦ ᐃᑯᒪᒧᑦ ᐊᒃᑐᕐᑕᐅᔪᑎᑐᑦ. ᓴᓐᖏᓂᖓᑕ ᓇᓗᓇᕐᓂᖓ ᖃᐅᔨᔭᐅᓚᐅᓐᖏᓚᖅ.

¹⁰ ᑎᓔᓚᐅᑉ ᐅᖃᐅᑎᕚ ᓵᒻᓲᓂ, “ᑕᑯᒋᑦ, ᒥᑕᐅᑎᒋᓚᐅᕐᐸᕐᒪ ᓴᒡᓗᓚᐅᕐᐳᑎᑦ ᐅᕙᓐᓄᑦ; ᒫᓐᓇᓕ ᐅᖃᐅᑎᓚᐅᓐᖓ ᓱᓇᒧᑦ ᐊᑦᓱᖏᕐᑕᐅᔪᓐᓇᕐᒪᖔᕐᐲᑦ.”

¹¹ ᐅᖃᐅᑎᕚ, “ᕿᓚᒃᓱᕐᑕᐅᒍᒪ ᐊᒃᓱᓈᓄᑦ ᐊᑐᓚᐅᕐᓯᒪᖏᑦᑐᓄᑦ, ᓴᓐᖐᓕᒐᔭᕐᐳᖓ, ᐃᓄᑐᐃᓐᓇᑎᑑᓕᕐᓗᖓ.”

¹² ᑍᒤᒻᒪᑦ ᑎᓔᓚ ᐊᑦᓱᓈᓂᒃ ᓄᑖᓂᒃ ᐱᓚᐅᕐᐳᖅ ᐊᑦᓱᖏᕐᓗᒍᓗ ᐅᖃᐅᑎᕚ, “ᓵᒻᓲᓂ, ᐱᓕᔅᑍᓂᒥᐅᑦ ᐅᐸᒃᐹᑎᑦ!” ᐊᖑᑏᑦ ᐅᑕᖅᑭᓚᐅᕐᐳᑦ ᐊᕐᓇᐅᑉ ᐃᒡᓗᕈᓯᖓᓂ. ᐊᒃᓱᓈᓪᓕ ᑖᒃᑯᐊ ᑕᓕᕐᒥᓂᑦ ᕿᒃᑐᕋᕐᐰᑦ ᐃᕙᓗᑎᑐᑦ.

¹³ ᑎᓔᓚᐅᑉ ᓵᒻᓲᓂ ᐅᖃᐅᑎᕚ, “ᒫᓐᓇᒧᑦ ᒥᑕᐅᑎᒋᓚᐅᕐᐸᕐᒪ ᓴᒡᓗᓚᐅᕐᐳᑎᓪᓗ ᐅᕙᓐᓄᑦ. ᐅᖃᐅᑎᓚᐅᓐᖓ ᓱᓇᒧᑦ ᐊᑦᓱᖏᕐᑕᐅᔪᓐᓇᕐᐲᑦ.” ᐅᖃᐅᑎᕚ, “ᓄᔭᒃᑲ 7ᓕᖅᑲᖓᔪᑦ ᓄᕕᕐᓴᕈᕕᒋᑦ ᓱᑲᓪᓗᒋᑦ ᓄᕕᕐᓴᐅᑎᐅᑉ ᓱᑲᑎᕈᑎᖓᓄᑦ ᓄᕕᕐᓴᕐᕕᖕᒧᑦ ᐊᑦᓱᖏᕐᓗᒋᑦ, ᓴᓐᖐᓕᒐᔭᕐᐳᖓ ᐃᓄᑐᐃᓐᓇᕐᑎᑑᓕᕐᓗᖓ.”

¹⁴ ᐊᓱᐃᓛᒃ ᓄᕕᕐᓴᓚᐅᕐᐰᑦ ᓱᑲᓪᓗᒋᑦ ᓄᕕᕐᓴᐅᑎᐅᑉ ᓱᑲᑎᕈᑎᖓᓄᑦ ᓄᕕᕐᓴᕐᕕᖕᒧᑦ ᐊᑦᓱᖏᕐᓗᒋᑦ, ᐅᖃᐅᑎᓪᓗᒍᓗ, “ᓵᒻᓲᓂ ᐱᓕᔅᑍᓂᒥᐅᑦ ᑎᑭᑉᐹᑎᑦ!” ᑐᐸᒃᑲᒥᓗ ᒪᑭᑉᐳᖅ ᓄᔭᓂᓗ ᐲᕐᐰᑦ ᓄᕕᕐᓴᐅᑎᒥᑦ.

¹⁵ ᐊᕐᓇᐅᑉ ᐅᖃᐅᑎᕚ, “ᖃᓄᖅ ᐅᖃᕈᓐᓇᕐᐲᑦ, ‘ᓇᒡᓕᒋᕙᒋᑦ,’ ᐆᒻᒪᑏᑦ ᐅᕙᓐᓃᓐᖏᑎᓪᓗᒍ? ᒥᑕᐅᑎᒋᓚᐅᕋᕕᓐᖓ ᐱᖓᓱᐊᕐᑎᕐᓗᑎᑦ, ᐅᖃᐅᑎᓚᐅᖏᓐᓇᕕᓐᖓᓗ ᖃᓄᖅ ᓴᓐᖏᔪᐊᓘᖕᒪᖔᕐᐱᑦ.”

¹⁶ ᒪᑐᒪ ᑭᖑᕐᖓᒍᑦ, ᐊᒃᓱᕈᕐᑎᓕᕐᐹ ᐅᖃᐅᓯᕐᒥᓄᑦ ᖃᐅᑕᒫᑦ; ᐅᖃᖁᓪᓗᒍ, ᑕᕐᓂᖓ ᕿᒃᓵᓕᕐᐳᖅ ᑐᖁᓕᕐᑐᑐᑦ,

¹⁷ ᐅᖃᐅᑎᓕᕐᐹᓗ ᖃᐅᔨᒪᔭᒥᓂᒃ ᑕᒤᓐᓂᒃ, ᐅᖃᐅᑎᓪᓗᒍ, “ᓄᔭᒃᑲ ᑭᑦᔭᐅᑎᒧᑦ ᑭᐱᔭᐅᓚᐅᕐᓯᒪᓐᖏᓚᑦ ᐊᓈᓇᒪ ᐃᒡᓕᐊᖓᓂᑦ ᐊᓂᒐᒪ ᒎᑎᒧᑦ ᑐᓂᕐᕈᑕᐅᓯᒪᕗᖓ ᓈᓴᕅᖑᖁᓪᓗᖓ. ᓄᔭᒃᑲ ᑭᐱᔭᐅᒃᐸᑕ ᓴᓐᖏᓂᕋ ᐱᕐᓂᐊᕐᐳᖅ, ᓴᓐᖐᑦᑑᓕᕐᓗᖓᓗ ᐃᓄᑐᐃᓐᓇᕐᑎᑐᑦ.”

¹⁸ ᑎᓔᓚ ᖃᐅᔨᒐᒥ ᓱᓕᓂᖓᓂᒃ, ᕾᖁᔨᕗᖅ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓂᒃ, ᐅᖃᐅᑎᓪᓗᒋᓪᓗ, “ᕾᓂᐊᕐᐳᓯ ᐊᑕᐅᓯᐊᒃᑲᓐᓂᕐᓗᓯ, ᓱᓕᔪᒥᒃ ᐅᖃᐅᑎᖕᒪᖓ.” ᐊᓱᐃᓛᒃ ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᐂᕗᑦ ᑖᑦᓱᒧᖓ ᐊᑭᓕᕐᓗᒍᓗ ᑮᓇᐅᔭᓂᒃ.

¹⁹ ᓯᓂᓕᕐᑎᑉᐹᓗ ᓰᖅᑯᒥᓂ; ᕾᖁᔨᓪᓗᓂᓗ ᐊᖑᒻᒥᒃ, ᑖᑦᓱᒪᓗ ᓄᔭᖏᑦ 7ᐃᓕᓪᓗᒋᑦ ᑭᑦᔭᕐᐰᑦ ᓂᐊᖁᐊᓂᑦ. ᐸᒡᕕᓴᓕᕐᐹᓗ ᐊᕐᓇᐅᑉ, ᓴᓐᖏᓂᖓᑕᓗ ᕿᒪᒃᐹ.

²⁰ ᐊᕐᓇᐅᑉ ᐅᖃᐅᑎᕚ, “ᐱᓕᔅᑍᓂᒥᐅᑦ ᑎᑭᑉᐹᑎᑦ, ᓵᒻᓲᓂ!” ᓯᓂᖕᓂᕐᒥᓂᑦ ᒪᑭᓐᓇᒥ ᐅᖃᕐᐳᖅ, “ᑍᒤᑉᐸᓚᐅᕋᒪ ᑍᒤᓐᓂᐊᕆᕗᖓ, ᐊᑦᓱᖏᐅᑎᑦ ᓱᕋᖕᓂᐊᕐᐸᒃᑲ!” ᑭᓯᐊᓂᓕ ᖃᐅᔨᒪᓚᐅᓐᖏᓚᖅ ᐊᑕᓂᐅᑉ ᕿᒪᖕᒪᒍ.

²¹ ᐱᓕᔅᑍᓂᒥᐅᑦ ᑎᒍᕚᑦ, ᐃᔨᖏᒡᓗ ᖃᕐᓗᒋᒃ, ᐂᑎᑉᐹᓗ ᒑᓴᒧᑦ, ᕿᓚᒃᓱᕐᓗᒍᓗ ᑲᓐᓄᔭᓄᑦ ᐊᕐᓵᕐᑑᔭᓄᑦ; ᓯᖃᓪᓕᑎᑦᓯᕕᖕᒥᓗ ᑎᒍᔭᐅᓯᒪᕕᖕᒥ ᓯᖃᓪᓕᑎᑦᓯᔨᐅᑎᑕᐅᓕᕐᐳᖅ.

²² ᓂᐊᖁᖓᓂᓕ ᓄᔭᖏᑦ ᐱᕈᓕᕆᕗᑦ ᓴᓕᔭᐅᓚᐅᕐᑐᑦ.

ᓵᒻᓲᓂᐅᑉ ᑐᖁᓂᖓ

²³ ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑲᑎᓚᐅᕐᐳᑦ ᐱᕕᒡᔪᐊᒥᖕᓂᒃ ᑐᓂᕐᕈᓯᕆᐊᕐᑐᕐᓗᑎᒃ ᒎᑎᒥᖕᓄᑦ ᑍᒐᓂᒧᑦ, ᖁᕕᐊᓱᒋᐊᕐᑐᕐᓗᑎᒡᓗ ᐅᖃᓚᐅᕋᒥᒃ, “ᒎᑎᑦᑕ ᐊᑭᕋᕗᑦ ᓵᒻᓲᓂ ᑐᓂᓚᐅᕐᐹ ᐅᕙᑦᑎᓐᓄᑦ!”

²⁴ ᐃᓄᐃᓪᓗ ᑕᑯᒐᒥᑦᔪᒃ ᒎᑎᒥᖕᓂᒃ ᓂᕐᑐᐃᓕᕐᐳᑦ ᐅᖃᕐᓗᑎᒃ, “ᒎᑎᑦᑕ ᐊᑭᕋᕗᑦ ᑐᓂᓚᐅᕐᐰᑦ ᐅᕙᑦᑎᓐᓄᑦ, ᓄᓇᑦᑎᓐᓂᒃ ᐊᓯᕈᐃᓚᐅᕐᑐᖅ ᑐᖁᕅᓚᐅᕐᑐᕐᓗ ᐃᓅᖃᑎᑦᑎᓐᓂᒃ ᐅᓄᕐᑐᓂᒃ.”

²⁵ ᑍᒤᓚᐅᕐᐳᖅ ᐃᒥᕐᓂᕐᒧᑦ ᖁᕕᐊᓱᓕᕋᒥᒃ ᐅᖃᕐᐳᑦ, “ᓵᒻᓲᓂ ᕾᖁᔭᐅᓚᐅᕐᓕ, ᑕᑯᕋᓐᓈᕐᑎᓐᓂᐊᕐᒪᑎᒍᑦ.” ᑕᕝᕙ ᓵᒻᓲᓂ ᐂᔭᐅᕗᖅ ᑎᒍᔭᐅᒪᕕᖕᒥᑦ, ᑕᑯᕋᓐᓈᕐᑎᑉᐰᓪᓗ. ᓇᖏᕐᑎᑕᐅᓪᓗᓂᓗ ᓱᑬᑦ ᓇᐸᔪᑦ ᐊᑯᕐᖓᓐᓂ;

²⁶ ᓵᒻᓲᓂᓗ ᓄᑲᑉᐱᐊᒧᑦ ᑕᓯᐅᕐᑎᒥᓄᑦ ᐅᖃᕐᐳᖅ, “ᐂᑎᓚᐅᓐᖓ ᐊᒃᑐᐃᑎᓪᓗᖓᓗ ᑐᒃᓯᐊᕐᕕᐅᑉ ᑐᓐᖓᕕᖏᑕ ᓇᐸᔪᖏᓐᓂᒃ, ᐄᒐᖓᕝᕕᒋᔪᒪᒐᒃᑭᑦ.”

²⁷ ᑐᒃᓯᐊᕐᕕᒡᓗ ᑕᑕᑉᐳᖅ ᐊᖑᑎᓂᒃ ᐊᕐᓇᓂᒡᓗ. ᐱᓕᔅᑍᓂᒥᐅᓪᓗ ᐊᖓᔪᖅᑳᖏᓐᓂᒃ, ᐊᓯᖏᓪᓗ ᐊᖑᑏᑦ ᐊᕐᓁᓪᓗ ᖄᖓᓃᑦᑐᑦ 3,000 ᓵᒻᓲᓂᒥᒃ ᑕᑯᓐᓇᕐᑐᑦ ᑕᑯᓐᓇᕐᑎᑦᓯᑎᓪᓗᒍ.

²⁸ ᓵᒻᓲᓂ ᓂᓪᓕᐊᕗᖅ ᐊᑕᓂᕐᒧᑦ ᐅᖃᕐᓗᓂ, “ᐆ ᐊᑕᓃᖅ ᒎᑏ, ᐃᖅᑲᐅᒪᓚᐅᓐᖓ, ᑐᒃᓯᐊᕐᐳᖓ! ᓴᓐᖏᓂᕐᑖᕐᑎᓚᐅᓐᖓ, ᑐᒃᓯᐊᕐᕕᒋᕙᒋᑦ, ᓱᓕ ᐊᑕᐅᓯᐊᒃᑲᓐᓂᕐᓗᑎᑦ, ᐆ ᒎᑏ, ᐱᒋᐊᕐᓗᖓ ᐊᑕᐅᓯᐊᕐᓗᖓ ᐊᑭᔪᓐᓇᖁᓪᓗᖓ ᐱᓕᔅᑍᓂᒥᐅᓂᒃ ᐃᔩᒃᑲᒃ ᐱᓪᓗᒋᒃ!”

²⁹ ᓵᒻᓲᓂᐅᓪᓗ ᓱᑬᑦ ᓇᐸᔪᑦ ᐊᒃᑐᕐᐰᑦ ᑐᒃᓯᐊᕐᕕᐅᑉ ᑐᓐᖓᕕᖏᒃ, ᐊᒃᑐᐊᑦᓯᐊᕐᓗᒋᒡᓗ, ᐂᑉᐹ ᑕᓕᕐᐱᖕᒥᓄᑦ ᐂᑉᐹᓗ ᓴᐅᒥᖕᒥᓄᑦ.

³⁰ ᓵᒻᓲᓂᓗ ᐅᖃᕐᐳᖅ, “ᐱᓕᔅᑍᓂᒥᐅᑦ ᑐᖁᖃᑎᒋᓚᐅᕐᓚᒃᑲ!” ᐅᑯᓪᓗᓂᓗ ᐱᔪᓐᓇᕐᓂᓕᒫᒥᓄᑦ, ᐊᔭᒃᐹᒃ, ᐃᒡᓗᓗ ᑲᑕᒃᐳᖅ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓄᑦ ᐃᓄᓕᒫᓄᓪᓗ ᑕᕝᕙᓃᑦᑐᓄᑦ. ᑐᖁᒥᓂ ᑐᖁᑦᓯᓂᖓ ᐅᓄᕐᓂᕐᓴᐅᓚᐅᕐᐳᖅ ᐃᓅᓯᓕᒫᒥᓂ ᑐᖁᑦᓯᓂᕆᓚᐅᕐᑕᒥᓂᑦ.

³¹ ᖃᑕᓐᖑᑎᖏᑕ ᐊᑖᑕᖓᑕᓗ ᐃᒡᓗᒥᐅᖃᑎᓕᒫᖏᓐᓂᑦ ᐂᔭᐅᕗᖅ, ᐃᓗᕕᕐᐹᓪᓗ ᔫᕋᐅᑉ ᐃᔅᑕᐅᓪᓗ ᐊᑯᓐᓂᖓᓄᑦ ᐊᑖᑕᖓᑕ ᒪᓄᐊᑉ ᐃᓗᕕᖓᓂ. ᐊᕐᕌᒍᓂᒃ 20ᓂᒃ ᐃᓴᕆᐊᓕᒥᐅᓄᑦ ᐊᖓᔪᖅᑳᖑᓚᐅᕐᐳᖅ.