ᐃᓗᐊᕐᓮᔩᑦ ᐊᒡᓚᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᓵᒻᓲᓂᐅᑉ ᓵᓚᖃᕐᓂᖓ ᐱᓕᔅᑍᓂᒥᐅᓂᒃ

¹ ᑕᒪᑐᒪ ᑭᖑᓂᑲᓪᓚᖓᒍᑦ, ᓂᐊᖂᔭᒃᓴᓂᒃ ᑲᑎᕐᓱᐃᕕᒃ ᓇᓪᓕᐅᑎᑎᓪᓗᒍ, ᓵᒻᓲᓂ ᐳᓛᕆᐊᓚᐅᕐᐳᖅ ᓄᓕᐊᒥᓄᑦ ᒎᑦᓯᐅᑉ ᓄᕐᕋᖓᓂᒃ ᓇᒃᓴᕐᓗᓂ. ᐅᖃᕐᓗᓂ, “ᓄᓕᐊᕋ ᑕᑯᔭᕐᑐᕋᒃᑯ ᐃᒡᓗᕈᓯᖓᓄᑦ.” ᐊᕐᓇᐅᓪᓕ ᐊᑖᑕᖓᑕ ᐱᖁᓐᖏᓛ.

² ᐊᕐᓇᐅᓪᓕ ᐊᑖᑕᖓᑕ ᐅᖃᐅᑎᕚ, “ᐆᒥᓱᓪᓚᑦᑖᕋᓱᒋᓕᓚᐅᕐᐸᒋᑦ ᑖᑦᓱᒥᖓ; ᑍᒤᒻᒪᑦ ᑐᓂᓚᐅᕐᐸᕋ ᐱᖃᑎᖕᓄᑦ. ᓄᑲᖔ ᐱᐅᓂᕐᓴᐅᓐᖏᓛᖅ? ᑖᓐᓇ ᐱᖔᓚᐅᕈᒃ.”

³ ᓵᒻᓲᓂᐅᑉ ᐅᖃᐅᑎᕚ, “ᒫᓐᓇ ᐸᓯᔭᒃᓴᐅᓂᐊᓐᖏᓚᖓ ᐱᓕᔅᑍᓂᒥᐅᓄᑦ ᐱᕋᔭᒃᑲᓗᐊᕈᒃᑭᑦ!”

⁴ ᑕᕝᕙᓐᖓᓪᓗ ᓵᒻᓲᓂ ᐊᐅᓪᓚᕐᐳᖅ ᓂᒐᕐᑎᑦᓯᓪᓗᓂᓗ 300ᓂᒃ ᑎᕆᒐᓂᐊᓂᒃ, ᑖᒃᑯᐊ ᓇᒃᓴᕐᐰᑦ ᑎᒍᓯᓪᓗᓂ ᕿᔪᖕᓂᒃ ᓇᓂᕈᐊᓂᒃ, ᑎᕆᒐᓂᐊᓪᓗ ᒪᕐᕉᓈᕐᑎᕐᓗᒋᑦ ᐸᒥᐅᖏᑦ ᕿᓚᒃᓱᕐᐰᑦ, ᐸᒥᐅᖓᑕᓗ ᐊᑯᓐᓂᖏᑎᒍᑦ ᕿᔪᐃᑦ ᕿᓚᒃᓱᕐᓗᒋᑦ.

⁵ ᕿᔪᐃᓪᓗ ᐃᑭᑎᓐᓇᒥᒋᑦ ᑎᕆᒐᓂᐊᑦ ᐊᐅᓪᓚᕐᑎᑉᐰᑦ ᐱᓕᔅᑍᓂᒥᐅᑦ ᓂᐊᖂᔭᒃᓴᖁᑎᖏᓐᓄᑦ ᒪᑭᑕᔪᓄᑦ, ᓂᐊᖂᔭᒃᓮᓪᓗ ᑲᑎᕐᓱᕐᓯᒪᔪᑦ ᒪᑭᑕᔪᓪᓗ ᐃᑯᐊᓪᓚᒃᐳᑦ, ᓇᐹᕐᑐᐃᓪᓗ ᐅᕐᓱᒃᓴᓖᑦ ᐱᖃᓯᐅᑎᓪᓗᒋᑦ.

⁶ ᐱᓕᔅᑍᓂᒥᐅᑦ ᐅᖃᓕᕐᐳᑦ, “ᑭᓇᐅᑉ ᒪᓐᓇ ᐱᓂᐊᕐᓂᖔ?” ᑭᐅᔭᐅᕗᑦ, “ᓵᒻᓲᓂᐅᑉ, ᑎᒻᓁᑎᐅᑉ ᓂᖓᐅᖓᑕ, ᓄᓕᐊᖓ ᑐᓂᓚᐅᕐᒪᒍ ᐱᖃᑎᖓᓄᑦ.” ᑍᒤᒻᒪᑦ ᐱᓕᔅᑍᓂᒥᐅᑦ ᑖᑦᓱᒧᖓ ᐂᕗᑦ ᐊᕐᓇᕐᓗ ᐊᑖᑕᖓᓗ ᐃᑯᐊᓪᓚᒡᓗᒋᑦ.

⁷ ᓵᒻᓲᓂᐅᑉ ᐅᖃᐅᑎᕔᑦ, “ᑍᒤᓕᐅᕈᑦᓯ, ᓴᖑᑎᓐᓂᐊᓐᖏᑕᓐᓂᒃ ᐊᖏᕐᐳᖓ ᐊᑭᒋᐊᓛᕐᐸᑦᓯ, ᑭᖑᓂᐊᒍᓪᓗ ᓄᖅᑲᓛᕐᐳᖓ.”

⁸ ᑍᒤᒻᒪᑦ ᑐᖁᕋᕐᐰᑦ ᓂᑲᒍᓱᒐᓂ ᐅᓄᕐᑐᐊᓗᐃᑦ ᑐᖁᓪᓗᓂᒋᑦ, ᑭᖑᓂᐊᒍᑦ ᕾᕈᓱᖕᒧᐊᕐᐳᖅ ᐄᑖᒻᒦᑦᑐᒧᑦ ᕾᕐᑐᒧᑦ ᑕᕝᕙᓂᓗ ᐃᓂᖃᓕᕐᓗᓂ.

ᓵᒻᓲᓂᐅᑉ ᓵᓚᖃᕐᓂᖓ ᐱᓕᔅᑍᓂᒥᐅᓂᒃ

⁹ ᐱᓕᔅᑍᓂᒥᐅᓪᓗ ᐅᓇᑕᕆᐊᓚᐅᕐᐳᑦ ᑕᑉᐸᐅᖓ ᑕᖕᒫᕐᓗᑎᒡᓗ ᔫᑕᒥ, ᑲᑎᓪᓗᑎᒃ ᐅᓇᑕᕆᐊᕐᐳᑦ ᓕᕼᐃᒥᒃ.

¹⁰ ᔫᑕᐅᓪᓗ ᐃᓄᖏᑦ ᐅᖃᕐᐳᑦ, “ᖃᓄᐃᒻᒪᑦ ᐅᕙᑦᑎᓐᓂᒃ ᐅᓇᑕᕆᐊᕐᐱᓰ?” ᑖᒃᑯᐊ ᐅᖃᕐᐳᑦ, “ᓵᒻᓲᓂ ᕿᓚᒃᓱᕐᓗᒍ ᑎᒍᔭᕐᑐᕐᐸᕗᑦ, ᐅᕙᑦᑎᓐᓄᑦ ᐱᓂᐊᕐᓂᕆᓚᐅᑕᖓ ᒪᓕᒡᓗᒍ ᐱᓂᐊᕐᕕᒋᔪᒪᒐᑦᑎᒍ.”

¹¹ ᑕᕝᕙ ᔫᑕᐅᑉ ᐃᓄᖏᑦ 3,000ᓴᐃᑦ ᐃᑖᒻᒧᑦ ᕾᕐᑐᒧᑦ ᐂᕗᑦ, ᓵᒻᓲᓂᓗ ᐅᖃᐅᑎᓪᓗᒍ, “ᖃᐅᔨᒪᓐᖏᓚᑏᑦ ᐱᓕᔅᑍᓂᒥᐅᓄᑦ ᐊᐅᓚᑕᐅᒐᑦᑖ? ᖃᓄᐃᓕᐅᓚᐅᕐᓃᑦ ᐅᕙᑦᑎᓐᓄᑦ ᑎᑭᒻᒪᑦ?” ᐅᖃᐅᑎᕔᑦ, “ᐅᕙᓐᓄᑦ ᐱᓂᐊᕐᓂᕆᓚᐅᕐᑕᖏᑦ ᒪᓕᒡᓗᒋᑦ ᐱᓂᐊᕐᕕᒋᓚᐅᕐᐸᒃᑲ.”

¹² ᐅᖃᐅᑎᕚᑦ, “ᐃᓕᖕᓂᒃ ᕿᓚᒃᓱᐃᓗᑕ ᑎᒍᓯᔭᕐᑐᕐᐳᒍᑦ, ᑐᓂᓂᐊᕋᑦᑎᒋᑦ ᐱᓕᔅᑍᓂᒥᐅᓄᑦ.” ᓵᒻᓲᓂᐅᑉ ᐅᖃᐅᑎᕔᑦ, “ᐊᖏᕐᕕᒋᓯᓐᖓ ᐅᕙᓐᓂᒃ ᑐᖁᑦᓯᓂᐊᖏᓐᓂᕋᕐᓗᓯ.”

¹³ ᐅᖃᐅᑎᕚᑦ, “ᑐᖁᓐᓂᐊᓐᖏᓚᑦᑎᒋᑦ ᕿᓚᒃᓱᑐᐃᓐᓇᕐᓂᐊᕐᐸᑦᑎᒋᑦ ᑐᓂᓗᑎᓪᓗ ᑍᒃᑯᓄᖓ, ᐃᓕᖕᓂᒃ ᑐᖁᑦᓯᓂᐊᓐᖏᓚᒍᑦ.” ᑕᕝᕙ ᕿᓚᒃᓱᕐᐹᑦ ᐊᒃᓗᓈᓄᑦ ᓄᑖᓄᑦ ᐊᐅᓪᓚᕈᑎᓪᓗᒍᓗ ᑕᕝᕙᓐᖓᑦ.

¹⁴ ᓕᕼᐃᒧᐊᕋᒥᒃ ᐱᓕᔅᑍᓂᒥᐅᑦ ᐅᐸᒃᐹᑦ ᕾᒐᓛᕐᓗᑎᒃ; ᑕᕝᕙ ᐊᑕᓂᐅᑉ ᐊᓂᕐᓂᖓᑕ ᐱᔪᓐᓇᕐᓂᕐᔪᐊᖃᕐᓗᓂ ᑎᑭᑉᐹ, ᐊᒃᓗᓈᓪᓗ ᑕᓕᖏᖕᓂ ᕿᓚᒃᓱᕐᓯᒪᔪᑦ ᐃᕕᒃᑎᑐᑦ ᐃᑯᐊᓪᓚᒃᑕᐅᔪᑐᑦ ᑍᒤᓕᕐᐳᑦ, ᕿᓚᕈᑎᖏᑦ ᐊᐅᒃᓗᑎᒃ ᑕᓕᖏᖕᓂ.

¹⁵ ᓇᓂᓯᕗᖅ ᓯᐅᑎᖅᑯᕐᑐᔫᑉ ᐊᒡᓕᕈᐊᓂᒃ ᓄᑖᕕᓂᕐᒥᒃ, ᑎᒍᕚᓗ ᑐᖁᑦᓯᓪᓗᓂ ᑖᑦᓱᒧᖓ ᐊᖑᑎᓂᒃ 1,000ᓂᒃ.

¹⁶ ᓵᒻᓲᓂ ᐅᖃᕐᐳᖅ, “ᓯᐅᑎᖅᑯᕐᑐᔫᑉ ᐊᒡᓕᕈᐊᓄᑦ ᖃᓕᕇᑦ ᖃᓕᕇᓕᕐᐳᑦ, ᓯᐅᑎᖅᑯᕐᑐᔫᑉ ᐊᒡᓕᕈᐊᓄᑦ ᑐᖁᑦᓯᕗᖓ ᐊᖑᑎᓂᒃ 1,000ᓂᒃ!”

¹⁷ ᐅᖃᕇᕋᒥᓗ, ᐊᒡᓕᕈᖅ ᐃᒋᑉᐹ, ᓄᓇᓗ ᑍᔭᐅᓕᕐᐳᖅ ᕌᒪᑎ-ᓕᕼᐃᒥᒃ.

¹⁸ ᓵᒻᓲᓂᓕ ᐃᒥᕈᖕᓂᕐᒧᑦ ᖀᓕᕐᐳᖅ, ᐊᑕᓂᕐᒧᓪᓗ ᐅᖃᕐᐳᖅ, “ᐊᖏᔪᒥᒃ ᓵᓚᖃᕐᑎᓚᐅᕐᐸᕐᒪ, ᒫᓐᓇᓕ ᑐᖁᓂᐊᓕᕐᐳᖓ ᐃᒥᕈᖕᓂᕐᒧᑦ, ᑐᖁᔪᒃᓴᐅᕗᖔ ᑭᐱᔭᐅᓯᒪᖏᑦᑐᑦ ᐊᒡᒐᖏᓐᓅᑦ?”

¹⁹ ᒎᑎ ᓄᓇᒥᒃ ᐃᑎᕐᓴᒥᒃ ᖁᐱᓯᕗᖅ ᓖᕼᐃᒥ, ᑕᕝᕙᓐᖓᓪᓗ ᐃᒥᖅ ᑯᕕᓕᕐᐳᖅ, ᐃᒥᕋᒥᓗ ᓄᑭᖃᑦᓯᐊᓕᕐᐳᖅ, ᖃᓄᐃᑦᑐᓐᓃᕐᓗᓂᓗ. ᑖᓐᓇᓗ ᐊᑦᓯᕐᐹ ᐃᓐ-ᕼᐊᑯᐊᕆᒥᒃ, ᓕᕼᐃᒦᑦᑐᖅ ᓱᓕ ᐅᓪᓗᒥᒧᑦ.

²⁰ ᓵᒻᓲᓂ ᓯᕗᓕᕐᑎᐅᓚᐅᕐᐳᖅ ᐊᕐᕌᒍᓂᒃ 20ᓂᒃ ᐱᓕᔅᑍᓂᒥᐅᑦ ᐅᓪᓗᖏᓐᓂ.