ᐃᓗᐊᕐᓮᔩᑦ ᐊᒡᓚᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᓵᒻᓲᓂ ᐊᕐᓇᕐᓗ ᑎᒻᓇᒥᐅᑕᖅ

¹ ᐅᓪᓗᐃᑦ ᐃᓚᖓᓐᓂ ᓵᒻᓲᓂ ᑕᐅᓄᖓ ᑎᒻᓇᓕᐊᕐᐳᖅ, ᑎᒻᓇᒥᓗ ᑕᑯᓪᓗᓂ ᐱᓕᔅᑍᓂᒥᐅᑦ ᐊᕐᓇᖏᑕ ᐃᓚᖓᓐᓂᒃ.

² ᐊᖏᕐᕋᕋᒥᓗ ᐊᑖᑕᓂᓗ ᐊᓈᓇᓂᓗ ᐅᖃᐅᑎᕔᑦ, “ᐱᓕᔅᑍᓂᒥᐅᒥᒃ ᐊᕐᓇᕐᑕᖃᕐᐳᖅ ᑎᒻᓇᒥ ᑕᑯᔭᓐᓂᒃ. ᐂᓚᐅᕐᓯᒃᑯᒃ ᓄᓕᐊᕐᑖᕆᓂᐊᕋᒃᑯ.”

³ ᐊᑖᑕᖓᑕᓗ ᐊᓈᓇᖓᑕᓗ ᐊᐱᕆᕚ, “ᓇᓂᓯᓐᖏᓚᑏᑦ ᐊᕐᓇᒥᒃ ᐃᓚᕕᑦ ᐸᓂᖏᓐᓂᑦ, ᐃᓅᖃᑎᑦᑎᓐᓂᒡᓘᓐᓃᑦ ᓇᓪᓕᐊᓐᓂᑦ? ᑍᒫᒃ ᑭᐱᓯᒪᖏᑦᑐᓂᑦ ᐱᓕᔅᑍᓂᒥᐅᑕᕐᓂᑦ ᓄᓕᐊᓂᒋᐊᖃᕐᐲᑦ?” ᓵᒻᓲᓂᐅᓪᓕ ᐊᑖᑕᓂ ᐅᖃᐅᑎᕚ, “ᑍᓐᓇ ᐊᕐᓇᖅ ᐂᓚᐅᕈᒃ ᐱᐅᒋᒐᒃᑯ.”

⁴ ᐊᑖᑕᖓᓕ ᐊᓈᓇᖓᓗ ᖃᐅᔨᒪᓚᐅᓐᖏᓚᒃ ᐊᑕᓂᕐᒥᑦ ᑕᒪᓐᓇ ᐱᖕᒪᖔᑦ; ᑍᒤᑎᑦᓯᓚᐅᕐᒪᑦ ᐱᕕᒃᓴᓕᐅᕐᓗᓂ ᐱᓕᔅᑍᓂᒥᐅᓂᒃ ᐊᑭᓂᐊᕈᑎᒃᓴᒧᑦ. ᑍᑦᓱᒪᓂ ᐱᓕᔅᑍᓂᒥᐅᑦ ᐊᐅᓚᑦᓯᓚᐅᕐᒪᑕ ᐃᓴᕆᐊᓕᒥᐅᓂᒃ.

⁵ ᓵᒻᓲᓂ ᑕᐅᓄᓐᖓᓚᐅᕐᐳᖅ ᑎᒻᓇᒧᑦ ᐊᑖᑕᓂᓗ ᐊᓈᓇᓂᓗ ᐱᖃᑎᒋᓪᓗᒋᒃ ᑍᑯᓐᖓᐅᓪᓗᑎᒃ ᐱᕈᕐᓰᕕᒃᑰᓚᐅᕐᐳᑦ ᑎᒻᓇᒥ, ᑐᓵᓕᕐᐳᕐᓗ ᐱᕈᕋᑖᒥᒃ ᓛᔭᒥᒃ ᓂᓪᓕᐊᔪᒥᒃ.

⁶ ᑕᕝᕔᓐᓇᖅ ᐊᑕᓂᐅᑉ ᐊᓂᕐᓂᖓᑕ ᐱᔪᓐᓇᕐᓂᕐᔪᐊᖃᕐᓗᓂ ᑎᑭᑉᐹ, ᓛᔭᓗ ᐊᓕᒃᑐᕐᓗᒍ ᓲᕐᓗ ᒎᑦᓯᐅᑉ ᓄᕐᕋᖏᑦ ᐊᓕᒃᑐᕐᑕᐅᕙᖕᒪᑕ; ᓱᓇᒥᒃ ᑎᒍᒥᐊᓚᐅᓐᖏᓚᖅ, ᐊᑖᑕᓂᓕ ᐊᓈᓇᓂᓗ ᐱᓂᐊᕐᓂᕐᒥᓂᒃ ᐅᖃᐅᑎᓚᐅᓐᖏᓛᒃ.

⁷ ᑕᐅᓄᖓᓗ ᐂᓚᐅᕐᐳᖅ ᐊᕐᓇᒧᑦ ᐅᖃᖃᑎᒋᓪᓗᒍᓗ, ᑖᑦᓱᒪᓗ ᓵᒻᓲᓂ ᖁᕕᐊᓱᒃᑎᑉᐹ.

⁸ ᑭᖑᓂᖓᒍᓪᓕ ᓵᒻᓲᓂ ᐅᑎᕐᐳᖅ ᐂᓕᕐᓗᒍ; ᑍᑯᖓᓗ ᐂᓕᕐᓗᓂ ᐊᖅᑯᑎᐅᑉ ᓯᓚᑖᓄᐊᕐᐳᖅ ᑕᑯᔭᕐᑐᕐᓗᓂ ᓛᔭᒥᒃ ᑐᖁᓚᐅᕐᑕᒥᓂᒃ, ᑕᑯᓪᓗᓂᓗ ᑲᑎᓐᖓᔪᓂᒃ ᐃᒍᑦᓴᕐᓂᒃ ᓛᔭᐅᑉ ᑐᖁᖓᔫᑉ ᑎᒥᖓᑕ ᐃᓗᐊᓃᑦᑐᓂᒃ, ᕼᐊᓂᒥᒡᓗ.

⁹ ᕼᐊᓂᒥᒡᓗ ᐊᒡᒐᖕᒥᓄᑦ ᖃᓗᓯᕗᖅ ᓂᕆᓕᕐᓗᒍᓗ ᐱᓱᒡᓗᓂ. ᐊᑖᑕᒥᓄᐊᕋᒥ ᐊᓈᓇᒥᓄᓪᓗ, ᐂᑦᑐᕐᐹᒃ ᓂᕆᓪᓗᑎᒡᓗ, ᐅᖃᐅᑎᓇᒋᒃ ᕼᐊᓂ ᓛᔭᐅᑉ ᑐᖁᖓᔫᑉ ᑎᒥᖓᓂᑦ ᐱᓚᐅᕐᒪᖔᕐᒥᐅᒃ.

¹⁰ ᐊᑖᑕᖓᓗ ᐊᕐᓇᐅᑉ ᐃᒡᓗᖓᓄᐊᓚᐅᕐᐳᖅ, ᓵᒻᓲᓂᓗ ᓂᕆᕕᒃᔪᐊᕐᑎᑦᓯᓚᐅᕐᐳᖅ ᑍᑲᓂ; ᑍᒫᒃ ᐅᕕᒃᑬᑦ ᐊᖑᑏᑦ ᐱᐅᓯᖃᓚᐅᕐᒪᑕ.

¹¹ ᐃᓄᐃᓪᓗ ᑕᑯᒐᒥᑦᔪᒃ, ᑎᓕᓯᓚᐅᕐᐳᑦ ᐅᕕᒃᑲᓂᒃ ᐊᖑᑎᓂᒃ 30ᓂᒃ ᓇᔪᕐᑎᒋᓂᐊᕐᑕᖏᓐᓂᒃ.

¹² ᓵᒻᓲᓂᐅᑉ ᐅᖃᐅᑎᕔᑦ, “ᐅᖃᐅᑎᓚᐅᕐᓚᑦᓯ ᐅᖃᓐᖑᐊᕈᓯᕐᒥᒃ; ᑐᑭᖓ ᖃᐅᔨᔪᓐᓇᕈᑦᓯᐅᒃ ᐅᖃᐅᑎᓗᖓ, ᑐᑭᖓ ᖃᐅᔨᒍᑦᓯᐅᒃ, ᓂᕆᕕᒃᔪᐊᕐᓂᑦᑕ ᐅᓪᓗᐃᑦ ᐊᑯᓐᓂᖓᓂ, ᑐᓂᓂᐊᕐᐸᑦᓯ ᐃᓘᓐᓇᓯ ᖃᓪᓗᓈᕐᑕᑦᓯᐊᓂᒃ 30ᓂᒃ ᐊᓐᓄᕌᓂᒃ 30ᓂᒡᓗ ᐊᓐᓄᕌᓂᒃ ᓂᕆᕕᒃᔪᐊᕐᑐᕐᓯᐅᑎᓂᒃ.

¹³ ᖃᓄᕐᓕ ᑐᑭᖃᕐᒪᖔᑦ ᐅᖃᐅᑎᔪᓐᓇᖏᒃᑯᑦᓯᓐᖓ, ᑕᕝᕙ ᐅᕙᓐᓄᑦ ᑐᓂᓯᔭᕆᐊᖃᕐᓂᐊᕐᐳᓯ ᖃᓪᓗᓈᕐᑕᑦᓯᐊᓂᒃ 30ᓂᒃ ᐊᓐᓄᕌᓂᒡᓗ 30ᓂᒃ ᓂᕆᕕᒡᔪᐊᕐᑐᕐᓯᐅᑎᓂᒃ.” ᑕᕝᕙ ᐅᖃᐅᑎᕚᑦ, “ᐅᖃᓐᖑᐊᕈᓯᕐᒥᒃ ᐅᖃᐅᑎᓚᐅᕐᑎᒍᑦ, ᑐᓴᕐᓂᐊᕋᑦᑎᒍ.”

¹⁴ ᑕᕝᕙ ᐅᖃᐅᑎᕔᑦ, “ᓂᕆᔨᒥᑦ ᓂᕆᔭᒃᓴᖅ ᓴᖅᑭᑉᐳᖅ; ᓴᓐᖏᔪᒥᑦ ᓰᕐᓇᕐᑐᖅ ᓴᖅᑭᑉᐳᖅ.” ᐅᓪᓗᐃᑦ ᐱᖓᓱᑦ ᓈᑎᓪᓗᒋᑦ ᓱᓕ ᐅᖃᓐᖑᐊᕈᓯᐅᑉ ᑐᑭᖓᓂᒃ ᖃᐅᔨᓚᐅᓐᖏᓚᑦ.

¹⁵ ᐅᓪᓗᐃᑦ 7ᖓᓐᓂ ᐅᖃᓚᐅᕐᐳᑦ ᓵᒻᓲᓂᐅᑉ ᓄᓕᐊᖓᓄᑦ, “ᐅᐃᑦ ᓯᓔᕐᕆᓗᒍ ᐅᖃᐅᑎᓚᐅᕈᒃ ᐅᖃᖑᐊᕈᓯᐅᑉ ᑐᑭᖓᓂ. ᑍᒤᓕᐅᖏᒃᑯᕕᑦ, ᐊᑖᑕᕕᑦ ᐃᓪᓗᖓ ᐃᑯᐊᓪᓚᖕᓂᐊᕐᐸᕗᑦ ᐃᑯᐊᓪᓚᖃᑕᐅᓗᑎᑦ, ᕾᖁᔨᓚᐅᕐᐱᓰᒃ ᑎᒡᓕᒍᒪᓪᓗᓯᒃ ᐅᕙᑦᑎᓐᓂᑦ?”

¹⁶ ᓵᒻᓲᓂᐅᑉ ᓄᓕᐊᖓ ᓵᖓᓂ ᕿᐊᓪᓗᓂ ᐅᖃᐅᑎᕚ, “ᐆᒥᒋᒐᕕᖓ ᓇᒡᓕᒋᓇᖓ; ᓄᓇᖅᑲᑎᒃᑲ ᐅᖃᓐᖑᐊᕈᓯᕐᒥᒃ ᐅᖃᐅᑎᓚᐅᕐᐸᑎᑦ ᑐᑭᖓᓂᒡᓘᓐᓃᑦ ᐅᖃᐅᑎᓚᐅᖏᓐᓇᕕᖓ!” ᑕᕝᕙ ᐅᖃᐅᑎᕚ, “ᑕᑯᒋᑦ, ᐊᑖᑕᒐᓘᓐᓃ ᐊᓈᓇᒐᓘᓐᓃᑦ ᐅᖃᐅᑎᓚᐅᓐᖏᓚᒃᑲ, ᓱᖕᒪᓪᓕ ᐅᖃᐅᑎᔭᕆᐊᖃᕐᐸᒌᑦ?”

¹⁷ ᕿᐊᑦᔪᑎᒋᓚᐅᕐᐹᓕ ᐅᓪᓗᓂᒃ 7ᓂᒃ ᓂᕆᕕᒃᔪᐊᕐᓇᐅᑎᓪᓗᒍ. ᐅᓪᓗᐃᓪᓕ 7ᖓᓂ ᐅᖃᐅᑎᓚᐅᕐᐹ ᐅᖃᓐᖑᐊᕈᓯᐅᑉ ᑐᑭᖓᓂᒃ, ᐊᒃᓱᕉᑎᓚᐅᕐᒪᒍ ᑍᒪᓐᖓᑦ, ᐊᕐᓇᐅᑉ ᓄᓇᖃᑎᓂ ᐅᖃᐅᑎᓚᐅᕐᐰᑦ.

¹⁸ ᐊᖑᑎᓪᓗ ᐃᒡᓗᒐᓴᒡᔪᐊᕐᒥᐅᑦ ᐅᖃᐅᑎᓚᐅᕐᐹᑦ ᐅᓪᓗᐃᑦ 7ᖓᓂ, ᓯᕿᓂᖅ ᓂᐱᓚᐅᕐᑎᓐᓇᒍ ᓱᓕ, “ᓱᓈ ᓯᕐᓇᕐᓂᕐᓴᐅᕙ ᕼᐊᓂᒥᑦ? ᓱᓇᓘ ᓴᓐᖏᓂᕐᓴᐅᕙ ᓛᔭᒥᑦ?” ᓵᒻᓲᓂᐅᑉ ᐅᖃᐅᑎᕔᑦ, “ᐃᒧᒃᓯᐅᒐᖁᑎᓐᓂᒃ ᑲᒪᓚᐅᖏᒃᑯᑦᓯ, ᖃᐅᔨᒪᒐᔭᓐᖏᓚᓯ ᐅᖃᓐᖑᐊᕈᓯᕐᒪ ᑐᑭᖓᓂᒃ.”

¹⁹ ᑕᕝᕔᓐᓇᖅ ᐊᑕᓂᐅᑉ ᐊᓂᕐᓂᖓᑕ ᐱᔪᓐᓇᕐᑐᕐᔪᐊᖑᓪᓗᓂ ᑎᑭᑉᐹ, ᑕᐅᓄᖓᓗ ᐂᕗᖅ ᐊᓯᑭᓗᓂᒧᑦ, ᑕᕝᕙᓂᓗ ᐊᖑᑎᓂᒃ 30ᓂᒃ ᐃᒡᓗᒐᓴᒡᔪᐊᕐᒥᐅᓂᒃ ᑐᖁᑦᓯᓪᓗᓂ, ᐊᓐᓄᕅᔭᕐᐰᑦ, ᐊᓐᓄᕌᓪᓗ ᑐᓂᓪᓗᒋᑦ ᐊᖑᑎᓄᑦ ᐅᖃᓐᖑᐊᕈᓯᐅᑉ ᑐᑭᖓᓂᒃ ᓇᓚᐅᑦᓯᓚᐅᕐᑐᓄᑦ. ᐊᒃᓱᐊᓗᒃ ᓂᓐᖓᐅᒪᓪᓗᓂ ᐊᑖᑕᒥ ᐃᒡᓗᖓᓄᑦ ᐅᑎᕐᐳᖅ.

²⁰ ᓵᒻᓲᓂᐅᓪᓗ ᓄᓕᐊᖓ ᑐᓂᔭᐅᕗᖅ ᐊᖑᒻᒧᑦ ᐃᓚᒋᓚᐅᕐᑕᖓᓄᑦ ᑲᑎᑎᑕᐅᓪᓗᓂ ᓵᒻᓲᓂᐅᑉ ᐊᖑᑎᖁᑎᒋᓚᐅᕐᑕᖓᓄᑦ.