ᐃᓗᐊᕐᓮᔩᑦ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᓵᒻᓲᓂᐅᑉ ᐃᕐᓂᐊᖑᓂᖓ

¹ ᓱᓕ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐊᔪᕐᑐᓕᓚᐅᕐᐳᑦ ᐊᑕᓂᐅᑉ ᑕᒃᑯᐊᓂ, ᐊᑕᓂᐅᓪᓗ ᑐᓂᓚᐅᕐᐰᑦ ᐱᓕᔅᑍᓂᒥᐅᓄᑦ ᐊᕐᕌᒍᓄᑦ 40ᓄᑦ.

² ᐊᖑᑎᑕᖃᓚᐅᕐᐳᖅ ᔫᕋᒥᐅᑕᕐᒥᒃ, ᑖᓐ ᑭᖑᕚᖓᓂᒃ, ᒪᓄᐊᒥᒃ ᐊᑎᓕᖕᒥᒃ ᓄᓕᐊᖓᓗ ᕿᑐᕐᖏᓱᐃᑦᑑᓚᐅᕐᐳᖅ.

³ ᐊᑕᓂᐅᑉ ᐂᖏᓕᖓ ᐊᕐᓇᒧᑦ ᓴᖅᑭᑉᐳᖅ ᐅᖃᐅᑎᓪᓗᒍᓗ, “ᒫᓐᓇ ᕿᑐᕐᖏᓱᐃᑦᑑᒐᓗᐊᕐᑐᑎᑦ ᕿᑐᕐᖓᖃᕋᑎᓪᓗ, ᓯᖎᓕᕐᓂᐊᕐᐳᑎᓪᓕ ᐃᕐᓂᕐᑖᕐᓗᑎᓪᓗ.

⁴ ᒫᓐᓇᓕ, ᖃᐅᔨᓴᑦᓯᐊᕐᓂᐊᕐᐳᑎᑦ ᐃᒥᕐᑍᓕᓗᑎᑦ ᕔᓂᒥᒃ ᓴᓐᖏᓂᕐᓴᒥᒡᓘᓐᓃᑦ, ᓂᕆᔪᒃᓴᐅᓐᖏᓚᑎᓪᓗ ᓴᓗᒤᑦᑐᓂᒃ.

⁵ ᑕᑯᒋᑦ ᐃᕐᓂᕐᒥᒃ ᐃᕐᓂᔪᒫᕐᐳᑎᑦ, ᑭᑦᔭᐅᑎᒧᓪᓘᓐᓃᑦ ᓂᐊᖁᐊ ᐊᒃᑐᕐᑕᐅᔪᒫᓐᖏᓚᖅ, ᓱᕈᓯᐅᓂᕐᒥᓂᑦ ᓈᓴᕅᑎᐅᓛᕐᒪᑦ ᒎᑎᒧᑦ ᐃᕐᓂᐊᖑᓂᕐᒥᓂᑦ ᐱᓗᓂ; ᑖᑦᓱᒪᓗ ᐃᓴᕆᐊᓕᒥᐅᑦ ᓴᐳᑎᔪᒫᕐᐰᑦ ᐱᓕᔅᑍᓂᒥᐅᓂᑦ.”

⁶ ᑍᒤᒻᒪᑦ ᐊᕐᓇᐅᑉ ᐅᐃᓂ ᐅᖃᐅᑎᔭᕐᑐᕐᐹ, ᐅᖃᕐᓗᓂᓗ, “ᐊᖑᑎᒥᒃ ᒎᑎᒥᑦ ᐱᔪᒥᒃ ᕾᔪᖃᓚᐅᕐᐳᖅ ᐅᕙᓐᓄᑦ, ᑕᐅᑦᑐᐊᓗ ᐂᖏᓕᑐᑦ ᒎᑎᒥᑦ ᐱᔪᑐᑦ ᑍᒤᓪᓗᓂ, ᑲᒪᓇᕐᑑᓪᓗᓂ; ᐊᐱᕆᓚᐅᓐᖏᓚᕋᓕ ᓇᑭᑦ ᐱᖕᒪᖔᑦ, ᐊᑎᕐᒥᓂᒡᓗ ᐅᖃᐅᑎᓚᐅᓐᖏᓛᖓ.

⁷ ᐅᖃᐅᑎᓚᐅᕐᐹᖓᓕ, ‘ᑕᑯᒋᑦ, ᓯᖎᓕᕈᒫᕐᐳᑎᑦ ᐃᕐᓂᕐᑖᕐᓗᑎᓪᓗ, ᕔᓂᑐᖃᑦᑕᕐᓂᐊᓐᖏᓚᑎᑦ ᓴᓐᖏᓂᕐᓴᒥᒡᓘᓐᓃᑦ, ᓂᕆᓂᐊᕐᓇᒡᓗ ᓴᓗᒤᑦᑐᒥᒃ, ᑖᓐᓇ ᓱᕈᓯᖅ ᓈᓴᕅᑎᐅᓂᐊᕐᒪᑦ ᒎᑎᒧᑦ ᐃᓅᓕᕐᓂᕐᒥᓂᑦ ᑐᖁᓂᖓᑕ ᐅᓪᓗᖅ ᑎᑭᓪᓗᒍ.’”

⁸ ᑭᖑᓂᖓᒍᑦ ᒪᓄᐊ ᑐᒃᓯᐊᓚᐅᕐᐳᖅ ᐊᑕᓂᕐᒧᑦ, ᐅᖃᕐᓗᓂ, “ᐊᑕᓃᖅ, ᐊᖑᑦ ᑍᓐᓇ ᒎᑎᒥᓐᖔᕐᑐᖅ ᑎᓕᓚᐅᕐᑍᑦ ᕾᑎᒃᑲᓐᓂᓚᐅᕈᒃ, ᐃᓕᓐᓂᐊᕐᑎᑦᓯᖁᓪᓗᒍ ᖃᓄᐃᓕᐅᕐᑐᒃᓴᐅᓂᑦᑎᓐᓂᒃ ᓱᕈᓯᕐᒧᑦ ᐃᓅᓂᐊᕐᑐᒧᑦ.”

⁹ ᒎᑎᐅᓪᓗ ᒪᓄᐊᑉ ᓂᐱᖓ ᓈᓚᓚᐅᕐᐹ, ᒎᑎᐅᓪᓗ ᐂᖏᓕᖓ ᐊᕐᓇᒧᐊᓚᐅᕆᕗᖅ ᐃᒃᓯᕚᕐᑎᓪᓗᒍ ᐱᕈᕐᓰᕕᖕᒥ; ᒪᓄᐊᓕ ᐅᐃᓂ ᐱᖃᑎᒋᓚᐅᓐᖏᓛ.

¹⁰ ᐊᕐᓇᕐᓕ ᑐᐊᕕᕐᓗᓂ ᐅᓪᓚᒃᓯᓚᐅᕐᐳᖅ ᐅᐃᒥᓄᑦ ᐅᖃᕆᐊᕐᑐᕐᓗᓂ, ᐅᖃᐅᑎᓪᓗᒍᓗ, “ᑕᑯᒋᑦ ᐊᖑᑦ ᑍᓐᓇ ᕾᓚᐅᕐᑐᖅ ᑍᑦᓱᒪᓂ ᒫᓐᓇ ᓴᖅᑭᒃᑭᕗᖅ ᐅᕙᓐᓄᑦ!”

¹¹ ᐊᓱᐃᓛᒃ ᒪᓄᐊ ᓂᑯᕕᓪᓗᓂ ᓄᓕᐊᒥᓂᒃ ᒪᓕᒃᐳᖅ, ᐊᖑᒻᒧᐊᕋᒥᒡᓗ ᐅᖃᐅᑎᕚ, “ᑖᓐᓇᐅᕖᑦ ᐊᖑᑦ ᐅᖃᓚᐅᕐᑐᖅ ᐊᕐᓇᒧᑦ ᐆᒧᖔ?” ᑖᓐᓇ ᐅᖃᕐᐳᖅ, “ᑖᓐᓇᐅᕗᖓ.”

¹² ᒪᓄᐊ ᐅᖃᓕᕐᐳᖅ, “ᒪᓐᓇ ᐅᖃᐅᓯᕐᑎᑦ ᓱᓕᓕᕐᓕᑦ! ᓄᑲᑉᐱᐊᑉ ᐃᓅᓯᖓ ᖃᓄᐃᑦᑑᔪᒫᕐᐹ, ᓱᓇᒥᒡᓗ ᐱᓇᓱᐊᒐᖃᕈᒫᕐᐹ?”

¹³ ᐊᑕᓂᐅᓪᓗ ᐂᖏᓕᖓ ᐅᖃᕐᐳᖅ ᒪᓄᐊᒧᑦ, “ᐅᖃᐅᓯᕆᓚᐅᕐᑕᓕᒫᓐᓂᒃ ᑖᓐᓇ ᐊᕐᓇᖅ ᐃᒃᐱᒍᓱᑦᓯᐊᕐᓕ.

¹⁴ ᓂᕆᔪᒃᓴᐅᓐᖏᓚᖅ ᓇᐹᕐᑐᒥᑦ ᕔᓂᒃᓴᒥᑦ ᐱᔪᓂᒃ, ᐃᒥᕐᑐᒃᓴᐅᓇᓂᓗ ᕔᓂᒥᒃ ᓴᓐᖏᔪᒥᒃ, ᓂᕆᔪᒃᓴᐅᓐᖏᓚᕐᓗ ᓴᓗᒤᑦᑐᒥᒃ ᐱᖁᓯᒪᔭᓕᒫᓐᓂᒃ ᒪᓕᑦᓯᐊᕐᑐᒃᓴᐅᕗᖅ.”

¹⁵ ᒪᓄᐊ ᐅᖃᕐᐳᖅ ᐊᑕᓂᐅᑉ ᐂᖏᓕᖓᓄᑦ, “ᐅᕙᑦᑎᓐᓂᒃ ᐅᑕᖅᑭᑬᓐᓇᕆᑦ, ᓂᕿᓕᐅᕐᓂᐊᕋᑦᑕ ᒎᑦᓯᐅᑉ ᓄᕐᕋᖓᓂᒃ ᐃᓕᖕᓄᑦ.”

¹⁶ ᐊᑕᓂᐅᑉ ᐂᖏᓕᖓ ᒪᓄᐊᒧᑦ ᐅᖃᕐᐳᖅ, “ᐅᑕᖅᑭᑎᒃᑲᓗᐊᕈᕕᖓ ᓂᕿᖕᓂᒃ ᓂᕆᓂᐊᓐᖏᓚᖓ. ᑐᓂᕐᕈᓯᕈᕕᓪᓕ ᐃᑯᐊᓪᓚᒋᐊᓕᖕᒥᒃ ᐊᑕᓂᕐᒧᑦ ᑐᓂᕐᕈᓯᕐᑐᒃᓴᐅᕗᑎᑦ.” (ᒪᓄᐊ ᖃᐅᔨᒪᓚᐅᖏᒻᒪᑦ ᐊᑕᓂᕐᒧᑦ ᐂᖏᓕᒋᔭᐅᓂᖓᓂᒃ.)

¹⁷ ᒪᓄᐊ ᐅᖃᓕᕐᐳᖅ ᐊᑕᓂᐅᑉ ᐂᖏᓕᖓᓄᑦ, “ᑭᓇᐅᒐᕖᑦ? ᐅᖃᐅᓯᕐᑎᑦ ᓱᓕᓕᕐᐸᑕ ᐅᐱᒋᓛᕋᑦᑎᒋᑦ.”

¹⁸ ᐊᑕᓂᐅᓪᓗ ᐂᖏᓕᖓᑕ ᐅᖃᐅᑎᕚ, “ᖃᓄᐃᒻᒪᑦ ᐊᑎᓐᓂᒃ ᐊᐱᕐᓱᕐᐲᑦ, ᑕᑯᔧᑦ ᐱᐅᔪᐊᓘᑎᓪᓗᒎ?”

¹⁹ ᑍᒤᒻᒪᑦ ᒪᓄᐊ ᒎᑦᓯᐅᑉ ᓄᕐᕋᖓᓂᒃ ᓂᐊᖂᔭᒃᓴᒥᒡᓗ ᑐᓂᕐᕈᓯᓚᐅᕐᐳᖅ ᐊᑕᓂᕐᒧᑦ ᐅᔭᕋᐅᑉ ᖄᖓᓂ, ᑲᒪᓇᕐᑐᓕᓚᐅᕐᐳᕐᓗ ᒪᓄᐊᒃᑯᑦ ᓄᓕᐊᕇᒃ ᑕᑯᓐᓇᕐᑎᓪᓗᒋᒃ.

²⁰ ᐃᑯᒪ ᖁᒻᒧᐊᒃᑎᓪᓗᒍ ᕿᓚᖕᒧᑦ ᑐᓂᕐᕈᓯᕐᕕᖕᒥᑦ ᐊᑕᓂᐅᑉ ᐂᖏᓕᖓ ᐃᑯᒪᒧᑦ ᖁᒻᒧᐊᖃᑕᐅᕗᖅ ᑐᓂᕐᕈᓯᕐᕕᐅᑉ ᐃᑯᒪᖓᒍᑦ! ᒪᓄᐊᒃᑯᒃ ᓄᓕᐊᕇᒃ ᑕᒪᑐᒥᖓ ᑕᑯᒐᒥᒃ, ᐹᒻᒪᒃᐴᒃ ᑮᓇᑎᒃ ᒪᓂᖅᑲᒨᑦ ᐊᒃᑐᕐᑎᓪᓗᒋᒃ.

²¹ ᐊᑕᓂᐅᓪᓗ ᐂᖏᓕᖓ ᓴᖅᑭᒃᑲᓐᓂᕈᓐᓃᕐᒪᑦ ᒪᓄᐊᒃᑯᒃ ᓄᓕᐊᕇᒃ, ᖃᐅᔨᓕᕐᐴᒃ ᐊᑕᓂᐅᑉ ᐂᖏᓕᒋᖕᒪᒍ.

²² ᒪᓄᐊᓗ ᓄᓕᐊᒥᓄᑦ ᐅᖃᕐᐳᖅ, “ᑐᖁᓂᐊᓕᕐᐳᒍᒃ, ᒎᑎᒥᒃ ᑕᑯᓚᐅᕋᓐᓄᒃ!”

²³ ᓄᓕᐊᖓᑕᓕ ᐅᖃᐅᑎᕚ, “ᐊᑕᓂᐅᑉ ᑐᖁᑦᓱᒪᒃᐸᑎᒍᒃ, ᐃᑯᒪᒧᑦ ᑐᓂᕐᕈᑎᑦ ᓂᐊᖂᔭᕐᓗ ᓈᒻᒪᒋᒐᔭᕐᓂᓐᖏᓔᑦ ᑐᓂᕐᕈᑎᕗᒃ, ᐅᕝᕙᓘᓐᓃᑦ ᑕᑯᑎᒃᑲᔭᓚᐅᓐᖏᓛᑎᒍᒃ ᑕᒪᒃᑯᓂᖓ, ᐅᕝᕙᓘᓐᓃᑦ ᐅᖃᐅᑎᒐᔭᓚᐅᓐᖏᓛᑎᒍᒃ ᑕᒪᒃᑯᓂᖓ ᒫᓐᓇ.”

²⁴ ᐊᕐᓇᕐᓗ ᐃᕐᓂᑖᓚᐅᕐᐳᖅ ᐊᑦᓯᕐᓗᒍᓗ ᓵᒻᓲᓂᒥᒃ, ᓱᕈᓯᕐᓗ ᐱᕈᕐᐸᓪᓕᐊᓚᐅᕐᐳᖅ, ᐊᑕᓂᐅᓪᓗ ᓮᒻᒪᕐᑎᓚᐅᕐᐹ.

²⁵ ᐊᑕᓂᐅᓪᓗ ᐊᓂᕐᓂᖓᑕ ᐱᓇᓱᐊᕐᕕᒋᕙᓪᓕᐊᓚᐅᕐᐹ ᒪᕼᐊᓂ ᑖᓐᒥ ᔫᕋᐅᓪᓗ ᐃᔅᑕᐅᓪᓗ ᐊᑯᓐᓂᖓᓂ.