ᐃᓗᐊᕐᓮᔩᑦ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ1 ᔨᑉᑕ, ᐊᔪᖏᑦᑐᕐᔪᐊᖑᓪᓗᓂ ᐅᓇᑕᕐᑐᒃᓴᐅᓚᐅᕐᐳᖅ ᒋᓕᐊᑎᒥᐅᑕᖅ, ᐃᕐᓂᕆᔭᐅᓚᐅᕐᐳᖅ ᐊᕐᓇᒧ ᓄᓕᐊᒐᕐᒧᑦ, ᐊᑖᑕᖃᕐᓗᓂ ᒋᓕᐊᑎᒥ. 2 ᒋᓕᐊᑎ ᐃᕐᓂᕐᑖᕐᑐᓚᐅᕆᕗᖅ ᓄᓕᐊᒥᓂᑦ; ᐃᕐᓂᖏᓪᓗ ᐱᕈᕋᒥᒃ, ᔨᑉᑕ ᐊᐅᓪᓚᕐᑎᑉᐹᑦ ᐊᖏᕐᕋᒥᖕᓂᑦ; ᐅᖃᐅᑎᓪᓗᒍ, “ᑭᖑᕐᖑᑦᔨᓂᐊᓐᖏᓚᑎᑦ ᓱᓇᒥᒡᓘᓐᓃᑦ ᓯᕗᓕᑦᑕ ᐱᕕᓂᖏᓐᓂᑦ; ᐃᕐᓂᕆᔭᐅᒐᕕᑦ ᐊᕐᓇᒧᑦ ᐊᓯᐊᓄᑦ.” 3 ᔨᑉᑕ ᕿᒫᓚᐅᕐᐳᖅ ᐃᓚᒥᓂᑦ ᓄᓇᑖᕐᓗᓂᓗ ᑑᑉᒥ. ᑍᑲᓂᓗ ᑲᑎᔭᐅᕗᖅ ᓈᒻᒪᖏᑦᑐᓂᒃ ᐱᐅᓯᖃᕐᑐᓂᑦ, ᓇᒧᑐᐃᓐᓇᕐᓗ ᐂᖃᑎᒋᓪᓗᒋᑦ ᑎᒡᓕᒐᖃᑎᒋᕙᒃᐰᑦ. 4 ᑕᒪᑐᒪ ᑭᖑᓂᖓᒍᑦ ᐊᒧᓁᑎᒥᐅᑦ ᐅᓇᑕᕆᐊᓚᐅᕐᐳᑦ ᐃᓴᕆᐊᓕᒥᐅᓂᒃ. 5 ᐊᒧᓁᑎᑦ ᐅᓇᑕᕆᐊᕐᒪᑕ ᐃᓴᕆᐊᓕᒥᐅᓂᒃ, ᒋᓕᐊᑎᒥᐅᑦ ᐊᖓᔪᖅᑳᖏᑕ ᐂᕚᑦ ᔨᑉᑕ ᓄᓇᒥᑦ ᑑᑉᒥᑦ. 6 ᔨᑉᑕᓗ ᐅᖃᐅᑎᓪᓗᒍ, “ᕾᓗᑎᑦ ᓯᕗᓕᓚᐅᕐᑎᒍᑦ, ᐅᓇᑕᕈᓐᓇᖁᓪᓗᑕ ᐊᒧᓁᑎᒥᐅᓂᒃ.” 7 ᔨᑉᑕᓕ ᑭᐅᕗᖅ ᒋᓕᐊᑎᒥᐅᑦ ᐊᖓᔪᖅᑳᖏᓐᓄᑦ, “ᐅᕙᓐᓂᒃ ᐆᒥᓱᓚᐅᓐᖏᓚᓰ, ᐊᑖᑕᒪᓗ ᐃᒡᓗᖓᓂᑦ ᐊᐅᓪᓚᕐᑎᑦᓯᓚᐅᓐᖏᓚᓰ? ᓱᖕᒪᓪᓕ ᕾᓕᕐᐱᓯ ᐊᒃᓱᕈᓕᕋᑦᓯ?” 8 ᒋᓕᐊᑎᒥᐅᑦ ᐊᖓᔪᖅᑳᖏᑕ ᔨᑉᑕ ᐅᖃᐅᑎᕚᑦ, “ᑍᒫᒃ ᑕᕝᕙ ᐃᓕᖕᓄᐊᕐᐳᒍᑦ, ᒫᓐᓇ ᐃᓚᒋᓗᑕ ᐅᓇᑕᕆᐊᖃᑕᐅᖁᓪᓗᑎᑦ ᐊᒧᓁᑎᒥᐅᓂᒃ ᓯᕗᓕᕐᑎᐅᓕᖁᓪᓗᑎᓪᓗ ᒋᓕᐊᑎᒥ ᓄᓇᖃᕐᑐᓕᒫᓄᑦ.” 9 ᔨᑉᑕ ᐅᖃᕐᐳᖅ ᒋᓕᐊᑎᒥᐅᑦ ᐊᖓᔪᖅᑳᖏᓐᓄᑦ, “ᐅᑎᕐᑎᓐᓂᐊᕈᑦᓯᓐᖓ ᐊᖏᕐᕋᓐᓄᑦ ᐅᓇᑕᕆᐊᕐᓗᖓᓗ ᐊᒧᓁᑎᒥᐅᓂᒃ ᐊᑕᓂᐅᓪᓗ ᓵᓚᖃᕐᑎᑉᐸᖓ, ᐊᐅᓚᑦᓯᔨᐅᓕᕐᓂᐊᕐᐳᖓ ᐃᓕᑦᓯᓐᓄᑦ.” 10 ᑕᕝᕙ ᒋᓕᐊᑎᒥᐅᑦ ᐊᖓᔪᖅᑳᖏᑦ ᐅᖃᕐᐳᑦ ᔨᑉᑕᒧᑦ, “ᐊᖏᕐᐳᒍᑦ, ᐊᑕᓂᖅ ᑕᑯᓐᓇᕐᑎᒋᕙᕗᑦ ᐊᑯᓐᓇᑦᑎᓐᓂ, ᓱᓕᓗᑕ ᓈᓚᖕᓂᐊᕐᐳᒍᑦ ᐃᓕᖕᓂᒃ.” 11 ᑕᕝᕙ ᔨᑉᑕᐅᑉ ᐃᓚᒋᓕᕐᐰᑦ ᒋᓕᐊᑎᒥᐅᑦ ᐊᖓᔪᖅᑳᖏᑦ, ᐃᓄᖏᑦᑕᓗ ᐊᐅᓚᑦᓯᔨᓐᖑᕐᑎᑉᐹᑦ ᓯᕗᓕᕐᑎᒋᓕᕐᓗᒍᓗ; ᔨᑉᑕᐅᓪᓗ ᐊᖏᕈᑎᒋᔭᓂ ᓇᓗᓁᕐᐰᑦ ᐊᑕᓂᐅᑉ ᓵᖓᓂ ᒥᔅᐸᒥ. 12 ᔨᑉᑕ ᑎᓕᓯᓚᐅᕐᐳᖅ ᐅᖃᕆᐊᕐᑐᕐᑐᓂᒃ ᐊᒧᓁᑎᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᐅᑎᓪᓗᒍ, “ᓱᓇᒥᒃ ᐊᑭᕋᕐᑑᑎᒃᓴᖃᕐᐲᑦ ᐅᕙᑦᑎᓐᓄᑦ? ᓱᖕᒪᓪᓗ ᓄᓇᑦᑎᓐᓄᐊᕐᐲᑦ ᐅᓇᑕᕆᐊᕐᑐᕐᓗᑏᑦ?” 13 ᐊᖓᔪᖅᑳᕐᔪᐊᑉ ᐊᒧᓁᑎᒥᐅᑕᐅᑉ ᑭᐅᕔᑦ ᔨᑉᑕᐅᑉ ᐅᖃᕆᐊᕐᑐᕐᑎᖏᑦ, “ᐃᓴᕆᐊᓕᒥᐅᑦ ᐄᑦᔨᑉᑎᒥᓐᖔᕐᑎᓪᓗᒋᑦ ᐊᕐᓵᕐᓯᓚᐅᕐᒪᑕ ᓄᓇᖁᑎᑦᑎᓐᓂᒃ ᐋᕐᓄᓂᐅᑉ ᑰᖓᓂᑦ ᔭᐴᑉ ᑰᖓᓄᑦ ᑎᑭᓪᓗᒍ ᔪᐊᕐᑕᓂᐅᓪᓗ ᑰᖓ ᑎᑭᓪᓗᒍ; ᒫᓐᓇᓕ ᐅᓇᑕᕐᓂᒃᑰᖏᑦᑐᖅ ᐅᑎᕐᑎᓕᕐᓯᐅᒃ.” 14 ᔨᑉᑕᐅᓪᓗ ᐅᑎᕐᑎᓚᐅᕐᐰᑦ ᐅᖃᕆᐊᕐᑐᕐᑎᑕᓂ ᐊᒧᓁᑎᑦ ᐊᖓᔪᖅᑳᕐᔪᐊᖓᓄᑦ. 15 ᐃᒫᒃ ᐅᖃᐅᑎᓪᓗᒋᑦ, “ᐃᒫᒃ ᔨᑉᑕ ᐅᖃᕐᐳᖅ; ᐃᓴᕆᐊᓕᒥᐅᑦ ᐊᕐᓵᕐᓯᓚᐅᓐᖏᓚᑦ ᒧᐊᐱᐅᑉ ᓄᓇᖓᓂᒃ ᐅᕝᕙᓘᓐᓃᑦ ᐊᒧᓁᑎᑦ ᓄᓇᖓᓂᒃ. 16 ᐄᑦᔨᑉᑎᒥᓪᓕ ᑎᑭᓐᓇᒥᒃ, ᐃᓴᕆᐊᓕᒥᐅᑦ ᐃᖏᕐᕋᓚᐅᕐᐳᑦ ᐃᓄᖃᖏᑦᑐᒃᑯᑦ ᐃᒪᕐᔪᐊᕐᒧᑦ ᐊᐅᐸᓗᒃᑕᒧᑦ ᑎᑭᓪᓗᑎᒡᓗ ᑲᑎᓯᒧᑦ. 17 ᐃᓴᕆᐊᓕᒥᐅᑦ ᑍᑦᓱᒪᓂ ᐅᖃᕆᐊᕐᑐᕐᑐᓂᒃ ᑎᓕᓯᓚᐅᕐᐳᑦ ᐄᑐᒥᐅᑉ ᐊᖓᔪᖅᑳᕐᔪᐊᖓᓄᑦ, ᐅᖃᕐᓗᑎᒃ, ‘ᐃᓕᑦᓯᓐᓂᒃ ᖄᖏᕈᒪᒐᑦᑕ, ᕿᓄᔪᒍᑦ ᓄᓇᑦᓯᒎᕈᓐᓇᕐᑎᑕᐅᔪᒪᓪᓗᑕ.’ ᐄᑐᒥᐅᓪᓕ ᐊᖓᔪᖅᑳᕐᔪᐊᖓ ᓈᓚᒍᒪᓚᐅᓐᖏᓚᖅ, ᑍᒫᒃ ᓱᓕ ᑎᓕᓯᓚᐅᕆᕗᑦ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᓄᑦ, ᑖᓐᓇᑦᑕᐅᖅ ᐊᖏᓚᐅᖏᓐᓂᕗᖅ. ᑍᒤᒻᒪᑦ ᐃᓴᕆᐊᓕᒥᐅᑦ ᑲᑎᓯᒦᑐᐃᓐᓇᓚᐅᕐᐳᑦ. 18 ᐃᓄᖃᖏᑦᑐᒃᑯᓪᓕ ᐃᖏᕐᕋᓚᐅᕐᐳᑦ, ᓂᒍᕐᓗᑎᒃ ᐄᑐᒥᐅᑉ ᓄᓇᖓᓂᒃ ᒧᐊᐱᐅᓪᓗ ᓄᓇᖓᓂᒃ, ᒧᐊᐱᐅᑉ ᓯᕿᓐᓂᓕᕐᕕᐊᑕ ᓇᓛᓄᑦ ᑎᑭᓪᓗᑎᒃ, ᐋᕐᓄᓂᐅᑉ ᑰᖓᑕ ᐊᑭᐊᓂ ᑕᖕᒫᓚᐅᕐᐳᑦ. ᒧᐊᐱᒥᐅᑦ ᓄᓇᖁᑎᖓ ᐃᑎᕐᕕᒋᓚᐅᓐᖏᓛᑦ, ᐋᕐᓄᓂᐅᑉ ᑰᖓ ᐃᑳᓚᐅᓐᖏᓛᑦ ᒧᐊᐱᒥᐅᑦ ᓄᓇᖁᑎᖓᑕ ᑭᒡᓕᒋᓚᐅᕐᒪᒍ. 19 ᑍᒪᓗ ᐃᓴᕆᐊᓕᒥᐅᑦ ᐅᖃᕆᐊᕐᑐᕐᑐᓂᒃ ᑎᓕᓯᓚᐅᕐᐳᑦ ᐊᖓᔪᖅᑳᕐᔪᐊᕐᒧᑦ ᓮᕼᐆᓂᒧᑦ ᐊᒧᕅᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᕼᐃᓴᐸᓂᒥ ᓄᓇᖃᕐᑐᒧᑦ, ᐅᖃᐅᑎᓪᓗᒍᓗ, ‘ᓄᓇᑦᓯᒍᑦ ᐊᖅᑯᓵᕈᓐᓇᕐᑎᓚᐅᕐᑎᒍᑦ ᓄᓇᒃᓴᑦᑎᓐᓄᓐᖓᐅᑎᓪᓗᑕ.’ 20 ᓮᕼᐆᓂᐅᓪᓕ ᐃᓴᕆᐊᓕᒥᐅᑦ ᐅᒃᐱᕆᓚᐅᓐᖏᓔᑦ ᓄᓇᖁᑎᒥᒍᑦ ᐊᖅᑯᓵᖁᓇᒋᑦ; ᐅᓇᑕᕐᑐᒃᓴᖁᑎᓕᒪᓂᓕ ᑲᑎᓚᐅᕐᐰᑦ, ᑕᖕᒫᕐᓗᑎᒡᓗ ᔧᕼᐋᓯᒧᑦ, ᐅᓇᑕᕆᐊᕐᓗᑎᒡᓗ ᐃᓴᕆᐊᓕᒥᐅᓂᒃ. 21 ᐊᑕᓂᐅᓪᓕ, ᐃᓴᕆᐊᓕᐅᑦ ᒎᑎᖓᑕ ᓵᓚᖃᕐᑎᓚᐅᕐᐰᑦ ᓮᕼᐆᓂᒥᒃ ᐅᓇᑕᕐᑐᒃᓴᖏᓐᓂᒡᓗ; ᑖᒃᑯᓂᖓᓗ ᓵᓚᖃᓚᐅᕐᐳᑦ. ᑍᒤᒻᒪᑦ ᐃᓴᕆᐊᓕᒥᐅᑦ ᓄᓇᑖᕆᓚᐅᕐᐹᑦ ᐋᒧᕅᑎᒥᐅᑦ ᓄᓇᖁᑎᓕᒫᖓᑦ. ᐊᒧᕅᑎᑦ ᓄᓇᖃᕐᕕᒋᓚᐅᕐᑕᖓᑦ. 22 ᓄᓇᖁᑎᑖᕆᓚᐅᕐᐹᓪᓗ ᐊᒧᕅᑎᒥᐅᑦ ᓄᓇᖁᑎᖓ ᐋᕐᓄᓂᒥᑦ ᐱᒋᐊᕐᓗᒍ ᔭᐴᒃ ᑎᑭᓪᓗᒍ, ᐃᓄᖃᖏᑦᑐᒥᓪᓗ ᐱᒋᐊᕐᓗᒍ ᔪᐊᕐᑕᓂᐅᑦ ᑰᖓ ᑎᑭᓪᓗᒍ. 23 ᑍᒤᒻᒪᑦ ᐊᑕᓂᐅᑉ, ᐃᓴᕆᐊᓕᒥᐅᑦ ᒎᑎᖓᑦᑕ, ᓯᖏᓚᐅᕐᐰᑦ ᐊᒧᕅᑎᒥᐅᑦ ᐃᓄᖁᑎᓂ ᐃᓴᕆᐊᓕᒥᐅᑦ ᓵᖓᓐᓂ; ᑖᒃᑯᓂᖓ ᓵᓚᖃᕈᒪᓕᕐᐱᓰ? 24 ᓄᓇᖁᑎᑖᕆᔪᒪᓐᖏᓚᓯᐅᒃ ᑭᒨᓯᐅᑉ ᒎᑎᓐᖑᐊᑦᓯ ᓄᓇ ᑐᓃᓚᐅᕐᑕᖓ ᐃᓕᑦᓯᓐᓄᑦ? ᐅᕙᒍᓪᓕ ᐱᓯᒤᓐᓇᕐᓂᐊᕆᕙᕗᑦ ᐊᑕᓂᐅᑉ, ᒎᑎᑦᑕ ᐊᕐᓵᕐᓯᑦᔪᑎᒋᓚᐅᕐᑕᖓ ᐅᕙᑦᑎᓐᓄᑦ ᑐᓂᓪᓗᒍ. 25 ᐱᔪᓐᓇᕐᓂᕐᓴᐅᕕᓰ ᐰᓚᒃᒥᑦ, ᔨᐴᕆᐅᑉ ᐃᕐᓂᖓᓂᑦ, ᒧᐊᐱᐅᑉ ᐊᖓᔪᖅᑳᕐᔪᐊᖓᓐᓂᑦ? ᐅᓇᖕᒥᓱᓚᐅᕐᓯᒪᕚ ᐃᓴᕆᐊᓕᒥᐅᓂᒃ, ᐅᕝᕙᓘᓐᓃᑦ ᐅᓇᑕᖃᑎᖃᓚᐅᕐᓯᒪᕚ ᑖᒃᑯᓂᖓ? 26 ᐊᕐᕌᒍᓂᒃ 300ᓂᒃ ᐃᓴᕆᐊᓕᒥᐅᑦ ᓄᓇᖃᓕᕐᒪᑕ ᕼᐃᓴᐸᓂᒥᒃ ᐊᕈᐃᕆᒥᓗ ᓄᓇᓕᖁᑎᖏᓐᓂᓗ, ᐃᒡᓗᒐᓴᓕᒫᓂᓗ ᐋᕐᓄᓂᐅᑉ ᑰᖓᑕ ᑭᒡᓕᖓᓃᑦᑐᓂᒃ, ᓱᖕᒪᓪᓕ ᐅᑎᕐᑎᑦᓯᓚᐅᕐᓯᒪᓐᖏᓚᓯ ᑍᒪᓐᖓᓂᑦ? 27 ᑍᒤᒻᒪᑦ ᐊᔪᕐᑐᓕᓚᐅᓐᖏᓚᒍᑦ ᐃᓕᑦᓯᓐᓄᑦ, ᑕᒻᒪᕐᐳᑎᑦ ᐅᓇᑕᕋᓱᐊᕋᕕᑦ ᐅᕙᑦᑎᓐᓂᒃ. ᐊᑕᓂᖅ ᐃᖅᑲᕐᑐᐃᔨ ᑖᓐᓇ ᑐᑭᑖᕐᓂᐊᕐᐳᖅ ᐅᓪᓗᒥ ᓇᓪᓕᐊᓐᓄᑦ ᐃᓴᕆᐊᓕᒥᐅᑦ ᐃᓄᖏᓐᓄᓪᓘᓐᓃᑦ ᐅᕝᕙᓘᓐᓃᑦ ᐊᒧᓁᑎᒥᐅᓄᑦ.” 28 ᐊᒧᓁᑎᒥᐅᓪᓕ ᐊᖓᔪᖅᑳᕐᔪᐊᖓᑦ ᓈᓚᓚᐅᓐᖏᓚᖅ ᔨᑉᑕᐅᑉ ᑎᓕᓯᓪᓗᓂ ᐅᖃᐅᓯᖏᓐᓂᒃ. 29 ᐊᑕᓂᐅᓪᓕ ᐊᓂᕐᓂᖓᑕ ᑎᑭᑉᐹ ᔨᑉᑕ. ᐂᕗᕐᓗ ᒋᓕᐊᑎᒧᑦ ᒫᓇᓯᒧᓪᓗ ᑲᔪᓯᓪᓗᓂ ᒥᔅᐱᒧᑦ ᒋᓕᐊᑎᒦᑦᑐᒧᑦ ᑕᕝᕙᓐᖓᓪᓗ ᑲᔪᓯᓪᓗᓂᓗ ᐊᒧᓁᑎᓄᑦ. 30 ᔨᑉᑕᓗ ᐊᖏᒻᒪᕆᒃᐳᖅ ᐊᑕᓂᕐᒧᑦ: “ᓵᓚᖃᕐᑎᓐᓂᐊᕈᕕᖓ ᐊᒧᓁᑎᒥᐅᓂᒃ, 31 ᑐᓂᕐᕈᓯᕐᓂᐊᕐᐳᖓ ᐃᓄᖕᒥᒃ ᐃᒡᓗᓐᓂᑦ ᓯᕗᓪᓕᕐᐸᐅᓗᓂ ᐅᒃᑯᐊᑎᒍᑦ ᐊᓂᔪᒥᒃ, ᓂᐅᕝᕕᐅᕆᐊᕐᑐᒥᒃ ᐅᕙᓐᓂᒃ, ᐅᑎᕈᒪ ᓵᓚᖃᕐᓯᒪᓗᖓ ᐊᒧᓁᑎᓂᒃ. ᑍᓐᓇ ᐃᓄᒃ ᐊᑕᓂᐅᑉ ᐱᒋᓂᐊᕐᐹ, ᑐᓂᕐᕈᑎᒋᓂᐊᕐᐸᕋᓗ ᑖᑦᓱᒧᖓ ᐃᑯᐊᓚᑦᓯᓂᒃᑯᑦ.” 32 ᔨᑉᑕᓗ ᐃᑳᓚᐅᕐᐳᖅ ᑰᒃᑯᑦ ᐅᓇᑕᕆᐊᕐᓗᓂ ᐊᒧᓁᑎᒥᐅᓂᒃ, ᐊᑕᓂᐅᓪᓗ ᓵᓚᖃᕐᑎᑉᐹ. 33 ᐅᓇᑕᓯᒋᐊᓚᐅᕐᐰᑦ ᐊᕈᐃᕆᒥᑦ ᒥᓂᑎ ᓄᓇᐅᑉ ᐃᓚᖓᓄᑦ, ᐃᒡᓗᒐᓮᑦ 20, ᐊᐱᐅᓪ-ᑭᕋᒥᓐ ᑎᑭᓪᓗᒍ. ᑐᖁᕅᓂᕐᔪᐊᖃᕐᐳᖅ ᐊᒧᓁᑎᓪᓗ ᓵᓚᐅᕗᑦ ᐃᓴᕆᐊᓕᒥᐅᓄᑦ. ᔨᑉᑕᐅᑉ ᐸᓂᖓ 34 ᔨᑉᑕ ᐊᖏᕐᕋᒥᓄᑦ ᐅᑎᕋᒥ ᒥᔅᐸᒧᑦ; ᐸᓂᖓ ᐊᓂᓚᐅᕐᐳᖅ ᓂᐅᕝᕕᐅᕆᐊᕐᓗᓂ, ᑖᓂᓯᕐᓗᓂ ᐊᕕᓗᕋᐅᑎᒥᒡᓗ ᑎᒍᒥᐊᕐᓗᓂ. ᑖᓐᓇᓗ ᕿᑐᕐᖓᑐᐊᕆᓚᐅᕐᐹ. 35 ᑕᑯᒐᒥᐅᒡᓗ ᐊᓐᓄᕌᓂ ᐊᓕᒃᐰᑦ ᕿᒃᓵᖕᓂᕐᒧᑦ ᐅᖃᕐᓗᓂᓗ, “ᐸᓃᒃ, ᑲᑕᒃᑎᕐᔪᐊᕐᐸᕐᒪ, ᐃᕝᕕᓪᓗ ᐱᓪᓗᑎᑦ ᐃᓱᒪᔮᕈᑎᖃᕐᐳᖓ; ᐊᖏᒻᒪᕆᒍᑎᖃᓚᐅᕋᒪ ᐊᑕᓂᕐᒧᑦ, ᐊᖏᕈᑎᒐᓗ ᐅᑎᕐᑎᑦᓱᓐᓇᓐᖏᓚᕋ!” 36 ᐸᓂᖓᑕᓗ ᐅᖃᐅᑎᕚ, “ᐊᖏᒻᒪᕆᒍᑎᖃᓚᐅᕈᕕᑦ ᐊᑕᓂᕐᒧᑦ, ᑲᔪᓯᓕᕆᑦ ᐊᖏᒻᒪᕆᒍᑎᒋᓚᐅᕐᑕᕐᓂᒃ, ᐊᑕᓂᐅᑉ ᓵᓚᖃᕐᑎᓚᐅᕐᒪᑎᑦ ᐊᑭᕋᕐᓂᒃ, ᐊᒧᓁᑎᒥᐅᓂᒃ.” 37 ᐊᑖᑕᓂᓕ ᐊᐱᕆᕚ, “ᐊᑕᐅᓯᕐᒥᒡᓕ ᐱᓇᓱᐊᖁᕙᒋᑦ ᐅᕙᓐᓄᑦ. ᑲᒪᒋᓐᖏᓚᐅᑲᓐᖓ ᑕᖀᖕᓂᒃ ᒪᕐᕉᖕᓂᒃ, ᐃᓱᒤᓐᓇᕐᕆᓚᐅᑲᒍᒪᕗᖓ ᖃᖅᑲᓂ ᕿᒃᓴᐅᑎᒋᓗᒍᓗ ᐅᐃᒡᒐᓲᓗᖓ ᐱᖃᑎᒃᑲ ᐱᖃᑎᒋᓗᒋᑦ.” 38 ᐊᑖᑕᖓᑕ ᐅᖃᐅᑎᕚ, “ᐊᐅᓪᓚᓕᕆᑦ.” ᐊᐅᓪᓚᕐᑎᑉᐹᓗ ᑕᖅᑮᖕᓂᒃ ᒪᕐᕉᖕᓂᒃ; ᐊᐅᓪᓚᕐᐳᕐᓗ, ᐱᖃᑎᓂ ᐱᖃᑎᒋᓪᓗᒋᑦ, ᕿᒃᓴᐅᑎᖃᕆᐊᕐᑐᕐᓗᑎᒃ ᖃᖅᑲᓂ ᑐᖁᓂᐊᕐᓂᕐᒥᓂᒃ ᐅᐃᖃᖏᓪᓗᓂ. 39 ᑕᖅᑮᒃ ᒪᕐᕉᒃ ᐊᓂᒍᕐᒪᑎᒃ ᐊᑖᑕᒥᓄᑦ ᐅᑎᓚᐅᕐᐳᖅ. ᐊᖏᕈᑎᒋᓚᐅᕐᑕᓂᓗ ᐊᑕᓂᕐᒧᑦ ᒪᓕᒡᓗᒍ ᑲᔪᓯᕗᖅ, ᑖᓐᓇᓗ ᑐᖁᓚᐅᕐᐳᖅ ᐅᐃᒡᒐᓲᖏᓐᓇᕐᓗᓂ. ᑕᒪᓐᓇ ᐱᐅᓯᐅᓕᓚᐅᕐᐳᖅ ᐃᓴᕆᐊᓕᒥᐅᓂᑦ. 40 ᐃᓴᕆᐊᓕᒥᐅᑦ ᐸᓂᖏᑦ ᐊᕐᕌᒍᑕᒫᑦ ᕿᒃᓵᒍᑎᖃᕆᐊᕐᑐᕐᐸᓚᐅᕐᐳᑦ ᔨᑉᑕᐅᑉ ᐸᓂᖓ ᐱᓪᓗᒍ ᒋᓕᐊᑎᒥᐅᖅ ᐅᓪᓗᓂᒃ ᓯᑕᒪᓂᒃ ᐊᕐᕌᒍᑕᒫᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society