ᐃᓗᐊᕐᓮᔩᑦ ᐊᒡᓚᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᑑᓚ

¹ ᐊᐱᒥᓕᑭᐅᑉ ᑐᖁᓂᖓᑕ ᑭᖑᓂᐊᒍᑦ ᑑᓚ, ᐳᕙᐅᑉ ᐃᕐᓂᖓ ᑐᑑᑉ ᐃᕐᖑᑕᖓ, ᓴᐳᑦᔨᒋᐊᕐᑐᓚᐅᕐᐳᖅ ᐃᓴᕆᐊᓕᒥᐅᓂᒃ. ᑖᓐᓇ ᐃᓴᑳᕆᐅᑉ ᑭᖑᕚᖓ ᓄᓇᖃᕐᑐᖅ ᓴᒥᕆᐅᑉ ᖃᖅᑲᖓᓂ ᐃᕗᕅᒻ ᓄᓇᖓᓂ.

² ᑖᓐᓇ ᐃᓴᕆᐊᓕᒥᐅᓄᑦ ᑕᓯᐅᕐᑎᐅᓚᐅᕐᐳᖅ ᐊᕐᕌᒍᓂᒃ 23ᓂᒃ. ᑐᖁᖕᒪᓪᓗ ᐃᓗᕕᕐᑕᐅᕗᖅ ᓴᒥᕆᒥ.

³ ᑑᓚᐅᑉ ᑭᖑᓂᖓᓂ ᓴᖅᑭᑉᐳᖅ ᔧᕆ ᒋᓕᐊᑎᒥᐅᑕᖅ, ᑕᓯᐅᕐᑎᐅᓚᐅᕐᐳᖅ ᐃᓴᕆᐊᓕᒥᐅᓄᑦ ᐊᕐᕌᒍᓂᒃ 22ᓂᒃ.

⁴ ᐃᕐᓂᖃᓚᐅᕐᐳᖅ 30ᓂᒃ ᓯᐅᑎᖅᑯᕐᑐᔪᖁᑎᖃᓚᐅᕐᑐᖅ ᐃᑭᒪᕝᕕᖕᒥᓂᒃ 30ᓂᒃ. 30ᓂᒡᓗ ᐃᒡᓗᒐᓴᖃᓚᐅᕐᐳᖅ ᒋᓕᐊᑎᑦ ᓄᓇᖓᓂ, ᓱᓕ ᑍᔭᐅᔪᑦ ᔧᕆᐅᑉ ᓄᓇᓕᖁᑎᖏᓐᓂᒃ.

⁵ ᔧᕆ ᑐᖁᓚᐅᕐᐳᖅ ᐃᓗᕕᕐᑕᐅᓪᓗᓂᓗ ᑲᒪᓐ-ᒥ.

ᔨᑉᑕ

⁶ ᐃᓴᕆᐊᓕᒥᐅᑦ ᓱᓕ ᐊᔪᕐᑐᓕᓚᐅᕆᕗᑦ ᐊᑕᓂᕐᒧᑦ ᑐᓯᐊᕐᓂᕐᒥᖕᓄᑦ ᐰᓕᒧᑦ ᐋᔅᑕᕉᑎᒧᓪᓗ, ᒎᑎᖃᕐᓂᕐᒥᖕᓄᑦ, ᓯᕆᐊᒥᐅᓪᓗ ᒎᑎᓐᖑᐊᖏᓐᓂᒃ, ᓮᑐᓂᒥᐅᓪᓗ ᒎᑎᓐᖑᐊᖏᓐᓂᒃ, ᒧᐊᐱᒥᐅᓪᓗ ᒎᑎᓐᖑᐊᖏᓐᓂᒃ, ᐊᒧᓁᑎᒥᐅᓪᓗ ᒎᑎᓐᖑᐊᖏᓐᓂᒃ, ᐱᓕᔅᑍᓂᒥᐅᓪᓗ ᒎᑎᓐᖑᐊᖏᓐᓂᒃ. ᐊᑕᓂᕐᒥᒃ ᕿᒤᓚᐅᕐᐳᑦ ᑐᒃᓯᐊᕐᕕᒋᔪᓐᓁᕐᓗᒍᓗ.

⁷ ᐊᑕᓂᐅᓪᓕ ᓂᓐᖓᑎᐅᓚᐅᕐᐰᑦ ᐃᓴᕆᐊᓕᒥᐅᑦ, ᐱᓕᔅᑍᓂᒥᐅᓄᓪᓗ ᐊᒧᓁᑎᓄᓪᓗ ᓵᓚᐅᑎᓚᐅᕐᐰᑦ.

⁸ ᐊᕐᕌᒍᓂᒃ 18ᓂᒃ ᐊᒃᓱᕈᕐᑎᑉᐰᑦ ᐊᑭᕋᕐᑐᕐᓗᒋᓪᓗ ᐃᓴᕆᐊᓕᒥᐅᑦ ᓄᓇᖃᕐᑐᓕᒫᑦ ᐊᒧᕅᑎᑦ ᓄᓇᖏᓐᓂ ᔪᐊᕐᑕᓂᐅᑉ ᑰᖓᓂᑦ ᓯᕿᓂᐅᑉ ᓂᐱᕕᐊᑕ ᓇᓛᓂ ᓄᓇᖃᕐᑐᑦ ᒋᓕᐊᑎᒥ.

⁹ ᐊᒧᓁᑎᑦ ᐊᒡᓛᑦ ᐃᑳᓚᐅᕐᐳᑦ ᔪᐊᕐᑕᓂᐅᑉ ᑰᖓᓂᒃ ᐅᓇᑕᕆᐊᕐᓗᑎᒃ ᔫᑕᐅᑉ ᑭᖑᕚᖏᓐᓂᒃ, ᐱᓐᔭᒥᓂᐅᓪᓗ ᑭᖑᕚᖏᓐᓂᒃ, ᐃᕗᕅᑎᒥᐅᓪᓗ ᑭᖑᕚᖏᓐᓂᒃ. ᐃᓴᕆᐊᓕᒥᐅᑦ ᖁᕕᐊᓇᖏᑦᑐᒃᑰᕐᑎᑕᐅᓚᐅᕐᐳᑦ.

¹⁰ ᐃᓴᕆᐊᓕᒥᐅᑦ ᐃᓗᖏᕐᓱᕐᓗᑎᒃ ᑐᒃᓯᐊᕐᓂᖃᓕᓚᐅᕐᐳᑦ ᐊᑕᓂᕐᒧᑦ ᐅᖃᕐᓗᑎᒃ, “ᐊᔪᕐᑐᓕᓚᐅᕐᐳᒍᑦ ᐃᓕᖕᓄᑦ, ᕿᒤᓚᐅᕋᑦᑕ ᐃᓕᖕᓂᒃ ᐊᑕᓃᖅ, ᑐᒃᓯᐊᕐᐸᓕᕐᓗᑕ ᐰᓕᒧᑦ.”

¹¹ ᐊᑕᓂᐅᑉ ᐃᓴᕆᐊᓕᒥᐅᑦ ᑭᐅᕔᑦ ᐃᒫᒃ: “ᓴᐳᑎᓚᐅᓐᖏᓚᑦᓰ ᐄᑦᔨᑉᑎᒥᐅᓂᑦ, ᐊᒧᕅᑎᒥᐅᓂᓪᓗ, ᐊᒧᓁᑎᒥᐅᓂᓪᓗ, ᐱᓕᔅᑍᓂᒥᐅᓂᓪᓗ?

¹² ᓮᑐᓂᒥᐅᑦ ᐊᒻᒪ, ᐊᒪᓕᑬᑎᒥᐅᑦ ᒪᐅᓁᑎᒥᐅᓪᓗ ᐊᒃᓱᕈᕐᑎᑦᓯᓕᕐᒪᑕ ᐃᓕᑦᓯᓐᓂᒃ; ᐃᓗᖏᕐᓱᕐᓗᓯ ᓂᓪᓕᐊᓚᐅᕐᐳᓯ ᐅᕙᓐᓄᑦ. ᓴᐳᑎᓚᐅᕐᐸᑦᓯᓗ ᑍᒃᑯᓇᓐᖔᑦ?

¹³ ᓱᓕᓕ ᕿᒤᓚᐅᕆᕗᓯ ᐅᕙᓐᓂᒃ ᒎᑎᓐᖑᐊᓄᓪᓗ ᐊᓯᓐᓄᑦ ᑐᒃᓯᐊᕐᐸᓕᕐᓗᓯ; ᑍᒤᒻᒪᑦ ᓴᐳᑎᒃᑲᓐᓂᕈᒪᔪᓐᓃᕐᐸᑦᓯ.

¹⁴ ᒎᑎᓐᖑᐊᓄᑦ ᓂᕈᐊᓚᐅᕐᑕᑦᓯᓐᓄᑦ ᑐᒃᓯᐊᕆᐊᕐᑐᓕᕆᑦᓯ, ᑖᒃᑯᓇᓐᖓᑦ ᓴᐳᑎᔭᐅᔪᓐᓇᕐᒪᖔᑦᓯ ᐊᒃᓱᕈᕈᑎᒋᔮᑦᓯᓐᓂᑦ.”

¹⁵ ᐃᓴᕆᐊᓕᒥᐅᓪᓕ ᑭᖑᕚᖏᑦ ᐅᖃᕐᐳᑦ ᐊᑕᓂᕐᒧᑦ, “ᐊᔪᕐᑐᓕᓚᐅᕐᐳᒍᑦ ᐅᕙᑦᑎᓐᓄᑦ ᐱᓇᓱᐊᓕᕆᑦ ᓈᒻᒪᒋᔭᕐᓂᒃ; ᑭᓯᐊᓂ ᐱᐅᓕᑎᒍᑦ, ᐃᓕᖕᓄᑦ ᑐᒃᓯᐊᕐᐳᒍᑦ ᐅᓪᓗᒥ.”

¹⁶ ᑕᕝᕙ ᓄᓇᖃᑎᒋᓐᖏᑕᒥ ᒎᑎᓐᖑᐊᖏᓐᓂᒃ ᕿᒤᓚᐅᕐᐳᑦ ᑐᒃᓯᐊᓕᕐᓗᑎᒡᓗ ᐊᑕᓂᕐᒧᑦ; ᐃᓱᒪᔮᕈᑎᖃᓕᕐᐳᕐᓗ ᐃᓴᕆᐊᓕᒥᐅᑦ ᐊᒃᓱᕈᕐᓂᖏᓐᓂᒃ.

¹⁷ ᐊᒧᓁᑎᒥᐅᑦ ᐅᓇᑕᕐᓂᕐᒧᑦ ᐸᕐᓇᓕᓚᐅᕐᐳᑦ, ᑕᖕᒫᕐᓗᑎᒡᓗ ᒋᓕᐊᑎᒥ; ᐃᓴᕆᐊᓕᒥᐅᓪᓗ ᐃᓄᖏᑦ ᑲᑎᓚᐅᕆᕗᑦ, ᑕᖕᒫᕐᓗᑎᒡᓗ ᒥᔅᐸᒧᑦ.

¹⁸ ᑕᕝᕙᓂᓗ ᐃᓄᐃᑦ, ᒋᓕᐊᑎᒥ ᓯᕗᓕᕐᑏᑦ ᐃᒻᒥᖕᓄᑦ ᐅᖃᓕᕐᐳᑦ, “ᑭᓇ ᓯᕗᓕᕐᓂᐊᕐᐸ ᐅᓇᑕᕆᐊᕐᓗᓂ ᐊᒧᓁᑎᓂᒃ? ᑖᓐᓇ ᓯᕗᓕᕐᑐᖅ ᐅᓇᑕᕐᓂᕐᒧᑦ ᐊᖓᔪᖅᑳᓐᖑᕐᑎᓐᓂᐊᕐᐸᕗᑦ ᒋᓕᐊᑎᒥ ᓄᓇᖃᕐᑐᓕᒫᓄᑦ.”