ᐃᓗᐊᕐᓮᔩᑦ ᐊᒡᓚᖏᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᑕᐅᑉ ᓯᒥᐅᓂᐅᓪᓗ ᑭᖑᕚᖏᑕ ᓵᓚᖃᕐᓂᖏᑦ ᐊᑐᓁ-ᐱᔨᒃᒥᒃ

¹ ᔮᓱᐊᑉ ᑐᖁᓂᖓᑕ ᑭᖑᓂᐊᒍᑦ ᐃᓴᕆᐊᓕᒥᐅᑦ ᐃᓄᖏᑦ ᐊᐱᕆᓕᕐᐳᑦ ᐊᑕᓂᕐᒧᑦ, “ᐃᓴᕆᐊᓕᐅᑉ ᑭᖑᕚᕇᖏᓐᓂᑦ ᓇᓪᓕᐊᑦ ᓯᕗᓪᓕᕐᐸᐅᓗᑎᒃ ᐅᓇᑕᕆᐊᕐᑐᒃᓴᐅᕚᑦ ᑬᓇᓂᒥᐅᓂᒃ, ᐅᕙᑦᑎᓐᓂᒃ ᐱᑦᔪᑦᔨᓗᑎᒃ?”

² ᐊᑕᓂᐅᑉ ᑭᐅᕔᑦ, “ᔫᑕᐅᑉ ᑭᖑᕚᖏᑦ ᓯᕗᓪᓕᕐᐸᐅᔪᒃᓴᐅᕗᑦ. ᓄᓇ ᑐᓂᔭᕇᕋᒃᑯ ᑖᒃᑯᓄᖓ.”

³ ᔫᑕᒃᑯᑦ ᐅᖃᕐᐳᑦ ᓯᒥᐅᓂᒃᑯᓐᓄᑦ, “ᐱᖃᑎᒋᓚᐅᕐᑎᒍᑦ ᓄᓇᒧᑦ ᓇᓚᐅᑦᑖᕈᑎᒃᑯᑦ ᕾᑕᐅᔪᒧᑦ, ᑲᑐᑦᔨᓗᑕ ᐅᓇᑕᕐᓂᐊᕋᑦᑕ ᑬᓇᓂᒥᐅᓂᒃ; ᐅᕙᒍᑦᑕᐅᖅ ᐱᖃᑎᒋᓂᐊᕆᕙᑦᑎᒋᑦ ᓄᓇᒧᑦ ᑐᓂᔭᐅᔪᒥᒃ ᐃᓕᑦᓯᓐᓄᑦ.” ᑍᒤᒻᒪᑦ ᓯᒥᐅᓂᒃᑯᑦ ᐱᖃᑕᐅᓕᓚᐅᕐᐳᑦ.

⁴ ᔫᑕᒃᑯᓪᓗ ᐅᓇᑕᕆᐊᓚᐅᕐᐳᑦ ᑲᑐᑦᔨᓪᓗᑎᒃ. ᐊᑕᓂᐅᑉ ᓵᓚᖃᕐᑎᓚᐅᕐᐰᑦ ᑬᓇᓂᒥᐅᓂᒃ ᐱᕆᔧᑎᒥᐅᓂᒡᓗ; ᓵᓚᖃᓚᐅᕐᐳᑦ 10,000ᓂᒃ ᓄᓇᒥ ᐲᔨᒃᒥ.

⁵ ᑕᕝᕙᓂᓗ ᑲᑎᓯᕗᑦ ᐊᑐᓁ-ᐱᔨᒃᒥᒃ ᓄᓇᒥ ᐲᔨᒃᒥ, ᐅᓇᑕᓕᕐᐰᓪᓗ; ᓵᓚᒋᓪᓗᒋᓪᓗ ᑬᓇᓂᒥᐅᑦ ᐱᕆᔧᑎᒥᐅᓪᓗ.

⁶ ᑕᕝᕙ ᐊᑐᓁ-ᐱᔨᒃ ᕿᒪᒃᓯᕗᖅ, ᒪᓕᒃᑲᒥᑦᔪᒃ ᐊᖑᒐᒥᑦᔪᒡᓗ, ᑯᓪᓗᖏᒃ ᐳᑐᒍᖏᒡᓗ ᓇᑲᑉᐰᑦ.

⁷ ᐊᑐᓁ-ᐱᔨᒃᓗ ᐅᖃᕐᐳᖅ, “ᐊᖓᔪᖅᑳᕐᔪᐊᑦ 70 ᑯᓪᓗᖏᑦ ᐳᑐᒍᖏᓪᓗ ᓇᑲᓯᒪᔪᑦ ᐳᑯᖃᑦᑕᓚᐅᕐᐳᑦ ᑲᑕᒐᕐᓂᕐᓗᑯᓂᒃ ᓂᕆᕕᖕᒪ ᐊᑖᓂᑦ ᓂᕆᓂᕐᓗᑯᓂᒃ. ᑍᒤᒻᒪᑦ ᒎᑎᐅᑉ ᐱᓂᐊᕐᓂᕕᓂᓐᓄᑦ ᑍᒃᑯᓄᖓ ᐊᑭᓂᐊᕐᕕᒋᕚᖓ.” ᑕᕝᕙ ᔨᕉᓴᓕᒧᐊᕈᑎᕚᑦ, ᑕᕝᕙᓂᓗ ᑐᖁᕗᖅ.

ᔫᑕᐅᑉ ᑭᖑᕚᖏᑕ ᓴᓚᖃᕐᓂᖏᑦ ᔨᕉᓴᓕᒥᒃ ᕼᐃᐸᕋᒻᒥᒡᓗ

⁸ ᔫᑕᐅᑉ ᐃᓄᖏᑦ ᐅᓇᑕᕆᐊᓚᐅᕐᐳᑦ ᔨᕉᓴᓕᒧᑦ, ᓵᓚᒋᓪᓗᒍᓗ. ᐃᓄᖏᓪᓗ ᑐᖁᓪᓗᒋᑦ, ᐃᒡᓗᒐᓴᖏᓪᓗ ᐃᑯᐊᓪᓚᒃᐰᑦ.

⁹ ᑕᒪᑐᒪ ᑭᖑᕐᖓᒍᑦ ᔫᑕᒥᐅᑦ ᐅᓇᑕᕆᐊᓚᐅᕐᐳᑦ ᑬᓇᓂᒥᐅᓂᒃ ᓄᓇᖃᕐᑐᓂᒃ ᖃᖅᑲᓕᖕᒥ, ᖃᖅᑬᓪᓗ ᑭᒡᓕᖏᓐᓂ, ᓇᑎᕐᓇᒥᓗ ᓄᓇᒥ ᓯᕿᓂᐅᑉ ᓇᓛᓃᑦᑐᓂ ᓂᒋᑉᒥ.

¹⁰ ᔫᑕᒥᐅᓪᓗ ᑲᔪᓯᓚᐅᕐᐳᑦ ᑬᓇᓂᒥᐅᓄᑦ ᓄᓇᓕᖕᓄᑦ ᐃᒡᓗᒐᓴᖕᓄᑦ ᕼᐃᐸᕋᓐᒥᑦ, ᓯᕗᓂᖓᒍᑦ ᑍᔭᐅᓚᐅᕐᑑᒐᓗᐊᖅ ᑭᕆᐊᑦ-ᐊᕋᐸᒥᒃ, ᓵᓚᒋᓚᐅᕐᐰᓪᓗ ᐃᓚᒌᑦ ᓯᓮᒃᑯᑦ, ᐊᕼᐂᒪᓐᑯᑦ, ᑕᓪᒤᒃᑯᓪᓗ.

ᐆᑦᓂᐅᓕᐅᑉ ᓵᓚᖃᕐᓂᖓ ᐃᒡᓗᒐᓴᖕᓂᒃ ᑎᐳᕐᒥᐅᓂᒃ

¹¹ ᑕᕝᕙᓐᖓᑦ ᔫᑕᐅᑉ ᑭᖑᕚᖏᑦ ᐅᓇᑕᕆᐊᓚᐅᕐᐳᑦ ᐃᒡᓗᒐᓴᖕᓄᑦ ᑎᐱᕆᒧᑦ, ᑍᑦᓱᒪᓂ ᑍᔭᐅᓚᐅᕐᑐᖅ ᑭᕆᐊᑦ-ᓯᐱᕆᒥᒃ.

¹² ᐃᓚᖓᑦ, ᑬᓚᐱ, ᐅᖃᕐᐳᖅ, “ᐸᓂᒐ ᐋᒃᓵ ᐂᑦᑑᑎᒋᓂᐊᕐᐸᕋ ᑲᑎᑎᑕᐅᖁᓪᓗᒍ ᐊᖑᒻᒧᑦ ᓵᓚᖃᕐᑐᒧᑦ ᑭᕆᐊᑦ-ᓯᐱᕆᒥᒃ.”

¹³ ᐅᑎᓂ-ᐅᓕ, ᑬᓚᐱᐅᑉ ᓄᑲᖓᑕ ᑮᓇᑦᔨᐅᑉ ᐃᕐᓂᖓ, ᓵᓚᖃᓚᐅᕐᐳᖅ ᐃᒡᓗᒐᓴᖕᓂᒃ, ᑍᒤᒻᒪᑦ ᑬᓚᐱᐅᑉ ᐸᓂᓂ ᐋᒃᓵ ᑐᓂᓚᐅᕐᐸ ᑖᑦᓱᒧᖓ ᑲᑎᑎᑕᐅᖁᓪᓗᒍ.

¹⁴ ᑲᑎᑎᑕᐅᕕᐊᑕᓗ ᐅᓪᓗᖓᓂ ᐊᕐᓇᐅᑉ ᐊᖑᑦ ᕿᓄᖁᓕᕐᐹ ᐊᑖᑕᒥᓂᑦ ᐱᕈᕐᓰᕕᖕᒥᒃ ᑐᒃᓯᕋᖁᓪᓗᒍ. ᑎᑭᓐᓇᒥᓕ ᐊᕐᓇᖅ ᓯᐅᑎᖅᑯᕐᑐᔪᒥᑦ ᐊᖅᑲᕐᒪᑦ, ᑬᓚᐱᐅᑉ ᐊᐱᕆᕚ ᓱᓇᒥᒃ ᐱᔪᒪᔭᖃᕐᒪᖔᑦ.

¹⁵ ᐸᓂᖓᑕ ᑭᐅᕚ, “ᐳᐂᓚᕕᓕᖕᒥᒃ ᐱᑎᑕᐅᔪᒪᕗᖓ, ᓄᓇ ᕾᓚᐅᕐᑍᑦ ᓂᒋᑉ ᐸᓂᕐᑐᒦᒻᒪᑦ.” ᑍᒤᒻᒪᑦ ᑬᓚᐱᐅᑉ ᑐᓂᓚᐅᕐᐹ ᑰᖃᕐᑐᓂᒃ ᖁᑦᓯᖕᓂᕐᓴᒥ ᐊᒃᐸᓯᖕᓂᕐᓴᒥᓗ ᑰᖃᕐᑐᒥᒃ.

ᑭᖑᕚᕇᑦ ᔫᑕᒃᑯᒃ ᐱᓐᔭᒥᓂᑯᓪᓗ ᓵᓚᖃᕐᓂᖏᑦ

¹⁶ ᒨᓯᓯᐅᑉ ᓴᑭᖓᑕ, ᑭᓁᑎᐅᑉ, ᑭᖑᕚᖏᑦ ᐊᐅᓪᓚᕐᐳᑦ ᔫᑕᐅᑉ ᑭᖑᕚᖏᓐᓂᒃ ᐃᓚᖃᕐᓗᑎᒃ, ᐃᒡᓗᒐᓴᖕᓂᑦ ᓇᐹᕐᑐᓕᖕᒥᑦ ᐹᒥᓂᒃ. ᓂᒋᑉᒧᑦ ᐊᕌᑎᐅᑉ ᖃᓂᒋᔮᓃᑦᑐᒧᑦ. ᑍᑲᓂᓗ ᓄᓇᖃᑎᖃᓕᕐᓗᑎᒃ ᐃᓄᖏᓐᓂᒃ.

¹⁷ ᔫᑕᐅᑉ ᑭᖑᕚᖏᑦ ᐃᓚᖃᕐᓗᑎᒃ ᓯᒥᐅᓂᐅᑉ ᑭᖑᕚᖏᓐᓂᒃ, ᑲᑐᑦᔨᓪᓗᑎᒃ ᓵᓚᖃᕐᐳᑦ ᑬᓇᓂᒥᐅᓂᒃ ᓄᓇᖃᕐᑐᓂᒃ ᐃᒡᓗᒐᓴᖕᓂᒃ ᔨᐸᑎᒥ. ᒪᑭᓐᓂᐊᕈᓐᓃᕐᓗᑎᒡᓗ ᓵᓚᒋᕔᑦ, ᐃᒡᓗᒐᓮᓪᓗ ᑍᔭᐅᓕᕐᐳᑦ ᕼᐅᕐᒪᒥᒃ.

¹⁸ ᔫᑕᐅᑉ ᑭᖑᕚᖏᑦ ᓵᓚᖃᓚᐅᕆᕗᑦ ᓄᓇᒥᒃ ᒑᓴᒥᒃ ᖃᓂᒋᔭᖓᓃᑦᑐᓕᒫᓂᒡᓗ, ᓄᓇᒥᒡᓗ ᐊᓯᑭᓗᓂᒥᒃ ᖃᓂᒋᔭᓕᒫᖏᓐᓂᒡᓗ, ᐃᑯᕋᓂᒥᒡᓗ ᖃᓂᒋᔭᓕᒫᖏᓪᓗ.

¹⁹ ᐊᑕᓂᐅᑉ ᐃᓚᒋᓚᐅᕐᐰᑦ ᔫᑕᐅᑉ ᑭᖑᕚᖏᑦ. ᓄᓇᑖᕐᓗᑎᒡᓗ ᖃᖅᑲᓕᖕᒥᒃ, ᑭᓯᐊᓂᓕ ᓯᖏᑦᓯᔪᓐᓇᓚᐅᓐᖏᓚᑦ ᐃᓄᖕᓂᒃ ᒪᓂᕋᕐᒦᑦᑐᓂᒃ ᕿᒧᒃᓯᐅᑎᓄᑦ ᑲᓕᒐᖃᓚᐅᕐᒪᑕ ᐊᒃᓴᓗᐊᓕᖕᓂᒃ ᓴᕕᕋᔭᖕᓂᒃ.

²⁰ ᒨᓯᓯᐅᑉ ᐱᖁᔨᓂᕆᓚᐅᕐᑕᖓ ᒪᓕᒡᓗᒍ ᕼᐃᐸᕋᓐ ᑐᓂᔭᐅᓚᐅᕐᐳᖅ ᑬᓚᐱᒧᑦ, ᓵᓚᖃᓚᐅᕐᒪᑦ ᐊᐅᓪᓚᕐᑎᑦᓯᓪᓗᓂ ᐱᖓᓱᐃᓂᒃ ᐃᓚᒌᓂᒃ ᐊᓇᑭᐅᑉ ᑭᖑᕚᖏᓐᓂᒃ.

²¹ ᐱᓐᔭᒥᓂᐅᓪᓕ ᑭᖑᕚᖏᑕ ᓵᓚᒋᓚᐅᓐᖏᓔᑦ ᔨᐳᓮᑎᑦ ᓄᓇᖃᕐᑐᑦ ᔨᕉᓴᓕᒥ, ᔨᐳᓮᑎᓪᓗ ᓄᓇᖃᖃᑕᐅᕗᑦ ᐱᓐᔭᒥᓂᐅᑉ ᑭᖑᕚᖏᓐᓂ ᐅᓪᓗᒥᒧᑦ.

ᔫᓯᐱᐅᑉ ᑭᖑᕚᖏᑕ ᓵᓚᖃᕐᓂᖓ ᐱᑎᐃᓪᒥᒃ

²² ᔫᓯᐱᐅᑉ ᑭᖑᕚᖏᑦ ᐅᓇᑕᕆᐊᓚᐅᕆᕗᑦ ᐃᒡᓗᒐᓴᖕᓂᒃ ᐱᑎᓕᒥᒃ, ᐊᑕᓂᐅᓪᓗ ᐃᓚᒋᓚᐅᕐᐰᑦ.

²³ ᔫᓯᐱᐅᑉ ᑭᖑᕚᖏᑕ ᐃᔨᕋᕐᑐᕐᓗᑎᒃ ᐃᒡᓗᒐᓮᑦ ᐱᑎᓕ ᕿᒥᕐᕈᔭᕐᑐᕐᐰᑦ. (ᑍᑦᓱᒪᓂ ᑍᔭᐅᓚᐅᕐᐳᑦ ᓚᔾᒥᒃ.)

²⁴ ᑖᒃᑯᐊᓗ ᑕᑯᔭᕐᑐᕐᓯᒪᔪᑦ ᐊᖑᒻᒥᒃ ᐃᒡᓗᒐᓴᖕᓂᑦ ᐊᓂᓕᕐᑐᒥᒃ ᑕᑯᒐᒥᒃ ᐅᖃᐅᑎᕚᑦ, “ᖃᐅᔨᑎᓚᐅᕐᑎᒍᑦ ᖃᓄᖅ ᐃᒡᓗᒐᓴᖕᓄᐊᕈᓐᓇᕐᒪᖔᑦᑕ, ᑕᕝᕙ ᐱᑦᓯᐊᕐᕕᒋᓂᐊᕐᐸᑦᑎᒋᑦ.”

²⁵ ᑕᕝᕙ ᖃᐅᔨᑎᑉᐰᑦ ᐃᒡᓗᒐᓴᖕᓄᑦ ᐃᑎᕐᑕᕐᕕᖓᓂᒃ, ᐃᑎᕋᒥᒃ ᐃᓄᖏᑦ ᓴᕕᒡᔪᐊᒧᑦ ᑐᖁᑉᐰᑦ ᐃᒡᓗᒐᓴᖕᓃᑦᑐᓕᒫᑦ, ᑭᓯᐊᓂᓕ ᑖᓐᓇ ᐊᖑᑦ ᐃᓚᓕᒪᖏᓪᓗ ᖃᓄᐃᓕᓇᒋᑦ.

²⁶ ᑖᓐᓇᓗ ᐊᖑᑦ ᕼᐃᑍᑏᑦ ᓄᓇᖓᓄᐊᓚᐅᕐᐳᖅ, ᐃᒡᓗᒐᓴᓕᐅᕐᓗᓂᓗ ᑍᑲᓂ, ᐊᑦᓯᕐᓗᒍᓗ ᓚᔾᒥᒃ, ᓱᓕ ᐊᑎᕆᕚ ᐅᓪᓗᒥᒧᑦ.

ᐃᓄᐃᑦ ᕿᒫᑎᑕᐅᓚᐅᖏᑦᑐᑦ ᐃᓴᕆᐊᓕᒥᐅᓄᑦ

²⁷ ᒫᓇᓯᐅᑉ ᑭᖑᕚᖏᑕ ᕿᒫᑎᓚᐅᓐᖏᑕᖏᑦ ᐃᓄᐃᑦ ᐅᑯᓇᓂ ᐃᒡᓗᒐᓴᖕᓃᑦᑐᑦ, ᐱᑦ-ᓰᓐ, ᓄᓇᓕᐊᕐᔪᖁᑎᖏᓪᓗ, ᑖᓇᒃ ᓄᓇᓕᐊᕐᔪᖁᑎᖏᓪᓗ, ᑐᐊᕆ ᓄᓇᓕᐊᕐᔪᖁᑎᖏᓪᓗ, ᐃᑉᓖᒻ, ᒥᒌᑐ ᓄᓇᓖᓪᓗ ᖃᓂᒋᔭᖓᓃᑦᑐᑦ; ᑬᓇᓂᒥᐅᓪᓕ ᑕᒫᓂ ᓄᓇᖃᖃᑕᐅᔪᒪᓚᐅᕐᐳᑦ.

²⁸ ᐃᓴᕆᐊᓕᒥᐅᑦ ᓱᖑᓯᕙᓪᓕᐊᒐᒥᒃ, ᑬᓇᓂᒥᐅᑦ ᐱᓇᓱᐊᕐᑎᓕᓚᐅᕐᐰᑦ ᖁᓄᒐᓗᐊᕐᑎᓪᓗᒋᑦ, ᑭᓯᐊᓂᓕ ᐊᑕᖏᕐᓗᒋᑦ ᐊᐅᓪᓚᕐᑎᓚᐅᓐᖏᓔᑦ.

²⁹ ᐃᕗᕅᒥᐅᑦ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᑬᓇᓂᒥᐅᑦ ᓄᓇᓖᑦ ᐃᒡᓗᒐᓴᖕᓂ ᒋᔨᕆᒥ, ᑬᓇᓁᒥᐅᓪᓕ ᓄᓇᖃᖃᑕᐅᓚᐅᕐᐳᑦ ᑖᒃᑯᓇᓂ.

³⁰ ᓯᐳᓗᓂᐅᑉ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᐃᓄᐃᑦ ᓄᓇᓖᑦ ᐃᒡᓗᒐᓴᖕᓂ ᑭᑦᕋᓐᒥ ᓇᕼᐊᓚᐅᓪᒥᓗ, ᑍᒤᒻᒪᑦ ᑬᓇᓂᒥᐅᑦ ᓄᓇᖃᖃᑕᐅᕗᑦ ᑖᒃᑯᓇᓂ ᐱᓇᓱᐊᕐᑎᒋᔭᐅᓪᓗᑎᒡᓗ ᐱᔪᒪᓐᖏᒐᓗᐊᕐᑎᓪᓗᒋᑦ.

³¹ ᐋᓱᕆᐅᑉ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᐃᓄᐃᑦ ᐃᒡᓗᒐᓴᖕᓂ ᐅᑯᓇᓂ, ᐊᒃᑯᒥ ᓄᓇᖃᕐᑐᑦ, ᓮᑐᓂᒥᓗ ᓄᓇᖃᕐᑐᑦ, ᐊᕼᐊᓚᑉᒥᓗ ᓄᓇᖃᕐᑐᑦ, ᐊᑲᔨᑉᒥᓗ ᓄᓇᖃᕐᑐᑦ, ᕼᐃᓪᐸᒥᓗ ᓄᓇᖃᕐᑐᑦ, ᐋᐱᒃᒥᓗ ᓄᓇᖃᕐᑐᑦ, ᕅᕼᐊᑉᒥᓗ ᓄᓇᖃᕐᑐᑦ.

³² ᐊᓯᕆᐅᓪᓕ ᑭᖑᕚᖏᑦ ᓄᓇᖃᑎᖃᓚᐅᕐᐳᑦ ᑬᓇᓂᒥᐅᓂᒃ, ᑕᒫᓂ ᓄᓇᖃᕐᑐᑐᖃᕐᓂᒃ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᓐᓇᒥᑦᔪᒃ.

³³ ᓈᑉᑕᓕᐅᑉ ᑭᖑᕚᖏᑕ ᕿᒫᑎᓪᓗᒋᑦ ᐊᐅᓪᓚᕐᑎᓚᐅᓐᖏᑕᖏᑦ ᐃᒡᓗᒐᓴᖕᓃᑦᑐ ᐅᑯᓇᓂ ᐱᑦ-ᓯᒥᔅᒥ ᓄᓇᖃᕐᑐᑦ, ᐱᑦ-ᐊᓇᑕᒥᓗ ᓄᓇᖃᕐᑐᑦ ᓄᓇᖃᖃᑎᖃᓚᐅᕐᐳᓪᓕ ᑬᓇᓂᒥᐅᓂᒃ, ᐱᓇᓱᐊᕐᑎᓪᓗᒋᓪᓗ ᐱᔪᒪᓐᖏᒐᓗᐊᕐᑎᓪᓗᒋᑦ.

³⁴ ᐊᒧᕅᑎᓪᓕ ᕿᒫᑎᓪᓗᒋᑦ ᐊᐅᓪᓚᕐᑎᑦᓯᓚᐅᕐᐳᑦ ᑖᓐ ᑭᖑᕚᖏᓐᓂᒃ ᓄᓇᒧᑦ ᖃᖅᑲᓕᖕᓄᑦ, ᓄᓇᒧᑦ ᐱᔪᓐᓇᕐᑎᓚᐅᖏᓐᓇᒥᑦᔪᒃ.

³⁵ ᐊᒧᕅᑎᓪᓕ ᓄᓇᕾᓐᓇᕈᒪᓚᐅᕐᐳᑦ ᕼᐊᕐ-ᕼᐃᕆᓯᒥ, ᐂᔭᓚᓐᒥᓗ ᓵ-ᐊᓪᐱᒻᒥᓗ, ᑭᓯᐊᓂᓕ ᔫᓯᐱᐅᑉ ᑭᖑᕚᖏᑕ ᐊᒃᓱᕉᑎᓚᐅᕐᐰᑦ. ᐱᔨᑖᕆᓪᓗᒋᓪᓗ ᐱᔪᒪᓐᖏᒐᓗᐊᕐᑎᓪᓗᒋᑦ.

³⁶ ᐊᒧᕅᑎᑦ ᓄᓇᖁᑎᖓ ᐱᒋᐊᕐᓂᖃᓚᐅᕐᐳᖅ ᐊᒃᕋᐱᒻ ᓯᕕᖓᓂᖓᓂᑦ ᓄᓇᒥᑦ ᓯᓚᒥᑦ ᖁᒻᒧᐊᖓᓪᓗᓂ ᓯᕕᖓᓂᖓᓄᑦ.