ᔧᒥᓯᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᖃᐅᑉ ᑲᒪᒋᔭᐅᑦᓯᐊᕆᐊᖃᕐᓂᖓ

¹ ᐊᒥᓲᓐᖏᑦᑐᓯᒍᑦ ᐊᔪᕆᓱᐃᔨᖑᕐᑐᒃᓴᐅᕗᓯ, ᐅᒃᐱᕐᑑᖃᑎᒃᑲ, ᖃᐅᔨᒪᒐᑦᓯ ᐅᕙᒍᑦ ᐊᔪᕆᕐᓱᐃᕙᒃᑐᒍᑦ ᓂᑲᒋᔭᐅᓐᖏᓐᓂᕐᓴᐅᓗᑕ ᐃᖅᑲᕐᑐᕐᑕᐅᔪᒫᕋᑦᑕ.

² ᑕᒪᑦᑕ ᐊᑦᔨᒌᖏᑦᑐᑎᒍᑦ ᑕᒻᒪᕐᐸᒃᑲᑦᑕ, ᓇᓪᓕᐊᓪᓗ ᐅᖃᐅᓯᕐᒥᒍᑦ ᑕᒻᒪᓚᐅᕐᓯᒪᖏᑦᑐᖅ ᑖᓐᓇ ᓈᒻᒪᑦᓯᐊᕐᑐᒥᒃ ᐃᓅᓯᖃᕐᐳᖅ, ᑎᒥᓂᓗ ᐊᔪᕐᑐᓕᓂᕐᒧᑦ ᐱᑎᑦᑍᓕᔪᓐᓇᕐᐹ.

³ ᕿᒧᒃᓯᐅᑎᑦ ᖃᓂᖏᑎᒍᑦ ᓴᕕᕋᔭᖕᒥᒃ ᐃᓕᓯᕕᒋᕙᒃᐸᕗᑦ ᐅᕙᑦᑎᓐᓂᒃ ᓈᓚᑦᓯᐊᕈᓐᓇᖁᓪᓗᒋᑦ, ᐊᒡᓛᑦ ᑎᒥᓕᒫᖓ ᐅᐸᒍᒪᔭᑦᑎᓐᓄᑦ ᐊᐅᓚᑎᑦᓱᓐᓇᕐᓯᕙᒃᐸᕗᑦ.

⁴ ᐅᒥᐊᕐᔪᐊᑦᑕᐅᖅ; ᐊᖏᔪᐊᓘᒐᓗᐊᑦ ᐊᓄᕆᕐᔪᐊᒧᓪᓗ ᐊᐅᓚᑕᐅᕙᒃᑐᑦ ᐃᖏᕐᕋᑎᑕᐅᓪᓗᑎᒃ, ᐊᖁᑕᐅᔪᓐᓇᕐᐳᑦ ᐊᖂᑎᖓᓄᑦ ᒥᑭᔪᒍᓗᖕᓄᑦ, ᐊᖁᑦᑑᑉ ᐅᐸᒍᒪᔭᖓᓄᑦ.

⁵ ᑍᒤᒃᑭᕗᕐᑕᐅᖅ ᐅᖃᖅ ᒥᑭᔫᒐᓗᐊᖅ ᐊᖏᔪᐊᓗᖕᓂᒃ ᐊᐅᓚᑦᓯᔪᓐᓇᕆᕗᖅ. ᓇᐹᕐᑐᐊᓗᐃᑦ ᐊᒥᓱᑦ ᐃᑯᐊᓪᓚᒃᑎᑕᐅᔪᓐᓇᕐᐳᑦ ᐃᑯᒪᒧᑦ ᒥᑭᔪᒧᑦ.

⁶ ᐅᖃᕐᑕᐅᖅ ᐃᑯᒪᐅᕗᖅ. ᓯᓚᕐᔪᐊᖑᓪᓗᓂᓗ ᐱᐅᖏᑦᑑᓕᕐᑎᑎᑦᔪᓇᕐᖢᓂᓗᑦ. ᑎᒥᑦᑕ ᐃᓚᒋᖕᒪᒍ, ᐃᑦᓴᒃᓯᕗᖅ ᑎᒥᑦᑎᓐᓂᒃ ᐃᑯᐊᓪᓔᕗᖅ ᐃᓅᓯᓕᒫᑦᑎᓐᓂᒃ, ᑲᑉᐱᐊᓇᕐᑐᕕᐅᑉ ᐃᑯᒪᓐᖓᓄᑦ.

⁷ ᓂᕐᔪᑎᑦ ᖃᓄᐃᑦᑐᑐᐃᓐᓁᑦ, ᑎᖕᒥᐊᑦ, ᐹᕐᖑᕐᑐᓪᓗ, ᐃᒪᕐᒥᐅᑍᓪᓗ ᓄᔪᐃᓕᕐᑎᑕᐅᔪᓐᓇᕐᐳᑦ, ᓄᔪᐃᓕᕐᑎᑕᐅᖃᑦᑕᕐᓯᒪᓪᓗᑎᒃᓗ,

⁸ ᐃᓅᓪᓕ ᐅᖃᖓ ᑭᓇᒧᓪᓘᓐᓃᑦ ᐊᐅᓚᑕᐅᔪᓐᓇᕐᓯᔪᓇᓐᖏᓚᖅ. ᓄᖅᑲᕈᓐᓇᕋᓂ ᐱᐅᖏᑦᑐᐊᓘᓪᓗᓂ, ᓴᓐᖏᔪᕐᔪᐊᒥᒃ ᑐᖁᓐᓇᕐᑐᒥᒃ ᑕᑕᑉᐳᖅ.

⁹ ᐅᖃᕗᑦ ᐊᑐᕐᓗᒍ ᖁᔭᓕᕙᒃᐳᒍᑦ ᐊᑕᓂᕐᒧᑦ ᐊᑖᑕᒧᓪᓗ, ᐅᖃᑦᑎᓐᓄᑦᑕᐅᖅ ᐃᓅᖃᑎᕗᑦ ᐅᖃᕐᓂᕐᓗᒡᕕᒋᕙᒃᐸᕗᑦ, ᒎᑎᐅᑉ ᐊᑦᔨᖓᓄᑦ ᐱᓐᖑᕐᑎᑕᐅᓯᒪᔪᖅ.

¹⁰ ᖃᓂᕐᒥᑦ ᑕᕝᕙᓐᖓᑦᓮᓐᓇᖅ ᐅᖃᐅᓰᑦ ᐊᓂᕗᑦ ᖁᔭᓕᓃᑦ ᐅᖃᕐᓂᕐᓗᖕᓃᓪᓗ. ᐅᒃᐱᕐᑑᖃᑎᒃᑲ, ᑍᒤᑦᑕᕆᐊᖃᓐᖏᓚᖅ.

¹¹ ᓄᓇᐅᑉ ᐃᓗᐊᓂᑦ ᑰᒃᑐᖅ ᐊᑕᐅᑦᓯᒃᑯᑦ ᐃᒪᑦᓯᐊᒥᒃ ᑕᕆᐅᒥᒡᓗ ᑯᕕᔪᓐᓇᕐᐹ?

¹² ᐅᒃᐱᖃᑎᒃᑲ, ᓇᐹᕐᑐᖅ ᐸᐅᕐᖓᓕᒃ ᐱᒋᓕᖕᓂᒃ, ᐱᕈᕐᕕᐅᔪᓐᓇᕐᐹ ᐅᕐᓱᒃᓴᕐᑕᓕᖕᓂᒃ? ᐅᐂᓂᒃᓴᓂᒡᓗ ᐱᕈᕐᕕᐅᕙᒃᑐᑦ ᐱᒋᓕᖕᓂᒃ ᐱᕈᕐᕕᐅᔪᓐᓇᕐᐹ? ᑍᒫᒃᑕᐅᖅ ᓄᓇᐅᑉ ᐃᓗᐊᓂᑦ ᑕᕆᐅᕐᒥᒃ ᑯᕕᔪᖅ ᐃᒪᑦᓯᐊᕙᖕᒥᒃ ᑯᕕᖃᓯᐅᑦᔨᔪᓐᓇᓐᖏᓚᖅ.

ᓯᓚᑐᓂᖅ ᕿᓚᖕᒥᑦ ᐱᔪᖅ

¹³ ᑭᓇ ᓇᓪᓕᓯᓂ ᓯᓚᑐᓪᓗᓂᓗ ᑐᑭᓯᐊᕙ? ᑕᕝᕙ ᐱᓇᓱᐊᑦᓯᐊᕐᓂᕐᒥᒍᑦ ᓴᖅᑭᑎᑦᓯᔪᒃᓴᐅᕗᖅ ᐃᓅᓯᐊᕐᓂᕐᒥᒃ ᐱᐅᔪᕆᖏᓐᓂᕐᒥᒃ ᓯᓚᑐᓂᕐᒥᒡᓗ.

¹⁴ ᐆᒻᒪᑎᑦᓯᒍᑦ ᐊᓐᓂᕈᑦᔨᓂᕐᒥᒃ ᐱᔪᑑᔪᒪᓂᕐᒥᒡᓗ ᐱᖃᕈᑦᓯ, ᓂᕐᑑᑎᓂᐊᕋᓯ ᓴᒡᓗᖁᓇᓯ ᓱᓕᔪᒧᑦ.

¹⁵ ᓯᓚᑐᓂᖅ ᑍᒤᑦᑐᖅ ᐹᓐᖓᑦ ᐱᓐᖏᓚᖅ, ᓯᓚᕐᔪᐊᕐᒥᓪᓕ ᐱᕗᖅ, ᐅᒃᐱᕐᓂᒥᐅᓐᖏᑦᑐᖅ, ᐊᓂᕐᓂᕐᓗᖕᓂᓪᓕ ᐱᕗᖅ.

¹⁶ ᓯᖕᓇᓂᖅ ᓇᖕᒥᓂᕐᓯᐅᕐᓂᕐᓘᓐᓃᑦ ᐱᑕᖃᕐᐸᑦ, ᐋᖅᑭᑦᑎᐊᕐᓯᒪᖏᓐᓂᖃᕐᓂᐊᕐᐳᖅ ᐱᐅᖏᑦᑐᐊᓗᖕᓂᒃᓗ ᐱᓂᐊᕐᓂᕐᑕᖃᕐᓗᓂ

¹⁷ ᓯᓚᑐᓂᕐᓕ ᕿᓚᖕᒥᑦ ᐱᔪᖅ ᓯᕗᓪᓕᐅᑦᔨᕗᖅ ᓴᓗᒪᑦᓯᐊᕐᓂᕐᒥᒃ, ᐊᒻᒪ ᓮᓕᓂᕐᒥᒃ, ᐅᐃᒪᔮᖏᓐᓂᕐᒥᒃ, ᐱᖃᓐᓂᕐᓗᓂᓗ; ᐱᑦᔪᑎᒃᓴᑦᓯᐅᑦᓯᐊᕐᐳᖅ, ᓂᑲᒍᓱᒃᐳᖅ ᐱᐅᔪᓂᒡᓗ ᐱᕈᕐᑎᑦᓯᓪᓗᓂ, ᐊᑦᔨᒌᒃᑎᑦᓯᕗᖅ ᓱᓕᑦᓯᐊᕐᓗᓂᓗ.

¹⁸ ᐃᓅᖃᑎᒌᑦᓯᐊᕈᑎᒃᓴᒥᒡᓗ ᑲᓐᖓᕐᓱᐃᕗᑦ ᓮᓕᓇᕐᑐᒥᒃ ᑖᒃᑯᐊ ᓮᓕᑎᑦᓯᔪᑦ.