ᐂᓮᐊᓯᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᓮᐊᓯᐅᑉ ᐃᕐᓂᖓᑕ ᓇᓗᓁᒃᑯᑕᐅᓂᖓ ᐃᓄᖕᓄᑦ

¹ ᐊᑕᓂᕐᓗ ᐅᕙᓐᓄᑦ ᐅᖃᕐᐳᖅ, “ᐊᖏᔪᒥᒃ ᐅᔭᕋᖕᒥᒃ ᑎᑎᕋᕐᕕᒃᓴᕐᑖᕐᓗᑎᑦ ᑎᑎᕋᕐᕕᒋᒍᒃ ᐊᖏᔫᑎᐅᓗᒋᑦ ᐃᒫᒃ, ‘ᑮᓇᐅᔭᕐᑖᑲᐅᕐᑐᕐᓂᖅ, ᐊᓯᐅᔨᑲᐅᕐᑐᕐᓂᕐᓗ.’ ‘ᒥᕼᐊ-ᓴᕼᐊᓚ-ᕼᐊᔅ-ᐸᔾ.’

² ᐊᖑᑏᖕᓂᒃ ᒪᕐᕉᖕᓂᒃ ᓱᓕᑦᓯᐊᕈᓐᓇᕐᑑᖕᓂᒃ ᐱᑕᖃᕐᐳᖅ, ᔪᕅᐊ ᑐᓂᕐᕈᓯᕐᑎᑦᓯᔨ ᓴᑲᕅᐊᓗ ᔨᐱᕆᑬᐊᐅᑉ ᐃᕐᓂᖓ, ᐅᕙᓐᓄᑦ ᐊᖏᕐᓯᒪᔫᖕᓂᒃ.”

³ ᑭᖑᓂᖓᒍᓪᓕ ᐊᕐᓇᒧᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᐊᕐᐳᖓ ᓄᑕᕋᒃᓴᕐᑖᕐᐳᕐᓗ, ᐃᕐᓂᕐᒥᒡᓗ ᐃᕐᓂᕗᖅ, ᐊᑕᓂᐅᑉ ᐅᖃᐅᑎᕚᖓ, “ᐊᑎᖃᕐᑎᑦᔪᒃ ‘ᑮᓇᐅᔭᕐᑖᑲᐅᕐᑐᕐᓂᖅ, ᐊᓯᐅᔨᑲᐅᕐᑐᕐᓂᕐᓗ,’ ‘ᒥᕼᐊ-ᓴᕼᐊᓚ-ᕼᐊᔅ-ᐸᔾ’;

⁴ ᑖᓐᓇ ᓄᑲᑉᐱᐊᖅ ᐊᓈᓈᕈᓐᓇᕐᓯᓚᐅᕐᑎᓐᓇᒍ ᐊᑖᑖᕈᓐᓇᕐᓯᓚᐅᕐᑎᓐᓇᒍᓗ ᓱᓕ, ᑕᒫᓯᑰᓯᒥᐅᑦ ᐊᔪᕐᓴᖏᑦᔪᑎᖏᑦ ᓴᒥᐊᕆᐊᕐᒥᐅᓪᓗ ᓵᓚᒃᓴᕈᑎᒋᓯᒪᔭᖏᑦ ᐊᐅᓪᓚᕈᑦᔭᐅᔪᒫᕐᐳᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ.”

ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑕ ᕾᓕᕐᓂᖓ

⁵ ᐊᑕᓂᐅᑉ ᑕᕝᕙ ᐅᖃᕐᕕᒋᒃᑲᓐᓂᕆᕚᖓ, ᐅᖃᕐᓗᓂ:

⁶ “ᐅᑯᐊ ᐃᓄᐃᑦ ᓮᓗᐊᑉ ᑕᓯᖓᓂᑦ ᑰᑦᓯᐊᕐᑐᒥᒃ ᐃᒥᕈᒪᖏᒻᒪᑕ, ᕆᔨᓂᐅᑉ ᓵᖓᓂ ᕆᒪᓔᐊᐅᓪᓗ ᐃᕐᓂᖓᑕ ᓵᖓᓂ ᓯᕘᕋᓂᕐᒧᑦ ᓴᔪᒍᒫᕐᐳᑦ;

⁷ ᑍᒤᒻᒪᑦ, ᑕᑯᒋᑦ ᐊᑕᓂᐅᑉ ᑎᑭᑕᐅᑎᓐᓂᐊᓕᕐᐰᑦ ᑰᖕᒧᑦ ᐃᒪᕐᔪᐊᕐᒧᑦ, ᓲᖑᔪᕐᔪᐊᒧᑦ ᐊᖏᔪᕐᔪᐊᒧᓪᓗ, ᑕᕝᕙ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐱᓐᓇᕐᓇᕐᓂᕐᔪᐊᖓᓄᓪᓗ; ᑰᖕᒧᑦ ᖄᒥᑕᐅᔪᑎᑐᑦ ᕾᕈᓱᓕᒫᖏᑦ ᓱᓪᓗᓕᒫᖏᓪᓗ ᑰᒐᓛᓕᒫᖏᓪᓗ ᑕᑕᑕᐅᔪᒫᕐᐳᖅ ᐅᓕᒃᑕᐅᓗᑎᒃ;

⁸ ᔫᑕᓗ ᑎᑭᑕᐅᔪᒫᕆᕗᖅ, ᖄᒥᑕᐅᓗᓂ ᐅᓗᑦᔭᐅᔪᒫᕐᐳᖅ ᐊᖅᑯᓵᕐᑕᐅᓗᓂ, ᐃᓄᐃᑦ ᖁᖓᓯᖏᓐᓄᑦ ᑎᑭᓪᓗᓂ ᐊᒡᓛᑦ; ᐃᓴᕉᖕᓂᓗ ᐃᓯᕕᓪᓗᒋᒃ ᓄᓇᖁᑏᑦ ᑕᒪᕐᒥᒃ ᐅᓕᒍᒫᕐᐹ, ᐆ ᐃᒫᓐᔪᐃᓕ.”

⁹ ᐃᓅᔪᓯ ᓴᔪᓕᕆᑦᓯ, ᓯᖁᒥᓪᓗᓯᓗ, ᑐᓴᓕᕆᑦᓯ ᑕᒪᑦᓯ, ᐅᖓᓯᒃᑐᒥ ᓄᓇᖃᕐᑐᓯ; ᐸᕐᓇᓕᕆᑦᓯ ᓯᖁᒥᓪᓗᓯᓗ; ᐸᕐᓇᓕᕆᑦᓯ ᓯᖁᒥᓪᓗᓯᓗ.

¹⁰ ᐃᓕᑦᓯᓐᓄᑦ ᐅᖃᖃᑎᒌᓕᕆᑦᓯ, ᑲᑎᒪᑦᔪᑎᓯᓕ ᑲᔪᓯᓂᐊᓐᖏᓚᖅ; ᐅᖃᐅᓯᕐᒥᒃ ᐅᖃᕋᓗᐊᕈᑦᓯ, ᓱᓕᓂᐊᓐᖏᓚᖅ, ᒎᑎᐅᑉ ᐃᓚᒋᖕᒪᑎᒍᑦ.

ᐊᑕᓂᐅᑉ ᐱᔪᖃᓛᕐᑐᒥᒃ ᐅᖃᕐᑎᒥᓂᒃ ᐅᓗᕆᐊᓱᖁᔨᓂᖓ

¹¹ ᐊᑕᓂᐅᑉ ᐅᖃᐅᑎᕚᖓ, ᐱᔪᓐᓇᕐᓂᕐᒥᓄᑦ ᓴᓐᖏᔪᕐᔪᐊᒧᑦ ᓇᔪᕐᓗᖓ, ᒪᓕᖁᓇᖓ ᐃᓄᐃᑦ ᑖᒃᑯᐊ ᐊᑐᕐᑕᖏᓐᓂᒃ, ᐅᖃᕐᓗᓂ:

¹² “ᐃᓱᒪᓕᐅᖃᑎᒌᖕᓂᐅᓂᕋᕐᓂᐊᕐᓇᒍ ᐃᓄᐃᑦ ᑍᔭᖓᑦ ᐃᓱᒪᓕᐅᖃᑎᒌᖕᓂᕐᒥᒃ, ᓯᕘᕋᒋᔭᖏᓪᓗ ᓯᕘᕋᒋᓂᐊᕐᓇᒋᑦ, ᐃᓱᒫᓗᒍᑎᖃᕐᓂᐊᕐᓇᒡᓘᓐᓃᑦ.

¹³ ᕿᓚᖕᒥᐅᒐᓴᒡᔪᐃᓪᓕ ᐊᑕᓂᖓᑦ, ᑖᑦᓱᒪ ᐃᑦᔪᕐᓁᑦᑑᓂᖓ ᐃᒃᐱᒋᑦᓯᐊᕋᒃᓴᕆᕙᑦ; ᑖᓐᓇ ᓯᕘᕋᒋᔭᒃᓴᕆᕙᑦ, ᑖᓐᓇᓗ ᑭᓯᒥ ᐃᓕᕋᒋᔭᒃᓴᕆᕙᑦ.

¹⁴ ᑖᓐᓇ ᐃᑦᔪᕐᓁᑦᑐᕐᔪᐊᖑᖕᒪᑦ, ᐅᔭᕋᐅᓪᓗᓂᓗ ᐊᒡᕕᐊᕈᑕᕆᔭᐅᔪᖅ, ᕾᕐᑑᕗᖅ ᐹᓪᓚᒡᕕᒃᓴᖅ ᑕᒪᖏᖕᓄᑦ ᐃᓴᕆᐊᓕᒃᑯᑦ ᑭᖑᕚᖏᓐᓄᑦ ᒪᕐᕈᐃᓕᖅᑲᖓᔪᓄᑦ, ᒥᑭᒋᐊᖑᕗᖅ ᓂᒐᐅᓪᓗᓂᓗ ᔨᕉᓴᓕᒥ ᓄᓇᖃᕐᑐᓄᑦ.

¹⁵ ᐅᓄᕐᑐᓪᓗ ᑖᒃᑯᓇᓃᑦᑐᑦ ᐹᓪᓚᒍᒫᕐᐳᑦ; ᐅᕐᕈᓗᑎᒃ ᓯᖁᒥᓪᓗᑎᒡᓗ, ᓂᒐᕐᑎᑕᐅᓗᑎᒃ ᐊᐅᓪᓚᕈᑦᔭᐅᓗᑎᒡᓗ.”

ᑐᖁᖓᔪᓂᒃ ᐊᐱᕐᓱᕋᓱᐊᕐᓂᐅᑉ ᐅᓗᕆᐊᓇᕐᓂᖓ

¹⁶ ᐱᓇᓱᐊᕐᕕᐅᓂᕐᓂᒃ ᐅᓂᒃᑳᕐᓂᖅ ᕿᓚᒃᓱᕐᓯᐅᒃ, ᐱᖁᔧᓪᓗ ᓇᓗᓁᒃᑯᓯᕐᓗᒋᑦ ᓇᕿᑦᔪᑎᒥᒃ ᐃᓕᓐᓂᐊᕐᑎᒪ ᐊᑯᕐᖓᓐᓂ.

¹⁷ ᐅᕙᖓᓕ ᐊᑕᓂᕐᒥᒃ ᐅᑕᖅᑭᓂᐊᕐᐳᖓ, ᑖᑦᓱᒪ ᑮᓇᓂ ᐃᔨᕐᓯᒪᖕᒪᒍ ᔧᑰᑉ ᑭᖑᕚᖏᓐᓄᑦ; ᓂᕆᐅᒡᕕᒋᓂᐊᕐᐸᕋᓗ.

¹⁸ ᑕᑯᒋᑦ, ᐅᕙᖓ ᓱᕈᓯᕐᓂᒃ ᐃᓚᖃᕐᐳᖓ ᐊᑕᓂᐅᑉ ᑐᓂᓚᐅᕐᑕᖏᓐᓂᒃ ᐅᕙᓐᓄᑦ! ᓇᓗᓁᒃᑯᑕᐅᕗᒍᑦ ᑲᒪᓇᕐᑐᓕᓂᐅᓪᓗᑕᓗ ᐃᓴᕆᐊᓕᒥ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓐᓂᑦ, ᓮᐅᓂᒥ ᖃᖅᑲᒥ ᐃᓂᖃᕐᑐᒥᑦ.

¹⁹ ᐅᖃᐅᑦᔭᐅᒍᕕᓪᓗ, “ᐊᐱᕐᓱᓚᐅᕆᑦ ᓯᕗᓂᒃᓴᒥᒃ ᓇᓚᐅᑦᑍᓲᓂᒃ ᑐᖁᖓᔪᓂᒡᓗ ᐅᖄᑎᑦᑎᓲᓂᒃ, ᖁᐸᓄᐊᑎᑐᑦ ᓂᑦᔭᒃᐸᒃᑐᑦ, ᓂᐱᑭᓗᐊᒧᓪᓗ ᑐᑭᓯᔭᒃᓴᐅᕙᖏᑦᑐᑦ, ᐃᓄᐃᑦ ᒎᑎᒥᖕᓂᒃ ᐊᐱᕐᓱᕆᐊᖃᓐᖏᓛᑦ? ᑐᖁᖓᔪᓂᒃ ᐊᐱᕐᓱᕆᐊᖃᕐᐹᑦ ᐃᓅᔪᑦ ᐱᑦᔪᑎᒋᓗᒋᑦ?

²⁰ “ᐱᖁᔭᓄᑦ ᐃᓕᓐᓂᐊᕐᑎᑦᓯᓂᕐᓄᓪᓗ! ᑕᒪᒃᑯᓂᖓ ᐅᖃᐅᓯᕐᓂᒃ ᐅᖃᓪᓚᖏᒃᑯᑎᒃ, ᑕᕝᕙ ᑍᒤᒃᑲᔭᕐᐳᑦ ᖃᐅᒪᓂᕐᒥᒃ ᐱᑕᖃᖏᓐᓇᒥᒃ.”

ᐃᓱᐊᖏᑦᑐᕐᓯᐅᕐᓂᖅ ᓇᓪᓕᐅᓯᒪᑎᓪᓗᒍ

²¹ ᓄᓇᒥ ᐃᓐᖏᕐᕋᔪᒫᕐᐳᑦ ᐅᑯᒤᒃᓴᕐᓗᑎᒃ, ᑳᒡᓗᑎᒡᓗ; ᑳᖕᓂᕐᒧᓪᓗ ᓂᓐᖓᐅᒪᓗᑎᒃ ᐅᖃᕐᓂᕐᓘᑦᔨᔪᒫᕐᐳᑦ ᐊᖓᔪᖅᑳᕐᔪᐊᕐᒥᖕᓂᒃ ᒎᑎᒥᖕᓂᒡᓗ, ᖁᒻᒧᓪᓗ ᑕᑯᓴᕐᓗᑎᒃ.

²² ᑭᖑᓂᖓᒍᑦ ᐊᒻᒧᑦ ᑕᑯᓴᕈᒫᕐᐳᑦ ᓄᓇᒧᑦ, ᑕᑯᓗᑎᒡᓗ ᐅᖁᒤᑦᑐᕐᔪᐊᓂᒃ ᑖᕐᑐᕐᔪᐊᒥᒡᓗ, ᐃᓱᒪᔮᕐᓇᕐᑐᒧᑦ ᑖᕐᑐᒧᑦ, ᐂᑎᑕᐅᓗᑎᒃ ᑖᕐᑐᕐᔪᐊᒧᑦ.